ନନ୍ଦିଘୋଷ ବ୍ୟୁରୋ : ନୀତୀଶ କୁମାର ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି। ତାଙ୍କ ସ୍ଥାନରେ ସମ୍ରାଟ ଚୌଧୁରୀଙ୍କୁ ବିଜେପି ବିଧାୟକ ଦଳର ନେତା ନିର୍ବାଚିତ କରାଯାଇଛି। ସେ ବିହାରର ନୂଆ ମୁଖ୍ୟମନ୍ତ୍ରୀ ହେବେ। ସମ୍ରାଟ ଚୌଧୁରୀ ବିହାର ରାଜନୀତିରେ ଏକ ପ୍ରମୁଖ ବିଜେପି ନେତା। ସେ ୧୯୯୦ ଦଶକରେ ଆରଜେଡି ରୁ ନିଜର ରାଜନୈତିକ ଯାତ୍ରା ଆରମ୍ଭ କରିଥିଲେ। ପରେ ଜେଡିୟୁ ଓ ତାପରେ ବିଜେପିରେ ଯୋଗ ଦେଇଥିଲେ । ବିଜେପିରେ ତାଙ୍କ ରାଜନୈତିକ ଜୀବନ ବେଶ ଆଗକୁ ବଢିଛି । ସମ୍ରାଟ ଚୌଧୁରୀଙ୍କୁ ରାଜନୀତି ତାଙ୍କ ପିତା ଶକୁନି ଚୌଧୁରୀଙ୍କଠାରୁ ଉତ୍ତରାଧିକାରୀ ରୂପେ ମିଳିଥିଲା। ଶକୁନି ଚୌଧୁରୀ ବିହାର ରାଜନୀତିର ଜଣେ ବଡ଼ ନେତା ଥିଲେ । ସମ୍ରାଟ ଚୌଧୁରୀ ପିତାଙ୍କ ରାଜନୈତିକ ଶକ୍ତିର ସହାୟତାରେ ରାଜନୀତିର ମଞ୍ଚକୁ ଓହ୍ଲାଇ ଥିଲେ । ସେ ଆରଜେଡି ଛାଡ଼ି ଜେଡିୟୁରେ ଯୋଗ ଦେଇଥିଲେ। ଜେଡିୟୁ ଛାଡ଼ି ୨୦୧୮ ମସିହାରେ ବିଜେପିରେ ସାମିଲ ହେଲେ । ୧୯୯୯ରେ ଯୁବ ମନ୍ତ୍ରୀ ଭାବେ ବେଶ ପରିଚିତ ଥିଲେ । ପିତା ସମତା ପାର୍ଟି ଛାଡ଼ି ଲାଲୁ ଯାଦବଙ୍କ ସହ ଯୋଡ଼ି ହୋଇଥିଲେ। ଏହା ବଦଳରେ ଲାଲୁ ତାଙ୍କୁ ଏମଏଲସିକୁ ପଠାଇ ମନ୍ତ୍ରୀ ବନାଇଥିଲେ। କିନ୍ତୁ ବୟସ ନେଇ ବିବାଦ ହୋଇଥିଲା ଏବଂ ସେ ମନ୍ତ୍ରୀ ପଦରୁ ଇସ୍ତଫା ଦେଇଥିଲେ। ୨୦୧୪ରେ ନୀତୀଶ କୁମାର ମୁଖ୍ୟମନ୍ତ୍ରୀ ପଦ ଛାଡ଼ିବା ପରେ ଜିତନ ରାମ ମାଝୀ ମୁଖ୍ୟମନ୍ତ୍ରୀ ହୋଇଥିଲେ। ସମ୍ରାଟ ଚୌଧୁରୀ ମାଝୀ ସରକାରରେ କ୍ୟାବିନେଟ୍ ମନ୍ତ୍ରୀ ହୋଇଥିଲେ। ମାଝୀଙ୍କ ପରେ ନୀତୀଶ ପୁଣି ମୁଖ୍ୟମନ୍ତ୍ରୀ ହେବା ପରେ ତାଙ୍କୁ କ୍ୟାବିନେଟ୍ରେ ସ୍ଥାନ ମିଳି ନ ଥିଲା। ୨୦୧୮ରେ ବିଜେପିରେ ଯୋଗ ଦେଇଥିଲେ। ୨୦୧୯ରେ ନିତ୍ୟାନନ୍ଦ ରାୟ ପ୍ରଦେଶ ସଭାପତି ଥିବା ସମୟରେ ସମ୍ରାଟ ଉପସଭାପତି ହୋଇଥିଲେ। ବିଜେପିରେ ଯୋଗ ଦେବା ପରେ ପଞ୍ଚାୟତି ରାଜ ମନ୍ତ୍ରୀ ହୋଇଥିଲେ। ୨୦୨୦ରେ ବିଜେପି ଟିକେଟରେ ବିଧାନ ପରିଷଦକୁ ଯାଇଥିଲେ । ଅଗଷ୍ଟ ୨୦୨୨ରେ ନୀତୀଶ କୁମାର ବିଜେପି ଛାଡ଼ି ଆରଜେଡି ସହ ମହାଗଠବନ୍ଧନ ସରକାର ଗଠନ କରିବା ପରେ ସମ୍ରାଟ ବିଧାନ ପରିଷଦରେ ବିରୋଧୀ ଦଳର ନେତା ହୋଇଥିଲେ। ୨୦୨୩ରେ ବିଜେପିର ପ୍ରଦେଶ ସଭାପତି ହୋଇଥିଲେ। ନୀତୀଶ କୁମାର ପୁଣି ଏନଡିଏକୁ ଫେରିବା ପରେ ସମ୍ରାଟଙ୍କୁ ଉପ ମୁଖ୍ୟମନ୍ତ୍ରୀ ପଦ ଦିଆଗଲା। ୨୦୨୫ରେ ବିଧାନସଭା ନିର୍ବାଚନରେ ବିରୋଧୀ ଦଳଗୁଡ଼ିକର ସବୁଠୁ ଅଧିକ ଟାର୍ଗେଟ ସମ୍ରାଟ ଚୌଧୁରୀଙ୍କ ଉପରେ ଥିଲା। ଏନଡିଏ ଶାସନକୁ ଆସିବା ପରେ ପୁଣି ଉପ ମୁଖ୍ୟମନ୍ତ୍ରୀ ହୋଇଥିଲେ । ପୂର୍ବରୁ ବିଜେପିର ବିରୋଧୀ ଥିବା ସମ୍ରାଟ ୮ବର୍ଷ ଭିତରେ ଅନେକ ବଡ଼ ବିଜେପି ନେତାଙ୍କୁ ପଛରେ ଛାଡ଼ି ଦେଇଛନ୍ତି। ସେ ନୀତୀଶ କୁମାରଙ୍କ ଘୋର ବିରୋଧୀ ଭାବେ ପରିଚିତ ଥିଲେ ଏବଂ ନୀତୀଶଙ୍କ ଏନଡିଏ ଫେରିବାକୁ ସେ ଏକଦା ବିରୋଧ କରୁଥିଲେ ବୋଲି କୁହାଯାଉଥିଲା। ବିହାର ରାଜନୀତିରେ ବଡ଼ ପରିବର୍ତ୍ତନ। ପ୍ରଥମ ଥର ପାଇଁ ବିଜେପି ବିହାରରେ ନିଜର ମୁଖ୍ୟମନ୍ତ୍ରୀ ପାଇବାକୁ ଯାଉଛି । ବିହାରର ନୂଆ ମୁଖ୍ୟମନ୍ତ୍ରୀ ହେବେ ସମ୍ରାଟ ଚୌଧୁରୀ ।
ଇସ୍ତଫା ଦେଲେ ନୀତୀଶ କୁମାର
ନନ୍ଦିଘୋଷ ବ୍ୟୁରୋ : ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଲେ ବିହାର ସିଏମ ନୀତୀଶ କୁମାର। ଏହା ପୂର୍ବରୁ ଶେଷଥର ଲାଗି କ୍ୟାବିନେଟ ବୈଠକରେ ଯୋଗ ଦେଇଥିଲେ ନୀତୀଶ। ପରେ ସେ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିଲେ। ୭୫ ବର୍ଷ ବୟସ୍କ ନୀତୀଶ କୁମାର ରାଜଭବନ ଯାଇ ରାଜ୍ୟପାଳଙ୍କୁ ନିଜର ଇସ୍ତଫା ପତ୍ର ପ୍ରଦାନ କରିଛନ୍ତି । ଆସନ୍ତାକାଲି ନୂଆ ସରକାର ଗଠନ ହୋଇପାରେ। ସମ୍ରାଟ ଚୌଧୁରୀ ହେବେ ବିହାରର ପରବର୍ତ୍ତୀ ମୁଖ୍ୟମନ୍ତ୍ରୀ। ସେହିପରି ଜେଡିୟୁରୁ ୨ ଜଣଙ୍କୁ ଉପମୁଖ୍ୟମନ୍ତ୍ରୀ କରାଯିବ।
୧୯୭୪ରେ ଜୟପ୍ରକାଶ ନାରାୟଣଙ୍କ ଜେପି ଆନ୍ଦୋଳନରେ ସକ୍ରିୟ ଭାଗ ନେଇଥିଲେ ନୀତୀଶ କୁମାର। ୧୯୭୫ ଜରୁରୀକାଳୀନ ପରିସ୍ଥିତିରେ ଗିରଫ ହୋଇଥିଲେ । ୧୯୮୫ରେ ପ୍ରଥମଥର ପାଇଁ ବିହାର ବିଧାନସଭାରେ ବିଧାୟକ ହୋଇଥିଲେ । ୧୯୮୯ରେ ଲୋକସଭାକୁ ନିର୍ବାଚିତ ହୋଇଥିଲେ ନୀତୀଶ । ୧୯୯୪ରେ ଜର୍ଜ ଫର୍ନାଣ୍ଡିଜଙ୍କ ସହିତ ସମତା ପାର୍ଟି ଗଠନ କରିଥିଲେ। ପରେ ସମତା ପାର୍ଟି ଜନତା ଦଳ (ୟୁନାଇଟେଡ୍)ରେ ମିଶିଯାଇଥିଲା। ସେ ବର୍ତ୍ତମାନ ଜେଡିୟୁର ଜାତୀୟ ସଭାପତି ଅଛନ୍ତି । ନିତୀଶ କୁମାର ବିହାରର ସବୁଠାରୁ ଲମ୍ବା ସମୟ ଧରି ମୁଖ୍ୟମନ୍ତ୍ରୀ ଥିଲେ। ପ୍ରାୟ ୨୧ ବର୍ଷ ସେ ବିହାରର ମୁଖ୍ୟମନ୍ତ୍ରୀ ରହିଛନ୍ତି । ମୋଟ ୧୦ ଥର ମୁଖ୍ୟମନ୍ତ୍ରୀ ହୋଇଥିଲେ ନିତୀଶ କୁମାର । ପ୍ରଥମ ଥର ମାର୍ଚ୍ଚ ୨୦୦୦ ବିହାର ମୁଖ୍ୟମନ୍ତ୍ରୀ ହୋଇଥିଲେ ନିତୀଶ କୁମାର । ନିତୀଶ କୁମାରଙ୍କ ରାଜନୈତିକ ଜୀବନ ପ୍ରାୟ ୪୦ ବର୍ଷରୁ ଅଧିକ। ସେ ବିହାରରେ ସୁଶାସନ ବାବୁ ଭାବେ ପରିଚିତ । କିନ୍ତୁ ସହଯୋଗୀ ବଦଳାଇବା ପାଇଁ ସେ ବିବାଦରେ ମଧ୍ୟ ରହିଛନ୍ତି।
ଟ୍ରମ୍ପ ବନାମ ପୋପ୍ , ବିବାଦୀୟ AI ଫଟୋ
