କଳାହାଣ୍ଡି: ଆଗକୁ ଆସୁଛି ପଞ୍ଚାୟତ ନିର୍ବାଚନ। ନିର୍ବାଚନରେ ଭଲ ପ୍ରଦର୍ଶନ କରିବା ପାଇଁ ଏବେଠୁ ସଂଗଠନକୁ ମଝବୁତ କରିବା ପାଇଁ ଲାଗି ପଡ଼ିଲାଣି ବିଜେଡି। ପଞ୍ଚାୟତ ଏରିଆରେ କେମିତି ରହିଛି ରଣନୀତି କଣ ରହିବ ପ୍ଲାନ୍ ସେଥିପାଇଁ କଳାହାଣ୍ଡି ଗ୍ରସ୍ତରେ ବିଜେଡି ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ। ପଞ୍ଚାୟତ ନିର୍ବାଚନକୁ ଆଖି ଆଗରେ ରଖି କଳାହଣ୍ଡିରେ ତୃଣମୂଳ ସ୍ତରରେ କର୍ମୀକୁ ସୁଦୃଢ କରିବାକୁ ଗୁରୁମନ୍ତ୍ର ଦେବେ ପ୍ରଣବ ପ୍ରକାଶ ଦାସ। ତେବେ କରୋନାକୁ ଦୃଷ୍ଟିରେ ରଖି କୋଭିଡ କଟକଣା ଭିତରେ ହେବ କର୍ମୀ ସମ୍ମିଳନୀ। ପ୍ରଥମେ ସେ ନର୍ଲା ବିଧନସଭା ମଣ୍ଡଳୀ କଶ୍ରୁପଡା, ପରେ ଭବାନିପାଟଣା ନିର୍ବାଚନ ମଣ୍ଡଳୀର ପାଷ୍ଟିଗୁଡ଼ି ଏବଂ ଲାଞ୍ଜିଗଡ ନିର୍ବାଚନୀ ମଣ୍ଡଳୀର ରିସଗାଁରେ ଆୟୋଜିତ କାର୍ଯ୍ୟକ୍ରମରେ ଯୋଗଦେବେ। ସନ୍ଧ୍ୟାରେ ଭବାନୀପାଟଣା ମୁନିସିପାଲିଟିରେ କାର୍ଯ୍ୟରତ ସଫେଇ କର୍ମଚାରୀଙ୍କୁ ଭେଟିବା କାର୍ଯ୍ୟକ୍ରମ ରହିଛି।
ଆସାମ-ମିଜୋରାମ ସୀମା ବିବାଦରେ ୫ ଯବାନ ସହିଦ
ନୂଆଦିଲ୍ଲୀ: ଆସାମ-ମିଜୋରାମ ସୀମାରେ ତୁମୁଳ ସଂଘର୍ଷ। ସଂଘର୍ଷରେ ଆସାମ ପୋଲିସର ୫ ଜଣ ଅଫିସରଙ୍କ ମୃତ୍ୟୁ ଘଟିଥିବା ବେଳେ, ୫୦ରୁ ଅଧିକ ଲୋକ ଆହତ ହୋଇଛନ୍ତି। ଉତ୍ତେଜନା ପ୍ରବଣ ଅଞ୍ଚଳରେ ସିଆରପିଏଫ ଯବାନଙ୍କୁ ମୁତୟନ କରାଯାଇଛି। ଘଟଣା ପରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଆସାମ ଓ ମିଜୋରାମର ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରି ସ୍ଥିତି ସମୀକ୍ଷା କରିଛନ୍ତି। ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱର୍ମା କହିଛନ୍ତି, ଆସାମ ପୋଲିସ ବିରୋଧରେ ମିଜୋରାମ ପୋଲିସ ଏପରିକି ହାଲୁକା ମେସିନଗନର ବ୍ୟବହାର କରିବା ଯୋଗୁ ସ୍ଥିତି ବିଗିଡିଛି।
