ଅନୁଗୁଳ: ଅନୁଗୁଳ ଜିଲ୍ଲା ଛେଣ୍ଡିପଦା ଥାନା କେରଜଙ୍ଗରେ ବେଆଇନ ଅସ୍ତ୍ରଶସ୍ତ୍ର ବିକ୍ରି ଅଭିଯୋଗରେ ଜଣକୁ ଧରିଲା ଏସଟିଏଫ୍ । ଏଥିସହ ବନ୍ଧୁକ ଓ ଗୁଳି ଜବତ କରାଯାଇଛି । ବେଆଇନ୍ ଅସ୍ତ୍ରଶସ୍ତ୍ର ବିକ୍ରିର ସୂଚନା ପାଇ ଅନୁଗୁଳ ପୋଲିସ ସହାୟତାରେ ଏସଟିଏଫ୍ ଚଢାଉ କରିଥିଲା ।
୮ଟି ଦେଶୀ ବନ୍ଧୁକ ଓ ବିପୁଳ ପରିମାଣର ଗୁଳି ଜବତ ସହିତ ରତ୍ନାକର କାଲଟା ନାମକ ବ୍ୟକ୍ତିକୁ କାବୁ କରାଯାଇଛି । ଗିରଫ କାବୁ ଘର ସମ୍ବଲପୁର ଜିଲ୍ଲା ସରପାଲି ଅଞ୍ଚଳରେ । ଏନେଇ ଛେଣ୍ଡିପଦା ଥାନାରେ ମାମଲା ରୁଜୁ ହୋଇଛି । ୨୦୨୦ରୁ ଏବେ ସୁଦ୍ଧା ଏସଟିଏଫ୍ ୬୪ଟି ବନ୍ଧୁକ ଓ ୯୮ ରାଉଣ୍ଡ ଗୁଳି ଜବତ କରାଯାଇଛି ।
ରାଉରକେଲା: ସୁନ୍ଦରଗଡ଼ ଜିଲ୍ଲା ହେମଗିର ଥାନା ଅନ୍ତର୍ଗତ କଲାମେଘାରେ ଚାଞ୍ଚଲ୍ୟ । ନାବାଳିକା ଝିଅକୁ ହତ୍ୟା କରିବା ପରେ ମାଆ କରିଛି ଆତ୍ମହତ୍ୟା ଉଦ୍ୟମ । ପାରିବାରିକ କହଳ କାରଣରୁ ଝିଅକୁ ହତ୍ୟା କରାଯାଇଥିବା ସନ୍ଦେହ କରାଯାଉଛି ।
ନିଜର ୧୭ ବର୍ଷର ଝିଅକୁ ଶିଳପୁଆରେ ଛେଚି ମାଆ ହତ୍ୟା କରିବା ପରେ ବିଷ ପିଇ ଆତ୍ମହତ୍ୟା ଉଦ୍ୟମ କରିଥିଲେ । ଗୁରୁତର ଅବସ୍ଥାରେ ମାଆଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି । ହତ୍ୟାର ପ୍ରକୃତ କାରଣ ଅସ୍ପଷ୍ଟ ଥିବାବେଳେ ପୋଲିସ ପକ୍ଷରୁ ତଦନ୍ତ ଜାରି ରହିଛି । ମାଆ ସୁସ୍ଥ ହେଲା ପରେ ପ୍ରକୃତ କାରଣ ଜଣାପଡ଼ିବ ବୋଲି ଏସପି କହିଛନ୍ତି ।
ଥିରୁବନନ୍ତପୁରମ୍: କେରଳରେ ୧୨ ଘଣ୍ଟା ମଧ୍ୟରେ ଦୁଇ ଦୁଇ ଜଣ ନେତାଙ୍କୁ ହତ୍ୟା କରାଯାଇଛି । ଯାହାକୁ ନେଇ ଅଲାପୁଜ୍ଜା ଜିଲ୍ଲାରେ ତୀବ୍ର ଉତ୍ତେଜନା ପ୍ରକାଶ ପାଇଛି । ହତ୍ୟାକାଣ୍ଡକୁ ମୁଖ୍ୟମନ୍ତ୍ରୀ ପିନାରାୟି ବିଜୟନ ନିନ୍ଦା କରିଥିବା ବେଳେ ଅଲାପୁଜ୍ଜାରେ ୧୪୪ ଧାରା ଲାଗୁ କରାଯାଇଛି ।
