spot_img
Home Blog Page 5971

West Bengal Election 2021: ସରିଲା ପ୍ରଚାର, ଏଥର ଭାଗ୍ୟ ପରୀକ୍ଷା କରିବେ ଭୋଟର

କୋଲକାତା: ପ୍ରଚାର ଦାଣ୍ଡରେ ଢେର ଝାଳ ବୁହାଇଲେ ନେତା । ଏଥର ଭାଗ୍ୟ ପରୀକ୍ଷା କରିବେ ଭୋଟର। ନେତାଙ୍କ ପରେ ଏବେ ଜନତାଙ୍କ ପାଳି। ପଶ୍ଚିମବଙ୍ଗ ଓ ଆସାମରେ ଦ୍ୱିତୀୟ ପର୍ଯ୍ୟାୟ ନିର୍ବାଚନ ପାଇଁ ଶେଷ ହୋଇଛି ପ୍ରଚାର। କାଲି ହେବ ମତଦାନ। ଏ ନେଇ ସମସ୍ତ ପ୍ରସ୍ତୁତି ଶେଷ ହୋଇଛି।

ଆସନ୍ତାକାଲି ପଶ୍ଚିମବଙ୍ଗର ୩୦ଟି ଓ ଆସାମର ୩୯ଟି ବିଧାନସଭା ଆସନରେ ହେବ ଭୋଟିଂ। ତେବେ ପଶ୍ଚିମବଙ୍ଗ ଉପରେ ଦେଶବାସୀଙ୍କ ନଜର ରହିଥିବାବେଳେ ନନ୍ଦିଗ୍ରାମରେ ହେଉଛି ହାଇଭୋଲଟେଜ୍ ଟକ୍କର। ଏଠି ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ବିରୋଧରେ ମୈଦାନରେ ଅଛନ୍ତି ବିଜେପିର ହେଭିଓ୍ବେଟ୍ ତଥା ପୂର୍ବତନ ଟିଏମସି ନେତା ଶୁଭେନ୍ଦୁ ଅଧିକାରୀ। ନନ୍ଦିଗ୍ରାମ ହାତେଇବା ପାଇଁ ଦିଦି ଓ ଦାଦା ଜି-ଜାନ୍ ଲଗାଇଥିବାବେଳେ ଏବେ ଭୋଟର କାହା ଉପରେ ଭରସା କରିବେ ତାହା ଉପରେ ରହିଛି ନଜର।

ପଶ୍ଚିମବଙ୍ଗରେ ଯେଉଁ ୩୦ଟି ଆସନରେ ନିର୍ବାଚନ ହେବ ଗତ ନିର୍ବାଚନରେ ଏହି ଆସନ ଉପରେ ଟିଏମସିର ଅଧିକ ପ୍ରାର୍ଥୀ ବିଜୟୀ ହୋଇଥିଲେ । ହେଲେ ଏଥର ଚିତ୍ର କିନ୍ତୁ ଓଲଟା। ସେପଟେ ଆସାମରେ ବିଜେପି ଶାସନରେ ଥିବାବେଳେ କଂଗ୍ରେସ କ୍ଷମତାକୁ ଫେରିବା ପାଇଁ ଜୋର ଲଗାଇଛି। ତାମିଲନାଡୁ, କେରଳ ଓ ପୁଡୁଚେରୀରେ ମଧ୍ୟ ଜୋର ଧରିଛି ନିର୍ବାଚନୀ ପ୍ରଚାର।