ନନ୍ଦିଘୋଷ ବ୍ୟୁରୋ : ବିବାଦର ଅନ୍ୟନାମ ଟ୍ରମ୍ପ । ଡୋନାଲ୍ଡ ଟ୍ରମ୍ପ ଓ ବିବାଦ ଏହା ନୀତି ଦିନିଆ କଥାରେ ପରିଣତ ହୋଇସାରିଲାଣି । ଏବେ ଖ୍ରୀଷ୍ଟ ଧର୍ମର ଲୋକ ଟ୍ରମ୍ପଙ୍କୁ ନେଇ ଅସନ୍ତୋଷ ପ୍ରକାଶ କରିଛନ୍ତି । ଆମେ ଜାଣିଛୁ ଟ୍ରମ୍ପ ନିଜ ‘ମାଗା’ ନୀତି ଓ ଟାରିଫ ପାଇଁ ବେଶ ଚର୍ଚ୍ଚାରେ । ଆମେରିକାରେ ଖ୍ରୀଷ୍ଟ ଧର୍ମରେ ବିଶ୍ୱାସ କରୁଥିବା ଅନେକ ଲୋକ ଟ୍ରମ୍ପଙ୍କୁ ସମର୍ଥନ କରନ୍ତି । ରିପବ୍ଲିକାନ୍ ପାର୍ଟିର ଅନେକ ସମର୍ଥକ ଯୀଶୁ ଖ୍ରୀଷ୍ଟ ଓ ଖ୍ରୀଷ୍ଟ ଧର୍ମ ଉପରେ ଗଭୀର ଆସ୍ଥା ରଖନ୍ତି । କିନ୍ତୁ ଲାଗୁଛି ଟ୍ରମ୍ପଙ୍କ ପାଇଁ ଏବେ ସବୁ କିଛି ଗଡ଼ବଡ଼ ହୋଇଯାଇପାରେ । ବିଶ୍ୱରେ ପ୍ରାୟ ୨୬୪ କୋଟି ଖ୍ରୀଷ୍ଟିୟାନ୍ ଅଛନ୍ତି । ଟ୍ରମ୍ପଙ୍କ ଏକ ପୋଷ୍ଟ କିନ୍ତୁ ଏବେ ପୁରା ଖ୍ରୀଷ୍ଟ ଧର୍ମଲୋକଙ୍କ ବିଶ୍ୱାସକୁ ଆଘାତ ଦେଇଛି ।
୧୨ଏପ୍ରିଲରେ ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ତାଙ୍କ ଟ୍ରୁଥ୍ ସୋସିଆଲ୍ରେ AIରେ ତିଆରି ଏକ ଫଟୋ ସେୟାର କରିଥିଲେ , ଯେଉଁଥିରେ ସେ ନିଜକୁ ଯୀଶୁ ଖ୍ରୀଷ୍ଟଙ୍କ ଭଳି ଚମତ୍କାର କରୁଥିବା ଦର୍ଶାଇଥିଲେ ।ଏହି ଫଟୋରେ ସେ ଜଣେ ଅସୁସ୍ଥ ବ୍ୟକ୍ତିଙ୍କୁ ସ୍ପର୍ଶ କରୁଥିବାର ଚିତ୍ର ଥିଲା , ଯାହାକୁ ବାଇବଲ୍ରେ ବର୍ଣ୍ଣିତ ଘଟଣାରୁ ପ୍ରେରିତ ବୋଲି କୁହାଯାଉଛି। ଫଟୋରେ ଆମେରିକୀୟ ପତାକା, ସାମରିକ ବିମାନ ଏବଂ ସ୍ୱର୍ଗଦୂତ ପରି ପ୍ରତୀକ ମଧ୍ୟ ରହିଥିଲା । ଯାହା ଫଳରେ ବିବାଦ ସୃଷ୍ଟି ହୋଇଥିଲା । ବ୍ୟାପକ ସମାଲୋଚନା ପରେ ସେ ଏହି ଫଟୋକୁ ଡିଲିଟ୍ କରିଦେଇଛନ୍ତି ଟ୍ରମ୍ପ । ପରେ ସଫାଇ ଦେଇ କହିଛନ୍ତି ଯେ ସେ ନିଜକୁ ଜଣେ ଡାକ୍ତର ଭାବରେ ଉପସ୍ଥାପିତ କରିଥିଲେ, ଯୀଶୁ ଖ୍ରୀଷ୍ଟ ଭଳି ନୁହେଁ। ଟ୍ରମ୍ପ କହୁଛନ୍ତି ସେ ଫଟୋରେ ତାଙ୍କୁ ଏକ ଡାକ୍ତରଙ୍କ ରୂପରେ ଵର୍ଣ୍ଣନା କରାଯାଇଛି ସେ ଲୋକମାନଙ୍କୁ ସୁସ୍ଥ କରୁଛନ୍ତି ।
ବର୍ତ୍ତମାନର ପୋପ୍ ଲିଓ ଯିଏ ମୂଳତଃ ଆମେରିକୀୟ ପୋପ୍ । ସେ ବାରମ୍ବାର ଆମେରିକା-ଇସ୍ରାଏଲ୍ ଏବଂ ଇରାନ୍ ମଧ୍ୟରେ ଚାଲୁଥିବା ଯୁଦ୍ଧକୁ ଅନ୍ୟାୟ, ଅମାନବୀୟ ଏବଂ ଅନୈତିକ ବୋଲି ସମାଲୋଚନା କରିଛନ୍ତି। ସେ ଯୁଦ୍ଧବିରାମ, କଥାବାର୍ତ୍ତା ଏବଂ ଶାନ୍ତି ଆଲୋଚନା ପାଇଁ ଆହ୍ୱାନ୍ ଦେଇଛନ୍ତି ଏବଂ କହିଛନ୍ତି ଯେ “ଈଶ୍ୱର କୌଣସି ଯୁଦ୍ଧକୁ ଆଶୀର୍ବାଦ କରନ୍ତି ନାହିଁ” ଏବଂ “ନିର୍ଦ୍ଦୋଷ ଲୋକଙ୍କ ରକ୍ତପାତ କୌଣସି କାରଣରେ ସମର୍ଥନ ଯୋଗ୍ୟ ନୁହେଁ”। ପୋପ୍ ଙ୍କ ଏହି ବୟାନ କିନ୍ତୁ ଟ୍ରମ୍ପଙ୍କୁ ପସନ୍ଦ ଆସିନାହିଁ ।
ଟ୍ରମ୍ପ ପୋପ୍ଙ୍କୁ କଡା ଆକ୍ରମଣ କରି ଟ୍ରୁଥ୍ ସୋସିଆଲ୍ରେ ଲେଖିଥିଲେ ଯେ ପୋପ୍ “ଅପରାଧ ପ୍ରତି ଦୁର୍ବଳ ମନୋଭାବ ରଖୁଛନ୍ତି ” ଏବଂ “ବିଦେଶ ନୀତିରେ ସେ ଅତ୍ୟନ୍ତ ଖରାପ”। ସେ ଆହୁରି କହିଛନ୍ତି — “ମୁଁ ଏପରି ପୋପ୍ ଚାହୁଁ ନାହିଁ ଯିଏ ଇରାନ ପରମାଣୁ ଅସ୍ତ୍ର ରଖିବା ଠିକ ବୋଲି ବିବେଚନା କରୁଛନ୍ତି ” ଏବଂ “ଯଦି ମୁଁ ହ୍ୱାଇଟ୍ ହାଉସ୍ରେ ନଥାନ୍ତି ତେବେ ଲିଓ ଭାଟିକାନ୍ରେ ପୋପ୍ ହୋଇପାରିନଥାନ୍ତେ” । ଟ୍ରମ୍ପ ପୋପ୍ଙ୍କ ଉପରେ କଟ୍ଟର ବାମପନ୍ଥୀଙ୍କୁ ସମର୍ଥନ କରିବା ଏବଂ ରାଜନୀତି କରୁଥିବା ଅଭିଯୋଗ ମଧ୍ୟ ଲଗାଇଛନ୍ତି।
