ନବରଙ୍ଗପୁର: ଛେଳି ଚରାଇବାକୁ ଯାଇ ପଥର ସନ୍ଧିରେ ଫସିଲା ବାଳକ। ପ୍ରାୟ ଦୀର୍ଘ ୧୦ ଘଣ୍ଟାର ରେସକ୍ୟୁ ଅପରେସନ୍ ପରେ କରାଯାଇଛି ଉଦ୍ଧାର । ନବରଙ୍ଗପୁର ତେନ୍ତୁଳିଖୁଣ୍ଟି ବ୍ଲକ୍ ସ୍ଥିତ କରାଘାଟି ଗାଁରେ ଘଟିଛି ଏପରି ଅଭାବନୀୟ ଘଟଣା । ଗତକାଲି ଦିନ ୧୦ଟାରେ ଜଣେ ୧୨ ବର୍ଷର ବାଳକ ପାହାଡ଼ ଉପରେ ଛେଳି ଚରାଇବାକୁ ଯାଇଥିବା ସମୟରେ ଦୁଇଟି ପଥର ସନ୍ଧିରେ ତା’ର ମୁଣ୍ଡ ଫସି ଯାଇଥିଲା। ବାଳକର ଗୋଡ଼ ଦୁଇଟି ଉପରେ ଥିବା ବେଳେ ମୁଣ୍ଡଟି ପଥର ସନ୍ଧିରେ ଫସି ରହିଥିଲା। ଚିତ୍କାର ଶୁଣି ଗାଁର କିଛି ଲୋକ ଘଟଣାସ୍ଥଳରେ ପହଞ୍ଚି ଉଦ୍ଧାର ବାଳକଟିକୁ କରିବାକୁ ଉଦ୍ୟମ କରିଥିଲେ। ସୂଚନା ପରେ ଅପରାହ୍ନରେ ତେନ୍ତୁଳିଖୁଣ୍ଟି ବିଡ଼ିଓ ଓ ଅଗ୍ନିଶମ ବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ । ରାତି ପ୍ରାୟ ୮ଟା ବେଳକୁ ବାଳକକୁ ଉଦ୍ଧାର କରାଯାଇଥଲା । ତେବେ ମୁଣ୍ଡ କେମିତି ପଥର ସନ୍ଧିରେ ଫସିଲା ତାହା ସ୍ପଷ୍ଟ ହୋଇନାହିଁ। ଏହାପରେ ତାକୁ ପ୍ରଥମେ ପାତ୍ରପୁଟ୍ ମେଡିକାଲ ଓ ପରେ ତେନ୍ତୁଳିଖୁଣ୍ଟି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା। ଏବେ ବାଳକର ସ୍ୱାସ୍ଥ୍ୟାବସ୍ଥା ଭଲ ଥିବା ଜଣାପଡିଛି।
BMWରେ ଝିଅର ପାୱାର ଶୋ’, କ୍ଷମା ମାଗିଲେ ବିଧାୟକ ବାପା
ବେଙ୍ଗାଲୁରୁ: କଥାରେ ଅଛି ବଡ ଘର ବଡ ଗୁମର କଥା । କିନ୍ତୁ ବଡବଡିଆଙ୍କ ଔଦ୍ଧତାମି ଏବେ ରାସ୍ତାଘାଟରେ ଦେଖିବାକୁ ମିଳିଛି । ବିଧାୟକ ବାପାଙ୍କ ପାୱାର ଦେଖାଇ ଦୁର୍ବ୍ୟବହାର କରିଛନ୍ତି ଝିଅ । ସହର ଭିତରେ ଦ୍ରୁତଗତିରେ ଗାଡି ଚଲାଇବା ସହ ଟ୍ରାଫିକ ନିୟମ ଉଲ୍ଲଙ୍ଘନ କରି ତଣ୍ଡ ଗଣିଛନ୍ତି ବିଧାୟକଙ୍କ ଝିଅ । ଆଉ ଝିଅର ଏଭଳି କାରନାମାରେ କ୍ଷମା ମାଗିଛନ୍ତି କର୍ଣ୍ଣାଟକର ବିଜେପି ବିଧାୟକ ଅରବିନ୍ଦ ଲିମ୍ବାଭଲି ।
