ନନ୍ଦିଘୋଷ ବ୍ୟୁରୋ : ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନ ଆଦିଆଲା ଜେଲରେ ନିରାପଦରେ ଅଛନ୍ତି। ତାଙ୍କୁ ସମ୍ପୂର୍ଣ୍ଣ ଅଲଗା ଭାବେ ରଖାଯାଇଛି। ତେବେ ଦେଶଛାଡ଼ି ଚାଲିଯିବା ଲାଗି ଇମ୍ରାନଙ୍କ ଉପରେ ଚାପ ପକାଯାଉଛି ବୋଲି କହିଛନ୍ତି ପିଟିଆଇ ସିନେଟର ଖୁରାମ ଜିସାନ। ସେ କହିଛନ୍ତି- ଇମ୍ରାନଙ୍କ ଲୋକପ୍ରିୟତା ବଢୁଥିବାରୁ ଶାସକ ଦଳ ଚିନ୍ତାରେ ଅଛନ୍ତି। ଇମ୍ରାନଙ୍କୁ ଭେଟିବା ଲାଗି ତାଙ୍କ ପରିବାରକୁ ଅନୁମତି ଦିଆ ଯାଉନଥିବାରୁ ତାହାକୁ ସମାଲୋଚନା କରିଛନ୍ତି ଜିସାନ।
ସେପେଟ ପାକିସ୍ତାନର ଆଦିଆଲା ଜେଲରେ ବନ୍ଦୀ ଥିବା ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ନେଇ ଦୂର ହେଉନି ସସପେନ୍ସ l ଜେଲରେ ସେ ସୁସ୍ଥ ଥିବା କୁହାଯାଉଥିଲେ ବି ପରିବାର ଓ ପିଟିଆଇ ସମର୍ଥକ ଏହାକୁ ଗ୍ରହଣ କରିବାକୁ ନାରାଜ l ତେବେ ଗତ ନଭେମ୍ବର ୫ରେ ପାକ୍ ସେନାମୁଖ୍ୟ ଜେନେରାଲ ଅସିମ ମୁନୀରଙ୍କ ବିରୋଧରେ ଇମ୍ରାନଙ୍କ ଟିପ୍ପଣୀ ଭିନ୍ନ କିଛି ବୟାନ କରୁଛି l ଇମ୍ରାନଙ୍କୁ ଭେଟିବା ଲାଗି କୋର୍ଟ ଅନୁମତି ସତ୍ତ୍ବେ ଏହା ପାଳନ ହେଉ ନଥିବାରୁ ସନ୍ଦେହ ଅଧିକ ଘନୀଭୂତ ହୋଇଛି l ତେଣେ ଇମ୍ରାନଙ୍କ ସମର୍ଥକମାନଙ୍କୁ ଗିରଫ କରାଯାଇ ଜେଲରେ ଅକଥନୀୟ ନିର୍ଯାତନା ଦିଆଯାଉଥିବା ଅଭିଯୋଗ କରିଛି ପିଟିଆଇ l ୨୦୧୮-୨୦୧୯ରେ ଇମ୍ରାନ ପ୍ରଧାନମନ୍ତ୍ରୀ ଥିବାବେଳେ ମୁନୀରଙ୍କ ସହ ତାଙ୍କର ମତଭେଦ ହୋଇଥିଲା l ସେତେବେଳେ ଆଇଏସଆଇର ମହାନିର୍ଦ୍ଦେଶକ ଥିଲେ ମୁନୀର l
ତେବେ ଇମ୍ରାନଙ୍କ ପତ୍ନୀ ବୁସରା ବିବିଙ୍କ ବିରୋଧରେ ଦୁର୍ନୀତି ମାମଲା ନେଇ ହସ୍ତକ୍ଷେପ କରିବାରୁ ମାତ୍ର ସାତ ମାସ ଭିତରେ ଆଇଏସଆଇ ମୁଖ୍ୟ ପଦରୁ ମୁନୀରଙ୍କୁ ହଟାଇଦେଇଥିଲେ ଇମ୍ରାନ l ଇମ୍ରାନଙ୍କ ଏହି ନିଷ୍ପତ୍ତି ମୁନୀରଙ୍କ ଲାଗି ସମ୍ମାନ ହାନିର କାରଣ ଥିଲା l ସେପଟେ ପାକିସ୍ତାନ ମିଲିଟାରୀ ଇମ୍ରାନଙ୍କୁ ଜଣେ ସଚ୍ଚୋଟ ଶାସକ ବୋଲ ବିବେଚନା କରିବା ସହ ସେନାର ବିଶ୍ବସନୀୟତା ରକ୍ଷା କରିବାରେ ତାଙ୍କର ଭୂମିକାକୁ ପ୍ରଶଂସା କରୁଥିଲା ସେନା l ତେବେ ୨୦୨୨ରେ ଇମ୍ରାନ ଅନାସ୍ଥା ଭୋଟରେ କ୍ଷମତାରୁ ଅନ୍ତର ହେବା ପରେ ସ୍ଥିତି ବିଗିଡ଼ିଯାଇଥିଲା l ମୁନୀର ହିଁ ଖଳନାୟକ ଏବଂ ପିଟିଆଇକୁ ଧ୍ବଂସ କରିଦେବାକୁ ମୁନୀର ଯୋଜନା କରୁଥିଲେ ବୋଲି ଇମ୍ରାନ ଧରି ନେଇଥିଲେ l ମେ ୨୦୨୩ରେ ଇମ୍ରାନ ଗିରଫ ହେବା ପରେ ସବୁକିଛି ଓଲଟପାଲଟ ହୋଇଯାଇଥିଲା l ଏପରିକି ତତକାଳୀନ ସେନାମୁଖ୍ୟ କମର ଜାଭେଦ ବାଜଓ୍ବାଙ୍କୁ ଜଣେ ପ୍ରତାରକ ବୋଲି କହିଥିଲେ ଇମ୍ରାନ l ନଭେମ୍ବର ୨୦୨୨ରେ ମୁନୀର ଆର୍ମି ଚିଫ ହେବା ପରେ ସେ ସର୍ବଶକ୍ତିମାନ ହୋଇଥିଲେ l