ସେପଟେ ଆସାମର କାଚର ଜିଲ୍ଲା ଏସପିଙ୍କ ଦେହରେ ଗୁଳି ଲାଗିବାରୁ ସେ ଗୁରୁତର ଆହତ ହୋଇଛନ୍ତି। ଲୈଲାପୁରରେ ସଂରକ୍ଷିତ ଜଙ୍ଗଲକୁ ନଷ୍ଟ କରି ମିଜୋରାମ ଏକ ସଶସ୍ତ୍ର ଶିବିର ନିର୍ମାଣ କରିବାକୁ ନେଇ ଏହି ସଂଘର୍ଷ ଉପୁଜିଛି। ଶିବିର ପ୍ରତିଷ୍ଠାକୁ ଆସାମ ପୋଲିସ ବିରୋଧ କରିବା ପରେ ମିଜୋରାମ ପକ୍ଷରୁ ଗୁଳିଚାଳନା କରାଯାଇଥିଲା ବୋଲି ଆସାମ ସରକାର ଅଭିଯୋଗ କରିଛନ୍ତି। ସେପଟେ ଆସାମ ବିରୋଧରେ ପାଲଟା ଅଭିଯୋଗ କରିଛି ମିଜୋରାମ। କୋଲାସିବଠାରେ ଏକ ପୋଲିସ ଶିବିର ଉପରେ ଆସାମ ପ୍ରଥମେ ଆକ୍ରମଣ କରିଛି ବୋଲି ମିଜୋରାମ ଅଭିଯୋଗ କରିଛି।
ଶିଲଂରେ ସମସ୍ତ ଉତ୍ତରପୂର୍ବ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ କେନ୍ଦ୍ର ଗୃହମନ୍ତ୍ରୀ ଆଲୋଚନା କରିବାର ଦୁଇ ଦିନ ପରେ ଏହି ସଂଘର୍ଷ ଚିନ୍ତାର କାରଣ ହୋଇଛି। ସଂଘର୍ଷକୁ ନେଇ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମା ଓ ମିଜୋରାମ ମୁଖ୍ୟମନ୍ତ୍ରୀ ଜୋରମଥାଙ୍ଗା ପରସ୍ପର ବିରୋଧରେ ଘଟୁଥିବା ହିଂସାକୁ ନେଇ ଟ୍ୱିଟ ଯୁଦ୍ଧ ଚଳାଉଥିଲେ। ଆସାମର କାଚର, ହେଲକାଣ୍ଡି ଓ କରିମଗଞ୍ଜ ଜିଲ୍ଲା ସହ ମିଜୋରାମର ଆଇଜଲ, କୋଲାସିବ ଓ ମାମିତ ଜିଲ୍ଲାର ସୀମା ଲାଗିଛି। ଆସାମ ଓ ମିଜୋରାମ ମଧ୍ୟରେ ଆନ୍ତଃରାଜ୍ୟ ସୀମାର ଦୀର୍ଘତା ହେଉଛି ୧୬୪ କିଲୋମିଟର।
ୟେଦିୟୁରପ୍ପାଙ୍କ ପରେ କିଏ ହେବ କର୍ଣ୍ଣାଟକ ମୁଖ୍ୟମନ୍ତ୍ରୀ ?
