ନୟାଗଡ: ବୋମା ଫୁଟାଇ ବନ୍ଧୁକ ମୁନରେ ୩ ଲକ୍ଷ ୬୦ ହଜାର ଲୁଟ୍ । ସୂଚନା ଅନୁସାରେ ଆଜି ଭୋରରୁ ୬ ଜଣ ଦୁର୍ବୃତ୍ତ ନାଲି କାରରେ ଆସି ଗଣିଆ କଣ୍ଟିଲୋ ମୁଖ୍ୟ ରାସ୍ତାରେ ଥିବା ମା ଭାନୁମତି ପେଟ୍ରୋଲ ପମ୍ପରେ ବୋମାମାଡ଼ କରିବା ସହ ମ୍ୟାନେଜରଙ୍କ ମୁଣ୍ଡରେ ବନ୍ଧୁକ ଲଗାଇ ୩ ଲକ୍ଷ ୫୦ହଜାର ଟଙ୍କା ନେଇ ଚମ୍ପଟ ମାରିଛନ୍ତି ଦୁର୍ବୃତ୍ତ ।
ଦୁର୍ବୃତ୍ତ ଟଙ୍କା ଛଡ଼ାଇ ନେଇ ପଳାଉଥିବା ବେଳେ ବିରୋଧ କରିଥିଲେ ପେଟ୍ରୋଲ ପମ୍ପ କର୍ମଚାରୀ । ୩ ଜଣଙ୍କୁ ଭୁଜାଲିରେ ଆକ୍ରମଣ କରିଥିଲେ । ୩ ଜଣ ଆହତ ହୋଇଥିବା ବେଳେ ଜଣେ ଗୁରୁତର ମେଡିକାଲରେ ଭର୍ତ୍ତି ହୋଇଛନ୍ତି । ଘଟଣାସ୍ଥଳରେ ଖଣ୍ଡପଡା ପୋଲିସ ପହଞ୍ଚି ତଦନ୍ତ ଜାରି ରଖିଛି ।
ଭୁବନେଶ୍ବର: ଆଉ ନାହାନ୍ତି ଅବସର ବେଉରିଆ । ପୂର୍ବତନ ରାଷ୍ଟ୍ରଦୂତ ତଥା ବିଶିଷ୍ଟ କୂଟନୀତିଜ୍ଞ ଅବସର ବେଉରିଆଙ୍କ ପରଲୋକ ହୋଇଛି । ହୃଦଘାତରେ ୮୧ ବର୍ଷ ବୟସରେ ତାଙ୍କର ଦେହାନ୍ତ ହୋଇଛି । ବିଳମ୍ବିତ ରାତିରେ ଛାତିରେ ଯନ୍ତ୍ରଣା ହେବାରୁ ଘରୋଇ ମେଡିକାଲରେ ଭର୍ତ୍ତି ହୋଇଥିଲେ । ଚିକିତ୍ସାଧିନ ଅବସ୍ଥାରେ ତାଙ୍କର ମୃତ୍ୟୁ ହୋଇଛି ।
ଓଡିଶାର ଗର୍ବ ଓ ଗୌରବ ବେଉରିଆ ଜଣେ ଭଦ୍ର ନମ୍ର ଓ ଅମାୟିକ ବ୍ୟକ୍ତିତ୍ୱ ଭାବରେ ବେଶ ଲୋକପ୍ରିୟ ଥିଲେ। ଅବସର ଗ୍ରହଣ କରିବା ପରେ ମଧ୍ଯ ଓଡିଆ ପୁଅ ଭାବରେ ଓଡ଼ିଶା ମାଟିର ବିଭିନ୍ନ ଉନ୍ନତିମୂଳକ ସାମାଜିକ କାର୍ଯ୍ୟରେ ସେ ପ୍ରତ୍ୟକ୍ଷ ଭାବରେ ଜଡ଼ିତ ରହୁଥିଲେ। ତାଙ୍କର ଅକୁଣ୍ଠିତ ମାର୍ଗଦର୍ଶନ ଆମ ପାଇଁ ପ୍ରେରଣାର ଉତ୍ସ ଥିଲା। ଏବେ ତାଙ୍କ ବିୟୋଗ ସମଗ୍ର ରାଜ୍ୟ ପାଇଁ ଏକ ଅପୂରଣୀୟ କ୍ଷତି।
ନୂଆଦିଲ୍ଲୀ: ଜହ୍ଲାଦ ପ୍ରେମିକ ଅଫତାବ ହାତରେ କାହିଁକି ଗଲା ଜୀବନ । କ’ଣ ଦୋଷ ଥିଲା ପ୍ରେମିକା ଶ୍ରଦ୍ଧା ଓ୍ବାକରଙ୍କର ? ହତ୍ୟା ଦିନ ଅର୍ଥାତ ମେ ମାସ ୧୮ ତାରିଖରେ କଣ ଘଟିଥିଲା ? ପୋଲିସ ହେପାଜତରେ ଥାଇ ଗୋଟି ଗୋଟି ଗୁମର ଖୋଲୁଛି ଅଫତାବ । ହତ୍ୟା ଘଟଣାର ଦୀର୍ଘ ଦିନ ପୂର୍ବରୁ ସେମାନଙ୍କ ମଧ୍ୟରେ ଅନେକ ଥର ଝଗଡ଼ା ହୋଇଥିଲା । ବିଶେଷ କରି ସେ ରହୁଥିବା ଘରର ଭଡ଼ା କିଏ ଦେବ ତାକୁ ନେଇ ସେମାନଙ୍କ ମଧ୍ୟରେ ଯୁକ୍ତିତର୍କ ହେଉଥିଲା । ଏହାକୁ ନେଇ ଘର ମାଲିକ ମଧ୍ୟ ପୂର୍ବରୁ ଖୁଲାସା କରିଛନ୍ତି ।
