ଯାଜପୁର ବ୍ଲକ ଚଇନିପୁର ଗାଁ ଅଖାଘର ସାହିରେ ଧୁମଧାମରେ ପାଳିତ ହୋଇଯାଇଛି ଗହ୍ମା ପର୍ବ ବା ବଳଭଦ୍ର ପୂଜା । ରାକ୍ଷୀ ପୂର୍ଣ୍ଣିମା ପରେ ପାଞ୍ଚ ଦିନ ଧରି ପାଳନ ହୁଏ ଏହି ପର୍ବ । ପାଞ୍ଚଦିନ ବ୍ୟାପୀ ଅନୁଷ୍ଠିତ ହେଉଥିବା ଏହି ପୂଜାରେ ଆମିଷ, ପିଆଜ ରସୁଣ ସମ୍ପୂର୍ଣ୍ଣ ବାରଣ କରାଯାଇଥାଏ । ପୂଜାର ଦ୍ୱିତୀୟ ଦିନକୁ ବଡ଼ ପୂଜା ନାଁରେ ନାମିତ କରାଯାଇଥାଏ । ସେଥିରେ ମହାପ୍ରଭୁଙ୍କୁ ବିଭିନ୍ନ ପ୍ରକାର ପିଠା ଓ କ୍ଷୀରି ଭୋଗ ରୂପେ ଅର୍ପଣ କରାଯାଇଥାଏ । ଶେଷ ଦିନରେ ପ୍ରଭୁଙ୍କ ପାଖରେ ଶାଗ ଭାତ ଭୋଗ ଲଗାଯାଇଥାଏ । ଏହି ଦିନ ସହସ୍ର ପ୍ରକାରର ବ୍ୟଞ୍ଜନ ପ୍ରସ୍ତୁତ କରାଯାଇ ପାଟରା ମାନଙ୍କ ଦ୍ୱାରା ପ୍ରଭୁଙ୍କ ନିକଟରେ ଭୋଗ ଲାଗି କରାଯାଇଥାଏ।
ଜାମ୍ମୁ ଓ କାଶ୍ମୀର ବାଦଲଫଟା ବର୍ଷା: ବର୍ତ୍ତମାନ ସୁଦ୍ଧା ୨୨୦ରୁ ଅଧିକ ନିଖୋଜ, ମୃତକଙ୍କ ସଂଖ୍ୟା ୬୫ରୁ ଅଧିକ
ଧ୍ବଂସସ୍ତୂପ ତଳୁ ଚାଲିଛି ଜୀବନ ଖୋଜା। ଜାମ୍ମୁ ଓ କାଶ୍ମୀରର କିସ୍ତୱାରରେ ଘଟିଥିବା ବାଦଲଫଟା ବର୍ଷାରେ ବର୍ତ୍ତମାନ ସୁଦ୍ଧା ୨୨୦ରୁ ଅଧିକ ନିଖୋଜ ଥିବାବେଳେ ମୃତକଙ୍କ ସଂଖ୍ୟା ୬୫ରୁ ଅଧିକ ହୋଇଛି। ମୃତକଙ୍କ ସଂଖ୍ୟା ଅଧିକ ହେବା ଆଶଙ୍କା ରହିଛି। ୧୭୦ ଜଣ ଆହତ ହୋଇଛନ୍ତି। ମୃତକଙ୍କ ମଧ୍ୟରେ ଅଛନ୍ତି ସିଆଇଏସଏଫର ୨ ଯବାନ। ବିଭିନ୍ନ ବିପଦସଙ୍କୁଳ ସ୍ଥାନରୁ ଶତାଧିକ ବିପନ୍ନଙ୍କୁ ଉଦ୍ଧାର କରାଯାଇଛି। ଚୋସିଟି ଗ୍ରାମ ସମେତ କିଛି ଅଞ୍ଚଳ ସମ୍ପୂର୍ଣ୍ଣ ମାଟିରେ ମିଶିଯାଇଛି। ଆହତମାନଙ୍କୁ ବିଭିନ୍ନ ହସ୍ପିଟାଲରେ ଭର୍ତ୍ତି କରାଯାଇଛି। ମଚେଲ ମାତା ଯାତ୍ରା ପଥରେ ଏହି ଆକସ୍ମିକ ବିପର୍ଯ୍ୟୟ ଆସିବାରୁ ଅନେକ ଭକ୍ତଙ୍କ ଜୀବନ ଯାଇଛି। ସ୍ଥାନୀୟ ଅଞ୍ଚଳରେ ମେଗା ରେସ୍କ୍ୟୁ ଅପରେସନ ଜାରି ରହିଛି। ଜାମ୍ମୁ ଓ କାଶ୍ମୀର ବିଧାନସଭାର ବିରୋଧୀ ଦଳ ନେତା ସୁନିଲ ଶର୍ମା କହିଛନ୍ତି ବାଦଲଫଟା ବର୍ଷା ଯେଉଁ ସ୍ଥାନରେ ଘଟିଛି ସେହି ସ୍ଥାନରେ ୧୨୦୦ରୁ ଅଧିକ ଲୋକ ଥିଲେ। କେନ୍ଦ୍ରମନ୍ତ୍ରୀ ଅମିତ ଶାହଙ୍କ ସହ ଉଦ୍ଧାର କାର୍ଯ୍ୟ ପ୍ରସଙ୍ଗରେ ଆଲୋଚନା କରିଛନ୍ତି ଜାମ୍ମୁ ଓ କାଶ୍ମୀର ମୁଖ୍ୟମନ୍ତ୍ରୀ ଓମର ଅବଦୁଲ୍ଲା।