ନୂଆଦିଲ୍ଲୀ: କର୍ଣ୍ଣାଟକ ରାଜନୀତିରେ ୟେଦିୟୁରପ୍ପା ଶାସନର ପତନ ପରେ ପରବର୍ତ୍ତୀ ମୁଖ୍ୟମନ୍ତ୍ରୀ କିଏ ହେବେ ତାହାକୁ ନେଇ ଚର୍ଚ୍ଚା। ନୂଆ ମୁଖ୍ୟମନ୍ତ୍ରୀ ଲାଗି ଆରମ୍ଭ ହୋଇଛି ରେସ୍। ନୂଆ ମୁଖ୍ୟମନ୍ତ୍ରୀ ବାଛିବା ଲାଗି ପର୍ଯ୍ୟବେକ୍ଷକ ଭାବେ ନିଯୁକ୍ତ ହୋଇଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ବିଜେପି ଜାତୀୟ ସାଧାରଣ ସମ୍ପାଦକ ତଥା କର୍ଣ୍ଣାଟକ ପ୍ରଭାରୀ ଅରୁଣ ସିଂ । ଲିଙ୍ଗାୟତ୍ତ ସମ୍ପ୍ରଦାୟର ୟେଦିୟୁରପ୍ପାଙ୍କ ପରେ ଜଣେ ବ୍ରାହ୍ମଣଙ୍କୁ ମୁଖ୍ୟମନ୍ତ୍ରୀ କରାଯାଇପାରେ ବୋଲି ଚର୍ଚ୍ଚା ଜୋର ଧରିଛି। କେନ୍ଦ୍ରମନ୍ତ୍ରୀ ପ୍ରହ୍ଲାଦ ଯୋଷୀଙ୍କ ନାଁ ଏବେ ଆଗରେ ରହିଛି। ସେ ଜଣେ ବ୍ରାହ୍ମଣ ଓ ସମସ୍ତଙ୍କୁ ଧରି ଆଗକୁ ଯାଇପାରିବାର କ୍ଷମତା ତାଙ୍କ ନିକଟରେ ରହିଛି। ସେପଟେ ଭୋକାଲିଗା ସମ୍ପ୍ରଦାୟର ବି କାହାକୁ କରାଯାଇପାରେ ମୁଖ୍ୟମନ୍ତ୍ରୀ।
ଏକ୍ଷେତ୍ରରେ ଚର୍ଚ୍ଚାରେ ଅଛନ୍ତି ବିଜେପି ଜାତୀୟ ସମ୍ପାଦକ ସି.ଟି ରବି। ଯୋଶୀଙ୍କୁ ଯଦି ମୁଖ୍ୟମନ୍ତ୍ରୀ କରାଯାଏ, ତେବେ ଏହା ହେବ ୧୯୮୮ ପରଠାରୁ ସବୁଠାରୁ ବଡ ପଦକ୍ଷେପ। ଏହାଦ୍ୱାରା ରାଜ୍ୟରେ ଉଚ୍ଚବର୍ଗଙ୍କ ସମର୍ଥନ ପାଇପାରିବ ବିଜେପି। ତେଣେ ଯଦି ରବିଙ୍କୁ ମୁଖ୍ୟମନ୍ତ୍ରୀ କରାଯାଏ ତେବେ ଭୋକାଲିଗା ବହୁଳ ଦକ୍ଷିଣ କର୍ଣ୍ଣାଟକରେ ବିଜେପି ନିଜର ପ୍ରଭାବ ବଢାଇ ପାରିବ।
ଲିଙ୍ଗାୟତ୍ତ ସମ୍ପ୍ରଦାୟର ଥିବା ୟେଦ୍ୟୁରପ୍ପାଙ୍କ ପରେ ଏହି ସମ୍ପ୍ରଦାୟରୁ ବି କାହାକୁ ମୁଖ୍ୟମନ୍ତ୍ରୀ କରିବା ଲାଗି ପଦକ୍ଷେପ ନେଇପାରନ୍ତି ହାଇକମାଣ୍ଡ। ଯୋଷୀ ଏବେ ଧରଓ୍ୱାଡରୁ ସାଂସଦ ଅଛନ୍ତି। ସେ ୨୦୧୨ରୁ ୨୦୧୬ ଯାଏଁ ବିଜେପି ରାଜ୍ୟ ସଭାପତି ଥିଲେ। ଏହାସହ ଖଣିମନ୍ତ୍ରୀ ମୁରୁଗେଶ ନିରାନି, ଗୃହମନ୍ତ୍ରୀ ବାସବରାଜ ବୋମାଇ, ଉପମୁଖ୍ୟମନ୍ତ୍ରୀ ସିଏନ ଅଶ୍ୱଥ ନାରାୟଣ, ବିଧାୟକ ଅରବିନ୍ଦ ବେଲାଡଙ୍କ ନାଁ ବି ଚର୍ଚ୍ଚାରେ ରହିଛି। ତେଣେ ପ୍ରଭାରୀ ଅରୁଣ ସିଂହ କହିଛନ୍ତି, ଦଳର ସଂସଦୀୟ ବୋର୍ଡ ଓ ବିଧାୟକ ଦଳ ବୈଠକରେ ଏନେଇ ନିଷ୍ପତ୍ତି ନିଆଯିବ।
