ଭୁବନେଶ୍ବର: ସାରା ଦିନର ଅପେକ୍ଷା ପରେ ଘରୁ ବାହାରିଲେ ବାବୁସାନ । ଘର ଆଗରେ ଗଣମାଧ୍ୟମ ପ୍ରତିନିଧିଙ୍କୁ ଦେଖି କଥା ହେଲେ । ଘରକୁ ଯାଇ ଖିଆପିଆ କରିବାକୁ ଅନୁରୋଧ କଲେ । ଏହାସହ ପୋଲିସକୁ ବୟାନ ଦେବା ପରେ ଗଣମାଧ୍ୟମକୁ ପ୍ରତିକ୍ରିୟା ଦେବେ ବୋଲି କହିଲେ । ଏହାସହ ପୋଲିସ ଡାକିବା ଅନୁସାରେ ହାଜର ହେବେ ବୋଲି କହିଲେ ।
ଏହି ସମୟରେ ବାବୁସାନ ଏକ ବଡ଼ ବୟାନ ଦେଇଛନ୍ତି । ମୋ ପୁଅ ମୋ କୋଳକୁ ଶୀଘ୍ର ଫେରିବ ବୋଲି ସେ କହିଛନ୍ତି । ସେ ସୁସ୍ଥ ଥିବା ଓ ବାପା ଉତ୍ତମ ମହାନ୍ତିଭ୍କ ଦେହ ଭଲ ଥିବା କହିଛନ୍ତି । ଏହାସହ ସେ ଚାପରେ ନଥିବା ଗଣମାଧ୍ୟମ ପ୍ରତିନିଧିଙ୍କୁ ଜଣାଇଛନ୍ତି ।
ଭୁବନେଶ୍ବର: ଦିନିକିଆ ଓଡ଼ିଶା ଗସ୍ତରେ ନୀତି ଆୟୋଗ ଉପାଧ୍ୟକ୍ଷ ସୁମନ ବେରୀ ଓ ସଦସ୍ୟ ଡ. ବିନୋଦ ପଲ । ଓଡ଼ିଶା ସରକାରଙ୍କ ବିଭିନ୍ନ ଉନ୍ନୟନ ମୂଳକ ଯୋଜନାର କାର୍ଯ୍ୟକାରିତା ପରଖିଛନ୍ତି ନୀତି ଆୟୋଗ ଟିମ୍ । ଏହାସହ ଓଡ଼ିଶା ସରକାରଙ୍କୁ କରିଛନ୍ତି ପ୍ରଶଂସା ।
ମଞ୍ଚେଶ୍ବରରେ ଥିବା ବିଶ୍ବ ଦକ୍ଷତା କେନ୍ଦ୍ର ବୁଲି ଦେଖିବା ସହ ପିପିଲିରେ ମହିଳା ସ୍ବୟଂ ସହାୟକ ଗୋଷ୍ଠୀ ଦ୍ବାରା ପରିଚାଳିତ ଉଦ୍ୟୋଗ, ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର, ଫାଇଭ-ଟିରେ ହେଉଥିବା ବିଦ୍ୟାଳୟର ରୂପାନ୍ତରଣ ସହ ଅଙ୍ଗନଓ୍ବାଡି କେନ୍ଦ୍ର ବୁଲି ଦେଖିଥିଲେ । ଏହାପରେ ମୁଖ୍ୟ ଶାସନ ସଚିବ, ଉନ୍ନୟନ କମିଶନର ଏବଂ ବରିଷ୍ଠ ବିଭାଗୀୟ ସଚବିଙ୍କ ସହ ରାଜ୍ୟ ସରକାରଙ୍କ ପକ୍ଷରୁ ନିଆଯାଉଥିବା ବିଭିନ୍ନ ଉନ୍ନୟନ ମୂଳକ କାମ ବାବଦରେ ଆଲୋଚନା କରିଥିଲେ । ରାଜ୍ୟ ସରକାରଙ୍କ ବିଭିନ୍ନ ଇନିସିଏଟିଭକୁ ନୀତି ଆୟୋଗ ପ୍ରଶଂସା କରିବା ସହ ଆଗକୁ ବିଭିନ୍ନ ଉନ୍ନୟନ କାମରେ ଆୟୋଗର ସହଯୋଗ ଜାରି ରହିବ ବୋଲି ପ୍ରତିଶ୍ରୁତି ଦେଇଛନ୍ତି । ଏହି ଅବସରରେ ଉପାଧ୍ୟକ୍ଷ ସୁମନ ବେରୀ ଏବଂ ସଦସ୍ୟ ଡ. ପଲ ମୁଖ୍ୟମନ୍ତ୍ରୀଙ୍କୁ ସୌଜନ୍ୟମୂଳକ ସାକ୍ଷାତ କରିଥିଲେ । ଆସନ୍ତା ନୀତି ଆୟୋଗ ପରିଷଦ ବୈଠକରେ ଯୋଗ ଦେବାକୁ ମୁଖ୍ୟମନ୍ତ୍ରୀଙ୍କୁ ନିମନ୍ତ୍ରଣ କରିଛନ୍ତି । ଅଗଷ୍ଟ ୭ ତାରିଖରେ ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ନୀତି ଆୟୋଗର ସପ୍ତମ ପରିଷଦ ବୈଠକ ଦିଲ୍ଲୀରେ ଅନୁଷ୍ଠିତ ହେବ ।