ଘଟଣା ଦିନ ଶ୍ରଦ୍ଧା କିଛି ଘର କରଣା ସାମଗ୍ରୀ କିଣି ଥିବା ବେଳେ ତାକୁ ନେଇ ମଧ୍ୟ ଝଗଡ଼ା ହୋଇଥିଲା । ଅଯଥାରେ କାହିଁକି ଏତେ ଖର୍ଚ୍ଚ ବୋଲି ପ୍ରଶ୍ନ କରିଥିଲା ଅଫତାବ । ଯାହାକୁ ନେଇ ଶ୍ରଦ୍ଧା ରାଗିବା ସହ ଦିନସାରା ଅଫତାବ କୁଆଡେ ଯାଇଥିଲା, କାହାସହ ବୁଲୁଥିଲା ତାର ଟିଖିନିଖି ଖବର ମାଗିଥିଲେ । ଏଥିରେ ଉତକ୍ଷିପ୍ତ ହୋଇ ମାରଧର କରିଥିଲା ଅଫତାବ । ଜୀବନରୁ ମାରିଦେବା ପାଇଁ ଯେମିତି ନିଜକୁ ନିଜେ ପ୍ରତିଜ୍ଞା କରିବସିଥିଲା ଅଫତାବ । ପ୍ରବଳ ମାଡ଼ ମାରିବା ସହ ମୁଣ୍ଡରେ ଆଘାତ ଯୋଗୁଁ ଶ୍ରଦ୍ଧାର ସେହି ଘରେ ହିଁ ମୃତ୍ୟୁ ହୋଇଥିଲା ।
ଘଟଣା ପରେ ଶବକୁ ଦେଖି କିଛି ସମୟ ପାଇଁ ଡରି ଯାଇଥିଲା ଅଫତାବ । ଶବ ସହ କଣ କରିବ ତାକୁ ନେଇ ରାତି ସାରା ଚିନ୍ତା କରିଥିଲା । ଶେଷରେ ତା ପରଦିନ ସକାଳୁ ଏକ ଛୁରୀ ଆଣି ମୃତ ଦେହକୁ ଖଣ୍ଡ ଖଣ୍ଡ କାଟିବା ଆରମ୍ଭ କରିଥିଲା । ତାପର ଦିନ ପୁଣି ବଜାରକୁ ଯାଇ ଏକ ଫ୍ରିଜ୍ କିଣିଥିଲା ଅଫତାବ । ୩୫ ଖଣ୍ଡ କରି କାଟିଥିବା ମୃତଦେହକୁ ସେ ଫ୍ରିଜ୍ରେ ରଖିଥିଲା । ପରେ ଘର ଚଟାଣରେ ଲାଗିଥିବା ରକ୍ତ ଦାଗକୁ ପୋଛିବା ପାଇଁ ଏସିଡର ମଧ୍ୟ ବ୍ୟବହାର କରିଥିଲା ।
ମୃତ ଦେହର ଗନ୍ଧ ଯେମିତି ପଡୋଶୀ ଲୋକ ବାରିନପାରନ୍ତି ସେଥିପାଇଁ ଅଫତାବ ଘର ଭିତରେ ଅତ୍ୟଧିକ ମାତ୍ରାରେ ଧୂପ ବ୍ୟବହାର କରିଥିଲା । ଅଫତାବକୁ ପୋଲିସ ଜେରା କରିବା ପରେ ହତ୍ୟା ଘଟଣାର ସେ ଏଭଳି କିଛି ଗୁମର ଖୋଲିଛି ।
କଟକ: ଐତିହାସିକ ବାଲିଯାତ୍ରାର ଆଜି ଶେଷ ରଜନୀ । ଗତ ୮ ତାରିଖରୁ ଆରମ୍ଭ ହୋଇଥିବା ବାଲି ଯାତ୍ରା ଆଜି ଶେଷ ହେବ । ବାଲିଯାତ୍ରା ଗତକାଲି ଶେଷ ହେବାର ଥିଲା । କିନ୍ତୁ ପର୍ଯ୍ୟଟକଙ୍କ ଅନୁରୋଧ ପରେ ଜିଲ୍ଲା ପ୍ରଶାସନ ଏହାକୁ ଅଧିକ ଗୋଟିଏ ଦିନ ବଢାଇଥିଲେ । ତେବେ ପ୍ରତିଦିନ ଭଳି ଆଜି ମଧ୍ୟ ବାଲିଯାତ୍ରାରେ ଜମିବ ଦର୍ଶକଙ୍କ ଭିଡ଼ । ଲୋକାରଣ୍ୟ ହେବ କଟକ ଉପର ଓ ତଳ ବାଲିଯାତ୍ରା ପଡ଼ିଆ ।
