ସୋର: ସୋରରେ ମହିଳାଙ୍କ ସନ୍ଦେହ ଜନକ ମୃତ୍ୟୁ । ଗତକାଲି ବିଳମ୍ବିତ ରାତିରେ ମହିଳାଜଣକ କେଉଁଆଡେ ଚାଲି ଯାଇଥିବା ବେଳେ ଆଜି ଗାଁ ପାଖରେ ଥିବା ଏକ ପୋଖରୀରୁ ଉଦ୍ଧାର ହୋଇଛି ମହିଳାଙ୍କ ମୃତଦେହ । ମୃତ ମହିଳା ହେଲେ ଖଇରା ଥାନା କଇଁଥଗଡ଼ିଆ ଗାଁର ବୁଦ୍ଧଦେବ ପାତ୍ରଙ୍କ ସ୍ତ୍ରୀ ଜୟନ୍ତୀ ପାତ୍ର । ମୃତ୍ୟୁ ପୂର୍ବରୁ ନିଜ ଇନଷ୍ଟାଗ୍ରାମରେ କାଲି ମୁଁ ହୁଏତ ନଥିବି, ହେଲେ ସମୟ ବଡ ବଳବାନ ବୋଲି ଲେଖିଥିଲେ ଜୟନ୍ତୀ । ଏବଂ ଏହି ଭିଡିଓ ତାଙ୍କର ଶେଷ ଭିଡିଓ ହୋଇପାରେ ବୋଲି ରିଲ୍ସ ଭିଡିଓ ଛାଡ଼ିଥିଲେ ଜୟନ୍ତୀ । ଅନ୍ୟପଟେ ଜୟନ୍ତୀ ହତ୍ୟା କରାଯାଇଥିବା ଅଭିଯୋଗ ଆଣିଛନ୍ତି ତାଙ୍କ ପରିବାର ଲୋକ । ଟିକଟକ୍ ଭିଡିଓ ଓ ରିଲ୍ସ କରି ବେଶ୍ ଜଣାଶୁଣା ଥିଲେ ଜୟନ୍ତୀ ।
ଇସ୍ତଫା ଦେଲେ ଓଡ଼ିଶା ରଣଜୀ ଟିମର ମୁଖ୍ୟ କୋଚ୍ ଓ୍ୱାସିମ ଜାଫର
କଟକ: ଇସ୍ତଫା ଦେଲେ ଓଡ଼ିଶା ରଣଜୀ ଟିମ୍ ମୁଖ୍ୟ କୋଚ ୱାସିମ ଜାଫର । ଭାରତୀୟ ଦଳର ପୂର୍ବତନ ବ୍ୟାଟ୍ସମ୍ୟାନ ଓ୍ୱାସିମ୍ ଜାଫରଙ୍କ ଇସ୍ତଫାକୁ ଗ୍ରହଣ କରିଛି କ୍ରିକେଟ ପରାମର୍ଶଦାତା । ବାଙ୍ଗଳାଦେଶ ୧୯ ବର୍ଷରୁ କମ୍ ଟିମର କୋଚ୍ ଦାୟିତ୍ୱ ତାଙ୍କୁ ମିଳିବା ପରେ ସେ ଗୋଟିଏ ସିଜିନ୍ ଆଗରୁ ଓଡ଼ିଶା ମୁଖ୍ୟ କୋଚ୍ ପଦ ଛାଡ଼ିଛନ୍ତି । ଓସିଏ ତାଙ୍କ ଇସ୍ତଫା ପତ୍ର ଗ୍ରହଣ କରିବା ସହିତ ଆର. ଶ୍ରୀକାନ୍ତଙ୍କୁ ଆଗାମୀ ୨୨-୨୩ ସିଜିନ ପାଇଁ କୋଚ୍ ଦାୟିତ୍ୱ ଦେଇଛି । ଶ୍ରୀକାନ୍ତ ପୂର୍ବରୁ ଓଡ଼ିଶା ପାଇଁ ରଣଜୀ ମ୍ୟାଚ୍ ଖେଳିଥିଲା ବେଳେ ୨୦ ବର୍ଷର ପ୍ରଶିକ୍ଷକ ଅଭିଜ୍ଞତା ରଖିଛନ୍ତି । ଶ୍ରୀକାନ୍ତ ଏବେ ଓଡ଼ିଶା କ୍ରିକେଟ ଏକାଡେମୀର ବୈଷୟକ ନିର୍ଦ୍ଦେଶକ ଭାବେ କାର୍ଯ୍ୟ କରିଛନ୍ତି । ଶ୍ରୀକାନ୍ତ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡର ଲେଭଲ-୩ ସାର୍ଟିଫାଏଡ କୋଚ୍ ଭାବେ ମାନ୍ୟତା ପାଇଛନ୍ତି ।
