ଭୁବନେଶ୍ବର: ଛାତ୍ରୀ ଆତ୍ମାହୁତି ଉଦ୍ୟମ ଘଟଣା । ଛାତ୍ରୀଙ୍କ ଆଶୁ ଆରଗ୍ୟ କାମନା କରି ଦୀପଦାନ କଲା ବିଜେଡି । କାର୍ଯ୍ୟକ୍ରମରେ ବିଜେଡି ବହୁ ବରିଷ୍ଠ ନେତା ସାମିଲ ହୋଇଛନ୍ତି । ରାମ ମନ୍ଦିରରେ ଦୀପଦାନ କରିଛନ୍ତି ବିଜେଡି ନେତା ।
ବିଜେପି ସରକାରରେ ବଢିଛି ନାରୀ ନିର୍ଯାତନା: ଅସୁରକ୍ଷିତ ଜନତା, ବଢୁଛି ଜନ ଅସନ୍ତୋଷ
ଭୁବନେଶ୍ବର: ତେର ମାସରେ ବିଜେପି ସରକାର । ବଢିଛି ନାରୀ ନିର୍ଯାତନା, ଅସୁରକ୍ଷିତ ଜନତା । ନ୍ୟାୟରୁ ବଂଚିତ ଚାଷୀ, ଦଳିତ, ଆଦିବାସୀ ଓ ପଛୁଆ ବର୍ଗ । ବଢୁଛି ଜନ ଅସନ୍ତୋଷ ରାସ୍ତାରେ ବିରୋଧୀଙ୍କ ଗର୍ଜନ । ଏମିତି କୋଉ ଦିନ ନାହିଁ ଯେଉଁଦିନ ନାରୀ ନିର୍ଯାତନାର ଖବର ପଦାକୁ ଆସିନାହିଁ । ଗତ ୧୩ ମାସ ମଧ୍ୟରେ ଶାନ୍ତିପ୍ରିୟ ଓଡିଶାରେ ଅଶାନ୍ତିର ବାତାବରଣ । ଆଇନ ଶୃଙ୍ଖଳା ବିପର୍ଯ୍ୟସ୍ତ । ଅସୁରକ୍ଷିତ ଶିଶୁ ଓ ମହିଳା । ଶାସନ ବ୍ୟବସ୍ଥା ଢିଲା ଯୋଗୁଁ ରାଜ୍ୟରେ ବଢିବଢି ଚାଲିଛି ଅରାଜକତା । ବିଜେପି ସରକାର ଆସିବା ପରେ ରାଜ୍ୟପାଳଙ୍କ ପୁଅ ସରକାରୀ ଅଧିକାରୀଙ୍କୁ ମାଡ ମାରିବା ଠାରୁ ଆରମ୍ଭ କରି ବାଲେଶ୍ବର ଏଫଏମ କଲେଜ ଛାତ୍ରୀ ନ୍ୟାୟ ପାଇଁ ଦେହରେ ନିଆଁ ଲଗାଇ ଆତ୍ମାହୁତି ଦେବା ଘଟଣା ଓଡିଶା ଶାସନ ବ୍ୟବସ୍ଥା ପ୍ରତି ପ୍ରଶ୍ନବାଚୀ ସୃଷ୍ଟି କରିଛି ।
ଏପରି ସ୍ଥିତିରେ ମହାମହିମ ରାଷ୍ଟ୍ରପତିଙ୍କ ହସ୍ତକ୍ଷେପ ଦାବି କରିଛି ବିଜେଡି । ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ ଅଭିଯୋଗ କରିଛନ୍ତି ମୁଖ୍ୟମନ୍ତ୍ରୀଙ୍କ କଥା କେହି ଶୁଣୁନାହାନ୍ତି । ଦିନକୁ ୧୫ଜଣ ମହିଳା ବଳାତ୍କାରର ଶିକାର ହେଉଛନ୍ତି । ବାଲେଶ୍ବର ପୀଡି଼ତା ସମସ୍ତଙ୍କୁ ଗୁହାରୀ କରିବା ପରେ ବି ନ୍ୟାୟ ମିଳିଲାନି । ସରକାରରେ ଶାସନ ବ୍ୟବସ୍ଥା କେତେ ଫଳପ୍ରଦ ତାହା ଏହି କେସରୁ ଜଣାପଡିଯାଇଛି । ବଡ ଠାକୁର ପଡିଯିବା ସହ ବିଭିନ୍ନ ଘଟଣାରେ ସରକାର ତଦନ୍ତ ରିପୋର୍ଟ କୁଆଡେ ଗଲା ବୋଲି ପ୍ରମିଳା ପ୍ରଶ୍ନ କରିଛନ୍ତି । ସେହିପରି ପୂର୍ବତନ ପିସିସି ସଭାପତି ଜୟଦେବ ଜେନା କହିଛନ୍ତି ଯେ ଓଡିଶାରେ ସରକାର ଅଛି ବୋଲି କେହି ଅନୁଭବ କରିପାରୁନାହାନ୍ତି ।
