କୋରାପୁଟ: କୋରାପୁଟ ଜିଲ୍ଲାରେ ବାତ୍ୟା ପ୍ରଭାବ। ଗୁଲାବ ପ୍ରଭାବରେ ବିଭିନ୍ନ ସ୍ଥାନରେ ଗଛ ଉପୁଡ଼ି ପଡ଼ିଥିବା ବଳେ କେତେଜ ସ୍ଥାନରେ ଭୂସ୍ଖଳନ ହୋଇଥିବା ସୂଚନା ମିଳିଛି। ଏହାସହ ବାତ୍ୟା ସମୟରେ କିଛି ଘର ଭାଙ୍ଗିଛି। ପଟାଙ୍ଗି ବ୍ଲକରେ ସର୍ବାଧିକ ୯୦ କିମି ବେଗରେ ପବନ ବୋହିବା ସହ ପ୍ରବଳ ବର୍ଷା ହୋଇଥିଲା। ପାହାଡ ଧସି ୨୬ ନଂ ଜାତୀୟ ରାଜପଥର ଶୁଙ୍କି ଘାଟି ଓ ରାଲେଗଡାଠାରେ ରାସ୍ତା ଅବରୋଧ ହୋଇଛି। ସେପଟେ ପ୍ରବଳ ବର୍ଷା ଯୋଗୁ କୋଟିଆ ଫାଟୁସେନେରି ରାସ୍ତାର ମାଡକର ପୋଲ ଉପରେ ୨ଫୁଟ ଉଚ୍ଚରେ ବର୍ଷା ଜଳ ପ୍ରବାହିତ ହେଉଛି। କୋଟିଆ ସହ ୮ ଟି ଗ୍ରାମକୁ ଯୋଗା ଯୋଗ ସମ୍ପୂର୍ଣ୍ଣ ଠପ ହୋଇଯାଇଛି। ସମ୍ବାଇ ଝାଙ୍କରଗୁଡା ରାସ୍ତାର ପୋଲ ଉପରେ ୧ ଫୁଟ ଉଚ୍ଚରେ ପାଣି ପ୍ରବାହିତ ହେଉଛି। କ୍ଷତ କ୍ଷତି ଆକଳନ ପରେ ଆବଶ୍ୟକ ପଦକ୍ଷେପ ନିଆଯିବ ବୋଲି କୋରାପୁଟ ଜିଲ୍ଲାପାଳ କହିଛନ୍ତି।
୧୩ ବର୍ଷ ବୟସରେ ସେ ଗାଉଛନ୍ତି ୧୦ ଟି ଭାଷାରେ ଗୀତ
କଟକ: ଆଦ୍ୟାଶା ଆଶାଠୁ ଅଧିକ। ଅନନ୍ୟ ପ୍ରତିଭାର ଅଧିକାରୀଣୀ। ମାତ୍ର ୧୩ ବର୍ଷରେ ୧୦ଟି ଭାଷାରେ ଗାଉଛନ୍ତି ଗୀତ। ବେଙ୍ଗଲୀ, ମରାଠି, ତେଲଗୁ, ହିନ୍ଦୀ ଓ ଓଡ଼ିଆ ସହ ଅନ୍ୟ ଭାଷାରେ ଗାଉଛନ୍ତି ସୁମଧୁର ଗୀତ। ଭିନ୍ନ ସ୍ବାଦର ସଙ୍ଗୀତ ଗାଉଥିବା କୁନି କଣ୍ଠଶିଳ୍ପୀକୁ ଏବେ ମିଳିଛି ବଡ଼ ସୁଯୋଗ। ଏମ୍ ଏମ୍ ପ୍ରଡକସନ ପକ୍ଷରୁ ପ୍ଲେ ବ୍ୟାକ୍ ସିଙ୍ଗର ଭାବେ ତୁହି ତୁ ଗୀତରେ କଣ୍ଠଦାନ କରିଛନ୍ତି। ଜଣାଶୁଣା ଗୀତିକାର ଅରୁଣ ମନ୍ତ୍ରୀ ଗୀତ ଲେଖିଥିବା ବେଳେ କଣ୍ଠଶିଳ୍ପୀ ହ୍ୟୁମାନ୍ ସାଗରଙ୍କ ସହିତ ଗୀତଟି ଗାଇଛନ୍ତି ଆଦ୍ୟାଶା।