ଆସନ୍ତାକାଲି ହୀରାକୁଦ ଛାଡ଼ିବ ବର୍ଷର ପ୍ରଥମ ବନ୍ୟାଜଳ, ତଳମୁଣ୍ଡରେ ଥିବା ଜିଲ୍ଲାକୁ ସତର୍କତା
ସମ୍ବଲପୁର: ଆସନ୍ତାକାଲି ଖୋଲିବ ହୀରାକୁଦ ଜଳଭଣ୍ଡାର । ଦିନ ୧୧ଟାରେ ହୀରାକୁଦରୁ ଛଡ଼ାଯିବ ବର୍ଷର ପ୍ରଥମ ବନ୍ୟାଜଳ । ଗେଟ୍ ଖୋଲିବା ପାଇଁ ସମସ୍ତ ପ୍ରସ୍ତୁତି ଶେଷ ହୋଇଛି । କାଲି ସକାଳେ ପୂଜାର୍ଚ୍ଚନା କରାଯାଇ ପ୍ରଥମେ ୭ ନମ୍ବର ସ୍ଲୁଇସ ଗେଟ ଖୋଲାଯିବ । ଜଳପତ୍ତନ ଓ ପ୍ରବେଶକୁ ଦୃଷ୍ଟିରେ ରଖି ପର୍ଯ୍ୟାୟକ୍ରମେ ୫ଟି ଗେଟ ଖୋଲାଯିବ ବୋଲି ହୀରାକୁଦ ଜଳଭଣ୍ଡାରର ମୁଖ୍ୟଯନ୍ତ୍ରୀ ଆନନ୍ଦ ଚନ୍ଦ୍ର ସାହୁ ସୂଚନା ଦେଇଛନ୍ତି ।
ଗେଟ୍ ଖୋଲାଯାଉଥିବାରୁ ତଳମୁଣ୍ଡରେ ଥିବା ୧୨ ଜିଲ୍ଲାର ଜିଲ୍ଲାପାଳ ଓ ଏସପିଙ୍କୁ ସତର୍କ ରହିବାକୁ ନିର୍ଦ୍ଦେଶ ଦିଆଯାଇଛି । ଗେଟ୍ ଖୋଲିବା ପରେ ମହାନଦୀ ଓ ଶାଖାନଦୀ ଗୁଡ଼ିକରେ ଜଳସ୍ତର ବଢ଼ିବ । ନଦୀ ମଧ୍ୟକୁ ପ୍ରବେଶ ଓ ଅନ୍ୟାନ୍ୟ ବ୍ୟବହାର ପାଇଁ ଜନସାଧାରଣ ସତର୍କତା ଅବଲମ୍ବନ କରିବା ଆବଶ୍ୟକ ବୋଲି କର୍ତ୍ତୃପକ୍ଷଙ୍କ ପକ୍ଷରୁ କୁହାଯାଇଛି । ଏହି ସମୟରେ ମହାନଦୀ ଭିତରେ ବୁଲାବୁଲି ନକରିବା, ଗାଈଗୋରୁଙ୍କୁ ମହାନଦୀ ଶଯ୍ୟାକୁ ନଛାଡ଼ିବା, ମାଛ ମାରିବା ପାଇଁ ନଯିବାକୁ ପରାମର୍ଶ ଦିଆଯାଇଛି ।
ଆଜି ଭାରତ-ଇଂଲଣ୍ଡ ଶେଷ ଦିନିକିଆ, ସିରିଜ୍ ବିଜୟ ଲକ୍ଷ୍ୟରେ ଉଭୟ ଟିମ୍