ମେଡିକାଲ ଓ ଇଞ୍ଜିନିୟରିଂ କଲେଜରେ ୧୫ ପ୍ରତିଶତ ସଂରକ୍ଷଣ ନେଇ ବିଜ୍ଞପ୍ତି ପ୍ରକାଶ

ଭୁବନେଶ୍ୱର: ଏଣିକି ସରକାରୀ ସ୍କୁଲରେ ପଢୁଥିବା ଛାତ୍ରଛାତ୍ରୀଙ୍କ ପାଇଁ ମେଡିକାଲ ଓ ଇଂଜିନିୟରିଂ କଲେଜରେ ୧୫ ପ୍ରତିଶତ ସଂରକ୍ଷଣ ରହିବ । ଏନେଇ ରାଜ୍ୟ ସରକାରଙ୍କ ଦକ୍ଷତା କୌଶଳ ବିକାଶ ଓ ବୈଷୟିକ ଶିକ୍ଷା ବିଭାଗ ଆଜି ବିଜ୍ଞପ୍ତି ପ୍ରକାଶ କରିଛି । ଏ ସମ୍ପର୍କରେ ବିଭାଗ ପକ୍ଷରୁ ଗଠିତ ଉଚ୍ଚ କ୍ଷମତା ସମ୍ପନ୍ନ କମିଟି ରାଜ୍ୟ ସରକାରଙ୍କୁ ପୂର୍ବରୁ ସୁପାରିସ୍ କରିଥିଲା । ହାଇକୋର୍ଟର ପୂର୍ବତନ ବିଚାରପତି ଡକ୍ଟର ଏ.କେ ମିଶ୍ରଙ୍କ ଅଧ୍ୟକ୍ଷତାରେ ଜାନୁଆରୀ ୮ ତାରିଖରେ ଉଚ୍ଚ କ୍ଷମତା ସମ୍ପନ୍ନ କମିଟି ଗଠନ ହୋଇଥିଲା । ହାଇପାୱାର କମିଟିର ସୁପାରିସ୍ ଗୁଡ଼ିକ ହେଲା, ସରକାରୀ ସ୍କୁଲ ଓ ଜୁନିଅର କଲେଜରେ ପାସ ହେଉଥିବା ଛାତ୍ରଛାତ୍ରୀଙ୍କ ପାଇଁ ମେଡିକାଲ ଓ ଇଂଜିନିୟରିଂ କଲେଜରେ ୧୫ ପ୍ରତିଶତ ସଂରକ୍ଷଣ ପ୍ରଦାନ । ଏହି ସଂରକ୍ଷଣ ବ୍ୟବସ୍ଥା ଉଭୟ ସାଧାରଣ ବର୍ଗ ଓ ସରଂକ୍ଷିତ ବର୍ଗଙ୍କ କ୍ଷେତ୍ରରେ ସମାନଭାବରେ ଲାଗୁ ହେବ । ଓଡ଼ିଶା ପ୍ରଫେସନାଲ ଏଜୁକେସନ୍ ଆଇନ ୨୦୦୭ର ସେକ୍ସନ-୯ ଅନୁସାରେ ରାଜ୍ୟ ସରକାର ଏ ନେଇ ବିଜ୍ଞପ୍ତି କରିପାରିବେ ବୋଲି କମିଟି ସୁପାରିସ କରିଥିଲା । ସେହି ଅନୁସାରେ ଆଜି କୌଶଳ ବିକାଶ ବିଭାଗ ବିଜ୍ଞପ୍ତି ପ୍ରକାଶ କରିଛି । ବିଜ୍ଞପ୍ତି ଅନୁସାରେ ୧୫ ପ୍ରତିଶତ ସଂରକ୍ଷଣ ସୁବିଧା ପାଇବାକୁ ଥିବା ଶିକ୍ଷାନୁଷ୍ଠାନଗୁଡିକ ହେଲେ ସରକାରୀ ହାଇସ୍କୁଲ, ସରକାରୀ ଅନୁଦାନପ୍ରାପ୍ତ ହାଇସ୍କୁଲ, ଉଚ୍ଚ ମାଧ୍ୟମିକ ସ୍କୁଲ, ଜୁନିଅର କଲେଜ ପ୍ରମୁଖ । ସେହିପରି ସଂରକ୍ଷଣ ସୁବିଧା ଥିବା ଡାକ୍ତରୀ ପାଠ୍ୟକ୍ରମରେ ଏମବିବିଏସ, ବିଡିଏସ, ବିଏଚଏମଏସ, ବିଏଏମଏସ, ବିଏସଏମଏସ, ବିୟୁଏମଏସ ସାମିଲ ରହିଛି । ଇଂଜିନିୟରିଂ କୋର୍ସରେ ବି.ଟେକ, ବି.ଇ, ଏବଂ ବି.ଆର୍କକୁ ସାମିଲ କରାଯାଇଛି । ସେହିପରି ବିଜ୍ଞପ୍ତିରେ କୁହାଯାଇଛି ଯେ, ଏହି ଛାତ୍ରଛାତ୍ରୀ ଅଣସଂରକ୍ଷିତ ସିଟ ପାଇଁ ମଧ୍ୟ ପ୍ରତିଦ୍ବନ୍ଦ୍ବିତା କରିପାରିବେ । ଯଦି ୧୫ ପ୍ରତିଶତ ସିଟ ପୂରଣ ନହୁଏ ତେବେ ସେହି କ୍ଷେତ୍ରରେ ତାହା ଅନ୍ୟବର୍ଗର ଛାତ୍ରଛାତ୍ରୀଙ୍କୁ ଆବଣ୍ଟନ କରାଯାଇପାରିବ ।