ରବିବାର ସକାଳେ ବିଜେପି ନେତାଙ୍କୁ ହତ୍ୟା କରାଯାଇଛି । ମୃତକ ବିଜେପି ନେତା ରଞ୍ଜିତ ଶ୍ରୀନିବାସ ବୋଲି ଜଣାପଡ଼ିଛି । ସେ ବିଜେପି ଓବିସି ମୋର୍ଚ୍ଚାର ସଚିବ ଥିଲେ । ସୂଚନା ଅନୁସାରେ ସକାଳେ କିଛି ଲୋକ ଶ୍ରୀନିବାସଙ୍କ ଘର ଭିତରେ ପଶି ତାଙ୍କୁ ହତ୍ୟା କରିଛନ୍ତି ।
ଏହା ପୂର୍ବରୁ ଶନିବାର ବିଳମ୍ବିତ ରାତିରେ ସୋଶିଆଲ ଡେମୋକ୍ରାଟିକ୍ ପାର୍ଟି ଅଫ୍ ଇଣ୍ଡିଆର ନେତା କେଏସ୍ ଶାନଙ୍କୁ ହତ୍ୟା କରାଯାଇଥିଲା । ଯାହାକୁ ନେଇ ଆରଏସ୍ଏସକୁ ଦାୟୀ କରିଥିଲା ଏସଡିପିଆଇ । କେଏନ୍ ଶାନଙ୍କ ହତ୍ୟା ପ୍ରତିଶୋଧରେ ବିଜେପି ନେତାଙ୍କୁ ହତ୍ୟା କରାଯାଉଥିବା ଚର୍ଚ୍ଚା ହେଉଛି ।
୧୨ ଘଣ୍ଟା ମଧ୍ୟରେ ୨ ନେତାଙ୍କୁ ହତ୍ୟା ପରେ ଅଲାପୁଜ୍ଜାରେ ଦୁଇ ଦିନ ପାଇଁ ୧୪୪ ଧାରା ଲାଗୁ କରିଛନ୍ତି ଜିଲ୍ଲାପାଳ । ମୁଖ୍ୟମନ୍ତ୍ରୀ ପିନାରାୟି ବିଜୟନ ଦୁଇ ନେତାଙ୍କ ହତ୍ୟାକୁ ନିନ୍ଦା କରିଛନ୍ତି । କହିଛନ୍ତି, ଆକ୍ରମଣକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବ ପୋଲିସ ।
ଶନିବାର ସୋଶିଆଲ ଡେମୋକ୍ରାଟିକ୍ ପାର୍ଟି ଅଫ୍ ଇଣ୍ଡିଆର ସଚିବ କେଏସ୍ ଶାନଙ୍କୁ ଗୁରୁତର ଅବସ୍ଥାରେ ଅଲାପୁଜ୍ଜା ମେଡିକାଲରେ ଭର୍ତ୍ତି କରାଯାଇଥିଲା । ପରେ କୋଚ୍ଚି ସ୍ଥାନାନ୍ତରଣ ବେଳେ ତାଙ୍କର ମୃତ୍ୟୁ ହୋଇଥିଲା । କେଏସ୍ ଶାନ ଘରକୁ ବାଇକରେ ଫେରୁଥିବା ବେଳେ ଏକ କାର ତାଙ୍କୁ ଧକ୍କା ଦେଇଥିଲା । ବାଇକରୁ ଛିଟକି ପଡ଼ିବା ପରେ କାରରେ ଥିବା ଦୁର୍ବୃତ୍ତ କେଏସ୍ ଶାନଙ୍କୁ ହତ୍ୟା କରିଥିଲେ । ତାଙ୍କ ଶରୀରରେ ପ୍ରାୟ ୪୦ଟି କ୍ଷତଚିହ୍ନ ଥିଲା ।
ଭୁବନେଶ୍ୱର: ଥରୁଛି ଓଡ଼ିଶା, ଖସୁଛି ପାରଦ । ରାଜ୍ୟରେ ଜାରି ରହିଛି ଶୀତ ଲହରୀ । ଆଜି ରାଜ୍ୟର ୯ ସହରରେ ପାରଦ ୧୨ ଡିଗ୍ରୀ ତଳେ ରହିଛି । ୮.୫ ଡିଗ୍ରୀ ସେଲସିୟସ୍ ସହ ଦାରଙ୍ଗବାଡ଼ିରେ ସର୍ବନିମ୍ନ ତାପମାତ୍ରା ରେକର୍ଡ କରାଯାଇଛି । ୧୦ ଡିଗ୍ରୀ ତଳେ ସୁନ୍ଦରଗଡ଼, ବଲାଙ୍ଗିର, କୋରାପୁଟ, ଫୁଲବାଣୀର ତାପମାତ୍ରା ରହିଛି ।
