ନୂଆଦିଲ୍ଲୀ: ସୀମା ପାର ଚୋରା ଚାଲାଣ ହେଉଛି ଡ୍ରଗ୍ସ। ସୀମା ସୁରକ୍ଷାର ଦାୟୀତ୍ୱରେ ଥିବା ଯବାନ କରୁଛନ୍ତି ଶତ୍ରୁଙ୍କ ସହ ଡିଲ। ଟଙ୍କା ପାଇଁ ବିକି ଦେଉଛନ୍ତି ଦେଶର ସୁରକ୍ଷା। ଜାତୀୟ ଅନୁସନ୍ଧାନ ଏଜେନ୍ସି NIA ଏକ ବଡ଼ ତଦନ୍ତ କରିଛି। ଚୋରା ଚାଲାଣକାରୀଙ୍କୁ ସାହାଯ୍ୟ କରିବା ଅଭିଯୋଗରେ NIA ସୀମା ସୁରକ୍ଷା ବାହିନୀ BSFର ଆସିଷ୍ଟାଣ୍ଟ ସବ୍ ଇନ୍ସପେକ୍ଟରଙ୍କୁ ଗିରଫ କରିଛି। ଏହି କାର୍ଯ୍ୟ ଜାମ୍ମୁ କାଶ୍ମୀରର ହନ୍ଦୱାଡ଼ାଠାରେ ହୋଇଛି। କୁହାଯାଉଛି ଯେ ଏହି ଚୋରା ଚାଲାଣକାରୀଙ୍କ ଚେର ଲଶ୍କର-ଏ-ତୋଇବା ଏବଂ ହିଜବୁଲ ମୁଜାହିଦ୍ଦିନ ଆତଙ୍କବାଦୀ ସଂଗଠନ ସହିତ ଯୋଡ଼ି ହୋଇଛି। ତେବେ ଏହାପୂର୍ବରୁ ମଧ୍ୟ ଅନେକ ଥର ସୁରକ୍ଷା ବ୍ୟବସ୍ଥା ସହ ଜଡିତ ବ୍ୟକ୍ତିଙ୍କୁ ଚୋରା ଚାଲାଣକାରୀଙ୍କୁ ସାହାଯ୍ୟ କରି ଗିରଫ କରାଯାଇଛି।
ଜାମ୍ମୁ କାଶ୍ମୀରର ହନ୍ଦୱାଡ଼ା ବିଏସ୍ଏଫ୍ ଆସିଷ୍ଟାଣ୍ଟ ସବ୍ ଇନ୍ସପେକ୍ଟର ରୋମେଶ କୁମାରଙ୍କୁ ଗିରଫ କରାଯାଇଛି। ଗିରଫ ପରେ ତାଙ୍କ ଉପରେ NIA କଟକଣା ଜାରି କରିଛି। ଆତଙ୍କବାଦୀଙ୍କୁ ସାହାଯ୍ୟ କରିବା ଅଭିଯୋଗରେ ଜାନୁଆରୀ ୨୦୨୦ ପରେ ଏହା ହେଉଛି ଦ୍ୱିତୀୟ ଗିରଫ। ଅଧିକ ପ୍ରମାଣ ପାଇବା ପାଇଁ ରୋମେଶଙ୍କ ଘରେ NIA ଦ୍ୱାରା ରେଡ ହୋଇଛି। ଏଥି ସହିତ NIA ପୂର୍ବରୁ ଡେପୁଟି ପୋଲିସ ଅଧୀକ୍ଷକ ଦେବେନ୍ଦ୍ର ସିଂଙ୍କୁ ମଧ୍ୟ ଗିରଫ କରିଛି। ସେ ହିଜବୁଲ ଆତଙ୍କବାଦୀଙ୍କୁ ସାହାଯ୍ୟ କରିଥିବା ଅଭିଯୋଗ ହୋଇଥିଲା।
ଏକ ରିପୋର୍ଟ ଅନୁଯାୟୀ, ରୋମେଶଙ୍କୁ ବାରାମୁଲ୍ଲା ଏବଂ ହନ୍ଦୱାଡ଼ା ଅଞ୍ଚଳରେ ଚୋରା ଚାଲାଣକାରୀଙ୍କ ଯାଞ୍ଚ ପାଇଁ ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋରେ ଡେପୁଟେସନ ନିୟୋଜିତ କରାଯାଇଥିଲା। ଅଭିଯୋଗ ହୋଇଛି ଯେ ଏହି ସମୟ ମଧ୍ୟରେ ସେ ଆତଙ୍କବାଦୀ ଗୋଷ୍ଠୀ ସହ ଜଡିତ ଡ୍ରଗ୍ ଚୋରା ଚାଲାଣକାରୀଙ୍କ ସହିତ ସମ୍ପର୍କ ଯୋଡ଼ିବା ଆରମ୍ଭ କରିଥିଲେ।
ତେବେ ସୋମବାର ଦୀର୍ଘ ସମୟନ ଧରି ପଚରାଉଚରା ପରେ ରୋମେଶଙ୍କୁ ଗିରଫ କରାଯାଇଥିଲା। ମଙ୍ଗଳବାର ତାଙ୍କୁ ଜାମ୍ମୁର ସ୍ୱତନ୍ତ୍ର କୋର୍ଟରେ ହାଜର କରାଯାଇଥିଲା। କୁମାରଙ୍କୁ ଏଠାରୁ ଦୁଇ ସପ୍ତାହ ପର୍ଯ୍ୟନ୍ତ ପୋଲିସ ହେପାଜତକୁ ପଠାଯାଇଛି। ଗୋପନୀୟତାର ସହିତ ଜଣେ ଅଧିକାରୀ କହିଛନ୍ତି ଯେ ଚାରିଜଣ ଡ୍ରଗ୍ସ ଚୋରା ଚାଲାଣକାରୀଙ୍କୁ ପଚରାଉଚରା ବେଳେ ରୋମେଶଙ୍କ ନାଁ ସାମ୍ନାକୁ ଆସିଥିଲା। ସେପଟେ ଦିଲ୍ଲୀର ବିଏସଏଫ ମୁଖପାତ୍ର କହିଛନ୍ତି ଯେ ଏହି ଗିରଫଦାରୀ ସମ୍ପର୍କରେ ସେମାନେ ଅଧିକ ତଥ୍ୟ ସଂଗ୍ରହ କରିବାକୁ ଚେଷ୍ଟା କରୁଛନ୍ତି। ସେ କହିଛନ୍ତି ଯେ ଅପରାଧିକ ମାମଲାରେ ଗିରଫ ହୋଇଥିବା ଯବାନଙ୍କୁ ନିଲମ୍ବିତ କରାଯିବ।
