spot_img
Home Blog Page 5727

କରୋନା କାଳରେ ରେକର୍ଡ ଭାଙ୍ଗୁଛି ପେଟ୍ରୋଲ, ଦୁଇଦିନ ପରେ ପୁଣି ବଢ଼ିଲା ପେଟ୍ରୋଲ ଦର

ନୂଆଦିଲ୍ଲୀ: କରୋନା ମହାମାରୀ ଭିତରେ ଭଢ଼ି ଚାଲିଛି ପେଟ୍ରୋଲ ଦଳ। ପେଟ୍ରୋଲ-ଡିଜେଲର ମୂଲ୍ୟ ବୃଦ୍ଧି ଏହି ସମୟରେ ସମସ୍ତ ରେକର୍ଡ ଭାଙ୍ଗିଛି। ଦୁଇ ଦିନ ପରେ ଆଜି ପୁଣି ତୈଳ ଦରରେ ବୃଦ୍ଧି ଘଟିଛି। ଜୁନ୍ ୪ରେ ସରକାରୀ ତୈଳ କମ୍ପାନୀ ଗୁଡ଼ିକ ପେଟ୍ରୋଲ ଲିଟର ପିଛା ୨୭ ପଇସା ବୃଦ୍ଧି କରିଥିବା ବେଳେ ଡିଜେଲ ଲିଟର ପିଛା ୨୮ ପଇସା ବୃଦ୍ଧି କରିଛନ୍ତି। ତେବେ ତେଲ ଦର ବୃଦ୍ଧି ପରେ ପରେ ରାଜଧାନୀ ଦିଲ୍ଲୀରେ ପେଟ୍ରୋଲ ଲିଟର ପିଛା ୯୪.୭୬ ଟଙ୍କା ଏବଂ ଡିଜେଲରେ ଲିଟର ପିଛା ୮୫.୬୬ ଟଙ୍କା ରହିଛି। ଯଦି ଦେଖିବା ଏହା ପୂର୍ବରୁ ଜୁନ୍ ୧ ରେ ପେଟ୍ରୋଲ ଏବଂ ଡିଜେଲ ଦରରେ ବୃଦ୍ଧି ଘଟିଥିଲା।

ଜୁନ୍ ମାସରେ ପେଟ୍ରୋଲ ଏବଂ ଡିଜେଲର ମୂଲ୍ୟ ଦୁଇଥର ବୃଦ୍ଧି ପାଇଥିବାବେଳେ ମେ ମାସରେ ଏହା ମଧ୍ୟବର୍ତ୍ତୀ ସମୟରେ ୧୭ ଗୁଣ ବୃଦ୍ଧି କରାଯାଇଥିଲା। ଏହି ବୃଦ୍ଧି ପରେ ପେଟ୍ରୋଲ ଲିଟର ପିଛା ୪.୧୭  ଟଙ୍କା ବୃଦ୍ଧି ଘଟିଥିଲା। ଏଥି ସହିତ ଡିଜେଲ ଦରରେ ୪.୬୦ ଟଙ୍କା ବୃଦ୍ଧି ମଧ୍ୟ ଦେଖିବାକୁ ମିଳିଥିଲା। ସବୁଠାରୁ ବଡ଼ କଥା ହେଉଛି ବର୍ତ୍ତମାନ ପେଟ୍ରୋଲର ମୂଲ୍ୟ ଅନେକ ସହରରେ ଲିଟର ପିଛା ୧୦୦ଟଙ୍କା ଅତିକ୍ରମ କରିଛି।

ଭାରତରେ ତିଆରି ହେଉଛି ଦ୍ୱିତୀୟ ସ୍ୱଦେଶୀ ଟିକା, ତୃତୀୟ ପର୍ଯ୍ୟାୟ କ୍ଲିନିକାଲ ଟ୍ରାଏଲ ଜାରି

ନୂଆଦିଲ୍ଲୀ: ଦେଶରେ କରୋନା ସଂକଟ ବଢ଼ିବାରେ ଲାଗିଛି। ଏବେ କରୋନା ସଂକ୍ରମଣ ଧିରେ ଧିରେ କମୁଥିଲେ ମଧ୍ୟ ଦେଶରୁ ବିପଦ ଟିଳିନାହିଁ। କାରଣ ଦେଶରେ ଦ୍ୱିତୀୟ ଲହରୀରେ ଅନେକ କ୍ଷତି କରିଛି କରୋନା। ଆଉ ଆଗକୁ ତୃତୀୟ ଲହରୀ ଆସିବା ଭୟ ମଧ୍ୟ ଦେଖା ଦେଲାଣି। ତେବେ ଦେଶରେ ଏବେ ଟିକାକରଣକୁ ଅଧିକ ଗୁରୁତ୍ୱ ଦିଆଯାଇଛି। ତେବେ କରୋନା ସଂକଟ ମଧ୍ୟରେ ଭାରତରେ ତିଆରି ହେଉଛି ଦ୍ୱିତୀୟ ସ୍ୱଦେଶୀ ଟିକା। ହାଇଦ୍ରାବାଦର ବାୟୋଲୋଜିକାଲ-ଇ ପ୍ରସ୍ତୁତ କରୁଥିବା କରୋନା ଟିକାକୁ ମିଳିପାରେ ମଞ୍ଜୁରୀ। ଟିକାର ପ୍ରଥମ ଓ ଦ୍ୱିତୀୟ ପର୍ଯ୍ୟାୟ ପରୀକ୍ଷଣ ସରିଥିବା ବେଳେ ତୃତୀୟ ପର୍ଯ୍ୟାୟ କ୍ଲିନିକାଲ ଟ୍ରାଏଲ ଜାରି ରହିଛି।

