ରାୟଗଡ଼ା ଓ ରାଉରକେଲାରେ ନାବାଳିକାଙ୍କୁ ଉଠାଇ ନେଇ ଜଙ୍ଗଲରେ ଦୁଷ୍କର୍ମ ଅଭିଯୋଗ

ନନ୍ଦିଘୋଷ ବ୍ୟୁରୋ: ରାଜ୍ୟରେ ଆଇନଶୃଙ୍ଖଳା ବିପର୍ଯ୍ୟସ୍ତ । ଅପରାଧୀ, ଅସାମାଜିକ ବ୍ୟକ୍ତି ଓ ଯୌନ ରାକ୍ଷସ ମାନୁନାହାନ୍ତି ଆଇନକାନୁକ । ପ୍ରତିଦିନ ରାଜ୍ୟର ବିଭିନ୍ନ ସ୍ଥାନରୁ ଆସୁଛି, ହତ୍ୟା, ରାହାଜାନୀ, ଦୁଷ୍କର୍ମ ଭଳି ଅଭିଯୋଗ । ବିଜେପି ସରକାର ଆସିବା ପରେ ବିଭିନ୍ନ ସ୍ଥାନରୁ ଏମିତି ଅଭିଯୋଗ ଆସୁଥିବା ବେଳେ ଦେଶ ତଥା ବିଦେଶରେ ଓଡ଼ିଶା ଅପବାଦ ମୁଣ୍ଡାଉଛି । ବାରମ୍ବାର ଘଟିଚାଲିଥିବା ଜଘନ୍ୟ କାଣ୍ଡରେ ସରକାର କି ପୋଲିସ ପ୍ରଶାସନ ବ୍ରେକ୍ ଲଗାଇ ପାରୁନାହାନ୍ତି । ଏମିତି ସ୍ଥିତିରେ ରାୟଗଡ଼ା ଓ ରାଉରକେଲାରେ ଦୁଇ ଜଣ ନାବାଳିକାଙ୍କୁ ଜଙ୍ଗଲକୁ ଉଠାଇ ନେଇ ଦୁଷ୍କର୍ମ କରାଯାଇଥିବା ଅଭିଯାଗୋ ହୋଇଛି । ରାୟଗଡ଼ା ଘଟଣାରେ ପୋଲିସ ଅଭିଯୁକ୍ତକୁ ଧରିଥିବା ବେଳେ ରାଉରକେଲା ନାବାଳିକା ଗଣ ଦୁଷ୍କର୍ମର ଶିକାର ହୋଇଛନ୍ତି ।

ଜଙ୍ଗଲକୁ ଉଠାଇ ନେଲା ଦୁର୍ବୃତ୍ତ

ରାୟଗଡ଼ା ଜିଲ୍ଲା କାଶିପୁର ବ୍ଲକ ଭାଲୁମାସ୍କ ଅଞ୍ଚଳରୁ ଆସିଛି ସଙ୍ଗୀନ ଅଭିଯୋଗ । ଜଙ୍ଗଲକୁ ଛତୁ ତୋଳିବାକୁ ନାବାଳିକା ଜଣଙ୍କ ଯାଇଥିବା ବେଳେ ଅଭିଯୁକ୍ତ ତାଙ୍କୁ ଉଠାଇ ନେଇ ଜୋରଜବରଦସ୍ତ ଦୁଷ୍କର୍ମ କରିଥିବା ଅଭିଯୋଗ ହୋଇଛି । ଏନେଇ ପରିବାର ପକ୍ଷରୁ ଥାନାରେ ଅଭିଯୋଗ ପରେ ପୋଲିସ ଅଭିଯୁକ୍ତକୁ ଗିରଫ କରି କୋର୍ଟ ଚାଲାଣ କରିଛି । ସେପଟେ, ନାବାଳିକା ଜଣଙ୍କ ଘଟଣା ପରେ ବିଷ ପିଇ ଦେଇଥିଲେ । ତାଙ୍କୁ ଗୁରୁତର ଅବସ୍ଥାରେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି ।

ସୂଚନା ମୁତାବକ ନାବଳିକା ଜଣଙ୍କ ଛତୁ ତୋଳିବାକୁ ସାଙ୍ଗଙ୍କ ସହ ଜଙ୍ଗଲକୁ ଯାଇଥିବା ବେଳେ ପାଖ ଗାଁର ଅଭିଯୁକ୍ତ ଗୁରୁ ମାଝି ତାଙ୍କୁ ଉଠାଇ ନେଇ ଶାରୀରିକ ସମ୍ପର୍କ ରଖିଥିଲେ । ଆଜି ତାଙ୍କୁ ଜୋରଜବରଦସ୍ତ ମନ୍ଦିରକୁ ନେଇ ବିବାହ କରିବାକୁ ଚେଷ୍ଟା କରିଥିଲେ । ନାବାଳିକା ଜଣଙ୍କ ଏହାକୁ ବିରୋଧ କରିବା ସହ ଜଙ୍ଗଲି ବିଷ ଫଳ ଖାଇ ଦେଇଥିଲେ ।

ନାବାଳିକାଙ୍କୁ ଗଣ ଦୁଷ୍କର୍ମ

ରାଉରକେଲାରୁ ବି ଜଣେ ନାବାଳିକା ଦୁଷ୍କର୍ମର ଶିକାର ହୋଇଛନ୍ତି । ତାଙ୍କୁ ଦୁଇ ଜଣ ଯୁବକ ଗଣ ଦୁଷ୍କର୍ମ କରିଥିବା ଅଭିଯୋଗ ହୋଇଛି । ରାଉରକେଲା ସେକ୍ଟର-୩ ଅଞ୍ଚଳର ନାବାଳିକାଙ୍କୁ ଅଭିଯୁକ୍ତମାନେ ଅପହରଣ କରି ନେଇଥିଲେ । ଏହାପରେ ଦେବଗଡ଼ ଜଙ୍ଗଲକୁ ନେଇ ସେଠାରେ ଗଣ ଦୁଷ୍କର୍ମ କରିଥିଲେ । ଘଟଣା ଗତ ୭ ତାରିଖରେ ଘଟିଛି । ଏନେଇ ଥାନାରେ ଅଭିଯୋଗ ପରେ ପୋଲିସ ତନାଘନା ଆରମ୍ଭ କରିଛି ।