spot_img
Home Blog Page 4774

ଆସୁଛି କ୍ରିସମାସ୍: ଆରମ୍ଭ ହେଲାଣି କେକ୍ ସେରିମୋନି

sitakanta dash
-
0
ଆସୁଛି କ୍ରିସମାସ୍: ଆରମ୍ଭ ହେଲାଣି କେକ୍ ସେରିମୋନି

କଟକ: ପାଖେଇ ଆସିଲାଣି କ୍ରିସମାସ୍ । ଏଥିପାଇଁ କଟକର ବିଭିନ୍ନ ହୋଟେଲରେ ଆରମ୍ଭ ହୋଇଗଲାଣି କେକ୍ ସେରିମୋନି । ବିଶେଷ କରି ବିଭିନ୍ନ ପ୍ରକାରର କେକ୍ ଓ ଚକୋଲେଟ ତିଆରି ପାଇଁ ଚାଲିଛି ଜୋରଦାର ପ୍ରସ୍ତୁତି । ଗ୍ରାହକଙ୍କୁ ଆକୃଷ୍ଟ କଲାଭଳି ପ୍ଲମ କେକ୍, ଫ୍ରୁଟ୍ କେକ୍ ସାଙ୍ଗକୁ ଏବେ ଡ୍ରାଏ ଫ୍ରୁଟ୍ ସହ ବିଭିନ୍ନ ପ୍ରକାର ଓ୍ବାଇନ ମିଶ୍ରଣ କରି ତିଆରି ହେଉଛି ସ୍ବତନ୍ତ୍ର କେକ୍ । ଆଗକୁ କ୍ରିସମସ୍ ସହ ନୂଆବର୍ଷ । କଟକଣା ହଟିଥିବାରୁ ଧୁମଧାମରେ ପାଳିବେ ଲୋକେ ।

ସେପଟେ ଏଥିପାଇଁ କଟକର ବିଭିନ୍ନ ହୋଟେଲ ଓ ରେଷ୍ଟୁରାଣ୍ଟ ଗୁଡିକରେ ଚାଲିଛି ବ୍ୟାପକ ପ୍ରସ୍ତୁତି । ବିଶେଷକରି ବଡ଼ଦିନ ପାଇଁ ସ୍ୱତନ୍ତ୍ର ଭାବେ ପ୍ରସ୍ତୁତ ହେଉଛି ଭଳିକି ଭଳି କେକ୍ । ଗ୍ରାହକଙ୍କୁ ଆକୃଷ୍ଟ କଲାଭଳି ‘ପ୍ଲମ କେକ’ ସହ କାଜୁ, କିସମିସ୍, ବ୍ଲାକ କରାଣ୍ଟ, ମୂର୍ରବା, ଚେରୀ ଓ ଗରମ ମସଲା ସହ ପାଖାପାଖି ୨୦ରୁ ଉର୍ଦ୍ଧ୍ବ ଡ୍ରାଏ ଫ୍ରୁଟରେ ତିଆରି ହେଉଛି କେକ୍ । ଖାଲି ଏତିକି ନୁହେଁ ଏଥିରେ ମିଶୁଛି ନାମିଦାମୀ ବ୍ରାଣ୍ଡର ୱlଇନ ।

ବଡ଼ଦିନ ଓ ନୂଆ ବର୍ଷରେ କେକ ପ୍ରତି ସାଧାରଣ ଲୋକଙ୍କର ରହିଥାଏ ଅହେତୁକ ଆକର୍ଷଣ  । ସେଥିପାଇଁ ବିଭିନ୍ନ ହୋଟେଲ ଗୁଡିକରେ ଆରମ୍ଭ ହୋଇଯାଇଛି କେକ୍ ସେରିମୋନି । ଭିନ୍ନ ଭିନ୍ନ ନୂଆ ଧରଣ କେକ୍ ଲୋକଙ୍କ ପସନ୍ଦ ଆସିବ ବୋଲି ଆଶା ରଖିଛନ୍ତି ହୋଟେଲ ମାଲିକ । ଖାଲି କେକ କି ଚକୋଲେଟ ନୁହେଁ ବରଂ ଗ୍ରାହକଙ୍କୁ ସ୍ୱାଗତ କରିବା ପାଇଁ କଟକର ହୋଟେଲ ଗୁଡିକ ପକ୍ଷରୁ ଆରମ୍ଭ ହୋଇଯାଇଛି ସାଜସଜ୍ଜା ।

କାହାଣୀ ‘ରାଜା ଇଡିପସ୍’, ଗ୍ରୀକ୍ ନାଟକରେ ଦର୍ଶକ ଅଭିଭୁତ

sitakanta dash
-
0
କାହାଣୀ ‘ରାଜା ଇଡିପସ୍’, ଗ୍ରୀକ୍ ନାଟକରେ ଦର୍ଶକ ଅଭିଭୁତ

ଭୁବନେଶ୍ୱର: କପାଳରେ ଲେଖା ଥିବା ଭାଗ୍ୟକୁ ବଦଳାଇ ହୁଏନି । ବିଧାତା ଲେଖିଥିବା ରେଖା ଏବଂ ଦଇବ ଦେଇଥିବା ଅଭିଶାପ ଆଗରେ ଅସହାୟ ମଣିଷ । ଏଭଳି ଏକ କାହାଣୀକୁ ନେଇ ଭୁବନେଶ୍ବର ରବୀନ୍ଦ୍ର ମଣ୍ଡପରେ ମଞ୍ଚସ୍ଥ ହୋଇଛି ନାଟକ ‘ରାଜା ଇଡିପସ୍’ । ଭାଗ୍ୟ ସହିତ ମଣିଷର ସଂଘର୍ଷ କିଭଳି ସଭ୍ୟତାର ଆଦିମ କାଳରୁ ଚାଲିଆସିଛି, ତାହା ଏହି ନାଟକ ମାଧ୍ୟମରେ ପ୍ରଦର୍ଶନ କରାଯାଇଥିଲା । ଅଢେଇଶହ ବର୍ଷ ତଳର ଏହି ଗ୍ରୀକ୍ ନାଟକକୁ ଓଡ଼ିଆ ଭାଷାନ୍ତର କରିବା ସହ ନିର୍ଦ୍ଦେଶନା ଦେଇଥିଲେ ଅଧ୍ୟାପକ ରମାକାନ୍ତ ମିଶ୍ର  ।