ଏହା ସଫଳ ହେଲେ ବାୟୋଲୋଜିକାଲ-ଇ ଟିକାକୁ କରୋନା ଟିକାକରଣରେ ସାମିଲ କରାଯିବ।  ଟିକାକରଣ ତ୍ୱରାନ୍ୱିତ କରିବାକୁ କେନ୍ଦ୍ର ସରକାର ବାୟୋଲୋଜିକାଲ-ଇ ର ୩୦କୋଟି ଟିକା ବୁକ୍ କରିସାରିଛନ୍ତି। ଥାର୍ଡ ଫେଜ୍ ଟ୍ରାଏଲ ସଫଳ ହେବା ପରେ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ଫାର୍ମା କମ୍ପାନୀକୁ ୧୫ଶହ କୋଟି ଟଙ୍କା ଆଡଭାନ୍ସ ଦେବେ। ବାୟୋଲୋଜିକାଲ-ଇ ପ୍ରସ୍ତୁତ କରୁଥିବା ଟିକା ହେଉଛି ଆରବିଡି ପ୍ରୋଟିନ ସବ-ୟୁନିଟ୍ ଭ୍ୟାକସିନ। ଏହି ଭ୍ୟାକସିନ ପ୍ରସ୍ତୁତ କରିବା ପାଇଁ କେନ୍ଦ୍ର ଜୈବ ପ୍ରଦ୍ୟୋଗିକ ମନ୍ତ୍ରଣାଳୟ ସମସ୍ତ ଖର୍ଚ୍ଚ ବହନ କରୁଛି।

କରୋନା ସଂକଟରେ ଆମେରିକା ଦେଲା ଆଶ୍ୱସ୍ତି, ବାଣ୍ଟିବ ୮ କୋଟି କରୋନା ଟିକା

ନୂଆଦିଲ୍ଲୀ: ବିଶ୍ୱରେ କରୋନା ସଂକ୍ରମଣ ଯୋଗୁଁ ସ୍ଥିତି ବିଗିଡ଼ିବାରେ ଲାଗିଛି। ଅଦୃଶ୍ୟ ଭୂତାଣୁ ପାଇଁ ପ୍ରତିଦିନ ଲୋକେ ମରିବାରେ ଲାଗିଛନ୍ତି। ଏଭଳି ପରିସ୍ଥିତି ବେଳେ ଆସିଲା ଆଶ୍ୱସ୍ତିକର ଖବର। ସଂକଟ ସମୟରେ ଆମେରିକା ୮ କୋଟି ଟିକା ଅନ୍ୟ ଦେଶ ମାନଙ୍କୁ ବିତରଣ କରିବ ବୋଲି ଜଣାପଡ଼ିଛି। ଏହି ଦେଶ ମାନଙ୍କ ଭିତରେ ଭାରତ ମଧ୍ୟ ରହିଛି। ଏନେଇ ଆମେରିକା ଉପରାଷ୍ଟ୍ରପତି କମଲା ହାରିଶ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ଫୋନ୍‌ ଯୋଗେ ଆଲୋଚନା କରିଛନ୍ତି। ଦେଶରେ କରୋନା ସ୍ଥିତି ଓ ଟିକାକରଣ ନେଇ ଉଭୟ ନେତାଙ୍କ ମଧ୍ୟରେ ଆଲୋଚନା ହୋଇଛି।

ପ୍ରଥମ ପର୍ଯ୍ୟାୟରେ ଅଢେଇ କୋଟି ଟିକା ଡୋଜ୍‌ ଅନ୍ୟ ଦେଶକୁ ବିତରଣ କରାଯିବ। ଏହି ଦେଶ ମାନଙ୍କ ଭିତରେ ଭାରତ, ଦକ୍ଷିଣ ଆଫ୍ରିକା, ଦକ୍ଷିଣ କୋରିଆ, ମେକ୍ସିକୋ ଭଳି ଦେଶ ରହିଛି। ସେହି ଦେଶର ନେତା ମାନଙ୍କ ସହ ମଧ୍ୟ ଫୋନ ଯୋଗେ ଆଲୋଚନା କରିଛନ୍ତି ଆମେରିକାର ଉପରାଷ୍ଟ୍ରପତି କମଲା ହରିଶ। କରୋନାର ଦ୍ୱିତୀୟ ଲହରୀରେ ଅନେକ ଦେଶରେ ସାଂଘାତିକ ସ୍ଥିତି ସୃଷ୍ଟି କରିଥିବା ବେଳେ ଆମେରିକା ନିଜର ବଳକା ଟିକା ଅନ୍ୟ ଦେଶକୁ ଦେବ ବୋଲି ଘୋଷଣା କରିଥିଲେ।

