spot_img
Home Blog Page 5978

ରାଜ୍ୟରେ କରୋନା ପାଇଁ ବନ୍ଦ ହେବନି ସ୍କୁଲ

ଭୁବନେଶ୍ୱର: ରାଜ୍ୟରେ କରୋନା ପାଇଁ ବନ୍ଦ ହେବନି ସ୍କୁଲ । ସ୍କୁଲ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ ଏହି ସୂଚନା ଦେଇଛନ୍ତି । କୌଣସି ସରକାରୀ ସ୍କୁଲ ଛାତ୍ରଛାତ୍ରୀ କରୋନା ଆକ୍ରାନ୍ତ ହୋଇନାହାନ୍ତି । କିଛି ଘରୋଇ ଶିକ୍ଷାନୁଷ୍ଠାନରେ କରୋନା ସଂକ୍ରମଣ ହୋଇଛି । ତେଣୁ ନବମ ଓ ଏକାଦଶ ଶ୍ରେଣୀ ପାଇଁ ସ୍କୁଲ ବନ୍ଦ ହେବ ନାହିଁ ବୋଲି ସ୍କୁଲ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ କହିଛନ୍ତି । ଆସନ୍ତାକାଲି ସେମାନଙ୍କ ଅଭ୍ୟାସ ପରୀକ୍ଷା ଅଛି । ସେହିପରି ଏପ୍ରିଲ ୯ ତାରିଖରେ OTET ହେବ । କରୋନା ପରିସ୍ଥିତିରେ ରାଜ୍ୟ ସରକାର ସମସ୍ତ SOP ମାନି କ୍ଲାସ ଚଳାଇଛନ୍ତି ବୋଲି ମନ୍ତ୍ରୀ ସୂଚନା ଦେଇଛନ୍ତ ।

ସୂଚନା ଯୋଗ୍ୟ ଯେ, କରୋନା ପଜିଟିଭ୍ ଟିହ୍ନଟ ପରେ ଭୁବନେଶ୍ୱର ମୈତ୍ରୀ ବିହାରସ୍ଥିତ ଆଲେନ୍ ଇନଷ୍ଟିଚ୍ୟୁଟକୁ ବିଏମ୍‌ସି ପକ୍ଷରୁ ସିଲ୍ କରାଯାଇଛି । ଟେଷ୍ଟିଂ ପରେ ଆଲେନ୍ ଇନଷ୍ଟିଚ୍ୟୁଟରୁ ଏକାଧିକ କରୋନା ପଜିଟିଭ ଚିହ୍ନଟ ହୋଇଥିଲେ । ଚିହ୍ନଟ ହୋଇଥିବା ଛାତ୍ରଛାତ୍ରୀ ଓ କର୍ମଚାରୀଙ୍କୁ ଆଇସୋଲେସନରେ ରହିବାକୁ ପରାମର୍ଶ ଦିଆଯାଇଛି । ସେହିପରି ପଜିଟିଭ ଚିହ୍ନଟ ବ୍ୟକ୍ତିଙ୍କ ଟ୍ରାଭେଲ ହିଷ୍ଟ୍ରି ଓ କଣ୍ଟାକ୍ଟ ଟ୍ରେସିଂ ଜାରି ରହିଛି । ସେହିପରି ପୂର୍ବରୁ XIMBରୁ ୨୩ ଜଣ କରୋନା ପଜିଟିଭ ଚିହ୍ନଟ ହୋଇଥିଲେ । ଶିକ୍ଷାନୁଷ୍ଠାନରୁ ୨୩ ପଜିଟିଭ୍ ଚିହ୍ନଟ ହେବା ପରେ XIMBକୁ ମଧ୍ୟ ସିଲ୍ କରିଥିଲା ଭୁବନେଶ୍ୱର ମହାନଗର ନିଗମ-ବିଏମସି ।

ଏଥିସହିତ ପଢ଼ନ୍ତୁ: ରାଜ୍ୟରେ ଆଉ ୨୦୮ ଜଣ କରୋନା ସଂକ୍ରମିତ ଚିହ୍ନଟ

ଗର୍ଭବତୀ ମହିଳାଙ୍କୁ ଚଲାଇ ଥାନା ଅଧିକାରୀ ସସ୍‌ପେଣ୍ଡ

ଉଦଳା: ଗର୍ଭବତୀ ମହିଳାଙ୍କୁ ଦୀର୍ଘରାସ୍ତା ଚଲାଇ ଥାନା ଅଧିକାରୀ ସସ୍‌ପେଣ୍ଡ । ମୟୂରଭଞ୍ଜ ଜିଲ୍ଲା ଶରତ ଥାନା ଅଧିକାରୀ ରୀନା ବକ୍ସାଲଙ୍କୁ ଏସ୍‌ପି ସସ୍‌ପେଣ୍ଡ କରିଛନ୍ତି । ସୂଚନା ଅନୁସାରେ ଶରତ ଥାନା ଅଞ୍ଚଳରେ ହେଲମେଟ୍ ଚେକିଂ କରୁଥିଲା ପୋଲିସ । ଏହି ସମୟରେ ନୋଟ ପଞ୍ଚାୟତର ବିକ୍ରମ ବିରୁଲି ତାଙ୍କ ୮ ମାସର ଗର୍ଭବତୀ ପତ୍ନୀଙ୍କୁ ଉଦଳା ମେଡିକାଲକୁ ସ୍ବାସ୍ଥ୍ୟ ପରୀକ୍ଷା ପାଇଁ ନେବା ବେଳେ ପୋଲିସ ଅଟକାଇଥିଲା । ବିକ୍ରମ ହେଲମେଟ ଓ ମାସ୍କ ପିନ୍ଧି ଥିବା ବେଳେ ସ୍ବାସ୍ଥ୍ୟାବସ୍ଥା ଖରାପ ଥିବାରୁ ପତ୍ନୀ ହେଲମେଟ୍ ପିନ୍ଧିନଥିଲେ । ଏଥିପାଇଁ ଚାଲାଣ କାଟିଥିଲା ପୋଲିସ । ଅନଲାଇନରେ ଟଙ୍କା ଦେବାକୁ କହିଥିଲେ ବିକ୍ରମ । କିନ୍ତୁ ଏଥିରେ ରାଜି ହୋଇଥିଲେ ଶରତ ଥାନା ଓଆଇସି ରୀନା ବକ୍ସାଲ । ସଙ୍ଗେ ସଙ୍ଗେ ଟଙ୍କା ନଦେଲେ ଯାଇପାରିବ ନାହିଁ ବୋଲି କହିଥିଲେ ଓଆଇସି । ଯାହାକୁ ନେଇ ଉଭୟଙ୍କ ମଧ୍ୟରେ କଥା କଟାକଟି ହୋଇଥିଲା । ପରେ ଗର୍ଭବତୀ ମହିଳାଙ୍କୁ ରାସ୍ତାରେ ଛାଡ଼ି ବିକ୍ରମଙ୍କୁ ୪ ଘଣ୍ଟା ଥାନାରେ ଅଟକ ରଖିଥିଲା । ମହିଳା ଜଣକ ଚାଲି ଚାଲି ଥାନାରେ ପହଞ୍ଚିଥିଲେ । ପରେ ଏନେଇ ଏସଡିପିଓଙ୍କ ନିକଟରେ ଅଭିଯୋଗ କରିଥିଲେ ଦମ୍ପତି । ଓଆଇସି ରୀନା ବକ୍ସାଲଙ୍କ ଏପରି କାର୍ଯ୍ୟକୁ ନିନ୍ଦା କରିବା ସହ ତାଙ୍କୁ ମୟୂରଭଞ୍ଜ ଏସପି ସସ୍‌ପେଣ୍ଡ କରିଛନ୍ତି ।

ଏଥିସହିତ ପଢ଼ନ୍ତୁ: ରାଜ୍ୟରେ ଆଉ ୨୦୮ ଜଣ କରୋନା ସଂକ୍ରମିତ ଚିହ୍ନଟ

୨୪ ଘଣ୍ଟାରେ ୬୮ହଜାର ଟପିଲା କରୋନା ସଂକ୍ରମିତଙ୍କ ସଂଖ୍ୟା

ନୂଆଦିଲ୍ଲୀ: ଦେଶରେ ବଢୁଛି କରୋନା ସଂକ୍ରମଣ । ୨୪ ଘଣ୍ଟାରେ ୬୮ହଜାର ୨୦ଜଣ କରୋନା ସଂକ୍ରମିତ ଚିହ୍ନଟ ହୋଇଥିବା ବେଳେ ୨୯୧ ଜଣଙ୍କ ମୃତ୍ୟୁ ହୋଇଛି । ଏହାକୁ ମିଶାଇ ଦେଶରେ କରୋନା ମୃତ୍ୟୁସଂଖ୍ୟା ଲକ୍ଷେ ୬୧ହଜାର ୮୪୩ରେ ପହଞ୍ଚିଛି । ଏଥିସହିତ ୩୨ହଜାର ୨୩୧ଜଣ ଆକ୍ରାନ୍ତ ସୁସ୍ଥ ହୋଇ ଘରକୁ ଫେରିଛନ୍ତି।

ଅନ୍ୟପଟେ ଦେଶରେ ବର୍ତ୍ତମାନ ସୁଦ୍ଧା ୫ଲକ୍ଷ ୨୧ହଜାର ୮୦୮ଟି ଆକ୍ଚିଭ କେଶ ରହିଛି। କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରାଳୟ ପକ୍ଷରୁ ଏହି ସୂଚନା ଦିଆଯାଇଛି । ସେପଟେ କରୋନା ମୁକାବିଲା ପାଇଁ ଦେଶରେ ଜୋରସୋରରେ ଚାଲିଛି ଟିକାକରଣ ।