ରାଜା ଇଡିପସ୍ ନିଜ ପିତାଙ୍କୁ ହତ୍ୟା କରିବା ସହ ମାତାଙ୍କୁ ବିବାହ କରି ସନ୍ତାନ ଜନ୍ମ ଦେଉଥିବା ନିଚ୍ଛକ କାହାଣୀ ଦର୍ଶକଙ୍କୁ ବିମୋହିତ କରିଥିଲା । ଏଭଳି ଘଟଣାକୁ ରାଜା ଇଡିପସ୍ ଯେତେ ଟାଳିବାକୁ ଚେଷ୍ଟା କଲେ ମଧ୍ୟ ବିଫଳ ହୋଇଛନ୍ତି । ପ୍ରଥମ ଥର ପାଇଁ ଗ୍ରୀକ୍ ନାଟକର ନିଆରା ଅନୁଭୁତି ସାଉଁଟିଛନ୍ତି ଦର୍ଶକ । ଆଧୁନିକ ସମାଜରେ ଏବେ ବି ଏହି ପ୍ରସଙ୍ଗର ପ୍ରାସଙ୍ଗିକତା ରହିଛି ବୋଲି ଦର୍ଶକଙ୍କମାନଙ୍କୁ ବାର୍ତ୍ତା ଦେଇଛନ୍ତି କଳାକାର । ତେବେ ଗ୍ରୀକ୍ ନାଟକକୁ ଓଡ଼ିଆରେ ପରିବେଶଣ କରିବା ବେଶ୍‌ କଷ୍ଟକର ।

ଭାଗ୍ୟ ଏବଂ ମଣିଷ ସଂଘର୍ଷର କାହାଣୀକୁ ନେଇ ରଚିତ ଏହି ନାଟକରୁ ମଞ୍ଚସ୍ଥ କରିଥିଲେ ହୃଦୟ ଅନୁଷ୍ଠାନର କଳାକାର ।  ନାଟକରେ ବିନାୟକ ମିଶ୍ର, ଶଙ୍କର ବସୁମଲ୍ଲିକ, ହରେନ୍ ସାହୁ, ବିଭୁ ଦୀକ୍ଷିତ, କୃଷ୍ଣ ମହାରଣା, ମନୋଜ ମହାପାତ୍ର ଓ ରମାକାନ୍ତ ମିଶ୍ର ପ୍ରମୁଖ ଅଭିଜ୍ଞ କଳାକାର ଅଭିନୟ କରିଥିଲେ । ବରିଷ୍ଠ ନାଟ୍ୟ ନିର୍ଦ୍ଦେଶକ ଅନନ୍ତ ମହାପାତ୍ର, ପ୍ରଯୋଜକ ଅକ୍ଷୟ କୁମାର ପରିଜା, କାଦମ୍ବିନୀର ସମ୍ପାଦିକା ଡକ୍ଟର ଇତି ସାମନ୍ତ, ସମାଜର ମୁଖ୍ୟ ପ୍ରଶାସନିକ ଅଧିକାରୀ ଡକ୍ଟର ପ୍ରଭାସ ଚନ୍ଦ୍ର ଆଚାର୍ଯ୍ୟ ପ୍ରମୁଖ ଅତିଥି ଭାବେ ଯୋଗ ଦେଇଥିଲେ ।

ଓଡ଼ିଆ ପୁଅ ଶୁଭ୍ରାଂଶୁଙ୍କ ଉପରେ CSKର ନଜର

Santosh Kumar Sahoo
-
0
ଓଡ଼ିଆ ପୁଅ ଶୁଭ୍ରାଂଶୁଙ୍କ ଉପରେ CSKର ନଜର

ଭୁବନେଶ୍ବର: ବିଶ୍ୱର ସବୁଠାରୁ ଧନୀ କ୍ରିକେଟ ଲିଗ୍ ଇଣ୍ଡିଆନ ପ୍ରିମିୟର ଲିଗ୍ ଖେଳିପାରନ୍ତି ଓଡିଆ ପୁଅ ଶୁଭ୍ରାଂଶୁ ସେନାପତି । ବିଜୟ ହଜାରେ ଟ୍ରଫିରେ ଦମଦାର ପ୍ରଦର୍ଶନ କରିବା ପରେ ଆଇପିଏଲରେ ନଜର ଆସିପାରନ୍ତି ଶୁଭ୍ରାଂଶୁ । ଆଇପିଏଲ ଇତିହାସର ସଫଳତମ ଟିମ୍ ଚେନ୍ନାଇ ସୁପର କିଙ୍ଗ୍ସକୁ ପସନ୍ଦ ଆସିଛି ଶୁଭ୍ରାଂଶୁଙ୍କ ବ୍ୟାଟିଂ । ଯାହା ଫଳରେ ଶୁଭ୍ରାଂଶୁ ସେନାପତିଙ୍କୁ ଟ୍ରାଏଲ ପାଇଁ ଡାକିଛି ସିଏସକେ । ଏନେଇ ଓଡ଼ିଶା କ୍ରିକେଟ ଆସୋସିଏସନ ଟ୍ୱିଟ୍ କରି ଏହି ସୂଚନା ଦେଇଛି ।

ଚଳିତ ବିଜୟ ହଜାରେ ଟ୍ରଫିରେ ଓଡିଶାର ନେତୃତ୍ୱ ନେଉଥିବା ଶୁଭ୍ରାଂଶୁ ୭ ମ୍ୟାଚରେ ୨୭୫ ରନ ସଂଗ୍ରହ କରିଥିଲେ । ବିଜୟ ହଜାରେ ଟ୍ରଫିରେ ସେ ଆନ୍ଧ୍ରପ୍ରଦେଶ ବିପକ୍ଷରେ ଦମଦାର ଶତକ ମଧ୍ୟ ହାସଲ କରିଥିଲେ । ସେହିପରି ଶୁଭ୍ରାଂଶୁ ହିମାଚଳ ପ୍ରଦେଶ ଓ ବିଦର୍ଭ ବିପକ୍ଷରେ ଅର୍ଦ୍ଧଶତକ ହାସଲ କରିଥିଲେ । ଶୁଭ୍ରାଂଶୁ ସେନାପତି ସୟଦ ମୁସ୍ତାକ ଅଲ୍ଲୀ ଟି-୨୦ର ଗତ ସଂସ୍କରଣରେ ମଧ୍ୟ ଓଡ଼ିଶା ପାଇଁ ଭଲ ପ୍ରଦର୍ଶନ କରିଥିଲେ । ଗତ ସୟଦ ମୁସ୍ତାକ ଅଲ୍ଲୀ ଟି-୨୦ରେ ସେ ପାଞ୍ଚ ମ୍ୟାଚରେ ୧୧୬.୯୪ ଷ୍ଟ୍ରାଇକ ରେଟରେ ୧୩୮ ରନ ସଂଗ୍ରହ କରିଥିଲେ । ଏପର୍ଯ୍ୟନ୍ତ ଶୁଭ୍ରାଂଶୁ ସେନାପତି ୨୬ଟି ଟି-୨୦ ମ୍ୟାଚ ଖେଳି ୬୩୭ ରନ ସଂଗ୍ରହ କରିଛନ୍ତି । ଯେଉଁଥିରେ ତିନୋଟି ଅର୍ଦ୍ଧଶତକ ସାମିଲ ଅଛି ।