ପ୍ରତିଦିନ ପଡିଆରେ ପଡିଥିବା ବିଭିନ୍ନ ଖାଦ୍ୟ ପାନୀୟ ଷ୍ଟଲରେ ସୁସ୍ବାଦୁ ଖାଦ୍ୟର ମଜାନେଉଛନ୍ତି ଲୋକ । କିଣାକିଣି ସାଙ୍ଗକୁ ସେଲଫି ମଜା ନେଉଛନ୍ତି ଦର୍ଶକ । ଟେରାକୋଟା ସାମଗ୍ରୀ ଓ ଘର କରଣା ଜିନିଷ କିଣିବାକୁ ଲୋକଙ୍କ ଆଗ୍ରହ ବଢିଥିବା ଦେଖବାକୁ ମିଳିଛି । ଓରମାସ ଷ୍ଟଲରେ ଡାଲିଆ,ଜିନିଆ, ଟୁଲିପ୍ ଠାରୁ ଆରମ୍ଭ କରି ବିଭିନ୍ନ କିସମର ଫୁଲର ପସରା ଦେଖବାକୁ ମିଳିଛି । ଏଗୁଡିକ ସତସତିକା ଫୁଲ ଭଳି ଦେଖାଯାଉଥିଲେ ବି ଏସବୁ ବିଭିନ୍ନ ଜଙ୍ଗଲଜାତୀୟ ପ୍ରାକୃତିକ ଜିନିଷ ରେ ତିଆରି ହୋଇଛି । ଏହି ଫୁଲ ସବୁ ଆକୃଷ୍ଚ କରୁଛି ବାଲିଯାତ୍ରା ମେଳାର ଦର୍ଶକଙ୍କୁ ।
ସେପଟେ ପ୍ରତିଦିନ ସଂଧ୍ୟାରେ ଆୟୋଜିତ ସାଂସ୍କୃତିକ ଓ ରଙ୍ଗାରଙ୍ଗ କାର୍ଯ୍ୟକ୍ରମରେ ଦୁଲୁକୁଛି ବାଲିଯାତ୍ରା ପଡିଆ । ବଲିଉଡ ଓ ଓଲିଉଡ୍ ଗୀତରେ ଝୁମୁଛନ୍ତି ଦର୍ଶକ ।
ଭୁବନେଶ୍ବର: କମୁଛି ତାପମାତ୍ରା, ବଢୁଛି ଶୀତ । ଉତ୍ତର ପଶ୍ଚିମ ଦିଗରୁ ରାଜ୍ୟକୁ ଶୁଷ୍କ ଓ ଥଣ୍ଡା ପବନ ପ୍ରବେଶ କରୁଥିବାରୁ ଥଣ୍ଡା ଅନୁଭୂତ ହେଉଛି । ଆସନ୍ତା ୨୪ ଘଣ୍ଟାରେ ଦକ୍ଷିଣ ଆଭ୍ୟନ୍ତରୀଣ ଓଡ଼ିଶାରେ ଘନ କୁହୁଡି ହେବା ନେଇ ପୂର୍ବାନୁମାନ କରିଛି ପାଣିପାଗ ବିଜ୍ଞାନ କେନ୍ଦ୍ର । ଗତ ୨୪ ଘଣ୍ଟା ମଧ୍ୟରେ ୧୪ ଡିଗ୍ରୀ ତଳେ ରହିଥିଲା ୯ ସହରର ତାପମାତ୍ରା ।
ଶିମିଳିଗୁଡାରେ ସର୍ବନିମ୍ନ ତାପମାତ୍ରା ୬.୪ ଡିଗ୍ରୀ ରେକର୍ଡ କରାଯାଇଛି । ସେହିପରି ଜି.ଉଦୟଗିରିରେ ୮ଡିଗ୍ରୀ, ଫୁଲବାଣୀ ୧୦ଡିଗ୍ରୀ, କୋରାପୁଟ ୧୦ଡିଗ୍ରୀ, ଦାରିଙ୍ଗବାଡି ୧୦.୫ ଡିଗ୍ରୀ, ଭବାନୀପାଟଣାରେ ୧୨ ଡିଗ୍ରୀ, ବୌଦ୍ଧରେ ୧୨ଡିଗ୍ରୀ, ଝାରସୁଗୁଡାରେ ୧୩.୨ଡିଗ୍ରୀ, କେନ୍ଦୁଝରରେ ୧୩.୪ଡିଗ୍ରୀ ତାପମାତ୍ରା ରେକର୍ଡ ହୋଇଛି । ସେପଟେ ଦକ୍ଷିଣ ଆଣ୍ଡାମାନ ସାଗର ନିକଟରେ ଥିବା ଘୂର୍ଣ୍ଣିବଳୟ ଘନେଇବାରେ ଲାଗୁଛି ।
ଆସନ୍ତା ୨୪ ଘଣ୍ଟାରେ ଏହା ଲଘୁଚାପ କ୍ଷେତ୍ରର ରୂପ ନେବ । କ୍ରମେ ପଶ୍ଚିମ ଉତ୍ତର ପଶ୍ଚିମ ଦିଗକୁ ଗତିକରି ପରବର୍ତ୍ତୀ ୪୮ ଘଣ୍ଟାରେ ଅବପାତରେ ପରିଣତ ହେବ ।