ବିଜେପି ସରକାର ଗଠନରେ ରାଜ୍ୟପାଳ ପୁଅ ଏଏସଓଙ୍କୁ ମାଡ ମାରିବା, ମାଣ୍ଡିପଙ୍କା ଗାଁରେ ଖାଦ୍ୟ ନପାଇ ଲୋକେ ଆମ୍ବ ଟାକୁଆ ଖାଇବା, ଧରାକୋଟରେ ଦଳିତଙ୍କ ବ୍ୟକ୍ତିଙ୍କୁ ନର୍ଦ୍ଦମା ପାଣି ପିଆଇ ରାସ୍ତାରେ ଆଣ୍ଠେଇ ଚଲାଇବା, ରାୟଗଡାରେ ପ୍ରେମୀ ଯୁଗଳଙ୍କୁ ବିଲରେ ହଳ କରାଇବା, ବିଏମସି ଅଫିସରେ ପଶି ସରକାରୀ ଅଧିକାରୀଙ୍କୁ ମାଡ ମାରିବା, ବିରୋଧୀ ନେତ୍ରୀଙ୍କୁ ବିଜେପି ବିଧାୟକ ଦେହଜୀବୀ କହିବା ପରି ବହୁ ପ୍ରସଙ୍ଗ ଓଡିଶାକୁ ଭାରତବର୍ଷରେ ଲଜ୍ଜିତ କରିଛି । ଏ ସବୁ ପ୍ରସଙ୍ଗରେ ବିଜେଡି ସରକାରଙ୍କୁ ଘେରିଛି । ନବୀନଙ୍କ ଶାସନରେ ଲୋକେ ଶାନ୍ତିରେ ଥିଲେ ।
ବିଜେପି ଯଦି ଶାସନ ବ୍ୟବସ୍ଥା ସମ୍ଭାଳି ପାରୁନି ଓ ଲୋକଙ୍କ ନ୍ୟାୟ ଦେଇପାରୁନି ତେବେ ଗାଦି ଛାଡନ୍ତୁ ବୋଲି କହିଛନ୍ତି ବିଜେଡି ବିଧାୟକ ପ୍ରଦୀପ ଦିଶାରୀ । ସେପଟେ ନବ ନିର୍ମାଣ କୃଷକ ସଂଘ ମଧ୍ୟ ୧୩ ମାସରେ ବିଜେପି ସରକାର ବର୍ଷ ଏକ ଉପଲବ୍ଧି ଅନେକ ପ୍ରଚାରକୁ କଟାକ୍ଷ କରିଛି । ବିଜେପିର ଉପଲବ୍ଧି କଣ ତାହା ଲୋକେ ଦେଖୁଛନ୍ତି ବୋଲି ନବ ନିର୍ମାଣ କୃଷକ ସଂଘ କହିଛି । ରାଜନୈତିକ ସମୀକ୍ଷକ କହିଛନ୍ତି ୧୩ମାସରେ ଅଧାଗଢା ସରକାର ରହିଛି । ମନ୍ତ୍ରିମଣ୍ଡଳରେ ୬ ମନ୍ତ୍ରୀପଦ ଖାଲିପଡିଥିବା ବେଳେ ଏଯାଏ ନିଗମ ବଣ୍ଟନ ବି କରିପାରୁନାହାନ୍ତି ସରକାର । ଦିଲ୍ଲୀରୁ ଫେରିବା ଦିନ ରାଜ୍ୟ ବିଜେପି ସଭାପତି ମନମୋହନ ସାମଲ କହିଥିଲେ ଠିକ ସମୟରେ ମନ୍ତ୍ରିମଣ୍ଡଳ ଓ ନିଗମ କଥା ଆଲୋଚନା କରାଯାଇ ନିଷ୍ପତ୍ତି ନିଆଯିବ । ୧୩ମାସ ପରେ ବିଜେପି ସରକାର ଲୋକଙ୍କ ଆଶା ଆକାଂକ୍ଷା ପୂରଣ କରିବାରେ ବିଫଳ ହୋଇଛି । ବଦଳରେ ବିପର୍ଯ୍ୟସ୍ତ ଆଇନଶୃଙ୍ଖଳା ପରିସ୍ଥିତି ଦେବା ସହ ଚାଷୀ ଓ ଗରିବଗୁରୁବାଙ୍କ ପ୍ରତି ସରକାର ଆଖି ବୁଜିଦେଇଥିବା ଅଭିଯୋଗ କରିଛନ୍ତି ବିରୋଧୀ ।
ବୋଲବମ ଧ୍ବନିରେ କମ୍ପିଲା ଶୈବପୀଠ: ଶ୍ରାବଣର ପ୍ରଥମ ସୋମବାର ଦିନ ଜଳଲାଗି କଲେ କାଉଡ଼ିଆ