ଗତ ଗୁରୁବାର ସନ୍ଧ୍ୟାରେ ବେଙ୍ଗାଲୁରୁ ରାସ୍ତାରେ ହଇଚଇ ସୃଷ୍ଟି କରିଥିଲା ବିଏମଡବ୍ଲୁର ୨୦୨୦ ମଡେଲ (K03-NH0909) । ସନ୍ଧ୍ୟା ୫ଟା ବେଳେ କୁଇନ ରୋଡରୁ ରାଜଭବନ ରୋଡ ମଧ୍ୟରେ ଔଦ୍ଧତାମି ଦେଖାଇଥିଲା BMW । ଦ୍ରୁତଗତିରେ ଆସି ଜଣେ ପୋଲିସ ଅଧିକାରୀଙ୍କ ଗାଡିକୁ ଅତିକ୍ରମ କରିବା ବେଳେ BMW କୁ ଅଟକାଇଥିଲା ପୋଲିସ । ଏହି ସମୟରେ ଗାଡିରୁ ବାହାରି ଆସି ପୋଲିସ ସହ ପାଟିତୁଣ୍ଡ ଆରମ୍ଭ କରି ଦେଇଥିଲେ ୨୦ ବର୍ଷୀୟ ଯୁବତୀ । ‘କଣ ଏସିପିଙ୍କ କାରକୁ ଓଭରଟେକ କରିବାରୁ ଗାଡି ଅଟକାଇଛ ? ଏଇଟା ଜଣେ ବିଧାୟକଙ୍କ ଗାଡି । ମୋ ବାପା ହେଉଛନ୍ତି ବିଧାୟକ ଅରବିନ୍ଦ ଲିମ୍ବାଭାଲି । ଆମକୁ ଯିବାକୁ ଦିଅନ୍ତୁ । ମୁଁ ଜୋରିମାନା ଦେବି ନାହିଁ । ଓଭରଟେକିଂ ପାଇଁ ମାମଲା ରୁଜୁ ହୁଏନି’ ବୋଲି ଉତକ୍ଷିପ୍ତ ହୋଇ ପ୍ରଶ୍ନ କରିଥିଲେ ଯୁବତୀ । ତେବେ ସେ ଭୁଲ ଦିଗରେ ଦ୍ରୁତଗତିରେ ଆସି ଗାଡି ଅତିକ୍ରମ କରିଥିବା ପୋଲିସ ତାଙ୍କୁ କହିଥିଲେ ମଧ୍ୟ ମାନିନଥିଲେ ଯୁବତୀ ।
ସେହିପରି ସେଠାରେ ଥିବା ଗଣମାଧ୍ୟମ ସଂସ୍ଥାର କ୍ୟାମେରାମ୍ୟାନ ଏହି ଘଟଣାକୁ କଏଦ କରିବା ସମୟରେ ତାଙ୍କୁ ମଧ୍ୟ ଅସଦାଚରଣ କରିଥିଲେ ଯୁବତୀ । ‘ତୁମକୁ କିଏ ପଠାଇଛି ଏଠାକୁ ? କିଏ ତୁମେ ?’ କ୍ୟାମେରା ବନ୍ଦ କର କହି ଇଂରାଜୀରେ ଚିତ୍କାର କରିବା ସହ କ୍ୟାମେରାକୁ ମଧ୍ୟ ତିନି ଚାରି ମୁଥ ମାରିଥିଲେ ।
ଗାଡିରେ ବସିଥିବା ଆଉ ୩ ଜଣ ବନ୍ଧୁଙ୍କ ମଧ୍ୟରୁ ଜଣେ ଯୁବକ ଅନଲାଇନରେ ଜୋରିମାନା ଗଣିବା ପରେ ପୋଲିସ ସେମାନଙ୍କ ଗାଡି ଯିବାକୁ ଦେଇଥିଲା । ସାତୋଟି ଜାଗାରେ ଭୁଲ ପାର୍କିଂ ପାଇଁ ଏକ ହଜାର ଟଙ୍କା ଓ ଛଅଟି ଜାଗାରେ ଟ୍ରାଫିକ ନିୟମ ଉଲ୍ଲଙ୍ଘନ ପାଇଁ ୫୦୦ ଟଙ୍କା ଜୋରିମାନା ଲଗାଇଥିଲା ପୋଲିସ ।
ସେପଟେ ଏହି ଘଟଣା ପାଇଁ କ୍ଷମା ମାଗିଛନ୍ତି ମହାଦେବପୁର ବିଧାୟକ ଅରବିନ୍ଦ ଲିମ୍ବାଭାଲି । ‘ଆମ ପରିବାରର ସଂସ୍କାର ଏଭଳି ନୁହେଁ । ଯଦି ମୋ ଝିଅ କାହା ମନରେ ଆଘାତ ଦେଇଛି ଏଥିପାଇଁ ମୁଁ କ୍ଷମା ମାଗୁଛି’ କହିଛନ୍ତି ବିଧାୟକ ।