https://twitter.com/mcbbsr/status/1472422000606199808/photo/1
ଫୁଲବାଣୀ ଓ କୋରାପୁଟରେ ପାରଦ ୯.୫ ଡିଗ୍ରୀ ରହିଛି । ସେହିଭଳି ବଲାଙ୍ଗିରରେ ପାରଦ ୯ ଡିଗ୍ରୀ ରହିଥିବାବେଳେ ସୁନ୍ଦରଗଡ଼ରେ ପାରଦ ୧୦ ଡିଗ୍ରୀ ରହିଛି । ଭୁବନେଶ୍ୱରର ସର୍ବନିମ୍ନ ତାପମାତ୍ରା ୧୫.୧ ଡିଗ୍ରୀ ରହିଛି ।
ପାଣିପାଗ ବିଭାଗର ଆକଳନ ଅନୁସାରେ, ଆସନ୍ତା ୫ ଦିନ ଯାଏ ପାଗ ମୁଖ୍ୟତଃ ଶୁଖିଲା ରହିବ । ପାଗରେ ବିଶେଷ ପରିବର୍ତ୍ତନ ଆସିବ ନାହିଁ । ସର୍ବନିମ୍ନ ତାପମାତ୍ରା ୨ରୁ ୪ ଡିଗ୍ରୀ କମ୍ ରହିବ । ଗତକାଲି ଫୁଲବାଣୀରେ ସବୁଠାରୁ କମ୍ ତାପମାତ୍ରା ୭ ଡିଗ୍ରୀ ରହିବ ।
ଅନୁଗୁଳ: କନ୍ନୁର ହେଲିକପ୍ଟର ଦୁର୍ଘଟଣାରେ ସହିଦ ଯବାନଙ୍କୁ ନିଆରା ଶ୍ରଦ୍ଧାଞ୍ଜଳି । ଲଣ୍ଠନ କାଚରେ ସହିଦ ଯବାନଙ୍କ ଚିତ୍ର ଆଙ୍କି ଶ୍ରଦ୍ଧାଞ୍ଜଳି ଜଣାଇଛନ୍ତି ଚିତ୍ର ଶିଳ୍ପୀ । ଅନୁଗୁଳର ଚିତ୍ର ଶିଳ୍ପୀ ରଜତ ରଞ୍ଜନ ନାଥ କନ୍ନୁର୍ ହେଲିକେପ୍ଟର ଦୁର୍ଘଟଣାରେ ପ୍ରାଣ ହରାଇଥିବା ୧୪ ଜଣ ବୀର ଯବାନ ମାନଙ୍କ ଫଟୋକୁ ଲଣ୍ଠନ କାଚରେ ଆଙ୍କିଛନ୍ତି । ଲଣ୍ଠନ କାଚରେ ସୁନ୍ଦର ଭାବରେ ଚିତ୍ରଣ କରି ନିଆରା ଭାବରେ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି ବଅଁରପାଳ ବ୍ଲକ ଗାଙ୍ଗିଯୋଡ଼ି ଗାଁର ଯୁବ ଶିଳ୍ପୀ ରଜତ ରଞ୍ଜନ ନାଥ ।
ପୂର୍ବରୁ ସେ ଗଲୱାନ ଘାଟିରେ ସହିଦ ହୋଇଥିବା ଭାରତର ବୀର ଯବାନମାନଙ୍କର ଚିତ୍ରକୁ ସେ ସୁନ୍ଦର ଭାବରେ ବାଉଁଶ ମାଧ୍ୟମରେ ଚିତ୍ରଣ କରି ନିଆରା ଭାବରେ ଶ୍ରଦ୍ଧାଞ୍ଜଳି ଅର୍ପଣ କରି ଲୋକ ଲୋଚନଙ୍କୁ ଆସିଥିଲେ । ଚଳିତ ଥର ଲଣ୍ଠନରେ ସେ ଏଭଳି ଚିତ୍ର ଆଙ୍କି ଭିନ୍ନ ପ୍ରୟାସ କରିଛନ୍ତି । ତାଙ୍କର ଏ ଅଭିନବ କୃତିକୁ ସମସ୍ତେ ଭୂୟସୀ ପ୍ରଶଂସା କରିଛନ୍ତି ।