ମାଞ୍ଚେଷ୍ଟର: ଆଜି ଭାରତ-ଇଂଲଣ୍ଡ ତୃତୀୟ ତଥା ଶେଷ ଦିନିକିଆ ମ୍ୟାଚ୍ । ମଞ୍ଚେଷ୍ଟରରେ ଅପରାହ୍ମ ସାଢେ ୩ଟାରେ ମ୍ୟାଚ୍ ଖେଳାଯିବ । ୩ଟିକିଆ ସିରିଜରେ ଗୋଟିଏ ଲେଖାଏ ମ୍ୟାଚ୍ ଜିତି ଏବେ ସମାନ ସ୍ଥିତିରେ ଅଛନ୍ତି ଉଭୟ ଟିମ୍ । ପ୍ରଥମ ମ୍ୟାଚକୁ ଭାରତ ସହଜରେ ବିଜୟ ଲାଭ କରିଥିବାବେଳେ ଦ୍ୱିତୀୟ ମ୍ୟାଚରେ ୧୦୦ ରନରେ ପରାଜିତ ହୋଇଥିଲା ଟିମ୍ ଇଣ୍ଡିଆ । ଦ୍ୱିତୀୟ ମ୍ୟାଚରେ ଭାରତର ବ୍ୟାଟିଂ ବିପର୍ଯ୍ୟୟ ହୋଇଥିଲା । ତେବେ ଆଜିର ମ୍ୟାଚ ଜିତି ସିରିଜ୍ ଜିତିବାକୁ ହେଲେ ଭାରତୀୟ ବ୍ୟାଟ୍ସମ୍ୟାନଙ୍କୁ ନିଜ ବ୍ୟାଟିଂରେ ପରିବର୍ତ୍ତନ ଆଣିବାକୁ ହେବ । ଅନ୍ୟପକ୍ଷରେ ଟି-୨୦ ସିରିଜ୍ ପରାଜୟ ବରଣ କରିବା ପରେ ଆଜିର ମ୍ୟାଚ ଜିତି ଦିନିକିଆ ସିରିଜ୍ ହାତେଇବାକୁ ଚେଷ୍ଟା କରିବ ଘରୋଇ ଇଂଲଣ୍ଡ ।
ସେହିପରି ଗତ କିଛି ମ୍ୟାଚ୍ ଭଳି ରବିବାରର ମ୍ୟାଚ୍ ମଧ୍ୟ ବ୍ୟକ୍ତିଗତ ଭାବେ କୋହଲିଙ୍କ ପାଇଁ ଢେର ମହତ୍ତ୍ୱ ରଖିବ । ଏହାଛଡ଼ା ବାମହାତୀ ବୋଲର ଭାବେ ରବୀନ୍ଦ୍ର ଜାଡେଜାଙ୍କୁ ନିଜ ପ୍ରଦର୍ଶନରେ ଆହୁରି ଉନ୍ନତି ଆଣିବାକୁ ହେବ ।
ମୋଟୁରେ ବନ୍ୟା ପରିସ୍ଥିତିରେ ଆସୁଛି ସୁଧାର, ଏବେ ବି ପୁରୁଣା ମୋଟୁ ଜଳମଗ୍ନ
ମାଲକାନଗିରି: ମାଲକାନଗିରି ଜିଲ୍ଲାର ମୋଟୁରେ ବନ୍ୟା ପରିସ୍ଥିତିରେ ଆସୁଛି ସୁଧାର । ଆଜି ଧିରରେ ଧିରେ ବନ୍ୟା ଜଳ କମିବାରେ ଲାଗିଛି । ଗତକାଲି ବନ୍ୟା ପାଣି ମୋଟୁ ସ୍କୁଲ ପର୍ଯ୍ୟନ୍ତ ଆସିଥିବା ବେଳେ ଆଜି ପାଣି କମିବାରେ ଲାଗିଛି । କିନ୍ତୁ ଏବେ ବି ପୁରୁଣା ମୋଟୁ ସମ୍ପୂର୍ଣ୍ଣ ବୁଡ଼ି ରହିଛି । ଗୋଦାବରୀ ନଦୀରେ ବନ୍ୟା ଜଳ କମିବା ସହିତ ବର୍ଷା ମଧ୍ୟ କମିଛି । ଆଜି ମୋଟୁରୁ ପାଣି କମିବ ବୋଲି ଆଶା କରାଯାଉଛି ।