କରୋନା ସଙ୍କଟରେ ଅମାନିଆଙ୍କର ମନମାନି, କରୋନାରେ ପାଲଟିଛନ୍ତି ସୁପର ସ୍ପ୍ରେଡର

ଢ଼େଙ୍କାନାଳ: ରାଜ୍ୟରେ କରୋନା ସଂକ୍ରମଣ ଧିରେ ଧିରେ କମ୍‌ ହେବାରେ ଲାଗିଛି। ଲକ୍‌ଡାଉନ୍‌ କାରଣରୁ ରାଜ୍ୟରେ ବଦଳୁଛି କରୋନା ପରିସ୍ଥିତି। କିନ୍ତୁ ଢ଼େଙ୍କାନାଳରେ ସାଂଘାତିକ ହୋଇଚାଲିଛି କରୋନା ପରିସ୍ଥିତି। ଢେଙ୍କାନାଳରେ ବଢିଚାଲିଛି ମହାମାରୀ କରୋନା। ଗତ କିଛିଦିନର ସଂଖ୍ୟାକୁ ଦେଖିଲେ ଉପରମୁହାଁ ରହୁଛି ସଂକ୍ରମଣ। କିଛି ଅମାନିଆଙ୍କ ଯୋଗୁ ଏହି ବଢୁଥିବା ଲୋକେ ଅଭିଯୋଗ କରିଛନ୍ତି। ତେବେ ରାଜ୍ୟରେ ଲକଡାଉନ ଲାଗୁ ହୋଇଥିବା ବେଳେ, ନିୟମ ନମାନି ବାହାରେ ବୁଲୁଛନ୍ତି ଅମାନିଆ।

ଯେଉଁମାନେ ନିୟମ ମାନୁନାହାନ୍ତି, ସେମାନଙ୍କ ଠାରୁ ଜରିମାନା ଆଦାୟ କରାଯିବା ସହ ଦୋକାନ ସିଲ୍ କରାଯାଉଛି। ପୋଲିସ ବିଭିନ୍ନ ସ୍ଥାନରେ ଚେକିଂ ବି କରୁଛି। ରାତିରେ କିଭଳି ଚାଲିଛି ଚେକିଂ। ଏହା ପୂର୍ବରୁ ମଧ୍ୟ ଢ଼େଙ୍କାନଳରେ ବାରମ୍ବାର ନିୟମ ଭାଙ୍ଗୁଥିବାର ଦେଖାଯାଇଛି। ହାଟ ଠାରୁ ଆରମ୍ଭ କରି ମାଛ ମାର୍କେଟ ସବୁଠି ଅମାନିଆଙ୍କର ଭିଡ଼।

କରୋନାକୁ ମାତ୍ ଦେବାକୁ ଟେଷ୍ଟିଂ ସହ ଟିକାକରଣକୁ ବିଏମସିର ଗୁରୁତ୍ୱ

ଭୁବନେଶ୍ୱର: ଟିକାକରଣ ପାଇଁ ବିଏମସି ପକ୍ଷରୁ ଆରମ୍ଭ ହେବ ସ୍ୱତନ୍ତ୍ର କାର୍ଯ୍ୟକ୍ରମ। ଚିହ୍ନଟ ତଥା ପଞ୍ଜିକୃତ ବାସହୀନଙ୍କର ଟିକାକରଣ କରାଯିବ। ଲୋକଙ୍କ ପାଖକୁ ଯାଇ ଟିକା ଦିଆଯିବ। ନିଳାଦ୍ରୀବିହାର ସ୍ଥିତ ସହରାଞ୍ଚଳ ବାସହୀନ ଥଇଥାନ କେନ୍ଦ୍ରରେ ହେବ ଟିକାକରଣ। ବିଏମସିର ୩ଟି ଯୋନରେ ଏହି କାର୍ଯ୍ୟକ୍ରମ କରାଯିବ। ଅନ୍ୟପଟେ ବୁଲା ବିକାଳିଙ୍କର ବାଧ୍ୟତାମୂଳକ ଟେଷ୍ଟିଂ କରାଯିବ।

ସେମାନେ ଅଧିକ ଲୋକଙ୍କ ସଂସ୍ପର୍ଷରେ ଆସୁଥିବାରୁ ଏପରି ନିଷ୍ପତ୍ତି ନିଆଯାଇଛି। ମୋବାଇଲ ଟେଷ୍ଟିଂ ଭ୍ୟାନ ମାଧ୍ୟମରେ ଟେଷ୍ଟିଂ କରାଯିବ। ବିଏମସି ନର୍ଥ ଜୋନରେ ଗୋପବନ୍ଧୁ ଷ୍ଟାଡିୟମ ନିକଟ ମାଛ ମାର୍କେଟରୁ ଆରମ୍ଭ ହେବ ଅଭିଯାନ। ପୂର୍ବରୁ ସହରାଞ୍ଚଳ ବାସହୀନଙ୍କର ସ୍ୱାସ୍ଥ୍ୟ ପରୀକ୍ଷାକୁ ଗୁରୁତ୍ୱ ଦିଆଯାଇଥିଲା। କରୋନାକୁ ମାତ୍ ଦେବାକୁ ଟେଷ୍ଟିଂ ସହ ଟିକାକରଣକୁ ପ୍ରାଥମିକତା ଦେଉଛି ବିଏମସି।