ଭୁବନେଶ୍ୱର: ପଞ୍ଚାୟତ ନିର୍ବାଚନ ପାଇଁ ଆଉ ପାଦେ ଆଗେଇଲେ ରାଜ୍ୟ ସରକାର । ନିର୍ବାଚନ ପାଇଁ ନିର୍ଦ୍ଦେଶନାମା ଜାରି କଲେ ରାଜ୍ୟ ନିର୍ବାଚନ ଆୟୋଗ । ରାଜ୍ୟରେ ଯେକୌଣସି ସମୟରେ ପଞ୍ଚାୟତ ନିର୍ବାଚନ ନେଇ ପ୍ରକାଶ ପାଇବ ବିଜ୍ଞପ୍ତି । ବିଜ୍ଞପ୍ତି ପ୍ରକାଶ ଦିନ ଠାରୁ ଲାଗୁ ହେବ ଆଦର୍ଶ ଆଚରଣ ବିଧି । ଭୋଟ୍ ଗଣତି ଶେଷ ହେବା ପର୍ଯ୍ୟନ୍ତ ଏହି ଆଚରଣ ବିଧି ବଳବତ୍ତର ରହିବ । ଉଭୟ ଇଂରାଜୀ ଓ ଓଡ଼ିଆ ଭାଷାରେ ଆଚରଣ ବିଧି ସଂକ୍ରାନ୍ତ ମାର୍ଗଦର୍ଶିକା ପ୍ରକାଶ ପାଇବ ।
ଏଥିସହ ପଢ଼ନ୍ତୁ: ବିଳମ୍ବିତ ରାତିରେ ଯୁବକଙ୍କୁ ବିଭତ୍ସ ହତ୍ୟା, ମାରି ରାସ୍ତାରେ ଫିଙ୍ଗିଦେଲେ ଦୁର୍ବୃତ୍ତ
ସମ୍ବିଧାନର ଧାରା ୨୪୩-କେ ଓ ପଞ୍ଚାୟତ ଆଇନ୍ ଅନୁଯାୟୀ ମାର୍ଗଦର୍ଶିକା ପ୍ରକାଶ ପାଇବ । ଚଳିତ ଥର ଭୋଟ୍ ଗ୍ରହଣ ଦିନ ଗଣତି ହେବ ନାହିଁ । ଜୋନ୍ ତଥା ବ୍ଲକର ସାମଗ୍ରିକ ତ୍ରିସ୍ତରୀୟ ନିର୍ବାଚନ ସରିବା ପରେ ବ୍ଲକ୍ ମୁଖ୍ୟାଳୟରେ ଗଣତି କରାଯିବ । ୩ଟି ପର୍ଯ୍ୟାୟରେ ଗଣତି ଓ ୫ଟି ପର୍ଯ୍ୟାୟରେ ହେବ ପଞ୍ଚାୟତ ନିର୍ବାଚନ । ପଞ୍ଚାୟତ ନିର୍ବାଚନ ପାଇଁ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଥିବା ବେଳେ ନିର୍ବାଚନ ଖର୍ଚ୍ଚ ରାଶି ସହ ଗାଡ଼ି ବ୍ୟବହାର ବୃଦ୍ଧି ନେଇ ଘୋଷଣା ହୋଇସାରିଛି ।
ଶ୍ରୀନଗର: ଜାମ୍ମୁକାଶ୍ମୀରର ହରୱାନ ଅଞ୍ଚଳରେ ସୁରକ୍ଷାକର୍ମୀ-ଆତଙ୍କବାଦୀଙ୍କ ମଧ୍ୟରେ ଗୁଳି ବିନିମୟ ହୋଇଛି । ଏଥିରେ ଜଣେ ଆତଙ୍କବାଦୀ ନିହତ ହୋଇଥିବା ସୂଚନା ଦେଇଛି ପୋଲିସ । ରବିବାର ସକାଳୁ ହରୱାନ ଅଞ୍ଚଳରେ ଗୁଳି ବିନିମୟ ହୋଇଥିଲା । ଏନକାଉଣ୍ଟରରେ ଲସ୍କର ଏ ତୋଏବାର ଜଣେ ଆତଙ୍କବାଦୀର ମୃତ୍ୟୁ ହୋଇଛି ।
One unidentified terrorist neutralized in the encounter that broke out between security forces and terrorists at Harwan area of Srinagar: Kashmir Zone Police