ସୂଚନାଯୋଗ୍ୟ, ସାରା ଦେଶରେ କରୋନାଭାଇରସ୍ କାୟା ମେଲାଇଦେଇଛି । ତେଣୁ କରୋନା କଟକଣା ଭିତରେ ଆଜି ସାରା ଦେଶ ପାଳୁଛି ରଙ୍ଗର ପର୍ବ ହୋଲି ।କୋଭିଡର ବଢ଼ୁଥିବା ମାମଲାକୁ ଦୃଷ୍ଟିରେ ରଖି ସର୍ବସାଧାରଣ ସ୍ଥାନରେ ହୋଲି ଖେଳିବାକୁ ବାରଣ କରାଯାଇଛି । କେବଳ ଘରେ ନିଜପରିବାର ସହ ଏହି ପର୍ବ ପାଳନ କରିବାକୁ ଲୋକଙ୍କୁ ନିବେଦନ କରାଯାଇଛି।

ସ୍ୱାମୀ ଓ ଶାଶୁ ଶ୍ୱଶୁରଙ୍କ ସହ ହୋଲି ସେଲିବ୍ରେଟ କଲେ ପ୍ରିୟଙ୍କା

ମୁମ୍ବାଇ: ଆଜି ହେଉଛି ରଙ୍ଗର ପର୍ବ ହୋଲି। କରୋନା କଟକଣା ଭିତରେ ସମଗ୍ର ଦେଶରେ ପାଳନ ଚାଲିଛି ଏହି ଉତ୍ସବ । ପ୍ରତ୍ୟେକ ଗଳି କନ୍ଦିରେ ପିଲାଠୁ ବୁଢ଼ା ଯାଏଁ ସମସ୍ତେ ହୋଲି ଖେଳରେ ମସଗୁଲ ଅଛନ୍ତି । ବଲିଉଡ ସେଲେବ୍ରିଟି ବି ଏଥିରେ ପଛରେ ପଡ଼ିନାହାଁନ୍ତି । ଅଭିନେତ୍ରୀ ପ୍ରିୟଙ୍କା ଚୋପ୍ରା ନିଜ ଇନଷ୍ଟାଗ୍ରାମ ଆକାଉଣ୍ଟରେ ହୋଲିର କିଛି ଫଟୋ ଶେୟାର କରିଛନ୍ତି। ଏହି ଫଟୋରେ ପ୍ରିୟଙ୍କା ଚୋପ୍ରା ତାଙ୍କ ସ୍ୱାମୀ ନିକ ଜୋନାସ ଏବଂ ଶାଶୁଙ୍କ ସହ ନଜର ଆସିଛନ୍ତି।

ଏହି ଫଟୋଗୁଡ଼ିକରେ ପ୍ରିୟଙ୍କା ଫଗୁ ଓ ଫୁଲରେ ହୋଲି ସେଲେବ୍ରେଟ କରୁଥିବା ଦେଖିବାକୁ ମିଳିଛି। ପ୍ରିୟଙ୍କା ଫଟୋ ଶେଆର କରି ନିଜ ପ୍ରଶଂସକମାନଙ୍କୁ ଅଭିନନ୍ଦନ ଜଣାଇଛନ୍ତି। ସେ ଲେଖିଛନ୍ତି, ‘ରଙ୍ଗର ପର୍ବ ହୋଲି ମୋର ସବୁଠୁ ପସନ୍ଦର ପର୍ବ ମଧ୍ୟରୁ ଅନ୍ୟତମ । ଆଶା କରୁଛିଯେ ଆମେ ସମସ୍ତେ ନିଜ ପ୍ରିୟଜନଙ୍କ ସହ ହୋଲି ଖେଳିବା, କିନ୍ତୁ ନିଜ ଘରେ। ସମସ୍ତଙ୍କୁ ହାପି ହୋଲି।’

ପ୍ରୟଙ୍କାଙ୍କର ଏହି ଫଟୋ ଏବେ ସୋସିଆଲ ମିଡିଆରେ ଭାଇରଲ ହେଉଛି । ବର୍ତ୍ତମାନସୁଦ୍ଧା ତାଙ୍ର ଏହି ଫଟୋରେ ୧୨ ଲକ୍ଷରୁ ଅଦିକ ଲାଇକ ମିଳିସାରିଲାଣି। ଏଥିସହ ବହୁତ କମେଣ୍ଟ ମଧ୍ୟ ମିଳୁଛି । ଫ୍ୟାନମାନେ କମେଣ୍ଟ କରି ପ୍ରିୟଙ୍କା ଓ ତାଙ୍କ ପରିବାରକୁ ହୋଲିର ଶୁଭ କାମନା ଦେଉଛନ୍ତି।