ଆଦ୍ୟାଶାଙ୍କ ଏଭଳି ପ୍ରତିଭା ଦେଖି ନନ୍ଦିଘୋଷ ଟିଭି ପ୍ରଣାମ ଓଡ଼ିଶାରେ ତାଙ୍କୁ ଲୋକଲୋଚନକୁ ଆଣିଥିଲା। ସୁମଧୁର କଣ୍ଠଶିଳ୍ପୀଙ୍କ ସଙ୍ଗୀତ ମୁର୍ଚ୍ଛନାକୁ ନେଇ ଅନେକ ଦର୍ଶକ ବିମୋହିତ ହୋଇଥିଲେ। ଗୁରୁ ଅନୁରାଗ ପାତ୍ରଙ୍କଠାରୂ ଆଦ୍ୟାଶା ସଙ୍ଗୀତ ଶିକ୍ଷା ଗ୍ରହଣ କରିଥିବା ବେଳେ ନିଜର କଠିନ ଅଭ୍ୟାସରେ ଏବେ ପ୍ଲେ ବ୍ୟାକ୍ ସିଙ୍ଗର ଭାବେ ସୁଯୋଗ ପାଇଛନ୍ତି। ଦଶମ ଶ୍ରେଣୀରେ ପଢୁଥିବା ଆଦ୍ୟାଶା ଆଗକୁ ଆହୁରି ଭାଷାରେ ଗୀତ ଗାଇବା ସହ ସଂଗୀତ ଜଗତରେ ନିଜର ନାଁ କରନ୍ତୁ ବୋଲି ପରିବାର ଲୋକ ଆଶା ରଖିଛନ୍ତି।
ଅସୀତ ତ୍ରିପାଠୀ ହେଲେ ଭୁବନେଶ୍ୱର କ୍ଳବର ନୂଆ ସଭାପତି
ଭୁବନେଶ୍ୱର: ଭୁବନେଶ୍ୱର କ୍ଳବର ନୂଆ ସଭାପତି ଭାବରେ ନିର୍ବାଚିତ ହେଲେ ପୂର୍ବତନ ମୁଖ୍ୟ ଶାସନ ସଚିବ ଅସୀତ ତ୍ରିପାଠୀ । ନିକଟତମ ପ୍ରତିଦ୍ୱନ୍ଦୀ ବିଜୟ ପଟ୍ଟନାୟକଙ୍କ ଠାରୁ ୨୭୮ ଭୋଟରେ ବିଜୟ ଲାଭ କରିଛନ୍ତି ଅସୀତ । ୧୨୭୪ ମୋଟ ଭୋଟିଂ ହୋଇଥିବା ବେଳେ ଅସୀତ ୭୭୬ ଏବଂ ବିଜୟ ପଟ୍ଟନାୟକ ୪୯୮ ଖଣ୍ଡ ଭୋଟ ପାଇଛନ୍ତି ।

ସଭାପତି ଭାବରେ ନିର୍ବାଚିତ ପରେ ଅସୀତ ତ୍ରିପାଠୀ ନିଜ ପ୍ରତିକ୍ରିୟା ରଖିଛନ୍ତି । ଭୁବନେଶ୍ୱର କ୍ଳବ କେବଳ ରେଷ୍ଟୁରାଣ୍ଟ ଓ ବାର ହୋଇ ନରହୁ । ଯେମିତି ବଡ଼ ବଡ଼ ସହରରେ ରିକ୍ରିଏସନ, ଏଜୁକେସନ, କଲଚରାଲ କାର୍ଯ୍ୟକ୍ରମ ପାଇଁ ସୁଯୋଗ ରହିଛି ସେହିଭଳି ପ୍ରସ୍ତୁତ କରାଯିବ। ଇଣ୍ଡିଆ ଇଂଟରନେସନାଲ ସେଣ୍ଟର, ଜିମ ଖାନା କ୍ଳବ ଭଳି ଏହାକୁ ବହୁମୁଖୀ କ୍ଳବ କରିବା ପାଇଁ ମୁଁ ଓ ମୋର ଟିମ ଉଦ୍ୟମ କରିବୁ ବୋଲି ଅସୀତ ତ୍ରିପାଠୀ କହିଛନ୍ତି।

ତେବେ କ୍ଲବର ଯୁଗ୍ମ ସମ୍ପାଦକ ଭାବରେ ଅଶୋକ ମିଶ୍ର ବିଜୟ ଲାଭ କରିଛନ୍ତି । ସେ ୨୭୨ ଖଣ୍ଡ ଭୋଟରେ ବିଜୟୀ ହୋଇଛନ୍ତି । ଉପସଭାପତି ଭାବରେ ମହେନ୍ଦ୍ର ଗୁପ୍ତା ନିର୍ବାଚିତ ହୋଇଛନ୍ତି । ସେ ୨୧୦ ଖଣ୍ଡ ଭୋଟରେ ବିଜୟୀ ହୋଇଛନ୍ତି। ୧୯୪୯ରେ ପ୍ରତିଷ୍ଠା ହୋଇଥିଲା ଭୁବନେଶ୍ବର କ୍ଲବ ।