ସ୍ପେନ୍କୁ ୩-୦ରେ ହରାଇ ଟୋକିଓ ଅଲମ୍ମିକ୍ସରେ ବିଜୟ ରାସ୍ତାକୁ ଓହ୍ଲାଇଲା ଭାରତୀୟ ହକି ଦଳ
ନୂଆଦିଲ୍ଲୀ: ଟୋକିଓ ଅଲିମ୍ପିକ୍ସରେ ବିଜୟ ରାସ୍ତାକୁ ଫେରିଲା ଭାରତୀୟ ହକି ଟିମ୍। ପୁଲ୍-ଏର ତୃତୀୟ ମ୍ୟାଚରେ ସ୍ପେନକୁ ୩-୦ ଗୋଲରେ ମାତ୍ ଦେଇଛି ଭାରତୀୟ ହକି ଟିମ୍ । ଟିମ୍ ପକ୍ଷରୁ ରୂପିନ୍ଦର ପାଲ୍ ସର୍ବାଧିକ ୨ଟି ଗୋଲ୍ କରିଛନ୍ତି । ସିମରନଜିତ୍ ସିଂହ ଖୋଳର ୧୪ ମିନିଟରେ ଗୋଟିଏ ଗୋଲ ଦେଇଛନ୍ତି । ଗୁରୁବାର ଭାରତର ପରବର୍ତ୍ତୀ ମୁକାବିଲା ଆର୍ଜେଣ୍ଟିନା ବିପକ୍ଷରେ ହେବ । ଅଷ୍ଟ୍ରେଲିଆଠାରୁ ୧-୭ରେ ହାରିଥିବା ଭାରତୀୟ ଟିମ୍ ଆଜି ପୁରା ଦମରେ ଖେଳିଥିଲା । ଗ୍ରୁପ୍ ଏରେ ଦ୍ବିତୀୟ ନମ୍ବରରେ ରହିଛି ଭାରତୀୟ ହକି ଟିମ୍ । ୩ଟି ମ୍ୟାଚରୁ ଗୋଟିଏରେ ପରାଜୟ ଓ ୨ଟି ମ୍ୟାଚରେ ବିଜୟର ସ୍ବାଦ ଚାଖିଛି ଟିମ୍ ।
ନୂଆ ଅତିଥିଙ୍କ କୋଳାହଳ ଶବ୍ଦରେ ଫାଟି ପଡ଼ିବ ନନ୍ଦନକାନନ
ଭୁବନେଶ୍ୱର: ପର୍ଯ୍ୟଟକଙ୍କ ପାଇଁ ଖୁସି ଖବର। ଖୁବ୍ଶୀଘ୍ର ନନ୍ଦନକାନନକୁ ଆସୁଛନ୍ତି ନୂଆ ଅତିଥି। କେନ୍ଦ୍ରୀୟ ଚିଡ଼ିଆ ଖାନା କର୍ତ୍ତୃପକ୍ଷଙ୍କ ଅନୁମତି ପରେ ନନ୍ଦନକାନନ କର୍ତ୍ତୃପକ୍ଷ ଜୀବଜନ୍ତୁ ଆଣିବା ପାଇଁ ଯୋଜନା କରିଛନ୍ତି। ନନ୍ଦନକାନନରୁ ଅନ୍ୟ ଜୁ ଗୁଡ଼ିକୁ ଜୀବଜନ୍ତୁ ଅଦଳବଦଳ କରାଯିବ। ପାଟଣା ଜୁ.ରୁ ଗୋଟିଏ ଯୋଡ଼ା ଗଣ୍ଡା, ଗୋଟିଏ ଯୋଡ଼ା ଚିତା ବାଘ, ତିନି ଯୋଡ଼ା ଜେବ୍ରା, ୮ଟି ବିରଳ ଚିଙ୍କାରି ଅଣାଯିବା ନେଇ ବ୍ୟବସ୍ଥା ହୋଇିଛି। ସେହିପରି ଜୟପୁର ଜୁରୁ ୫ଟି କ।