ବୋଲବମ ଧ୍ବନିରେ କମ୍ପିଲା ଶୈବପୀଠ । ଶ୍ରାବଣର ପ୍ରଥମ ସୋମବାର ଦିନ ଜଳଲାଗି କଲେ କାଉଡ଼ିଆ । ଏଥିପାଇଁ ଶିବମୟ ହୋଇଛି ଶ୍ରୀକ୍ଷେତ୍ର । ଶ୍ରୀଜଗନ୍ନାଥଙ୍କ ଭଣ୍ଡାର ରକ୍ଷକ ପୁରୀର ବାବା ଲୋକନାଥଙ୍କ ପୀଠର ଜଳଲାଗି କରିଛନ୍ତି ହଜାର ହଚାର କାଉଡ଼ିଆ । ମାନସିକ ରଖି ଦୂର ଦୂରାନ୍ତରୁ ଛୁଟି ଆସିଥିଲେ କାଉଡ଼ିଆ । କାନ୍ଧରେ ବାହୁଙ୍ଗୀ ଧରି ରାତିରୁ ମନ୍ଦିର ପରିସରରେ ଲଗାଇଥିଲେ ଲମ୍ବା ଧାଡ଼ି । ବର୍ଷସାରା ଯିଏ ଜଳରେ ବୁଡି ରହିଥାନ୍ତି, ସେହି ଲୋକନାଥ ବାବାଙ୍କ ପୀଠରେ ଜଳଲାଗି କରି ଆନନ୍ଦିତ ହୋଇଛନ୍ତି ଶ୍ରଦ୍ଧାଳୁ ।
ଜଳଲାଗି ପାଇଁ ରବିବାର ଅପରାହ୍ନରୁ ଆରମ୍ଭ ହୋଇଥିଲା ଟିକେଟ ବିକ୍ରି । ରାତି ୧୨ଟା ୧୫ ରୁ ମଙ୍ଗଳ ଆଳତି ସରିବା ପରେ ମଇଲମ ଅବକାଶ ହୋଇ ରାତି ୧୨ଟା ୩୦ରୁ ଆରମ୍ଭ ହୋଇଥିଲା ଜଳଲାଗି । ମନ୍ଦିର ପରିସର ଟିକେଟ କାଉଣ୍ଟରରୁ ୩0 ଟଙ୍କାର ଟିକେଟ ନେଇ ଧାଡ଼ିବାନ୍ଧି ଯାଇଥିଲେ କାଉଡ଼ିଆ । ବ୍ୟାରିକେଡରେ ଯାଇ ରୋଷଘର ପଛପାର୍ଶ୍ଵ ପଟୁ ମନ୍ଦିର ପ୍ରବେଶ କରିବା ସହ ଲକ୍ଷ୍ମୀ ଦ୍ୱାର ନିକଟରେ ଜଳଲାଗି କରି ଫେରିଥିଲେ । ସୁରକ୍ଷା ବ୍ୟବସ୍ଥା ସହ ପ୍ରାୟ ୨ ହଜାର କାଉଡ଼ିଆଙ୍କ ପାଇଁ ଅସ୍ଥାୟୀ ସେଡ, ପାନୀୟ ଜଳ ଆଦି ବ୍ୟବସ୍ଥା କରିଥିଲା ପ୍ରଶାସନ । ଆସନ୍ତା ସୋମବାରରେ ଆହୁରି ଭିଡ଼ ହେବା ସମ୍ଭବାନ ଥିବାରୁ ପ୍ରଶାସନ ପକ୍ଷରୁ ସ୍ବତନ୍ତ୍ର ବ୍ୟବସ୍ଥା କରାଯାଇଛି ।
ଚାଷୀଙ୍କୁ ଘାରିଛି ସାର ଚିନ୍ତା: ସରକାରୀ କେନ୍ଦ୍ରରେ ମିଳୁନି ସାର
ଚାଷୀଙ୍କୁ ଘାରିଛି ସାର ଚିନ୍ତା । ସରକାରୀ କେନ୍ଦ୍ରରେ ମିଳୁନି ସାର । ତଳି ପକାଇ ଚାହିଁ ବସିଛନ୍ତି ଚାଷୀକୂଳ । ମାତିଛନ୍ତି ସାର କରବଜାରୀ । ଜିଲ୍ଲା କୃଷି ଅଧିକାରୀଙ୍କୁ ଘେରିଲେ ଚାଷୀ । ଚଳିତ ବର୍ଷ ବର୍ଷା ଭଲ ହୋଇଥିବାରୁ ଚାଷୀ ମୁହଁରେ ହସ ଫୁଟିଛି । କାହାର ତଳି ସଂଗ୍ରହ ଚାଲିଥିବାବେଳେ କିଏ ବିଲରେ ତଳି ରୋଇବା ଆରମ୍ଭ କଲେଣି । ହେଲେ ସାର ନ ମିଳିବାରୁ ପଡିଛି ଚଡ଼କ । ପ୍ରତିବାଦରେ ସମ୍ବଲପୁର ଜିଲ୍ଲା କୃଷି ଅଧିକାରୀଙ୍କୁ ଘେରାଉ କରିଥିଲେ ଚାଷୀ । ବାହାର ଦୋକାନରେ ସାର ମିଳୁଥିବାବେଳେ ସରକାରୀ କେନ୍ଦ୍ରକୁ କାହିଁକି ଆସିନି ବୋଲି ପ୍ରଶ୍ନ କରିଛନ୍ତି । ଅଧିକ ଲାଭ ପାଇବା ଆଶାରେ ସାର ବାଟମାରଣ କରାଯାଉଥିବା ଅଭିଯୋଗ କରିଛି ଚାଷୀ ସଂଗଠନ ।