ରାଉରକେଲା: ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର, ଓ କ୍ରୀଡା ସଚିବ ଆର ଭିନିଲ କ୍ରୀଷ୍ଣା ଆଜି ରାଉରକେଲା ଗସ୍ତରେ ଯିବେ । ବିର୍ସା ମୁଣ୍ଡା ଆନ୍ତର୍ଜାତୀୟ ହକି ଷ୍ଟାଡିୟମ ନିର୍ମାଣ କାର୍ଯ୍ୟ ଅନୁଧ୍ୟାନ କରିଵା ସହ ସମୀକ୍ଷା କରିଵାର କାର୍ଯ୍ୟକ୍ରମ ରହିଛି । ସକାଳ ୯ ଟା ୪୫ରେ ରାଉରକେଲା ବିମାନବନ୍ଦର ଠାରେ ପହଞ୍ଚିଵା ପରେ ସକାଳ ୯ ଟା ୫୫ରେ ବିର୍ସା ମୁଣ୍ଡା ଆନ୍ତର୍ଜାତୀୟ ହକି ଷ୍ଟାଡିୟମ ନିର୍ମାଣ କାର୍ଯ୍ୟ ଅନୁଧ୍ୟାନ କରିବା ସହ ସମୀକ୍ଷା କରିବେ ।
ହକି ବିଶ୍ଵ କପ ପୁର୍ବରୁ ରାଉରକେଲା ସହରରେ ଚାଲିଥିବା ବିଭିନ୍ନ ଉନ୍ନତିମୂଳକ କାର୍ଯ୍ୟ ଅନୁଧ୍ୟାନ କରିବେ । ବିଭାଗୀୟ ଅଧିକାରୀ ଓ ପ୍ରଶାସନିକ ଅଧିକାରୀଙ୍କ ସହ ସମୀକ୍ଷା ବୈଠକ କରିବାର କାର୍ଯ୍ୟକ୍ରମ ରହିଛି । ସକାଳ ୧୧ ଟା ୧୫ରେ ମୁଖ୍ୟ ଶାସନ ସଚିବ ରାଉରକେଲା ବିମାନ ବନ୍ଦର ଠାରେ ସାମ୍ବାଦିକ ସମ୍ମିଳନୀ କରିବାର କାର୍ଯ୍ୟକ୍ରମ ରହିଛି । ୧୨ ଟା ୧୫ରେ ଭୁବନେଶ୍ୱର ଫେରିଯିଵାର କାର୍ଯ୍ୟକ୍ରମ ରହିଛି ।
ବରଗଡ: କମ୍ପିବ ପଦମପୁର । ଉଠିବ ପଡିବ ରାସ୍ତାଘାଟ । ତିନି ପ୍ରମୁଖ ଦଳର ପ୍ରାର୍ଥୀ ଆଜି ଦାଖଲ କରିବେ ନାମାଙ୍କନ । ଆଜି ଉପନିର୍ବାଚନ ପାଇଁ ପ୍ରାର୍ଥୀପତ୍ର ଦାଖଲର ଶେଷ ଦିନ ରହିଛି । ବିଜେଡିରୁ ପ୍ରାର୍ଥୀ ହୋଇଛନ୍ତି ଦିବଂଗତ ବିଧାୟକ ବିଜୟ ରଞ୍ଜନ ସିଂ ବରିହାଙ୍କ ଝିଅ ବର୍ଷା ସିଂ ବରିହା । ୨୦୧୯ରେ ପଦମପୁରରେ ବିଜେପି ପ୍ରାର୍ଥୀ ହୋଇ ହାରିଥିବା ପ୍ରଦୀପ ପୁରୋହିତକୁ ଦଳ ପୁଣି ଥରେ ଟିକେଟ୍ ଦେଇଛି ।
ସେହିପରି କଂଗ୍ରେସ ପୂର୍ବତନ ବିଧାୟକ ସତ୍ୟଭୂଷଣ ସାହୁଙ୍କୁ ପ୍ରାର୍ଥୀ କରିଛି । ତିନି ପ୍ରାର୍ଥୀ ଆଜି ଶେଷ ଦିନରେ ନିଜ ନାମାଙ୍କର ଭରିବେ । ସେପଟେ ଗତକାଲି ପଦମପୁରରେ ବିଜେଡିର ପାୱାର ଶୋ କରିଛି । ବିଭିନ୍ନ ଜୋନରେ ବିଜେଡି ବିରାଟ ସଭାକରି ଭୋଟରଙ୍କୁ ଏକଜୁଟ କରୁଛି । ବାପାଙ୍କ ଗଡ଼ ଦଖଲ ଲାଗି ଭୋଟରଙ୍କ ସାମ୍ନାକୁ ଆସିଛନ୍ତି ବର୍ଷା ।
ବାପାଙ୍କୁ ମନେ ପକାଇ ନିଜେ ଲୁହରେ ଭିଜିବା ସହ ଭୋଟରଙ୍କୁ ବି ଭାବପ୍ରବଣ କରିଥିଲେ । କାର୍ଯ୍ୟକ୍ରମରେ ଦଳୀୟ ବହୁ ହେବିଓ୍ବେଟ ସାମିଲ ହୋଇଥିଲେ । ସେପଟେ ବିଜେପି ଓ କଂଗ୍ରେସ ମଧ୍ୟ ଜନ ସମର୍ଥନ ଜୁଟାଇବାକୁ ଜୋରଦାର ପୟାସ ଆରମ୍ଭ କରିଛି ।