କୁନି ବୟସରେ ହାତେଇଛନ୍ତି ଇଣ୍ଡିଆ ବୁକ ରେକର୍ଡର ଟାଇଟଲ, ତାଙ୍କ ମୁହଁରେ ରହିଛି ସବୁ ପ୍ରଶ୍ନର ଉତ୍ତର
ସମ୍ବଲପୁର: ବୟସ ମାତ୍ର ୨ ବର୍ଷ ୧୦ ମାସ। ହେଲେ ବିଚକ୍ଷଣ ପ୍ରତିଭା। ନିଜର ଜ୍ଞାନ ପାଇଁ ଇଣ୍ଡିଆ ବୁକ୍ ରେକର୍ଡର ଅଧିକାରୀ। ସମ୍ବଲପୁରର ସୁଧିର ସାହୁ ଓ ସୁଶ୍ରୀ ସଙ୍ଗିତା ଜେନାଙ୍କ ଝିଅ ଶୁଭସ୍ମିତା। କଥା କହିଲେ ପାଟି ଲାଖି ଯାଉଛି। ହେଲେ ସଂସ୍କୃତ ଶ୍ଲୋକକୁ ଅନର୍ଗଳ କହି ସମସ୍ତଙ୍କ ମନ ମୋହୁଛନ୍ତି। ବିଜ୍ଞାନ ସମ୍ବନ୍ଧୀୟ ପିରିୟଡିକ ଟେବୁଲ କହି ଦେଖଣାହାରୀକୁ କରିଦେଉଛନ୍ତି ତାଜୁବ।
କେବଳ ସେତିକି ନୁହେଁ, ଇଂରାଜୀରେ ୧୧ଟି ପଶୁ, ୧୬ଟି ପନିପରିବା, ୬୦ରୁ ଉର୍ଦ୍ଧ୍ୱ ସାଧାରଣ ଜ୍ଞାନ, ପ୍ରଧାନମନ୍ତ୍ରୀ, ରାଷ୍ଟ୍ରପତି, ମୁଖ୍ୟମନ୍ତ୍ରୀ, କେନ୍ଦ୍ର ଶାସିତ ଅଞ୍ଚଳର ନାଁ ଅନର୍ଗଳ କହୁଛନ୍ତି ଶୁଭସ୍ମିତା। ବୀପରିତ ଶବ୍ଦ, ୨୮ଟି ରାଜ୍ୟର ରାଜଧାନୀ, ଶରୀରର ୨୮ ଅଙ୍ଗପ୍ରତ୍ୟଙ୍ଗର ନାଁ କହି ସେ ଏହି ଇଣ୍ଡିଆ ବୁକ ରେକର୍ଡର ଅଧିକାରୀ ହୋଇଛନ୍ତି।
ତେବେ ଝିଅର ପ୍ରତିଭା ପାଇଁ ମା ବାପା ବେଶ ଖୁସି ବୋଲି କହିଛନ୍ତି। ତେବେ ଝିଅକୁ ସବୁବେଳେ ପାଠପଢାଉଥିବା ମା ଇଣ୍ଡିଆ ବୁକରେ ଝିଅର ନାଁ ଆସିଲା ପରେ ଆଗକୁ କେମିତି ଆହୁରି ଭଲ ପାଠପଢିବ ସେନେଇ ବେଶ ପରିଶ୍ରମ କରୁଛନ୍ତି। ଯେଉଁ ବୟସରେ ପିଲା ଏବିସିଡିରେ ବ୍ୟସ୍ତ ସେହି ବୟସରେ ଏତେ ସବୁ ଶିଖିବା ନିଶ୍ଚିତ ଭାବରେ ପ୍ରଶଂସା ଯୋଗ୍ୟ।
ମହମ୍ମଦ ଅଲ୍ଲୀ ଜିନ୍ନାଙ୍କ ପ୍ରତିମୂର୍ତ୍ତୀକୁ ବମ୍ ଲଗାଇ ଉଡାଇଦେଲେ ବଲୁଚିସ୍ତାନର ଏହି ବିଦ୍ରାଦୀ ଗୋଷ୍ଠୀ