ଅନ୍ୟପକ୍ଷରେ, ପୋପ୍ ମଧ୍ୟ କହିଛନ୍ତି ଯେ ଟ୍ରମ୍ପ ପ୍ରଶାସନକୁ ସେ ଭୟ କରନ୍ତି ନାହିଁ ଏବଂ ଯୁଦ୍ଧ ବିରୋଧରେ ସେ କଥା କହିବା ଜାରି ରଖିବେ। ଇରାନ୍ ରାଷ୍ଟ୍ରପତି ମସୁଦ୍ ପେଜେଶ୍କିୟାନ୍ ମଧ୍ୟ ପୋପ୍ଙ୍କୁ ସମାଲୋଚନା କରିବା ପରେ ଟ୍ରମ୍ପଙ୍କୁ କଠୋର ନିନ୍ଦା କରିଛନ୍ତି। ପେଜେଶ୍କିୟାନ୍ ଏକ୍ସରେ ଲେଖିଛନ୍ତି ଯେ “ମହାମହିମ୍ ପୋପ୍ ଲିଓ, ମୁଁ ଇରାନ୍ ତରଫରୁ ଆପଣଙ୍କ ଅପମାନର ନିନ୍ଦା କରୁଛି। ଯୀଶୁ ଖ୍ରୀଷ୍ଟଙ୍କ ଅପମାନ ସମ୍ପୂର୍ଣ୍ଣ ଅସ୍ୱୀକାର ଯୋଗ୍ୟ”। ଇଟାଲୀର ପ୍ରଧାନମନ୍ତ୍ରୀ ଜର୍ଜିଆ ମେଲୋନି ମଧ୍ୟ ଟ୍ରମ୍ପଙ୍କୁ ସମାଲୋଚନା କରିଛନ୍ତି। ସେ କହିଛନ୍ତି ଯେ ପୋପ୍ ଙ୍କ ବିରୋଧରେ ଏପରି ମନ୍ତବ୍ୟ ସହ୍ୟ କରାଯାଇପାରିବ ନାହିଁ।
ଆମେରିକୀୟ ମୂଳର ପ୍ରଥମ ପୋପ୍ ଲିଓ ଗତ କିଛି ସପ୍ତାହରେ ଇରାନ ଉପରେ ଆମେରିକାର ସାମରିକ ହସ୍ତକ୍ଷେପ ଉପରେ ଚିନ୍ତା ପ୍ରକାଶ କରିଛନ୍ତି। ଇରାନ୍, ଲେବାନନ୍ ଏବଂ ଆଞ୍ଚଳିକ ସଂଘର୍ଷ ଉପରେ ସେ ବାରମ୍ବାର ଯୁଦ୍ଧବିରାମ ଏବଂ କୂଟନୈତିକ ସମାଧାନର ସମର୍ଥନ କରିଛନ୍ତି। ଗତ ସପ୍ତାହରେ ସେ କହିଥିଲେ ଯେ ସର୍ବଶକ୍ତିମାନ୍ ହେବାର ଭ୍ରମ ଇରାନ୍ରେ ଆମେରିକା-ଇସ୍ରାଏଲ୍ ଯୁଦ୍ଧକୁ ଉତ୍ସାହିତ କରୁଛି। ଲେବାନନ୍ରେ ଇସ୍ରାଏଲୀ ସାମରିକ କାର୍ଯ୍ୟକଳାପ ଉପରେ ତୁରନ୍ତ ସଂଘର୍ଷ ବିରାମର ଆହ୍ୱାନ୍ କରିଛନ୍ତି ପୋପ୍ । ପୋପ୍ ଲିଓ ସ୍ପଷ୍ଟ କରିଛନ୍ତି ଯେ ସେ କୌଣସି ରାଜନୈତିକ ସଂଘର୍ଷରେ ସେ ପଡ଼ିବାକୁ ଚାହୁଁ ନାହାନ୍ତି ଏବଂ ଯୁଦ୍ଧ ବିରୋଧରେ ନିଜର ସ୍ୱର ଉଠାଇବା ସେ ଜାରି ରଖିବେ।
ପୋପ୍ ବନାମ ଟ୍ରମ୍ପ ଏ ବିବାଦ ଚାଲିଥିବା ବେଳ ଟ୍ରମ୍ପଙ୍କ ବିବାଦୀୟ AI ଫଟୋ ପୋଷ୍ଟ କରିବା ଏବେ ପୁରା ବିଶ୍ୱରେ ଖ୍ରୀଷ୍ଟ ଧର୍ମର ଲୋକଙ୍କ ମନରେ ଆଘାତ ଦେଇଛି ।
ଆଜି ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇପାରନ୍ତି ବିହାର ସିଏମ ନୀତୀଶ କୁମାର
ନନ୍ଦିଘୋଷ ବ୍ୟୁରୋ : ଆଜି ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇପାରନ୍ତି ବିହାର ସିଏମ ନୀତୀଶ କୁମାର। ଆଜି ଶେଷଥର ଲାଗି କ୍ୟାବିନେଟ ବୈଠକରେ ଯୋଗଦେଇଛନ୍ତି ନୀତୀଶ। ପରେ ସେ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବେ ବୋଲି ଚର୍ଚ୍ଚା ହେଉଛି । ଏହା ସହ ରାଜ୍ୟ ରାଜନୀତି ସହ ଆଜିଠୁ ନୀତୀଶଙ୍କ ପୂର୍ଣ୍ଣଚ୍ଛେଦ ପଡ଼ିବ। ୭୫ ବର୍ଷ ବୟସ୍କ ନୀତୀଶ କୁମାର ରାଜଭବନ ଯାଇ ରାଜ୍ୟପାଳଙ୍କୁ ନିଜର ଇସ୍ତଫା ପତ୍ର ପ୍ରଦାନ କରିବେ। କେବଳ ଗୋଟିଏ ଏଜେଣ୍ଡା ନେଇ କ୍ୟାବିନେଟ ବୈଠକ ହୋଇଥିବା ସୂଚନା ମିଳିଛି। ଆସନ୍ତାକାଲି ସମ୍ଭବତଃ ନୂଆ ସରକାର ଗଠନ ହୋଇପାରେ। ପରବର୍ତ୍ତୀ ମୁଖ୍ୟମନ୍ତ୍ରୀଙ୍କୁ ନେଇ ଚର୍ଚ୍ଚା ଜୋରଧରିଛି। ଉପମୁଖ୍ୟମନ୍ତ୍ରୀ ସମ୍ରାଟ ଚୌଧୁରୀ ଓ କେନ୍ଦ୍ରମନ୍ତ୍ରୀ ନିତ୍ୟାନନ୍ଦ ରାଏଙ୍କ ନାମ ସର୍ବାଗ୍ରେ ରହିଛି। ସେଟେ ଜେଡିୟୁରୁ ୨ ଜଣଙ୍କୁ ଉପମୁଖ୍ୟମନ୍ତ୍ରୀ କରାଯିବା ନେଇ ଚର୍ଚ୍ଚା ଚାଲିଛି। କେନ୍ଦ୍ରୀୟ ପର୍ଯ୍ୟବେକ୍ଷକ ଭାବେ ଯୋଗ ଦେଇଛନ୍ତି କେନ୍ଦ୍ରମନ୍ତ୍ରୀ ଶିବରାଜ ସିଂ ଚୌହ୍ବାନ।
ନୋଏଡ଼ାରେ ଶ୍ରମିକଙ୍କ ଲଙ୍କାକାଣ୍ଡ ଘଟଣା। ହିଂସା ପଛରେ ପାକିସ୍ତାନ ଲିଙ୍କ
ନନ୍ଦିଘୋଷ ବ୍ୟୁରୋ : ଉତ୍ତରପ୍ରଦେଶର ନୋଇଡ଼ାରେ ଏପ୍ରିଲ ୧୩, ୨୦୨୬ ସୋମବାରରେ କାରଖାନା ଶ୍ରମିକଙ୍କ ଏକ ଶାନ୍ତିପୂର୍ଣ୍ଣ ପ୍ରତିବାଦ ହଠାତ୍ ହିଂସାତ୍ମକ ରୂପ ନେଇଥିଲା। ବେତନ ବୃଦ୍ଧି, ସାପ୍ତାହିକ ଛୁଟି, ବୋନସ୍ ଏବଂ ଅନ୍ୟାନ୍ୟ ଦାବି ନେଇ ଶ୍ରମିକମାନେ ପ୍ରତିବାଦ କରୁଥିଲେ । ପରେ ଏହି ଶାନ୍ତିପୂର୍ଣ୍ଣ ପ୍ରତିବାଦ ହଠାତ୍ ହିଂସାତ୍ମକ ରୂପ ନେଇଥିଲା । ନୋଏଡ଼ାରେ ଶ୍ରମିକଙ୍କ ହିଂସା ଓ ଲଙ୍କାକାଣ୍ଡ ଘଟଣା ପଛରେ ପାକିସ୍ତାନ ଲିଙ୍କ ଥିବା ନେଇ ଚର୍ଚ୍ଚା। ସେପଟେ ହିଂସା ଘଟଣାରେ ୩୫୦ଜଣଙ୍କୁ ଗିରଫ କରିଛି ପୋଲିସ। ୧୦୦ ଜଣଙ୍କୁ ଅଟକ ରଖି ପଚରାଉଚରା କରୁଛି ପୋଲିସ। କିଛି ଜାତୀୟତାବିରୋଧୀ ଶକ୍ତି ହିଂସା ଭିଆଇଛନ୍ତି ବୋଲି କହିଛନ୍ତି ୟୁପିର ଶ୍ରମମନ୍ତ୍ରୀ । ମଜୁରୀ ବୃଦ୍ଧି ଦାବିରେ ହୋଇଥିବା ଆନ୍ଦୋଳନ ନୋଏଡା, ଫେଜ-୨, ସେକ୍ଟର ୬୦, ୬୨, ୮୪ରେ ପରିଲକ୍ଷିତ ହୋଇଥିଲା। ଦିନକୁ ୮ ଘଣ୍ଟିଆ ସିଫ୍ଟ ଓ ମାସକୁ ଅତି କମରେ ୨୦ ହଜାର ଟଙ୍କା ଦରମା ଦାବିରେ ଲଙ୍କାକାଣ୍ଡ କରିଥିଲେ ଶ୍ରମିକ। ଶହ ଶହ ଶ୍ରମିକ ପ୍ରଥମେ ଆନ୍ଦୋଳନ କରିଥିଲେ, ଧାରଣା ଦେଇଥିଲେ। ପରେ ତାହା ହିଂସାତ୍ମକ ରୂପ ନେଇଥିଲା। ପୂରା ଅଞ୍ଚଳ ରଣକ୍ଷେତ୍ରରେ ପରିଣତ ହୋଇଥିଲା। ଖଣ୍ଡଯୁଦ୍ଧ ସହିତ ଟେକା ପଥର ଫିଙ୍ଗିଥିଲେ ଶ୍ରମିକ। ବ୍ୟାପକ ଭଙ୍ଗାରୁଜା କରିବା ସହିତ ଗାଡ଼ିରେ ନିଆଁ ଲଗାଇ ଦେଇଥିଲେ। ହରିୟାଣା ସରକାର କୁଶଳୀ, ଅଣକୁଶଳୀ ଓ ଅର୍ଦ୍ଧକୁଶଳୀ ଶ୍ରମିକଙ୍କ ପାରିଶ୍ରମିକ ବୃଦ୍ଧି କରିଥିଲେ। କିନ୍ତୁ ନୋଏଡ଼ାରେ କାହିଁକି ଶ୍ରମିକଙ୍କ ପାରିଶ୍ରମିକ ବୃଦ୍ଧି କରାଯିବନି ବୋଲି ପ୍ରଶ୍ନ କରି ଆନ୍ଦୋଳନକୁ ଓହ୍ଲାଇଥିଲେ ଶ୍ରମିକମାନେ।
କାକବନ୍ଧ ସ୍କୁଲର ଶତାଧିକ ଅନ୍ତେବାସୀ ଡାଇରିଆରେ ଅସୁସ୍ଥ ହେବା ଘଟଣା ; ଆଖିବୁଜିଲେ ୫ମ ଶ୍ରେଣୀ ଛାତ୍ରୀ