ରାଜ୍ୟରେ ଆଉ ୨୦୮ ଜଣ କରୋନା ସଂକ୍ରମିତ ଚିହ୍ନଟ

ଭୁବନେଶ୍ୱର: ଗତ ୨୪ ଘଣ୍ଟା ମଧ୍ୟରେ ରାଜ୍ୟ ଆଉ ୨୦୮ ଜଣ କରୋନା ସଂକ୍ରମିତ ଚିହ୍ନଟ ହୋଇଛନ୍ତି । ସେମାନଙ୍କ ମଧ୍ୟରୁ ୧୨୨ ଜଣ କ୍ୱାରେଣ୍ଟାଇନରେ ରହିଥିବା ବେଳେ ସ୍ଥାନୀୟ ଅଞ୍ଚଳରୁ ୮୬ ଜଣ ସଂକ୍ରମିତ ଚିହ୍ନଟ ହୋଇଛନ୍ତି । ଖୋର୍ଦ୍ଧାରୁ ସର୍ବାଧିକ ୩୩ ଜଣ ସଂକ୍ରମିତ ଚିହ୍ନଟ ହୋଇଥିବା ବେଳେ ଅନୁଗୁଳ ୩, ବାଲେଶ୍ୱର ୮ ବରଗଡ଼ ୨୨, ବଲାଙ୍ଗୀର ୪, ବୌଦ୍ଧ ୧, କଟକ ୧୫, ଗଞ୍ଜାମ ୩, ଯାଜପୁର ୮, ଝାରସୁଗୁଡ଼ା ୧୧, କଳାହାଣ୍ଡି ୨୨, କେନ୍ଦ୍ରାପଡ଼ା ୩, ମୟୂରଭଞ୍ଜ ୯, ନବରଙ୍ଗପୁର ୧, ନୂଆପଡ଼ା ୩୬, ପୁରୀ ୯, ରାୟଗଡ଼ାରୁ ଜଣେ, ସମ୍ୱଲପୁର ୫, ସୁନ୍ଦରଗଡ଼ରୁ ୭ ଓ ଷ୍ଟେଟ୍ ପୁଲ୍‌ରୁ ୭ ଜଣ ସଂକ୍ରମିତ ଚିହ୍ନଟ ହୋଇଛନ୍ତି ।

୧୨୩ ଦିନ ଧରି ଆନ୍ଦୋଳନ କରୁଥିବା ଚାଷୀ ପାଳିଲେ ହୋଲି

ନୂଆଦିଲ୍ଲୀ:କେନ୍ଦ୍ର ସରକାରଙ୍କ ତିନୋଟି ନୂଆ କୃଷି ନିୟମକୁ ସାରା ଦେଶର ଚାଷୀମାନେ ବିରୋଧ କରୁଛନ୍ତି। ଗତ ୧୨୩ ଦିନ ଧରି କୃଷକମାନେ ଦିଲ୍ଲୀ ସୀମାଗୁଡ଼ିକରେ ପ୍ରଦର୍ଶନ କରିଆସୁଛନ୍ତି। ଦିଲ୍ଲୀ-ଉତ୍ତରପ୍ରଦେଶ ସୀମାରେ ଥିବା ଗାଜୀପୁରରେ କୃଷକମାନେ ବିକ୍ଷୋଭ ପ୍ରଦର୍ଶନ କରୁଛନ୍ତି। ତେବେ ଏହି ଆନ୍ଦୋଳନ ଭିତରେ ବି ରଙ୍ଗର ବର୍ବକୁ ପାଳନ କରିଛନ୍ତି ଅନ୍ନଦାତା। ଗାଜିପୁରରେ ଆନଦୋଳନରତ ଚାଷୀମାନେ ଗୀତ ଓ ନୃତ୍ୟ କରି ହୋଲି ପାଳନ କରିଛନ୍ତି। ଯାହାର ଭିଡିଓ ଏବେ ସାମ୍ନାକୁଆସିଛି ।

ଚାଷୀମାନେ ନିଜର ଦୁଃଖକୁ ଭୁଲି ବେଶ୍ ଖୁସିରେ ବାଜା ବଜାଇ, ନାଚି-ଗାଇ ହୋଲି ପାଳନ କରୁଛନ୍ତି। ଜଣେ ଚାଷୀ କହିଛନ୍ତି, ‘ସରକାର ଆମର ଦାବିକୁ ଗ୍ରହଣ କରନ୍ତୁ ଏବଂ ତିନୋଟି କୃଷି ଆଇନ ପ୍ରତ୍ୟାହାର କରନ୍ତୁ। ଯାହାଫଳରେ ଆମେ ନିଜ ଘରକୁ ଫେରିପାରିବୁ।’

ସୂଚନାଯୋଗ୍ୟ, ଗତବର୍ଷ ସେପ୍ଟେମ୍ବରରେ କୃଷି କ୍ଷେତ୍ରରେ ଐତିହାସିକ ପରିବର୍ତ୍ତନ କହି ମୋଦି ସରକାର ସଂସଦରେ ତିନୋଟି କୃଷି ବିଲ୍ ଆଗତ କରିଥିଲେ । କୁହାଯାଇଥିଲା- ଏହି ବିଲ୍ ଦ୍ୱାରା ମଧ୍ୟସ୍ଥି ହଟିବା ସହ ଚାଷୀ ଦେଶର କୌଣସି ସ୍ଥାନରେ ଫସଲ ବିକି ପାରିବେ । ହେଲେ କେନ୍ଦ୍ରର ଏହି ତିନି କୃଷି ଆଇନକୁ ବିରୋଧ କରି ଗତବର୍ଷ ନଭେମ୍ବରରୁ ଦିଲ୍ଲୀ ସୀମାରେ କୃଷକଙ୍କ ଆନ୍ଦୋଳନ ଜାରି ରହିଛି । ସରକାରଙ୍କ ସହ ଏକାଧିକ ବାର ବୈଠକ ପରେ ବି ନିଷ୍କର୍ଷ ବାହାରି ପାରିନି । ଅନ୍ୟପଟେ ସରକାରଙ୍କ ଉପରେ ଚାପ ସୃଷ୍ଟି କରିବାକୁ ଦେଶବ୍ୟାପୀ କୃଷି ଆଇନ୍ ବିରୋଧରେ କୃଷକ ଆରମ୍ଭ କରିଛନ୍ତି ଅଭିଯାନ।

ହୋଲି ଅବସରରେ ଶୁଭେଚ୍ଛା ଜଣାଇଲେ ମୁଖ୍ୟମନ୍ତ୍ରୀ: ଘରେ ରହି ହୋଲି ପାଳିବାକୁ କଲେ ନିବେଦନ

ଭୁବନେଶ୍ୱର: ରଙ୍ଗ ଓ ଆନନ୍ଦର ପର୍ବ ହୋଲି ଅବସରରେ ରାଜ୍ୟବାସୀଙ୍କୁ ଶୁଭେଚ୍ଛା ଜଣାଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏହି ଅବସରରେ ମୁଖ୍ୟମନ୍ତ୍ରୀ ସୋସିଆଲ ମିଡିଆ ଜରିଆରେ ଏକ ଭିଡିଓ ବାର୍ତ୍ତା ଜାରି କରି ରାଜ୍ୟବାସୀଙ୍କୁ ହୋଲିର ଶୁଭେଚ୍ଛା ଜଣାଇଛନ୍ତି । ନିଜକୁ ତଥା ବନ୍ଧୁ ପରିଜନଙ୍କୁ ସୁରକ୍ଷିତ ରଖିବା ପାଇଁ ଚଳିତ ବର୍ଷ ଘରେ ରହି ହୋଲି ପାଳନ କରିବାକୁ ମୁଖ୍ୟମନ୍ତ୍ରୀ ରାଜ୍ୟବାସୀଙ୍କୁ ନିବେଦନ କରିଛନ୍ତି । କୋଭିଡଠାରୁ ଦୂରେଇ ରହିବା ପାଇଁ ନିୟମର କଡ଼ାକଡ଼ି ପାଳନ ସମସ୍ତଙ୍କର ସଂକଳ୍ପ ହେଉ। ବୋଲି ମୁଖ୍ୟମନ୍ତ୍ରୀ କହିଛନ୍ତି ।

 ବିଜୁ ଜନତା ଦଳ ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାଶ ମଧ୍ୟ ରାଜ୍ୟବାସୀଙ୍କୁ ହୋଲି ଅବସରରେ ଶୁଭେଚ୍ଛା ଜଣାଇଛନ୍ତି । ବର୍ତ୍ତମାନ  ସ୍ଥିତିରେ ସମସ୍ତଙ୍କ ସୁରକ୍ଷା ପାଇଁ କୋଭିଡ ନିୟମ ମାନି ଘରେରହି ହୋଲି ଉତ୍ସବକୁ ସ୍ୱତନ୍ତ୍ର ଭାବେ ପାଳନ କରିବାକୁ ଆହ୍ୱାନ ଦେଇଛନ୍ତି ପ୍ରଣବ । ଆନନ୍ଦ, ଉଲ୍ଲାସ ମଧ୍ୟରେ ହୋଲି ଭାଇଚାରା , ଏକତା ଓ ସାହାନୁଭୂତିର ପର୍ବ ହେବ ବୋଲି ପ୍ରଣବ କାମନା କରିଛନ୍ତି ।

          ଅପରପକ୍ଷରେ ରାଜ୍ୟରେ କରୋନା ସଂକ୍ରମିତଙ୍କ ସଂଖ୍ୟା ବଢ଼ୁଥିବାରୁ ହୋଲି ପାଳନ ନେଇ କଟକଣା ଜାରି କରିଛି ପ୍ରଶାସନ । ଘରେ ରହି ହୋଲି ଖେଳିବାକୁ ସରକାର ପରାମର୍ଶ ଦେଇଛନ୍ତି । ସେହିପରି ରାଜଧାନୀରେ ହୋଲି କଟକଣା ପାଇଁ ୧୫ ପ୍ଲାଟୁନ୍ ଫୋର୍ସ ମୁତୟନ କରାଯାଇଛି । ବିଭିନ୍ନ ଛକ ଓ ଭିଡ଼ ସ୍ଥାନରେ କଡ଼ା ନଜର ରଖିବ ପୋଲିସ । ପାଟ୍ରୋଲିଂ ପାଇଁ ୨୦ ପିସିଆର୍‌ ଭ୍ୟାନ୍, ଷ୍ଟ୍ରାଇକିଂ ଫୋର୍ସ ମୁତୟନ ହେଇଛନ୍ତି । ବିଏମ୍‌ସି ଗାଇଡ୍‌ଲାଇନ୍ ମାନିବାକୁ ରାଜଧାନୀବାସୀଙ୍କୁ ଭୁବନେଶ୍ବର ଡିସିପି ଅପିଲ୍ କରିଛନ୍ତି । ବାହାରେ ହୋଲି ଖେଳନ୍ତୁ ନାହିଁ, ନିଜ ପରିବାର ସହ ହୋଲି ଖେଳିବା ପାଇଁ ଆହ୍ବାନ କରିଛନ୍ତି ଡିସିପି  । ଅମାନିଆ ହେଲେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି ଭୁବନେଶ୍ବର ଡିସିପି ଉମାଶଙ୍କର ଦାଶ କହିଛନ୍ତି  ।

ଏଥିସହିତ ପଢ଼ନ୍ତୁ: ଭାଇଚାରାର ପର୍ବରେ ଭାଇରସ୍ ନ ବ୍ୟାପୁ: କରୋନା କଟକଣା ମାନି ହୋଲି ଖେଳିବାକୁ ପରାମର୍ଶ

ହୋଲି ପରେ କେମିତି ସଫା କରିବେ ରଙ୍ଗ ଲଗା ଡ୍ରେସ୍

ଭୁବନେଶ୍ୱର : ଆସିଯାଇଛି ରଙ୍ଗର ପର୍ବ ହୋଲି । ପ୍ରାୟ ସମସ୍ତେ ଏହି ପର୍ବକୁ ବେଶ୍ ଧୂମଧାମରେ ଆନନ୍ଦ ଉଲ୍ଲାସର ସହ ପାଳନ କରନ୍ତି । ହୋଲି ଖେଳିବାକୁ ଯେତେ ମଜା ଲାଗେ ତାପରେ କିନ୍ତୁ ରଙ୍ଗ ଛଡ଼େଇବା ହୋଇଯାଏ ପୂରା ସଜା। ଆଉ ଡ୍ରେସରୁ ରଙ୍ଗ ଛଡ଼େଇବା ତ ବହୁତ କଷ୍ଟକର ହୋଇପଡ଼େ । ପ୍ରାୟ ସମସ୍ତେ  ହୋଲି ପରେ କପଡ଼ାରେ ଲାଗିଥିବା ରଙ୍ଗକୁ ନେଇ ଅନେକ ଚିନ୍ତାରେ ପଡ଼ିଥା’ନ୍ତି। ତେବେ ଆଜି ଆମେ ଆପଣଙ୍କର ଏହି ଚିନ୍ତା ଦୂର କରିଦେବୁ। ଆସନ୍ତୁ ଜାଣିବା କେମିତି କପଡ଼ାରୁ ଛଡାଇବେ ରଙ୍ଗ

୧. ଧଳା ଭିନେଗାର୍:  ରଙ୍ଗ ଲାଗିଥିବା କପଡ଼ାକୁ ସହଜରେ ସଫା କରି ଦେଇଥାଏ ଧଳା ଭିନେଗାର। କପଡ଼ା ସଫା କରିବା ସମୟରେ ପାଣିରେ ଅଧା କପ୍‌ ଭିନେଗାର୍‌ ପକାନ୍ତୁ। ଦେଖିବେ ସହଜରେ ରଙ୍ଗ ଛାଡ଼ିଯିବ। ମନେ ରଖନ୍ତୁ ଭିନେଗାର୍‌ କେବଳ ସୂତା କପଡ଼ା ପାଇଁ ବ୍ୟବହାର କରିବେ।

୨. ଲେମ୍ବୁ: ରଙ୍ଗ ଲାଗିବା ପରେ ସେହି କପଡ଼ାକୁ ପ୍ରଥମେ କିଛି ସମୟ ଲେମ୍ୱୁ ପାଣିରେ ବୁଡ଼ାଇ ରଖନ୍ତୁ। ଏହାପରେ ସାବୁନ୍‌ କିମ୍ବା ସର୍ଫରେ କପଡ଼ାକୁ ସଫା କରି ନିଅନ୍ତୁ। ଦେଖିବେ କପଡ଼ା ପୂରା ସଫା ହୋଇଯିବ।

୩. ବାସନ ମଜା ସାବୁନ୍‌: ଆପଣ ଜାଣିଲେ ଆଶ୍ଚର୍ଯ୍ୟ ହେବେ ଯେ ବାସନ ମଜା ସାବୁନରେ ବି ଆପଣ ରଙ୍ଗ ହୋଇଥିବା ଧଳା କପଡ଼ା ସଫା କରିପାରିବେ। ହୋଲି ରଙ୍ଗ ଛଡ଼ାଇବା ପାଇଁ ଏହା ବହୁତ ଭଲ କାମ କରିଥାଏ। ହେଲେ ଏହା କପଡ଼ାର କୌଣସି କ୍ଷତି କରି ନଥାଏ ।

୪. ଦହି: କପଡ଼ାରୁ ରଙ୍ଗ ଛଡ଼ାଇବାରେ ଦହି ଭଲ କାମ କରେ। କିଛି ସମୟ ଦହି ପାଣିରେ ରଙ୍ଗ ଲାଗିଥିବା କପଡ଼ା ସବୁକୁ ବୁଡ଼ାଇ ରଖନ୍ତୁ। ଏହାପରେ କପଡ଼ାକୁ ହାଲକା ଭାବେ ଟିକେ ମକଚି ଧୋଇ ନିଅନ୍ତୁ। ଏହିପରି ଦୁଇଥର କଲେ ରଙ୍ଗ ସହଜରେ ଛାଡ଼ି ଯାଇଥାଏ।

୫. ବେକିଂ ସୋଡ଼ା: ରଙ୍ଗ ହୋଇଥିବା କପଡ଼ା ଧୋଇବାବେଳେ ପାଣିରେ କିଛି ବେକିଂ ସୋଡ଼ା ମିଶାଇ ଦିଅନ୍ତୁ। ଏହା ମଧ୍ୟ ରଙ୍ଗ ଛଡ଼ାଇବାରେ ଭଲ କାମ କରିଥାଏ।

 

 

କରୋନା କଟକଣାରେ ଦେଶ ପାଳୁଛି ହୋଲି; ପ୍ରଧାନମନ୍ତ୍ରୀ ଦେଲେ ଶୁଭକାମନା

ନୂଆଦିଲ୍ଲୀ: ସାରା ଦେଶରେ କରୋନାଭାଇରସ୍ କାୟା ମେଲାଇଦେଇଛି । ତେଣୁ କରୋନା କଟକଣା ଭିତରେ ଆଜି ସାରା ଦେଶ ପାଳୁଛି ରଙ୍ଗର ପର୍ବ ହୋଲି । କୋଭିଡର ବଢ଼ୁଥିବା ମାମଲାକୁ ଦୃଷ୍ଟିରେ ରଖି ସର୍ବସାଧାରଣ ସ୍ଥାନରେ ହୋଲି ଖେଳିବାକୁ ବାରଣ କରାଯାଇଛି । କେବଳ ଘରେ ନିଜପରିବାର ସହ ଏହି ପର୍ବ ପାଳନ କରିବାକୁ ଲୋକଙ୍କୁ ନିବେଦନ କରାଯାଇଛି। ହୋଲି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସମେତ ଅନ୍ୟ ବଡ଼ ବଡ଼ ନେତାମାନେ ଦେଶବାସୀଙ୍କୁ ଅଭିନନ୍ଦନ ଜଣାଇଛନ୍ତି। ଦେଶବାସୀଙ୍କୁ ଶୁଭେଚ୍ଛା ଜଣାଇବାବେଳେ ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ଏହି ପର୍ବ ସମସ୍ତଙ୍କ ଜୀବନରେ ନୂତନ ଜୋଶ୍ ଏବଂ ନୂତନ ଶକ୍ତି ସଂଚାର କରୁ ।

 ପ୍ରଧାନମନ୍ତ୍ରୀ ମୋଦୀ ତାଙ୍କ ଟ୍ୱିଟରେ ଲେଖିଛନ୍ତି, “ଆପଣ ସମସ୍ତଙ୍କୁ ହୋଲିର ଅନେକ ଶୁଭକାମନା । ଏହି ଆନନ୍ଦ ଏବଂ ଉଲ୍ଲାସର ଏହି ପର୍ବ ସମସ୍ତଙ୍କ ଜୀବନରେ ନୂଆ ଜୋଶ୍ ଏବଂ ନୂଆ ଶକ୍ତି ଯୋଗାଉ।”

ଗୃହମନ୍ତ୍ରୀ ଅମିତ ଶାହା ଲେଖିଛନ୍ତି, “ହୋଲିର ଶୁଭ ଅବସରରେ ସମସ୍ତ ଦେଶବାସୀଙ୍କୁ ହାର୍ଦ୍ଦିକ ଶୁଭେଚ୍ଛା। ରଙ୍ଗ, ଉତ୍ସାହ, ଏକତା ଏବଂ ଆନନ୍ଦର ଏହି ମହାପର୍ବ ଆପଣଙ୍କ ଜୀବନରେ ସୁଖ, ଶାନ୍ତି ଏବଂ ସୌଭାଗ୍ୟ ଆଣୁ।”

ସେହିପରି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ କହିଛନ୍ତି, “ହୋଲି ପର୍ବରେ ସମସ୍ତ ଦେଶବାସୀଙ୍କୁ ହାର୍ଦ୍ଦିକ ଶୁଭେଚ୍ଛା। ରଙ୍ଗର ଏହି ପର୍ବ ଆପଣ ସମସ୍ତଙ୍କ ଜୀବନରେ ଆନ୍ନଦ ଉଲ୍ଲାସର ସହ ଉତ୍ତମ ସ୍ୱାସ୍ଥ୍ୟ ଏବଂ ସମୃଦ୍ଧି ଆଣୁ ।”

 ଅନ୍ୟପଟେ ଦେଶରେ ବଢୁଛି କରୋନା ଗ୍ରାଫ୍ । ଦୈନିକ ସଂକ୍ରମଣ ସଂଖ୍ୟା ବଢୁଥିବା ବେଳେ ମୃତ୍ୟୁ ସଂଖ୍ୟା ମଧ୍ୟ ବଢିବାରେ ଲାଗିଛି । ମହାରାଷ୍ଟ୍ର ଓ ଦିଲ୍ଲୀରେ ସ୍ଥିତି ସଙ୍ଗିନ ହେବାରେ ଲାଗିଛି । ଦିନକୁ ଦିନ ସଂକ୍ରମିତଙ୍କ ସଂଖ୍ୟା ବଢୁଥିବା ବେଳେ ବିଭିନ୍ନ ରାଜ୍ୟରେ ହୋଲି ପାଇଁ କଟକଣା ଲଗାଯାଇଛି । ମହାରାଷ୍ଟ୍ରରେ ଗତକାଲି ରାତିରୁ ନାଇଟ୍ କର୍ଫ୍ୟୁ ଲାଗୁ କରାଯାଇଛି ।

ନନ୍ଦନକାନନ ପ୍ରାଣୀ ଉଦ୍ୟାନରେ ଏପ୍ରିଲରୁ ଆରମ୍ଭ ହେବ ଟଏ ଟ୍ରେନ୍

ଭୁବନେଶ୍ୱର: ନନ୍ଦନକାନନ ପ୍ରାଣି ଉଦ୍ୟାନରେ ପର୍ଯ୍ୟଟକ ନେବେ ଡବଲ ମଜା । ଟଏ ଟ୍ରେନ ବା ଶିଶୁ ରେଳ ଗାଡ଼ିରେ ବୁଲି ମୁକ୍ତ ଜୀବଜନ୍ତୁ ଦେଖିବା ସହ କାଞ୍ଜିଆ ହ୍ରଦର ମଜା ନେଇପାରିବେ ପର୍ଯ୍ୟଟକ । ୧୯୮୫ ମସିହାରୁ ନନ୍ଦନକାନନରେ ଟଏ ଟ୍ରେନ ଆରମ୍ଭ ହୋଇଥିଲା । ୨୦୧୩ ମସିହାରେ ଏହାର ଯାନ୍ତ୍ରିକ ତ୍ରୁଟି ଯୋଗୁ ବନ୍ଦ ପଡ଼ିଥିଲା । କୌଣସି ଠିକା ସଂସ୍ଥା ବି ପୁନର୍ବାର ନେବାକୁ ଅରାଜି ହୋଇଥିଲେ । ସେବେଠୁ ୯ ବର୍ଷ  ହେବ ବନ୍ଦ ପଡିଥିବା ଟଏ ଟ୍ରେନ ବା ଶିଶୁ ରେଳଗାଡି ଆସନ୍ତା ଏପ୍ରିଲ ମାସରୁ ଚାଲିବା ପାଇଁ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି । ରାଜ୍ୟ ସରକାରଙ୍କ ଦ୍ୱାରା ୩ କୋଟି ୫ ଲକ୍ଷ ଟଙ୍କା ଧାର୍ଯ୍ୟରେ ବଗି ଓ ଟ୍ରାକ କାମ ସମ୍ପୂର୍ଣ କରାଯିବା ପାଇଁ ବ୍ୟବସ୍ଥା କରାଯାଇଛି । ଏ ନେଇ କର୍ତ୍ତୃପକ୍ଷଙ୍କ ପକ୍ଷରୁ ସୂଚନା ଦିଆଯାଇଛି । ଏହି ଟଏ ଟ୍ରେନ ଇଞ୍ଜିନ ସହିତ ୪ ଟି ବଗି ରହିବ ।  ଥରକେ ୭୨ ଜଣ ପର୍ଯ୍ୟଟକ ବୁଲିବାର ମଜା ନେଇପାରିବେ । ପାଖାପାଖି ଦେଢ କିଲୋମିଟର ପର୍ଯ୍ୟନ୍ତ ପଯ୍ୟଟକ ଟ୍ରେନରେ ବୁଲି ମୁକ୍ତ ଜୀବଜନ୍ତୁ ଦେଖିପାରିବେ ।

ଏଥିସହିତ ପଢ଼ନ୍ତୁ: ଭାଇଚାରାର ପର୍ବରେ ଭାଇରସ୍ ନ ବ୍ୟାପୁ: କରୋନା କଟକଣା ମାନି ହୋଲି ଖେଳିବାକୁ ପରାମର୍ଶ