ଇସଲାମାବାଦ: ବିସ୍ଫୋରକ ଲଗାଇ ଉଡାଇଦେଲେ ପାକିସ୍ତାନର ପ୍ରଥମ ଗଭର୍ଣ୍ଣର ଜେନେରାଲ ମହମ୍ମଦ ଅଲି ଜିନ୍ନାଙ୍କ ପ୍ରତିମୂର୍ତ୍ତି । ରବିବାର ଦିନ ପାକିସ୍ତାନର ଗ୍ୱାଦାରରେ ଏହି ବୋମା ବିସ୍ଫୋରଣ ହୋଇଥିଲା । ପାକିସ୍ତାନରେ ନିଷିଦ୍ଧ ହୋଇଥିବା ବାଲୁଚ ଲିବରେସନ ଫ୍ରଣ୍ଟ ଏହି ଆକ୍ରମଣ ପାଇଁ ନିଜକୁ ଦାୟୀ କରିଛି । ସୂଚନା ଥାଉ କି ଯେ ଚୀନ୍ ଭଳି ପାକିସ୍ତାନ ପାଇଁ ମଧ୍ୟ ଏହି ସହର ଗୁରୁତ୍ୱପୂର୍ଣ୍ଣ। ଚଳିତ ବର୍ଷ ଆରମ୍ଭରେ ଗ୍ୱାଦାରର ମେରାଇନ୍ ଡ୍ରାଇଭରେ ଜିନ୍ନାଙ୍କ ପ୍ରତିମୂର୍ତ୍ତି ସ୍ଥାପିତ ହୋଇଥିଲା । ଏହି ଅଞ୍ଚଳଟି ଏକ ସୁରକ୍ଷିତ ଅଞ୍ଚଳ ଭାବରେ ବେଶ ପରିଚିତ । ଗଣମାଧ୍ୟମର ରିପୋର୍ଟ ଅନୁଯାୟୀ ମୂର୍ତ୍ତି ତଳେ ବିସ୍ଫୋରକ ଲଗାଇ ବିସ୍ଫୋରଣ କରାଯାଇଥିଲା ।

ଏହି ବିସ୍ଫୋରଣରେ ମୂର୍ତ୍ତିଟି ସମ୍ପୂର୍ଣ୍ଣ ନଷ୍ଟ ହୋଇଯାଇଥିଲା। ତେବେ ଏହି ବିସ୍ପୋରଣ ପାଇଁ ନିଷିଦ୍ଧ ସଂଗଠନ ବାଲୁଚ ରିପବ୍ଲିକାନ ଆର୍ମି ମୁଖପାତ୍ର ବାବର ବାଲୋଚ ଟ୍ୱିଟରରେ ଏହି ବିସ୍ଫୋରଣ ପାଇଁ ଦାୟୀ ବୋଲି ଦାବି କରିଛନ୍ତି। ତେବେ ଗ୍ୱାଦରର ଡେପୁଟି କମିଶନର ମେଜର (ଅବସରପ୍ରାପ୍ତ) ଅବଦୁଲ କବୀର ଖାନ କହିଛନ୍ତି ଯେ ଏହି ଘଟଣାର ଅନୁସନ୍ଧାନ କରାଯାଉଛି । ସେ କହିଛନ୍ତି ଯେ ଯେଉଁମାନେ ବିସ୍ଫୋରକ ଲଗାଇ ଜିନ୍ନାଙ୍କ ପ୍ରତିମୂର୍ତ୍ତିକୁ ନଷ୍ଟ କରିଥିଲେ ସେମାନେ ପର୍ଯ୍ୟଟକ ଭାବରେ ଏହି ଅଞ୍ଚଳରେ ପ୍ରବେଶ କରିଥିଲେ ।

ତାଙ୍କ କହିବାନୁସାରେ, ଏପର୍ଯ୍ୟନ୍ତ କୌଣସି ଗିରଫଦାରୀ ହୋଇନାହିଁ, କିନ୍ତୁ ଯାଞ୍ଚ ଏକ କିମ୍ବା ଦୁଇ ଦିନ ମଧ୍ୟରେ ଶେଷ ହେବ। ସେ କହିଛନ୍ତି ଯେ ଆମେ ସବୁ ଦିଗରୁ ଏହି ଘଟଣାର ଦୃଷ୍ଟି ରଖିଛୁ ଏବଂ ଖୁବ୍ ଶୀଘ୍ର ଦୋଷୀଙ୍କୁ ଧରାଯିବ । ଜିନ୍ନା ୧୯୧୩ ରୁ ୧୪ ଅଗଷ୍ଟ ୧୯୪୭ ପାକିସ୍ତାନ ପ୍ରତିଷ୍ଠା ପର୍ଯ୍ୟନ୍ତ ଅଲ ଇଣ୍ଡିଆ ମୁସଲିମ ଲିଗର ନେତା ଥିଲେ। ଏହା ପରେ, ସେ ୧୯୪୮ ମସିହାରେ ତାଙ୍କର ମୃତ୍ୟୁ ହୋଇଯାଇଥିଲା ।
ବର୍ଷା ଆସିଲେ ବାଲେଶ୍ୱରୀଆଙ୍କ ପାଇଁ ଦୁଃଖ ପାଲଟେ କାଂଶବାଂଶ ନଈ