ରାଜ୍ୟରେ ଆଉ ୨୯୭ ଜଣ କରୋନା ସଂକ୍ରମିତ ଚିହ୍ନଟ

ଭୁବନେଶ୍ୱର: ରାଜ୍ୟରେ ଆଉ ୨୯୭ ଜଣ କରୋନା ସଂକ୍ରମିତ ଚିହ୍ନଟ ହୋଇଛନ୍ତି । ଚିହ୍ନଟ ସଂକ୍ରମିତଙ୍କ ମଧ୍ୟରେ ୧୭୪ ଜଣ କ୍ୱାରେଣ୍ଟାଇନ୍‌ରେ ରହିଥିବା ବେଳେ ୧୨୩ ଜଣ ସ୍ଥାନୀୟ ସଂକ୍ରମିତ ରହିଛନ୍ତି । ଅନୁଗୁଳରୁ ୯, ବାଲେଶ୍ୱର ୬, ବରଗଡ଼ ୧୮, ଭଦ୍ରକ ୨, କଟକ ୧୭, ଢେଙ୍କାନାଳ ୧, ଗଞ୍ଜାମ ୭, ଜଗତସିଂହପୁର ୨, ଯାଜପୁର ୫, ଝାରସୁଗୁଡ଼ା ୫, କଳାହାଣ୍ଡି ୫୭, କେନ୍ଦ୍ରାପଡ଼ା ୨,  କେନ୍ଦୁଝର ୧୨, ଖୋର୍ଦ୍ଧା ୩୩, କୋରାପୁଟ ୫, ମୟୂରଭଞ୍ଜ ୭, ନବରଙ୍ଗପୁର ୩, ନୟାଗଡ଼ ୨, ନୂଆପଡ଼ା ୩୧, ପୁରୀ ୬, ସମ୍ୱଲପୁର ୧୭, ସୋନପୁର ୩, ସୁନ୍ଦରଗଡ଼ ୩୮ ଏବଂ ଷ୍ଟେଟ୍ ପୁଲ୍‌ରୁ ୪ ଜଣ ସଂକ୍ରମିତ ଚହ୍ନଟ ହୋଇଛନ୍ତି । ଏଯାବତ୍ ରାଜ୍ୟରେ ୯୦ ଲକ୍ଷ ୪୩ ହଜାର ୯୭୨ ଜଣଙ୍କ କରୋନା ଟେଷ୍ଟିଂ ହୋଇସାରିଥିବା ବେଳେ ୩ ଲକ୍ଷ ୪୦ ହଜାର ୯୧୭ ଜଣ କରୋନା ସଂକ୍ରମିତ ଚିହ୍ନଟ ହୋଇଛନ୍ତି । ସେମାନଙ୍କ ମଧ୍ୟରୁ ୩ ଲକ୍ଷ ୩୬ ହଜାର ୯୩୦ ଜଣ ସୁସ୍ଥ ହୋଇ ଘରକୁ ଫେରିଥିବା ବେଳେ ୨୦୧୩ ଜଣ ଏବେ ଚିକିତ୍ସାଧିନ ଅଛନ୍ତି ।