ଶ୍ରୀକ୍ଷେତ୍ରରେ ସଂପର୍ଣ୍ଣ ହେଲା ଭଉଁରୀ ନୀତି, ୨୧ ଦିନ ଧରି ଜଳକ୍ରୀଡ଼ା କରିଥିଲେ ମହାପ୍ରଭୁ

ପୁରୀ: ଶ୍ରୀକ୍ଷେତ୍ରରେ ସଂପର୍ଣ୍ଣ ହେଲା ଭଉଁରୀ ବା ଜଳକ୍ରୀଡା ନୀତି । ୨୧ ଦିନ ଧରି ନରେନ୍ଦ୍ର ପୁଷ୍କରିଣୀରେ ଜଳକ୍ରୀଡ଼ା କରିଛନ୍ତି ମହାପ୍ରଭୁଙ୍କ ଚଳନ୍ତି ପ୍ରତିମା । ଚଳିତ ବର୍ଷ କରୋନା କଟକଣା ଭିତରେ ବିନାଭକ୍ତରେ ଜଳକ୍ରୀଡ଼ାର ଆୟୋଜନ କରାଯାଇଥିଲା । ଅକ୍ଷୟ ତୃତୀୟା ତିଥିରୁ ବାହାର ଚନ୍ଦନଯାତ୍ରା ଆରମ୍ଭ ହୋଇ ୨୧ଦିନ ବ୍ୟାପୀ ଚାଲିଥିଲା।

ଯାତଭୋଗ ସରିବା ପରେ ମହାପ୍ରଭୁଙ୍କ ଚଳନ୍ତି ପ୍ରତିମା ମଦନମୋହନ, ରାମକୃଷ୍ଣ, ଭୂଦେବୀ, ଶ୍ରୀଦେବୀ ଓ ଶ୍ରୀକ୍ଷେତ୍ରର ପଞ୍ଚମହାଦେବ ପାଲିଙ୍କି ଓ ମଣି ବିମାନରେ ନରେନ୍ଦ୍ର ପୁଷ୍କରିଣୀକୁ ବିଜେ କରିଥିଲେ । ଆସନ୍ତାକାଲି ମହାପ୍ରଭୁଙ୍କ କୌଣସି ଜଳକ୍ରୀଡ଼ା ହେବନାହିଁ । କେବଳ ହଳଦୀପାଣି ନୀତି ଅନୁଷ୍ଠିତ ହେବ । ମହାପ୍ରଭୁ ପ୍ରଚଣ୍ଡ ରୌଦ୍ରତାପ ଓ ଗ୍ରୀଷ୍ମପ୍ରବାହରୁ ରକ୍ଷା ପାଇଁ ଜଳକ୍ରୀଡ଼ା କରିଥାନ୍ତି । ଯାତ୍ରା ପାଇଁ ଶ୍ରୀମନ୍ଦିର ଠାରୁ ନରେନ୍ଦ୍ର ପୁଷ୍କରିଣୀ ଓ ନରେନ୍ଦ୍ର ପୁଷ୍କରିଣୀ ଚତୁଃପାର୍ଶ୍ଵରେ ୧୪୪ଧାରା ଜାରି କରାଯାଇଥିଲା ।

ଅପହରଣ ଘଟଣାରେ ନୂଆ ମୋଡ: ନିଶା ନିବାରଣ କେନ୍ଦ୍ରରୁ ପଳାଇ ଆସିଥିଲେ ଯୁବକ

ଭୁବନେଶ୍ବର: ରାଜଧାନୀ ଅପହରଣ ଘଟଣାରେ ନୂଆ ମୋଡ । ଅପହରଣ ନୁହେଁ ବଂର ନିଶା ନିବାରଣ କେନ୍ଦ୍ରରୁ ଖସିଯାଇଥିବା ଜଣେ ଯୁବକଙ୍କୁ ଉଦ୍ଧାର କରାଯାଇଥିବା ନେଇ ଖବର ମିଳିଛି । ଡିସିପି ଉମାଶଙ୍କର ଦାସ ଏନେଇ ସୂଚନା ପ୍ରଦାନ କରିଛନ୍ତି । ଅପରାହ୍ନ ସମୟରେ ଭୁବନେଶ୍ୱରର ଡେଲ୍ଟା ଛକ ନିକଟରେ ଏଭଳି ଘଟଣା ଘଟିଥିବାବେଳେ ସାଧାରଣରେ ଏହି ଘଟଣାକୁ ନେଇ ଢେର ଚର୍ଚ୍ଚା ହୋଇଥିଲା ।

ସେପଟେ ସଦ୍ୟ ରିପୋର୍ଟ ଏହା ଅପହରଣ ନୁହେଁ ନିଶା ନିବାରଣ କେନ୍ଦ୍ରରୁ ଖସି ପଳେଇ ଥିଲେ ଉକ୍ତ ଯୁବକ । ନିଶା ନିବାରଣ କେନ୍ଦ୍ରରୁ ଯୁବକ ଖସି ପଳେଇ ଥିବାରୁ ସଂପୃକ୍ତ ସଦସ୍ୟ ଉଠେଇ ନେଇଥିଲେ । କାର ଗାଡି ନମ୍ବର ଆଧାରରେ ପୋଲିସ ଠାବ କରିଥିବାବେଳେ ଏହି ସୂଚନା ପ୍ରାପ୍ତ ହୋଇଛି ।