ବାଲେଶ୍ୱର: ବାଲେଶ୍ବରବାସୀଙ୍କ ଦୁଃଖ ପାଲଟିଛି କାଂଶବାଂଶ। ଜିଲ୍ଲାର ସୋର, ସିମୁଳିଆ ଓ ଖଇରା ବ୍ଲକ ଦେଇ ପ୍ରବାହିତ ହେଉଛି ଏହି ନଈ। ହେଲେ ବର୍ଷା ଦିନ ଆସିଲେ ନଦୀ ଦେଉଛି କଷ୍ଟ। ନଈ କୂଳରେ ଥିବା ୪୦ ଗାଁର ୨୦ ହଜାରରୁ ଉର୍ଦ୍ଧ୍ବ ଲୋକେ ପ୍ରଭାବିତ ହୁଅନ୍ତି। ବହ୍ୟ ଜଗତରୁ ବିଛିନ୍ନ ହୁଏ ଏହି ୪୦ ଗାଁ। ନଦୀ ଗର୍ଭ ପୋତି ହେବା ସହ ପଥର ପ୍ୟାକିଂ ନଷ୍ଟ ହେବାକୁ ବସିଥିବାରୁ ଭୟର ବିତୁଛି ଲୋକଙ୍କ ଜୀବନ। ଏନେଇ ବାରମ୍ବାର ଅଭିଯୋଗ ହୋଇଛି। କାମ ପାଇଁ ଅର୍ଥ ମଧ୍ୟ ମଞ୍ଜୁର ହେଉଛି। ହେଲେ ମରାମତି ପାଇଁ ବିଭିନ୍ନ ଯୋଜନାରେ ଆସୁଥିବା ସରକାରୀ ଅର୍ଥ ବାଟମାରଣା ହେଉଥିବା ଲୋକେ ଅଭିଯୋଗ କରିଛନ୍ତି।
ପ୍ରତିବର୍ଷ ବର୍ଷା ଦିନ ଆସିଲେ ନଈ କୂଳ ଲଂଘେ। ଫଳରେ ଅଞ୍ଚଳର ଏକର ଏକର ଜମିରେ ପାଣି ପଶି ଫସଲ ନଷ୍ଟ ହୁଏ। ସେପଟେ ବିଭାଗୀୟ ଯନ୍ତ୍ରୀଙ୍କ କହିବା କଥା, ନଦୀ ଖନନ ପରେ ମାଟି ପକାଇବାକୁ ସ୍ଥାନ ନଥିବାରୁ ପାଖ ଜମିରେ ପକାଇବାକୁ ପଡୁଛି। ତେବେ ଖୁବଶୀଘ୍ର ପଥର ପ୍ୟାକିଂ କରି ମରାମତି କରାଯିବ। ନଦୀର ଉପଯୁକ୍ତ ମରାମତି କରାଗଲେ ଏହା ଉପରେ ନିର୍ଭର କରୁଥିବା ଲୋକଙ୍କ ଜୀବନ ଜୀବିକା ସୁରକ୍ଷିତ ହୋଇ ପାରନ୍ତା ବୋଲି କହିଛନ୍ତି ବୁଦ୍ଧିଜୀବୀ।
ଚାଷିଙ୍କ ପାଇଁ ଅଭିଶାପ ପାଲଟିଛି IOCLର ତୈଳ ବିଶୋଧନାଗାର, ଘଣ୍ଟ ବାଡ଼େଇ ଲୋକଙ୍କୁ କରୁଛନ୍ତି ଏକାଠି
ଭୁବନେଶ୍ୱର: ଚାଷୀଙ୍କ ପାଇଁ କାଳ ସାଜିଛି ପାରଦୀପ ଆଇଓସିଏଲ ତୈଳ ବିଶୋଧନାଗାର। ଏକର ଏକର ଜମିରି ପଶୁଛି ତେଲମିଶା ପାଣି। ନିଷ୍କାସନର ସୁବିଧା ନଥିବାରୁ ଜମିରେ ମାଡୁଛି। ଯାହାଫଳରେ ସଢି ଯାଉଛି ଧାନ ଗଛ। ଚାଷୀଙ୍କ ସୁନାର ସ୍ୱପ୍ନ ଆଇଓସିଏଲ୍ ପାଇଁ ଭାଙ୍ଗିରୁଜି ଚୁରମାର ହେଉଛି। ଏହାରି ବିରୋଧରେ ଏକାଠି ହେଲେଣି ପାରାଦୀପ ଢ଼ିଙ୍କିଆ, ତ୍ରୀଲୋଚନପୁର ଓ ବଡକଣ୍ଟା ଗ୍ରାମର ଚାଷୀ।