ଗତ ଦୁଇ ଦିନ ଧରି ମୋଟୁ ଅଂଚଳରେ ବନ୍ୟା ଜଳ ପ୍ରବାହିତ ହେବାରୁ ପ୍ରାୟ ୮୦ଟି ଘର ଭିତରେ ପାଣି ପ୍ରବେଶ କରିଥିଲା । ୪୦୦ ଲୋକଙ୍କୁ ବାତ୍ୟା ଆଶ୍ରୟ ସ୍ଥଳକୁ ସ୍ଥାନାନ୍ତର କରାଯାଇଛି । ଏହାସହ ୩୨୮ ଜଣ ହଷ୍ଟେଲ ଛାତ୍ର ଛାତ୍ରୀଙ୍କୁ MV-88 ବିଦ୍ୟାଳୟକୁ ନିଆଯାଇଛି । ମାଲକାନଗିରି ଜିଲ୍ଲା ପ୍ରଶାସନ ପକ୍ଷରୁ ଆଗୁଆ ପଦକ୍ଷେପ ଗ୍ରହଣ କରାଯାଇଛି । ରନ୍ଧାଖାଦ୍ୟ ସହ ଶୁଖିଲା ଖାଦ୍ୟ ଯୋଗାଇ ଦିଆଯାଇଛି । ବନ୍ୟା ଯୋଗୁଁ ଓଡ଼ିଶା ଓ ଆନ୍ଧ୍ରକୁ ଯୋଗାଯୋଗ ମଧ୍ୟ ପ୍ରଭାବିତ ହୋଇଛି ।
ସୁଧୁରିବ ଭାରତ-ଚୀନ ସମ୍ପର୍କ, ଆଜି ସୀମା ବିବାଦ ନେଇ କମାଣ୍ଡରସ୍ତରୀୟ ଆଲୋଚନା
ନୂଆଦିଲ୍ଲୀ: ଆଜି ଭାରତ ଓ ଚୀନ ମଧ୍ୟରେ ସୀମା ବିବାଦ ନେଇ କମାଣ୍ଡରସ୍ତରୀୟ ଆଲୋଚନା ହେବ । LACରୁ ନିଜ ଅଞ୍ଚଳକୁ ସେନା ଫେରାଇ ନେବା ନେଇ ଚାଲିଥିବା ପ୍ରକ୍ରିୟାକୁ ତ୍ୱରାନ୍ୱିତ କରିବା ପାଇଁ ଦୁଇ ପକ୍ଷଙ୍କ ମଧ୍ୟରେ ଆଲୋଚନା ହେବ । ଦୁଇ ଦେଶ ମଧ୍ୟରେ ସମ୍ପର୍କର ସୁଧାର ପାଇଁ ଏହା ନିହାତି ଆବଶ୍ୟକ ବୋଲି କିଛି ଦିନ ତଳେ ଚୀନର ବିଦେଶ ମନ୍ତ୍ରୀ ଓ୍ୱାଙ୍ଗ ୟି ସୂଚନା ଦେଇଥିଲେ । ଏଥିସହ ବୈଦେଶିକ ମନ୍ତ୍ରୀ ଏସ ଜୟଶଙ୍କରଙ୍କ ସହ ଆଲୋଚନା କରିଥିଲେ ।
ପୂର୍ବ ଲଦାଖରେ ଚାଲିଥିବା ସୀମା ବିବାଦ ଉଭୟ ଦେଶର ସମ୍ମାନକୁ ରକ୍ଷା କରି ସମାଧାନ ହେବା ନିହାତି ଆବଶ୍ୟକ । କାରଣ ସୀମା ବିବାଦ ଜାରି ରହିଲେ ଦୁଇ ଦେଶର ସ୍ୱାର୍ଥ୍ୟ ହାନି ସହ ଅନେକ ସମସ୍ୟା ସୃଷ୍ଟି ହେଉଥିବା ଚୀନ ପକ୍ଷରୁ କୁହାଯାଇଛି । LACରେ ଭାରତ ଓ ଚୀନ ମୁହାଁମୁହିଁ ହେବା ପରେ ଦୁଇ ସେନା ସୀମାର ଅତି ନିକଟରେ ଡେରା ପକାଇଥିଲେ । ପରେ ବିଭିନ୍ନ ପର୍ଯ୍ୟାୟରେ ସୀମାରୁ ସେନା ପ୍ରତ୍ୟାହୃତ ଆରମ୍ଭ ହୋଇଛି ।
ଆଜି ପ୍ରକାଶ ପାଇବ ICSE ଦଶମ ରେଜଲ୍ଟ, ସନ୍ଧ୍ୟା ୫ଟାରେ ଆସିବ ଫଳାଫଳ
