ନନ୍ଦିଘୋଷ ବ୍ୟୁରୋ: ଧାନ ବିକିବାକୁ ପଞ୍ଜିକରଣ ନେଇ ଜାରି ରହିଛି ରାଜନୈତିକ ବୟାନବାଜି । ଧାନ ବିକ୍ରି କରିବା ପ୍ରସଙ୍ଗରେ ଦଲାଲ ଚିହ୍ନଟ କରିବା ସମୟରେ ପ୍ରକୃତ ଚାଷୀ ଯେମିତି ବାଦ ନପଡ଼ିବେ ତାକୁ ଗୁରୁତ୍ବ ଦେବାକୁ ଦାବି କରିଛି ବିଜେଡି। ଏହାସହ ଅନଲାଇନ ପଞ୍ଜୀକରଣ ଲାଗି ନୂଆ ନିୟମ ଚାଷୀଙ୍କ ତଣ୍ଟିରେ କଣ୍ଟା ସାଜିଛି । ସରକାରଙ୍କ ଏପରି ନିଷ୍ପତ୍ତିରେ ଲକ୍ଷ ଲକ୍ଷ ଚାଷୀ ଧାନ ବିକ୍ରି କରିବାକୁ ବଂଚିତ ହେବେ ବୋଲି ବିଜେଡି କହିଛି । କଂଗ୍ରେସ ସାଟେଲାଇଟ ସର୍ଭେକୁ ନେଇ ସନ୍ଦେହ ପ୍ରକାଶ କରିଛି। ଶାସକ ଦଳ ମଧ୍ୟ ପଞ୍ଜୀକରଣ ପ୍ରକ୍ରିୟାକୁ ସରଳୀକରଣ କରିବାକୁ ସରକାରଙ୍କୁ ଅନୁରୋଧ କରିଛନ୍ତି ବୋଲି କହିଛନ୍ତି।
ପଞ୍ଜିକରଣ ସାଜିଛି କଣ୍ଟା । ଧାନବିକ୍ରିରୁ ବାଦ ପଡିବେ ଲକ୍ଷ ଲକ୍ଷ ଚାଷୀ । ଚାଷୀଙ୍କ ପାଇଁ ଶାସକ ଓ ବିରୋଧୀଙ୍କ ସ୍ବର ଏକ । ନୂଆ ନିୟମକୁ କୋହଳ କରିବାକୁ ସଭିଁଙ୍କ ଦାବି । ସ୍ବଚ୍ଛତା ପାଇଁ ବଳି ନପଡନ୍ତୁ ପ୍ରକୃତ ଚାଷୀ। ଧାନ ପଞ୍ଜିକରଣରେ ନୂଆ ନିୟମ ଚାଷୀଙ୍କ ପାଇଁ କଣ୍ଟା ସାଜିଛି। ରାଜ୍ୟ ସରକାରଙ୍କ ନୂଆ ନିୟମ ପାଇଁ ଖରିଫ ଧାନ ବିକ୍ରି କରିବାରୁ ବଂଚିତ ହେବେ ଲକ୍ଷ ଲକ୍ଷ ଚାଷୀ । ଯାହାକୁ ନେଇ ପ୍ରଶ୍ନ ଉଠାଇଛି ବିଜେଡି । ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ କହିଛନ୍ତି ଯେ ଧାନ ବିକ୍ରିରେ ଦଲାଲ ମୁକ୍ତ କରାଯାଉ । ହେଲ ସ୍ବଚ୍ଛତା ଆଳରେ ପ୍ରକୃତ ଚାଷୀ ଯେମିତି ଧାନ ବିକ୍ରି କରିବାବୁ ବଂଚିତ ନହୁଅନ୍ତି ତାକୁ ଗୁରୁତ୍ବ ଦେବାକୁ ମୁଖ୍ୟ ବିରୋଧୀ ବିଜେଡି ଦାବି କରିଛି । ଧାନକିଣାରେ ସରକାରଙ୍କ ନୂଆ ନିୟମ ବହୁତ ଜଟିଳ ହୋଇଥିବାରୁ ଚାଷୀମାନେ ନାହିଁ ନଥିବା ଅସୁବିଧାର ସମ୍ମଖୀନ ହେଉଛନ୍ତି ବୋଲି ବିଜେଡି କହିଛି । ଶାସକ ବିଜେପି ବିଧାୟକ ଅଶୋକ ମହାନ୍ତି ଧାନ ପଞ୍ଚିକରଣର ନୂଆ ନିୟମକୁ କୋହଳ କରିବା ସପକ୍ଷରେ ସ୍ବର ଉଠାଇଛନ୍ତି । ପଞ୍ଜୀକରଣ ସରଳ କରିବାକୁ ସରକାରଙ୍କ ଦୃଷ୍ଟି ଆକର୍ଷଣ କରାଯାଇଛି ବୋଲି ସେ କହିଛନ୍ତି ।
