ଭୁବନେଶ୍ୱର: ଜୟ ଜଗନ୍ନାଥ, ରସଗୋଲା ଆମର। ଏବେ ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଜାତୀୟ ମଞ୍ଚରେ ଯେତେବେଳେ ଏହି ଦୁଇପଦ ଶୁଣିବାକୁ ମିଳିଲା, ସେତେବେଳେ ପ୍ରତିଟି ଓଡ଼ିଆଙ୍କ ଛାତି ଫୁଲି ଉଠିଥିଲା। ସମସ୍ତେ ଗର୍ବ କରିଥିଲେ ଓଡ଼ିଶାର ଗରିମାକୁ ନେଇ, ଗର୍ବ କରିଥିଲେ ନିଜ ପରମ୍ପରାକୁ ନେଇ। ସାରେଗାମାପାରେ ଏହି ଦୁଇପଦ କହି ସବୁ ଓଡ଼ିଆଙ୍କ ହୃଦୟ ଜିଣିଥିବା ଝିଅଟି ହେଉଛନ୍ତି ଆମ ଓଡ଼ିଶାର। କଟକର ଝିଅ ସ୍ଥିତିପଦ୍ମା ଦାସ।

ଏହି ଭିଡିଓ ଭାଇରାଲ ହେବା ପରେ ନନ୍ଦିଘୋଷ ଟିଭି ଷ୍ଟୁଡିଓକୁ ଆସିଥିଲେ ସ୍ଥିତିପଦ୍ମା। ସେ ତାଙ୍କର ସାରେଗାମାପାରେ ହୋଇଥିବା ସମସ୍ତ ଅନୁଭୂତିକୁ ବାଣ୍ଟିଥିଲେ ସମସ୍ତଙ୍କ ଆଗରେ। ସେ କହିଥିଲେ ସାରେଗାମାପାର ମଞ୍ଚ ଉପରକୁ ଯିବା ସମୟରେ ବହୁତ ନରଭସ ଥିଲି। କେମିତି ଓଡ଼ିଶାର ଟେକ ରଖିବି ସେହି କଥା ଭାବୁଥିଲି। ମଞ୍ଚ ଉପରକୁ ଯିବା କ୍ଷଣି ଯେତେବେଳେ ମେଣ୍ଟର ମାନେ ଜାଣିଲେ ମୁଁ ଓଡ଼ିଶାରୁ ଆସିଛି ବୋଲି ହଠାତ ହିମେସ ରେସମିୟା ସାର ସିଧା ପଚାରିଥିଲେ ରସଗୁଲା କାହାର ? ରସଗୁଲା ଓଡ଼ିଶାର ନା ବେଙ୍ଗଲର। ଏଭଳି ପ୍ରଶ୍ନ ଶୁଣିବା ପରେ ମୁଁ ଆଗ ଭାବିଥିଲି କ’ଣ କହିବି। କିଛି ସମୟ ଭାବିଲା ପରେ ମୁଁ କହିଥିଲି ଜୟ ଜଗନ୍ନାଥ ରସଗୋଲା ଆମର। ରସଗୁଲା ବେଙ୍ଗଲର ହୋଇଥାଇପାରେ ହେଲେ ରସଗୋଲା ହେଉଛି ଆମର ବୋଲି କହିଥିଲେ ସ୍ଥିତିପଦ୍ମା।