ଜିଲ୍ଲାରେ ୨୪ହଜାର ମେଟ୍ରିକ ଟନ ୟୁରିଆ ସାର ଆବଶ୍ୟକ ରହିଥିବାବେଳେ ଏ ପର୍ଯ୍ୟନ୍ତ କେବଳ ୧୧ ହଜାର ମେଟ୍ରିକ ଟନ ଆସିଛି । ସେପଟେ ଜିଲ୍ଲାରେ DAP ସାର ୧୧ ହଜାର ମେଟ୍ରିକ ଟନ ଆବଶ୍ୟକ ରହିଥିବାବେଳେ ଆସିଛି ମାତ୍ର ୩୫୮୨ ମେଟ୍ରିକ ଟନ । ସାର ମିଳୁ ନଥିବାରୁ ଚାଲିଛି କଳାବଜାରୀ । ଚାଷୀଙ୍କ ଆବଶ୍ଯକତାକୁ ଦେଖି ଚଢା ଦରରେ ବିକ୍ରି କରୁଛନ୍ତି ଦୋକାନୀ । ସେପଟେ କିପରି ଚାଷୀ ସାର ପାଇ ପାରିବେ ସେନେଇ ଦୃଷ୍ଟି ଦେବାକୁ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଥିବା କହିଛନ୍ତି ଜିଲ୍ଲା ମୁଖ୍ୟ କୃଷି ଅଧିକାରୀ ।
ଲଗାଣ ବର୍ଷାରେ ଉବୁଟୁବୁ ରାଉରକେଲା: ରାସ୍ତା ଉପରେ ୩ ଫୁଟ ପାଣି
ଲଗାଣ ବର୍ଷାରେ ଉବୁଟୁବୁ ରାଉରକେଲା । ପାଣି ଘେରରେ ସହରର ତଳିଆ ଅଞ୍ଚଳବାସୀ । ରାସ୍ତା ଉପରେ ୩ ଫୁଟ ପାଣି, ବିତୁଛି ଜଳବନ୍ଦୀ ଜୀବନ । ସହରର ବେଦବ୍ୟାସ ଛକ ଠାରୁ ବେଦବ୍ୟାସ ମନ୍ଦିର ରାସ୍ତାରେ ଗୋଟିଏ ବଡ ଗଛ ଉପୁଡି ପଡି ଗୋଟିଏ ପଟ ରାସ୍ତା ଅବରୋଧ ହୋଇ ଗାଡି ଚଳାଚଳ ବ୍ୟାହତ ହୋଇଛି। ଏହାସହ ରାଉରକେଲା ସହରର ଉଦିତନଗର ସାରନା ଛକଠାରୁ ଦେଓଗାଁ ରାସ୍ତାରେ ଦୁଇ ଫୁଟର ବର୍ଷା ଜଳ ଜମି ରହିଥିବାରୁ ରାସ୍ତାରେ ଗାଡି ଚଳାଚଳ ବ୍ୟାହତ ହୋଇଛି । ବିଭିନ୍ନ ସ୍ଥାନରେ ଡ୍ରେନ ଜାମ ରହିଥିବାରୁ ବର୍ଷାଜଳ ନିଷ୍କାସନ ହୋଇ ନପାର ନିଥିବା ଲୋକେ ଅଭିଯୋଗ କରିଛନ୍ତି ।
ପାଣି ଜମି ରହିଥିବାରୁ ବିଶ୍ବକର୍ମା ବିହାର ଅଞ୍ଚଳରେ ୩୦ ଅଧିକ ଘର ଜଳବନ୍ଦୀ ଅବସ୍ଥାରେ ରହିଛି । ସ୍ଥିତିକୁ ଦେଖି ଆରଏମସି, ରାଉରକେଲା ଇସ୍ପାତ କାରଖାନା ଓ ଅଗ୍ନିଶମ ବାହିନୀ ଜଳ ନିଷ୍କାସନ ସହ ଉଦ୍ଧାର କାର୍ଯ୍ୟ ଜାରି ରଖିଛନ୍ତି । ବର୍ଷା ଯୋଗୁଁ ରାସ୍ତାରେ ଗୋଟିଏ କାର ଫସି ରହିଥିଲା । ଅଗ୍ନିଶମ ବିଭାଗର ଉଦ୍ୟମ ପରେ କାରଟିକୁ ଉଦ୍ଧାର କରାଯାଇଛି । ରାଉରକେଲା ବିଧାୟକ ବିଭିନ୍ନ ସ୍ଥାନ ଗସ୍ତ କରି ସ୍ଥିତି ଅନୁଧ୍ୟାନ କରି ତୁରନ୍ତ ପାଣି ନିଷ୍କାସନ ବ୍ୟବସ୍ଥା କରିବାକୁ ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି । ବର୍ଷା ଆସିବା ପୂର୍ବରୁ ଡ୍ରେନେଜ ବ୍ୟବସ୍ଥା ହୋଇ ନଥିବାରୁ ଏପରି ସ୍ଥିତି ଉପୁଜିଥିବା ଲୋକେ ଅଭିଯୋଗ କରିଛନ୍ତି ।