ନୂଆଦିଲ୍ଲୀ: ଏଣିକି ୧୭ ବର୍ଷରୁ ଭୋଟର କାର୍ଡରେ ନିଜର ନାମ ପଞ୍ଜିକରଣ କରିପାରିବେ ଯୁବକ ଓ ଯୁବତୀ । ହେଲେ ୧୮ ବର୍ଷରୁ ଭୋଟ୍ ଦେବେ । ୧୭ରୁ ଅଧିକ ବର୍ଷର ବ୍ୟକ୍ତିଙ୍କ ପାଇଁ ଏଭଳି ଘୋଷଣା କରିଛନ୍ତି ନିର୍ବାଚନ କମିଶନ । ଏଥିସହ ଭୋଟର କାର୍ଡରେ ନାମ ପଞ୍ଜିକରଣ ପାଇଁ ଆବଶ୍ୟକୀୟ ମାନଦଣ୍ଡର ପୂରଣ ପାଇଁ ଆଉ ଅପେକ୍ଷା କରିବାକୁ ପଡିବ ନାହିଁ ।
ବର୍ଷକରେ ତିନିଥର ଭୋଟର କାର୍ଡ ପାଇଁ ଆବେଦନ କରିହେବ । ଏପ୍ରିଲ, ଜୁଲାଇ, ଅକ୍ଟୋବର ପହିଲାରେ ଆବେଦନ କରିପାରିବେ । ଏନେଇ ରାଜ୍ୟମାନଙ୍କୁ ନିର୍ଦ୍ଦେଶ ଦେଇଛନ୍ତି ନିର୍ବାଚନ କମିଶନ । ପୂର୍ବରୁ ୧୮ ବର୍ଷ ହେଲା ପରେ କେବଳ ଜାନୁଆରୀ ପହିଲାରେ ହିଁ ଆବେଦନ କରାଯାଉଥିଲା । ଏଥିସହ ଭୋଟର କାର୍ଡ ସହ ଆଧାର କାର୍ଡ ସଂଯୋଗ କରିବା ପାଇଁ ମଧ୍ୟ ପ୍ରସ୍ତୁତି ଆରମ୍ଭ ହୋଇଛି । ଅଗଷ୍ଟ ପହିଲାରୁ ଡିସେମ୍ବର ପର୍ଯ୍ୟନ୍ତ ଏକ ସ୍ବତନ୍ତ୍ର ଅଭିଯାନ ଜାରି ରହିବ ।
ଚେନ୍ନାଇ: ଆରମ୍ଭ ହେଲା ୪୪ତମ ଅନ୍ତର୍ଜାତୀୟ ଚେସ୍ ଅଲିମ୍ପିଆଡ୍ । ଚେନ୍ନାଇର ଜବାହରଲାଲ ନେହେରୁ ଷ୍ଟାଡିୟମରେ ଆୟୋଜିତ ଏହି ଇଭେଣ୍ଟକୁ ଉଦ୍ଘାଟନ କଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଉଦଘାଟନୀ ସମାରୋହରେ ତାମିଲନାଡୁ ମୁଖ୍ୟମନ୍ତ୍ରୀ ଏମ କେ ଷ୍ଟାଲିନ ଉପସ୍ଥିତ ଥିଲେ । ସାଉଥ ସୁପରଷ୍ଟାର ରଜନୀକାନ୍ତ ମଧ୍ୟ ଉଦଘାଟନୀ ସମାରୋହରେ ସାମିଲ ହୋଇଥିଲେ ।
ଉଦଘାଟନୀ ଉତ୍ସବରେ ଓଡ଼ିଶା ସମେତ ବିଭିନ୍ନ ରାଜ୍ୟର ପ୍ରତିଯୋଗୀ ଭାଗ ନେଇ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରିଥିଲେ । ଟୁର୍ଣ୍ଣାମେଣ୍ଟରେ ୨ ଶହ ଦେଶର ପ୍ରାୟ ୨ ହଜାର ଖେଳାଳି ସାମିଲ ହେବେ । ଏହି ସ୍ପେଶାଲ ଇଭେଣ୍ଟ ପାଇଁ ଚେନ୍ନାଇରେ ବ୍ୟାପକ ପ୍ରସ୍ତୁତି କରାଯାଇଛି । ସହରର ଅନେକ ସ୍ଥାନକୁ ଚେସ୍ ଥିମରେ ସଜ୍ଜା ଯାଇଛି ।
ପ୍ରଧାନମନ୍ତ୍ରୀଙ୍କ ଗସ୍ତ ଯୋଗୁଁ ସୁରକ୍ଷା ଦୃଷ୍ଟିରୁ ଜୁଲାଇ ୨୮ ଓ ୨୯ ତାରିଖରେ ସହର ମଧ୍ୟରେ ଡ୍ରୋନ୍ ଉଡାଣ ଉପରେ ରୋକ ଲଗାଯାଇଛି । ଏହାସହ ବ୍ୟାପକ ପୋଲିସ ଫୋର୍ସ ମଧ୍ୟ ମୁତୟନ ହୋଇଛନ୍ତି । ଏହି ଅନ୍ତର୍ଜାତୀୟ ଚେସ୍ ଅଲିମ୍ପିଆଡ୍ ଅଗଷ୍ଟ ୧୦ ତାରିଖରେ ଉଦଯାପିତ ହେବ । ଚେସ୍ ଅଲିମ୍ପିଆଡ୍ ଋଷ୍ରେ ଅନୁଷ୍ଠିତ ହେବାର ଥିଲା । ମାତ୍ର ଋଷ-ୟୁକ୍ରେନ ଯୁଦ୍ଧ ଯୋଗୁଁ ଏହାକୁ ଭାରତ ସିଫ୍ଟ କରାଯାଇଛି ।
ଭୁବନେଶ୍ବର: ଏଣିକି ନିମୟ ଅନୁସାରେ ସରକାରୀ ଚାକିରିରୁ ଅବସର ନେବାର ମାସକ ପରେ ପେନସନ୍ ଦେବାକୁ ଉଦ୍ୟମ କରାଯିବ । ଏକ୍ଷେତ୍ରରେ ଥିବା ସମସ୍ୟାର ସମାଧାନ କରି ଅବସର ନେବାର ମାସକ ପରେ ପେନସନ ପ୍ରଦାନ ବ୍ୟବସ୍ଥା କରାଯିବ । ପେନସନ ଦେବା ଦାୟିତ୍ବରେ ଥିବା ଆକାଉଣ୍ଟାଣ୍ଟ ଜେନେରାଲ ବା ଏଜି ଦେଲେ ସୂଚନା । ଆଜି ରାଜ୍ୟସ୍ତରୀୟ ସ୍ବତନ୍ତ୍ର ପେନସନ୍ ଅଦାଲତରେ ଏଜି ଏହି ସୂଚନା ଦେଇଛନ୍ତି । ଏଥିପାଇଁ ନୂଆ ଟେକ୍ନୋଲୋଜିର ନିଆଯିବ ସହାୟତା ।
ଆକାଉଣ୍ଟାଣ୍ଟ ଜେନେରାଲ ଅଫିସରେ ଆୟୋଜିତ ରାଜ୍ୟସ୍ତରୀୟ ସ୍ବତନ୍ତ୍ର ପେନସନ୍ ଅଦାଲତରେ ସରକାରୀ ଚାକିରିରୁ ଅବସର ନେଇଥିବା ଲୋକଙ୍କ ଭିଡ଼ । କିଏ ୨୦୦୫ରୁ ଅବସର ନେଲେଣି ତ କିଏ ୧୯୮୫ରୁ । କିନ୍ତୁ ଏଯାଏଁ ପେନସନ ସମସ୍ୟାର ସମାଧାନ ହୋଇନାହିଁ । କିଏ ପ୍ରୋଭିଜନାଲ ପେନସନ୍ ପାଉଛନ୍ତି ତ କିଏ ଫାମିଲି ପେନସନକୁ ଅପେକ୍ଷା କରିଛନ୍ତି । କାହାକୁ ସପ୍ତମ ବେତନ କମିଶନ ଅନୁସାରେ ପେନସନ ମିଳୁନି ତ ପୁଣି କିଏ ଏ ଅଫିସରୁ ସେ ଅଫିସକୁ ଦୌଡ଼ି ଦୌଡ଼ି ହତାଶ ହେଲେଣି ।
ଯିଏ ଯେଉଁ ବିଭାଗରେ ଥିଲେ ବି ଅବସର ପରେ ତାଙ୍କୁ ପେନସନ୍ ଦେବା ଦାୟିତ୍ବ ମହା-ଲେଖାଗାରଙ୍କର । ରାଜ୍ୟ ସରକାର ହୁଅନ୍ତୁ କି କେନ୍ଦ୍ର ସରକାର, ଅବସରର ସୂଚନା ମିଳିବା ମାତ୍ରେ ପେନସନ୍ ଦେବା ବ୍ୟବସ୍ଥା ହେବା କଥା । ଅବସର ନେବାର ମାସକ ମଧ୍ୟରେ ପେନସନ୍ ପାଇବାକୁ କର୍ମଚାରୀ ହକଦାର । ହେଲେ ଏହା ଠିକ୍ ସମୟରେ ହେଉନାହିଁ । ସମସ୍ୟାକୁ ମହା-ଲେଖାଗାର ସ୍ବୀକାର କରିଛନ୍ତି । ବିଭାଗୀୟ ତଥ୍ୟ ବିନିମୟରେ ଥିବା ସମସ୍ୟାରେ ସୁଧାର ସହ ଟେକ୍ନୋଲୋଜିର ବ୍ୟବହାର କରି ସମସ୍ୟାର ସମାଧାନ କରାଯିବ ବୋଲି କହିଛନ୍ତି ଏଜି ଅନନ୍ତ ବେହେରା ।
ଖୋର୍ଦ୍ଧା ଜିଲ୍ଲାରେ ପେନସନ ସମସ୍ୟା ମାମଲା ଅଢ଼େଇ ହଜାର ଉପରେ । ଅନ୍ୟ ଜିଲ୍ଲାରେ ବି ଏଭଳି ମାମଲା କିଛି କମ୍ ନାହିଁ । ଆଗକୁ ସବୁ ଜିଲ୍ଲା ସ୍ତରରେ ପେନସନ ଅଦାଲତ କରି ସମସ୍ୟା ସମାଧାନ ପାଇଁ ଉଦ୍ୟମ କରାଯିବ ।