ପୁଚିଁନ୍ ମାଙ୍କଡ଼ ସହ ଗୋଟିଏ ଘଡିଆଳ କୁମ୍ଭିର ଅଣାଯିବ। ଏଥି ସହିତ ଥାଇଲାଣ୍ଡରୁ ବିରଳ ଓ ବିଶ୍ୱର ସର୍ବ ବୃହତ କ୍ୟାପୀବାରା ମୂଷା ଆସିବେ। ତେବେ ନନ୍ଦନକାନନରେ ଦୀର୍ଘ ବର୍ଷ ହେବ ଗଣ୍ଡା, ଚିତା ବାଘ, ଜେବ୍ରା ଓ କ୍ୟାପି ବାରା ମୂଷା ନଥିଲା। ଏବେ ଏମାନେ ଆସିବା ପରେ ଖାଲି ଖୁଆଡ ପରିପୂର୍ଣ୍ଣ ହେବ। ତାହାସହ ପର୍ଯ୍ୟଟକଙ୍କ ଆକର୍ଷଣର କେନ୍ଦ୍ରବିନ୍ଦୁ ପାଲଟିବ ବୋଲି କୁହାଯାଉଛି। ତେବେ ବର୍ତ୍ତମାନ କୋଭିଡ କଟକଣା ଯୋଗୁଁ ପ୍ରାଣୀ ଉଦ୍ୟାନ ବନ୍ଦ ରହିଛି। ଖୋଲିବା ପରେ ପର୍ଯ୍ୟଟକଙ୍କ ଆନନ୍ଦର ଖୋରାକ ଯୋଗାଇବ ନୂତନ ଜୀବଜନ୍ତୁ।
ଟି-୨୦ ସିରିଜ ହାତେଇବା ଲକ୍ଷରେ ମୈଦାନକୁ ଓହ୍ଲାଇବ ଟିମ୍ ଇଣ୍ଡିଆ, ହୋଇପାରେ ପ୍ଲେ ୧୧ରେ ପରିବର୍ତ୍ତନ
ନୂଆଦିଲ୍ଲୀ: ଆଜି ଖେଳାଯିବ ଦ୍ୱିତୀୟ ଟି ୨୦। ଶ୍ରୀଲଙ୍କା ଠାରୁ ଶୃଙ୍ଖଳା ବିଜୟ ଲକ୍ଷ୍ୟରେ ଟିମ ଇଣ୍ଡିଆ। ପ୍ରଥମ ମ୍ୟାଚ ଜିତି ସିରିଜରେ ୧-୦ରେ ଅଗ୍ରଣୀ ଥିବା ଭାରତ ଆଜି ପୁଣି ପଡିଆକୁ ଓହ୍ଲେଇବ୍ । ଭାରତ ଓ ଶ୍ରୀଲଙ୍କା ମଧ୍ୟରେ ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ର ଦ୍ଵିତୀୟ ମ୍ୟାଚ୍ ଆଜି କଲୋମ୍ବୋର ପ୍ରେମଦାସା ଷ୍ଟାଡିୟମରେ ଖେଳାଯିବ। ଏହି ମ୍ୟାଚ୍ରେ ଭାରତୀୟ ଦଳର ଚୂଡାନ୍ତ ଏକାଦଶରେ କିଛି ପରିବର୍ତ୍ତନ ଦେଖିବାକୁ ମିଳିପାରେ। ପୃଥ୍ଵୀ ଶ ଓ ସୂର୍ଯ୍ୟକୁମାର ଯାଦବ ଇଂଲଣ୍ଡ ଗସ୍ତ ପାଇଁ ଭାରତୀୟ ଦଳରେ ଚୟନ ହୋଇଛନ୍ତି। ତେଣୁ ଏହି ଦୁଇ ଖେଳାଳି ଆଜି ମ୍ୟାଚରେ ଖେଳି ନପାରନ୍ତି।ତାଙ୍କ ସ୍ଥାନରେ ଋତୁରାଜ ଗାଏକୋଓ୍ଵାଡ ଓ ଦେବଦତ୍ତ ପାଦିକଲଙ୍କୁ ଦଳରେ ସୁଯୋଗ ମିଳିପାରେ।
ରାଜ୍ୟରେ କମୁଛି କରୋନା ହେଲେ ଖୋର୍ଦ୍ଧା ଜିଲ୍ଲାରେ ବଢ଼ୁଛି ସଂକ୍ରମିତଙ୍କ ସଂଖ୍ୟା