ନିଶା ନିବାରଣ କେନ୍ଦ୍ରରୁ ଯୁବକ ଜଣଙ୍କ ଖସି ଯିବା ପରେ ସ୍ଥାନୀୟ ଥାନାକୁ ଅବଗତ କରାଯାଇନଥିଲା । ବଂର ଉକ୍ତ ସଂସ୍ଥାର ସଦସ୍ୟମାନେ ଖୋଜା ଖୋଜି କରିବା ପରେ ଡେଲ୍ଟା ଛକ ନିକଟରେ ଠାବ କରିଥିଲେ । ଏବଂ ଯୁବକ ଜଣଙ୍କୁ ଗାଡିରେ ବସାଇବା ବେଳେ ସେ ଚିତ୍କାର କରିବା ସହ ନାରାଜ ହୋଇଥିଲେ । ଫଳରେ ଅପହରଣ କରାଯାଇଥିବା ନେଇ ସ୍ଥାନୀୟ ଲୋକେ କହିଥିଲେ । ପରେ ଭୁବନେଶ୍ୱର ଡିସିପିଙ୍କ କାର୍ଯ୍ୟାଳୟ ପକ୍ଷରୁ ଏନେଇ ସ୍ପଷ୍ଟୀକରଣ କରାଯାଇଛି ।

ତପୁ ମିଶ୍ରଙ୍କୁ ସୋନୁଙ୍କ ଆଶ୍ୱସ୍ତି, ତୁମର କିଛି ହବନି..

ଭୁବନେଶ୍ୱର: ଦୁଃଖିର ସାଥ ଦେଉଥିବା ସୋନୁ ଏବେ ତପୁଙ୍କ ଦେଇଛନ୍ତି ଆଶ୍ୱସ୍ତି । ମେଡିକାଲରେ ଚିକିତ୍ସିତ ହେଉଥିବା ଓଡ଼ିଆ କଣ୍ଠଶିଳ୍ପୀ ତପୁ ମିଶ୍ରଙ୍କ ପାଇଁ ସହାୟତା ପାଇଁ ନିବେଦନ କରିଛନ୍ତି ଅନେକ କଳାକାର ଏବଂ କଣ୍ଠଳିଳ୍ପୀ । କଣ୍ଠଳିଳ୍ପୀ ଗୀତା ଦାସ ସୋନୁ ସୁଡଙ୍କୁ ଟ୍ବିଟ କରି ତପୁ ମିଶ୍ରଙ୍କୁ ୨ଡିଜି ଭ୍ୟାକସିନ ଯୋଗାଇଦେବା ପାଇଁ ନିବେଦନ କରିଥିଲେ । ଏବଂ ଦୀର୍ଘ ଦିନ ଧରି ତପୁ ମିଶ୍ର ଅସୁସ୍ଥ ରହିଥିବା ବେଳେ ତାଙ୍କୁ ସାହାଯ୍ୟ ସହଯୋଗ କରିବା ପାଇଁ ମଧ୍ୟ ଜଣାଇଥିଲେ ।

ସଂନ୍ଧ୍ୟାରେ ବଲିଉଡ ଅଭିନେତା ତଥା ସମାଜସେବୀ ସୋନୁ ସୁଦ ଏହି ଟ୍ବିଟର ଉତ୍ତର ରଖିଥିଲେ । ଏବଂ କହିଥିଲେ ତପୁ କିଛି ହବନି ତୁମର । ସୋନୁଙ୍କ ଏହି ଟ୍ବିଟ ହିଁ ସ୍ପଷ୍ଟ କରୁଛି, ସେ କିଛିନା କିଛି ପ୍ରୟାସ କରିବାକୁ ଯାଉଛନ୍ତି । କଣ୍ଠଶିଳ୍ପୀ ତମୁ ମିଶ୍ରଙ୍କୁ ସହାୟତା ଏବଂ ସହଯୋଗର ହାତ ବଢାଇବାକୁ ଯାଉଥିବା ନେଇ ସୋନୁଙ୍କ ଟ୍ବିଟରୁ ଆଭାସ ମିଳିଛି ।

କୋଭିଡର ଭୟବହତା ଭିତରେ ଏବେ ମଧ୍ୟ ସାଧାରଣ ଲୋକଙ୍କ ସେବା ଜାରି ରଖିଛନ୍ତି ଅଭିନେତା ସୋନୁ ସୁଡ । ଭରସା ଏବଂ ବିଶ୍ବାସର ଅନ୍ୟ ନାମ ପାଲଟିଥିବା ସୋନୁଙ୍କ ଘର ଆଗରେ ପ୍ରତି ଦିନ ଶହ ଶହ ସାଧାରଣ ଲୋକଙ୍କ ଭିଡ ଜମୁଛି । ଅର୍ଥାତ ଭିନ୍ନ ଭିନ୍ନ ସମସ୍ୟାରେ ନେଇ ସୋନୁଙ୍କ ନିକଟକୁ ଆସୁଥିବାବେଳେ ସମସ୍ତଙ୍କ ସମସ୍ୟାର ସମାଧାନ କରିବାରେ ଲାଗିଛନ୍ତି ସୋନୁ ।