ଏହି ଘଟଣାରେ ଶୋକବ୍ୟକ୍ତ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। କିସ୍ତୱାରରେ ଯୁଦ୍ଧକାଳୀନ ଭିତ୍ତିରେ ଉଦ୍ଧାର କାର୍ଯ୍ୟ ଜାରି ରହିଛି। ଉଦ୍ଧାର କାର୍ଯ୍ୟରେ ପ୍ରଶାସନ, ପୋଲିସ, ଆର୍ମି, ଏନଡିଆରଏଫ ଓ ଏସଡିଆରଏଫ ନିୟୋଜିତ ଅଛନ୍ତି। ସେହିପରି ହ୍ବାଇଟ ନାଇଟ କର୍ପସର ୩୦୦ ଯବାନ ବି ଉଦ୍ଧାର କାର୍ଯ୍ୟରେ ନିୟୋଜିତ ଅଛନ୍ତି। ସେଠାରେ ମେଡିକାଲ କ୍ୟାମ୍ପ ବି କରାଯାଇ ଲୋକଙ୍କ ଚିକିତ୍ସା କରାଯାଉଛି। କିସ୍ତାୱାଡ଼ ସହରଠାରୁ ୯୦ କିଲୋମିଟର ଦୂର ଚୋସିତିରେ ଏହି ଅଘଟଣ ଘଟିଥିଲା। ଅନେକ ଦୋକାନ ଓ ସିକ୍ଯୁରିଟି ପୋଷ୍ଟ ବି ମାଟିରେ ମିଶିଯାଇଛି। ଜିଲ୍ଲା ପ୍ରଶାସନ ପକ୍ଷରୁ ଆର୍ଥମୁଭର ମୁତୟନ କରାଯାଇ ଉଦ୍ଧାର କାର୍ଯ୍ୟ କରାଯାଉଛି। ଉଦ୍ଧାର ହୋଇଥିବା ଶବଗୁଡିକର ଚିହ୍ନଟ ପ୍ରକ୍ରିୟା ବି ଜାରି ରହିଛି। ବାଦଲ ଫଟା ବର୍ଷାରେ ଅନେକ ଘର, ସରକାରୀ କାର୍ଯ୍ଯାଳୟ, ୩ଟି ମନ୍ଦିର, ୪ଟି ୱାଟର ମିଲ, ୩୦ ମିଟର ବ୍ରିଜ ମାଟିରେ ମିଶିଛି।
ଟ୍ରକକୁ ପଛପଟୁ ଧକ୍କା ଦେଲା ବସ୍ । ୧୦ ମୃତ, ୩୫ ଆହତ
ନନ୍ଦିଘୋଷ ବ୍ୟୁରୋ ; ପଶ୍ଚିମବଙ୍ଗର ପୂର୍ବ ବର୍ଦ୍ଧମାନ ଜିଲ୍ଲାରେ ମର୍ମନ୍ତୁଦ ଦୁର୍ଘଟଣା । ଟ୍ରକ ସହିତ ବସ ଧକ୍କା ହେବା ଫଳରେ ୧୦ ଜଣଙ୍କର ଘଟଣାସ୍ଥଳରେ ମୃତ୍ୟୁ ଘଟିଛି । ଏହି ଦୁର୍ଘଟଣାରେ ୩୫ ଜଣ ଆହତ ହୋଇଛନ୍ତି। ସମସ୍ତ ଆହତଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି। ପୂର୍ବ ବର୍ଦ୍ଧମାନର ଜାତୀୟ ରାଜପଥର ନାଲା ଫେରି ଘାଟରେ ଏହି ଦୁର୍ଘଟଣା ଘଟିଛି। ସକାଳ ପ୍ରାୟ ସାଢ଼େ ୭ଟା ସମୟରେ ପୂର୍ବ ବର୍ଦ୍ଧମାନରୁ ଦୁର୍ଗାପୁର ଯାଉଥିବା ଯାତ୍ରୀବାହୀ ବସ୍ଟି ଠିଆ ହୋଇଥିବା ଟ୍ରକ୍ର ପଛକୁ ଧକ୍କା ଦେଇଥିଲା।
ସମସ୍ତ ବସ୍ ଯାତ୍ରୀ ବିହାରର ମୋତିୟାର ଥାନା ଅଞ୍ଚଳର ଚିରୈୟା ସାରସୱା ଘାଟ ଅଞ୍ଚଳର ବାସିନ୍ଦା। ଯାତ୍ରୀମାନେ ଗଙ୍ଗାରେ ସ୍ନାନ କରିବାକୁ ପଶ୍ଚିମ ପ୍ରାନ୍ତକୁ ଆସିଥିଲେ। ସ୍ନାନ ପରେ ସେମାନେ ବସ୍ ଯୋଗେ ଘରକୁ ଫେରୁଥିଲେ।