ନୂଆଦିଲ୍ଲୀ: ଆଜି ଅପରାହ୍ଣ ୫ଟାରେ ପ୍ରକାଶ ପାଇବ ICSE ଦଶମ ରେଜଲ୍ଟ । cisce.org ଓ results.cisce.org ଜରିଆରେ ଉପଲବ୍ଧ ହେବ ରେଜଲ୍ଟ । ଏହାସହ 09248082883 ନମ୍ବରକୁ SMS କରି ରେଜଲ୍ଟ ଜାଣିପାରିବେ ପରୀକ୍ଷାର୍ଥୀ । ପରୀକ୍ଷା ଫଳ ପ୍ରକାଶ ପରେ ଆଜିଠାରୁ ଆସନ୍ତା ୨୩ ତାରିଖ ମଧ୍ୟରେ ଛାତ୍ରଛାତ୍ରୀ ମାର୍କ ଯାଞ୍ଚ ଲାଗି ଆବେଦନ କରିପାରିବେ । ଏଥିଲାଗି ପେପର ପିଛା ୧ ହଜାର ଟଙ୍କା ଜମା ଦେବାକୁ ପଡ଼ିବ । ସେମିଷ୍ଟାର ୧ ଓ ସେମିଷ୍ଟାର ୨କୁ ସମାନ ଗୁରୁତ୍ୱ ଦିଆଯାଇଛି ବୋଲି କହିଛନ୍ତି ବୋର୍ଡ ସମ୍ପାଦକ ଗେରି ଆରାଥୁନ ।
ଯେଉଁମାନେ ପ୍ରଥମ କିମ୍ବା ଦ୍ୱିତୀୟ ସେମିଷ୍ଟାର ମଧ୍ୟରୁ ଗୋଟିକରେ ପରୀକ୍ଷା ଦେଇ ନଥିବେ ସେମାନଙ୍କ ଫଳ ପ୍ରକାଶ ପାଇବନାହିଁ । ଗତବର୍ଷ କୋଭିଡ ଯୋଗୁ ଆଇସିଏସଇ ଓ ଆଇଏସସି ପରୀକ୍ଷା ହୋଇପାରି ନଥିଲା । ବିକଳ୍ପ ମାର୍କିଂ ବ୍ୟବସ୍ଥା ଅନୁସାରେ ଛାତ୍ରଛାତ୍ରୀଙ୍କୁ ମାର୍କ ପ୍ରଦାନ କରାଯାଇଥିଲା । ବିକଳ୍ପ ମାର୍କିଂ ବ୍ୟବସ୍ଥାରେ ୨ ଲକ୍ଷ ୭ ହଜାର ଛାତ୍ରଛାତ୍ରୀଙ୍କ ମଧ୍ୟରୁ ୨ ଲକ୍ଷ ୬ ହଜାର ଛାତ୍ରଛାତ୍ରୀ ପାସ୍ କରିଥିଲେ । ଗତ ବର୍ଷ ପାସ୍ ହାର ୯୯.୭୬ ପ୍ରତିଶତ ରହିଥିଲା ।
ଆଜି ମେଡିକାଲ ପ୍ରବେଶିକା ପରୀକ୍ଷା, ଓଡ଼ିଆ ସମେତ ୧୩ଟି ଭାଷାରେ ପରୀକ୍ଷା
ନୂଆଦିଲ୍ଲୀ: ଆଜି ମେଡିକାଲ ପ୍ରବେଶିକା ପରୀକ୍ଷା ନ୍ୟାସନାଲ ଏଲିଜିବିଲିଟି ଟେଷ୍ଟ ବା ନିଟ୍ । ଓଡ଼ିଆ ସମେତ ୧୩ଟି ଭାଷାରେ ହେଉଛି NEET ପରୀକ୍ଷା । ଦେଶ ବାହାରେ ୧୪ଟି କେନ୍ଦ୍ର ସହ ମୋଟ ୫୪୩ଟି ସହରରେ ପରୀକ୍ଷା ହେଉଛି । ଏଥିପାଇଁ ୧୮ ଲକ୍ଷରୁ ଅଧିକ ଛାତ୍ରଛାତ୍ରୀ ପଞ୍ଜିକରଣ କରିଛନ୍ତି । କିଛି ଛାତ୍ରଛାତ୍ରୀ ପରୀକ୍ଷା ତାରିଖ ପରିବର୍ତ୍ତନ କରିବାକୁ ଦାବି କରୁଥିଲେ । ଏନେଇ ଦିଲ୍ଲୀ ହାଇକୋର୍ଟରେ ବି ଆବେଦନ କରିଥିଲେ । କିନ୍ତୁ ମାମଲାର ଶୁଣାଣି କରି କୋର୍ଟ ଆବେଦନକୁ ଖାରଜ କରିଥିଲେ ।
