କଟକ: ନିଆଳି କୃଷ୍ଣପ୍ରସାଦ ପଞ୍ଚାୟତ ସାତଙ୍ଗ ଗାଁ ପୋଖରୀରୁ ମାଆ ଓ ୭ ବର୍ଷ ପୁଅଙ୍କ ମୃତଦେହ ଉଦ୍ଧାର । ଗାଁର ବନ୍ଧୁମଣୀ ପଣ୍ଡାଙ୍କ ଝିଅ ଓ ନିଜ ପୁଅକୁ ଧରି ବିଶ୍ବନାଥ ମନ୍ଦିର ଦର୍ଶନ ପାଇଁ ଯାଇଥିଲେ । ଫେରିବା ବାଟରେ ଏକ ପୋଖରୀକୁ ଶୌଚ ପାଇଁ ଯାଇ ପାଣିରେ ବୁଡି ଯାଇଥିଲେ ବୋଲି କୁହାଯାଉଛି । ଏପଟେ ମାଆ ଓ ପୁଅଙ୍କ ମୃତ୍ୟୁକୁ ନେଇ ସନ୍ଦେହ ଉପୁଜିଛି । ଖବର ପାଇ ନିଆଳି ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇବା ସହ ତଦନ୍ତ ଆରମ୍ଭ କରିଛି ।
ଉପଜିଲ୍ଲାପଳଙ୍କ ଅଫିସ୍ କିରାଣିଙ୍କ ଘରେ ଭିଜିଲାନ୍ସ ଚଢ଼ାଉ
ବଲାଙ୍ଗିର: ଆୟବହିର୍ଭୁତ ସଂପତ୍ତି ଠୁଳ ଅଭିଯୋଗରେ ଭିଜିଲାନ୍ସ ଜାଲରେ ସୋନପୁର ଉପଜିଲ୍ଲାପାଳଙ୍କ ଅଫିସର ମୁଖ୍ୟ କିରାଣି ରମେଶ ପ୍ରସାଦ ନାଗ । ରମେଶ ତାଙ୍କ ୩୨ ବର୍ଷ ଚାକିରି କାଳରେ କୋଟି କୋଟି ଟଙ୍କା ଆୟ ବହିର୍ଭୁତ ସମ୍ପତି ଠୁଳ କରିଥିବା ଅଭିଯୋଗ ପରେ ଭିଜିଲାନ୍ସ ବିଭାଗ ଏକକାଳୀନ ୩ଟି ସ୍ଥାନରେ ଚଢ଼ାଉ କରିଛି । ବଲାଙ୍ଗିର ଭିଜିଲାନ୍ସ ଡିଏସପି ସଦାନନ୍ଦ ପାଣିଙ୍କ ନେତୃତ୍ୱରେ ସମ୍ବଲପୁର ଓ ସୋନପୁର ଭିଜିଲାନ୍ସ ବିଭାଗ ପକ୍ଷରୁ ଚଢ଼ାଉ କରାଯାଇଛି
ରମେଶଙ୍କ ଶାନ୍ତିପଡା ବାସଭବନ, ତାଲପାଳିପଡା ପୈତୃକ ବାସଭବନ ସମେତ ସୋନପୁର ଅଫିସରେ ଚଢ଼ାଉ କରାଯାଇଛି । ତାଲପାଳିପଡାରେ ଏକ ସରକାରୀ ଜମିକୁ ତାଙ୍କ ପରିବାର ଅକ୍ତିଆର କରି ରଖିଥିବା ଭିଜିଲାନ୍ସ ତଦନ୍ତରୁ ଜଣାପଡିଛି । ତାଙ୍କ ଘରୁ ଟଙ୍କା, ସୁନା ଗହଣା ସହ ଗୁରୁତ୍ତ୍ୱପୂର୍ଣ୍ଣ କାଗଜପତ୍ର ଜବତ କରିଛି ଭିଜିଲାନ୍ସ । ବ୍ୟାଙ୍କ ଲକରରେ କିଛି ସୁନା ଗହଣା ଓ ଗୁରୁତ୍ୱପୂର୍ଣ୍ଣ କାଗଜପତ୍ର ଥିବା ଭିଜିଲାନ୍ସ ଜାଣିବାକୁ ପାଇଛି । ବ୍ୟାଙ୍କକୁ ଯାଇ ତାହା ମଧ୍ୟ ତଦନ୍ତ କରାଯିବ ବୋଲି ଭିଜିଲାନ୍ସ ଡ଼ିଏସପି ସଦାନନ୍ଦ ପାଣି ସୂଚନା ଦେଇଛନ୍ତି ।