ଭୁବନେଶ୍ୱର: ରାଜ୍ୟରେ ଦିନକୁ ଦିନ କମିବାରେ ଲାଗିଛି କରୋନା ସଂକ୍ରମଣ। ଦିନକରେ ୧୬୨୯ ସଂକ୍ରମିତ ଚିହ୍ନଟ ହୋଇଥିବା ବେଳେ ୬୦ଜଣଙ୍କର ଜୀବନ ନେଇଛି କିଲର ଭାଇରସ୍ । ୨୪ଘଣ୍ଟାରେ ସୁସ୍ଥ ହୋଇଛନ୍ତି ୨ହଜାର ୨୦୪ ଜଣ କରୋନା ସଂକ୍ରମିତ। କ୍ୱାରେଣ୍ଟାଇନରୁ ୯୩୯ ଜଣ ସଂକ୍ରମିତ ଚିହ୍ନଟ ହୋଇଥିବା ବେଳେ ଲୋକାଲ କେସ୍ ରହିଛି ୬୯୦। ତେବେ ସବୁଦିନ ଭଳି ଖୋର୍ଦ୍ଧାରୁ ସର୍ବାଧିକ ୫୩୨ ଜଣ ସଂକ୍ରମିତ ଚିହ୍ନଟ ହୋଇଛନ୍ତି।
କଟକରୁ ୧୬୦, ଷ୍ଟେଟପୁଲରୁ ୧୧୩ ସଂକ୍ରମିତ ଚିହ୍ନଟ ହୋଇଛନ୍ତି। ପୁରୀରୁ ୯୬, ବାଲେଶ୍ୱରରୁ ୯୩, ଯାଜପୁରରୁ ୮୪, ଭଦ୍ରକରୁ ୭୬, ଜଗତସିଂହପୁରରୁ ୬୭, ମୟୂରଭଞ୍ଜରୁ ୫୩, କେନ୍ଦ୍ରାପଡାରୁ ୪୭, ଅନୁଗୁଳରୁ ୪୪, ଢେଙ୍କାନାଳରୁ ୩୯, ନୟାଗଡ଼ରୁ ୩୮, କେନ୍ଦୁଝରରୁ ୪୭, କେନ୍ଦୁଝରରୁ ୨୯, ସୋନପୁର ଓ ସୁନ୍ଦରଗଡ଼ରୁ ୨୨ଜଣ ଲେଖାଏଁ, କନ୍ଧମାଳରୁ ୧୬, ସମ୍ବଲପୁରରୁ ୧୪, ରାୟଗଡ଼ାରୁ ୧୨, ବରଗଡରୁ ୧୧, ନୂଆପଡାରୁ ୧୦, ଦେବଗଡ଼ରୁ ୯, ଗଞ୍ଜାମରୁ ୮, ନବରଙ୍ଗପୁରରୁ ୬, ବଲାଙ୍ଗୀର, ଝାରସୁଗୁଡା, କଳାହାଣ୍ଡି ଓ ମାଲକାନଗିରିରୁ ୫ଜଣ ଲେଖାଏଁ, କୋରାପୁଟରୁ ୪, ବୌଦ୍ଧ ଓ ଗଜପତିରୁ ୨ଜଣ ଲେଖାଏଁ ସଂକ୍ରମିତ ଚିହ୍ନଟ ହୋଇଛନ୍ତି। ରାଜ୍ୟରେ ମୋଟ୍ ସଂକ୍ରମିତଙ୍କ ସଂଖ୍ୟା ରହିଛି ୯ଲକ୍ଷ ୭୦ହଜାର ୮୧୪ । ମୋଟ୍ ସୁସ୍ଥ ହେଲେଣି ୯ଲକ୍ଷ ୪୭ହଜାର ୩୮୧। ଏବେ ରାଜ୍ୟରେ ମୋଟ ଆକ୍ଟିଭ କେସ୍ ୧୭ହଜାର ୭୪୬ ରହିଛି।
ଘରକୁ ଫେରୁଥିବା ବେଳେ ଯୁବକଙ୍କୁ ଭୁଜାଲିରେ ଦୁର୍ବୃତ୍ତଙ୍କ ଆକ୍ରମଣ
ସମ୍ବଲପୁର: ସମ୍ବଲପୁର ଧନୁପାଲି ଥାନା ଗୋବିନ୍ଦତୋଲା ଅଞ୍ଚଳରେ ହତ୍ୟାକାଣ୍ଡ। ପୂର୍ବ ଶତ୍ରୁତା କେନ୍ଦ୍ରକରି ଦୀପକ ଯାଦବଙ୍କୁ ଭୁଜାଲିରେ ଆକ୍ରମଣ ଅଭିଯୋଗ। ରକ୍ତ ଜୁଡୁବୁଡୁ ଅବସ୍ଥାରେ ପ୍ରଥମେ ସମ୍ବଲପୁର ପରେ ବୁର୍ଲା ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଏହା ପରେ ଚିକିତ୍ସାଧିନ ଅବସ୍ଥାରେ ଦୀପକଙ୍କ ମୃତ୍ୟୁ ହୋଇଛି। ସୂଚନା ଅନୁସାରେ ଗୋବିନ୍ଦତୋଲା ଅଞ୍ଚଳର ଦୀପକ ଯାଦକ କାମରୁ ନିଜ ଘରକୁ ବିଳମ୍ବିତ ରାତିରେ ଫେରୁଥିଲେ। ଅନ୍ଧାର ରାସ୍ତାରେ ୨ ଜଣ ଦୁର୍ବୃତ୍ତ ଛକି ରହିଥିଲା। ଛକି ରହିଥିବା ଦୁଇଜଣ ଦୁର୍ବୃତ୍ତ ତାଙ୍କୁ ହଠାତ୍ ଆକ୍ରମଣ କରିଥିଲେ। ଆକ୍ରମଣ ପରେ ଦୀପକ ଗୁରୁତର ଆହତ ହୋଇଥିଲେ। ସ୍ଥାନୀୟ ଲୋକଙ୍କ ସୂଚନା ଦେବା ପାରେ ଘଟଣା ସ୍ଥଳରେ ପୋଲିସ ପହଞ୍ଚି ଦୀପକଙ୍କୁ ଡାକ୍ତରଖାନା ନେଇଥିଲା। ପୋଲିସ ଘଟଣାର ତଦନ୍ତ କରୁଛି ।
ଜନସାଧାରଣ ନୁହେଁ ଖୋଦ ବିଧାୟକ ଭାଙ୍ଗିଲେ କରୋନା କଟକଣା
ଗଞ୍ଜାମ: କରୋନା କଟକଣାକୁ ଫୁ କରିଦେଲେ ସୋରଡ଼ା ବିଧାୟକ। ଜନସାଧାରଣଙ୍କ କଥା ଛାଡ଼ନ୍ତୁ ଖୋଦ ବିଧାୟକ ହେଲେ ଅମାନିଆ। କଟକଣାକୁ ବେଖାତିର କରି ହଜାର ହଜାର ଲୋକଙ୍କ ପାଇଁ ହୋଇଛି ଭୋଜି ଭାତର ଆୟୋଜନ। ଶହ ଶହ ଲୋକେ ଏକାଠି ହୋଇ ଭୋଜି ଖାଇବାକୁ ବସିଛନ୍ତି।
ଏ ଦୃଶ୍ୟ ହେଉଛି ଗଞ୍ଜାମ ଜିଲ୍ଲା ସୋରଡ଼ା ଥାନା ଅମୃତୁଲୁ ଗାଁର ସୋରଡ଼ା ବିଧାୟକ ପୂର୍ଣଚନ୍ଦ୍ର ସ୍ୱାଇଁଙ୍କ ବାପାଙ୍କ ପ୍ରଥମ ଶ୍ରାଦ୍ଧ ବାର୍ଷିକୀର ଦୃଶ୍ୟ। ପୂର୍ଣ୍ଣଚନ୍ଦ୍ର ନିଜ ବାପାଙ୍କ ଶ୍ରାଦ୍ଧ ବାର୍ଷିକିକୁ ବେଶ ଧୁମଧାମରେ ପାଳନ କରିଥିବା ଅଭିଯୋଗ ହୋଇଛି। ହଜାର ହଜାର ଲୋକଙ୍କ ପାଇଁ ଭୋଜି ଭାତ ଆୟୋଜନ କରିବା ସହିତ ଏକ ରକ୍ତଦାନ ଶିବିର ଓ ଭଜନ ସମାରୋହ କାର୍ଯ୍ୟକ୍ରମ ଆୟୋଜନ କରିଥିଲେ।
ମହାମାରୀ ସମୟରେ ଭିଡ଼ ଓ ଭୋଜିଭାତର ଆୟୋଜନ ଉପରେ କଟକଣା ଲଗାଯାଇଥିବା ବେଳେ, ବିଧାୟକଙ୍କୁ କିଏ ଅନୁମତି ପ୍ରଦାନ କଲା ତା ଉପରେ ପ୍ରଶ୍ନ ଉଠାଇଛନ୍ତି ସ୍ଥାନୀୟ ବାସିନ୍ଦା।
ସାମ୍ବାଦିକ ଜଗତର ପିତାମହଙ୍କ ଶ୍ରାଦ୍ଧ ଦିବସ ପାଳିତ, ଶିଶିର ଭଟ୍ଟ ମିଶ୍ରଙ୍କୁ ନୀଳମଣି ବିଦ୍ୟାରତ୍ନ ସ୍ମୃତି ସମ୍ମାନ