ଘଣ୍ଟ ବାଡେଇ ଲୋକଙ୍କୁ ଏକାଠି କରୁଛନ୍ତି ଅଞ୍ଚଳବାସୀ। କମ୍ପାନୀର ପରିଚାଳନାଗତ ତ୍ରୁଟି ଯୋଗୁଁ ଚାଷୀ ଦୁଃଖ ସହୁଥିବା ଅଭିଯୋଗ ହୋଇଛି। ଆସନ୍ତା ୧୫ ଦିନ ମଧ୍ୟରେ କ୍ଷତିପୂରଣ ସହିତ ସ୍ଥାୟୀ ସମାଧାନ କରାନଗଲେ ଆନ୍ଦୋଳନ ର ଚେତାବନୀ ଦେଇଛନ୍ତି ଲୋକେ।

ସ୍ବର୍ଣ୍ଣଗର୍ଭା କୁହାଯାଉଥିବା ବନ୍ଦର ନିକଟସ୍ଥ ଢ଼ିଙ୍କିଆ, ନୂଆଗାଁ, ଗୋବିନ୍ଦପୁର, ବାଲିତୁଠ ଅଞ୍ଚଳ ଏବେ ଆଇଓସିଏଲ ତେଲ ଯୋଗୁଁ ଶ୍ରୀହିନ ହେବାକୁ ବସିଛି। ଧାନ, ପାନ ଓ ମାଛ ଚାଷ ତେଲ ଯୋଗୁଁ ନଷ୍ଟ ହେଉଛି।

ର୍ତୈଳ ମିଶ୍ରିତ ପାଣି ଚାଷ ଜମି ସହ ନଦୀରେ ମିଶୁଛି। ବାରମ୍ବାର ଏନେଇ ଅଭିଯୋଗ ହୋଇଥିଲେ ସୁଦ୍ଧା କମ୍ପାନୀ କର୍ତ୍ତୃପକ୍ଷ ଶୁଣୁ ନଥିବା ଅଭିଯୋଗ ହୋଇଛି। ନଦୀ ଓ ଚାଷ ଜମିରେ ଏକ ତୈଳାକ୍ତ ଆସ୍ତରଣ ଜମି ରହୁଛି। ତେଣୁ ତୁରନ୍ତ ଏଥିପ୍ରତି ଦୃଷ୍ଟି ଦେବାକୁ ଦାବି ହୋଇଛି।
ଭାରତ ବନ୍ଦ ସମୟରେ ଜିଲ୍ଲାପଳଙ୍କ କାର୍ଯ୍ୟାଳୟକୁ ଧସେଇ ପଶିଲେ ଆନ୍ଦୋଳନକାରୀ
ବଲାଙ୍ଗୀର: ବଲାଙ୍ଗୀରରେ ଭାରତ ବନ୍ଦ ବେଳେ ଅପ୍ରୀତିକର ପରିସ୍ଥିତି। ଜିଲ୍ଲାପାଳଙ୍କ ପ୍ରକୋଷ୍ଠକୁ ଧସେଇ ପଶିଲେ ଆନ୍ଦୋଳନକାରୀ। ଚାଷୀ ସଂଗଠନ ଗୁଡିକ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ପ୍ରତିବାଦ ସଭା ସହିତ ଧାରଣା ଦେଇଥିଲେ। ତେବେ ଜିଲ୍ଲାପାଳ ତାଙ୍କ ଅଫିସ ପ୍ରକୋଷ୍ଠରେ ମାଜିଷ୍ଟ୍ରେଟ ଦାୟିତ୍ୱରେ ଥାଇ କାମ କରୁଥିବା ବେଳେ ଆନ୍ଦୋଳନକାରୀ ମାନେ ତୀବ୍ର ଅସନ୍ତୋଷ ପ୍ରକାଶ କରିଥିଲେ। ଏପରିକି ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖ ଫାଟକରେ ମୁତୟନ ଥିବା ସୁରକ୍ଷାକର୍ମୀଙ୍କୁ ଠେଲି ଆନ୍ଦୋଳନକାରୀ ଜିଲ୍ଲାପାଳଙ୍କ ଅଫିସ ଭିତରକୁ ଧସେଇ ପଶିଯାଇଥିଲେ।