ଏଥିସହିତ ପଢ଼ନ୍ତୁ: ୩ ଶହ ଟପିଲା ଦୈନିକ ମୃତ୍ୟୁ ସଂଖ୍ୟା, ୫୩ ହଜାରରୁ ଅଧିକ ସଂକ୍ରମିତ ଚିହ୍ନଟ

୩ ଶହ ଟପିଲା ଦୈନିକ ମୃତ୍ୟୁ ସଂଖ୍ୟା, ୫୩ ହଜାରରୁ ଅଧିକ ସଂକ୍ରମିତ ଚିହ୍ନଟ

ନୂଆଦିଲ୍ଲୀ: ଦେଶରେ ଆତଙ୍କ ଖେଳାଇଛି କରୋନାର ଦ୍ୱିତୀୟ ଲହରୀ। ଗତ ୨୪ ଘଣ୍ଟାରେ ପୁଣିଥରେ  ୫୦ ହଜାର ଟପିଛି ସଂକ୍ରମିତଙ୍କ ସଂଖ୍ୟା । ଗୋଟିଏ ଦିନରେ ଆଉ ୫୩ ହଜାର ୪୮୦ନୂଆ ଆକ୍ରାନ୍ତ ଚିହ୍ନଟ ହୋଇଛନ୍ତି। ଏଥିସହ ୩୫୪ ଜଣଙ୍କ ମୃତ୍ୟୁ ହୋଇଛି। ଏନେଇ କେନ୍ଦ୍ର ସ୍ୱାସ୍ଥ୍ୟମନ୍ତ୍ରାଳୟ ଟ୍ୱିଟ୍ କରି ସୂଚନା ଦେଇଛି।

ସେହିପରି କରୋନାରୁ ଆଉ ଆଉ ୪୧ ହଜାର ୨୮୦ ସଂକ୍ରମିତ ସୁସ୍ଥ ହୋଇଛନ୍ତି। ତେବେ ଏଥିସହ ମୋଟ ସଂକ୍ରମିତଙ୍କ ସଂଖ୍ୟା ୧ କୋଟି ୨୧ ଲକ୍ଷ ୪୯ ହଜାର ୩୩୫ ଛୁଇଥିବା ବେଳେ, ୧ କୋଟି ୧୪ ଲକ୍ଷ ୩୪ହଜାର ୩୦୧ସଂକ୍ରମିତ ସୁସ୍ଥ ହୋଇଛନ୍ତି। ଏବେ ବି  ସାରାଦେଶରେ ୫ ଲକ୍ଷ ୫୨ ହଜାର ୫୬୬ ସକ୍ରିୟ ମାମଲା ରହିଛି। ମୋଟ ମୃତ୍ୟୁ ସଂଖ୍ୟା ୧ ଲକ୍ଷ ୬୨ ହଜାର ୪୬୮ରେ ପହଞ୍ଚିଛି। ସେପଟେ ଦେଶରେ ଟିକାକରଣ ଜାରି ଥିବା ବେଳେ, ଏବେ ସୁଦ୍ଧା ୬ କୋଟି ୩୦ ଲକ୍ଷ ୫୪ ହଜାର ୩୫୩ ଜଣଙ୍କୁ ଟିକା ଦିଆଯାଇଛି।