— ANI (@ANI) December 18, 2021
ବିଗତ ତିନିଦିନ ଭିତରେ ଜାମ୍ମୁ-କାଶ୍ମୀରରେ ଅନେକ ଆତଙ୍କବାଦୀ ଆକ୍ରମଣ ହୋଇଥିବା ବେଳେ ସେନା ମୁହଁତୋଡ଼ ଜବାବ ଦେଇଛି । ଗୁରୁବାର କୁଲଗାମରେ ହୋଇଥିବା ଗୁଳି ବିନିମୟରେ ୨ ଆତଙ୍କବାଦୀ ନିହତ ହୋଇଥିଲେ ।
ଏଥିସହ ପଢ଼ନ୍ତୁ: ବିଳମ୍ବିତ ରାତିରେ ଯୁବକଙ୍କୁ ବିଭତ୍ସ ହତ୍ୟା, ମାରି ରାସ୍ତାରେ ଫିଙ୍ଗିଦେଲେ ଦୁର୍ବୃତ୍ତ
ବାଲେଶ୍ୱର: ସହର ଶୋଉଛି ହେଲେ ଅପରାଧ ଥମୁନି । ବିଳମ୍ବିତ ରାତିରେ ବାଲେଶ୍ୱର ଜିଲ୍ଲା ସହଦେବଖୁଣ୍ଟା ଥାନା ଅଞ୍ଚଳରେ ବିଭତ୍ସ ହତ୍ୟାକାଣ୍ଡ ଘଟିଛି । ଗୋଲାପଲ ନିକଟରୁ ମିଳିଛି ମାଛ ବ୍ୟବସାୟୀଙ୍କ ରକ୍ତ ଜୁଡୁବୁଡୁ ମୃତଦେହ । ଏକାଧିକବାର ଛୁରିରେ ଆକ୍ରମଣ କରି ଯୁବକଙ୍କୁ ହତ୍ୟା କରିଛନ୍ତି ଦୁର୍ବୃତ୍ତ ।
ହତ୍ୟା ପରେ ରକ୍ତ ଜୁଡୁବୁଡ଼ୁ ମୃତଦେହକୁ ରାସ୍ତାରେ ଫିଙ୍ଗି ଦୁର୍ବୃତ୍ତ ଫେରାର୍ ହୋଇ ଯାଇଛନ୍ତି । ମୃତକ ଜଣଙ୍କ ଗୋଲାପଲ ଅଞ୍ଚଳର ରବି ସିଂ ବୋଲି ସୂଚନା ଦେଇଛି ପୋଲିସ । ଘଟଣାସ୍ଥଳରେ କ୍ରାଇମ୍ ଡିଏସପିଙ୍କ ସହ ପୋଲିସ ଟିମ୍ ପହଞ୍ଚି ତଦନ୍ତ କରୁଛି । ପୂର୍ବ ଶତ୍ରୁତାକୁ ନେଇ ହତ୍ୟା ସନ୍ଦେହରେ ପୋଲିସ ଜଣଙ୍କୁ ଥାନାରେ ଅଟକ ରଖି ପଚରାଉଚରା କରୁଛି ।
ଏଥିସହ ପଢ଼ନ୍ତୁ: ସ୍ୱର୍ଣ୍ଣ ମନ୍ଦିରରେ ପଶି ପୂଜା ସ୍ଥଳରୁ ଖଣ୍ଡ ଉଠାଇବାକୁ ଉଦ୍ୟମ, ପିଟିପିଟି ମାରିଦେଲେ ଲୋକ
ଅମ୍ରିତସର: ପଞ୍ଜାବର ଅମ୍ରିତସର ସ୍ୱର୍ଣ୍ଣ ମନ୍ଦିରର ପବିତ୍ର ସ୍ଥଳରେ ପଶିଥିବା ଜଣେ ଯୁବକଙ୍କୁ ପିଟିପିଟି ହତ୍ୟା କରାଯାଇଛି । ଦରବାର ସାହିବର ପବିତ୍ର ଶ୍ରୀ ଗୁରୁଗ୍ରନ୍ଥ ସାହିବ ସ୍ଥଳରେ ଯୁବକ ଜଣଙ୍କ ପଶିଥିଲେ । ଏହାପରେ ସେଠାରେ ଉତ୍ତ୍ୟକ୍ତ ଲୋକ ଉକ୍ତ ଯୁବକଙ୍କୁ ପିଟିପିଟି ମାରି ଦେଇଥିଲେ ।