ଏପରିକି ଜିଲ୍ଲାପାଳଙ୍କ ପ୍ରକୋଷ୍ଠକୁ ଆନ୍ଦୋଳନକାରୀ ଚାଷୀ ଓ କଂଗ୍ରେସ କର୍ମୀ ଧସେଇ ପଶିଥିଲେ। ଆନ୍ଦୋଳନ ଯୋଗୁଁ ଜିଲ୍ଲାର ସମସ୍ତ ସରକାରୀ କାର୍ଯ୍ୟାଳୟ ବନ୍ଦ ରହିଥିବା ବେଳେ ନିଜେ ଜିଲ୍ଲାପାଳ କାର୍ଯ୍ୟାଳୟରେ ଆସି କାର୍ଯ୍ୟ କରୁଥିବାରୁ ଆନ୍ଦୋଳନକାରୀମାନେ ପ୍ରତିବାଦ କରିଥିଲେ। ତେବେ ପାଣିପାଗ ବିଭାଗ ପକ୍ଷରୁ ଜିଲ୍ଲାକୁ ଅରେଞ୍ଜ ୱାର୍ଣ୍ଣିଂ ଜାରି କରାଯାଇଥିବାରୁ ଜରୁରୀକାଳୀନ କାମରେ ଜିଲ୍ଲାପାଳ କାର୍ଯ୍ୟାଳୟକୁ ଆସି କାମ କରୁଥିବା ଜିଲ୍ଲାପାଳ ଚଞ୍ଚଲ ରାଣା ସୂଚନା ଦେଇଛନ୍ତି। ତେବେ ଜିଲ୍ଲାପାଳଙ୍କ ସହ ଆଲୋଚନା ପରେ ଆନ୍ଦୋଳନକାରୀମାନେ ପୁଣି ଆନ୍ଦୋଳନସ୍ଥଳକୁ ଫେରିଆସିଥିଲେ।
ବଢ଼ୁଛି କି ଋଣ ବୋଝ ? ଆପଣାନ୍ତୁ ଏହି ବାସ୍ତୁ ଉପାୟ, ମିଳିବ ସୁଫଳ…
ଜୀବନରେ ଆସୁଥିବା ସମସ୍ୟାକୁ ବାସ୍ତୁଶାସ୍ତ୍ର ଦ୍ବାରା ବଦଳାଇ ହେବ। ଆସନ୍ତୁ ଜାଣିବା ଏଭଳି କିଛି ବାସ୍ତୁ ଟିପ୍ସ, ଯାହାଦ୍ବାରା ଋଣଭାରରୁ ମୁକ୍ତି ମିଳିପାରିବ। ଆମେ ଋଣ ତ ନେଇଥାଉ, କିନ୍ତୁ ତାକୁ ସୁଝି ପାରିନଥାଉ। ଯେତେବି ଚେଷ୍ଟା କଲାପରେ ମଧ୍ୟ କିଛି ନା କିଛି ପରିଶୋଧ କରିବା ବାକି ରହିଯାଇଥାଏ। ସେଥିପାଇଁ ଆମେ ଆଜି ଆପଣଙ୍କୁ ଋଣ ବୋଝରୁ କିପରି ମୁକ୍ତି ପାଇବେ ସେ ବିଷୟରେ କହିବାକୁ ଯାଉଛୁ।
ଋଣ ଭାରରୁ ମୁକ୍ତି ପାଇବା ପାଇଁ ସବୁବେଳେ ମଙ୍ଗଳବାର ଦିନକୁ ଚୟନ କରିବା ଦରକାର। ଏହି ଦିନ ଟଙ୍କା ଫେରାଇ ଦିଆଯିବା ଦ୍ବାରା ଋଣ ଶୀଘ୍ର ପରିଶୋଧ ହୋଇଥାଏ। ଘରର ଦକ୍ଷିଣ-ପଶ୍ଚିମ ଭାଗରେ ତିଆରି ହୋଇଥିବା ଓ୍ବାଶରୁମ୍ ମଧ୍ୟ ଲୋକଙ୍କ ଋଣ ଭାରକୁ ବଢାଇ ପାରେ। ତେଣୁ ଘରର ଏହି ଦିଗରେ ଓ୍ବାଶରୁମ୍ ନିର୍ମାଣ ନକରନ୍ତୁ।
