ଭୁବନେଶ୍ୱର: ଗିରଫ ପରେ ନିଲମ୍ୱିତ ହେଲେ IFS ଅଭୟକାନ୍ତ ପାଠକ । ଆୟବହିର୍ଭୂତ ସଂପତ୍ତି ଠୁଳ ଅଭିଯୋଗରେ ନିଲମ୍ୱିତ ହୋଇଛନ୍ତି ଅଭୟକାନ୍ତ । ଅତିରିକ୍ତ ପିସିସଏଫ ଦାୟିତ୍ୱରେ ଥିଲେ ଅଭୟକାନ୍ତ । ବେନାମୀ ସଂପତ୍ତି ଠୁଳ ଅଭିଯୋଗରେ ଗିରଫ ହୋଇଥିଲେ ପାଠକ ବାପ-ପୁଅ । ଜାମିନ ନାମଞ୍ଜୁର ପରେ ସେମାନଙ୍କୁ ବିଚାର ବିଭାଗୀୟ ହାଜତକୁ ପଠାଯାଇଛି ।

ଅଭୟକାନ୍ତ ଓ ପୁଅ ଆକାଶକୁ ଗିରଫ ପରେ ଝାରପଡା ଜେଲ ପଠାଇଛି ଭିଜିଲାନ୍ସ । ଏବେ ତାରକା ହୋଟେଲ ବଦଳରେ ଜେଲ ଭିତରେ କଟିବ ଜୀବନ । ଆସନ୍ତା 9 ତାରିଖ ପର୍ଯ୍ୟନ୍ତ ନ୍ୟାୟିକ ହେପାଜତରେ ରହିବେ ଉଭୟ ବାପ ଓ ପୁଅ । ଦୁଇ ଦିନ ଧରି ଭିଜିଲାନର ମାରାଥନ୍ ଚଢାଉ ପରେ ଆଇଏଫଏସ ଅଫିସର ଅଭୟକାନ୍ତ ପାଠକ ଓ ପୁଅ ଆକାଶ ପାଠକ ଗିରଫ ହୋଇଥିଲେ । ଭୁବନେଶ୍ବର ଭିଜିଲାନ୍ସ ସେଲ କାର୍ଯ୍ୟାଳୟରେ ବାପା ପୁଅଙ୍କୁ ସାମ୍ନାସାମ୍ନି ଜେରା ପରେ ଡାକ୍ତରୀ ଯାଞ୍ଚ କରି ଗିରଫ କରାଯାଇଥିଲା ।

କୋରାପୁଟ: ପିଶାଚ ସାଜିଲା ବାପା । ୬ ବର୍ଷର ଝିଅକୁ ହତ୍ୟା କରି ପୋତିଦେଲା ବାପା । ଏଭଳି ନୃସଂଶ ଘଟଣା ଘଟିଛି କୋରାପୁଟ ପଟାଙ୍ଗି ବ୍ଲକ ଟାଉପଦର ଗାଁରେ । ଦେଓମାଳି ପର୍ବତ ନିକଟର ଭୈରବ ମନ୍ଦିର ଠାରୁ ମୃତଦେହକୁ ପୋତିଥିବା ଅବସ୍ଥାରେ ଠାବ କରିଛି ପଟାଙ୍ଗୀ ପୋଲିସ । ଗତ କିଛିଦିନ ତଳେ ଝିଅ ନିଖୋଜ ହୋଇଥିବା ନେଇ ନିଜେ ବାପା ସୂଚନା ଦେଇଥିଲେ । ଏନେଇ ଥାନାରେ ଏତଲା ପରେ ପୋଲିସ ଇଭେଷ୍ଟିଗେସନ ଆରମ୍ଭ କରିଥିଲା । ତେବେ ତଦନ୍ତରୁ ନିଜେ ବାପା ହିଁ ହତ୍ୟାକାରୀ ବୋଲି ପୋଲିସ ଜାଣିବାକୁ ପାଇଥିଲା । ସେପଟେ ଗ୍ରାମବାସୀ ବାପା ଝିଅକୁ ବଳି ଦେଇଥିବା ଅଭିଯୋଗ କରିଛନ୍ତି ।