କଙ୍ଗାରୁ କୋର୍ଟରେ ପ୍ରେମୀଯୁଗଳଙ୍କୁ ବଳଦ ଦଣ୍ଡ: ପ୍ରଶାସନ ପକ୍ଷରୁ ତଦନ୍ତ ଜାରି
କଙ୍ଗାରୁ କୋର୍ଟରେ ପ୍ରେମୀଯୁଗଳଙ୍କୁ ବଳଦ ଦଣ୍ଡ । ପ୍ରଶାସନ ପକ୍ଷରୁ ତଦନ୍ତ ଜାରି । ଯୁବକ-ଯୁବତୀଙ୍କ ସହ ସରପଞ୍ଚ ଓ ଗ୍ରାମବାସୀଙ୍କୁ ପଚରାଉଚରା । ଉପ ଜିଲ୍ଲାପାଳଙ୍କ ସହ ତଦନ୍ତ ଆରମ୍ଭ କଲେ ୪ ଜଣିଆ ଟିମ୍ । ଭୁଲ ଥିଲା ଦୁହେଁ ଦୁହେଁ ଦୁହିଙ୍କୁ ଭଲ ପାଇ ବିବାହ କରିଥିଲେ । ହେଲେ ପରିବାର ଲୋକେ ସ୍ବୀକୃତି ଦେବାକୁ କହି ଗ୍ରାମସଭାରେ ହାଜର କରି ବଳଦ କରି ଗାଁରେ ହଳ ବୁଲାଇଲେ । ଆଦିବାସୀ ପରମ୍ପରାର ଦ୍ବାହି ଦେଇ ସର୍ବ ସମ୍ମୁଖରେ କାନ୍ଧରେ ପକାଇଲେ ଜୁହାଳି । ଗୋଟିଏ ବଂଶରେ ଗୋଟିଏ ଜାତିରେ ବିବାହ କରିଥିବାରୁ ଧରଣୀ ପେନୁ ରାଗିବ କହି ଗାଁ ଦାଣ୍ଡରେ ଦେଲେ ପଶୁତୁଲ୍ୟ ଦଣ୍ଡ । ନାରାୟପାଟଣା ବ୍ଲକ ବୋରିଗି ପଞ୍ଚାୟତ ପେଦାଇଟିକି ଗାଁର ଏହି ଘଟଣା ପଦାକୁ ଆସିବା ପରେ ଏବେ ଆରମ୍ଭ ହୋଇଛି ତଦନ୍ତ । ନାରାୟଣ ପାଟଣା ପୋଲିସ ଗାଁକୁ ଯାଇ ତଦନ୍ତ କରୁଛି । ଥାନାରେ ସରପଞ୍ଚ ସମେତ ଗାଁ ମୁଖିଆଙ୍କୁ ଡାକି ପଚରାଉଚରା କରିଛି ପୋଲିସ୍ । ତେବେ ଘଟଣା ପରେ ଯୁବକ ଜଣକ ତାଙ୍କ ପ୍ରେମିକାକୁ ଧରି ନିଜ ଘରକୁ ଫେରିଛନ୍ତି ।
ଖାଲି ଇଟିକି ନୁହେଁ ରାୟଗଡ଼ା କଲ୍ୟାଣସିଂହପୁରର କଞ୍ଜାମଯୋଡ଼ି ଗାଁରେ ମଧ୍ୟ ଏପରି ଘଟଣା ରାଜ୍ୟରେ ଆଲୋଡ଼ନ ସୃଷ୍ଟି କରିଛି । ଏପରି ବର୍ବରତା ଓ କୁସ୍ଚିତ କାର୍ଯ୍ୟ ସଭ୍ୟ ସମାଜରେ ଗ୍ରହଣୀୟ ନୁହେଁ ବୋଲି ଦର୍ଶାଇ ବିଭିନ୍ନ ସାମାଜିକ କର୍ମୀ ମାନବଧିକାର ଆୟୋଗ ନିକଟରେ ଫେରାଦ ହୋଇଛନ୍ତି । ପିଉସୀ ଓ ପୁତୁରାଙ୍କ ପ୍ରେମ ସଂପର୍କକୁ ବିରୋଧ କରି ଗତ ୯ ତାରିଖରେ କଞ୍ଜାମଯୋଡି ଗ୍ରାମବାସୀ ଉଭୟଙ୍କ ବେକରେ ଲଙ୍ଗଳ ପକାଇ ଜମିରେ ଚାଷ କରାଇଥିଲେ । ଘଟଣା ପରେ ଉପଜିଲ୍ଲାପାଳ ରମେଶ ଚନ୍ଦ୍ର ଜେନାଙ୍କ ସମେତ କଲ୍ୟାଣସିଂହପୁର ବିଡିଓ, ତହସିଲଦାର, ସିଡିପିଓ ଓ ସମାଜ ମଙ୍ଗଳ ଅଧିକାରୀ ପହଞ୍ଚି ତଦନ୍ତ କରୁଛନ୍ତି । ସେପଟେ ଏନେଇ ମାମଲା ହେବା ସହ ତଦନ୍ତ ଚାଲିଛି । ଲୋକଙ୍କୁ ସଚେତନ କରିବାକୁ ପଦକ୍ଷେପ ନିଆଯିବ ବୋଲି କହିଛନ୍ତି ଜିଲ୍ଲାପାଳ । ସଚେତନତା ଅଭାବରୁ ପରମ୍ପରା ନାଁରେ ଖୋଲାଖୋଲି ଭାବେ ମାନବାଧିକାର କ୍ଷୁର୍ଣ୍ଣ କରାଯାଉଛି । ଆଇନ କାନୁନ ପ୍ରତି ଭରସା ତୁଟିବାରେ ଲାଗୁଛି । ଏନେଇ ବ୍ୟାପକ ସଚେତନତାର ଆବଶ୍ୟକତା ଥିବା କହିଛନ୍ତି ବୁଦ୍ଧିଜୀବୀ ।
ଚିନ୍ତା ବଢାଇଲା ରେଭେନ୍ସା ଝାଡ଼ାବାନ୍ତି: କେଉଁ ପରିସ୍ଥିତିରେ ଆକ୍ରାନ୍ତ ହେଲେ ଛାତ୍ର ?
ଚିନ୍ତା ବଢାଇଲା ରେଭେନ୍ସା ଝାଡ଼ାବାନ୍ତି । କେଉଁ ପରିସ୍ଥିତିରେ ଆକ୍ରାନ୍ତ ହେଲେ ଛାତ୍ର ? ଖାଦ୍ୟ ନା ପାଣିରେ ଥିଲା ସମସ୍ୟା ? ସଂକ୍ରମଣ ପରେ ଚେତିଲା ସ୍ବାସ୍ଥ୍ୟ ବିଭାଗ । ହଷ୍ଟେଲରେ ପହଞ୍ଚି ସ୍ଥିତି ଅନୁଧ୍ୟାନ କଲେ ଜନସ୍ବାସ୍ଥ୍ୟ ଅଧିକାରୀ । ନ୍ୟୁ ପିଜି ଓ ଧର୍ମପଦ ହଷ୍ଟେଲର ୮୫ ଜଣ ଛାତ୍ର ଝାଡ଼ାବାନ୍ତିରେ ଆକ୍ରାନ୍ତ ହୋଇଥିଲେ । ୪୪ ଜଣଙ୍କୁ ଏସସିବି ମେଡିକାଲରେ ଭର୍ତ୍ତି କରାଯାଇଥିବାବେଳେ ୧୯ ଜଣ ସୁସ୍ଥ ହୋଇ ଫେରିଛନ୍ତି । ଉଭୟ ହଷ୍ଟେଲରେ ସ୍ବାସ୍ଥ୍ୟ ବିଭାଗ ଓ ଜିଲ୍ଲା ଜନସ୍ବାସ୍ଥ୍ୟ ଅଧିକାରୀ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି । ପାଣିର ରିପୋର୍ଟ ଆସି ନଥିବାବେଳେ ରୋଷେଇ ଘର, ହଷ୍ଟେଲ ବାରଣ୍ଡା ବିଶୋଧନ କରାଯାଇଛି । ନୂଆ ଭେଣ୍ଡରକୁ ଏସଓପି ମାନି ଖାଦ୍ୟ ଯୋଗାଇ ଦେବାକୁ ତାଗିଦ କରାଯାଇଛି ।
ବାସି ଓ ଖରାପ ମାଛ ତରକାରୀ ଖାଇ ଛାତ୍ର ଆକ୍ରାନ୍ତ ହୋଇଥିବା ପ୍ରାଥମିକ ସମୀକ୍ଷାରୁ ଜଣା ପଡ଼ିଛି । ଛାତ୍ରଙ୍କ ସ୍ବାସ୍ଥ୍ୟ ଉପରେ ନଜର ରଖିବାକୁ ଜଣେ ଡାକ୍ତର ଓ ଜଣେ ଫାର୍ମାସିଷ୍ଟଙ୍କୁ ଦାୟିତ୍ବ ଦିଆଯାଇଛି । ଗତ ଶନିବାର ଖାଇବା ପରେ ହଠାତ ଛାତ୍ରମାନଙ୍କୁ ଝାଡ଼ାବାନ୍ତି ହୋଇଥିଲା । ତୁରନ୍ତ ସେମାନଙ୍କୁ ଆମ୍ବୁଲାନ୍ସ ଯୋଗେ ଏସସିବି ପଠାଯାଇଥିଲା । ସେପଟେ ରାଜ୍ୟର ପ୍ରମୁଖ ବିଶ୍ବବିଦ୍ୟାଳୟରେ ଏପରି ଅବହେଳା ଏବେ ଅଭିଭାବକଙ୍କୁ ଚିନ୍ତାରେ ପକାଇଛି ।