ଏହାଛଡା ଘର କିମ୍ବା ଦୋକାନର ଉତ୍ତର-ପୂର୍ବ ଦିଗରେ କାଚ ଲଗାଇବା ଦ୍ବାରା ଋଣରୁ ମୁକ୍ତି ମିଳିଥାଏ। କାଚର ଫ୍ରେମ୍ ଲାଲ, ସିନ୍ଦୁର କିମ୍ବା ମେରୁନ୍ ରଙ୍ଗର ହେବା ଉଚିତ୍ ନୁହେଁ। କାଚ ଯେତିକି ହାଲକା ତଥା ବଡ ଆକାରର ହେବ, ଆପଣଙ୍କ ପାଇଁ ତାହା ସେତେଲାଭଦାୟକ ହେବ।
ନିର୍ବାଚନୀ ପ୍ରଚାରର ଶେଷ ଦିନରେ କମ୍ପିଲା ପଶ୍ଚିମବଙ୍ଗ ଭବାନୀପୁର, ରାସ୍ତାରୁ ଓହ୍ଲାଇଲେ ହେବିଓ୍ୱେଟ ନେତା
କୋଲକାତା: ପ୍ରଚାରରେ କମ୍ପୁଛି ପଶ୍ଚିମବଙ୍ଗର ବହୁ ଚର୍ଚ୍ଚିତ ଭବାନୀପୁର। ଆସନ୍ତା ୩୦ ତାରିଖରେ ଉପ-ନିର୍ବାଚନ ଥିବା ବେଳେ ଆଜି ହେଉଛି ପ୍ରଚାରର ଶେଷ ଦିନ। ଏଥି ପାଇଁ ନିର୍ବାଚନର ମୈଦାନରେ ହେବିଓ୍ବେଟଙ୍କ ଭିଡ଼ ଲାଗୁଥିବା ଦେଖିବାକୁ ମିଳିଛି। ଟିଏମସି ପକ୍ଷରୁ ପ୍ରଚାରକୁ ଜୋରଦାର କରାଯାଉଛି। ମମତାଙ୍କୁ ବିଜେପି ମଧ୍ୟ ଟକ୍କର ଦେଇଥିବା ଦେଖିବାକୁ ମିଳିଛି। ବିଜେପି ପକ୍ଷରୁ ଆଜି ୮୦ଜଣ ନେତା ପ୍ରଚାର ମୈଦାନକୁ ଓହ୍ଲାଇଛନ୍ତି। ସେପଟେ ବିଜେପିର ଏହି ରଣନୀତି କୌଣସି କାମ ଦେବ ନାହିଁ ବୋଲି କହିଛନ୍ତି ଟିଏମ୍ସିର ସାଧାରଣ ସମ୍ପାଦକ । ଅଭିଷେକ ବାନାର୍ଜୀଙ୍କ କହିବା ଅନୁଯାୟୀ, ଏହି ଆସନରୁ ଟିଏମସି ନିଶ୍ଚୟ ବିଜୟ ହାସଲ କରିବ।

ଅନ୍ୟପଟେ ଭବାନୀପୁର ନିର୍ବାଚନୀ ପ୍ରଚାର ବେଳେ ବିଜେପି ନେତାଙ୍କ ସୁରକ୍ଷା କର୍ମୀମାନେ ବନ୍ଧୁକ ଦେଖାଇ ଲୋକଙ୍କୁ ଧମକାଉଥିବାର ଦେଖାଯାଇଛି। ବିଜେପି ଉପ ସଭାପତି ଦିଲ୍ଲୀପ୍ ଘୋଷ ଭବାନୀପୁର ପ୍ରଚାର କରୁଥିବା ବେଳେ ଏକ ଟିକାକରଣ କେନ୍ଦ୍ରରେ ପ୍ରବେଶ କରିଥିଲେ। ସେଠାରେ ଥିବା ଲୋକମାନେ ଏହାକୁ ବିରୋଧ କରିବାରୁ ସୁରକ୍ଷାକର୍ମୀ ଜଣଙ୍କ ଲୋକମାନଙ୍କୁ ବନ୍ଧୁକ ଦେଖାଇ ଡରାଇଥିଲେ। ଯାହାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି। ବନ୍ଧୁକ ଦେଖାଇ ବିଜେପି ଲୋକଙ୍କୁ ଭୟଭୀତ କରିବାକୁ ଚେଷ୍ଟା କରୁଛି ବୋଲି ଭୋଟର କହିଛନ୍ତି।