ବନ୍ଦ ହେବ ତାଳଚେର ଥର୍ମାଲ ପାଓ୍ୱାର ଷ୍ଟେସନ୍

ଅନୁଗୁଳ: ଏନ୍‌ଟିପିସି ପରିଚାଳିତ ଅନୁଗୋଳ ଜିଲ୍ଲା ତାଳଚେର ଥର୍ମାଲ ପାୱାର ଷ୍ଟେସନ୍ (ଟିଟିପିଏସ୍‌)କୁ ନେଇ ଲାଗି ରହିଥିବା ନାନା କଳ୍ପନାଜଳ୍ପନାର ଏକ ପ୍ରକାର ଅନ୍ତଃ ଘଟାଇଛନ୍ତି ଏନ୍‌ଟିପିସି କର୍ତ୍ତୃପକ୍ଷ । ପୂର୍ବ ନିର୍ଦ୍ଧାରିତ ତାରିଖ ଅନୁସାରେ ୩୧ ତାରିଖରୁ  ତାପଜ ବିଦ୍ୟୁତ୍‌ କେନ୍ଦ୍ରର ୟୁନିଟ୍‌ ଗୁଡ଼ିକୁ ବିଧିବଦ୍ଧ ଭାବେ ବନ୍ଦ କରାଯିବ ବୋଲି କମ୍ପାନୀ ନିଷ୍ପତ୍ତି ନେଇଛି । ଏନେଇ ଏନ୍‌ଟିପିସି ସେକ୍ରେଟାରୀ ନନ୍ଦିନୀ ସରକାର କେନ୍ଦ୍ର ଓ ରାଜ୍ୟ ସରକାର ଏବଂ ଟିଟିପିଏସ୍‌ କର୍ତ୍ତୃପକ୍ଷଙ୍କୁ ଚିଠି ମାଧ୍ୟମରେ ଜଣାଇ ଦେଇଛନ୍ତି । ତେବେ ଟିଟିପିଏସ୍‌ରେ ଷ୍ଟେଜ-୩ ୟୁନିଟ୍‌ ସ୍ଥାପନ ସମ୍ପର୍କରେ ଏନ୍‌ଟିପିସି କର୍ତ୍ତୃପକ୍ଷ କିଛି ଉଲ୍ଲେଖ କରି ନଥିବା ସୂଚନା ମିଳିଛି । ଆଜି ସକାଳୁ ପ୍ଲାଣ୍ଟର ସମସ୍ତ ୟୁନିଟ ବନ୍ଦ କରାଯାଇଥିବା ଦେଖାଯାଇଛି । ପ୍ଲାଣ୍ଟରେ ଥିବା ୬ଟି ଯାକ ୟୁନିଟରୁ ବିଦ୍ୟୁତ ଉତ୍ପାଦନ ଠପ୍ ହୋଇଯାଇଛି । ସୂଚନା ଅନୁସାରେ , କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ନିର୍ଦ୍ଦେଶ ପାଳନ କରିନଥିବାରୁ ମାର୍ଚ୍ଚ ୩୧ ପରଠାରୁ ଟିଟିପିଏସ୍‌ ପରିଚାଳନା ପାଇଁ ଏନ୍‌ଟିପିସିକୁ ଅନୁମତି ମିଳିନାହିଁ । ତେବେ ନିର୍ଦ୍ଧାରିତ ତାରିଖ ପୂର୍ବରୁ ଗତ ୨୨ ତାରିଖ ରାତିରୁ ଏନ୍‌ଟିପିସି କର୍ତ୍ତୃପକ୍ଷ ପର୍ଯ୍ୟାୟକ୍ରମେ ଟିଟିପିଏସ୍‌ର ୬ଟି ୟୁନିଟ୍‌କୁ ବନ୍ଦ କରିଦେଇଥିଲେ । ଏ ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉଦ୍‌ବେଗ ପ୍ରକାଶ କରିଥିଲେ । ରାଜ୍ୟ ସରକାରଙ୍କ ଉଚ୍ଚସ୍ତରୀୟ କ୍ଲିୟରାନ୍ସ କମିଟି ଷ୍ଟେଜ୍‌-୩ ପ୍ରକଳ୍ପ ସ୍ଥାପନ କରିବାକୁ ଅନୁମୋଦନ ଦେଇସାରିଥିବାରୁ ତୁରନ୍ତ ଉକ୍ତ କାର୍ଯ୍ୟ ଆରମ୍ଭ ନିମନ୍ତେ କେନ୍ଦ୍ର ଶକ୍ତି ରାଷ୍ଟ୍ରମନ୍ତ୍ରୀ ଆର.କେ. ସିଂଙ୍କୁ ମୁଖ୍ୟମନ୍ତ୍ରୀ ଗତ ୨୪ ତାରିଖରେ ଚିଠି ଲେଖିଥିଲେ । ଏହା ସତ୍ୱେ କେନ୍ଦ୍ର ସରକାର ନା ପରିବେଶ ମଞ୍ଜୁରୀ ଦେଇଛନ୍ତି ନା ପ୍ଲାଣ୍ଟର ସମ୍ପ୍ରସାରଣ ଏବଂ ନବୀକରଣ କରାଇଛନ୍ତି । ଯାହା ଫଳରେ କମ୍ପାନୀ କର୍ତ୍ତୃପକ୍ଷ ଆଜି ପ୍ଲାଣ୍ଟକୁ ବନ୍ଦ କରି ଦେଇଥିବା ଜଣା ପଡ଼ିଛି  ।

ସାଢ଼େ ୧୧ଟା ଯାଏଁ ଗୃହ ମୁଲତବୀ

ଭୁବନେଶ୍ୱର:  ଗୃହ ଆରମ୍ଭରୁ ବିରୋଧୀଙ୍କ ହୋହଲ୍ଲା। ବିଦ୍ୟୁତ ଶୁଳ୍କ ବୃଦ୍ଧିକୁ ବିରୋଧ କରି ଗୃହର ମଧ୍ୟ ଭାଗରେ କଂଗ୍ରେସ ସଦସ୍ୟଙ୍କ ହଟ୍ଟଗୋଳ । ସେପଟେ ବିଜେପିର ସଦସ୍ୟମାନେ ପ୍ରଧାନମନ୍ତ୍ରୀ ଆବସଯୋଜନର ଲୋଗୋ ପରିବର୍ତ୍ତନ କରିବା ପ୍ରସଙ୍ଗକୁ  ନେଇ ହୋହଲା କରିଥିଲେ । ବାଚସ୍ପତି  ଗୃହକୁ  ୧୧ ଟା ୩୦ ମିନିଟ୍ ପର୍ଯ୍ୟନ୍ତ ମୁଲତବୀ ଘୋଷଣା କରିଛନ୍ତି ।  ସୂଚନା ଯୋଗ୍ୟ ଯେ, ବିଧାନସଭାରେ ଦ୍ବିତୀୟ ପର୍ଯ୍ୟାୟ ବଜେଟ ଅଧିବେଶନରେ ଆଜି ପ୍ରଶ୍ନକାଳ ରହିଛି । ଆଜି ପ୍ରଶ୍ନକାଳରେ ଖାଦ୍ୟଯୋଗାଣ,ସମବାୟ, କୄଷି ଓ କୄଷକ ଶସକ୍ତିକରଣ, ମତ୍ସ୍ୟ ପଶୁସମ୍ପଦ, ଉଚ୍ଚଶିକ୍ଷା, ଗଣଶିକ୍ଷା ବିଭାଗ ରହିଛି । ସେହିଭଳି ବ୍ୟୟ ମଂଜୁରୀ ବିଲ ଉପରେ ଆଲୋଚନା ହେବା ନେଇ କାର୍ଯ୍ୟକ୍ରମ ରହିଛି । ଆଜି କିଛି ବାର୍ଷିକ ରିପୋର୍ଟ ସହ କମିଟି ରିପୋର୍ଟ ମଧ୍ୟ ଉପସ୍ଥାପିତ ହେବ ।

