ନୂଆଦିଲ୍ଲୀ: ଆପଣ ଖାଉଥିବା ରୁଟି ଆଗକୁ ଆଉ ମିଳିବନି । ଆମେ ଏହାର ଫଟୋ ମୋବାଇଲରେ ତ ଦେଖିପାରିବା କିନ୍ତୁ ଖାଇବା ଥାଳିରେ ଦେଖିପାରିବାନି । ସେତେବେଳେ ଆପଣଙ୍କ ପାଖରେ ବ୍ୟାଙ୍କ ବାଲାନ୍ସ ଥିବ ହେଲେ ଖାଇବାକୁ ରୁଟି ନଥିବ ।
ଏ କଥା ଆମେ କହୁନୁ ସାମାଜିକ ଏବଂ ଆର୍ଥିକ କାରବାର ଉପରେ ନଜର ରଖିୁଥିବା ସଂସ୍ଥା, ‘ଦ ଓ୍ବାଲଡ କାଉଣ୍ଟ’ର ଏକ ରିପୋର୍ଟ ପୂରା ଦୁନିଆକୁ ଚକିତ କରିଦେଇଛି । ‘ଦ ଓ୍ବାଲଡ କାଉଣ୍ଟ’ ନିଜ ଓ୍ବେବସାଇଟରେ ଏହାର ଓଲଟା ଗଣତି ବି ଆରମ୍ଭ କରିଦେଇଛି । ଏଥିରେ ଦେଖାଯାଉଛି ୨୭ ବର୍ଷ ପରେ ବିଶ୍ବରେ ଘୋର ଖାଦ୍ୟ ସଂକଟ ଦେଖାଯିବ । ସେତେବେଳେ ଆପଣଙ୍କ ଥାଳିରୁ ଉଭାନ ହୋଇଯିବ ରୁଟି ।
ହେଲେ ଏହା କେମିତି ସମ୍ଭବ ହେବ? ଆପଣ ଭାବୁଥିବେ ପ୍ରତିବର୍ଷ ତ ଚାଷ ହେଉଛି । ଫସଲ ବି ଅମଳ ହେଉଛି । ଖାଦ୍ୟ ସରିଯିବ କିପରି?
ତାହାଲେ ଜାଣନ୍ତୁ …
‘ଦ ଓ୍ବାଲଡ କାଉଣ୍ଟ’ ଅନୁସାରେ ୨୦୫୦ ବର୍ଷ ବେଳକୁ ପୃଥିବୀରେ ଜନସଂଖ୍ୟା ହଜାରେ କରୋଡରୁ ଅଧିକ ହୋଇଯାଇଥିବ । ସେତେବେଳେ ୭୦ ପ୍ରତିଶତ ଅଧିକା ଖାଦ୍ୟର ଡିମାଣ୍ଡ ବଢ଼ିଯିବ । କିନ୍ତୁ ଆପଣ ଏହା ଜାଣି ଚିନ୍ତାରେ ପଡ଼ିବେ ଯେ, ଗତ ୪୦ ବର୍ଷରେ ୩ ଭାଗରୁ ଏକ ଭାଗ ମାଟି ଶସ୍ୟ ଉତ୍ପାଦନ କରିବା ସାମର୍ଥ୍ୟ ହରାଇବସିଛି । ଆଗାମୀ ୪୦ ବର୍ଷରେ ଜନସଂଖ୍ୟା ଦୃଷ୍ଟିରୁ ଆମକୁ ଏତେ ଶସ୍ୟ ଉତ୍ପାଦନ କରିବାକୁ ପଡ଼ିବ ଯାହା ଗତ ୮ ହଜାର ବର୍ଷରେ କେବେ ହୋଇନି । ୨୦୫୦ ବେଳକୁ ପୃଥିବୀରେ ଶସ୍ୟ ଉତ୍ପାଦନ ଯୋଗ୍ୟ ମାଟି ହିଁ ନଥିବ ଯାହାଦ୍ବାରା ଆମେ ଫସଲ ଉତ୍ପାଦନ କରିପାରିବା ।
ଶସ୍ୟ ସଂକଟ ୨୦୩୦ ପରଠୁ ଦେଖାଯିବ । ସେତେବେଳେ ଚାଉଳ ୧୩୦ ପ୍ରତିଶତ ଏବଂ ମକା ୧୮୦ ପ୍ରତିଶତ ମହଙ୍ଗା ହୋଇଯାଇଥିବ । ସେତେବେଳେ ଶସ୍ୟ ଉତ୍ପାଦନ କରିବାକୁ ୨ଟି ପୃଥିବୀର ଆବଶ୍ୟକତା ପଡ଼ିବ । ଯଦି ସେତେବେଳେ ମଙ୍ଗଳ ଗ୍ରହରେ ପାଣି ଏବଂ ଚାଷ ଉପଯୋଗୀ ଜମି ଖୋଜା ଯାଇନଥିବ ତାହାଲେ ପୃଥିବୀ ଶସ୍ୟ ଉତ୍ପାଦନ ନେଇ ସରେଣ୍ଡର କରିପାରେ ।