ଗତ ଥର କିଛି ଫେକ ଚାଷୀ ପଞ୍ଜୀକରଣ କରି ଧାନ ବିକ୍ରି କରିଥିଲେ । ବିଭିନ୍ନ ଅଞ୍ଚଳରେ ଜଣା ପଡ଼ିଛି ଧାନ ଯିଏ କରିଛି ସେ ଟୋକନ ପାଉନି । କିନ୍ତୁ ଧାନ ଯିଏ କରିନି ଓ ବିଲ ପଡିଆ ପଡିଛି ସେ ଟୋକନ ପାଉଛି । ଏହି ଘଟଣାପରେ ତନ୍ନ ତନ୍ନ କରି ଯାଞ୍ଚ ପାଇଁ ବିଭାଗ ନିର୍ଦ୍ଦେଶ ଦେଇଥିଲା । ତଦନ୍ତ ପରେ ୧ ଲକ୍ଷ ୮୧ ହଜାର ଏମିତି ଫେକ ଚାଷୀ ଧରାପଡିଛନ୍ତି । ଆହୁରି ମଧ୍ୟ କିଛି ଲୋକ ବାହାରିବେ । ତେଣୁ ତାଙ୍କୁ କାରଣ ଦର୍ଶଆ ନୋଟିସ କରାଯାଇଛି । କଣ ପାଇଁ ଏମିତି ଚାଷୀ ନାଁରେ ପଞ୍ଜିକରଣ କରି ସରକାରୀ ରାଜସ୍ୱ ଲୁଟ କରୁଛନ୍ତି ତାଙ୍କଠୁ ଉତ୍ତର ଆସିବା ପରେ ସେମାନେ ଅଣ୍ଡରଟେକିଙ୍ଗି ଲେଖିକି ଦେବେ । ଏହାସହ ବର୍ଷକ ପାଇଁ ଧାନ କିଣା ପ୍ରକ୍ରିୟାରୁ ବାଦ ଦିଆଯିବ । ବିଧାୟକ ତାରା ପ୍ରସାଦ ବାହିନୀପତି କିନ୍ତୁ ସମବାୟ ମନ୍ତ୍ରୀଙ୍କ ଯୁକ୍ତିକୁ ନେଇ ପ୍ରଶ୍ନ ଉଠାଇଛନ୍ତି । ଫସଲ ଅମଳ ପରେ ସାଟେଲାଇଟ ସର୍ଭେରେ ଚାଷ ଜମି ବଦଳରେ ପାହାଡ ଦେଖାଯାଇଥିବା ଜଣାପଡ଼ୁଛି । ତେଣୁ ଚାଷୀ ଅଯଥାରେ ହଇରାଣ ହେଉଛନ୍ତି ବୋଲି ତାରା ଅଭିଯୋଗ କରିଛନ୍ତି । ଅନ୍ୟପଟେ ବିଜେଡି ବିଧାୟକ ରାଜେନ୍ଦ୍ର ଢୋଲକିଆ କହିଛନ୍ତି ଚାଷୀ ସମସ୍ୟା କଥା ଆଗାମୀ ବିଧାନସଭା ଅଧିବେଶନରେ ବିଜେଡି ଉଠାଇବ ।
୨୦୨୫-୨୬ ଖରିଫ ଧାନ ବିକ୍ରି କରିବା ନେଇ ସରକାରଙ୍କ ନୂଆ ନିୟମକୁ ନେଇ ଉଭୟ ଶାସକ ଓ ବିରୋଧୀ ବିଧାୟକ ପ୍ରଶ୍ନ ଉଠାଇନ୍ତି । ସମସ୍ତଙ୍କର ଗୋଟିଏ ଦାବି, ପଞ୍ଚିକରଣ କରାଯାଉ ସରଳ ।