ଦିଲ୍ଲୀରୁ ଦୂରଉଛି କୋଭିଡ, ୫ଶହ ତଳେ ଦୈନିକ ସଂକ୍ରମଣ

ନୂଆଦିଲ୍ଲୀ: ମହାମାରୀରୁ ମୁକୁଳୁଛି ରାଜଧାନୀ ଦିଲ୍ଲୀ । ଧିରେ ଧିରେ କମିବାରେ ଲାଗିଛି ଭୂତାଣୁ ଭୟ । ଦିଲ୍ଲୀରେ ୫୦୦ ତଳକୁ ଖସିଛି ଦୈନିକ ସଂକ୍ରମଣ ସଂଖ୍ୟା । ଯାହାକି ଦିଲ୍ଲୀବାସୀଙ୍କୁ ଆଶ୍ବସ୍ତି ଆଣିଦେଇଛି । ଗତ ୨୪ ଘଣ୍ଟାରେ ଦିଲ୍ଲୀରେ ୪୮୭ ଜଣ ସଂକ୍ରମିତ ଚିହ୍ନଟ ହୋଇଥିବାବେଳେ ୪୫ ଜଣକ ମୃତ୍ୟୁ ହୋଇଛି । ଦିଲ୍ଲୀରେ ୯୭.୬୭ ପ୍ରତିଶତ ଆରୋଗ୍ୟ ହାର ରହିଥିବାବେଳେ ୧.୭୧ ପ୍ରତିଶତ ସଂକ୍ରମିତଙ୍କ ମୃତ୍ୟୁ ହୋଇଛି ।

ଏପ୍ରିଲ୍ ୧୯ରୁ ଦିଲ୍ଲୀରେ ସଂକ୍ରମିତଙ୍କ ସଂଖ୍ୟା ଦୃତ ଗତିରେ ବଢି ଚାଲିଥିଲା । ସେହିଭଳି ମେ ୩ରେ ୪୪୮ ଜଣକ ଜୀବନ ନେଇଥିଲା କରୋନା । ଯାହାକି ସବୁଠୁ ସର୍ବାଧିକ ଅଟେ । ତେବେ ଗତ ସପ୍ତାହେ ଧରି ଦିଲ୍ଲୀରେ ସଂକ୍ରମିତ ଓ ମୃତକଙ୍କ ସଂଖ୍ୟା କମିବାରେ ଲାଗିଛି । ଗୋଟେପଟେ କୋଭିଡ ଲହରୀ ଅନ୍ୟପଟେ ଅକ୍ସିଜେନ ଅଭାବରେ ଆଉଟପାଉଟ ହୋଇଯାଉଥିଲେ ଦିଲ୍ଲୀବାସୀ  । କିନ୍ତୁ ଗତ ସପ୍ତାହରେ ଲଗାତର କମିବାରେ ଲାଗୁଥିବା କୋଭିଡ ସଂକ୍ରମଣ ସଂଖ୍ୟା ଦିଲ୍ଲୀବାସୀଙ୍କୁ ଆସ୍ୱସ୍ତି ଆଣିଦେଇଛି  ।

ରିଲାଏନ୍ସ ଜିଓ ପକ୍ଷରୁ ଓଡ଼ିଶାରେ ଗ୍ରାହକ ଅନୁଭୂତିକୁ ଅଧିକ ସମୃଦ୍ଧ କରିବା ପାଇଁ ଅତିରିକ୍ତ ୨୦ ମେଗାହର୍ଜ ସ୍ପେକ୍ଟ୍ରମ୍ ମୃତୟନ

ଭୁବନେଶ୍ୱର: ଓଡ଼ିଶାର ଏକ ନମ୍ବର ଡିଜିଟାଲ୍ ସେବା ପ୍ରଦାନକାରୀ ରିଲାଏନ୍ସ ଜିଓ ପକ୍ଷରୁ ରାଜ୍ୟରେ ଗ୍ରାହକ ଅନୂଭତିକୁ ଅଧିକ ସମୃଦ୍ଧ କରିବା ଲାଗି ନିକଟରେ ଅନୁଷ୍ଠିତ ସ୍ପେକ୍ଟ୍ରମ୍ ନିଲାମରେ ହାସଲ କରାଯାଇଥିବା ଅତିରିକ୍ତ ୨୦ ମେଗାହର୍ଜ ସ୍ପେକ୍ଟ୍ରମ୍‌କୁ ସଫଳତାର ସହ ସମଗ୍ର ରାଜ୍ୟରେ ମୂତୟନ କରିବା କାର୍ଯ୍ୟ ସମ୍ପୂର୍ଣ୍ଣ କରାଯାଇଛି । ଭାରତ ସରକାରଙ୍କ ଦୂରସଂଚାର ବିଭାଗ ପକ୍ଷରୁ ନିକଟରେ ଶେଷ ହୋଇଥିବା ସ୍ପେକ୍ଟ୍ରମ୍ ନିଲାମ ପ୍ରକ୍ରିୟାରେ ଦେଶର ସମସ୍ତ ୨୨ଟି ସର୍କଲରେ ସ୍ପେକ୍ଟ୍ରମ୍ ବ୍ୟବହାର କରିବାର ଅଧିକାରକୁ ସଫଳତାର ସହ ହାସଲ କରିଥିବା ରିଲାଏନ୍ସ ଜିଓ ଇନ୍‌ଫୋକମ୍ (ଆର୍‌ଜେଆଇଏଲ୍‌) ପକ୍ଷରୁ ମାର୍ଚ୍ଚ ମାସରେ ଘୋଷଣା କରାଯାଇଥିଲା । କଂପାନି ୮୦୦, ୧୮୦୦ ଓ ୨୩୦୦ ମେଗାହର୍ଜ ବ୍ୟାଣ୍ଡ୍‌ରେ ସ୍ପେକ୍ଟ୍ରମ୍ ହାସଲ କରିଥିଲା । ଏହି ସ୍ପେକ୍ଟ୍ରମ୍ ନିଲାମରେ ରିଲାଏନ୍ସ ଜିଓ ଓଡ଼ିଶାରେ ୮୦୦ ମେଗାହର୍ଜ ବ୍ୟାଣ୍ଡ୍‌ରେ ୫ ମେଗାହର୍ଜ, ୧୮୦୦ ମେଗାହର୍ଜ ବ୍ୟାଣ୍ଡ୍‌ରେ ୫ ମେଗାହର୍ଜ ଏବଂ ୨୩୦୦ ମେଗାହର୍ଜ ବ୍ୟାଣ୍ଡ୍‌ରେ ୧୦ ମେଗାହର୍ଜ ସ୍ପେକ୍ଟ୍ରମ୍ ସମେତ ମୋଟ ୨୦ ମେଗାହର୍ଜ ଅତିରିକ୍ତ ସ୍ପେକ୍ଟ୍ରମ୍ ହାସଲ କରିଥିଲା ।