ନନ୍ଦିଘୋଷ ବ୍ୟୁରୋ : ମୟୂରଭଞ୍ଜ ରାସଗୋବିନ୍ଦପୁର ବ୍ଲକ କାକବନ୍ଧ ସ୍କୁଲର ଶତାଧିକ ଅନ୍ତେବାସୀ ଡାଇରିଆରେ ଅସୁସ୍ଥ ହେବା ଘଟଣା। ଚିକିତ୍ସାଧିନ ଅବସ୍ଥାରେ ଆଖିବୁଜିଲେ ୫ମ ଶ୍ରେଣୀ ଛାତ୍ରୀ । ବାରିପଦା ଜିଲ୍ଲା ମୁଖ୍ୟ ଚିକିତ୍ସାଳୟରେ ଚିକିତ୍ସିତ ଅବସ୍ଥାରେ ନଳଗଜା ଅଞ୍ଚଳର ୫ମ ଶ୍ରେଣୀ ଛାତ୍ରୀ ରୁପାଲି ବେଶ୍ରାଙ୍କ ମୃତ୍ୟୁ ହୋଇଛି। ଦୁଇ ଦିନ ତଳେ ଆଶ୍ରମ ବିଦ୍ୟାଳୟର ୧୫୦ ରୁ ଉର୍ଦ୍ଧ୍ଵ ଛାତ୍ର ଛାତ୍ରୀ ଗୁରୁତର ହୋଇ ରାସଗୋବିନ୍ଦପୁର ସିଏଚସିରେ ଭର୍ତ୍ତି ହୋଇଥିଲେ। ଗତକାଲି ଗୁରୁତର ହେବାରୁ ୫୦ରୁ ଉର୍ଦ୍ଧ ଛାତ୍ରଛାତ୍ରୀଙ୍କୁ ରାସଗୋବିନ୍ଦପୁର ଡାକ୍ତରଖାନାରୁ ବାରିପଦା ଜିଲ୍ଲା ମୁଖ୍ୟ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା। ଗୁରୁତର ଥିବା ରୁପାଲି ଙ୍କୁ ଗତକାଲି ଠାରୁ ICUରେ ରଖାଯାଇଥିଲା । ତେବେ ବିଦ୍ୟାଳୟ କର୍ତ୍ତୃପକ୍ଷଙ୍କ ଅବହେଳାରୁ ଝିଅର ମୃତ୍ୟୁ ଘଟିଥିବା ପରିବାର ଲୋକେ ଅଭିଯୋଗ କରିଛନ୍ତି। ଅନ୍ୟପଟେ ଗୁରୁତର ଛାତ୍ର ଛାତ୍ରୀଙ୍କୁ ମେଡିକାଲରେରେ ଭେଟି ଚିକିତ୍ସା ସମ୍ପର୍କରେ ପଚାରି ବୁଝିଥିଲେ ନଗର ଉନ୍ନୟନ ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର ଏବଂ ଜିଲ୍ଲା ପରିଷଦ ଅଧ୍ୟକ୍ଷା ଭାରତୀ ହାଁସଦା। ସେପଟେ ଵାରିପଦା ପିଆରଏମ୍ ହସ୍ପିଟାଲରେ ଚାପା ଉତ୍ତେଜନା ଲାଗିରହିଛି। ଚିକିତ୍ସାରେ ଅବହେଳା ପାଇଁ ଦୋଷୀ ବିରୋଧରେ କାର୍ଯ୍ୟାନୁଷ୍ଠାନ ସହ ମୃତକଙ୍କ ପରିବାରଙ୍କୁ କ୍ଷତି ପୂରଣ ଦାବୀରେ ଆନ୍ଦୋଳନ ଚାଲିଛି। ହସ୍ପିଟାଲ ପରିସରରେ ବିଭିନ୍ନ ଦଳର ନେତା ଓ କର୍ମୀ ଉପସ୍ଥିତ ରହି ସରକାରଙ୍କ ବିରୁଦ୍ଧରେ ନାରାବାଜି ଦେଇଛନ୍ତି। ଘଟଣା ସ୍ଥଳରେ ପୋଲିସ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରୁଛି। କାକବନ୍ଧ ଆଶ୍ରମ ବିଦ୍ୟାଳୟ ର ଛାତ୍ରୀ ମୃତ୍ୟୁ ଘଟଣାରେ ବିଦ୍ୟାଳୟ ର ପ୍ରଧାନ ଶିକ୍ଷକ ନିଲମ୍ବିତ ହୋଇଛନ୍ତି।
ଚଡକ ମେଳା ହେଲା କାଳ ; ମେଳାରେ ଘଟିଲା ଅଘଟଣ ଖଜୁରୀ ଗଛରୁ ଖସିପଡି ଜଣେ ଯୁବକଙ୍କ ମୃତ୍ୟୁ
ନନ୍ଦିଘୋଷ ବ୍ୟୁରୋ : ଚଡକ ମେଳା ହେଲା କାଳ । ମେଳାରେ ଘଟିଲା ଅଘଟଣ। ଖଜୁରୀ ଗଛରୁ ଖସିପଡି ଜଣେ ଯୁବକଙ୍କ ମୃତ୍ୟୁ ଘଟିଛି। ଏଭଳି ଅଭାବନୀୟ ଘଟଣା ଘଟିଛି ମାଲକାନଗିରି ଜିଲ୍ଲା ମୋଟୁ ଥାନା ମାନ୍ୟମକୋଣ୍ଡା ପଞ୍ଚାୟତ ଏମପିଭି -୩୬ ଗାଁରେ। ମୃତକ ହେଲେ ଜଗଦୀଶ ସାନା।ଗାଁ ନିକଟ ଏମଭି-୭୨ ଠାରେ ଚଡକମେଳା ଆୟୋଜନ କରାଯାଇଥିଲା। ବଙ୍ଗୀୟ ସମ୍ପ୍ରଦାୟର ପରମ୍ପରା ଅନୁଯାୟୀ ବ୍ରତଧାରୀମାନେ ଶେଷ ସୋମବାର ଖଜୁରୀ ଗଛ ମୂଳରେ ମନ୍ତ୍ରପାଠ କରିବା ସହ ପୂଜାର୍ଚ୍ଚନା କରିଥିଲେ। ପୂଜା ପରେ ବ୍ରତଧାରୀମାନେ ଖଜୁରୀଗଛକୁ ଚଢିବା ପରମ୍ପରା ରହିଛି। ବ୍ରତ କରିଥିବା ଜଗଦୀଶ ପୂଜାର୍ଚ୍ଚନା ପରେ ୩୦ ଫୁଟ ଉଚ୍ଚର ଏକ ଖଜୁରୀଗଛକୁ ଚଢିଥିଲେ। ଉପବାସ କରିଥି ବାରୁ ଗଛ ଚଢିବା ବେଳେ ହଠାତ ତାଙ୍କ ମୁଣ୍ଡ ଘୂରି ସେ ତଳକୁ ପଡିଯାଇଥିଲେ । ଉପସ୍ଥିତ ପରିବାର ବର୍ଗ ଓ ଗ୍ରାମବାସୀ ତାଙ୍କୁ ଉଦ୍ଧାର କରି ତୁରନ୍ତ କାଲିମେଳା ସ୍ଥ୍ୟକେନ୍ଦ୍ରକୁ ନେଇ ଥିଲେ। ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କ ମୃତ୍ୟୁ ଘଟିଥିଲା। ମୃତକଙ୍କ ୨ ଶିଶୁ କନ୍ୟା ଓ ଗୋଟିଏ ପୁଅ ଅଛନ୍ତି। ସେହିପରି ଏମଭି ୮୦ରେ ମଧ୍ୟ ଚଡ଼କ ମେଳା ରେ ଗଛରେ ଚଢ଼ିବା ବେଳେ ଗଛରୁ ପଡ଼ି ଜଣେ ଆହତ ହୋଇଛନ୍ତି।