ଦୁର୍ଘଟଣା ପରେ ତୁରନ୍ତ ପୋଲିସ ଘଟଣାସ୍ଥଳରେ ପହଞ୍ଚି ଆହତ ମେଡିକାଲରେ ଭର୍ତ୍ତି କରିଛି । ଡ୍ରାଇଭରର ଆଥି ଲାଖିଯିବା କାରଣରୁ ଦୁର୍ଘଟଣା ହୋଇଥାଇପାରେ ବୋଲି ପୋଲିସ ସନ୍ଦେହ କରୁଛି । ପୋଲିସ ଘଟଣାର ତଦନ୍ତ ଆରମ୍ଭ କରିଛି।
ଜରାଶ୍ରମରେ ଅନ୍ତେବାସୀଙ୍କୁ ନିର୍ଯାତନା ଅଭିଯୋଗ
ଆରଡି : ଜରାଶ୍ରମରେ ଅନ୍ତେବାସୀଙ୍କୁ ନିର୍ଯାତନା ଅଭିଯୋଗ। ନିର୍ଯାତନାର ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି। ଭାଇରାଲ୍ ହେଉଥିବା ଏ ଭିଡିଓଟି ଭଦ୍ରକ ଜିଲ୍ଲା ଧାମନଗର ସହରରେ ଥିବା ଜରା ନିବାସର। ଏକ ବେସରକାରୀ ଆଶୀର୍ବାଦ ସଂଗଠନର ପରିଚାଳନାରେ ଥିବା ଏହି ଜରା ନିବାସରେ ଅନ୍ତେବାସୀଙ୍କୁ ଭଲ ଖାଇବାକୁ ଦିଆଯାଉନଥିବା ବେଳେ ମାନସିକ ଓ ଶାରୀରିକ ନିର୍ଯତନା ଦିଆଯାଉଥିବା ଅଭିଯୋଗ। ଧନୁ ମଳିକ ନାମକ ବ୍ୟକ୍ତି ଅଭିଯୋଗ କରିଛନ୍ତି। ଏପରିକି ପରିସର ଵାହାରେ ଅଭିଯୋଗ କଲେ କିମ୍ବା ଖାଦ୍ୟ ସର୍ମ୍ପକରେ କିଛି କହିଲେ ଜରା ନିଵାସରୁ ତଡ଼ି ଦିଆଯିବ ବୋଲି ଧମକ ଦିଆଯାଉଛି। ପୂର୍ବରୁ ଏହି ସଂସ୍ଥା ନାମରେ ଅନେକ ଅଭିଯୋଗ ଆସିଛି। ଏଥିଲାଗି ଜିଲ୍ଲାପାଳ ତଦନ୍ତ କରିବା ଆବଶ୍ଯକ ବୋଲି ଦାବି ଉଠୁଛି। ଏନେଇ ଆଜି କିଛି ଗଣମାଧ୍ୟମ ପ୍ରତିନିଧି ଖବର ସଂଗ୍ରହ ପାଇଁ ବୃଦ୍ଧାଶ୍ରମ ଭିତରକୁ ଯାଉଥିବା ସମୟରେ ସାମ୍ବାଦିକଙ୍କୁ ବାରଣ କରିଥିଲେ ସୁରକ୍ଷାକର୍ମୀ। ନିଜର ଦୋଷ ଦୁର୍ବଳତା ଲୁଚାଇବାକୁ ଦାୟିତ୍ବରେ ଥିବା କର୍ତ୍ତୃପକ୍ଷ ଭରପୂର ପ୍ରୟାସ କରିଥିଲେ। ଧାମନଗର ବୃଦ୍ଧାଶ୍ରମରେ ଅନ୍ତେବାସୀଙ୍କୁ ନିର୍ଯାତନା ଓ ଖାଇବାକୁ ଦେଉନଥିବା ଅଭିଯୋଗ ସଂପର୍କିତ ଭିଡିଓ ଭାଇରାଲ ବିଭିନ୍ନ ସୋସିଆଲ ମିଡ଼ିଆ ହେଉଥିବା ଦେଖିବାକୁ ମିଳିଛି।
ରୋଷେଇ ଘରେ ଫାଟିଲା ଗ୍ୟାସ ଟାଙ୍କୀ, ତିନି ଗୁରୁତର
ନିମାପଡା : ପୁରୀ ଜିଲ୍ଲା ଗୋପ ଥାନା ବଣିଆସାହିରେ ଅଘଟଣ । ରୋଷେଇ ଘରେ ଥିବା ଗ୍ୟାସ ଟାଙ୍କୀ ଫାଟିବାରୁ ନିଆଁ ଲାଗି ତିନିଜଣ ଗୁରୁତର ହୋଇଛନ୍ତି । ଗୋପ ପୟରା ପଞ୍ଚାୟତ ଯମରା ଗାଁର ନାରାୟଣ ମଲ୍ଲିକ ଓ ତାଙ୍କ ପତ୍ନୀ ବଣିଆସାହିରେ ଭଡାଘରେ ରହି ଆସୁଥିଲେ। ରାତିରେ ସ୍ତ୍ରୀ ରୋଷେଇ କରୁଥିବା ବେଳେ ଗ୍ୟାସ ଟାଙ୍କୀରେ କୌଣସି କାରଣ ବଶତଃ ନିଆଁ ଲାଗିଯିବାରୁ ଟାଙ୍କୀଟି ଫାଟି ଯାଇଥିଲା । ଫଳରେ ନାରାୟଣ ଓ ତାଙ୍କ ପତ୍ନୀ ଉଭୟଙ୍କ ଶରୀରରେ ନିଆଁ ଲାଗିଯାଇଥିଲା । ଘଟଣାସ୍ଥଳରେ ନାରାୟଣଙ୍କ ସଢୁ ଉଭୟଙ୍କୁ ଉଦ୍ଧାର କରିବାକୁ ଯାଇ ନିଜେ ନିଆଁର ଶିକାର ହୋଇଥିଲେ । ଘଟଣା ଘଟିବା ପରେ ତୁରନ୍ତ ଗ୍ରାମବାସୀଙ୍କ ଦ୍ୱାରା ତିନିଜଣଙ୍କୁ ଗୁରୁତର ଆହତ ଅବସ୍ଥାରେ ଗୋପ ମେଡିକାଲରେ ଭର୍ତି କରାଯାଇଥିଲା । ପ୍ରାଥମିକ ଚିକିତ୍ସା ପରେ ଅବସ୍ଥା ଅଧିକ ଗୁରୁତର ହେବାରୁ ଡାକ୍ତର ତିନିଜଣଙ୍କୁ ଭୁବନେଶ୍ୱର ଏମ୍ସକୁ ସ୍ଥାନାନ୍ତରିତ କରିଥିବା ସୂଚନା ମିଳିଛି ।
ବିଜେଡି ରାଜ୍ୟ କାର୍ଯ୍ୟାଳୟରେ ୭୯ ତମ ସ୍ବାଧୀନତା ଦିବସ ପାଳିତ
ଭୁବନେଶ୍ବର : ଦେଶ ପାଳୁଛି ୭୯ ତମ ସ୍ବାଧୀନତା ଦିବସ । ପଲ୍ଲୀରୁ ଦିଲ୍ଲୀ ସବୁଠି ଦେଶାତ୍ମବୋଧର ମାହୋଲ ଥିବା ବେଳେ, ବିଜୁ ଜନତା ଦଳ ରାଜ୍ୟ କାର୍ଯ୍ୟାଳୟରେ ଉଡିଛି ତ୍ରିରଙ୍ଗା । ବିଜେଡି ଉପସଭାପତି ତଥା ବରିଷ୍ଠ ବିଜେଡି ନେତା ଦେବୀ ମିଶ୍ର ଆଜି ପତାକା ଉତ୍ତୋଳନ କରିଛନ୍ତି I ଭୁବନେଶ୍ବର ଜିଲ୍ଲା ସଭାପତି ଅଶୋକ ପଣ୍ଡା, ଦଳର ବରିଷ୍ଠ ନେତା ପ୍ରତାପ ଜେନା, ବିଧାୟକ ସୁଶାନ୍ତ ରାଉତ ,ବିଧାୟକ ଅନନ୍ତ ନାରାୟଣ ଜେନା, ମେୟର ସୁଲୋଚନା ଦାସଙ୍କ ସମେତ ଶତାଧିକା ବିଜେଡି ନେତା ଓ କର୍ମୀ ଉପସ୍ଥିତ ରହିଥିଲେ । ୨୪ ବର୍ଷ ଭିତରେ ନବୀନ ପଟ୍ଟନାୟକ ଓଡ଼ିଶା ପାଇଁ ବୈପ୍ଳବିକ ପରିବର୍ତ୍ତନ ଆଣିଥିଲେ ବୋଲି ନେତାମାନେ ମତ ରଖିଥିଲେ ।
‘ସିନ୍ଧୂ ନଦୀ ଚୁକ୍ତି ଏକତରଫା ଥିଲା, ରକ୍ତ ଓ ପାଣି ଏକାସଙ୍ଗେ ବହିପାରିବନି’
ନୂଆଦିଲ୍ଲୀ : ଆଜି ଦେଶ ପାଳୁଛି ୭୯ତମ ସ୍ଵାଧୀନତା ଦିବସ। ସାରା ଦେଶରେ ସ୍ଵାଧୀନତା ଦିବସର ଧୁମ। ଉତ୍ସବ ମୁଖର ପୁର ପଲ୍ଲୀ। ଲାଲକିଲ୍ଲାରେ ପତାକା ଉତ୍ତୋଳନ କଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଦ୍ଵାଦଶ ଥର ଲାଗି ଲାଲକିଲ୍ଲାରେ ପ୍ରଧାନମନ୍ତ୍ରୀ ମୋଦି ପତାକା ଉତ୍ତୋଳନ କରିଛନ୍ତି।ଏହି ଅବସରରେ ଦେଶବାସୀଙ୍କୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଛନ୍ତି, ସ୍ଵାଧୀନତାର ଏହି ପର୍ବ ଗୌରବର ପର୍ବ। ସ୍ଵାଧୀନତାର ଏହି ପର୍ବ ସଂକଳ୍ପର ପର୍ବ। ଆଜି ସାରା ଦେଶରେ ମାତୃଭୂମିର ଜୟଗାନ ହେଉଛି। ସ୍ଵାଧୀନତାର ମହାପର୍ବ ୧୪୦ କୋଟି ଭାରତୀୟଙ୍କ ସଂକଳ୍ପର ପର୍ବ। ଆଜି ହୃଦୟ ଖୁସିରେ ଭରି ଯାଇଛି।
୧୪୦ କୋଟି ଭାରତୀୟ ତ୍ରିରଙ୍ଗା ରଙ୍ଗରେ ରଙ୍ଗେଇ ହୋଇଛନ୍ତି ବୋଲି କହିଥିଲେ ମୋଦି। ଏକ ଦେଶ ଏକ ସମ୍ବିଧାନର ସଂକଳ୍ପ ପୂରଣ ହୋଇଛି।
ଭାରତର ସମ୍ବିଧାନ ଆଲୋକସ୍ତମ୍ଭ ଭଳି ମାର୍ଗ ଦର୍ଶନ କରୁଛି। ଦେଶବାସୀଙ୍କୁ ସମ୍ବୋଧିତ କରିବା ଅବସରରେ ଅପରେସନ ସିନ୍ଦୂର ପ୍ରସଙ୍ଗ ଉଠାଇଥିଲେ ପ୍ରଧା ମନ୍ତ୍ରୀ। କହିଥିଲେ, ଅପରେସନ ସିନ୍ଦୂରର ବୀର ଯବାନଙ୍କୁ ସାଲ୍ୟୁଟ କରିବାର ଆଜି ସୁଯୋଗ ମିଳିଛି। ପହଲଗାଓଁରେ ଲୋକଙ୍କୁ ଧର୍ମ ପଚାରି ମରାଗଲା।
ପତି, ପତ୍ନୀ ଓ ପିଲାଙ୍କ ସାମନାରେ ବାପା ମାଆଙ୍କୁ ମରାଗଲା। ଯାହା ଦଶନ୍ଧି ଧରି ହୋଇନଥିଲା ତାହା କରି ଦେଖାଇଲୁ। ଅପରେସନ ସିିନ୍ଦୂର ସଫଳ ହେଲା। ବୀର ଯବାନ ଶତ୍ରୁଙ୍କୁ କଳ୍ପନା ଠାରୁ ଢେର ଅଧିକ ସଜା ଦେଲେ। ଅପରେସନ ସିଦୂରରେ ସେନାକୁ ସମ୍ପୂର୍ଣ୍ଣ ସ୍ଵାଧୀନତା ଦିଆଯାଇଥିଲା। ପଡୋଶୀର ପରମାଣୁ ବ୍ଲାକମେଲିଂ ସହ୍ୟ କରିବନି ଦେଶ।ଦେଶ ଅନେକ ଦଶନ୍ଧି ଧରି ଆତଙ୍କବାଦ ସହ୍ୟ କରି ଆସୁଛି। ପରମାଣୁ ଯୁଦ୍ଧର ଧମକ ଏବେ ଦେଶ ସହ୍ୟ କରିବନି।
ଶତ୍ରୁକୁ ଆମେ ମୁହଁତୋଡ଼ ଜବାବ ଦେବୁ। ଆତଙ୍କବାଦ ଓ ସେମାନଙ୍କୁ ପାଳୁଥିବା ଦେଶ ମାନବତାର ଶତ୍ରୁ। ସିନ୍ଧୁ ନଦୀ ଚୁକ୍ତିରୁ ଦେଶକୁ କ୍ଷତି ପହଞ୍ଚିଥିଲା। ରକ୍ତ ଓ ପାଣି ଏକାସଙ୍ଗେ ବହିପାରିବେନି। ସିନ୍ଧୂ ନଦୀର ପାଣି ଆମ ଦେଶର ଚାଷୀ ପାଇବାକୁ ହକଦାର । ପ୍ରତିରକ୍ଷା କ୍ଷେତ୍ରରେ ଆମେ ଆତ୍ମନିର୍ଭରଶୀଳ ହୋଇଛେ।
ସାମର୍ଥ୍ୟକୁ ବଜାୟ ରଖିବାକୁ ଆତ୍ମନିର୍ଭରତା ଜରୁରୀ। ଅପରେସନ ସିନ୍ଦୂରରେ ଦେଶରେ ନିର୍ମିତ ଅସ୍ତ୍ରଶସ୍ତ୍ର ଶକ୍ତି ଦେଖାଇଲେ। ଦେଶରେ ମିଶନ ମୋଡରେ ଚାଲିଛି ସେମିକଣ୍ଡକ୍ଚର କାମ। ଆତ୍ମନିର୍ଭରତା ବିକଶିତ ଭାରତର ଆଧାର। ଆତ୍ମନିର୍ଭରତାରୁ ଅପରେସନ ସିନ୍ଦୂର ସଫଳ ହୋଇଛି। ଏବେ ମେଡ ଇନ୍ ଇଣ୍ଡିଆ ସେମିକଣ୍ଡକ୍ଟର ବଜାରକୁ ଆସିବ। ସବୁ କ୍ଷେତ୍ରରେ ଆତ୍ମନିର୍ଭର ହେବାକୁ ପ୍ରୟାସ ଜାରି ରହିଛି। ଆତ୍ମନିର୍ଭର ହେବାକୁ ଆମକୁ ଆହୁରି ଅଧିକ ଭଲ କରିବାକୁ ପଡ଼ିବ। ମହାକାଶରେ ନିଜର ସ୍ପେସ୍ ଷ୍ଟେସନ ପ୍ରସ୍ତୁତ କରିବ ଭାରତ।