ଜିଓ ପକ୍ଷରୁ ସାରା ରାଜ୍ୟରେ ଥିବା ୧୦,୦୦୦ରୁ ଅଧିକ ନେଟ୍‌ୱର୍କ ସ୍ଥଳରେ ସମସ୍ତ ତିନି ପ୍ରକାରର ସ୍ପେକ୍ଟ୍ରମ୍ ମୂତୟନ ସମ୍ପୁର୍ଣ୍ଣ କରାଯାଇଛି । ଏଥି ସହିତ ଓଡ଼ିଶାରେ ବ୍ୟବହାର ଲାଗି ଜିଓ ପାଖରେ ଉପଲବ୍ଧ ଥିବା ମୋଟ ସ୍ପେକ୍ଟ୍ରମ୍ ୬୦ ମେଗାହର୍ଜରେ ପହଂଚିଛି ଯେଉଁଥିରେ ସାମିଲ ରହିଛି ୮୦୦ ଓ ୧୮୦୦ ମେଗାହର୍ଜ ବ୍ୟାଣ୍ଡ୍‌ରେ ୧୦ ମେଗାହର୍ଜ ଲେଖାଏଁ ସ୍ପେକ୍ଟ୍ରମ୍ ଏବଂ ୨୩୦୦ ମେଗାହର୍ଜ ବ୍ୟାଣ୍ଡ୍‌ରେ ୪୦ ମେଗାହର୍ଜ ସ୍ପେକ୍ଟ୍ରମ୍ । ସ୍ପେକ୍ଟ୍ରମ୍‌ରେ ଏହିଭଳି ବ୍ୟାପକ ବୃଦ୍ଧି ଜିଓକୁ ନିଜ ନେଟ୍‌ୱର୍କକୁ ଅଧିକ ସୁଦୃଢ କରିବାରେ ସହାୟକ ହେବା ସହିତ ସାରା ଓଡ଼ିଶାର ଜିଓ ଗ୍ରାହକମାନଙ୍କ ପାଇଁ ମୋବାଇଲ୍ ବ୍ୟବହାର ଅନୁଭୂତିକୁ ବହୁଗୁଣା ସମୃଦ୍ଧ କରିବ ।

ସଂପ୍ରତି ମହାମାରୀ ଯୋଗୁଁ ସୀମିତ ଗମନାଗମନ ଓ ଲକ୍‌ଡାଉନ୍ ସ୍ଥିତି ଦୃଷ୍ଟିରୁ ଏହା ହେଉଛି ଏକ ସମୟୋପଯୋଗୀ ଯୋଗଦାନ ଯାହା ଛାତ୍ରଛାତ୍ରୀମାନଙ୍କୁ ଅନଲାଇନ୍ କ୍ଲାସ୍ କରିପାରିବା ଏବଂ କର୍ମଚାରୀ ଓ ପେସାଦାରମାନଙ୍କୁ ୱାର୍କ-ଫ୍ରମ୍‌-ହୋମ୍‌ରେ କାମ କରିବା ସହ ସୁରକ୍ଷିତ ଭାବେ ଘରେ ରହି ନିରବଚ୍ଛିନ୍ନ ଭାବେ କାର୍ଯ୍ୟ ସମ୍ପାଦନ କରିବାରେ ସହାୟକ ହେବ । ଯୋଗାଯୋଗ, ବେଗ ଓ ଅନୁଭତିରେ ବ୍ୟାପକ ଉନ୍ନତି ମହାମାରୀର ମୁକାବିଲା ଲାଗି ନିରବଚ୍ଛିନ୍ନ ଭାବେ କାର୍ଯ୍ୟ କରୁଥିବା ସ୍ୱାସ୍ଥ୍ୟ କ୍ଷେତ୍ର ଓ ଆଗଧାଡ଼ିର ଯୋଦ୍ଧାଙ୍କ ପାଇଁ ବିଶେଷ ଭାବରେ ସହାୟକ ହେବ ।