ପୋଲିସ ସୂଚନା ଅନୁସାରେ, ଉକ୍ତ ଯୁବକ ଜଣଙ୍କ ଘର ଉତ୍ତରପ୍ରଦେଶର । ତାଙ୍କ ବୟସ ୩୦ ବର୍ଷ ହେବ । ମନ୍ଦିରରେ ଲାଗିଥିବା ସମସ୍ତ ସିସିଟିଭି କ୍ୟାମେରାର ଯାଞ୍ଚ କରୁଛି ପୋଲିସ । ଯୁବକ ଜଣଙ୍କ କେତେବେଳେ ମନ୍ଦିରରେ ପ୍ରବେଶ କରିଥିଲେ । ତାକୁ କେତେଜଣ ପିଟିଥିଲେ ପୋଲିସ ତଦନ୍ତ କରୁଛି ।
ନୂଆଦିଲ୍ଲୀ: ଦୂରଗାମୀ ଟ୍ରେନରେ ଏଣିକି ମହିଳାଙ୍କ ଲାଗି ରହିବ ସ୍ବତନ୍ତ୍ର ବର୍ଥ । ମହିଳାଙ୍କ ସୁରକ୍ଷା ଦୃଷ୍ଟିରୁ ଏହି ପଦକ୍ଷେପ ନେଇଛି ଭାରତୀୟ ରେଳବାଇ । ରେଳମନ୍ତ୍ରୀ ଅଶ୍ବିନୀ ବୈଷ୍ଣବ କହିଛନ୍ତି ଦୂରଗାମୀ ଟ୍ରେନରେ ଏହି ବ୍ୟବସ୍ଥା କରାଯିବା ସହ ଅନ୍ୟାନ୍ୟ ସୁରକ୍ଷା ଉପରେ ଗୁରୁତ୍ବ ଦିଆଯିବ । ଦୂରଗାମୀ ମେଲ ଓ ଏକ୍ସପ୍ରେସ ଟ୍ରେନ, ଗରିବ ରଥ, ରାଜଧାନୀ ଏକ୍ସପ୍ରେସର ସ୍ଲିପର କୋଚରେ ୬ଟି ବର୍ଥ ମହିଳାଙ୍କ ଲାଗି ସଂରକ୍ଷିତ ରହିବ ।
ଏହା ସହ ପ୍ରତି ସ୍ଲିପର କୋଚର ୬-୭ଟି ଲୋୟର ବର୍ଥ, ଥ୍ରୀ ଟାୟର ଏସି କୋଚର ୪-୫ଟି ଲୋୟର ବର୍ଥ ଏବଂ ୨ ଟାୟର ଏସି କୋଚର ୩-୪ଟି ଲୋୟର ବର୍ଥ ବରିଷ୍ଠ ନାଗରିକ, ୪୫ ବର୍ଷରୁ ଅଧିକ ବୟସର ମହିଳା ଓ ଗର୍ଭବତୀଙ୍କ ଲାଗି ସଂରକ୍ଷିତ ରହିବ । ଟ୍ରେନରେ ମହିଳା ଯାତ୍ରୀଙ୍କ ସୁରକ୍ଷା ଲାଗି ଅନେକ ପଦକ୍ଷେପ ନିଆଯାଇଛି ।
ଆରପିଏଫ, ଜିଆରପି ଓ ଡିଷ୍ଟ୍ରିକ୍ଟ ପୋଲିସ ଯେପରି ମହିଳା ଯାତ୍ରୀଙ୍କ ସୁରକ୍ଷା ପ୍ରତି ଅଧିକ ଗୁରୁତ୍ବ ଦେବେ ସେଥିଲାଗି ବ୍ୟବସ୍ଥା କରାଯାଇଛି ବୋଲି କହିଛନ୍ତି ରେଳମନ୍ତ୍ରୀ । ରେଳବାଇ ରେଳଯାତ୍ରାରେ ନୂତନ୍ୱ,ତ ଆଣିବା ପାଇଁ ଆରମ୍ଭ କରିଛି ପ୍ଲାନ ଓ ପ୍ରସ୍ତୁତି । ଟ୍ରେନରେ ଅନେକ ସମୟରେ ଅସୁବିଧାର ଶିକାର ହେବା ସହ ବିଭିନ୍ନ ବ୍ୟକ୍ତିଗତ ସମସ୍ୟାରେ ପଡ଼ିଥାନ୍ତି । କିନ୍ତୁ ସ୍ୱତନ୍ତ୍ର ବଗିରେ ଏଣିକି ମହିଳା ଯାତ୍ରା କରିପାରିବେ ବୋଲି ଘୋଷଣା କରିଛନ୍ତି ରେଳମନ୍ତ୍ରୀ ।