ଦେଶର ଭାଗ୍ୟ ବଦଳାଇବାକୁ ଆପଣଙ୍କର ସହଯୋଗ ଦରକାର। ଦେଶକୁ ଶକ୍ତି କ୍ଷେତ୍ରରେ ଆତ୍ମନିର୍ଭର କରିବା ଜରୁରୀ। ୧୪୦ କୋଟି ଭାରତୀୟଙ୍କ ଗୋଟିଏ ମନ୍ତ୍ର ହେଉ ସମୃଦ୍ଧ ଭାରତ। ଲାଲକିଲ୍ଲାରୁ ଯୁବବର୍ଗଙ୍କ ଲାଗି ବଡ଼ ଘୋଷଣା କରିଛନ୍ତି ପ୍ରଧାନମନ୍ତ୍ରୀ। ଯୁବବର୍ଗଙ୍କ ଲାଗି ୧ ଲକ୍ଷ କୋଟି ଟଙ୍କାର ନୂଆ ଯୋଜନା ଘୋଷଣା କରିଛନ୍ତି ପ୍ରଧାନମନ୍ତ୍ରୀ। ବିକଶିତ ଭାରତ ରୋଜଗାର ଯୋଜନା ଆଜିଠାରୁ ଲାଗୁ ହୋଇଛି। ଦୀପାବଳୀରେ ବହୁତ ବଡ଼ ଉପହାର ମିଳିବ ବୋଲି କହିଲେ ପ୍ରଧାନମନ୍ତ୍ରୀ। GSTର ସମୀକ୍ଷା କରିବାକୁ ଦାବି ହୋଇ ଆସୁଛି। ସାଧାରଣ ଲୋକଙ୍କ ଲାଗି GST ଦର କମ କରାଯିବ। ସାଧାରଣ ଲୋକଙ୍କ ବ୍ୟବହୃତ ସାମଗ୍ରୀ ଶସ୍ତା ହେବ । ନାଗିରକଙ୍କ ଉପରେ ଟ୍ୟାକ୍ସର ବୋଝ କମ ହେବ ବୋଲି କହିଛନ୍ତି ପ୍ରଧାନମନ୍ତ୍ରୀ। ସରକାର ଚାଷୀ, ମତ୍ସ୍ୟଜୀବୀ ଓ ପଶୁପାଳଙ୍କ ବିକାଶକୁ ପ୍ରାଥମିକତା ଦେଉଛନ୍ତି। ପଛୁଆ ଜିଲ୍ଲାକୁ ଅଧିକ ପ୍ରାଥମିକତା ଦିଆଯିବ। ପିଏମ ଆବାସ ଯୋଜନାରେ ୪ କୋଟି ଲୋକଙ୍କୁ ମିଳିଲା ଘର। ଆମେରିକାର ଟାରିଫ ପ୍ରସଙ୍ଗ ନେଇ ଲାଲକିଲ୍ଲାରୁ ରାଷ୍ଟ୍ରପତି ଟ୍ରମ୍ପଙ୍କୁ ମୋଦି ଜବାବ ଜବାବ ଦେଇଛନ୍ତି। ଚାଷୀଙ୍କ କ୍ଷତିକୁ ବରଦାସ୍ତ କରିବେନି ସରକାର। ଚାଷୀ ବିରୋଧୀ ନୀତିକୁ ସରକାର ଗ୍ରହଣ କରିବେନି। ଦେଶବାସୀଙ୍କ ସ୍ଵାସ୍ଥ୍ୟ ନେଇ ମଧ୍ୟ ଗୁରୁତ୍ଵାରୋପ କରିଥିଲେ ପ୍ରଧାନମନ୍ତ୍ରୀ। ମେଦବହୁଳତା ଲୋକଙ୍କ ମଧ୍ୟରେ ବଡ଼ ସ୍ଵାସ୍ଥ୍ୟ ସଂକଟ ନେଇ ଚିନ୍ତା ପ୍ରକଟ କରିଥିଲେ ପ୍ରଧାନମନ୍ତ୍ରୀ। ଖାଦ୍ୟରେ ୧୦ ପ୍ରତିଶତ ତେଲ କମ କରିବାକୁ କହିଛନ୍ତି। ପ୍ରତି ୩ ଜଣଙ୍କ ମଧ୍ୟରେ ଜଣେ ମେଦବହୁଳତାର ଶିକାର। ସେଥିଲାଗି ସୁସ୍ଥ ଭାରତ ଗଠନ ଲାଗି ସୁସ୍ଥ ଜୀବନ ଉପରେ ଗୁରୁତ୍ଵ ଦେଇଛନ୍ତି ପ୍ରଧାନମନ୍ତ୍ରୀ।
ବାଦଲ ଫଟା ବର୍ଷାରେ ୫୨ ଜଣଙ୍କର ମୃତ୍ୟୁ, ଚାଲିଛି ଉଦ୍ଧାର କାର୍ଯ୍ୟ