ଭୁବନେଶ୍ବର: ବିଜୁ ଜନତା ଦଳର ୨୫ ବର୍ଷ ଅବସରରେ ବ୍ୟାପକ ହେବ ସଭ୍ୟ ସଂଗ୍ରହ ଅଭିଯାନ । ଯୁବ ଓ ଛାତ୍ର ବିଜେଡି ଏହି ଦାୟିତ୍ବ ନେଇଛନ୍ତି । ଏଥିପାଇଁ ଏକ ଓ୍ବେବସାଇଟ୍ ଡିଜାଇନ୍ କରାଯାଇଛି । ଯେଉଁଥିରେ ଆବେଦନ କରିବାକୁ ଆପ୍ଲିକେସନ୍ ଖୁବ୍ ଶୀଘ୍ର ଲୋଡ୍ କରାଯିବ । ଆପ୍ଲିକେସନର ନାଁ ରହିଛି bjd25.com । ଏହାକୁ ଲଗ୍ ଇନ୍ କଲେ ବିଜେଡିର ଯୁବ କି ଛାତ୍ର ଓ୍ବିଙ୍ଗରେ ସାମିଲ ହୋଇପାରିବେ ।
ଓ୍ବେବପେଜର ଡିଜାଇନ୍ ସରିଛି । କେବଳ ଅନ୍ୟାନ୍ୟ ଆପ୍ଲିକେସନ୍ ପାଇଁ ହାଇକମାଣ୍ଡଙ୍କ ଅନୁମୋଦନକୁ ଅପେକ୍ଷା କରିଛି ଦଳ । ଏଣିକି ସମ୍ପୂର୍ଣ୍ଣ ଭାବେ ଟେକ୍ନୋଲୋଜି ମାଧ୍ୟମରେ ଯୁବ ଓ ଛାତ୍ରଙ୍କୁ ବିଜେଡିରେ ସାମିଲ କରାଯିବ । ପ୍ରତି ପଞ୍ଚାୟତ ଓ ପୌରାଞ୍ଚଳ ଓ୍ବାର୍ଡରୁ ୨୫ ଜଣଙ୍କୁ ସଦସ୍ୟ କରାଯିବ । ଏଥିରୁ ୧୩ ଜଣ ସଦସ୍ୟ ଯୁବ ଓ୍ବିଙ୍ଗ ଓ ୧୨ ଜଣ ଛାତ୍ର ବିଜେଡିରେ ରହିବେ । ଏଥିସହ କିଛି ପ୍ରତିଷ୍ଠିତ ଲୋକଙ୍କୁ ଇନଫ୍ଲୁଏନସର ଭାବେ ବଛାଯିବ । ସେମାନେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଯୋଜନା ସମ୍ପର୍କରେ ଯୁବ ଓ ଛାତ୍ରଙ୍କୁ ଅବଗତ କରି ସଦସ୍ୟ କରିବେ ।
ସଦସ୍ୟତା ଅଭିଯାନ ପାଇଁ ମୁଖ୍ୟମନ୍ତ୍ରୀ ତଥା ବିଜେଡି ସଭାପତି ନବୀନ ପଟ୍ଟନାୟକଙ୍କ ଅନୁମୋଦନ ମିଳିବା ପରେ ଛାତ୍ର ଓ ଯୁବ କମିଟିକୁ ନେଇ ସମୀକ୍ଷା କରିଥିଲେ ଦଳର ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ । ଛାତ୍ର ଓ ଯୁବ ବିଜେଡିର ବ୍ଲକ ସଭାପତି ଓ ଓ୍ବାର୍ଡ ସଭାପତିଙ୍କ ସମେତ ଅନ୍ୟାନ୍ୟ ଦଳୀୟ ପଦାଧିକାରୀ ସଭ୍ୟ ସଂଗ୍ରହ ଅଭିଯାନକୁ ସକ୍ରିୟ କରିବେ । ଆବଶ୍ୟକ ପଡ଼ିଲେ ସେମାନେ ନିଜେ ଛାତ୍ର ଓ ଯୁବକଙ୍କ ପାଖକୁ ଯାଇ ସଦସ୍ୟ କରିବେ ।
ଚଳିତବର୍ଷ ଡିସେମ୍ବର ୨୬ ତାରିଖର ବିଜେଡିକୁ ୨୫ ବର୍ଷ ପୂରିବ । ଏକ ଆଞ୍ଚଳିକ ଦଳ ଭାବେ ନିରଙ୍କୁଶ ଭାବେ ଦୁଇ ଦଶନ୍ଧିରୁ ଅଧିକ ସମୟ ଧରି ଲୋକଙ୍କ ସମର୍ଥନ ପାଇ ଆସୁଛି ଦଳ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଜନକଲ୍ୟାଣକାରୀ ଯୋଜନା ଯୋଗୁଁ ଏହା ସମ୍ଭବ ହୋଇଛି ।