ଯଦି ଚେନ୍ନାଇ ସୁପର କିଙ୍ଗ୍ସ କଥା କହିବା ତାହାଲେ ସିଏସକେ ଆଇପିଏଲ ଇତିହାସରେ ସଫଳତମ ଦଳ ମଧ୍ୟରୁ ଅନ୍ୟତମ । ଆଇପିଏଲ ଇତିହାସରେ ଚାରି ଥର ଟ୍ରଫି ଜିତିବାରେ ସଫଳ ହୋଇଛି ସିଏସକେ । ମେଗା ଅକ୍ସନ ପୂର୍ବରୁ ୪ ଜଣ ଖେଳାଳିଙ୍କୁ ରିଟେନ କରିଛି ଚେନ୍ନାଇ ସୁପର କିଙ୍ଗ୍ସ । ଚେନ୍ନାଇ ଅଧିନାୟକ ମହେନ୍ଦ୍ର ସିଂ ଧୋନୀ, ରବିନ୍ଦ୍ର ଜାଡେଜା, ଋତୁରାଜ ଗାଇକଏଡ ଏବଂ ମୋଏନ ଅଲ୍ଲୀଙ୍କୁ ରିଟେନ କରିଛି ।

କମିବ ତାପମାତ୍ରା, ଥରିବ ଓଡ଼ିଶା

sitakanta dash
-
0
କମିବ ତାପମାତ୍ରା, ଥରିବ ଓଡ଼ିଶା

ଭୁବନେଶ୍ୱର: ରାଜ୍ୟରେ ଆହୁରି ବଢିବ ଶୀତ । ଆସନ୍ତା ୪ରୁ ୫ ଦିନ ମଧ୍ୟରେ ସ୍ବାଭାବିକ ଠାରୁ ୩ ରୁ ୪ ଡିଗ୍ରୀ ତାପମାତ୍ରା କମିବା ନେଇ ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ଉପକୂଳ ଅପେକ୍ଷା ଉପାନ୍ତରେ ଅଧିକ ଜାଡ ଅନୁଭୁତ ହେବ । କ୍ରମାଗତ ଭାବରେ ଉତ୍ତର ଦିଗରୁ ଓଡ଼ିଶା ମଧ୍ୟକୁ ଥଣ୍ଡା ଏବଂ ଶୁଷ୍କ ବାୟୁ ପ୍ରବାହ ବଢୁଥିବାରୁ ଆସନ୍ତା ୨୪ ଘଣ୍ଟା ମଧ୍ୟରେ ପାରା କମିବ ।

ଶୀତ ବଢୁଥିବା କାରଣରୁ ସଂନ୍ଧ୍ୟା ପରଠାରୁ ବିନା ଶୀତ ବସ୍ତ୍ରରେ ବାହାରକୁ ନ ବାହାରିବା ପାଇଁ ପରାମର୍ଶ ଦିଆଯାଇଛି । ଆସନ୍ତା ୨୪ ଘଣ୍ଟା ପର୍ଯ୍ୟନ୍ତ ରାଜ୍ୟର କିଛି ଜିଲ୍ଲାରେ ଘନ କୁହୁଡି ସହ ଅଧିକାଂଶ ଜିଲ୍ଲାରେ ସାମାନ୍ୟ କୁହୁଡି ପାଇଁ ମଧ୍ୟ ସତର୍କତା ଜାରି କରାଯାଇଛି । ଗତ ୨୪ ଘଣ୍ଟା ମଧ୍ୟରେ ରାଜ୍ୟର ୯ଟି ସ୍ଥାନର ତାପମାତ୍ରା ୧୨ଡିଗ୍ରୀ ତଳେ ରହିଛି ।

୮.୫ ଡିଗ୍ରୀ ତାପମାତ୍ରା ସହ ଦାରିଙ୍ଗବାଡି ରାଜ୍ୟର ସବୁଠାରୁ ଥଣ୍ଡା ସହର ଭାବରେ ରେକର୍ଡ କରିଥିବା ବେଳେ ବଲାଙ୍ଗୀର ୯ଡିଗ୍ରୀ, କୋରାପୁଟ ଏବଂ ଫୁଲବାଣୀରେ ୯.୫ ଡିଗ୍ରୀ, ସୁନ୍ଦରଗଡରେ ୧୦ ଡିଗ୍ରୀ, ଟିଟିଲାଗଡ ଏବଂ ସୋନପୁରରେ ୧୦.୮ ଡିଗ୍ରୀ, ଝାରସୁଗୁଡାରେ ୧୧.୨, ଭବାନୀପାଟଣାରେ ୧୧.୬ ଏବଂ ନୟାଗଡରେ ୧୨ ଡିଗ୍ରୀ ତାପମାତ୍ରା ରେକର୍ଡ କରାଯାଇଛି ।

ଅଣ୍ଡର-୧୯ ବିଶ୍ୱକପ ପାଇଁ ଦଳ ଘୋଷଣା କଲା ଟିମ୍ ଇଣ୍ଡିଆ, ୟଶ ଢ଼ୁଲ ଅଧିନାୟକ

Santosh Kumar Sahoo
-
0
ଅଣ୍ଡର-୧୯ ବିଶ୍ୱକପ ପାଇଁ ଦଳ ଘୋଷଣା କଲା ଟିମ୍ ଇଣ୍ଡିଆ, ୟଶ ଢ଼ୁଲ ଅଧିନାୟକ

