ଭୁବନେଶ୍ୱର: ବଦଳିପାରେ ଖରାଛୁଟି ନିଷ୍ପତ୍ତି । ମେ’ ବଦଳରେ ଜୁନ୍ ମାସରେ ଖରାଛୁଟିକୁ ନେଇ ଅନେକ ଅଭିଯୋଗ ଆସିଥିବା ବେଳେ ପରିସ୍ଥିତି ଦେଖି ବିଭାଗ ବିଚାର କରିବ ବୋଲି କହିଛନ୍ତି ସ୍କୁଲ ଓ ଗଣଶିକ୍ଷା ମନ୍ତ୍ରୀ ସମୀର ଦାସ । ବର୍ତ୍ତମାନ କରୋନା ପ୍ରଭାବ ସେଭଳି ନାହିଁ । ଦଶମ ଓ ଦ୍ୱାଦଶ ପରୀକ୍ଷା ପାଇଁ କୌଣସି ଅସୁବିଧା ହେବନି । ସ୍ଵାସ୍ଥ୍ୟ ବିଭାଗ ପରାମର୍ଶ ଅନୁଯାୟୀ ପଦକ୍ଷେପ ନିଆଯାଉଛି ।
ଅନ୍ୟପକ୍ଷରେ ଚଳିତ ସପ୍ତାହରେ ଛାତ୍ରଛାତ୍ରୀଙ୍କୁ ମିଳିବ ସ୍ୱତନ୍ତ୍ର ପୁସ୍ତିକା । ଯେଉଁଥିରେ ଦୁଇ ବର୍ଷର ପୁରୁଣା ପାଠ ରହିବ । ମେ’ରେ ଆରମ୍ଭ ହେବାକୁ ଥିବା ନୂଆ ଶିକ୍ଷା ବର୍ଷରୁ ରେଗୁଲାର କୋର୍ସ ସହ ଏହାକୁ ପଢ଼ାଯିବ । ଏହି ସ୍ୱତନ୍ତ୍ର ପୁସ୍ତକ ଦେବାର ଉଦ୍ଦେଶ୍ୟ ହେଉଛି ଦୁଇ ବର୍ଷର ପିଲାଙ୍କ ପାଠ ପଢ଼ା କ୍ଷତି ଭରଣା କରିବା । ଏହା କେବଳ ଖରା ଛୁଟି ସମୟରେ ହେବାକୁ ଥିବା କ୍ଲାସରେ ପଢ଼ାଯିବନି । ପୂରା ସେସନରେ ଏହି ପାଠ ପଢ଼ାଯିବ ବୋଲି କହିଛନ୍ତି ସ୍କୁଲ ଓ ଗଣଶିକ୍ଷା ମନ୍ତ୍ରୀ ।