ପୁଣି ବୁର୍ଲା ଭିସୁଟ୍‌ରେ ରାଗିଂ ଅଭିଯୋଗ: ଭୟରେ ହଷ୍ଟେଲ ଛାଡ଼ିଲେ ଛାତ୍ର

ବୁର୍ଲା: ପୁଣି ବୁର୍ଲା ଭିସୁଟ୍‌ରୁ ଆସିଲା ରାଗିଂର ଅଭିଯୋଗ । କିଛିଦିନର ବ୍ୟବଧାନରେ ରାଜ୍ୟର ଏହି ପ୍ରତିଷ୍ଠିତ ଶିକ୍ଷାନୁଷ୍ଠାନର ପ୍ରତିଷ୍ଠା ଓ ଅନୁଶାସନ ଉପରେ ଲାଗିଛି କଳଙ୍କ । ବୁର୍ଲା ବୀର ସୁରେନ୍ଦ୍ର ସାଏ ବୈଷୟିକ ବିଶ୍ୱବିଦ୍ୟାଳୟ ଭିସୁଟରେ ଜୁନିୟର ଛାତ୍ରଙ୍କୁ ସିନିୟର ଛାତ୍ର ରାଗିଂ କରିଥିବା ଅଭିଯୋଗ। ଗତ ୨୯ ତାରିଖ ହୋଲି ଦିନ ଭିସୁଟ୍‌ର ବଶିଷ୍ଟ ଛାତ୍ରାବାସରେ କିଛି ଚତୁର୍ଥ ବର୍ଷର ସିନିୟର ଛାତ୍ର ନିଶା ସେବନ କରୁଥିଲେ। ଏହି ସମୟରେ କିଛି ଦ୍ଵିତୀୟ ବର୍ଷର ଜୁନିୟର ଛାତ୍ର ସେହି ରାସ୍ତା ଦେଇ ଯାଇଥିଲେ। ଏଥିରେ ଉତ୍‌କ୍ଷୀପ୍ତ ହୋଇ ସିନିୟର ଛାତ୍ରମାନେ ୪ ଜଣ ଜୁନିୟରଙ୍କୁ ତାଙ୍କ କଠୋରୀରୁ ଡାକି ରାଗିଂ କରିଥିବା ଅଭିଯୋଗ ହୋଇଛି। ଏପରିକି ୪ ଜଣ ଦ୍ଵିତୀୟ ବର୍ଷର ଛାତ୍ରଙ୍କୁ ୪୦ ରୁ ଉର୍ଦ୍ଧ୍ବ ଛାତ୍ରଙ୍କୁ ରାଗିଂ କରିଥିବା ଅଭିଯୋଗ ହୋଇଛି। ଜୁନିୟର ଛାତ୍ରଙ୍କୁ ଉଲଗ୍ନ କରି ମାଡ଼ ମରାଯିବା ସହିତ ଗଞ୍ଜେଇ ଧୁଆଁ ମୁହଁରେ ଫୁଙ୍କିଥିବା ଅଭିଯୋଗ ହୋଇଛି। ଏନେଇ ଜୁନିୟର ଛାତ୍ରମାନେ ଭିସୁଟର ଆଣ୍ଟି ରାଗିଂ ସେଲରେ ଲିଖିତ ଅଭିଯୋଗ କରିଥିବା ଜଣାପଡ଼ିଛି। ଏପରିକି ଏହି ଜୁନିୟର ଛାତ୍ରମାନେ ଭୟରେ ଛାତ୍ରାବାସ ଛାଡ଼ି ପଳାଇଥିବା ଜଣାପଡିଛି।

ଅପରପକ୍ଷରେ ଏହି ଘଟଣା ସମ୍ପୃକ୍ତ ନଥିବା କିଛି ଛାତ୍ରଙ୍କ ନାମ ମଧ୍ୟ ଅଭିଯୋଗରେ ଉଲ୍ଲେଖ ଥିବାରୁ ଗତକାଲି ୨ ଛାତ୍ର ଗୋଷ୍ଠୀଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା । ସ୍ଥାନୀୟ କିର୍ବା ଛକରେ ମୁହାଁମୁହିଁ ୨ ଛାତ୍ର ଗୋଷ୍ଠୀ । ଏପଟେ ଏହି ଘଟଣାକୁ ଚାପିଦେବାକୁ କର୍ତ୍ତୃପକ୍ଷଙ୍କ ପ୍ରୟାସ କରିଛନ୍ତି। ବିଶ୍ୱବିଦ୍ୟାଳୟ ରେ ଏପରି ରାଗିଂ ଘଟଣା ନୂଆ ନୁହଁ। ପୂର୍ବରୁ ମଧ୍ୟ ଭିସୁଟରେ ଅନେକ ଥର ଏପରି ରାଗିଂ ଭଳି ସଙ୍ଗୀନ ଅଭିଯୋଗ ହୋଇଛି।