ଭୁବନେଶ୍ବର: ପୁଣି ଓଡ଼ିଶାକୁ କେନ୍ଦ୍ରର ସାର୍ଟିଫିକେଟ । ମନରେଗା ଯୋଜନାରେ ଲୋକଙ୍କୁ କାମ ଯୋଗାଇବାରେ ଓଡ଼ିଶାର ରେକର୍ଡ । ଦେଶର ୫ଟି ସର୍ବଶ୍ରେଷ୍ଠ ରାଜ୍ୟ ଭିତରେ ଓଡ଼ିଶା । ଜୀବିକା ମିଶନ, ଆବାସ ଯୋଜନା, ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନା ପରି କେନ୍ଦ୍ର ପ୍ରବର୍ତ୍ତିତ ଯୋଜନା କାର୍ଯ୍ୟକାରୀ କରିବାରେ ଓଡ଼ିଶାକୁ ମିଳିଛି ସଫଳତା ।
କେନ୍ଦ୍ର ଅନୁଦାନ କାର୍ଯ୍ୟକାରୀ କରିବାରେ ରାଜ୍ୟ ବେଶ ଆଗୁଆ । ବିରୋଧୀଙ୍କ ମୁହଁ ବନ୍ଦ କଲା କେନ୍ଦ୍ର ସାର୍ଟିଫିକେଟ । ରାଜ୍ୟର ସଫଳତାକୁ ଖୋଦ କେନ୍ଦ୍ର ସରକାର ଉଜାଗର କରିଛନ୍ତି । ବିଜେଡି ସାଂସଦ ସସ୍ମିତ ପାତ୍ରଙ୍କ ପ୍ରଶ୍ନରେ କେନ୍ଦ୍ର ଗ୍ରାମ୍ୟ ଉନ୍ନୟନ ରାଷ୍ଟ୍ରମନ୍ତ୍ରୀ ସାଧ୍ବୀ ନିରଞ୍ଜନ ଜ୍ୟୋତି ରାଜ୍ୟସଭାରେ ଏହି ତଥ୍ୟ ରଖିଛନ୍ତି ।
କେନ୍ଦ୍ର ପ୍ରବର୍ତ୍ତିତ ଯୋଜନା କାର୍ଯ୍ୟକାରୀ କରିବାରେ ରେକର୍ଡ କରିଛି ଓଡ଼ିଶା । ମନରେଗା ଯୋଜନାରେ ଗତ ସାଢେ ତିନି ବର୍ଷ ଭିତରେ ୧୭ ଲକ୍ଷ ୮୯ ହଜାର ୬୬୭ଟି ପ୍ରକଳ୍ପ ଶେଷ ହୋଇଛି । ଯେଉଁଥି ପାଇଁ ସାରାଦେଶରେ ଓଡ଼ିଶା ଟପ ଫାଇଭ ରାଜ୍ୟ ଭିତରେ ସ୍ଥାନ ପାଇଛି । ଏପରିକି କୋଭିଡ ମହାମାରୀ ଦୁଇବର୍ଷରେ ବି ପ୍ରବାସୀ ଶ୍ରମିକଙ୍କଠାରୁ ଆରମ୍ଭ କରି ମନରେଗା ହିତାଧିକାରୀଙ୍କୁ କର୍ମ ସଂସ୍ଥାନ ଯୋଗାଇବାରେ ରାଜ୍ୟ ରେକର୍ଡ କରିଛି ।
ଓଡ଼ିଶାରେ 5T ସଂସ୍କାର ବ୍ୟବସ୍ଥା କାର୍ଯ୍ୟକାରୀ ହେବାପରଠାରୁ ପୂର୍ବଭଳି ଡେଡଲାଇନ ଭିତରେ ପ୍ରତ୍ୟେକ ଯୋଜନା କାର୍ଯ୍ୟକାରି ହେଉଛି । କେନ୍ଦ୍ର ସରକାର ସିଏସ୍ଏସ ଯୋଜନାରେ ରାଜ୍ୟ ଦେଉଛି ୪୦ ପ୍ରତିଶତ ଅର୍ଥ । ଯେଉଁଥି ପାଇଁ ଆର୍ଥିକ ବୋଝ ସତ୍ତ୍ବେ ବି ଓଡ଼ିଶା ସରକାର ଲୋକଙ୍କୁ ମୌଳିକ ସେବା ଯୋଗାଇବାକୁ ସିଏସ୍ଏସର ସଫଳ ରୂପାୟନ ପାଇଁ ବଜେଟରେ ଅଗ୍ରାଧିକାର ଦେଉଛନ୍ତି । ପ୍ରଧାନମନ୍ତ୍ରୀ ସଡକ ଯୋଜନା କାର୍ଯ୍ୟକାରୀ କରିବାରେ ଦେଶରେ ଓଡ଼ିଶା ରେକର୍ଡ କରିଛି । ଖୋଦ କେନ୍ଦ୍ରମନ୍ତ୍ରୀଙ୍କ ତଥ୍ୟ ଅନୁଯାୟୀ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନା ଅଧୀନରେ ୧୭ ହଜାର ୯୨୯ଟି ରାସ୍ତାରୁ ଗତ ୨୨ ତାରିଖ ସୁଦ୍ଧା ୧୬ ହଜାର ୫୪୯ଟି ରାସ୍ତା ସମ୍ପୂର୍ଣ୍ଣ ହୋଇଛି । ସେହିପରି ପ୍ରଧାନମନ୍ତ୍ରୀ ଆବାସ ଯୋଜନାରେ ଅନୁମୋଦିତ ସଂଖ୍ୟାଠାରୁ ଚଳିତମାସ ୨୩ ତାରିଖ ସୁଦ୍ଧା ୫୦ ପ୍ରତିଶତ ଘର ସମ୍ପୂର୍ଣ୍ଣ ହୋଇଛି ।