ଏପଟେ ଭିଜିଲାନ୍ସ ବିଭାଗର ଆକ୍ସନ ଦେଖି ଦୁର୍ନୀତିଖୋର ସରକାରୀ ବାବୁଙ୍କ ଭିତରେ ଛନକା । ନାହିଁ ନିସ୍ତାର । ଜଣଙ୍କ ପରେ ଜଣେ ଲାଞ୍ଚଖୋର ବାବୁ ପଡୁଛନ୍ତି ଭିଜିଲାନ୍ସ ଜାଲରେ । ଅଭିଯୋଗ ଆସିବା ମାତ୍ରେ ଭିଜିଲାନ୍ସ ବିଭାଗର ଆକ୍ସନ ଆରମ୍ଭ । ଯେଉଁଠି ହାତ ମାରୁଛନ୍ତି ସେଠୁ ବାହାରୁଛି ପୁଳା ପୁଳା ଟଙ୍କା ଓ ଆୟ ବହିର୍ଭୁତ ସ୍ଥାବର, ଅସ୍ଥାବର ସମ୍ପତ୍ତି ।
ଫସର ଫାଟିଲା ଡିଲ୍, ଜୀବନ୍ତ ବଜ୍ରକାପ୍ତା ଉଦ୍ଧାର
କନ୍ଧମାଳ: ଫସର ଫାଟିଲା ବଜ୍ରକାପ୍ତା ଚୋରା ଚାଲାଣ ଡିଲ୍ । ବାଲିଗୁଡା ବନଖଣ୍ଡ ଜାକିକିଆରେ କ୍ରାଇମବ୍ରାଞ୍ଚ ଏସଟିଏଫର ଚଢ଼ାଉ, ଡିଲ୍ ପଣ୍ଡ । ଗୋଟିଏ ଜୀବନ୍ତ ବଜ୍ରକାପ୍ତା ଉଦ୍ଧାର, ୨ ବେପାରୀ ଗିରଫ ।
ଗିରଫ ଅଭିଯୁକ୍ତମାନେ ହେଲେ ବାଲିଗୁଡା ସୋନୁବାଡିର ଶିବାନନ୍ଦ ମଲ୍ଲିକ ଏବଂ ରାଷ୍ଟ୍ର ଭୋଇ । ବାଲିଗୁଡା ଡିଏଫଓଙ୍କୁ ବଜ୍ରକାପ୍ତା ହସ୍ତାନ୍ତର କରାଯାଇଛି । ବର୍ଷକ ମଧ୍ୟରେ ୨୦ ବାଘ ଛାଲ, ୧୧ ହାତୀ ଦାନ୍ତ, ୨ଟି ହରୀଣ ଛାଲ, ୭ଟି ବଜ୍ରକାପ୍ତା ଓ ୧୫ କେଜି ବଜ୍ରକାପ୍ତା କାତି ଜବତ କରିଛି ଏସଟିଏଫ୍ । ୪୫ ଅଭିଯୁକ୍ତଙ୍କୁ ଗିରଫ କରାଯାଇଛି ।
ଭୟାବହ ଅଗ୍ନିକାଣ୍ଡ, ଜଳିଗଲା ୧୨ ବଖରା ଘର
ବାଲେଶ୍ବର: ମାଣିତ୍ରୀ ବନ୍ଧସାହିରେ ଗତକାଲି ବିଳମ୍ବିତ ରାତିରେ ଘଟିଛି ଭୟାବହ ଅଗ୍ନିକାଣ୍ଡ । ନିଆଁ ଲାଗି ଲକ୍ଷାଧିକ ଟଙ୍କାର ସମ୍ପତ୍ତି ଜଳିପୋଡ଼ି ପାଉଁଶ ହୋଇଯାଇଛି । ବନ୍ଧସାହିରେ ଟିକିବନ୍ଧଙ୍କର ୧୨ ବଖରା ଘର ପୋଡି ପାଉଁଶ ହୋଇଯାଇଛି । ବିଦ୍ୟୁତ ସର୍ଟସକ୍ରିଟ ଯୋଗୁଁ ଅଗ୍ନିକାଣ୍ଡ ଘଟିଥିବା ନେଇ ସନ୍ଦେହ କରାଯାଉଛି । ଦମକଳ ବାହିନୀ ପହଁଞ୍ଚି ନିଆଁକୁ ଆୟତ୍ତ କରିଛି । ସରକାରୀ ସହାୟତା ଯୋଗାଇ ଦେବାକୁ ଅଞ୍ଚଳବାସୀ ଦାବି କରିଛନ୍ତି ।
ଶୀଘ୍ର ସରିବ ମାଷ୍ଟରକ୍ୟାଣ୍ଟିନ ଯୋଦ୍ଧା ଘୋରା ମରାମତି