ଜଳୁଛି ପଶ୍ଚିମ ଏସିଆ, ଯୁଦ୍ଧ ରୋକିବ ରୁଷିଆ ।
ନନ୍ଦିଘୋଷ ବ୍ୟୁରୋ :ମଧ୍ୟପ୍ରାଚ୍ୟରେ ଯୁଦ୍ଧ ଆଗକୁ ଆହୁରି ବଢିପାରେ । ପାକିସ୍ତାନରେ ଆମେରିକା ଓ ଇରାନ ଭିତରେ ଶାନ୍ତି ଚୁକ୍ତି ପାଇଁ ପ୍ରୟାସ ବିଫଳ ପରେ ପଶ୍ଚିମ ଏସିଆ ସ୍ଥିତି ଆହୁରି ଗମ୍ଭୀର ହେଉଛି ।ଏପଟେ ପୁରା ବିଶ୍ୱରେ ଶକ୍ତି ସଙ୍କଟ ଲାଗିରହିଛି । ଇରାନ ଓ ଆମେରିକା ପୁଣି ଯୁଦ୍ଧ କରିବା ପାଇଁ ପ୍ରସ୍ତୁତ ହେଉଥିବା ସୂଚନା ମିଳୁଛି । ହର୍ମୁଜ୍ ପ୍ରଣାଳୀରେ ଥିବା ଇରାନର ସମସ୍ତ ବନ୍ଦରକୁ ଆମେରିକା ଅବରୋଧ କରିବା ଗତକାଲି ଠାରୁ ଆରମ୍ଭ କରିଦେଇଛି । ପଶ୍ଚିମ ଏସିଆରେ ଉତ୍ତେଜନା ହ୍ରାସ ଓ ସମାଧାନ ଲାଗି ଆଗେଇ ଆସିଛି ରୁଷିଆ। ଦିନକୁ ଦିନ ପଶ୍ଚିମ ଏସିଆ ସ୍ଥିତି ବିଗିଡୁଥିବାବେଳେ ଏହାର ସମାଧାନ ଲାଗି ରୁଷିଆ ଆଗ୍ରହ ପ୍ରକାଶ କରିଛି। ଇରାନ ବୈଦେଶିକ ମନ୍ତ୍ରୀ ଆବାସ ଆରାଘଚିଙ୍କ ସହ ଆଲୋଚନା କରିଛନ୍ତି ରୁଷିଆ ବୈଦେଶିକ ମନ୍ତ୍ରୀ ସର୍ଜେଇ ଲାଭରୋଭ। ହର୍ମୁଜ୍ ପ୍ରଣାଳୀର ସ୍ଵାଧୀନତା ରକ୍ଷା ଲାଗି ଆହ୍ବାନ ଦେଇଛନ୍ତି ଫ୍ରାନ୍ସ, ବ୍ରିଟେନ ଓ ୟୁରୋପୀୟ ୟୁନିଅନ। ସେପଟେ ଚୀନ ଲାଗି ନିଯୁକ୍ତ ଆମେରିକୀୟ ରାଷ୍ଟ୍ରଦୂତଙ୍କ ସହ ଆଜି ଆଲୋଚନା କରିବେ ଟ୍ରମ୍ପ। ଅନ୍ୟପଟେ ଆରବ ସାଗରରେ ରାତ୍ରୀକାଳୀନ ଫ୍ଲାଇଟ ଅପରେସନ କରିଛି ୟୁଏସଏସ ତ୍ରିପୋଲି। ଏହାର ଭିଜୁଆଲ ସେୟାର କରିଛି ଆମେରିକା ସେଣ୍ଟ୍ରାଲ କମାଣ୍ଡ। ଲେବାନନ ଉପରେ ପୁଣି ହମଲା କରିଛି ଇସ୍ରାଏଲ। ହେଜବୁଲ୍ଲା ଆତଙ୍କୀଙ୍କ କବଳରୁ କିଛି ସହରକୁ ମୁକ୍ତ କରିବା ଲାଗି ଦକ୍ଷିଣାଞ୍ଚଳ ଲେବାନନର କିଛି ସହର ଉପରେ ଇସ୍ରାଏଲ ହମଲା କରିଛି । ଏଭଳି ସ୍ଥିତିରେ ଯଦି ଯୁଦ୍ଧକୁ ଶୀଘ୍ର ବନ୍ଦ କରାନଯାଏ ଓ ଶାନ୍ତି ସ୍ଥାପନ କରାନଯାଏ ଏହାର ପ୍ରଭାବ ପୁରା ବିଶ୍ୱ ଉପରେ ପଡିବ ।
ଇରାନରୁ ଆସିଲା ଜାହାଜ । ପାରାଦୀପ ବନ୍ଦରରେ ଲାଗିଛି ଏମ୍ ଟି ଜୟା
ନନ୍ଦିଘୋଷ ବ୍ୟୁରୋ :ମଧ୍ୟପ୍ରାଚ୍ୟରେ ଯୁଦ୍ଧର ସଙ୍କଟ ଭିତରେ ଭାରତ ଓ ଓଡିଶା ପାଇଁ ଆସିଛି ଖୁସି ଖବର । ପୁରା ବିଶ୍ୱରେ ଶକ୍ତି ସଙ୍କଟ ଲାଗି ରହିଛି । ଇରାନ ଓ ଆମେରିକା ପୁଣି ଯୁଦ୍ଧ କରିବା ସ୍ଥିତିରେ ପହଞ୍ଚି ସାରିଲେଣି ।ହର୍ମୁଜ୍ ପ୍ରଣାଳୀକୁ ନେଇ ସଂଗ୍ରାମ ଏବେ ବି ଜାରି ରହିଛି । କିନ୍ତୁ ଏ ସବୁ ଭିତରେ ପାରାଦୀପ ବନ୍ଦରରେ ଲାଗିଛି ବୃହତ ତୈଳବାହୀ ଜାହାଜ ଏମ୍ ଟି ଜୟା । ଇରାନ ଖାର୍ଗ ଦ୍ଵୀପ ରୁ ୨୭୭.