ଭୁବନେଶ୍ବର: ଏଣିକି ସ୍କୁଲରେ ବ୍ୟାପକ ଭାବେ ଦିଆଯିବ ଧନ୍ଦାମୂଳକ ଶିକ୍ଷା । ଛାତ୍ରଛାତ୍ରୀଙ୍କ ଦକ୍ଷତା ବିକାଶ ପାଇଁ ଅଳ୍ପ କିଛି ସ୍କୁଲରେ ଏହି ଶିକ୍ଷା ଦଆଯାଉଥିଲା । ଏହାର ସଫଳତା ପାଇଁ ୨୩୦ଟି ସ୍କୁଲରେ ଧନ୍ଦାମୂଳକ ଶିକ୍ଷା ପ୍ରଦାନ କରିବାକୁ ନିଷ୍ପତ୍ତି ନେଇଛନ୍ତି ରାଜ୍ୟ ସରକାର । ସ୍କୁଲ ପାଠ ସରୁ ସରୁ ରୋଜଗାରକ୍ଷମ ଶିକ୍ଷା ସଂପର୍କରେ ଛାତ୍ରଛାତ୍ରୀଙ୍କୁ ଅବଗତ କରିବାକୁ ଧନ୍ଦାମୂଳକ ଶିକ୍ଷାକୁ ଦିଆଯାଉଛି ପ୍ରାଧାନ୍ୟ ।
ସ୍କୁଲରେ ଧନ୍ଦାମୂଳକ ଶିକ୍ଷାର ବଢୁଛି ଗୁରୁତ୍ବ । ୨୩୦ ସ୍କୁଲର ୧୭ଟି ବିଭାଗରେ ବ୍ୟାପକ ହେବ ଧନ୍ଦାମୂଳକ ଶିକ୍ଷା । ସମଗ୍ର ଶିକ୍ଷା ଯୋଜନା ଅଧୀନରେ ମାଧ୍ୟମିକ ଓ ଉଚ୍ଚମାଧ୍ୟମିକ ବିଦ୍ୟାଳୟରେ ନବମରୁ ଦ୍ବାଦଶ ଶ୍ରେଣୀ ଯାଏଁ ଛାତ୍ରଛାତ୍ରୀଙ୍କୁ ଧନ୍ଦାମୂଳକ ଶିକ୍ଷା ପଢାଯିବ । ଏହାର ପରିଚାଳନା ଦାୟିତ୍ବ ନେଇଛି ଓସେପା । ସେ ସ୍କୁଲଗୁଡ଼ିକୁ ଚୟନ କରି ଆଉଟସୋର୍ସିଂ ସଂସ୍ଥା ଦ୍ବାରା ପିଲାମାନଙ୍କୁ ପ୍ରଶିକ୍ଷିତ କରାଇବେ । ଆଇଟି ଆଣ୍ଡ ଆଇଟିଇଏସ୍, ପାଓ୍ବାର, ଇଲେକ୍ଟ୍ରୋନିକ୍ସ ଆଣ୍ଡ ହାର୍ଡଓ୍ବେର, ଟୁରିଜିମ ଆଣ୍ଡ ହସ୍ପିଟାଲିଟି, କୃଷି, ପ୍ଲମବିଂ, ରିଟେଲ, ଅଟୋମୋଟିଭ୍, ଆପାରେଲସ୍, ହୋମ୍ ଫର୍ଣ୍ଣିସିଂ ପରି କ୍ଷେତ୍ରରେ ପିଲାମାନେ ପାଠ ପଢିବେ । ସେମାନେ ଡୋମେଷ୍ଟିକ୍ ଡାଟା ଏଣ୍ଟ୍ରି ଅପରେଟର, କନଜ୍ୟୁମର ଏନର୍ଜି ମିଟର ଟେକନିସିଆନ୍, ଫିଲଡ ଟେକନିସିଆନ୍, ହୋମ ଆପଲାଏନସେସ୍, ଫିଲଡ୍ ଟେକନିସିଆନ୍ ଓ୍ବାରମ୍ୟାନ କଣ୍ଟ୍ରୋଲ, ଫୁଡ ବେଭରେଜ ସର୍ଭିସ୍ ଟ୍ରେନିଂ, ମାଇକ୍ରୋ ଇରିଗେସନ୍ ଟେକନିସିଆନ୍, ପ୍ଲମବର, ରିଟେଲ ଷ୍ଟୋର ଅପରେସନ୍ ଆସିସଟାଣ୍ଟ, ଶିଲେଇ ମେସିନ୍ ଅପରେଟର୍ ଓ ଚାରି ଚିକିଆ ସର୍ଭିସ୍ ଆସିସଟାଣ୍ଟ ପରି କର୍ମକ୍ଷେତ୍ରରେ କାମ କରି ପାରିବେ ।