ବିଦ୍ୟାଳୟ ରୂପାନ୍ତରଣ ନେଇ ଓଡ଼ିଶା ସରକାରଙ୍କ ପଦକ୍ଷେପ ଏବେ ଜାତୀୟ ସ୍ତରରେ ଚର୍ଚ୍ଚା ସାଉଁଟିଛି । ବାଳକ ଓ ବାଳିକାଙ୍କ ପାଇଁ ମୌଳିକ ସୁବିଧା କଥା ହେଉ କି ଶିକ୍ଷା ବିକାଶ ନେଇ ଭିତ୍ତିଭୂମି ନେଇ କେନ୍ଦ୍ର ସରକାର ବି ତାଜୁବ ହେଲେଣି ।
ଭୁବନେଶ୍ବର: ଆସନ୍ତା ନଭେମ୍ବର ୩୦ ତାରିଖରୁ ଆରମ୍ଭ ହେବ ମେକ୍ ଇନ୍ ଓଡିଶା କନକ୍ଲେଭ୍ର ତୃତୀୟ ସଂସ୍କରଣ । ଏଥିପାଇଁ ଆଜି IPICOL ଓ FICCI ମଧ୍ୟରେ ଏକ ଏମଓୟୁ ସ୍ବାକ୍ଷରିତ ହୋଇଛି । ଏହା ଡିସେମ୍ବର ୪ ତାରିଖ ପର୍ଯ୍ୟନ୍ତ ଚାଲିବ । ଏଥିରେ ଦେଶ ତଥା ଦେଶ ବାହାରୁ ପୁଞ୍ଜିପତିମାନେ ଯୋଗଦେବେ ।
ଏମଓୟୁ ସ୍ବାକ୍ଷର ସମାରୋହରେ ଶିଳ୍ପ, ଏମଏସଏମଇ ଏବଂ ଶକ୍ତି ମନ୍ତ୍ରୀ ପ୍ରତାପ ଦେବ, ଶିଳ୍ପ ବିଭାଗର ମୁଖ୍ୟ ଶାସନ ସଚିବ ହେମନ୍ତ ଶର୍ମା ଫିକିର ମହାନିର୍ଦ୍ଦେଶକ ଅରୁଣ ଚାଓ୍ବଲା ପ୍ରମୁଖ ଉପସ୍ଥିତ ଥିଲେ । 2016ରେ ପ୍ରଥମ ମେକ୍ ଇନ୍ ଓଡିଶା କନକ୍ଳେଭ ହୋଇଥିଲା । ସେଥିରେ 2 ଲକ୍ଷ କୋଟିରୁ ଅଧିକ ମୂଲ୍ୟର ପୁଞ୍ଜି ବିନିଯୋଗ ପାଇଁ ପ୍ରତିଶ୍ରୁତି ମିଳିଥିଲା । ଏଥିରେ 5000ରୁ ଅଧିକ ପ୍ରତିନିଧି ଭାଗ ନେଇଥିଲେ । ସେହିଭଳି ୨୦୧୮ରେ ଦ୍ବିତୀୟ ସଂସ୍କରଣରେ 4 ଲକ୍ଷ 19 ହଜାର କୋଟିରୁ ଅଧିକ ଟଙ୍କାର ପୁଞ୍ଜି ବିନିଯୋଗ ପ୍ରସ୍ତାବ ଆସିଥିଲା ।
ଚଳିତବର୍ଷ କନକ୍ଲେଭ୍ର ଲକ୍ଷ୍ୟ ହେଉଛି ସମସ୍ତ ଆଶାକୁ ଅତିକ୍ରମ କରିବା ଏବଂ ଓଡିଶାକୁ ବିଶ୍ବ ମାନଚିତ୍ରରେ ସ୍ଥାନ ଦେବା ବୋଲି ବିଭାଗୀୟ ମନ୍ତ୍ରୀ ପ୍ରତାପ ଦେବ ସୂଚନା ଦେଇଛନ୍ତି । ଏହାସହ ଆମର ପ୍ରାକୃତିକ ସମ୍ପଦ ଏବଂ ଇକୋସିଷ୍ଟମ୍ ସୁବିଧା ଯୋଗୁଁ ଓଡ଼ିଶା ଧାତୁ ଏବଂ ସହଯୋଗୀ କ୍ଷେତ୍ରଗୁଡିକର ଶିଳ୍ପ ପାଇଁ ପସନ୍ଦର ସ୍ପଟ ପାଲଟିଛି ବୋଲି ସେ କହିଛନ୍ତି । ରାସାୟନିକ ପଦାର୍ଥ ଏବଂ ପେଟ୍ରୋକେମିକାଲ୍ସ, ବୟନ ଶିଳ୍ପ ଓ ପୋଷାକ ପରି ସେକ୍ଟର ସହିତ ରାଜ୍ୟରେ ଶିଳ୍ପ ଇକୋସିଷ୍ଟମକୁ ବ୍ୟାପକ କରିବା ପାଇଁ ସରକାର ସକ୍ରିୟ ଭାବରେ ପଦକ୍ଷେପ ନେଇଛନ୍ତି । ପୂର୍ବ ଦୁଇଟି ସଂସ୍କରଣରେ ଭାଗ ନେଇଥିବା ୫୩ ପ୍ରତିଶତ ପୁଞ୍ଜି ନିବେଶକାରୀ ଓଡିଶାରେ ସେମାନଙ୍କର ଶିଳ୍ପ ଆରମ୍ଭ କଲେଣି ବୋଲି ସେ କହିଛନ୍ତି ।