ଭୁବନେଶ୍ୱର: ସାମ୍ବାଦିକ ଜଗତର ପିତାମହ ନୀଳମଣି ବିଦ୍ୟାରତ୍ନଙ୍କ ୯୮ତମ ଶ୍ରାଦ୍ଧ ଦିବସ ପାଳିତ । ପୂଜ୍ୟ ପୂଜା ସଂସ୍କୃତି ସୁରକ୍ଷା ଅଭିଯାନ ପକ୍ଷରୁ ଦିବସ ପାଳିତ ହୋଇଛି । ଜୟଦେବ ବିହାର ଛକରେ ଥିବା ନୀଳମଣି ବିଦ୍ୟାରତ୍ନ ପ୍ରତିମୂର୍ତ୍ତି ସ୍ଥଳରେ ଶ୍ରଦ୍ଧାଞ୍ଜଳି ଅର୍ପଣ କରାଯାଇଛି । ସଂସ୍କୃତି ସୁରକ୍ଷା ଅଭିଯାନର ଅଧ୍ୟକ୍ଷ ପ୍ରଦ୍ୟୁମ୍ନ ଶତପଥୀଙ୍କ ସଭାପତିତ୍ବରେ ଏହି ଶ୍ରଦ୍ଧାଞ୍ଜଳୀ ସଭା ଆୟୋଜିତ ହୋଇଥିଲା ।
ବହୁ ବିଶିଷ୍ଟ ବ୍ୟକ୍ତି ଯୋଗ ଦେଇ ଶ୍ରଦ୍ଧାଞ୍ଜଳୀ ଅର୍ପଣ କରିଥିଲେ । ଏହି ଅବସରରେ ନନ୍ଦିଘୋଷ ଟିଭିର ସମ୍ପାଦକ ଶିଶିର ଭଟ୍ଟ ମିଶ୍ରଙ୍କୁ ନୀଳମଣି ବିଦ୍ୟାରତ୍ନ ସ୍ମୃତି ସମ୍ମାନରେ ସମ୍ମାନିତ କରାଯାଇଛି । ଏହାସହ ମହାନ୍ ସ୍ଵାଧୀନତା ସଂଗ୍ରାମୀ ତଥା ସାରସ୍ବତ ସାଧକ ଗୋଦାବରୀଶ ମିଶ୍ରଙ୍କ ୬୫ ତମ ଶ୍ରାଦ୍ଧ ଦିବସ ମଧ୍ୟ ଭୁବନେଶ୍ୱର ପାଳିତ ହୋଇଯାଇଛି । ମୁଖ୍ୟ ଡାକପାଳଙ୍କ କାର୍ଯ୍ୟାଳୟ ସମ୍ମୁଖରେ ଥିବା ପ୍ରତିମୂର୍ତ୍ତି ନିକଟରେ ଶ୍ରଦ୍ଧାଞ୍ଜଳି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।
ଏହି ଅବସରରେ କବି ପ୍ରବୀର ମହାନ୍ତିଙ୍କୁ ଗୋଦାବରୀଶ ମିଶ୍ର ସ୍ମୃତି ସମ୍ମାନରେ ସମ୍ମାନିତ କରାଯାଇଛି । ଏଥିସହ ଅଗ୍ନି ତେଜସ୍ବିନୀ,ବିପ୍ଲବିଣୀ ମାଳତୀ ଚୌଧୁରୀଙ୍କ ୧୧୮ ତମ ଜୟନ୍ତୀ ଏବଂ ସଂଗ୍ରାମୀ ଗୋବିନ୍ଦ ଚନ୍ଦ୍ର ପ୍ରଧାନଙ୍କ ଶ୍ରାଦ୍ଧ ଦିବସ ଅବସରରେ ଶ୍ରଦ୍ଧାଞ୍ଜଳି ଅର୍ପଣ କରାଯାଇଛି । ଏହି ଶ୍ରଦ୍ଧାଞ୍ଜଳୀ କାର୍ଯକ୍ରମରେ ବାଙ୍କୀ ର ପୂର୍ବତନ ବିଧାୟକ ପ୍ରଭାତ ତ୍ରିପାଠୀ,ଚିଲିକା ବିଧାୟକ ପ୍ରଶାନ୍ତ ଜଗଦେବ,ପଣ୍ଡିତ କୃଷ୍ଣ କେଶବ ଷଡ଼ଙ୍ଗୀଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ଯୋଗ ଦେଇ ଶ୍ରଦ୍ଧା ସୁମନ ଅର୍ପଣ କରିଥିଲେ।