ଭୁବନେଶ୍ବର: ଖୁବଶୀଘ୍ର ଶେଷ ହେବ ମାଷ୍ଟର କ୍ୟାଣ୍ଟିନ ଛକରେ ଥିବା ଯୋଦ୍ଧା ଘୋଡାର ମରାମତି କାର୍ଯ୍ୟ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ହସ୍ତକ୍ଷେପ ପରେ ଚାଲିଛି ମାଷ୍ଟର କ୍ୟାଣ୍ଟିନ ଛକର ସୌନ୍ଦର୍ଯ୍ୟକରଣ ।
ପଦ୍ମବିଭୁଷଣ ସୁଦର୍ଶନ ସାହୁଙ୍କ ପ୍ରତ୍ୟକ୍ଷ ତତ୍ୱାବଧାନରେ ସ୍ବର୍ଗତ ପଦ୍ମଶ୍ରୀ ରଘୁନାଥ ମହାପାତ୍ରଙ୍କ ନାତି ସ୍ମିତେଶ ମହାପାତ୍ର ଯୋଦ୍ଧା ଘୋଡା ଓ ଏହାର ଚତୁଃପାର୍ଶ୍ବରେ ଥିବା ନର୍ତ୍ତକୀ ମୂର୍ତ୍ତିଗୁଡିକର ମରାମତି କାର୍ଯ୍ୟ ହାତକୁ ନେଇଛନ୍ତି । ମରାମତି କାର୍ଯ୍ୟ ଶେଷ ପର୍ଯ୍ୟାୟରେ ଥିବା ବେଳେ ଆଉ ମାତ୍ର ୨ରୁ ୩ଦିନ ମଧ୍ୟରେ ଶେଷ ହେବ ।
ସେପଟେ ମାଷ୍ଟର କ୍ୟାଣ୍ଟିନ ଛକର ଗୋଲେଇ ଆକୃତି ବର୍ତ୍ତମାନ ବଦଳି ଅଣ୍ଡାକୃତି ହୋଇସାରିଛି । ଖୁବଶୀଘ୍ର ମାଷ୍ଟର କ୍ୟାଣ୍ଟିନ ଛକର ସୌନ୍ଦର୍ଯ୍ୟକରଣ କାର୍ଯ୍ୟ ଶେଷ ହେବା ସହ ଏହା ସ୍ମାର୍ଟସିଟି ଭୁବନେଶ୍ୱରର ଅନ୍ୟତମ ପ୍ରମୁଖ ଦର୍ଶନୀୟ ସ୍ଥାନ ରୂପେ ପରିଗଣିତ ହେବ ।
ୟୁପି ନିର୍ବାଚନ ଜିତିବା ପାଇଁ ଆଜି ଦିଲ୍ଲୀରେ ରଣନୀତି କରିବ ବିଜେପି
ନୂଆଦିଲ୍ଲୀ: ଉତ୍ତରପ୍ରଦେଶ ବିଧାନସଭା ନିର୍ବାଚନ ପାଇଁ ଏପର୍ଯ୍ୟନ୍ତ ତାରିଖ ଘୋଷଣା ହୋଇନାହିଁ । କିନ୍ତୁ ଉତ୍ତରପ୍ରଦେଶରେ ରାଜନୖତିକ ସରଗରମ ଆରମ୍ଭ ହୋଇସାରିଛି । ଉତ୍ତରପ୍ରଦେଶ ବିଧାନସଭା ନିର୍ବାଚନ ଜିତିବା ପାଇଁ ଭାରତୀୟ ଜନତା ପାର୍ଟି ତା’ର ଚେଷ୍ଟା ଆରମ୍ଭ କରିସାରିଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କଠାରୁ ଆରମ୍ଭ କରି ଗୃହମନ୍ତ୍ରୀ ଅମିତ ଶାହାଙ୍କ ସହ ବରିଷ୍ଠ ବିଜେପି ନେତା ଗୋଟିଏ ପରେ ଗୋଟିଏ ୟୁପି ଗସ୍ତ କରି ସେଠାରେ ବିଜେପିର ମାହୋଲ ବନାଇବାରେ ଚେଷ୍ଟା କରୁଛନ୍ତି । ତେବେ ଗୁରୁବାର ଦିଲ୍ଲୀରେ ୟୁପି ନିର୍ବାଚନର ରଣନିତୀ ପାଇଁ ଗୁରୁତ୍ବପୂର୍ଣ୍ଣ ବୈଠକ ବସିବ । ଯେଉଁ ବୈଠକରେ ଭାରତୀୟ ଜନତା ପାର୍ଟିର ବରିଷ୍ଠ ନେତା କାର୍ଯ୍ୟକ୍ରମ ଓ ମୁଦ୍ଦା ଆଧାରରେ ପ୍ରଚାର ଓ ନିର୍ବାଚନ ଅଭିଯାନକୁ ନେଇ ମନ୍ଥନ କରାଯିବ ।