ଧନ୍ଦାମୂଳକ ଶିକ୍ଷା ପାଇଁ ଅନୁଗୁଳ ଜିଲ୍ଲାର ୬ଟି, ବାଲେଶ୍ବରର ୮ଟି, ବରଗଡ଼ର ୮ଟି, ଭଦ୍ରକର ୬ଟି, ବଲାଙ୍ଗୀରର ୭ଟି, ବୌଦ୍ଧର ୩ଟି, କଟକର ୪ଟି, ଢେଙ୍କାନାଳର ୧୦ଟି, ଗଞ୍ଜାମର ୧୯ଟି, ମୟୂରଭଞ୍ଜର ୧୯ଟି, ସମ୍ବଲପୁରର ୪୯ଟି ଓ ସବୁର୍ଣ୍ଣପୁରର ୧୦ଟି ସ୍କୁଲ ଚୟନ କରାଯାଇଛି । ବଲାଙ୍ଗୀର, ଗଞ୍ଜାମ, କଳାହାଣ୍ଡି ଆଦି ଜିଲ୍ଲାରେ ଦାଦନ ସମସ୍ୟା ଉପରେ ରୋକ ଆଣିବାକୁ ଏହି ନିଆରା ପ୍ରୟାସ କରୁଛନ୍ତି ରାଜ୍ୟ ସରକାର । ତେବେ ଏହାକୁ ତୃତୀୟ ଭାଷା ସହ ପଢାଇବାକୁ ମତ ପ୍ରକାଶ ପାଇଛି ।
ଯୋଗ ଉପଯୋଗ ଶିକ୍ଷାଦାନକୁ ରାଜ୍ୟ ସରକାର ଗୁରୁତ୍ବ ଦେଉଛନ୍ତି । ଏଥିରେ ୫ଟି ରୂପାନ୍ତର ଶିକ୍ଷାର ବିକାଶରେ ଗୁରୁତ୍ବପୂର୍ଣ୍ଣ ଭୂମିକା ନେଇଛି । ଏହାକୁ ଆହୁରି କ୍ରୀୟାଶୀଳ କରି ସ୍ବୟଂ ସମ୍ପୂର୍ଣ୍ଣ ଛାତ୍ରଛାତ୍ରୀ ପ୍ରସ୍ତୁତ କରିବାରେ ଲାଗି ପଡ଼ିଛି ବିଦ୍ୟାଳୟ ଓ ଗଣଶିକ୍ଷା ବିଭାଗ ।
ଭୁବନେଶ୍ବର: ବିଜେପିର ଚାଷୀମାରଣ ନୀତି । ଫସଲବୀମା ଅଟକାଇ ଚାଷୀଙ୍କ ସଂସାରକୁ ଦୁର୍ଦ୍ଦିନକୁ ଠେଲିଥିଲେ । ଏବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଘୋଷଣା କରିଥିବା ଇନପୁଟ ସବସିଡିକୁ ବିରୋଧ କରି ସେମାନଙ୍କ କଟା ଘାରେ ଚୂନ ମାରିବାରେ ଲାଗିଛି । ଏହାର ଜବାବ ରାଜ୍ୟର ଚାଷୀ ନିଶ୍ଚିତ ଦେବେ । ଚାଷୀଙ୍କ ପ୍ରତି ଏହି ବୈମାତୃକ ମନୋଭାବ ବିଜେପିକୁ ମହଙ୍ଗା ପଡ଼ିବ । ଆଜି ଏମିତି କିଛି କହି ବିଜେପିକୁ ଟାର୍ଗେଟ କରିଛି ବିଜେଡି । ଏକ ସାମ୍ବାଦିକ ସମ୍ମିଳନୀରେ ଚାଷୀ ବିଜେପିକୁ ଉଚିତ ଜବାବ ଦେବେ ବୋଲି କହିଛନ୍ତି ବିଜେଡି ପ୍ରବକ୍ତା ଗୌତମବୁଦ୍ଧ ଦାସ ।
ସେ କହିଛନ୍ତି, ବିଜେପି ଚାଷୀଙ୍କ ଫସଲ ବୀମା ଦେୟକୁ ଅଟକାଇ ଥିଲେ । ଏବେ ଏଭଳି ସାମ୍ବାଦିକ ସମ୍ମିଳନୀ ମାଧ୍ୟମରେ ଇନପୁଟ ସବସିଡି ରୋକିବାକୁ ଚେଷ୍ଟା କରୁଛି । ଯାହା ଓଡିଶାର ଚାଷୀଙ୍କ ପାଇଁ ମୁଖ୍ୟମନ୍ତ୍ରୀ ଘୋଷଣା କରିଛନ୍ତି । ଓଡିଶାର ଚାଷୀଙ୍କୁ ସହାୟତା ଦେବାକୁ ମୁଖ୍ୟମନ୍ତ୍ରୀଙ୍କ ଇନପୁଟ୍ ସବସିଡି ପ୍ରଦାନ ଭଳି ଏକ ମହତ୍ୱପୂର୍ଣ୍ଣ ନିଷ୍ପତ୍ତି ନେଇଥିବା ବେଳେ ବିଜେପି ଏହାକୁ ପ୍ରଶଂସା କରିବା ପରିବର୍ତ୍ତେ ଏହାକୁ ଚକିତ, ଦୁର୍ଭାଗ୍ୟଜନକ ଓ ଦୁଃଖଦାୟକ ବୋଲି କହିଛି ।’