୩୨୧ ମେଟ୍ରିକ୍ ଟନ୍ ଅଶୋଧିତ ତୈଳ ଆଣି ଆସିଥିବା ଏହି ଜାହାଜ ପାରାଦୀପ ବନ୍ଦରର ସିଙ୍ଗିଲ ବୋରିଂ ପଏଣ୍ଟରେ ଲାଗିଛି। ଏହି ଅଶୋଧିତ ତୈଳ ପାରାଦୀପ ରିଫାଇନାରୀକୁ ଆସିଥିବା ବେଳେ ଆଜି ଏହାର ଅନଲୋଡିଂ କାର୍ଯ୍ୟ ଆରମ୍ଭ ହୋଇଛି। ପାରାଦୀପ ବନ୍ଦରରେ ଏହି ଜାହାଜ ଲାଗିବା ପରେ ବନ୍ଦର ପକ୍ଷରୁ ଏହାକୁ ସ୍ୱାଗତ କରାଯାଇଛି। ଏହା ଭାରତର ଶକ୍ତି ଆମଦାନୀ ପାଇଁ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ ବୋଲି ବନ୍ଦର ପକ୍ଷରୁ କୁହାଯାଇଛି। ଜାହାଜ ଏମ୍ ଟି ଜୟା ଲାଗିବାପରେ ଆଶା କରାଯାଉଛି ଆଗକୁ ଆହୁରି ବୃହତ ଜାହାଜ ବନ୍ଦରକୁ ଆସିପାରେ । ଏହା ଦ୍ୱାରା ଆଗାମୀ ଦିନରେ ପାରାଦୀପ ବନ୍ଦରକୁ ବୃହତ ଅଶୋଧିତ ତୈଳ ଜାହାଜ ଆସିବାର ବାଟ ଖୋଲିଛି ।
ପୁଣି ଯାତ୍ରା ଜଗତରୁ ବିବାଦର ଖବର ,ଆଗ ଟଙ୍କା ନେଲା କିନ୍ତୁ ଆସିଲେନି
ନନ୍ଦିଘୋଷ ବ୍ୟୁରୋ : ଆଗ ପଇସା ନେଲେ କିନ୍ତୁ ଯାତ୍ରା କରିବାକୁ ଆସିଲେନି । ପୁଣି ଯାତ୍ରା ଜଗତରୁ ଆସିଲା ଆଉ ଏକ ବିବାଦର ଖବର । ଯାତ୍ରା ପାର୍ଟି ଟ୍ରକ ଆଗରେ ଧାରଣା ଦେଲେ କମିଟି ସଦସ୍ୟ । ଆଡଭାନ୍ସ ନେଲା କିନ୍ତୁ ଯାତ୍ରା କରିବାକୁ ଆସିଲାନି ଯାତ୍ରା ପାର୍ଟି । ଆଡଭାନ୍ସ ଟଙ୍କା ମଧ୍ୟ ଫେରସ୍ତ କଲା ନାହିଁ । ଠକେଇ ଅଭିଯୋଗରେ ଯାତ୍ରା ପାର୍ଟିର ଗାଡ଼ି ଅଟକ ରହିଛି । ଭଦ୍ରକ ଜିଲ୍ଲା ଧୂଷୁରୀ ଥାନା ଅଧୀନ ଫତେପୁର ଗ୍ରାମରେ ଅଟକି ରହିଛି ଯାତ୍ରା ପାର୍ଟି ଅଶୋକ ସମ୍ରାଟ ଗାଡ଼ି । ଗାଡି ଆଗରେ ଧାରଣାରେ ବସିଛନ୍ତି ଚାନ୍ଦବାଲି ଥାନା ବାସନ୍ତିକ ଦୁର୍ଗାପୂଜା କମିଟିର ସଦସ୍ୟ ମାନେ । ଟଙ୍କା ଫେରସ୍ତ ନପାଇଲେ ଗାଡ଼ି ଛାଡ଼ିବେ ନାହିଁ ବୋଲି ଜିଦରେ ଅଟଳ ସଦସ୍ୟ । ଚାନ୍ଦବାଲି ଥାନା ତେନ୍ତୁଳିଡିହ ଗାଁର ବାସନ୍ତିକ ଦୁର୍ଗା ପୂଜା ଅବସରରେ ଚଳିତ ବର୍ଷ ମାର୍ଚ୍ଚ ୨୮ ରୁ ୩୧ ତାରିଖ ପର୍ଯ୍ୟନ୍ତ ଯାତ୍ରା ପରିବେଷଣ ହେବାର ଥିଲା । ଯାତ୍ରା ଅଶୋକ ସମ୍ରାଟର ମାଲିକ ୯ ଲକ୍ଷ ଟଙ୍କା ଅଗ୍ରୀମ ନେଇଥିବା ଅଭିଯୋଗ ହୋଇଛି। କିନ୍ତୁ ଯାତ୍ରା ପରିବେଷଣ କରିବା ପାଇଁ ଆସିନଥିଲେ । କମିଟି ସଦସ୍ୟ ମାନେ ବାରମ୍ବାର ଯୋଗାଯୋଗ କରିଥିଲେ ମଧ୍ୟ କୌଣସି ସୁଫଳ ପାଇନଥିଲେ । କମିଟି ସଦସ୍ୟ ଜାଣିବାକୁ ପାଇଥିଲେ କି ଧୂଷୁରୀ ଥାନା ଅଧୀନ ଫତେପୁରରେ ଯାତ୍ରା ଅଶୋକ ସମ୍ରାଟ ଯାତ୍ରା ପରିବେଷଣ କରୁଛି । ତୁରନ୍ତ ବାସନ୍ତୀକ ଦୁର୍ଗା କମିଟି ତେନ୍ତୁଳିଡିହର ସଦସ୍ୟ ମାନେ ଫତେପୁରରେ ପହଞ୍ଚିଥିଲେ । ଧୂଷୁରୀ ଥାନାରେ ଏକ ଲିଖିତ ଅଭିଯୋଗ କରିବା ସହିତ ଟ୍ରକ ଆଗରେ ଧାରଣା ଦେଇଛନ୍ତି । ଏ ସମ୍ପର୍କରେ ଯାତ୍ରା ପାର୍ଟି ତରଫରୁ କୌଣସି ପ୍ରତିକ୍ରିୟା ମିଳିପାରିନାହିଁ ।