NTA ତରଫରୁ ଛାତ୍ରଛାତ୍ରୀମାନଙ୍କ ପାଇଁ ନିର୍ଦ୍ଦେଶନାମା ଓ ଡ୍ରେସକୋର୍ଡ ଜାରି କରିଛନ୍ତି । ଗାଇଡଲାଇନକୁ କଡ଼ାକଡ଼ି ପାଳନ ଉପରେ ଗୁରୁତ୍ୱ ଦିଆଯାଇଛି । ପରୀକ୍ଷାର୍ଥୀମାନେ ଆଧାର କାର୍ଡ ସମେତ ଏକ ପରିଚୟ ପତ୍ର ନେବା ବାଧ୍ୟତାମୂଳକ । ପରୀକ୍ଷା କେନ୍ଦ୍ରରେ ମୋବାଇଲ ଫୋନ, ସ୍ମାର୍ଟଓ୍ୱାଚ, କାଲକୁଲେଟର ବା ଅନ୍ୟ କୌଣସି ଇଲେକ୍ଟ୍ରୋନିକ୍ସ ସାମଗ୍ରୀକୁ ଅନୁମତି ନାହିଁ ।
ଆସନ୍ତାକାଲି ରାଷ୍ଟ୍ରପତି ନିର୍ବାଚନ, ୧୦ଟାରୁ ସନ୍ଧ୍ୟା ୫ଟା ପର୍ଯ୍ୟନ୍ତ ଭୋଟିଂ
ଭୁବନେଶ୍ୱର: ଆସନ୍ତାକାଲି ରାଷ୍ଟ୍ରପତି ନିର୍ବାଚନ । ଭାରତର ୧୬ତମ ରାଷ୍ଟ୍ରପତି ବାଛିବ ଦେଶ । ଏଥିପାଇଁ ଶେଷ ପର୍ଯ୍ୟାୟରେ ପ୍ରସ୍ତୁତି । ଓଡ଼ିଶା ବିଧାନସଭା ପକ୍ଷରୁ ସବୁ ପ୍ରସ୍ତୁତି ଶେଷ ହୋଇଛି । ବିଧାନସଭାର ୫୪ ନମ୍ବର ପ୍ରକୋଷ୍ଠକୁ ବୁଥ୍ କେନ୍ଦ୍ର କରାଯାଇଛି । ସକାଳ ୧୦ଟାରୁ ସନ୍ଧ୍ୟା ୫ଟା ପର୍ଯ୍ୟନ୍ତ ଭୋଟ ଗ୍ରହଣ ହେବ । ସାଂସଦମାନେ ଚାହିଁଲେ ଏଠାରେ ନିଜର ମତ ସାବ୍ୟସ୍ତ କରିପାରିବେ । ନିର୍ବାଚନ ପାଇଁ ରିଟର୍ଣ୍ଣିଂ ଅଫିସର ସହ ଅନ୍ୟ ଅଧିକାରୀମାନଙ୍କୁ ନିଯୁକ୍ତି ଦିଆଯାଇଛି ।
ସେପଟେ ମାଟିର ଝିଅକୁ ଦେଶର ଶୀର୍ଷ ପଦରେ ବସାଇବାକୁ ଲାଗିପଡ଼ିଛି ବିଜେଡି । ଦଳମତ ନିର୍ବିଶେଷରେ ୧୪୭ ଜଣ ବିଧାୟକଙ୍କ ଭୋଟ ଦ୍ରୌପଦୀଙ୍କ ସପକ୍ଷରେ କେମିତି ଯିବ, ସେ ନେଇ ବିଜେଡି କରୁଛି ପ୍ରୟାସ । ମତଦାନ ବେଳେ ଗୋଟିଏ ବି ଭୋଟ ଯେମିତି ନାକଚ ନହେବ ତାକୁ ଗୁରୁତ୍ୱ ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏଥିଲାଗି ବିଜେଡିର