ନନ୍ଦିଘୋଷ ବ୍ୟୁରୋ : ଆକାଶରୁ ଝରିଲା ମୃତ୍ୟୁର ଝରଣା । ବାଦଲ ଫଟା ବର୍ଷାରେ ଛାରଖାର ହୋଇଗଲା ଦେବୋଭୂମି ଜମ୍ମୁ ଓ କାଶ୍ମୀରର କିସ୍ତୱାରର ଚାଶୋଟି ଗାଁ। ପାହାଡ଼ରୁ ପାଣି ଏବଂ ଭଗ୍ନାବଶେଷ ଯୋଗୁଁ ଅନେକ ଲୋକ ପ୍ରଭାବିତ ହୋଇଥିଲେ। ଏହି ଦୁର୍ଘଟଣାରେ ଏପର୍ଯ୍ୟନ୍ତ ୫୨ ଜଣଙ୍କର ମୃତ୍ୟୁ ହୋଇଛି। ଏପର୍ଯ୍ୟନ୍ତ ୧୬୭ ଜଣଙ୍କୁ ଉଦ୍ଧାର କରାଯାଇଛି। ୧୦୦ ରୁ ଅଧିକ ଲୋକ ନିଖୋଜ ଅଛନ୍ତି। କିସ୍ତୱାରର ଚାଶୋଟି ଗାଁରେ ମାଚୈଲ ମାତା ଯାତ୍ରା ପାଇଁ ହଜାର ହଜାର ଭକ୍ତ ପହଞ୍ଚିବା ସମୟରେ ଏହି ଦୁର୍ଘଟଣା ଘଟିଥିଲା। ଏହା ଯାତ୍ରାର ପ୍ରଥମ ରହଣି । ଯାତ୍ରା ଯେଉଁଠାରୁ ଆରମ୍ଭ ହେବାକୁ ଥିଲା ସେହି ସ୍ଥାନରେ ମେଘ ଫାଟି ଯାଇଥିଲା। ଏଠାରେ ଭକ୍ତଙ୍କ ବସ୍, ତମ୍ବୁ, ଲଙ୍ଗର ଏବଂ ଅନେକ ଦୋକାନ ଥିଲା। ସବୁକିଛି ବନ୍ୟା ପାଣିରେ ଭାସି ଯାଇଥିଲା। ଚାଶୋଟି କିସ୍ତୱାର ସହରରୁ ପ୍ରାୟ ୯୦ କିଲୋମିଟର ଦୂରରେ ଅବସ୍ଥିତ ଏବଂ ମାଚାଇଲ ମାତା ମନ୍ଦିରକୁ ଯିବା ରାସ୍ତାରେ ଏହା ପ୍ରଥମ ଗାଁ । ସେନା, ପୋଲିସ, ଏନଡିଆରଏଫ ଓ ଏସଡିଆରଏଫ ଟିମ କିସ୍ତୱାଡରେ ରେସକ୍ଯୁ ଅପରେସନ ଚଲାଇଛନ୍ତି। ରିଲିଫ୍ ଏବଂ ଉଦ୍ଧାର କାର୍ଯ୍ୟ ଜାରି ରହିଛି। ବହୁ କ୍ଷୟକ୍ଷତି ଘଟିବା ସମ୍ଭାବନା ରହିଛି। କ୍ଷୟକ୍ଷତିର ଆକଳନ କରାଯାଉଛି । ଆବଶ୍ୟକ ଉଦ୍ଧାର ଏବଂ ଚିକିତ୍ସା ବ୍ୟବସ୍ଥା କରାଯାଉଛି। କୁପୱାରା, ବାରାମୁଲ୍ଲା, ବାନ୍ଦିପୋରା, ଶ୍ରୀନଗର, ଗନ୍ଦେରବଲ, ବଡଗାମ, ପୁଞ୍ଚ, ରାଜୌରି, ରଇସି, ଉଧମପୁର, ଡୋଡା,କାଜିଗୁଣ୍ଡ, ବନିହଲ ଓ ରାମବାନ୍ ଅଂଚଳରେ କିଛି ସ୍ଥାନରେ ପ୍ରବଳ ବର୍ଷା ନେଇ ଆଲର୍ଟ ଜାରି କରିଛି ପାଣିପାଗ ବିଭାଗ।
ଲଘୁଚାପ ପ୍ରଭାବରେ ଆହୁରି ୪ ଦିନ ଯାଏ ପ୍ରବଳ ବର୍ଷା
ଭୁବନେଶ୍ବର : କେନ୍ଦ୍ରୀୟ ବଙ୍ଗୋପସାଗରରେ ସକ୍ରିୟ ଲଘୁଚାପ ପ୍ରଭାବରେ ଆହୁରି ୪ ଦିନ ଯାଏ ପ୍ରବଳ ବର୍ଷା । ବିଶେଷ କରି ଦକ୍ଷିଣ ଓଡ଼ିଶାରେ ବର୍ଷା ସମ୍ଭାବନା ରହିଛି । ଆସନ୍ତା ୨୪ ଘଣ୍ଟାରେ ୨୩ ଜିଲ୍ଲାରେ ହାଲୁକରୁ ମଧ୍ୟମ ଧରଣର ବର୍ଷା ହେବ । କୋରାପୁଟ, ନବରଙ୍ଗପୁର, ରାୟଗଡା ଓ ଗଜପତି ଜିଲ୍ଲାରେ ପ୍ରବଳ ବର୍ଷା ପାଇଁ ୟେଲୋ ୱାର୍ଣ୍ଣିଂ ଜାରିକରି କରିଛି ପାଣିପାଗ କେନ୍ଦ୍ର । ୧୯ ତାରିଖ ଯାଏ ପ୍ରବଳ ବର୍ଷର ସମ୍ଭାବନା ରହିଛି । ସେପଟେ ମେଘୁଆ ପାଗ ସହ ପବନର ବେଗକୁ ନେଇ ସମୁଦ୍ର ଅଶାନ୍ତ ରହିବ । ତେଣୁ ୧୫ ତାରିଖ ଯାଏ ସମୁଦ୍ର ମଧ୍ୟକୁ ନଯିବାକୁ ମତ୍ସ୍ୟଜୀବୀଙ୍କୁ ବାରଣ କରାଯାଇଛି ।