ମୁଁ କିଛି ସମୟ ଏଥିପାଇଁ ରହିଥିଲି କାରଣ ମୁଁ କେବେ ବି ଭାବି ନଥିଲି ମୋତେ ଏଭଳି ପ୍ରଶ୍ନ ପଚରାଯିବ ବୋଲି। ତାପରେ ମୋ ମୁହଁରୁ ଏମିତି ଉତ୍ତର ଶୁଣିବା ପରେ ପୁରା ମଞ୍ଚ ତାଳିମାଡ଼ରେ କମ୍ପି ଉଠିଥିଲା ବୋଲି ସ୍ଥିତିପଦ୍ମା କହିଛନ୍ତି। ସେ ଆହୁରି ମଧ୍ୟ କହିଛନ୍ତିଯେ ତାଙ୍କୁ ତାଙ୍କ ସାଙ୍ଗମାନେ କହିଥିଲେ ତାଙ୍କର ଏକ ଭିଡିଓ ଭାଇରାଲ ହେଉଛି ବୋଲି। ତେବେ ଭଡିଓ ଦେଖିବା ପରେ ନିଜକୁ ବହୁତ ଖୁସି ଅନୁଭବ କରୁଛନ୍ତି ବୋଲି ସ୍ଥିତିପଦ୍ମା କହିଛନ୍ତି। ସ୍ଥିତିପଦ୍ମା କହିଛନ୍ତି ମୁଁ ଯାହା କହିଛି ତାହା ଓଡ଼ିଶାର ପ୍ରତିଟି ଲୋକଙ୍କର ଶବ୍ଦ। ଓଡ଼ିଶାର ଯାହାକୁବି ପଚାରିବେ ସେ ସେହି ସମାନ କଥାହିଁ କହିବେ। ମୋତେ ଖାଲି ଗୋଟେ ସୁଯୋଗ ମିଳିଲା ଜାତୀୟ ମଞ୍ଚରେ କହିବା ପାଇଁ। ମୁଁ ମଧ୍ୟ ଚାହୁଁଥିଲି ଜାତୀୟ ମଞ୍ଚରେ ଏମିତି କିଛି ଓଡ଼ିଆ କହିବା ପାଇଁ ବୋଲି ସେ କହିଛନ୍ତି। ରସଗୋଲା ଖାଲି ଆମର କହିଲେ ଚଳିବନି। ସରଗୋଲା ହେଉଛି ଜଗାର ଆଉ କାଳିଆ ଠାକୁର ଜଗା ହେଉଛି ଆମର। ସେଥିପାଇଁ ଜୟ ଜଗନ୍ନାଥ ରସଗୋଲା ଆମର।

ମିଠାଯୁଦ୍ଧରେ ଓଡ଼ିଶା ଜିତିଥିଲେ ବି ରସଗୋଲା ବେଙ୍ଗଲର ନା ଓଡ଼ିଶାର, ଅନେକ ଏଥିରେ ସନ୍ଦେହରେ ରୁହନ୍ତି । ରସଗୋଲାକୁ ଜିଆଇ ଟ୍ୟାଗ ମିଳିଛି ସତ, ହେଲେ ଏବେବି ରସଗୋଲା କାହାର ବୋଲି ଅନେକ ପଚାରନ୍ତି । କିନ୍ତୁ ସଙ୍ଗୀତ ମଞ୍ଚରେ ରସଗୋଲାକୁ ନେଇ ଜଜ୍ ପଚାରିଥିବା ପ୍ରଶ୍ନର ଉତ୍ତମ ଜବାବ ଦେଇଥିଲେ କଟକର ଝିଅ ସ୍ଥିତିପଦ୍ମା । ଅନେକ ପ୍ରତିଯୋଗୀ ରସଗୋଲା କୋଲକାତା ଓ ପଶ୍ଚିମବଙ୍ଗର ବୋଲି କହିଥିଲେ । ସ୍ଥିତିପଦ୍ମା କିନ୍ତୁ କହିଥିଲେ ଜୟ ଜଗନ୍ନାଥ, ରସଗୋଲା ଆମର । ରସଗୋଲା ପ୍ରତିଟି ଓଡ଼ିଆଙ୍କର ପ୍ରିୟ । ପ୍ରତିଟି ଓଡ଼ିଆଙ୍କ ପରିଚୟ । ରସଗୋଲା କେବଳ ଓଡ଼ିଆଙ୍କ ହାଣ୍ଡିଶାଳ, ଦୋକାନ ବଜାର ଓ ପର୍ବପର୍ବାଣୀରେ ସୀମିତ ନୁହେଁ, ଏହା ଓଡ଼ିଶାର ଧର୍ମ, ସଂସ୍କୃତି , ପରମ୍ପରା ଓ ଇତିହାସର ଏକ ଅଭିନ୍ନ ଅଙ୍ଗ । ରସଗୋଲା ସ୍ଵାଦରେ ସମସ୍ତେ ବିଭୋର । ନୀଳାଦ୍ରି ବିଜେ ସମୟରେ ପ୍ରଭୁ ଜଗନ୍ନାଥ, ପ୍ରାଣପ୍ରିୟା ଅଭିମାନିନୀ ମହାଲକ୍ଷ୍ମୀଙ୍କୁ ରସଗୋଲା ଖୁଆଇ ମାନଭଞ୍ଜନ କରିବାର ପରମ୍ପରା ରହିଛି । ଏଥିପାଇଁ ରାଜ୍ୟରେ ପ୍ରତିବର୍ଷ ନୀଳାଦ୍ରି ବିଜେ ତିଥିରେ ରସଗୋଲା ଦିବସ ପାଳନ କରାଯାଏ ।