ବାରବାଟୀ ଟି-୨୦: ଓଡ଼ିଶାରେ ପହଞ୍ଚିଲେ ଦୁଇ ଦେଶର ଖେଳାଳି
ଭୁବନେଶ୍ୱର: ଓଡ଼ିଶାରେ ପହଞ୍ଚିଲେ ଖେଳାଳି । ବାରବାଟୀ ଟି-୨୦ ପାଇଁ ଉଭୟ ଦଳର ଖେଳାଳି ଭୁବନେଶ୍ୱର ବିମାନ ବନ୍ଦରରେ ପହଞ୍ଚିଛନ୍ତି । ଭାରତ ଓ ଦକ୍ଷିଣ ଆଫ୍ରିକା ଦଳର ସମସ୍ତ ଖେଳାଳି ବିମାନବନ୍ଦରରେ ପହଞ୍ଚିଛନ୍ତି । ବିମାନବନ୍ଦରରେ ପହଞ୍ଚିବା ପରେ ଉଭୟ ଦେଶରେ ଖେଳାଳିଙ୍କୁ ଭବ୍ୟ ସ୍ୱାଗତ କରାଯାଇଛି । ବିମାନବନ୍ଦରରେ ପହଞ୍ଚିବା ପରେ ସେଠାରୁ ସ୍ୱତନ୍ତ୍ର ବସ୍ ଯୋଗେ ହୋଟେଲ ମେ ଫାୟର ଅଭିମୁଖେ ଯାତ୍ରା କରିଛନ୍ତି ଉଭୟ ଦେଶର ଖେଳାଳି । କଡ଼ା ସୁରକ୍ଷା ମଧ୍ୟରେ ଖେଳାଳିଙ୍କୁ ହୋଟେଲକୁ ନିଆଯାଉଛି ।
ରାଉରକେଲାରେ ବିଜେପି ନେତାଙ୍କ ଦାଦାଗିରି, ଶ୍ରମିକ ନେତାଙ୍କ ଘରେ ପଶି ସ୍ତ୍ରୀଙ୍କୁ କଲେ ଅସଦାଚରଣ
ରାଉରକେଲା: ରାଉରକେଲାରେ ବିଜେପି ନେତାଙ୍କ ଦାଦାଗିରି । ଶ୍ରମିକ ନେତା ପ୍ରଶାନ୍ତ ମାଝୀଙ୍କ ଘରେ ପଶି ବିଜେପି ନେତା ଦାଦାଗିରି କରିଥିବା ଅଭିଯୋଗ ହୋଇଛି । ପ୍ରଶାନ୍ତ ମାଝୀଙ୍କ ପତ୍ନୀଙ୍କୁ ଦୁର୍ବ୍ୟବହାର କରିବା ସହ ଆକ୍ରମଣ କରିଥିବା ଅଭିଯୋଗ ହୋଇଛି । ଏପରିକି ମାରିଦେବା ପାଇଁ ଧମକ ଦେବା ସହ ବିଭିନ୍ନ ଆସବାବପତ୍ର ଭାଙ୍ଗିଥିବା ନେଇ ସେକ୍ଟର ୩ ଥାନାରେ ଅଭିଯୋଗ ହୋଇଛି । ଏହି ଅଭିଯୋଗ ପରେ ପୋଲିସ ପକ୍ଷରୁ ତଦନ୍ତ ଆରମ୍ଭ ହୋଇଛି । ଅଭିଯୋଗ ଅନୁସାରେ, ଗତକାଲି ଜଣେ ଯୁବ ବିଜେପି ନେତା, ପ୍ରଶାନ୍ତ ମାଝୀଙ୍କ ଘରେ ଜୋର ଜବରଦସ୍ତ ପଶିଥିଲେ । ପ୍ରଶାନ୍ତ ମାଝୀଙ୍କ ପତ୍ନୀଙ୍କୁ ଧକ୍କା ମାରି ଅଶ୍ଲୀଳ ଭାଷାରେ ଗାଳିଗୁଲଜ କରିବା ସହ ଆକ୍ରମଣ କରିଥିବା ଅଭିଯୋଗ ହୋଇଛି ।
