ନୂଆଦିଲ୍ଲୀ: ଆଜିଠୁ ଆରମ୍ଭ ହେଉଛି ୨୦୨୨-୨୩ ଆର୍ଥିକ ବର୍ଷ । ଆଜିଠୁ କେତେକ ସାମଗ୍ରୀ ଓ ସେବା ପାଇଁ ଲୋକଙ୍କୁ ଅଧିକ ଖର୍ଚ୍ଚ କରିବାକୁ ପଡ଼ିପାରେ । ଔଷଧ, ସିଏନଜି, ପାଇପ ଏଲପିଜି ଗ୍ୟାସ, ସିମେଣ୍ଟ ଇତ୍ୟାଦିରେ ଲୋକଙ୍କୁ ଅଧିକ ବ୍ୟୟ କରିବାକୁ ପଡ଼ିପାରେ । ଗତ କିଛିଦିନ ଧରି ପେଟ୍ରୋଲ ଓ ଡିଜେଲ ଦର ବଢୁଥିବାବେଳେ ଏଥିରୁ ମଧ୍ୟ ଗ୍ରାହକଙ୍କୁ ନିସ୍ତାର ନମିଳିପାରେ । ବର୍ଦ୍ଧିତ ତୈଳ ଦର ପାଇଁ ବସ ଭଡ଼ା ମଧ୍ୟ ବଢିଛି ।
ଆଜିଠୁ ୮୦୦ଟି ଜୀବନ ରକ୍ଷାକାରୀ ଔଷଧର ମୂଲ୍ୟବୃଦ୍ଧି ହୋଇପାରେ । ସେପଟେ କ୍ରିପ୍ଟୋକରେନ୍ସି କିଣିବା ମଧ୍ୟ ମହଙ୍ଗା ହୋଇପାରେ । ଆଜଠୁ କ୍ରିପ୍ଟୋକରେନ୍ସି ଉପରେ ମିଳୁଥିବା ଲାଭ ଉପରେ ସରକାର ୩୦ ପ୍ରତିଶତ ଟିକସ ଲଗାଇବେ । ଏନେଇ କେନ୍ଦ୍ରୀୟ ବଜେଟରେ ଘୋଷଣା କରାଯାଇଛି । ପିପିଏଫ, ସୁକନ୍ୟା ସମୃଦ୍ଧି ଯୋଜନା, ବରିଷ୍ଠ ନାଗରିକ ସଂଚୟ ସ୍କିମ, ପୋଷ୍ଟ ଅଫିସ ସଂଚୟ ସ୍କିମ, ଜାତୀୟ ସଂଚୟ ସାର୍ଟିଫିକେଟ ସ୍କିମ ଇତ୍ୟାଦିରେ ଦିଆଯାଉଥିବା ସୁଧହାରକୁ ଅପରିବର୍ତ୍ତିତ ରଖିଛନ୍ତି । ଏଣୁ ମୋଟାମୋଟି ଭାବରେ ଆଜିଠୁ ଅତ୍ୟାବଶ୍ୟକ ସେବା ଓ ସାମଗ୍ରୀ ପାଇଁ ଲୋକଙ୍କୁ ଅଧିକ ଟଙ୍କା ଗଣିବାକୁ ପଡ଼ିପାରେ ।