ନୂଆଦିଲ୍ଲୀ: ଆସନ୍ତା ବର୍ଷ ଜାନୁଆରୀରେ ଓ୍ୱେଷ୍ଟ ଇଣ୍ଡିଜରେ ହେବକୁ ଯାଉଛି ଅଣ୍ଡର-୧୯ ବିଶ୍ୱକପ । ଅଣ୍ଡର-୧୯ ବିଶ୍ୱକପ ପାଇଁ ଦଳ ଘୋଷଣା କରିଛି ଟିମ୍ ଇଣ୍ଡିଆ । ଅଣ୍ଡର-୧୯ ବିଶ୍ୱକପ ପାଇଁ ବିସିସିଆଇ ୧୭ ଜଣିଆ ଦଳ ଘୋଷଣା କରିଛି । ଯାହାର ନେତୃତ୍ୱ ନେବେ ୟଶ ଢ଼ୁଲ । ଏହି ଟୁର୍ଣ୍ଣାମେଣ୍ଟ ଜାନୁଆରୀ ୧୪ରୁ ଆରମ୍ଭ ହେବ ଏବଂ ଫାଇନାଲ ମ୍ୟାଚ ୫ ଫେବ୍ରୁଆରୀରେ ଖେଳାଯିବ ।  ଏହି ଟୁର୍ଣ୍ଣାମେଣ୍‌ଟରେ ମୋଟ ୧୬ଟି ଦଳ ଅଂଶଗ୍ରହଣ କରିଛନ୍ତି ।

ଅଣ୍ଡର-୧୯ ଇତିହାସରେ ସବୁଠାରୁ ସଫଳତମ ଦଳ ହେଉଛି ଭାରତ । ଭାରତ ଚାରି ଥର ଅଣ୍ଡର-୧୯ ବିଶ୍ୱକପ ଟ୍ରଫିକୁ ନିଜ ନାମରେ କରିଛି । ୨୦୦୦ ମସିହାରେ ମହମ୍ମଦ କୈଫଙ୍କ ନେତୃତ୍ୱରେ ଭାରତ ଟ୍ରଫି ଜିତିଥିଲା । ସେହିପରି ୨୦୦୮ରେ ବିରାଟ କୋହଲିଙ୍କ ନେତୃତ୍ୱରେ, ୨୦୧୨ରେ ଉନ୍ମୁକ୍ତ ଚାନ୍ଦଙ୍କ ନେତୃତ୍ୱରେ ଓ ୨୦୧୮ରେ ପୃଥ୍ୱୀ ଶ’ଙ୍କ ନେତୃତ୍ୱରେ ଭାରତ ଅଣ୍ଡର-୧୯ ଟ୍ରଫି ଜିତିଥିଲା । ସେହିପରି ଭାବରେ ୨୦୧୬ ଓ ୨୦୨୦ ମସିହାରେ ଉପବିଜେତା ହୋଇଥିଲା ଟିମ୍ ଇଣ୍ଡିଆ । ଚଳିତ ବିଶ୍ୱକପରେ ୟଶ ଢ଼ୁଲଙ୍କ ନେତୃତ୍ୱରେ ଭାରତ ପୁଣି ଥରେ ବିଶ୍ୱ ବିଜେତା ହେବା ପାଇଁ ଲକ୍ଷ୍ୟ ରଖିଛି ।

ଜୟପୁର ଆକାଶବାଣୀ କେନ୍ଦ୍ରର ସ୍ଥାନାନ୍ତର ନିଷ୍ପତ୍ତିକୁ ଦୃଢ଼ ବିରୋଧ

Tanmaya Reddy
-
0
ଜୟପୁର ଆକାଶବାଣୀ କେନ୍ଦ୍ରର ସ୍ଥାନାନ୍ତର ନିଷ୍ପତ୍ତିକୁ ଦୃଢ଼ ବିରୋଧ

ଜୟପୁର: ଆକାଶବାଣୀ ଜୟପୁରର ସ୍ଥାନାନ୍ତର ନିଷ୍ପତ୍ତିକୁ ଦୃଢ଼ ବିରୋଧ । କେନ୍ଦ୍ର ସରକାରଙ୍କ ଏଭଳି ନିଷ୍ପତ୍ତିକୁ ଦୃଢ଼ ବିରୋଧ କରିଛନ୍ତି ଜୟପୁର ବାସିନ୍ଦା । ଭବାନୀପାଟଣା ଆକାଶବାଣୀ କେନ୍ଦ୍ର  ଅଧୀନରେ ଜୟପୁର ଆକାଶବାଣୀ କେନ୍ଦ୍ରକୁ ରଖାଯିବ ନେଇ ନିଷ୍ପତ୍ତି ନେଇଛି ପ୍ରସାର ଭାରତୀ ।ସ୍ଥାନୀୟ ଲୋକେ ଏଭଳି ନିଷ୍ପତ୍ତିକୁ ନାପସନ୍ଦ କରିବା ସହ ଆଞ୍ଚଳିକ ଭାଷା ଓ କାଳସଂସ୍କୃତିର ସୁରକ୍ଷା ପାଇଁ ନିଷ୍ପତିର ପୁନର୍ବିଚାର ହେବା ଆବଶ୍ୟକ ବୋଲି କହିଛନ୍ତି ଲୋକେ ।