ବିଜେପି ସାଂସଦ ଜୁଏଲ ଓରାମଙ୍କ ନାଁରେ ଅଶାଳୀନ ଆଚରଣ ନେଇ ଝିରପାଣି ଥାନାରେ ଅଭିଯୋଗ କରିଥିଲେ ଗୌରୀ ମୁଣ୍ଡାରୀ ଓ ଶ୍ରମିକ ନେତା ପ୍ରଶାନ୍ତ ମାଝୀ । କିନ୍ତୁ ଏହାପରେ ଏମାନଙ୍କ ନାଁରେ ସେକ୍ଟର ତିନି ଥାନାରେ ବିଜେପିର ଜଣେ ନାରୀ ନେତ୍ରୀ ମିଥ୍ୟା ଅଭିଯୋଗ କରିଛନ୍ତି । ବିଜେପି ବୈଠକ ସମୟରେ ହୋଇଥିବା ଗଣ୍ଡଗୋଳରେ ଗୌରୀ ମୁଣ୍ଡାରୀ ଓ ପ୍ରଶାନ୍ତ ମାଝି ସମ୍ପୃକ୍ତ ନଥିଲେ ମଧ୍ୟ ସେକ୍ଟର ୩ ଥାନାରେ ଉଭୟଙ୍କ ନାଁରେ ମିଥ୍ୟା ଅଭିଯୋଗ ହୋଇଛି । ଗୌରୀ ମୁଣ୍ଡାରୀ ଓ ପ୍ରଶାନ୍ତ ମାଝୀଙ୍କୁ ମିଛ କେସରେ ଫସାଇବା ସହ ଜୀବନରେ ମାରିଦେବା ପାଇଁ ବିଜେପି ନେତା ଉଦ୍ୟମ କରୁଥିବା ଅଭିଯୋଗ ହୋଇଛି ।
ଦେବସ୍ନାନ ପୂର୍ଣ୍ଣିମା ପାଇଁ ପ୍ରସ୍ତୁତି କଡ଼ାକଡ଼ି; ସ୍ୱାସ୍ଥ୍ୟ, ପାନୀୟ ଜଳ, ପାର୍କିଂ ବ୍ୟବସ୍ଥାକୁ ଗୁରୁତ୍ୱ
ପୁରୀ: ପାଖେଇ ଆସୁଛି ପବିତ୍ର ଦେବ ସ୍ନାନ ପୂର୍ଣ୍ଣିମା । ସଜେଇ ହେଉଛି ଜଗନ୍ନାଥ ଧାମ । ପବିତ୍ର ସ୍ନାନ ପୂର୍ଣ୍ଣିମା ଉପଲ୍ଲଖେ ଜିଲ୍ଲା ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି ଆରମ୍ଭ ହୋଇଛି | ଉଭୟ ବ୍ୟାରିକେଡ ଓ ବଡ଼ଦାଣ୍ଡରୁ ଭକ୍ତମାନେ ମହାପ୍ରଭୁଙ୍କୁ ଦର୍ଶନ କରିପାରିବେ| ସହରର ବିଭିନ୍ନ ସ୍ଥାନରେ ୬ଟି ସ୍ୱତନ୍ତ୍ର ପାର୍କିଂ ସ୍ଥଳର ବ୍ୟବସ୍ଥା କରାଯାଇଛି | ସ୍ୱାସ୍ଥ୍ୟ, ପାନୀୟ ଜଳ ଓ ପୋଲିସ ପ୍ରଶାସନ ପକ୍ଷରୁ ଭକ୍ତଙ୍କ ଶୃଙ୍ଖଳିତ ଦର୍ଶନ ପାଇଁ ସମସ୍ତ ବ୍ୟବସ୍ଥା କରାଯାଇଛି | ସେବାୟତଙ୍କ ସହ ସମନ୍ୱୟ ରଖାଯାଇ ସମସ୍ତ ନୀତିକୁ ତ୍ୱରାନ୍ୱିତ କରାଯିବ ବୋଲି ଜିଲ୍ଲାପାଳ ସମର୍ଥ ବର୍ମା ସୂଚନା ଦେଇଛନ୍ତି ।
ସେପଟେ ବିଶ୍ଵ ପ୍ରସିଦ୍ଧ ରଥଯାତ୍ରା ପାଇଁ ରଥ ନିର୍ମାଣ କାର୍ଯ୍ୟ ୩୬ ଦିନରେ ପହଞ୍ଚିଛି । ୪ ଦିନ ପୂର୍ବରୁ ଆଜି ତିନି ରଥର ଚାରି ନାହାକା ଉଠିଛି। ରଥ ନିର୍ମାଣ ଟାର୍ଗେଟ ଅନୁଯାୟୀ , ଦେବସ୍ନାନ ପୂର୍ଣ୍ଣିମା ଦିନ ହିଁ ତିନି ରଥର ଚାରି ନାହାକା ଉଠିଥାଏ । କିନ୍ତୁ ଚଳିତ ବର୍ଷ ଆଗୁଆ ଏହି କାର୍ଯ୍ୟ କରାଯାଇଛି । ଏହା ପରେ ରଥର ଉପରି ଭାଗର ନିର୍ମାଣ କାର୍ଯ୍ୟ କରାଯିବ ।