୨୦୨୨ ୟୁପି ନିର୍ବାଚନକୁ ନେଇ ଦିଲ୍ଲୀରେ ହେବାକୁ ଥିବା ବୈଠକରେ ବିଜେପି ଅଧ୍ୟକ୍ଷ ଜେପି ନଡ୍ଡା, ସଂଗଠଡ଼ ମହାମନ୍ତ୍ରୀ ବିଏଲ ସନ୍ତୋଷ, ୟୁପି ପ୍ରଭାରୀ ରାଧାମୋହନ ସିଂହ, ୟୁପି ନିର୍ବାଚନ ପ୍ରଭାରୀ ର୍ଧମେନ୍ଦ୍ର ପ୍ରଧାନ, ୟୁପି ବିଜେପି ପ୍ରଦେଶ ଅଧ୍ୟକ୍ଷ ସ୍ବତନ୍ତ୍ର ଦେବ ସିଂହ ଏବଂ ୟୁପି ସଂଗଠନ ମହାମନ୍ତ୍ର ସୁନୀଲ ବଂସଲ ଉପସ୍ଥିତ ରହିବେ । ଭାରତୀୟ ଜନତା ପାର୍ଟି ୟୁପିରେ ୨୦୧୭ ପରି ୩୦୦ରୁ ଅଧିକ ସିଟ୍ ଜିତିବା ପାଇଁ ଲକ୍ଷ୍ୟ ରଖିଛି । କିନ୍ତୁ ଦୁଇ- ତିନି ଦଶନ୍ଧି କଥା ଯଦି ଦେଖିବା ତାହାଲେ କ୍ଷମତାରେ ଥିବା ପାର୍ଟି ନିର୍ବାଚନ ଜିତି ପାରିନାହିଁ । ଏପରି ସ୍ଥିତିରେ ବିଜେପି ୨୦୨୨ ନିର୍ବାଚନକୁ ଜିତି ଇତିହାସ ରଚିବାକୁ ଚେଷ୍ଟା କରିବ ବିଜେପି ।

ଜେପି ନଡ୍ଡା ୟୁପି ନିର୍ବାଚନ ରଣନୀତି ପାଇଁ ଆଜି କାର୍ଯ୍ୟକର୍ତ୍ତାଙ୍କୁ ନିର୍ବାଚନ ପାଇଁ ମନ୍ଥନ କରିବେ । ଜେପି ନଡ୍ଡା ଆସନ୍ତା ସପ୍ତାହରେ ଦୁଇ ଦିନ ପାଇଁ ଉତ୍ତରପ୍ରଦେଶ ଗସ୍ତରେ ଯିବେ । ଏହି ସମୟରେ ସେ ବୁଥ୍ କାର୍ଯ୍ୟକର୍ତ୍ତଙ୍କୁ ନିର୍ବାଚନ ଜିତିବା ପାଇଁ ମନ୍ତ୍ର ଦେବେ । ଜେପି ନଡ୍ଡା ୨୨ ନଭେମ୍ବରରେ ଗୋରଖପୁରରେ ପାର୍ଟିର ବୁଥ୍ ଅଧ୍ୟକ୍ଷଙ୍କ ସହ ବୈଠକ କରିବେ । ସେହିପରି ନଭେମ୍ବର ୨୩ରେ ନଡ୍ଡା କାନପୁର ଅନ୍ତର୍ଗତ ଥିବା ଜିଲ୍ଲାର ସବୁ ବୁଥ୍ ଅଧ୍ୟକ୍ଷଙ୍କ ସହ ବୈଠକ କରି ନିର୍ବାଚନର ସମୀକ୍ଷା କରିବେ । ବୁଥ୍ ଜିତିଲେ ନିର୍ବାଚନ ଜିତିବା । ଏହି ମନ୍ତ୍ରକୁ ଆଧାର କରି ବିଜେପି ଅଧ୍ୟକ୍ଷ ଜେପି ନଡ୍ଡା ବୁଥ୍ ଅଧ୍ୟକ୍ଷଙ୍କ ସହ ଆଲୋଚନା କରିବାର କାର୍ଯ୍ୟକ୍ରମ ରହିଛି ।