୧୯୬୪ ମସିହାରେ ପ୍ରତିଷ୍ଠତ ହୋଇଥିଲା ଜୟପୁର ଆକାଶବାଣୀ କେନ୍ଦ୍ର । କେନ୍ଦ୍ର ସରକାରଙ୍କ ନିଷ୍ପତି ଅନୁସାରେ ଭବାନୀପାଟଣା କ୍ଲଷ୍ଟର ଅଧିନରେ ରହିଲେ ସ୍ୱାଧୀନ ଦାୟିତ୍ୱରେ ରହିବ ନାହିଁ ଜୟପୁର ଆକାଶ ବାଣୀ କେନ୍ଦ୍ର । ପ୍ରସାର ଭାରତିର ନୂଆ ନିଷ୍ପତ୍ତି ଅନୁସାରେ ଭବାନୀପାଟଣା କେନ୍ଦ୍ରକୁ କ୍ଳଷ୍ଟର ମାନ୍ୟତା ଦିଆଯିବ ଏବଂ ଜୟପୁର ଏହାର ଅଧୀନରର ରହିବ । ଏଭଳି ହେଲେ ଅବିଭକ୍ତ କୋରାପୁଟ ଜିଲ୍ଲାର ଆଞ୍ଚଳିକ ଭାଷା ଓ କଳା ସଂସ୍କୃତିର ଗୁରୁତ୍ୱ କମିବ । ବିଭିନ୍ନ ଜନ ସଚେତନତା ମୂଳକ ଓ ମନୋରଞ୍ଜନ କାର୍ଯ୍ୟକ୍ରମ ଲାଗି ଜାତୀୟ ସ୍ତରରେ ବହୁବାର ପୁରସ୍କୃତ ହୋଇଥିବା ଆକାଶବାଣୀ କେନ୍ଦ୍ରର କଳାକାର ବୃତ୍ତି ହରାଇବେ । ଏଥିସହିତ ଆଞ୍ଚଳିକ ଭାଷାରେ କାର୍ଯ୍ୟକ୍ରମ କମିବା ଫଳରେ ଦୁର୍ଗମ ଅଞ୍ଚଳରେ ଲୋକେ ରେଡିଓରୁ ମୁହଁ ଫେରାଇବେ । ଏଥିପାଇଁ ଆଜି କୋରାପୁଟ ଜିଲ୍ଲା କଳାକର ସଂଘ ଓ ଅଭିଭକ୍ତ କୋରାପୁଟ ଦେଶିଆ ନାଟ ସଂଘ ପକ୍ଷରୁ ତୀବ୍ର ପ୍ରତିବାଦ କରାଯାଇଛି  । ଆଗାମୀ ଦିନରେ କେନ୍ଦ୍ର ସରକାର ଏହାର ପୁନର୍ବିଚାର ନ କଲେ ଦୁର୍ବାର ଆନ୍ଦୋଳନ କରାଯିବ ବୋଲି କହିଛନ୍ତି କଳାକାର ସଂଘ  ।

ରାଜ୍ୟର ପ୍ରଥମ ଆକାଶବାଣୀ କେନ୍ଦ୍ର ୧୯୪୮ ମସିହାରେ କଟକ ଠାରେ ପ୍ରତିଷ୍ଠା ହୋଇଥିଲା ୧୯୬୩ ମସିହାରେ ସମ୍ବଲପୁର ଓ ୧୯୬୪ ମସିହାରେ ଜୟପୁର ଆକାଶବାଣୀ କେନ୍ଦ୍ର ପ୍ରତିଷ୍ଠା ହୋଇଥିଲା । ଜୟପୁରରେ କେନ୍ଦ୍ର ଖୋଲିବାର ବହୁ ବର୍ଷ ପରେ ଡେପୁଟୀ ଡାଇରେକ୍ଟର ଜେନରାଲ୍‌ ( ଡିଡିଜି ) ପଦବି ସୃଷ୍ଟି ହୋଇଥିଲା । ଏହି ପଦବିରେ ଜଣେ ଅଧିକାରୀ ରହି କେନ୍ଦ୍ର ପରିଚାଳନା କରୁଥିଲେ । କିନ୍ତୁ ଉକ୍ତ ଅଧିକାରୀଙ୍କ ବଦଳି ପରେ ଆଉ କାହାକୁ ଦାୟିତ୍ୱ ଦିଆଯାଇ ନଥିଲା । ସୂଚନା ଅନୁସାରେ ପ୍ରସାର ଭାରତୀ ପକ୍ଷରୁ ଓଡ଼ିଶାରେ ୩ଟି କ୍ଲଷ୍ଟର କଟକ , ଭୁବନେଶ୍ୱର ଓ ଭବାନୀପାଟଣା ଠାରେ ଖୋଲାଯିବ । ଭବାନୀପାଟଣା କ୍ଲଷ୍ଟର ଅଧୀନରେ ଜୟପୁର ସମେତ ୪ଟି କେନ୍ଦ୍ର ରହିବ ।  ଏହାକୁ ବିରୋଧ କରି କୋରାପୁଟ ସାଂସଦ ସପ୍ତଗିରି ଉଲ୍ଲକା ସଂସଦରେ ପ୍ରଶ୍ନ ଉଠାଇଥିଲେ  । କିନ୍ତୁ କେନ୍ଦ୍ରମନ୍ତ୍ରୀ ଅନୁରାଗ ସିଂ ଠାକୁର କୌଣସି ପରିବର୍ତ୍ତନ କରାଯାଇପାରିବ ନାହିଁ ବୋଲି ସଂସଦରେ କହିବାରୁ ଏବେ ସ୍ଥାନୀୟ ବୁଦ୍ଧଜୀବୀ ମହଲରେ ତୀବ୍ର ଅସନ୍ତୋଷ ପ୍ରକାଶ ପାଇଛି  । ସେଥିପାଇଂ ଆଜି ଦଳଗତ ନିର୍ବିଶେଷରେ ରାଜରାସ୍ତକୁ ଓଲ୍ଲାଇଛନ୍ତି ବିଭିନ୍ନ ସଂଗଠନ  ।

ମଇଁଷିର ମୂଲ୍ୟ ୮୦ ଲକ୍ଷ, ଓଜନ ଦେଢ଼ ଟନ୍

Swapna Ray
-
0
ମଇଁଷିର ମୂଲ୍ୟ ୮୦ ଲକ୍ଷ, ଓଜନ ଦେଢ଼ ଟନ୍

ମହାରାଷ୍ଟ୍ର : ମହାରାଷ୍ଟ୍ର ସାଙ୍ଗଲିରେ ରହୁଥିବା ଗଜେନ୍ଦ୍ର ନାମକ ଏହି ମଇଁଷି । ଯାହାର ମୂଲ୍ୟ ୮୦ ଲକ୍ଷ ଟଙ୍କା । ସାଙ୍ଗଲି ଜିଲ୍ଲା ତାସ ଗାଁରେ ଏକ ସଙ୍ଗଠନ ତରଫରୁ ଆୟୋଜିତ କୃଷି, ପଶୁ, ପକ୍ଷୀ ପ୍ରଦର୍ଶନୀ ମେଳାରେ ଗଜେନ୍ଦ୍ର ଆସିଥିବା ବେଳେ ଲୋକମାନେ ଏହି ମଇଁଷିକୁ ଦେଖି ଅବାକ୍ ହୋଇଯାଇଥିଲେ । ଏହା ପରଠୁ ଗଜେନ୍ଦ୍ର ଖୁବ୍ ଚର୍ଚ୍ଚାରେ ରହୁଥିବା ବେଳେ ଅନେକ କୃଷକ ଏହି ମଇଁଷିକୁ କିଣିବାକୁ ଇଚ୍ଛୁକ ।