ଭୁବନ: ଯାତ୍ରୀବାହୀ ବସ ଉପରକୁ ଗୁଳିମାଡ଼ । ଅଳ୍ପକେ ବର୍ତ୍ତିଲେ ବସ୍ ଚାଳକ । ବାଇକରେ ଆସିଲେ ସାମ୍ନାପଟୁ ଗଳି ମାରିଲେ । ଏଭଳି ଘଟଣା ଘଟିଛି ଢେଙ୍କାନାଳ ଜିଲ୍ଲା ଭୁବନ ବ୍ଲକ ବାଜିରାଉତ ସେତୁ ନିକଟ ଛକରେ । ମଲ୍ଲିକ ନାମକ ଏକ ଯାତ୍ରୀବାହୀ ବସ ଉପରକୁ ଜଣେ ଯୁବକ ଓ ଯୁବତି ଗୁଳି ଚଳାଇଛନ୍ତି । ବସଟି କଟକରୁ ଭୁବନ ଅଭିମୁଖେ ଯାଉଥିବା ବେଳେ ଦେଓଗାଁ ରାସ୍ତାରେ ଏକ ବାଇକରେ ଦୁଇ ଜଣ ଯୁବକ ଓ ଯୁବତୀ ବାରମ୍ବାର ଓଭରଟେକ୍ କରିଥିଲେ । ଏଭଳି ନକରିବା ପାଇଁ ବସ ଡ୍ରାଇଭର କହିବାରୁ ସେମାନଙ୍କ ସହ ଝଗଡ଼ା ହୋଇଥିଲା । ପରେ ଯୁବକ-ଯୁବତୀ ଉତ୍ୟକ୍ତ ହୋଇ ବାଜିରାଉତ ସେତୁ ନିଳକଣ୍ଠପୁର ଛକରେ ବସ ଡ୍ରାଇଭର ଉପରକୁ ବ୍ୟାଗରୁ ମାଉଜର ଖୋଲି ଗୁଳି ଚଳାଇଥିଲେ । ସ୍ଥାନୀୟ ଲୋକ ଆସିବାରୁ ଦୁଇ ଜଣ ନଦୀ ପଠାକୁ ଦୌଡି ପଳାଇଥିଲେ । ପରେ ଖବର ପାଇ ପୋଲିସ ଘଟଣାସ୍ଥଳରେ ପହଁଚି ତଦନ୍ତ ଚଳାଇଛି ।

ଭୁବନେଶ୍ୱର: ରାସ୍ତାରେ ଟାୟାର ଜାଳି ରାସ୍ତା ରୋକ । ଡାକ୍ତରଖାନାରେ ପସିଲେ ଭଙ୍ଗା ରୁଜା କଲେ । ଏଭଳି ଏକ ଘଟଣା ଦେଖିବାକୁ ମିଳିଛି ବାଲେଶ୍ୱର ଜିଲ୍ଲା ଭୋଗରାଇ  ଥାନା  ଜଳେଶ୍ଵରପୁର  ଗୋଷ୍ଠୀ ସ୍ଵାସ୍ଥ୍ୟ କେନ୍ଦ୍ରରେ । ଡାକ୍ତରଙ୍କ ଚିକିତ୍ସା ଅବହେଳାରୁ ଏଭଳି ହୋଇଥିବା ଅଭିଯୋଗ ହୋଇଛି । ପାଣିରେ  ବୁଡ଼ି ଯାଇଥିବା ଶିଶୁ କନ୍ୟାର ମୃତ୍ୟୁକୁ ନେଇ  ହସ୍ପିଟାଲରେ ସମ୍ପର୍କିୟମାନେ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଭଙ୍ଗା ରୁଜା କରିଛନ୍ତି । ତେବେ ନ୍ୟାୟ ପାଇଁ ଟାୟାର ଜାଳି ରାସ୍ତା ଅବରୋଧ କରିଛନ୍ତି ସ୍ଥାନୀୟ ଲୋକେ । ଘଟଣାସ୍ଥଳରେ  ଭୋଗରାଇ  ପୋଲିସ  ପହଞ୍ଚି  ତଦନ୍ତ ଆରମ୍ଭ କରିଛନ୍ତି  ।

ସୂଚନା ଅନୁଯାୟୀ, ଭୋଗରାଇ ଥାନା ଛୋଟ ମହେଶ ପୁର ଗାଁର ଅନୀଲ କାମିଳାଙ୍କ ତିନି ବର୍ଷର  ଝିଅ ଦିବ୍ୟାଂସି ଆଜି  ଅପରାହ୍ନରେ  ପାଣିରେ  ବୁଡ଼ି ଯାଇଥିଲା । ଘର ଲୋକେ ଉଦ୍ଧାର କରି ଝିଅକୂ ଜଳେଶ୍ଵରପୁର ହସ୍ପିଟାଲକୁ ଆଣି ଥିଲେ । ମାତ୍ର   ସନ୍ଧ୍ୟା ବେଳେ କୌଣସି ଡାକ୍ତର  ହସ୍ପିଟାଲରେ ନଥିଲେ । ଦୀର୍ଘ ସମୟ ଅପେକ୍ଷା ପରେ  ଜଣେ  କର୍ମଚାରୀ  ଡାକ୍ତର ତାଙ୍କ  ସରକାରୀ ବାସଭବନରେ  ଅଛନ୍ତି  ସେଠାକୁ  ନେଲେ  ଦେଖିବେ ବୋଲି କହିଥିଲେ । ଘର ଲୋକେ  ଡାକ୍ତରଙ୍କୁ  ତାଙ୍କ  ବାସଭବନରୁ  ଡାକି ଆଣିବା  ପରେ  ଡାକ୍ତର  ଶିଶୁଟିର  ମୃତ୍ୟୁ  ହୋଇ ଯାଇଥିବା କହିଥିଲେ । ଫଳରେ  ସେଠାରେ  ଉତେଜନା ସୃଷ୍ଟି ହୋଇଥିଲା । ଘଟଣାସ୍ଥଳରେ  ଭୋଗରାଇ  ପୋଲିସ ପହଞ୍ଚି  ତଦନ୍ତ  ଆରମ୍ଭ କରିଛି ।