ରାଜ୍ୟରେ ଶିଳ୍ପ ପ୍ରତିଷ୍ଠା ସହ ରୋଜଗାର ସୃଷ୍ଟି କରିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉଦ୍ଦେଶ୍ୟ । ସେଥିପାଇଁ ରାଜ୍ୟକୁ କିଭଳି ପୁଞ୍ଜିପତିମାନେ ଆସିବେ ସେ ନେଇ ମେକ ଇନ୍ ଓଡିଶା କାର୍ଯ୍ୟକ୍ରମ ଆୟୋଜନ କରାଯାଉଛି ।
କୋଲକାତା: ପଶ୍ଚିମବଙ୍ଗ ଶିକ୍ଷକ ନିଯୁକ୍ତି ମହା ଘୋଟାଲାରେ ଟିଏମସି ମୁଖ୍ୟ ମମତା ବାନାର୍ଜୀଙ୍କ ବଡ଼ ପଦକ୍ଷେପ । ଘୋଟାଲାରେ ଫସି ଗିରଫ ହୋଇଥିବା ପୂର୍ବତନ ମନ୍ତ୍ରୀ ପାର୍ଥ ଚାଟାର୍ଜୀଙ୍କୁ ଦଳରୁ ନିଲମ୍ବନ କଲେ ମମତା ବାନାର୍ଜୀ । ଟିଏମସି ନେତା ଅଭିଶେଷ ବାନାର୍ଜୀ କହିଛନ୍ତି, ‘ପାର୍ଥ ଚାଟାର୍ଜୀଙ୍କୁ ଟିଏମସିରୁ ନିଲମ୍ବନ କରାଯାଇଛି । ମହାସଚିବ, ରାଷ୍ଟ୍ରୀୟ ଉପାଧ୍ୟକ୍ଷ ସହ ବାକି ୩ଟି ପଦରୁ ତାଙ୍କୁ ହଟାଇ ଦିଆଯାଇଛି । ତଦନ୍ତ ସରିବା ପର୍ଯ୍ୟନ୍ତ ଏହି ନିଲମ୍ବନ ବଳବତ୍ତର ରହିବ । ଯଦି ସେ ନିର୍ଦ୍ଦୋଷରେ ଖଲାସ ହୁଅନ୍ତି, ଦଳକୁ ଫେରି ପାରିବେ ।’
ସୂଚନାଯୋଗ୍ୟ, ଏହା ପୂର୍ବରୁ ପାର୍ଥଙ୍କୁ ଶିଳ୍ପମନ୍ତ୍ରୀ ପଦରୁ ମମତା ବାନାର୍ଜୀ ହଟାଇ ଦେଇଥିଲେ । ଅପରାହ୍ଣରେ ପାର୍ଥ ମନ୍ତ୍ରୀପଦ ହରାଇ ଥିବା ବେଳେ ସନ୍ଧ୍ୟାରେ ଦଳରୁ ନିଲମ୍ବିତ ହୋଇଛନ୍ତି ।
ମହା ଘୋଟାଲାର ମହାରାଣୀ ଅର୍ପିତା ମୁଖାର୍ଜୀଙ୍କୁ ଇଡି ଧରିବା ପରେ ପାର୍ଥଙ୍କୁ ଗିରଫ କରାଯାଇଥିଲା । ପ୍ରଥମ ଚଢାଉରେ ଅର୍ପିତାଙ୍କ ଘରୁ ୨୧ କୋଟି ୯୦ ଲକ୍ଷ ନଗଦ ଟଙ୍କା ମିଳିଥିଲା । ବୁଧବାର ଅର୍ପିତାଙ୍କ ବେଲଘୋରିୟା ଫ୍ଲାଟରେ ଇଡି ଟିମ୍ ପୁଣି ଚଢ଼ାଉ କରିଥିଲା । ଏଠାରୁ ୨୭ କୋଟି ୯୦ ଲକ୍ଷ ଟଙ୍କା ନଗଦ କ୍ୟାସ୍ ଓ ୪ କୋଟି ଟଙ୍କାର ସୁନା ମିଳିଥିଲା ।
ଗତକାଲି ମିଳିଥିବା ସୁନାରେ ୬ କେଜି ସୁନା ( ଅଧ କେଜି ଲେଖାଏଁ ଓଜନର ୬ଟି ବାହୁଟି, ୩ କେଜି ସୁନା ବିସ୍କୁଟ୍) ଓ ସୁନା କଲମ ମିଳିଥିଲା ।