ଏହି ମଇଁଷିଟିର ଓଜନ ପ୍ରାୟ ଦେଢ଼ ଟନ୍ ହୋଇଥିବାବେଳେ ମୂଲ୍ୟ ୮୦ ଲକ୍ଷ ଟଙ୍କା । ମହାରାଷ୍ଟ୍ର, କର୍ଣ୍ଣାଟକ ବର୍ଡରରେ ଥିବା ମଙ୍ଗସୁଲି ଗାଁର ବାସିନ୍ଦା ବିଳାସ ନାୟକଙ୍କର ଏହି ମଇଁଷି । ମଇଁଷିଟି ଖୁବ୍ ଓଜନ ଏବଂ ହୃଷ୍ଟପୃଷ୍ଟ ହୋଇଥିବାରୁ ଏହାର ନାମ ଗଜେନ୍ଦ୍ର ରଖିଥିବା ବିଳାସ କହିଛନ୍ତି । ଏହି ମଇଁଷି ସହ ସେଲ୍ଫି ନେବା ପାଇଁ ଲୋକ ଦୂରଦୂରାନ୍ତରରୁ ଛୁଟି ଆସନ୍ତି ଏବଂ ବର୍ତ୍ତମାନ ସୋସିଆଲ ମିଡିଆରେ ଗଜେନ୍ଦ୍ରର ଫଟୋ ଏବଂ ଭିଡିଓ ଖୁବ୍ ଭାଇରାଲ ହେବାରେ ଲାଗିଛି । କେବଳ ଏତିକି ନୁହେଁ ଗଜେନ୍ଦ୍ରକୁ ଦିନକୁ ୧୫ ଲିଟର କ୍ଷୀର ପିଇବାକୁ ଦିଆଯାଉଥିବା ବେଳେ ଦିନକୁ ୪ ଥର ଘାସ ଏବଂ ଆଖୁ ଖାଇବାକୁ ଦିଆଯାଏ । କୃଷକଙ୍କ କହିବାନୁସାରେ ଏଭଳି କିସମର ମଇଁଷିର ବଂଶ ବୃଦ୍ଧି କରାଗଲେ ଖୁବ୍ ଲାଭବାନ ହୋଇପାରିବେ । ମାତ୍ର ଏଭଳି ମଇଁଷିଙ୍କର ଯତ୍ନନେବା ଖୁବ୍ କଷ୍ଟକର । ସମୟ ବ୍ୟବଧାନରେ ଡାକ୍ତରୀ ପରୀକ୍ଷା କରାଯିବା ସହ ସାଧାରଣ ମଇଁଷିଠୁ ଏଭଳି ମଇଁଷିର ଭରଣପୋଷଣ ଦାୟିତ୍ୱ ଢେର ଅଧିକ ।

 

ବିଜେଡିର ପ୍ରସ୍ତାବକୁ ମୋଟର ଚାଳକ ମହାସଂଘର କୃତଜ୍ଞତା

sitakanta dash
-
0
ବିଜେଡିର ପ୍ରସ୍ତାବକୁ ମୋଟର ଚାଳକ ମହାସଂଘର କୃତଜ୍ଞତା

ଭୁବନେଶ୍ୱର: ବିଜେଡ଼ିର ପ୍ରସ୍ତାବକୁ ଡ୍ରାଇଭର ମହାସଂଘର ଭୂୟସୀ ପ୍ରଶଂସା  । ହଜାର ହଜାର ଡ୍ରାଇଭର ଭୋଗୁଥିବା ସମସ୍ୟାକୁ ନେଇ କେନ୍ଦ୍ରମନ୍ତ୍ରୀଙ୍କୁ ଭେଟିଥିଲା ବିଜେଡି  ।ପୂରଣ ହେବାକୁ ଯାଉଛି ଡ୍ରାଇଭରଙ୍କ ଦୀର୍ଘ ଦିନର ଦାବି । ଜାତୀୟ ରାଜପଥରେ ଗାଡ଼ି ଚଳାଉଥିବାବେଳେ ଡ୍ରାଇଭର ଭୋଗୁଥିବା ଅସୁବିଧା ଦୂର କରିବାକୁ ଦାବି  । ରବିବାର କେନ୍ଦ୍ର ସଡ଼କ ପରିବହନ ମନ୍ତ୍ରୀ ନୀତିନ ଗଡ଼କାରୀଙ୍କୁ ଏ ନେଇ ଦାବି ଜଣାଇଛନ୍ତି ବିଜେଡ଼ି ସଂସଦୀୟ ଦଳ   । ରାଜ୍ୟ ଡ୍ରାଇଭର ମହାସଂଘର ଦୀର୍ଘ ଦିନର ଦାବି ପୂରଣ ହେବା ଦିଗରେ ପଦକ୍ଷେପ ଗ୍ରହଣ କରିଛି ବିଜେଡ଼ି ।

ଜାତୀୟ ରାଜପଥ କଡ଼ରେ ଡ଼୍ରାଇଭର ମାନଙ୍କ ପାଇଁ ବିଶ୍ରାମ ସ୍ଥାନ, ଖାଦ୍ୟପେୟର ବ୍ୟବସ୍ଥା ସହ ପାର୍କିଂ ବ୍ୟବସ୍ଥା କରିବାକୁ ବିଜେଡ଼ି ସାଂସଦ ସୁବାସ ସିଂ କେନ୍ଦ୍ରମନ୍ତ୍ରୀଙ୍କୁ ଦାବି ଜଣାଇଛନ୍ତି  । ରାଜ୍ୟ ସରକାର ରାଜ୍ୟ ରାଜପଥ ଗୁଡ଼ିକରେ ଡ୍ରାଇଭରଙ୍କ ସୁବିଧା ନେଇ ବିଭିନ୍ନ କାର୍ଯ୍ୟମାନ ଗ୍ରହଣ କରିଛନ୍ତି  । ଯେମିତିକି ରାଜ୍ୟ ରାଜପଥ କଡ଼ରେ ଯାତ୍ରୀମାନଙ୍କ  ବିଶ୍ରାନ ପାଇଁ ରାଜ୍ୟ ସରକାର  ପଥପ୍ରାନ୍ତ ବିଶ୍ରାମ କେନ୍ଦ୍ର ପ୍ରତିଷ୍ଠା କରିଛନ୍ତି  । ସେହିପରି କେନ୍ଦ୍ର ସରକାର ମଧ୍ୟ ରାଜ୍ୟ ଢାଞ୍ଚାରେ ଜାତୀୟ ରାଜପଥ କଡ଼ରେ ଡ଼୍ରାଇଭର ମାନଙ୍କ ପାଇଁ ବିଶ୍ରାମ ସ୍ଥାନ କରିବାର ଆବଶ୍ୟକତା ରହିଥିବା କୁହାଯାଇଛି  ।