ଶୁଣିଲାନି ପ୍ରଶାସନ: ନିଜସ୍ଵ ଉଦ୍ୟମରେ କାଠ ପୋଲ ନିର୍ମାଣ କଲେ ଲୋକେ
ଶୁଣୁନି ପ୍ରଶାସନ । ନିଜସ୍ଵ ଉଦ୍ୟମରେ କାଠପୋଲ ନିର୍ମାଣ କରୁଛନ୍ତି ଲୋକେ । ପ୍ରତିବର୍ଷ ଲୋକେ ଏଭଳି ସଂଘର୍ଷ କରୁଛନ୍ତି । କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକ ଲୁଇସିଂ ପଞ୍ଚାୟତର କୁଚେଣ୍ଡି ନଦୀ ଉପରେ ନାହିଁ ସ୍ଥାୟୀ ପୋଲ । ଫଳରେ ଗ୍ରାମବାସୀ ମିଶି ନିଜସ୍ଵ ଉଦ୍ୟମରେ କାଠପୋଲ ନିର୍ମାଣ କରୁଛନ୍ତି ହେଲେ ବର୍ଷା ଦିନେ ତାହା ଭାସିଯାଉଛି । ଯାହାଫଳରେ ଲୁଇସିଂ ପଞ୍ଚାୟତରେ ରହୁଥିବା ୨ ହଜାରରୁ ଉର୍ଦ୍ଧ୍ଵ ଲୋକେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି । ବଜାର, ହାଟ, ପଞ୍ଚାୟତ କାର୍ଯ୍ୟାଳୟକୁ ଯାଇ ପାରୁନାହାନ୍ତି । ଯାହାକୁ ନେଇ ଲୋକଙ୍କ ମଧ୍ଯରେ ତୀବ୍ର ଅସନ୍ତୋଷ ଦେଖାଦେଇଛି ।
ଚଳିତ ଥର ଲଗାଣ ବର୍ଷାରେ କୁଚେଣ୍ଡି ନଦୀ ଉପରେ ଥିବା କାଠପୋଲ ଧୋଇ ଯାଇଥିଲା । ଲୋକେ ସମସ୍ୟା ସଂପର୍କରେ ଅନେକ ଥର ପ୍ରଶାସନ ସମେତ ବିଧାୟକଙ୍କ ନିକଟରେ ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳିଲା ନାହିଁ । ବାଧ୍ଯ ହୋଇ ତଳ ଡାଙ୍ଗାଣାମ, ଉପର ଡାଙ୍ଗାଣାମ, ଶାଗଜଲା, ପାନପଦର, କଟଡି ସିରା, ବାଗ ନୁରୀ, ଟୁକୁ ଭଳି ୧୧ ରୁ ଉର୍ଦ୍ଧ୍ଵ ଗାଁ ଲୋକେ ମିଶି ନଦୀ ଉପରେ ଏକ ଅସ୍ଥାୟୀ ପୋଲ ନିର୍ମାଣ କରିଛନ୍ତି । କେବେ କୁଚେଣ୍ଡି ନଦୀ ଉପରେ ବ୍ରିଜ ନିର୍ମାଣ ହେଉଛି ତାହା ଉପରେ ସମସ୍ତଙ୍କ ନଜର ରହିଛି ।
ଗାଁକୁ ନାହିଁ ପକ୍କା ରାସ୍ତା: କାଦୁଅ ପଚପଚ ରାସ୍ତା ସାଜିଛି ଯୋଗାଯୋଗର ମାଧ୍ୟମ
ଟିକେ ନଜର ପକାନ୍ତୁ ଏହି ଦୃଶ୍ୟ ଉପରେ । କିପରି କାଦୁଅରେ ପରିପୂର୍ଣ୍ଣ ହୋଇଛି ରାସ୍ତା । ଚାଲିଯିବା ବି ମୁସ୍କିଲ ହୋଇପଡୁଛି । ଏଥିରେ ଆମ୍ବଲାନ୍ସ ବା ଯିବ କେମିତି ? ବାଧ୍ୟ ହୋଇ ଖଟିଆରେ ରୋଗୀଙ୍କୁ ଆମ୍ବୁଲାନ୍ସ ନିକଟକୁ ବୋହି ଆଣୁଛନ୍ତି ରୋଗୀଙ୍କ ସଂପର୍କୀୟ । ଏଭଳି କିଛି ଚିତ୍ର ଦେଖିବାକୁ ମିଳିଛି ଜଗତସିଂହପୁର ଜିଲ୍ଲା ବାଲିକୁଦା ବ୍ଳକ ମିଞ୍ଜାପଡା ଗାଁରୁ । ମିଞ୍ଜାପଡା ଗାଁଟି ମୁଖ୍ୟ ରାସ୍ତା ଠାରୁ ଦୁଇ କିଲୋମିଟର ଦୂରର ଥିଲେ ମଧ୍ୟ ଦୀପତଳ ଅନ୍ଧାର ଭଳି ଏଠାରେ ରହୁଥିବା ୨ ଶହରୁ ଉର୍ଦ୍ଧ୍ଵ ଲୋକଙ୍କ ଭାଗ୍ୟ ଏବେବି ଅନ୍ଧାରରେ ରହିଛି । ଗାଁକୁ ଯିବାକୁ ହେଲେ ପକ୍କା ରାସ୍ତା ଟିଏ ନଥିବାରୁ ଖରାଦିନ ଲୋକେ ଯେଣତେଣ ପ୍ରକାରେ ଯିବା ଆସିବା ତ କରିଦିଅନ୍ତି ହେଲେ ବର୍ଷା ଦିନେ ସମସ୍ଯା ଦ୍ଵିଗୁଣିତ ହୋଇ ଯାଉଛି ।
ସେପଟେ ଏହି ରାସ୍ତାଦେଇ ଦୈନିକ ଅନେକ ଲୋକ ସାଙ୍ଗକୁ ଛାତ୍ରଛାତ୍ରୀ ଯାଆସ କରୁଛନ୍ତି । ରାସ୍ତା ଦୂରାବସ୍ଥା ଯୋଗୁଁ ଲୋକେ ବହୁ ଅସୁବିଧାର ସମ୍ମୁଖୀନ ହେଉଥିଲେ ବି ପ୍ରଶାସନ ଦୃଷ୍ଟି ଦେଉନଥିବା ଅଭିଯୋଗ ହୋଇଛି । ଯାହା ଫଳରେ ମିଞ୍ଜାପଡା ବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଲାଣି ।
ଶିକ୍ଷା ବ୍ୟବସ୍ଥାର ବିକଳ ଚିତ୍ର: ବାରଣ୍ଡାରେ ଚାଲିଛି ପିଲାଙ୍କ ପାଠପଢା
ଶିକ୍ଷା ବ୍ୟବସ୍ଥାର ବିକଳ ଚିତ୍ର । ବାରଣ୍ଡାରେ ଚାଲିଛି ପିଲାଙ୍କ ପାଠପଢା । ଅବ୍ୟବସ୍ଥା ଘେରରେ ବଲାଙ୍ଗୀର ଜିଲ୍ଲା ତୁରେକେଲା ବ୍ଲକ ହିଆଁଲ ଉନ୍ନୀତ ଉଚ୍ଚ ବିଦ୍ୟାଳୟ । ସ୍କୁଲରେ ପ୍ରଥମରୁ ଦଶମ ଶ୍ରେଣୀ ପର୍ଯ୍ୟନ୍ତ ୪୬୭ ଜଣ ଛାତ୍ରଛାତ୍ରୀ ପାଠ ପଢୁଛନ୍ତି । ହେଲେ ଛାତ୍ରଛାତ୍ରୀଙ୍କ ପାଇଁ ପର୍ଯ୍ୟାପ୍ତ ଶ୍ରେଣୀ ଗୃହ ନାହିଁ । ଫଳରେ ଖରା ହେଉ ବା ବର୍ଷା, ବର୍ଷ ତମାମ ସ୍କୁଲ ବାରଣ୍ଡାରେ ଚାଲୁଛି ପିଲାଙ୍କ ପାଠପଢା । ବାରଣ୍ଡାରେ ପାଠପଢା ହେଉଥିବାରୁ ଠିକ ଭାବରେ ପାଠ ପଢା ହୋଇପାରୁନଥିବା ଅଭିଯୋଗ କରିଛନ୍ତି ଛାତ୍ରଛାତ୍ରୀ ।
ସ୍କୁଲରେ କୋଠରୀ କମ ଥିବାରୁ ସ୍କୁଲକୁ ଆସୁଥିବା ଶିକ୍ଷଣୀୟ ସାମଗ୍ରୀ, ଏମଡିଏମ ଚାଉଳ ମଧ୍ୟ ରଖିବାକୁ ସ୍ଥାନ ନଥିବାରୁ ତାହା ମଧ୍ୟ ନଷ୍ଟ ହେଉଛି । ଶ୍ରେଣୀ ଗୃହ ଅଭାବ ନେଇ ପ୍ରଶାସନ ନିକଟରେ ସ୍କୁଲ କମିଟି ପକ୍ଷରୁ ବାରାମ୍ବାର ଅଭିଯୋଗ ପରେ ମଧ୍ୟ କୌଣସି ସୁଫଳ ମିଳିପାରିନାହିଁ । ଅନ୍ୟପଟେ ଅଭିଯୋଗକୁ ସ୍ଵୀକାର କରିବା ସହ ଖୁବଶୀଘ୍ର ସମସ୍ଯାର ସମାଧାନ କରାଯିବ ବୋଲି କହିଛନ୍ତି ବିଇଓ । କେବେ ହିଆଁଲ ଉନ୍ନୀତ ଉଚ୍ଚ ବିଦ୍ୟାଳୟର ସମସ୍ୟାର ସମାଧାନ ହେବ ? ତାହା ଉପରେ ସମସ୍ତଙ୍କ ନଜର ରହିଛି ।