ଫ୍ଲାଟର ଯେଉଁ ସ୍ଥାନରେ ସବୁ ଟଙ୍କା ରଖା ଯାଇଥିଲା ସେ ବିଷୟରେ ଜାଣିଲେ ଆପଣ ଚକିତ ହୋଇଯିବେ । ଫ୍ଲାଟର ବେଡରୁମ୍, ଡ୍ରଇଂ ରୁମରେ ଥିଲା ପୁଳା ପୁଳା ଟଙ୍କା । ବାଥରୁମରୁ ମିଳିଥିଲା ସବୁଠାରୁ ଅଧିକ ଟଙ୍କା । ବାଥରୁମର ବେସିନ ତଳେ ଲକର କରାଯାଇ କଳାଟଙ୍କା ଲୁଚାଇ ରଖାଯାଇଥିଲା । ଇଡି କର୍ମଚାରୀଙ୍କ ପୂରା ରାତି ଟଙ୍କା ଗଣାରେ ବିତି ଯାଇଥିଲା । ଏଥିପାଇଁ ମେସିନର ବ୍ୟବହାର କରାଯାଇଥିଲା । ଟଙ୍କା ନେବା ଲାଗି ଏକ ଟ୍ରକରେ ୨୦ଟି ବକ୍ସ ମଗା ଯାଇଥିଲା । ଆଜି ସକାଳ ୪ଟାରେ ଟଙ୍କା ଗଣା ସରିବା ପରେ ଏହାକୁ ଉକ୍ତ ବକ୍ସରେ ଭରି ନିଆଯାଇଥିଲା ।
ନୂଆଦିଲ୍ଲୀ: ରାଷ୍ଟ୍ରପତିଙ୍କୁ ରାଷ୍ଟ୍ରପତ୍ନୀ କହି ଅଡୁଆରେ ବରିଷ୍ଠ କଂଗ୍ରେସ ନେତା ଅଧିର ରଞ୍ଜନ ଚୌଧୁରୀ । ପୂରା ଦେଶରେ ବଢ଼ିବାରେ ଲାଗିଛି ଅସନ୍ତୋଷ । ରାଷ୍ଟ୍ରପତିଙ୍କୁ ଅପମାନ ପ୍ରସଙ୍ଗକୁ ଜାତୀୟ ମହିଳା କମିଶନ ଗୁରୁତର ସହ ନେଇ ଅଧିରଙ୍କୁ ନୋଟିସ୍ କରିଛନ୍ତି । ଆସନ୍ତା ଅଗଷ୍ଟ ୩ ତାରିଖରେ ହାଜର ହେବାକୁ ତାଙ୍କୁ ନିର୍ଦ୍ଦେଶ ଦିଆଯାଇଛି । ବ୍ୟକ୍ତିଗତ ଭାବେ ହାଜର ହୋଇ ଲିଖିତ ଭାବେ ଉତ୍ତର ଦେବେ ଅଧିର । ସେହିଦିନ ସାଢେ ୧୧ଟା ବେଳେ ଶୁଣାଣି ହେବ ।
ଏହାସହ ଏନସିଡବ୍ଲ୍ୟୁ ସୋନିଆ ଗାନ୍ଧିଙ୍କୁ ମଧ୍ୟ ଚିଠି ଲେଖି ଅଧିର ରଞ୍ଜନ ଚୌଧୁରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଉଲ୍ଲେଖ କରିଛି ।
ରାଷ୍ଟ୍ରପତିଙ୍କୁ ରାଷ୍ଟ୍ରପତ୍ନୀ କହି ବିବାଦରେ ଫସିବା ପରେ ଅଧିର ରଞ୍ଜନ କ୍ଷମା ମାଗିଥିଲେ । ଭୁଲରେ ପାଟିରୁ ଖସି ଯାଇଥିବା ସେ ସଫେଇ ଦେଇଥିଲେ । ସେ କହିଥିଲେ, ‘ରାଷ୍ଟ୍ରପତିଙ୍କୁ ଭେଟି କ୍ଷମା ମାଗିକୁ ମୁଁ ସମୟ ମାଗିଥିଲି । ହେଲେ ବିଜେପି ସୋନିଆ ଗାନ୍ଧିଙ୍କୁ କାହିଁକି ଟାର୍ଗେଟ କରୁଛି । ମୁଁ ଚ୍ୟାଲେଞ୍ଜ କରୁଛି, ବିଜେପି ମୋ ଆଗକୁ ଆସି ମୋ ସହ ସାମ୍ନାସାମ୍ନି କରୁ । ଆମ ନେତା ମଧ୍ୟ ଜଣେ ମହିଳା, ତାଙ୍କୁ ଟାର୍ଗେଟ କରାନଯାଉ ।’
ସେ ଆଗକୁ କହିଥିଲେ, ‘ମୁଁ ପୁଣି କହୁଛି, ମୋର ଭୁଲ ହୋଇଛି । ମୁଁ ବଙ୍ଗଳୀ । ମୋର ହିନ୍ଦି ସେତେ ଭଲ ନୁହେଁ । ମୋତେ ସଂସଦରେ ମୋ ଭୁଲର ସ୍ପଷ୍ଟିକରଣ ଦେବାକୁ ଦିଅନ୍ତୁ । ହେଲେ ଭୁଲରେ କହି ଦେଇଥିବା କଥାକୁ ନେଇ ବିଜେପି ରାଜନୀତି କରୁଛି ।’