ତେବେ କେନ୍ଦ୍ର ସଡ଼କ ପରିବାହନ ମନ୍ତ୍ରୀ ନୀତିକ ଗଡ଼କାରୀ ଓଡ଼ିଶାର କାର୍ଯ୍ୟକୁ ପ୍ରଶଂସା କରିଥିଲେ  । ବିଜେଡି ସାଂସଦମାନେ ଦେଇଥିବା ପ୍ରସ୍ତାବକୁ ଗୁରୁତ୍ୱର ସହ ଗ୍ରହଣ କରିଥିଲେ ବିଭାଗୀୟ ମନତ୍ରୀ  । ଏପରିକି ଉକ୍ତ ଦାବିକୁ ନେଇ ଖୁବ ଶୀଘ୍ର ପଦକ୍ଷେପ ନେବାକୁ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି । ବିଜେଡ଼ିର ଏଭଳି ଉଦ୍ୟମ ପାଇଁ କୃତଜ୍ଞତା ଜଣାଇଛନ୍ତି ରାଜ୍ୟ ମୋଟର ଚାଳକ ମହାସଂଘ ।

ଏସିଆନ ଚମ୍ପିଆନ୍ସ ଟ୍ରଫି ହକି; ଜାପାନ ବିପକ୍ଷରେ ଭାରତର ବଡ଼ ବିଜୟ

Santosh Kumar Sahoo
-
0
ଏସିଆନ ଚମ୍ପିଆନ୍ସ ଟ୍ରଫି ହକି; ଜାପାନ ବିପକ୍ଷରେ ଭାରତର ବଡ଼ ବିଜୟ

ଢ଼ାକା: ଚଳିତ ଏସିଆନ ଚମ୍ପିଆନ୍ସ ଟ୍ରଫି ହକିରେ ଭାରତର ବଡ଼ ବିଜୟ । ଜାପାନକୁ ୬-୦ରେ ହରାଇଲା ଭାରତ । ରବିବାର ଭାରତ ଶେଷ ଲିଗ୍ ମ୍ୟାଚରେ ଜାପାନକୁ ଭେଟିଥିଲା । ଏହି ମ୍ୟାଚରେ ଜାପାନକୁ ୬-୦ରେ ପରାସ୍ତ କରିଛି ଟିମ୍ ଇଣ୍ଡିଆ । ଏହି ବିଜୟ ସହ ଭାରତ ପଏଣ୍ଟ ଟେବୁଲରେ ପ୍ରଥମ ସ୍ଥାନରେ ରହିଛି ।

ମ୍ୟାଚ ଆରମ୍ଭରୁ ଆକ୍ରମଣାତ୍ମକ ଖେଳ ପ୍ରଦର୍ଶନ କରିଥିଲା ଟିମ୍ ଇଣ୍ଡିଆ । ମ୍ୟାଚର ୧୦ତମ ମିନିଟରେ ହରମନପ୍ରୀତଙ୍କ ଷ୍ଟିକରୁ ଆସିଥିଲା ପ୍ରଥମ ଗୋଲ । ଏକ ପେନାଲ୍ଟି କର୍ଣ୍ଣରକୁ ଗୋଲରେ ପରିଣତ କରିଥିଲେ ହରମନପ୍ରୀତି । ଏହି ଗୋଲ ସହ ଭାରତ ପ୍ରଥମ କ୍ୱାଟରରେ ୧-୦ରେ ଆଗୁଆ ରହିଥିଲା । ଦ୍ୱିତୀୟ କ୍ୱାଟରରେ ମଧ୍ୟ ଜାପାନ ଉପରେ ଭାରି ପଡ଼ିଥିଲା ଇଣ୍ଡିଆ ।  ଦ୍ୱିତୀୟ କ୍ୱାଟରରେ ଦିଲପ୍ରୀତ ସିଂହଙ୍କ ଷ୍ଟିକରୁ ଆସିଥିଲା ଦ୍ୱିତୀୟ ଗୋଲ । ଏହି ଗୋଲ ଫଳରେ ଭାରତ ୨-୦ରେ ଆଗୁଆ ରହିଥିଲା । ସେହିପରି ତୃତୀୟ କ୍ୱାଟରରେ ଜରମନପ୍ରୀତ ସିଂଙ୍କ ଷ୍ଟିକରୁ ଆସିଥିଲା ତୃତୀୟ ଗୋଲ । ତୃତୀୟ କ୍ୱାଟର ଶେଷ ସୁଦ୍ଧା ଭାରତ ୩-୦ରେ ଆଗୁଆ ରହିଥିଲା । ଚତୁର୍ଥ କ୍ୱାଟର ଆରମ୍ଭରୁ ଅଧିକ ଆକ୍ରମଣାତ୍ମକ ଖେଳ ପ୍ରଦର୍ଶନ କରିଥିଲା ଭାରତ । ଶେଷ କ୍ୱାଟରରେ ଭାରତ ତିନୋଟି ଗୋଲ ସ୍କୋର କରିଥିଲା । ଭାରତ ପକ୍ଷରୁ ଶେଷ କ୍ୱାଟରରେ ସୁମିତ କୁମାର, ହରମନପ୍ରୀତ ସିଂ ଓ ଶମସେର ସିଂ ଗୋଲ ସ୍କୋର କରିଥିଲେ । ଏଥି ସହ ଏହି ମ୍ୟାଚକୁ ଭାରତ ୬-୦ରେ ନିଜ ନାମରେ କରିଥିଲା ।

ଏହି ବିଜୟ ସହ ଭାରତ ଚଳିତ ଏସିଆନ ଚମ୍ପିଆନ୍ସ ଟ୍ରଫି ହକିର ପଏଣ୍ଟ ଟେବୁଲରେ ଶୀର୍ଷ ସ୍ଥାନରେ ରହିଛି । ପଏଣ୍ଟ ଟେବୁଲର ଦ୍ୱିତୀୟ ସ୍ଥାନରେ ରହିଛି ସାଉଥ କୋରିଆ, ତୃତୀୟ ସ୍ଥାନରେ ରହିଛି ଜାପାନ ଓ ଚତୁର୍ଥ ସ୍ଥାନରେ ରହିଛି ପାକିସ୍ତାନ । ଆସନ୍ତା ୨୧ ଡିସେମ୍ବରରେ ଭାରତ ସେମିଫାଇନାଲ ଖେଳିବ ।

