ଫାଇନାଲ ଥିଲା NCP ମିଶ୍ରଣ: ଅଜିତ ପାଓ୍ବାରଙ୍କ ମୃତ୍ୟୁ ପରେ କାହିଁକି ଅଟକିଲା ?
ନନ୍ଦିଘୋଷ ବ୍ୟୁରୋ: ଅଜିତ ପାଓ୍ବାରଙ୍କ ଦେହାନ୍ତ ପରେ ମହାରାଷ୍ଟ୍ର ରାଜନୀତିକୁ ନେଇ ନାନା କଥା ଶୁଣିବାକୁ ମିଳୁଛି । କୁହାଯାଉଛି ଅଜିତଙ୍କ ପରଲୋକ ପୂର୍ବରୁ ଏନସିପିର ଦୁଇ ଗୋଷ୍ଠୀର ମିଶ୍ରମଣ ପାଇଁ କଥା ବହୁତ ଆଗକୁ ବଢ଼ିଯାଇଥିଲା । ଦୁଇ ପକ୍ଷରୁ କିଛି ଲୋକ ଏହାକୁ ସମର୍ଥନ କରୁଥିଲେ ତ ଆଉ କିଛି ବିରୋଧ କରୁଥିଲେ । ହେଲେ ଅଜିତଙ୍କ ଦେହାନ୍ତ ପରେ ୨ରୁ ୩ ଦିନି ହେବ ଦୁଇ ଗୋଷ୍ଠୀଙ୍କ ମଧ୍ୟରେ ଥିବା ମତଭେଦ ପଦାକୁ ଆସିବାରେ ଲାଗିଛି । ଏମିତି ସ୍ଥିତିରେ ପୁଣି ଥରେ ଏନସିପି ଗୋଟିଏ ହେବାକୁ ନେଇ ପ୍ରକ୍ରିୟା ଚାଲିଥିଲା ତାହା ଆଶଙ୍କା ମଧ୍ୟକୁ ଚାଲିଯାଇଛି । କୁହାଯାଉଛି ଶରଦ ପାଓ୍ବାରଙ୍କ ଗୋଷ୍ଠୀ ମିଶ୍ରଣ ପାଇଁ ପ୍ରସ୍ତୁତ ଅଛନ୍ତି । ଦଳର ଦୁଇ ବଡ଼ ନେତା ରାଜେଶ ଟୋପେ ଏବଂ ଅନିଲ ଦେଶମୁଖ ଖୋଲାଖୋଲି ଏହାକୁ ସମର୍ଥନ କରୁଛନ୍ତି । ହେଲେ ଅଜିତଙ୍କ ଗୋଷ୍ଠୀ ପକ୍ଷରୁ ସେମିତି କିଛି ସକରାତ୍ମକ ସଙ୍କେତ ଦେଖିବାକୁ ମିଳୁନି । ଏମିତି ସ୍ଥିତିରେ ନିକଟ ଭବିଷ୍ୟରେ ଦୁଇ ଗୋଷ୍ଠୀ ପୁଣି ଥରେ ଏକାଠି ହେବା ପରି ଲାଗୁନି ।
ଶରଦଙ୍କ ଗୋଷ୍ଠୀ ଏବେ ବି ଆଶାବାଦୀ
ଅଜିତ ପାଓ୍ବାରଙ୍କ ଏନସିପି ମିଶ୍ରଣକୁ ନେଇ ତତ୍ପରତା ଦେଖାଉ ନଥିବା ବେଳେ ଶରଦ ପାଓ୍ବାରଙ୍କ ଗୋଷ୍ଠୀ ଏବେ ବି ଆଶା ରଖିଛନ୍ତି । ଶରଦ ପାଓ୍ବାର ଆଜି ବାରାମତିରେ କହିଛନ୍ତି, ଦୁଇ ଏନସିପିର ମିଶ୍ରଣ ନେଇ ଅଜିତ ପାଓ୍ବାର ୧୨ ଫେବୃଆରୀରେ ନିଜେ ଘୋଷଣା କରିଥାନ୍ତେ । ସୁନେତ୍ରା ପାଓ୍ବାର ଉପମୁଖ୍ୟମନ୍ତ୍ରୀ ହେବା ନେଇ ତାଙ୍କ ପାଖରେ କୌଣସି ସୂଚନା ନାହିଁ । ଏଥିରୁ ଜଣାପଡୁଛି ଅଜିତ ପାଓ୍ବାରଙ୍କ ଗୋଷ୍ଠୀର ନେତା ଶରଦ ପାଓ୍ବାରଙ୍କୁ ବିଶ୍ବାସରେ ନେଇ କିଛି କାମ କରୁନାହାନ୍ତି ।