ସମ୍ବଲପୁର: ଏବେବି କରୋନା ପ୍ରକୋପ ଦୂର ହୋଇନାହିଁ, କିନ୍ତୁ ବାରମ୍ବାର ହେଉଛି ନିୟମ ଉଲ୍ଲଂଘନ। ପୋଲିସର ନାକତଳେ ଫୁଟିଲା ବାଣ, ବାଜିଲା ଡିଜେ। କୋଭିଡ୍‌ ଗାଇଡ୍‌ଲାଇନକୁ ଉଲ୍ଲଂଘନ କଲେ ବରଯାତ୍ରୀ। ସମ୍ବଲପୁର ଜିଲ୍ଲା ଗୋଶାଳା ଫାଣ୍ଡି ବଉଦିଆପଡ଼ାରେ ଏଭଳି ଘଟଣା ଘଟିଛି। ଗତକାଲି ରାତି ୯ଟାରୁ ୧୦ଟା ଭିତରେ ବଉଦିଆପଡ଼ାକୁ ବରଯାତ୍ରୀ ଆସିଥିଲେ। ହେଲେ କୋଭିଡ୍‌ କଟକଣା ଭିତରେ ବାହାଘର ତ ଦୂରର କଥା, ଡିଜେ ଓ ବାଣ ରୋଶଣୀରେ କମ୍ପିଥିଲା ଖଣ୍ଡମଣ୍ଡଳ। ଡିଜେର ତାଳେ ତାଳେ ରଙ୍ଗିନ ଆଲୁଅରେ ଝୁମିଥିଲେ ବରଯାତ୍ରୀ।

କେହି କୋଭିଡ୍‌ ନିୟମ ପାଳନ କରିନଥିଲେ। ପାଖରେ ଥିବା ଗୋଶାଳା ଫାଣ୍ଡି ପୋଲିସ ଏହି ଘଟଣାର କେମିତି ଟେର ପାଇଲାନି ତାହା ସବୁଠାରୁ ବଡ ପ୍ରଶ୍ନ ସୃଷ୍ଟି କରିଛି। ବରଯାତ୍ରୀ କେଉଁ ସାହସ ଓ କାହା ବଳରେ ସାଙ୍ଗରେ ଡିଜେ, ରଙ୍ଗୀନ ଆଳୁଅ ଓ ବାଣ ନେଇ ଆସିଥିଲେ ? ପୋଲିସ ଜାଣିକି ଅଜଣା ରହିଲା ନା ମନା କରିବାକୁ ସାହସ ଜୁଟାଇ ପାରିଲାନି, ଏବେ ଏହି ପ୍ରଶ୍ନ ସୃଷ୍ଟି ହୋଇଛି।

ଭୁବନେଶ୍ୱର: ଗୋଟିଏ ବାପାର କୋହଭରା କଣ୍ଠରେ ଅଭିଯୁକ୍ତକୁ ଫାଶୀ ପାଇଁ ଦାବି। ଗଣମାଧ୍ୟମ ଆଗରେ ହାତଯୋଡ଼ି ମୋ ଝିଅକୁ ଅଜଥାରେ ବଦନାମ ନ କରିବା ପାଇଁ ଗୁହାରି। ମମିତା ମେହେର ହତ୍ୟା ମାମଲାରେ ଅଭିଯୁକ୍ତ ଗୋବିନ୍ଦ ସାହୁକୁ ଫାଶୀ ଦିଆଯାଉ ବୋଲି ଗୁହାରି କରିଛନ୍ତି ମମିତାଙ୍କ ବୁଢ଼ା ବାପା। ଆଖିରେ ଛଳ ଛଳ ଲୁହ ଏବଂ ହାତ ଯୋଡ଼ି ନ୍ୟାୟ ପାଇଁ ଗୁହାରୀ।