ଅମୃତସର ପରେ କପୁରତାଲା, ଧର୍ମୀୟ ଭାବନାକୁ ଆଘାତ ଅଭିଯୋଗରେ ଆଉ ଜଣଙ୍କୁ ପିଟି ପିଟି ହତ୍ୟା

Santosh Kumar Sahoo
-
0
ଅମୃତସର ପରେ କପୁରତାଲା, ଧର୍ମୀୟ ଭାବନାକୁ ଆଘାତ ଅଭିଯୋଗରେ ଆଉ ଜଣଙ୍କୁ ପିଟି ପିଟି ହତ୍ୟା

ଅମୃତସର: ଧାର୍ମିକ ଅବମାନନାକୁ ନେଇ ପଞ୍ଜାବରେ ଦୁଇ ଦିନରେ ହୋଇଛି ଦୁଇଟି ହତ୍ୟା । ଅମୃତସର ସ୍ଥିତ ସ୍ବର୍ଣ୍ଣ ମନ୍ଦିର ଭିତରେ ଗୁରୁ ଗ୍ରନ୍ଥ ସାହିବଙ୍କୁ ଅସମ୍ମାନ ଅଭିଯୋଗରେ ଶନିବାର ଜଣେ ବ୍ୟକ୍ତିଙ୍କୁ ପିଟି ପିଟି ହତ୍ୟା କରାଯିବାର ମାତ୍ର କେଇ ଘଣ୍ଟା ପରେ କପୁରତାଲାରେ ଆଉ ଜଣେ ଯୁବକଙ୍କୁ ସମାନ ଅଭିଯୋଗରେ ହତ୍ୟା କରାଯାଇଛି ।

ଶନିବାର ସ୍ୱର୍ଣ୍ଣ ମନ୍ଦିରରେ ଏକ ହତ୍ୟା ପରେ ରବିବାର କପୁରତାଲାରେ ଆଉ ଜଣଙ୍କୁ ହତ୍ୟା କରାଯାଇଛି । ଧର୍ମୀୟ ଭାବନର ଅବମାନନା କାରଣରୁ କପୁରତାଲା ଜିଲ୍ଲା ନିଜାମପୁରରେ ଆଉ ଜଣଙ୍କୁ ହତ୍ୟା କରାଯାଇଛି । ଶିଖ୍ ପତାକା ନିସାନ ସାହିବକୁ ଅସମ୍ମାନ ପ୍ରଦର୍ଶନକୁ ନେଇ ଉକ୍ତ ଯୁବକକୁ ହତ୍ୟା କରାଯାଇଛି । ଏହି ଘଟଣାରେ ପୋଲିସ ତଦନ୍ତ ଜାରି ରହିଛି ।

ସୂଚନାଯୋଗ୍ୟ ଯେ, ଶନିବାର ସ୍ୱର୍ଣ୍ଣ ମନ୍ଦିର ପରିସରରେ ସବୁଦିନ ପରି ପ୍ରାର୍ଥନା ଚାଲିଥିବା ବେଳେ, ଜଣେ ବ୍ୟକ୍ତି ରେଲିଂ ଡେଇଁ ମନ୍ଦିରର ଗର୍ଭଗୃହ ଭିତରକୁ ଚାଲି ଯାଇଥିଲେ । ସେଠାରେ ଗୁରୁ ଗ୍ରନ୍ଥ ସାହିବ ସମ୍ମୁଖରେ ଥିବା ଖଣ୍ଡାକୁ ଟେକି ନେବାକୁ ଉଦ୍ୟମ କରିଥିଲା । ଏହାକୁ ନେଇ ଭକ୍ତଙ୍କ ମଧ୍ୟରେ ତୀବ୍ର ଉତ୍ତେଜନା ପ୍ରକାଶ ପାଇଥିଲା । ପରେ ସେମାନେ ଉକ୍ତ ବ୍ୟକ୍ତିଙ୍କୁ ସେଠାରେ ହିଁ ପିଟିପିଟି ହତ୍ୟା କରିଥିଲେ । ଏହି ହତ୍ୟା ପରେ ମନ୍ଦିରର ସମସ୍ତ ସିସିଟିଭିକୁ ପୋଲିସ ଯାଞ୍ଚ କରିବା ସହ ମାମଲା ରୁଜୁ କରି ତଦନ୍ତ ଜାରି ରଖିଛି ବୋଲି କହିଛନ୍ତି ଅମୃତସର ଡେପୁଟି ପୋଲିସ କମିଶନର ପରମିନ୍ଦର ସିଂ ଭଣ୍ଡଲ । ଘଟଣାର ତଦନ୍ତ ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ ଚରଣଜିତ ସିଂ ଚନ୍ନି ।

ପୂର୍ବରୁ ସମାନ ଧରଣର ଏକ ଧାର୍ମିକ ଅବମାନନା ମାମଲାରେ ପୂର୍ବତନ ମୁଖ୍ୟମନ୍ତ୍ର ଅମରିନ୍ଦର ସିଂଙ୍କୁ ଜୋରଦାର ଟାର୍ଗେଟ କରିଥିଲେ ପିସିସି ସଭାପତି ନବଜୋତ ସିଂ ସିଦ୍ଧୁ । ଫଳ ଏହା ହୋଇଥିଲା ଯେ ଅମରିନ୍ଦରଙ୍କୁ ଏଥିଲାଗି ବହୁ ମୂଲ୍ୟ ଦେବାକୁ ପଡିଥିଲା ଏବଂ ଶେଷରେ ସେ ଦଳ ଛାଡିଥିଲେ । ଆଗକୁ ରାଜ୍ୟରେ ବିଧାନସଭା ନିର୍ବାଚନ ହେବାକୁ ଯାଉଥିବା ବେଳେ, ଏହି ହତ୍ୟା ଘଟଣା କଂଗ୍ରେସ ସରକାର ଲାଗି ବେଶ୍ ଅଡୁଆ ପରିସ୍ଥିତି ସୃଷ୍ଟି ହୋଇପାରେ ।

1...4,7734,7744,775...7,940Page 4,774 of 7,940

Latest Stories

Location

Popular Tags

Odisha16411NANDIGHOSHA TV5792INDIA3265BHUBANESWAR3063BJD2125Naveen Patnaik1903PURI1719BJP1618NandighoshaTv1584

Contact us