ମିଶ୍ରଣ ପାଇଁ ଏକାଧିକ ବୈଠକ
ଅଜିତଙ୍କ ଦଳର ନେତା ତୁରନ୍ତ ଉପମୁଖ୍ୟମନ୍ତ୍ରୀ ପଦ ନେବାକୁ ଚେଷ୍ଟା କରୁଛନ୍ତି । କାରଣ ଅଜିତଙ୍କ ଦେହାନ୍ତ ପରେ ଯେପରି କୌଣସି ବିଧାୟକ ଅନ୍ୟ ଦଳକୁ ଚାଲି ନଯାଆନ୍ତି । ଅଜିତଙ୍କ ଜୀବିତାବସ୍ଥାରେ ମିଶ୍ରଣକୁ ନେଇ ୫ରୁ ୬ ଥର ବୈଠକ ହୋଇଥିଲା । ଶରଦଙ୍କ ଗୋଷ୍ଠୀର ଜଣେ ବରିଷ୍ଠ ନେତା କହିଥିଲେ, ଫେବୃଆରୀ ୧୨ ତାରିଖରେ ଦୁଇ ଦଳର ରାଷ୍ଟ୍ରୀୟ କାର୍ଯ୍ୟକାରିଣୀର ଯୁଗ୍ମ ବୈଠକ ଡକାଯାଇ ମିଶ୍ରଣ ନେଇ ଘୋଷଣା କରାଯିବ ।
ନିର୍ବାଚନ ପରେ ମିଶ୍ରଣ ପାଇଁ ହୋଇଥିଲା ଘୋଷଣା
ଶରଦଙ୍କ ଗୋଷ୍ଠୀର ବିଧାୟକ ଶଶିକାନ୍ତ ସିନ୍ଧେ କହିଥିଲେ ଦୁଇ ଗୋଷ୍ଠୀଙ୍କ ମିଶ୍ରଣ ନେଇ ଆଲୋଚନା ହୋଇଥିଲା । ନଗରପାଳିକା ନିର୍ବାଚନ ପରେ ମିଶ୍ରଣ ନେଇ ନିଜେ ଅଜିତ ପାଓ୍ବାର ପ୍ରସ୍ତାବ ରଖିଥିଲେ । ପରେ ଜିଲ୍ଲା ପରିଷଦ ନିର୍ବାଚନ ଆସିଯିବାରୁ ଏହା ଅଟକି ଯାଇଥିଲା । ହେଲେ ପୁଣି ଆଲୋଚନା ହୋଇ ଜିଲ୍ଲା ପରିଷଦ ନିର୍ବାଚନ ପରେ ମିଶ୍ରଣ ପାଇଁ ସ୍ଥିର ହୋଇଥିଲା । ସିନ୍ଧେଙ୍କ ଏହି ବୟାନରୁ ଏମିତି ଲାଗୁଛି ମିଶ୍ରଣକୁ ନେଇ ଅଜିତ ପାଓ୍ବାରଙ୍କ ଇଚ୍ଛା ଥିଲା ଓ ଏହା ଶୀଘ୍ର ହୋଇଯିବା ସେ ଚାହୁଁଥିଲେ । ହେଲେ ଅଜିତ ପାଓ୍ବାରଙ୍କ ଗୋଷ୍ଠୀ ତାଙ୍କ ଦେହାନ୍ତ ପରେ ଦେଖା ଦେଇଥିବା ସ୍ଥିତିରେ ଦଳ ଓ ସରକାରରେ ତାଳମେଳ ବନାଇ ରଖିବା ଉପରେ ଅଧିକ ଧ୍ୟାନ ଦେଉଛନ୍ତି ।
ଅଜିତଙ୍କ ଗୋଷ୍ଠୀରେ ଉତ୍ସାହ ନାହିଁ
ଏନସିପି କାର୍ଯ୍ୟାଳୟର ପ୍ରଦେଶ ଅଧ୍ୟକ୍ଷ ସୁନୀଲ ତଟକରେ ଗତକାଲି ଶୁକ୍ରବାର କହିଥିଲେ, ଆମେ ଏବେ ଶୋକରେ ଅଛୁ । ଏହା ଉପରେ ଆଲୋଚନା ପରେ ହେବ । ଅଜିତଙ୍କ ଗୋଷ୍ଠୀର ବରିଷ୍ଠ ନେତା ଛଗନ ଭୁଜବଳ ବି କହିଛନ୍ତି, ମିଶ୍ରଣକୁ ନେଇ ଦଳର ନେତାଙ୍କ ସହ କୌଣସି ଆଲୋଚନା ହୋଇନି । ବର୍ତ୍ତମାନ ଆମର ମୁଖ୍ୟ କାମ ହେଲା ବିଧାୟକ ଦଳର ନେତା ଚୟନ କରିବା । ଏମିତି ସ୍ଥିତିରେ ବିଜେପିର ଭୂମିକା ଗୁରୁତ୍ବପୂର୍ଣ୍ଣ ହୋଇଯାଉଛି ।