ମୌତ କା କୂଆ: ବାଲଟିଏ ପାଣି ପାଇଁ ବାଜିରେ ଜୀବନ
ମୁମ୍ବାଇ: ପାଣି ପାଇଁ ଚାଲିଛି ବିପଦଜ୍ଜନକ ପ୍ରତିଯୋଗିତା । ଏମିତି ଘଟଣା ଦେଖିବାକୁ ମିଳିଛି ମହାରାଷ୍ଟ୍ର ମେଲଘାଟର ଖଳିଆଳ ଗାଁରେ । ବାଲଟିଏ ପାଣି ପାଇଁ ଜୀବନକୁ ବାଜିରେ ଲଗାଇ ଦେଇଛନ୍ତି ଗ୍ରାମବାସୀ । ଗାଁରେ ଦେଖିବାକୁ ମିଳିଛି ଜଳକଷ୍ଟ । ଗାଁରେ ୧୫୦୦ ଜନସଂଖ୍ୟାଙ୍କ ଶୋଷ ମେଣ୍ଟାଇବା ପାଇଁ ୨ଟି କୂପ ରହିଛି । ହେଲେ କୂଅଟି ପ୍ରାୟତଃ ଶୁଖିଲା ରହୁଥିବାରୁ 2 ରୁ ୩ଟି ଟ୍ୟାଙ୍କର ଗାଁକୁ ପାଣି ଯୋଗାଇଥାନ୍ତି ।
ଟ୍ୟାଙ୍କରର ପାଣି ଯୋଗାଇବା ବ୍ୟବସ୍ଥା ଦେଖିଲେ ଯେ କେହି ବି ଆଶ୍ଚର୍ଯ୍ୟ ହେବେ । ପ୍ରତିଦିନ ୨ଟି ଟ୍ୟାଙ୍କର ଆସି ଶୁଖିଲା କୂଅରେ ପାଣି ଭରିଥାଏ । ଆଉ ଏଠାରୁ ପାଣି ନେବା ପାଇଁ ପ୍ରତିଯୋଗିତା କରିଥାନ୍ତି ଗ୍ରାମବାସୀ । ତାହା ବି ଅତି ବିପଦଜ୍ଜନକ ଭାବେ ଜୀବନକୁ ବାଜି ଲଗାଇ ଗ୍ରାମବାସୀ ମାନେ କୂଅରୁ ପାଣି କାଢି ଥାଆନ୍ତି ।
#WACTH | Maharashtra: People of Khadial village in Melghat are risking their lives for a bucket of water
"There are only two wells in the village which have almost dried up, a village of 1500 population is dependent on 2-3 tankers for water every day", said a villager pic.twitter.com/5tWAjDgqci
— ANI (@ANI) June 10, 2022
ସେପଟେ ଅପରିଷ୍କାର ପାଣି ପିଇ ବିଭିନ୍ନ ରୋଗର ଶିକାର ହେଉଛନ୍ତି ଗାଁ ଲୋକେ । ଆଉ ଯଦି କେହି ଅସୁସ୍ଥ ହୁଏ ତେବେ ହସ୍ପିଟାଲ ଯିବା ପାଇଁ ଗାଁକୁ ରାସ୍ତା ଟିଏ ବି ନାହିଁ । ତେବେ ଜଳ ସଙ୍କଟ ଦୂର ପାଇଁ ଗାଁରେ ଚାଲିଛି ଜୀବନ-ମରଣ ଖେଳ ।
ବଢ଼ିଲା ଓଡ଼ିଶା ହାଇକୋର୍ଟ ବିଚାରପତିଙ୍କ ସଂଖ୍ୟା
କଟକ: ବଢ଼ିଲା ଓଡ଼ିଶା ହାଇକୋର୍ଟ ବିଚାରପତିଙ୍କ ସଂଖ୍ୟା । ଓଡ଼ିଶା ହାଇକୋର୍ଟର ନୂତନ ବିଚାରପତି ଭାବେ ଶପଥ ନେଲେ ଜଷ୍ଟିସ ଶୁଭାଶିଷ ତାଳପତ୍ର ଓ ବରିଷ୍ଠ ଆଇନଜୀବି ସଞ୍ଜୟ ମିଶ୍ର । ହାଇକୋର୍ଟର ପୁରୁଣା କୋଠାର ନୂତନ ସମ୍ମିଳନୀ କକ୍ଷରେ ଏହି ଶପଥ ପାଠ କାର୍ଯ୍ୟକ୍ରମ ଅନୁଷ୍ଠିତ ହୋଇଛି । ଓଡ଼ିଶା ହାଇକୋର୍ଟର ମୁଖ୍ୟ ବିଚାରପତି ଡକ୍ଟର ଜଷ୍ଟିସ ଏସ ମୂରଲୀଧର ଏହି ଶପଥ ପାଠ କରାଇଛନ୍ତି । ତେବେ ଗତ ୨୭ ତାରିଖରେ ସୁପ୍ରିମକୋର୍ଟ କଲେଜିଏମଙ୍କ ସୁପାରିଶକ୍ରମେ ବିଭିନ୍ନ ହାଇକୋର୍ଟର ବିଚାରପତିଙ୍କ ବଦଳି ପାଇଁ ଏକ ବିଜ୍ଞପ୍ତି ପ୍ରକାଶ ପାଇଥିଲା । ଯେଉଁଥିରେ ଓଡ଼ିଶା ହାଇକୋର୍ଟର ବିଚାରପତି ଜଷ୍ଟିସ ଚିତ୍ତରଂଜନ ଦାସଙ୍କୁ କଲିକତା ହାଇକୋର୍ଟକୁ ବଦଳି କରାଯାଇଥିବା ବେଳେ ତ୍ରିପୁରା ହାଇକୋର୍ଟରୁ ଓଡ଼ିଶା ହାଇକୋର୍ଟକୁ ବଦଳି ହୋଇଥିଲେ ଜଷ୍ଟିସ ଶୁଭାଶିଷ ତାଳପତ୍ର । ସେପଟେ ଓଡ଼ିଶା ହାଇକୋର୍ଟର ବରିଷ୍ଠ ଆଇନଜୀବୀ ସଞ୍ଜୟ କୁମାର ମିଶ୍ରଙ୍କ ନିଯୁକ୍ତିକୁ ନେଇ କେନ୍ଦ୍ର ସରକାରଙ୍କ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଥିଲା ।
ଖେଳାଳିଙ୍କ ଖାଇବା ପାଇଁ ଆସିଲା ମେନ୍ୟୁ, ଜାଣନ୍ତୁ ମେ ଫେୟାର ପକ୍ଷରୁ କ’ଣ ଅଛି ମେନ୍ୟୁରେ
ଭୁବନେଶ୍ୱର: ଜୁନ ୧୨ ତାରିଖରେ ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଦ୍ୱିତୀୟ ଟି-୨୦ ମୁକାବିଲା । ଏଥିପାଇଁ ଉଭୟ ଟିମ୍ ଆଜି ଭୁବନେଶ୍ୱରରେ ପହଞ୍ଚିବେ । ଭୁବନେଶ୍ୱର ମେ ଫେୟାର ହୋଟେଲରେ ଆଜିଠାରୁ ୧୩ ତାରିଖ ପର୍ଯ୍ୟନ୍ତ ରହିବେ ୨ ଦେଶର ଖେଳାଳି । ତେଣୁ ଖେଳାଳିଙ୍କ ଖାଦ୍ୟପେୟ ଉପରେ ହୋଟେଲ୍ ପକ୍ଷରୁ ବିଶେଷ ଦୃଷ୍ଟି ଦିଆଯାଇଛି ।