ବିଜେପି ଅଧ୍ୟକ୍ଷଙ୍କ ପରି ପ୍ରଧାନମନ୍ତ୍ରୀ ମଧ୍ୟ ୟୁପି ନିର୍ବାଚନ ପାଇଁ ରଣନିତୀ ଆପଣେଇ ସାରିଛନ୍ତି । ନିର୍ବାଚନକୁ ଆଖି ଆଗରେ ରଖି ଉତ୍ତରପ୍ରଦେଶରେ ବିଭିନ୍ନ ପ୍ରକଳ୍ପର ଶିଳାନ୍ୟାସ କରିବା ସହ ବିଭିନ୍ନ ପ୍ରକଳ୍ପର ଉଦଘାଟନ କରିଛନ୍ତି । ପୂର୍ବାଞ୍ଚଳ ଏକ୍ସପ୍ରେସ ଓ୍ବେର ଉଦଘାଟନ ପରେ ଏବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୧୯ ନଭେମ୍ବର ଝାଂସୀରେ ଅନୁଷ୍ଠିତ ହେଉଥିବା କାର୍ଯ୍ୟକ୍ରମର ମଧ୍ୟ ଯୋଗ ଦେବେ । ଏହା ପରେ ୨୫ ନଭେମ୍ବରରେ ମୋଦି ଜେବର ଏୟାରପୋର୍ଟର ଶିଳାନାସ୍ୟ ମଧ୍ୟ କରିବେ । ସେହିପରି ବାରଣାସୀରେ ଡିସେମ୍ବର ୧୩ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କାଶୀ ବିଶ୍ବନାଥ କୋରିଡରର ଉଦଘାଟନ ମଧ୍ୟ କରିବେ ।
ନାବାଳିକା ଅପହରଣ ଅଭିଯୋଗରେ ୩ ଗିରଫ
ସମ୍ବଲପୁର: ନାବାଳିକାକୁ ଅପରହଣ କରି ଟଙ୍କା ମାଗିବା ଅଭିଯୋଗରେ ୩ ଜଣ ଗିରଫ । ଘଟଣା ଘଟିଛି ରେଙ୍ଗାଲି ଥାନା ଅଞ୍ଚଳରେ । ଗିରଫ ଅଭିଯୁକ୍ତମାନେ ହେଲେ ଭରତ ନାଏକ, ସାରଙ୍ଗ ନାଏକ ଏବଂ ରାଜେନ୍ଦ୍ର ଧୁରୁଆ । ଅଭିଯୁକ୍ତଙ୍କୁ ଧରିବାକୁ ପୋଲିସ ୨ଟି ଟିମ୍ ଗଠନ କରିଥିଲା । ଅଭିଯୁକ୍ତଙ୍କୁ କୁଚିଣ୍ଡା ପୁରୁଣାପାଣି ଜଙ୍ଗଲରୁ ମୋବାଇଲ ଟ୍ରାକିଂ ସାହାଯ୍ୟରେ ଗିରଫ କରିଛି ପୋଲିସ ।
ଅଭିଯୁକ୍ତମାନେ ଗତ ୪ ତାରିଖ ସନ୍ଧ୍ୟାରେ ନାବାଳିକାକୁ ଅପହରଣ କରି ଜଙ୍ଗଲରେ ଲୁଚାଇଥିଲେ । ୧୫ ତାରିଖରେ ଫୋନ୍ କରି ନାବାଳିକାର ଭାଇକୁ ୪ ଲକ୍ଷ ଟଙ୍କା ଦାବି କରିଥିଲେ । ନାବାଳିକାକୁ ଅପହରଣ କରିବା ପଛରେ ପୁଅ ଭରତକୁ ସହଯୋଗ କରିଥିଲା ବାପା ସାରଙ୍ଗ । ଜଙ୍ଗଲରେ ଦୁଇ ସପ୍ତାହ ରହିବା ପରେ ନାବାଳିକାକୁ ଉଦ୍ଧାର କରିଛି ପୋଲିସ । ଅଭିଯୁକ୍ତଙ୍କଠାରୁ କିଛି ଆପତ୍ତିଜନକ ଜିନିଷ ଉଦ୍ଧାର କରିଛି ପୋଲିସ ।