ବିଜେପି ଗୋଟିଏ ହାତରେ ଫସଲ ବୀମାକୁ ଅଟକାଉ ଥିବାବେଳେ ଅନ୍ୟ ହାତରେ ଇନପୁଟ୍ ସବସିଡି ବନ୍ଦ କରିବାକୁ ଚେଷ୍ଟା କରୁଛନ୍ତି । ଏହା ବିଜେପିର ଚାଷୀ ତଥା ଚାଷ ବିରୋଧୀ ନୀତିକୁ ପଦାରେ ପକାଇ ଦେଇଛି ।
ଓଡିଶାର ଚାଷୀ ବିଶେଷ କରି ପଦମପୁରର ଚାଷୀ ଫସଲ ବୀମାକୁ ନେଇ ବିଜେପି ଉପରେ ଅସନ୍ତୁଷ୍ଟ ଅଛନ୍ତି । ଏମିତି ସ୍ଥିତିରେ ଇନପୁଟ୍ ସବସିଡିକୁ ସମାଲୋଚନା କରୁଥିବା ବିଜେପିକୁ ଚାଷୀ ଭାଇ ଉଚିତ ଜବାବ ଦେବେ ବୋଲି ସେ କହିଛନ୍ତି ।
ପଦମପୁର: ଆସନ୍ତାକାଲି ପଦମପୁର ଉପନିର୍ବାଚନ ପାଇଁ ନାମାଙ୍କନପତ୍ର ଦାଖଲର ଶେଷ ଦିନ । ଏହା ପୂର୍ବରୁ ଆଜି ପଦମପୁରରେ ଶକ୍ତି ପ୍ରଦର୍ଶନ କରିଛି ବିଜେଡି । ଆଉ ଏହି ଶକ୍ତି ପ୍ରଦର୍ଶନ ପ୍ଲାଟ ଫର୍ମରେ ନିଜକୁ ଇଣ୍ଟ୍ରୋଡ୍ୟୁସ କରିଛନ୍ତି ବିଜେଡି ପ୍ରାର୍ଥୀ ବର୍ଷା ସିଂ ବରିହା । ରାଜନୀତି ମୈଦାନରେ ନୂଆ ହେଲେ ବି ଠାଣି କହୁଥିଲା ଅନୁଭୂତିରେ ଭରପୂର ବ୍ୟକ୍ତିତ୍ବ । ପୂରା ପଦମପୁର, ପଶ୍ଚିମ ଓଡ଼ିଶା ସହ ଉପକୂଳ ଓଡ଼ିଶା ଦେଖିଛି ଦିବଂଗତ ବିଧାୟକ ବିଜୟ ରଂଜନ ସିଂ ବରିହାଙ୍କ ସୁପୁତ୍ରୀ ବର୍ଷାଙ୍କ ପଲିଟିକାଲ ଇମେଜ । ମଞ୍ଚ ଉପରୁ ଦଳର ହେଭିୱେଟଙ୍କ ଉପସ୍ଥିତିରେ ବାପାଙ୍କୁ ମନେ ପକାଇ ଲୁହ ଭିଜା ଆଖିରେ ବର୍ଷା ଲୋଡିଥିଲେ ପଦମପୁରର ଆଶୀର୍ବାଦ । ଉପନିର୍ବାଚନରେ ବିଜୟୀ ହେବା ଲାଗି ମାଗିଥିଲେ ବହୁମୂଲ୍ୟ ଭୋଟ ।
ପଦମପୁର ପଲିଟିକ୍ସରେ ବର୍ଷାଙ୍କ ବିଗ ଏଣ୍ଟ୍ରି । ବିଜେଡିର ଶକ୍ତିଶାଳୀ ସ୍ଲୋଗାନ, ହୁଳହୁଳି, ତାଳିମାଡ ଭିତରେ ନିଜକୁ କରିଛନ୍ତି ଇଣ୍ଟୋଡ୍ୟୁସ । ବାବାଙ୍କ ଲିଗାସି ବଜାୟ ରଖିବାକୁ ଦେଇଛନ୍ତି ନିର୍ଭର ପ୍ରତିଶ୍ରୁତି । ଆକାଶଛୁଆଁ ଉତ୍ସାହ ଭିତରେ ଆଜି ପ୍ରଚାର ମୈଦାନକୁ ଓହ୍ଲାଇଛନ୍ତି ଦଳୀୟ ପ୍ରାର୍ଥୀ ବର୍ଷା ସିଂ ବରିହା । କାଲି ନାମାଙ୍କନର ଶେଷ ଦିବସ । ବାପାଙ୍କ ଗଡ଼ ଦଖଲ ଲାଗି ଭୋଟରଙ୍କ ସାମ୍ନାକୁ ଆସିଛନ୍ତି ବର୍ଷା । ବାପାଙ୍କୁ ମନେ ପକାଇ ନିଜେ ଲୁହରେ ଭିଜିବା ସହ ଭୋଟରଙ୍କୁ ବି କରିଛନ୍ତି ଭାବପ୍ରବଣ । ମଞ୍ଚରୁ ଦଳୀୟ ହେଭିୱେଟଙ୍କ ଉପସ୍ଥିତିରେ ଜନତାଙ୍କ ଆଶୀର୍ବାଦ ଲୋଡିଛନ୍ତି । ସଂପର୍କକୁ ଆହୁରି ଆଗକୁ ନେବାକୁ ମଞ୍ଚରୁ ଓହ୍ଲାଇ ଆସି ଭାବର ଆଦାନ ପ୍ରଦାନ କରିଛନ୍ତି । ଗୁରୁଜନଙ୍କୁ ମୁଣ୍ଡିଆ ମାରିଛନ୍ତି । ସାନମାନଙ୍କୁ ସ୍ନେହ ଦେବା ସହ ଯୁବପିଢିଙ୍କ ସହ ସେଲଫି ଉଠାଇଛନ୍ତି । ପାଇକମାଳ ସାଲେପାଲିରେ ଆୟୋଜିତ ବିଜେଡି ସମାବେଶରେ ଆରମ୍ଭରୁ ଶେଷ ଯାଏଁ ବର୍ଷା ଥିଲେ ଆକର୍ଷଣ ।
ବର୍ଷାଙ୍କୁ ସାମ୍ନାକୁ ଆଣିବା ସହ ବିଜେଡି ଆଜି ପଦମପୁର ଦୁଲୁକେଇ ଦେଇଛି । ନିର୍ବାଚନ ମଣ୍ଡଳୀର ବିଭିନ୍ନ ସ୍ଥାନରେ କରିଛି ବିଶାଳ ଜନସମାବେଶ । ବଳ ଗୋଟାଇବା ପାଇଁ କରିଛି ପାୱାର ପ୍ଲେ । ପ୍ରଚାର କରିବାକୁ ଯାଇ କରିଛି ମାରାଥନ ମିଟିଂ । ସତିଭଟାରେ ଆୟୋଜିତ ସମ୍ମିଳନୀରେ ଅନେକ ବିଜେପି ଓ କଂଗ୍ରେସ କର୍ମୀ ବିଜେଡିରେ ଯୋଗ ଦେଇଛନ୍ତି । ଅଂଚଳର ୫ଜଣ ୱାର୍ଡ ମେମ୍ବର ବିଜେପି ଛାଡ଼ି ଶଙ୍ଖ ଫୁଙ୍କିଛନ୍ତି । ବିଜେପିର ଚାଷୀ କାର୍ଡ ଚାଲ ବୁଝିପାରି ବିଜେଡିରେ ଯୋଗ ଦେଇଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବିକାଶଧାରା ପାଇଁ ବିଜେଡିକୁ ପଦମପୁରରେ ବିପୁଳ ଭୋଟ ମିଳିବ ବୋଲି କହିଛନ୍ତି ବିଧାୟକ ଦେବୀ ମିଶ୍ର ।
ପାଇକମାଳ ବ୍ଲକରେ ବିଜେଡିର ଜୋରଦାର୍ ପ୍ରଚାର । ବଡତୁଣ୍ଡା ଗାଁ ଏକ ନମ୍ବର ଜୋନରେ ବିଜେଡି କରିଛି ବିରାଟ କର୍ମୀ ସମାବେଶ । ଦଳର ବରିଷ୍ଠ ମନ୍ତ୍ରୀଙ୍କ ସହ ବହୁ ବିଧାୟକଙ୍କ ଉପସ୍ଥିତିରେ ବିଜେଡି ରାଜ୍ୟ ସରକାରଙ୍କ ବହୁମୁଖୀ ଯୋଜନା ସଂପର୍କରେ ବୁଝାଇଥିଲେ । ସମାବେଶରେ ସ୍ଥାନୀୟ ଅଞ୍ଚଳରୁ ୫ହଜାରରୁ ଅଧିକ ଲୋକ ଯୋଗଦେଇଥିଲେ I ମୁଖ୍ୟମନ୍ତ୍ରୀ ଚାଷୀଙ୍କ ପାଇଁ ଇନପୁଟ ସବସିଡି ଘୋଷଣା କରିବା ପରେ ଚାଷୀ କୂଳରେ ମଧ୍ୟ ଉତ୍ସାହ ଦେଖାଦେଇଛି I
ବର୍ଷାଙ୍କ ଏଣ୍ଟ୍ରିକୁ ସାରା ପଦମପୁର ଉତ୍ସାହର ସହ ଗ୍ରହଣ କରିଥିବା ଦେଖିବାକୁ ମିଳିଛି । ସବୁ ସଭାରେ ଲୋକଙ୍କ ସମାଗମ ଓ ସମର୍ଥନ ଏହା ପ୍ରମାଣିତ କରିଛି ଭରସା ଓ ବିଶ୍ବାସର ନାଁ ବିଜେଡି ।
ଆସନ୍ତାକାଲି ପ୍ରାର୍ଥିପତ୍ର ଦାଖଲର ଶେଷ ଦିନ ଥିଲେ ବି, ଏପର୍ଯ୍ୟନ୍ତ ୩ ଦଳର ପ୍ରାର୍ଥୀ କେହି ବି ନାମାଙ୍କନ ଭରିନାହାନ୍ତି । କିନ୍ତୁ ପ୍ରଚାର ରଣନୀତିରେ ସବୁଠୁ ଆଗରେ ରହିଛି ଶଙ୍ଖ ଦଳ ।