ହୋଟେଲର ମୁଖ୍ୟ ସେଫଙ୍କ ସୂଚନା ଅନୁସାରେ ଦକ୍ଷିଣ ଆଫ୍ରିକା ଦଳର ଖେଳାଳିଙ୍କ ମେନ୍ୟୁରେ ରହିବ ଅଧିକାଂଶ ନନଭେଜ୍ ଖାଦ୍ୟ । ଅନ୍ୟପଟେ ଭାରତୀୟ ଖେଳାଳିଙ୍କ ମେନ୍ୟୁରେ ନନଭେଜ୍ ସହ ଭେଜ୍ ଖାଦ୍ୟ ରହିବ । ଉଭୟ ଦେଶର ଖେଳାଳିଙ୍କୁ ସ୍ୱତନ୍ତ୍ର ଭାବେ କିଛି ଓଡ଼ିଆ ଖାଦ୍ୟ ପରଷାଯିବ । ସେପଟେ ସମସ୍ତ ଖାଦ୍ୟ କମ୍ ମସଲା ଓ କମ୍ ତେଲରେ ତିଆରି ହେବ । ହୋଟେଲ୍ ସେଫଙ୍କ ଅନୁସାରେ ଉଭୟ ଦେଶର ଖେଳାଳିଙ୍କ ମେନୁରେ ରୋଷ୍ଟ ଚିକେନ, ଦେଶୀ ଚିକେନ ଝୋଳ, ମଟନ କରି, ଚିଙ୍ଗୁଡ଼ି ଓ ପାମ୍ପ୍ଲେଟ୍ ମାଛ ଭଳି ଆମିଷ ଖାଦ୍ୟ ରହିବ । ସେହପିରି ନିରାମିଷରେ ଡାଲମା, ବଟର ପନିର, ବଡ଼ିଚୁରା, ଛତୁ ବେସର ଓ ଶାଗ ସ୍ୱତନ୍ତ୍ର ଭାବେ ପରଷାଯିବ ।ଏଥିସହ ଓଡ଼ିଶାର ପାରମ୍ପରିକ କଂସା ଓ ପିତ୍ତଳ ଥାଳି, ଗ୍ଲାସ ସାଙ୍ଗକୁ ଚାମଚରେ ଖାଦ୍ୟ ପରଷା ଯିବାର ବ୍ୟବସ୍ଥା କରାଯାଇଛି । ଖେଳାଳିଙ୍କ ପାଇଁ ସ୍ୱତନ୍ତ୍ର ମେନୁ ଆସି ସାରିଛି ଯାହକୁ ନେଇ ହୋଟେଲ ପକ୍ଷରୁ ଖାଦ୍ୟ ପ୍ରସ୍ତୁତି କରାଯାଉଛି ।
ସେହିପରି ବ୍ରେକ୍ଫାଷ୍ଟରେ ଟୋଷ୍ଟେଡ୍ ବ୍ରେଡ, ଡ୍ରାଏ ଫ୍ରୁଟ୍ସ,, କ୍ଷୀର, ଦହି, ଜୁସ୍, ପଇଡ଼ ପାଣି, ସୁଗାର ଫ୍ରି ଜାମ୍, ଇଡଲି, ଦୋସା, ସମ୍ବର, ଚଟଣି, ଚା’, କଫି, ଅମଲେଟ, ଅଳ୍ପ ତେଲ ଓ ମସଲାଯୁକ୍ତ ଚିକେନ୍ ତରକାରୀ ପ୍ରସ୍ତୁତ ରହିବ ।
ଲଞ୍ଚରେ ବାସୁମତୀ ସହ ଅନ୍ୟ ୩ ପ୍ରକାର ଚାଉଳର ଭାତ, କାନିକା ରାଇସ, ରୁଟି, ଗ୍ରୀନ୍ ସାଲାଡ, ଓଡ଼ିଆ ଡାଲମା, ହନୀ ଚିକେନ୍, ଦେଶୀ କୁକୁଡ଼ା ଝୋଳ, ତନ୍ଦୁରୀ ଚିକେନ୍, ଗ୍ରୀଲ୍ଡ ମାଛ, ମଟନ କରି, ଚିଙ୍ଗୁଡ଼ି ଓ ପାମ୍ପ୍ଲେଟ୍ ମାଛ, ଡାଲି, ତଡ଼କା, ପନିର, ଦିୱାନି ଦମ୍ କି ହାଣ୍ଡି, ଅମେରିକାନ ଚପସି, ପ୍ରନ୍ noodles ସହ ଖେଳାଳିଙ୍କ ପସନ୍ଦ ଅନୁସାରେ କହିବା ପ୍ରସ୍ତୁତ ହୋଇଛି ।
ସେହିପରି ଡିନରରେ ୩ ପ୍ରକାରର ଚାଉଳର ଭାତ, ରୁଟି, ଗ୍ରୀନ୍ ସାଲାଡ, ସିଝା ଅଣ୍ଡା, ଗ୍ରୀଲଡ ଚିକେନ, ଦେଶୀ କୁକୁଡ଼ା ଝୋଳ, ତନ୍ଦୁରୀ ଚିକେନ୍, ଗ୍ରୀଲଡ ମାଛ, ମଟନ କରି, ଚିଙ୍ଗୁଡ଼ି ଓ ପାମ୍ପ୍ଲେଟ୍ ମାଛ, ଡାଲି, ତଡ଼କା, ପନିର, ଦିୱାନି ଦମ୍ କି ହାଣ୍ଡି, ସମ୍ବର, ପାମ୍ପଡ଼, ଆମ୍ବ ଆଚାର, ଦହି, ରାଇତା ଖାଇବା ପାଇଁ ତାଲିକା ଆସିଛି ।