ଆଜି ଦେଶ ପାଳୁଛି ୭୯ତମ ସ୍ବାଧୀନତା ଦିବସ
ନୁଆଦିଲ୍ଲୀ : ଦେଶ ପାଳୁଛି ୭୯ତମ ସ୍ବାଧୀନତା ଦିବସ । ଏହି ଅବସରରେ ଦିଲ୍ଲୀ ଲାଲକିଲ୍ଲାରେ ପତାକା ଉତ୍ତୋଳନ କରି ଦେଶବାସୀଙ୍କୁ ସମ୍ବୋଧନ କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ସ୍ୱାଧୀନତା ଦିବସ ପାଳନ ଦେଖିବା ପାଇଁ ପ୍ରାୟ 20 ରୁ 25 ହଜାର ଅତିଥି ଲାଲକିଲ୍ଲାରେ ପହଞ୍ଚନ୍ତି, ଯେଉଁଥିରେ ଭିଆଇପି ଅତିଥି ଏବଂ ସାଧାରଣ ଜନତା ମଧ୍ୟ ସାମିଲ ଅଛନ୍ତି । ତେବେ ଲାଲକିଲ୍ଲା ସମେତ ଅନେକ ସ୍ଥାନରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି । ଦିଲ୍ଲୀର ପ୍ରତ୍ୟେକ କୋଣରେ ସୁରକ୍ଷା ବାହିନୀ ମୁତୟନ କରାଯାଇଛି ଏବଂ ପୋଲିସ ଦ୍ୱାରା ଯାଞ୍ଚ ମଧ୍ୟ କରାଯାଉଛି। ଲାଲକିଲ୍ଲାରେ ପ୍ରବେଶ ପଥ ପୋଲିସ ଦ୍ୱାରା ଯାଞ୍ଚ କରାଯାଉଛି। ଦିଲ୍ଲୀ ପୋଲିସ ଏବଂ ଅନ୍ୟାନ୍ୟ ଅର୍ଦ୍ଧସାମରିକ ବାହିନୀ ସମେତ ୨୦ ହଜାରରୁ ଅଧିକ ଯବାନଙ୍କୁ ନିୟୋଜିତ କରାଯାଇଛି।ଲାଲକିଲ୍ଲା ଏବଂ ଏହାର ଆଖପାଖରେ ଥିବା ସମସ୍ତ ଭିଭିଆଇପି ରୁଟରେ ସିସିଟିଭି କ୍ୟାମେରା ଲଗାଯାଇଛି। ପ୍ରଥମ ଥର ପାଇଁ, ପାର୍କିଂରେ ଅଣ୍ଡର ଯାନ ସ୍କାନିଂ ସିଷ୍ଟମ ବ୍ୟବହାର କରାଯାଇଛି। ଦିଲ୍ଲୀ ପୋଲିସ ପକ୍ଷରୁ ଡ୍ରୋନ୍ ପ୍ରତିରୋଧୀ ବ୍ୟବସ୍ଥା ମଧ୍ୟ କରାଯାଇଛି ।
ଅନ୍ୟପଟେ ଭୁବନେଶ୍ବର ଗାନ୍ଧିମାର୍ଗରେ ଅନୁଷ୍ଠିତ ହେବ ପରେଡ ଉତ୍ସବ । ଅଭିବାଦନ ଗ୍ରହଣ କରିବେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ପରେଡ ୪୯ଟି କଣ୍ଟିଜେଣ୍ଟ ଭାଗ ନେଇଛନ୍ତି । ଏହାସହ ବିଭିନ୍ନ ସ୍କୁଲର ଛାତ୍ରଛାତ୍ରୀମାନେ ମଧ୍ୟ ଅଂଶ ଗ୍ରହଣ କରିଛନ୍ତି । ପଡୋଶୀ ରାଜ୍ୟ ସହିତ ଉତ୍ତମ ସମନ୍ୱୟ ରକ୍ଷା ଲାଗି ଆନ୍ଧ୍ରପ୍ରଦେଶ ପୋଲିସର ଗୋଟିଏ ପ୍ଲାଟୁନ ପରେଡରେ ସାମିଲ ହେବେ । ଚଳିତ ବର୍ଷ ୨୦୨୨ ବ୍ୟାଚର IPS ଅନନ୍ୟା ଅୱସ୍ତି ପରେଡ କାମାଣ୍ଡାଣ୍ଟ ଭାବେ ଦାୟିତ୍ୱ ତୁଲାଇବେ । ସୁରକ୍ଷା ଦୃଷ୍ଟିକୋଣରୁ ସ୍ବତନ୍ତ୍ର ରଣନୀତି କରି ବ୍ୟାପକ ପୋଲିସ ଫୋର୍ସ ମୁତୟନ ହୋଇଛନ୍ତି ।