ଏଠାରେ ଉଲ୍ଲେଖଯୋଗ୍ୟ ଯେ ରାଜ୍ୟରେ ୧.୪ କୋଟି ମୋବାଇଲ୍ ଉପଭୋକ୍ତାଙ୍କ ସହିତ ରିଲାଏନ୍ସ ଜିଓ ଓଡିଶାରେ ଏକ ନମ୍ବର ଡିଜିଟାଲ୍ ସେବା ପ୍ରଦାନକାରୀ ହେବା ସହିତ ଓଡ଼ିଶାର ୪୧% ମୋବାଇଲ୍ ଗ୍ରାହକ ତଥା ଏହି କ୍ଷେତ୍ରରେ ରାଜସ୍ୱର ୫୦%ରୁ ଅଧିକ ବଜାର ଅଂଶ ହାସଲ କରିଛି । ୪ଜି ଟାୱାରର ଅଧିକ ଆବଶ୍ୟକତାକୁ ଦୃଷ୍ଟିରେ ରଖି ୨୦୨୧ରେ ଜିଓ ଓଡ଼ିଶାରେ ଏହାର ୪ଜି ନେଟ୍‌ୱର୍କକୁ ଅଧିକ ସମ୍ପ୍ରସାରିତ କରୁଥିବା ବେଳେ ଅନେକ ଅପହଂଚ ଇଲାକାରେ ସଂଯୋଗ ପ୍ରଦାନ କରୁଛି । ବର୍ତମାନ ରାଜ୍ୟରେ ଜିଓର ୧୦,୦୦୦ରୁ ଅଧିକ ୪ଜି ନେଟ୍‌ୱର୍କ ଟାୱାର ରହିଛି ଯାହା ହେଉଛି ସର୍ବବୃହତ ବାସ୍ତବ ୪ଜି ଉପସ୍ଥିତି । ମାସ ପରେ ମାସ ରାଜ୍ୟର ପ୍ରତି ଜିଲ୍ଲାରେ ଅଧିକରୁ ଅଧିକ ଉପଭୋକ୍ତା ଯୋଡ଼ି ଜିଓ ରାଜ୍ୟର ସବୁଠୁ ପସନ୍ଦର ଡିଜିଟାଲ୍ ସେବା ପ୍ରଦାନକାରୀ ହୋଇରହିଛି ।

ନିକଟରେ ଅନୁଷ୍ଠିତ ହୋଇଥିବା ସ୍ପେକ୍ଟ୍ରମ୍ ନିଲାମରେ ରିଲାଏନ୍ସ ଜିଓ ପକ୍ଷରୁ ୫୭,୧୨୩ କୋଟି ଟଙ୍କା ମୂଲ୍ୟରେ ୨୦ ବର୍ଷ ଅବଧି ପାଇଁ ଦେଶର ୨୨ଟି ସର୍କଲ୍ ନିମନ୍ତେ ୮୦୦ ମେଗାହର୍ଜ, ୧୮୦୦ ମେଗାହର୍ଜ ଓ ୨୩୦୦ ମେଗାହର୍ଜ ବ୍ୟାଣ୍ଡ୍‌ରେ ମୋଟ ୪୮୮.୩୫ ମେଗାର୍ହ ସ୍ପେକ୍ଟ୍ରମ୍ ହାସଲ କରାଯାଇଛି । ଏହା ସହିତ ଜିଓ ଦେଶରେ ଏହାର ସ୍ପେକ୍ଟ୍ରମ୍ ଉପସ୍ଥିତିରେ ଉଲ୍ଲେଖନୀୟ ଉନ୍ନତି ଆଣି ୫୫% ବୃଦ୍ଧି ସହ ୧୭୧୭ ମେଗାହର୍ଜରେ ପହଂଚାଇଛି । ଭାରତରେ ଜିଓର ଏବେ ୪୨.୬ କୋଟିରୁ ଅଧିକ ଉପଭୋକ୍ତା ରହିଛନ୍ତି ଏବଂ ସ୍ପେକ୍ଟ୍ରମ୍‌ରେ ବୃଦ୍ଧି ସହିତ ଜିଓ ପାଖରେ ନୂଆ ଓ ପୁରୁଣା ଉପଭୋକ୍ତାଙ୍କୁ ସେବା ପ୍ରଦାନ କରିବା ଲାଗି ଏକ ସୁଦୃଢ଼ ନେଟ୍‌ୱର୍କ ଦକ୍ଷତା ରହିବ । ଏହି ଉନ୍ନତି ପରବର୍ତୀ ୩୦୦ ନିୟୁତ ଉପଭୋକ୍ତା ଯୋଡ଼ିବାରେ ସହାୟକ ହେବ ଯାହା ଡିଜିଟାଲ୍ ସେବାକୁ ବଢ଼ାଇବା ସହ ୫ଜି ସେବାକୁ ରୂପାନ୍ତରିତ ହେବାରେ ସହାୟକ ହେବ ।