ଅଭିଯୁକ୍ତକୁ ପୋଲିସ ଗିରଫ କରିଥିବା ବେଳେ, ତଦନ୍ତ ପ୍ରକ୍ରିୟାରେ ସନ୍ତୁଷ୍ଟ ଅଛନ୍ତି ପରିବାର ଲୋକ। ଅଭିଯୁକ୍ତ ଗୋବିନ୍ଦ ସାହୁକୁ ଫାଶୀ ଦେବାକୁ ଦାବି କରିଛନ୍ତି ମମିତାଙ୍କ ବାପା। ତାଙ୍କ ଝିଅ ମମିତାକୁ ନ୍ୟାୟ ପ୍ରଦାନ କରିବାକୁ ସେ ନିବେଦନ କରିଛନ୍ତି। ହେଲେ ମୋ ଝିଅକୁ ନେଇ ଯେଉଁଭଳି ଭାରେ ରାଜନୀତି ହେଉଛି ତାକୁ ବନ୍ଦ କରାଯାଉ। ରାଜନୀତି ନକରିବାକୁ ହାତ ଯୋଡ଼ି ନିବେଦନ କରିଛନ୍ତି ମମିତାଙ୍କ ବାପା। ଏମିତି ରାଜନୀତି ହେଲେ ମୋଝିଅ ନ୍ୟାୟ ପାଇବ ନାହିଁ। ତେଣୁ ରାଜନୀତିକୁ ବନ୍ଦ କରି ମୋ ଝିଅକୁ ନ୍ୟାୟ ଦିଅନ୍ତୁ ବୋଲି କରିଛନ୍ତି ମମିତା ମେହେରଙ୍କର ବାପା।

ଭୁବନେଶ୍ୱର: ଦୁର୍ନୀତି ନିବାରଣ ସଚେତନତା ସପ୍ତାହ ପାଳନ ଅବସରରେ ମୁଖ୍ୟମନ୍ତ୍ରୀଙ୍କ ବାର୍ତ୍ତା। ଅକ୍ଟୋବର ୨୬ରୁ ନଭେମ୍ବର ୧ ଯାଏ ଦୁର୍ନୀତି ନିବାରଣ ସଚେତନତା ସପ୍ତାହ ପାଳନ ହେଉଛି। ଦୁର୍ନୀତି ନିବାରଣ ଅଭିଯାନରେ ସଂକଳ୍ପବଦ୍ଧ ଓ ଉତ୍ସର୍ଗୀକୃତ ଭାବେ ସାମିଲ ହୋଇ ଉତ୍ତମ ସମାଜ ଗଠନରେ ସହାୟକ ହେବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆହ୍ୱାନ  ଦେଇଛନ୍ତି।

ବିକାଶ ଓ ପ୍ରଗତି ପଥରେ ଦୁର୍ନୀତି ପ୍ରମୁଖ ଅନ୍ତରାୟ। ବିକାଶ ଓ ଜନକଲ୍ୟାଣମୂଳକ କାର୍ଯ୍ୟର ସୁଫଳ ଲୋକଙ୍କ ପାଖରେ ପହଞ୍ଚାଇବା ଦିଗରେ ଦୁର୍ନୀତି ବଡ଼ ପ୍ରତିବନ୍ଧକ। ଦୁର୍ନୀତି ମଧ୍ୟ ସୁଶାସନ, ସାମାଜିକ ସଂହତି ତଥା ବ୍ୟକ୍ତି ମର୍ଯ୍ୟାଦା ଓ ଅଧିକାରର ପରିପନ୍ଥୀ। ରାଜ୍ୟ ସରକାର ଦୁର୍ନୀତି ବିରୋଧରେ କଠୋର ଆଭିମୁଖ୍ୟ ଗ୍ରହଣ କରିବା ସହ ସ୍ୱଚ୍ଛତା ଏବଂ ଶୂନ୍ୟ ସହିଷ୍ଣୁତା ଉପରେ ପ୍ରାଧାନ୍ୟ ଦେଇଆସୁଛନ୍ତି।

ଦୁର୍ନୀତି ବିରୋଧରେ ସଂଗ୍ରାମର ସଫଳତା ପାଇଁ ଜନଶିକ୍ଷା ଓ ସଚେତନତା ତଥା ଗୋଷ୍ଠୀଗତ ସହଯୋଗ ଅତ୍ୟନ୍ତ ଆବଶ୍ୟକ। ଦୁର୍ନୀତି ବିରୋଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ପାଇଁ ରାଜ୍ୟ ଦୁର୍ନୀତି ନିବାରଣ ବିଭାଗକୁ ଅଭିନନ୍ଦନ ଜଣାଇଛନ୍ତି ମୁଖ୍ୟମନ୍ତ୍ରୀ । ଦୁର୍ନୀତିମୁକ୍ତ ସମାଜ ଗଠନ ସହ ରାଜ୍ୟବାସୀଙ୍କ ସର୍ବାଙ୍ଗୀନ ଉନ୍ନତି ପାଇଁ ସମାଜର ସବୁବର୍ଗର ଆକୁଣ୍ଠ ସମର୍ଥନ, ସହଯୋଗ ଓ ସହଭାଗିତା କାମନା କରିଛନ୍ତି ମୁଖ୍ୟମନ୍ତ୍ରୀ।