ଏଥିସହିତ ପଢ଼ନ୍ତୁ: ଚଳନ୍ତା କାର୍‌ରେ ଲାଗିଗଲା ନିଆଁ: ଜଳିଗଲା ସମ୍ପୂର୍ଣ୍ଣ କାର୍‌

ଚଳନ୍ତା କାର୍‌ରେ ଲାଗିଗଲା ନିଆଁ: ଜଳିଗଲା ସମ୍ପୂର୍ଣ୍ଣ କାର୍‌

କେନ୍ଦୁଝର: ଚଳନ୍ତା କାର୍‌ରେ ଲାଗିଗଲା ନିଆଁ । ବଡବିଲରେ ଆଜି ଏକ ଚଳନ୍ତା କାରରେ ନିଆଁ ଲାଗିଛି ଫଳରେ କାର୍‌ଟି ସମ୍ପୂର୍ଣ୍ଣ ପୋଡ଼ି ପାଉଁଶ  ହୋଇଯାଇଛି । ଘରୋଇ ଫାଇନାନ୍ସ କମ୍ପାନୀର ଶାଖା ପ୍ରବନ୍ଧକ ସୁରେନ୍ଦ୍ର କୁମାର ଦାସ ଓ ତାଙ୍କର ଜଣେ ବନ୍ଧୁ ଓଆର ୦୫ ଏକ୍ସ ୦୮୧୧ ଚେଭରୋଲେଟ ସ୍ପାର୍କ କାର ଯୋଗେ ବଡବିଲ୍ ବଜାର ପଟକୁ ଆସୁଥିବା ବେଳେ, ଡାକ ବଙ୍ଗଳା ଛକ ନିକଟରେ ରାତି ପ୍ରାୟ ୯ଟା ସମୟରେ ଚଳନ୍ତା କାରଟିରେ ହଠାତ୍ ନିଆଁ ଲାଗିଯାଇଥିଲା ।  ଦେଖୁଦେଖୁ ହୁତୁହୁତୁ ହୋଇ କାରଟି ସମ୍ପୂର୍ଣ୍ଣ ଜଳିବାକୁ ଲାଗିଲା । ତେବେ କାରରେ ଥିବା ଉଭୟ ବ୍ୟକ୍ତି ସଙ୍ଗେ ସଙ୍ଗେ କାର୍ ଭିତରୁ ବାହାରି ନିଜକୁ ବଞ୍ଚାଇ ନେଇଥିଲେ । ଖବର ପାଇ ଦମକଳ ଗାଡ଼ି ପହଞ୍ଚି ବହୁ ପରିଶ୍ରମ ପରେ ନିଆଁକୁ ଆୟତ୍ତ କରିଥିଲା ମାତ୍ର ସେତେବେଳକୁ କାରଟି ସମ୍ପୂର୍ଣ୍ଣ ପୋଡ଼ି ପାଉଁଶ ହୋଇଯାଇଥିଲା । ତେବେ ଇଞ୍ଜିନରେ ସର୍ଟସର୍କିଟ କାରଣରୁ ଅଗ୍ନିକାଣ୍ଡ ଘଟିଥିବା ସନ୍ଦେହ କରାଯାଉଛି ।

ଏଥିସହିତ ପଢ଼ନ୍ତୁ: ବାଲିଗୁଡ଼ାରେ ଅନ୍ଧବିଶ୍ୱାସକୁ ଢାଲ କରି ଘର ଭାଙ୍ଗିଦେଲେ