ବିଜେପିର ଜିଙ୍ଗାଲାଲା
ଏନସିପିର ଦୁଇ ଗୋଷ୍ଠୀ ଏକାଠି ହେବାରେ ବିଜେପିର ଭୂମିକା ଗୁରୁତ୍ବପୂର୍ଣ୍ଣ ହୋଇଯାଉଛି । ଅଜିତଙ୍କ ଗୋଷ୍ଠୀ ପାଖରେ ବର୍ତ୍ତମାନ ଲୋକସଭାରେ ସୁନିଲ ତଟକରେ ହିଁ ଏକମାତ୍ର ସାଂସଦ ଅଛନ୍ତି । ହେଲେ ଶରଦ ପାଓ୍ବାରଙ୍କ ଗୋଷ୍ଠୀ ପାଖରେ ୮ ଜଣ ସାଂସଦ ଅଛନ୍ତି । ଯଦି ଦୁଇ ଗୋଷ୍ଠୀ ଏକାଠି ହୋଇ ଏନଡିଏରେ ଯୋଗ ଦିଅନ୍ତି, ଏହାର ଲାଭ ବିଜେପିର କେନ୍ଦ୍ର ସରକାରକୁ ହେବ । ଏହାକୁ ନେଇ ବିଜେପି ଉପରେ କୌଣସି ଚାପ ନଥିଲେ ବି ରାଜନୈତିକ ତାଳମେଳ କରିବାକୁ ପଡ଼ିପାରେ ।
ମିଶ୍ରଣରୁ ଅଜିତଙ୍କ ଗୋଷ୍ଠୀର ପଛଘୁଞ୍ଚା କାହିଁକି ?
ଯଦି ମିଶ୍ରଣ ହେବ, ତେବେ ଶରଦଙ୍କ ଗୋଷ୍ଠୀର ନେତାଙ୍କୁ ମନ୍ତ୍ରୀମଣ୍ଡଳରେ କେମିତି ନିଆଯିବ ତାହା ବଡ଼ ପ୍ରଶ୍ନ ହୋଇ ଛିଡ଼ା ହେବ । ମହାରାଷ୍ଟ୍ରରେ ଅଜିତଙ୍କ ପରେ ମାତ୍ର ଗୋଟିଏ ମନ୍ତ୍ରୀପଦ ଖାଲି ରହିଛି । ଯଦି ଶରଦଙ୍କ ଗୋଷ୍ଠୀର ୩ରୁ ୪ ଜଣଙ୍କୁ ମନ୍ତ୍ରୀ କରାଯିବ ତେବେ ଅଜିତଙ୍କ ଗୋଷ୍ଠୀର କିଛି ନେତାଙ୍କୁ ମନ୍ତ୍ରୀ ପଦ ଛାଡିବାକୁ ପଡ଼ିବ । ଯଦି ଏପରି ହୁଏ ଅଜିତଙ୍କ ଗୋଷ୍ଠୀ ମଧ୍ୟ ଅସନ୍ତୋଷ ବୃଦ୍ଧି ପାଇବ । ଯାହା ଅଜିତଙ୍କ ଗୋଷ୍ଠୀର ନେତା ବି ଜାଣିଛନ୍ତି । ଏହାବାଦ ମିଶ୍ରଣ ପରେ ଶରଦଙ୍କ ଗୋଷ୍ଠୀର ଏମିତି ବି କିଛି ନେତା ଅଛନ୍ତି, ଯେଉଁମାନଙ୍କର ଦବଦବା ବଢ଼ିଯିବା ସହ ଅଜିତଙ୍କ ଗୋଷ୍ଠୀର ବଡ଼ ନେତାଙ୍କର କମିଯିବ । ଏସବୁ କାରଣରୁ ଅଜିତଙ୍କ ଗୋଷ୍ଠୀ ବର୍ତ୍ତମାନ ମିଶ୍ରଣକୁ ନେଇ ଚୁପ ରହିବାକୁ ପସନ୍ଦ କରୁଛି । ନିଜ ନେତାଙ୍କୁ ଏକାଠି କରି ଦଳ ସୁନେତ୍ରା ପାଓ୍ବାରଙ୍କୁ ନେତୃତ୍ବ ଦେବାକୁ ଚାହିଁଛି । ଯାହାଦ୍ବାରା ବିଧାୟକ ଏବଂ ପଦାଧିକାରୀ ପାଓ୍ବାର ପରିବାର ପ୍ରତି ନିଷ୍ଠାବାନ ରହିବେ ।