ଋଣ ଭାର ସହିନପାରି ଆତ୍ମହତ୍ୟା କଲେ ଦମ୍ପତି
ଢ଼େଙ୍କାନାଳ: ଡକାଡକି ହୋଇ ବିଶ ପିଇବା ସହ ରଶି ଲଗାଇ ଆତ୍ମହତ୍ୟା କଲେ ଦମ୍ପତି । ଏମିତି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ଢେଙ୍କାନାଳ ସଦର ଥାନା କାଙ୍କଡ଼ପାଳ ଗାଁରେ । ଆମେ ବିଷ ପିଇଛୁ ବୋଲି ମଧ୍ୟ ଲେଖି ଆତ୍ମହତ୍ୟା କରିଥିବା ଜଣାପଡ଼ିଛି । ଋଣ ଭାର ସହିନପାରି ଆତ୍ମହତ୍ୟା କରିଥିବା ଅନୁମାନ କରାଯାଉଛି । ମୃତ ଦମ୍ପତି ହେଲେ ବିଶିକେଶନ ସାହୁ ମାମା ସାହୁ । ଉପର ମହଲା ଛାତର ଏକ ପରିତ୍ୟକ୍ତ ଘରେ ଆତ୍ମହତ୍ୟା କରିଛନ୍ତି ଦମ୍ପତି । ଖବରପାଇ ଘଟଣାସ୍ଥଳରେ ସଦର ଥାନା ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।
ସାକାର ହେଉଛି ପିଲାଙ୍କ ସ୍ୱପ୍ନ, ଆଜି ୫ ଜିଲ୍ଲାର ୪୧୬ଟି ରୂପାନ୍ତରିତ ହାଇସ୍କୁଲକୁ ଲୋକାର୍ପଣ କରିବେ ମୁଖ୍ୟମନ୍ତ୍ରୀ
ଭୁବନେଶ୍ୱର: ବଦଳୁଛି ପିଲାଙ୍କ ଶିକ୍ଷା ମନ୍ଦିର । ନୂଆ ରୂପରେ ନୂଆ ରଙ୍ଗରେ ଚମକୁଛି ବିଦ୍ୟାପୀଠ । ସ୍ମାର୍ଟ ହାଇସ୍କୁଲରେ ପାଠ ପଢ଼ୁଛନ୍ତି ପିଲା । ସାକାର ହେଉଛି ସ୍ବପ୍ନ । ଅତ୍ୟାଧୁନିକ କ୍ଲାସରୁମରେ ପ୍ରୋଜେକ୍ଟର ବ୍ୟବସ୍ଥା ସହ ଛାତ୍ରଛାତ୍ରୀଙ୍କ ପାଇଁ ସ୍ମାର୍ଟ ବୋର୍ଡ ହୋଇଛି । କ୍ଲାସରୁମରେ କରାଯାଇଛି ଉନ୍ନତମାନର ବ୍ୟବସ୍ଥା । ପିଲାଙ୍କ ସୁନ୍ଦର ଭବିଷ୍ୟତ ପାଇଁ ରୂପାନ୍ତରିତ ହେଉଛି ହାଇସ୍କୁଲ । ଆଜି ରାଜ୍ୟର ୫ଟି ଜିଲ୍ଲାର ୪୧୬ଟି ରୂପାନ୍ତରିତ ହାଇସ୍କୁଲକୁ ଲୋକାର୍ପଣ କରିବେ ମୁଖ୍ୟମନ୍ତ୍ରୀ । ସଂଧ୍ୟା ୫ଟା ୩୦ରେ ଲୋକସେବା ଭବନର କନଭେନସନ ସେଣ୍ଟରରେ ଭିଡିଓ କନଫରେନସିଂରେ ଲୋକାର୍ପଣ କରିବେ ମୁଖ୍ୟମନ୍ତ୍ରୀ । କୋରାପୁଟ ଜିଲ୍ଲାର ୯୫, ଗଜପତି ୩୧, ସମ୍ବଲପୁର ୪୦, ବଲାଙ୍ଗୀର ୧୦୦ ଓ ଯାଜପୁରର ୧୫୦ଟି ହାଇସ୍କୁଲକୁ ଉତ୍ସର୍ଗ କରିବେ ମୁଖ୍ୟମନ୍ତ୍ରୀ ।