ସମସ୍ତ ବିଧାୟକ ଓ ସାଂସଦଙ୍କୁ ଭୋଟର ଦିନକ ପୂର୍ବରୁ ପ୍ରଶିକ୍ଷଣ ଦିଆଯାଇଛି । ବିଧାନସଭାରେ ୫ ଜଣିଆ ଟିମ୍ କରାଯାଇ ବିଧାୟକମାନଙ୍କୁ ଭୋଟ ପାଇଁ ଟ୍ରେନିଂ ଦିଆଯାଇଛି । ସେହିପରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ସାଂସଦମାନଙ୍କୁ ନବୀନ ନିବାସରେ ମଧ୍ୟ ଟ୍ରେନିଂ ଦିଆଯାଇଛି ।
ପ୍ରବଳ ବର୍ଷାରେ ଭିଜୁଛି ଓଡ଼ିଶା, କାଲି ଯାଏ ଅବିଶ୍ରାନ୍ତ ବର୍ଷାରୁ ନାହିଁ ନିସ୍ତାର
ଭୁବନେଶ୍ୱର: ରାଜ୍ୟରେ ଜାରି ରହିଛି ପ୍ରବଳ ବର୍ଷା । ଲଗାଣ ବର୍ଷାରେ ବେହାଲ ଉପକୂଳ ଓଡ଼ିଶା । ଆସନ୍ତାକାଲି ପର୍ଯ୍ୟନ୍ତ ପ୍ରବଳ ବର୍ଷାରୁ ମିଳିବନି ନିସ୍ତାର । ସକ୍ରିୟ ଲଘୁଚାପ ଏବଂ ଘୂର୍ଣ୍ଣିବଳୟ ପ୍ରଭାବରେ ଜାରି ରହିଛି ଅବିଶ୍ରାନ୍ତ ବର୍ଷା । ୨୪ ଘଣ୍ଟା ମଧ୍ୟରେ ପ୍ରବଳରୁ ଅତି ପ୍ରବଳ ବର୍ଷା ପାଇଁ ୯ଟି ଜିଲ୍ଲାକୁ ଅରେଞ୍ଜ ଓ ୧୩ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । କଳାହାଣ୍ଡି, କନ୍ଧମାଳ, ବଲାଙ୍ଗୀର, ବୌଦ୍ଧ, ସୋନପୁର, ବରଗଡ଼, ଗଞ୍ଜାମ, ଖୋର୍ଦ୍ଧା ଏବଂ ପୁରୀ ଜିଲ୍ଲାରେ ୭୦ରୁ ୨ଶହ ମିଲିମିଟର ପର୍ଯ୍ୟନ୍ତ ବର୍ଷା ହୋଇପାରେ । ଉପକୂଳ ଏବଂ ଉତ୍ତର ଓଡ଼ିଶାର ଜିଲ୍ଲା ଗୁଡ଼ିକରେ ୭୦ରୁ ୧୦୦ ମିମି ପର୍ଯ୍ୟନ୍ତ ବର୍ଷା ହେବା ସମ୍ଭାବନା ରହିଛି ।
ତେବେ ପ୍ରବଳ ବର୍ଷାରେ ତଳି ଅଞ୍ଚଳ ଜଳମଗ୍ନ ହେବ । ବର୍ଷା ସମୟରେ ଘଣ୍ଟାପ୍ରତି ୪୫ରୁ ୫୫ କିମି ବେଗରେ ପବନ ବହିବ । ଏଥିପାଇଁ ସମୁଦ୍ର ମଧ୍ୟକୁ ଯିବାକୁ ମତ୍ସ୍ୟଜୀବୀଙ୍କୁ ମନା କରାଯାଇଛି । ଆସନ୍ତାକାଲି ପର୍ଯ୍ୟନ୍ତ ରାଜ୍ୟରେ ଏଭଳି ବର୍ଷା ଜାରି ରହିବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର ।