ନୂଆଦିଲ୍ଲୀ: କରୋନା ଭାଇରସ ଭାରତର ଅର୍ଥନୈତିକ ମେରୁଦଣ୍ଡକୁ ଏକ ପ୍ରକାର ଭାଙ୍ଗି ଦେଇଛି । ଭାରତ ଏବେ ମଧ୍ୟ ଭାଇରସ ଯୋଗୁଁ ହୋଇଥିବା କ୍ଷୟକ୍ଷତିରୁ ଉଠିବାକୁ ଚେଷ୍ଟା କରୁଛି । ଇତି ମଧ୍ୟରେ ନନ୍ ପ୍ରଫିଟ୍ ଗ୍ରୁପ୍ Oxfam ସୋମବାର ନିଜର ଏକ ସର୍ଭେ ରିପୋର୍ଟ ପ୍ରକାଶ କରିଛି । ରିପୋର୍ଟ ମୁତାବକ, କରୋନା ମହାମାରୀ ଯୋଗୁଁ ଭାରତର କୋଟିପତି ଏବଂ ଗରିବ ଶ୍ରେଣୀର ଲୋକଙ୍କ ମଧ୍ୟରେ ଆୟକୁ ନେଇ ଅସମାନତାର ଏକ ବଡ଼ ପାଚେରୀ ସୃଷ୍ଟି ହୋଇଛି । The Inequality Virus ନାମକ ଶୀର୍ଷକରେ ପ୍ରକାଶ ପାଇଥିବା ଏହି ରିପୋର୍ଟରେ ଦର୍ଶାଯାଇଛି ଯେ, କରୋନାଭାଇରସ୍ ଲକଡାଉନ୍ ସମୟରେ ଭାରତର କୋଟିପତିଙ୍କ ସମ୍ପତି ୩୫ ପ୍ରତିଶତ ବୃଦ୍ଧି ପାଇଥିବାବେଳେ ଦେଶର ୮୪ ପ୍ରତିଶତ ପରିବାରକୁ ଆର୍ଥିକ ସମସ୍ୟା ଦେଇ ଗତି କରିବାକୁ ପଡିଛି। ଏଥି ସହିତ, କେବଳ ୨୦୨୦ ମସିହା ଏପ୍ରିଲ୍ ମାସରେ ଘଣ୍ଟା ପ୍ରତି ୧.୭ ଲକ୍ଷ ଲୋକ ନିଜ ଚାକିରି ହରାଇଛନ୍ତି ।
ରିପୋର୍ଟରେ କୁହାଯାଇଛି ଯେ, ମାର୍ଚ୍ଚ ୨୦୨୦ ମସିହା ପରେ ଭାରତର ୧୦୦ କୋଟିପତିଙ୍କର ଯେତିକି ଆୟ ହୋଇଛି, ସେଥିରୁ ଦେଶର ପ୍ରତି ୧୩୮ ମିଲିୟନ ଅର୍ଥାତ ୧୩.୮ କୋଟି ଲୋକଙ୍କୁ ୯୪,୦୪୫ ଟଙ୍କାର ଚେକ୍ ଦିଆଯାଇପାରିବ ।
ରିପୋର୍ଟରେ କୁହାଯାଇଛି ଯେ, ‘ କରୋନା ଭାଇରସ ଯୋଗୁଁ ଭାରତରେ ଦେଖାଦେଇଥିବା ଆୟ ଅସମାନତା ଅତ୍ୟନ୍ତ ଆଶ୍ଚର୍ଯ୍ୟଜନକ । ମହାମାରୀ ସମୟରେ ରିଲାଏନ୍ସ ଇଣ୍ଡଷ୍ଟ୍ରିର ମୁଖ୍ୟ ମୁକେଶ ଅମ୍ବାନୀ ଏକ ଘଣ୍ଟାରେ ଯେତିକି ଆୟ କରିଥିଲେ, ଭାରତର ଜଣେ ଅଜ୍ଞ ଶ୍ରମିକଙ୍କ ପାଇଁ ସେତିକି ସମ୍ପତି ଅର୍ଜନ କରିବାକୁ ୧୦,୦୦୦ ବର୍ଷ ଲାଗିବ, ଏବଂ ଗୋଟିଏ ସେକେଣ୍ଡରେ ଯେତିକି ଟଙ୍କା ଆୟ କରିଥିଲେ ସେତିକି ରୋଜଗାର କରିବାକୁ ପ୍ରାୟ ତିନି ବର୍ଷ ଲାଗିବ। ସୂଚନା ଅନୁଯାୟୀ, ଗତ ବର୍ଷ ଅଗଷ୍ଟ ମାସରେ ମୁକେଶ ଅମ୍ବାନୀଙ୍କୁ ବିଶ୍ୱର ଚତୁର୍ଥ ଧନୀ ବ୍ୟକ୍ତି ଘୋଷିତ କରାଯାଇଥିଲା ।
ଲକଡାଉନର ପ୍ରାରମ୍ଭିକ ସମୟରେ ଆମେ ଦେଖିବାକୁ ପାଇଥିଲୁ ପ୍ରବାସୀ ଶ୍ରମିକଙ୍କ ହୃଦୟ ବିଦାରକ ଚିତ୍ର । ନିଜ ରୋଜଗାର, ସଞ୍ଚୟ, ଖାଦ୍ୟ ପେୟ ଏବଂ ରହିବାର ଠିକଣା ହରାଇବା ପରେ ପ୍ରବାସୀମାନେ ସ୍ୱରାଜ୍ୟକୁ ଫେରିବାକୁ ବାଧ୍ୟ ହୋଇଥିଲେ। ଏହି ସମୟରେ ଅନେକ ହୃଦୟ ବିଦାରକ ଚିତ୍ର ସାମ୍ନାକୁ ଆସିଥିଲା । ଅନେକ ପ୍ରବାସୀଙ୍କ ମୃତ୍ୟୁ ମଧ୍ୟ ହୋଇଥିଲା ।
ରିପୋର୍ଟ ଅନୁଯାୟୀ, କରୋନା ଭାଇରସ ମହାମାରୀ ହେଉଛି ଗତ ଶହେ ବର୍ଷର ସବୁଠାରୁ ବଡ ସ୍ୱାସ୍ଥ୍ୟ ସଙ୍କଟ ଏବଂ ଏହା ୧୯୩୦ ମସିହାର ଆର୍ଥିକ ମାନ୍ଦାବସ୍ଥା ପରେ ସବୁଠାରୁ ବଡ଼ ଅର୍ଥନୈତିକ ସଙ୍କଟ ସୃଷ୍ଟି କରିଥିଲା। Oxfam ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଅମିତାଭ ବେହର କହିଛନ୍ତି ଯେ, ଏହି ରିପୋର୍ଟ ସ୍ପଷ୍ଟ ଭାବରେ ଦର୍ଶାଉଛି ଯେ ଅନ୍ୟାୟପୂର୍ଣ୍ଣ ଅର୍ଥନୈତିକ ବ୍ୟବସ୍ଥାରୁ କିପରି ଭାବରେ ସବୁଠୁ ବଡ଼ ଅର୍ଥନୈତିକ ସଙ୍କଟ ସମୟରେ ଧନୀ ଲୋକମାନେ ବହୁ ଧନ ଅର୍ଜନ କରିଛନ୍ତି, ଯେତେବେଳେ କି ଲକ୍ଷ ଲକ୍ଷ ଲୋକ ବହୁତ କଷ୍ଟଦାୟକ ସମୟ ଦେଇ ଗତି କରିଥିଲେ। ବେହର କହିଛନ୍ତି ଯେ, ପ୍ରାରମ୍ଭରେ ଏକ ଚିନ୍ତାଧାରା ଥିଲା ଯେ ମହାମାରୀ ସମସ୍ତଙ୍କୁ ସମାନ ଭାବରେ ପ୍ରଭାବିତ କରିବ, କିନ୍ତୁ ଲକଡାଉନ ଯୋଗୁଁ ସମାଜରେ ଅସମାନତା ସୃଷ୍ଟି ହୋଇଛି।
ରିପୋର୍ଟ ପାଇଁ Oxfam ଦ୍ୱାରା କରାଯାଇଥିବା ସର୍ଭେରେ ୭୯ ଦେଶର ୨୯୫ ଅର୍ଥନୀତିଜ୍ଞ ନିଜ ନିଜ ମତ ପ୍ରକାଶ କରିଥିଲେ । ଯେଉଁଥିରେ ଜୋଫରୀ ଡେବିଡ, ଜୟତି ଘୋଷ ଏବଂ ଗେବ୍ରିୟଲ ଜୁକମ୍ୟାନ ସହ ୮୭ ପ୍ରତିଶତ ଉତ୍ତରଦାତା ମହାମାରୀ ସମୟରେ ନିଜ ଦେଶରେ ବଢ଼ିଥିବା ଆୟ ଅସମାନତାର ଅନୁମାନ ପ୍ରକାଶ କରିଥିଲେ ।
ରିପୋର୍ଟ ମୁତାବକ, ମୁକେଶ ଅମ୍ବାନୀ, ଗୌତମ ଅଢ଼ାଣୀ, ଶିବ ନାଦର, ଶାୟରସ ପୁନାୱାଲା, ଉଦୟ ଫୋଟକ, ଅଜୀମ ପ୍ରେମଜୀ, ସୁନୀଲ ମିତ୍ତଲ, ରାଧାକୃଷ୍ଣ ଦମାନୀ, କୁମାନ ମଙ୍ଗଲମ ବିରଲା ଏବଂ ଲକ୍ଷ୍ମୀ ମିତ୍ତଲ ଭଳି କୋଟିପତି ମାନଙ୍କ ସମ୍ପତି ମାର୍ଚ୍ଚ ୨୦୨୦ ମସିହା ପରେ ମହାମାରୀ ଏବଂ ଲକଡାଉନ ସମୟରେ ଦୃତ ଗତିରେ ବୃଦ୍ଧି ପାଇଥିଲା । ଅନ୍ୟପଟେ ଅପ୍ରେଲ ୨୦୨୦ ରେ ଘଣ୍ଟା ପ୍ରତି ୧.୭ ଲକ୍ଷ ଲୋକ ନିଜ ଚାକିରି ହରାଉଥିଲେ ।
ରିପୋର୍ଟରେ ଲେଖାଯାଇଥିବା ଭାରତ ଖଣ୍ଡରେ ପ୍ରକାଶ ପାଇଛି ଯେ, ‘ଭାରତୀୟ କୋଟିପତିଙ୍କ ସମ୍ପତି ଲକଡାଉନ ସମୟରେ ୩୫ ପ୍ରତିଶତ ବୃଦ୍ଧି ପାଇଛି । ଆମେରିକା, ଚୀନ୍, ଜର୍ମାନୀ, ଋଷ ଏବଂ ଫ୍ରାନ୍ସ ପରେ କୋଟିପତିଙ୍କ ସମ୍ପତି କ୍ଷେତ୍ରରେ ଭାରତ ଷଷ୍ଠ ସ୍ଥାନରେ ପହଞ୍ଚିଛି। ମହାମାରୀ ସମୟରେ ଭାରତର ୧୧ ପ୍ରମୁଖ କୋଟିପତିଙ୍କର ଯେତିକି ଆୟ ବୃଦ୍ଧି ପାଇଛି, ସେଥିରୁ MNREGA ଏବଂ ସ୍ୱାସ୍ଥ୍ୟ ମନ୍ତ୍ରଣାଳୟର ବର୍ତ୍ତମାନର ବଜେଟ୍ ଏକ ଦଶନ୍ଧି ପାଇଁ ପ୍ରାପ୍ତ ହୋଇପାରିବ ।
Oxfamର ରିପୋର୍ଟ ମୁତାବକ, ଶ୍ରମିକଙ୍କ ଉପରେ ମହାମାରୀ ଏବଂ ଲକଡାଉନର ପ୍ରଭାବ ଅଧିକ ମାତ୍ରାରେ ପଡ଼ିଛି । ଏହି ସମୟରେ ପ୍ରାୟ ୧୨.୨ କୋଟି ଲୋକ ନିଜ ରୋଜଗାର ହରାଇଛନ୍ତି, ଯେଉଁଥିରେ ୯.୨ କୋଟି ( ୭୪ ପ୍ରତିଶତ) ଅନୌପଚାରିକ କ୍ଷେତ୍ରରୁ ଥିଲେ । ମହିଳାମାନେ ସବୁଠୁ ଅଧିକ କଷ୍ଟ ସହ୍ୟ କରିଛନ୍ତି ଏବଂ ୧.୭ କୋଟି ମହିଳା ନିଜ ଚାକିରି ହରାଇଛନ୍ତି । ମହିଳାଙ୍କ କ୍ଷେତ୍ରରେ ବେକାରୀ ସମସ୍ୟା ପୂର୍ବରୁ ୧୫ ପ୍ରତିଶତ ଥିବାବେଳେ, ଲକଡାଉନରେ ଏହା ବୃଦ୍ଧି ପାଇ ୧୮ ପ୍ରତିଶତ ହୋଇଛି ।
ଗତ ବର୍ଷ ସରକାର ୨୧ ଲକ୍ଷ କୋଟି ଟଙ୍କା ରିଲିଫ ପ୍ୟାକେଜ ଘୋଷଣା କରିଥିଲେ ଯାହାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆତ୍ମନିର୍ଭରଶୀଳ ଭାରତର ମୂଳଦୁଆ ବୋଲି ବର୍ଣ୍ଣନା କରିଛନ୍ତି । କିନ୍ତୁ Oxfam ଏହାର ରିପୋର୍ଟରେ କହିଛି ଯେ, ଏହି ପ୍ୟାକେଜର ପ୍ରତ୍ୟକ୍ଷ ଆର୍ଥିକ ପ୍ରଭାବ ୨ ଲକ୍ଷ କୋଟିରୁ ଅଧିକ ଅର୍ଥାତ୍ ଜିଡିପିର ଏକ ପ୍ରତିଶତରୁ ଅଧିକ ଥିଲା।