ରାଉରକେଲା: ଭିଜିଲାନ୍ସ ଜାଲରେ  ୱେସ୍କୋ ଯନ୍ତ୍ରୀ । ଟ୍ରାନସଫରମର ବସାଇବା ପାଇଁ ୧୫ ହଜାର ଟଙ୍କା ଲାଞ୍ଚ ନେଉଥିବା ସମୟରେ ଧରିଲା ଭିଜିଲାନ୍ସ । ଯନ୍ତ୍ରୀ ଯଶୋବନ୍ତ ନାରାୟଣ ଦେଓ ଭିଜିଲାନ୍ସ ହାତରେ ଧରା ପଡ଼ିଛନ୍ତି । ୧୫ ହଜାର ଲାଞ୍ଚ ଟଙ୍କା ଜବତ କରି ଭିଜିଲାନ୍ସ ବିଭାଗ । ଏଭଳି ଏକ ଘଟଣା ଦେଖିବାକୁ ମିଳିଛି ସୁନ୍ଦରଗଡ ଜିଲ୍ଲା ସବଡେଗା ବ୍ଲକ ଟାଙ୍ଗର ଗାଁରେ । ଯନ୍ତ୍ରୀଙ୍କୁ ଗିରଫ କରି ଘଟଣାର ତଦନ୍ତ ଆରମ୍ଭ କରିଛି ।

ତେବେ ଉକ୍ତ ଗାଁରେ ଗତ ଏପ୍ରିଲ ମାସରୁ  ଟ୍ରାନସଫରମର ପୋଡିଯାଇଥିଲେ ମଧ୍ୟ  ଟ୍ରାନ୍ସଫର୍ମର ବସାଇବା  ପାଇଁ ୱେସ୍କୋର  ସବଡେଗା ସେକ୍ସନର କନିଷ୍ଠ ଯନ୍ତ୍ରୀ ଯଶବନ୍ତ ନାରାୟଣ ଦେଓ ୧୫ ହଜାର ଲାଞ୍ଚ ମାଗିଥିଲେ । ଏନେଇ ଗାଁ ଲୋକେ ଭିଜିଲାନ୍ସ ପାଖରେ ଅଭିଯୋଗ କରିଥିଲେ । ଆଜି  ଜଣେ ଗ୍ରାମବାସୀଙ୍କ ଠାରୁ ଯନ୍ତ୍ରୀ ୧୫ ହଜାର ଟଙ୍କା ଲାଞ୍ଚ ନେବା ସମୟରେ ସୁନ୍ଦରଗଡ଼ ଭିଜିଲାନ୍ସ ହାତରେ ଧରାପଡି କନିଷ୍ଠ ଯନ୍ତ୍ରୀ  ଗିରଫ ହୋଇଛନ୍ତି ।

ଭୁବନେଶ୍ୱର: କେନ୍ଦ୍ର ରେଳମନ୍ତ୍ରୀଙ୍କୁ ଚିଠି ଲେଖିଲେ ବିଜେଡି ସାଂସଦ ଅମର ପଟ୍ଟନାୟକ । ରାଜ୍ୟରେ ରେଳବାଇ ପ୍ରକଳ୍ପର କାମ ନେଇ ଚିଠି ଲେଖିଛନ୍ତି । ରାଜ୍ୟ ସରକାର ଜମି ଯୋଗାଇଥିଲେ ମଧ୍ୟ ଏ ଯାଏଁ ପୁରୀ-କୋଣାର୍କ ରେଳ ପ୍ରକଳ୍ପ ଆଗେଇ ପାରୁନି । ପ୍ରକଳ୍ପ ପାଇଁ ରାଜ୍ୟ ୫୦ ପ୍ରତିଶତ ଅର୍ଥ ବହନ କରିଛନ୍ତି । ହେଲେ ୨୦୧୬ରୁ ଆରମ୍ଭ ହୋଇଥିବା କାମ ଏପର୍ଯ୍ୟନ୍ତ ଶେଷ ହୋଇନାହିଁ ।

ସେହିପରି ୨୦୧୭ରୁ ଅନୁମତି ପାଇଥିବା ଗୁଣୁପୁର- ଥେରୁବାଲି ପ୍ରକଳ୍ପ କାମରେ ମଧ୍ୟ ସମାନ ଅବସ୍ଥା ଦେଖିବାକୁ ମିଳିଛି । ଜମି ଚିହ୍ନଟ ପରେ ମଧ୍ୟ ଶିତଳାପାଲି ଓ୍ୱାଗନ କାରଖାନା କାମ ଆରମ୍ଭ ହୋଇନାହିଁ ବୋଲି ଚିଠିରେ ଉଲ୍ଲେଖ କରିଛନ୍ତି ସାଂସଦ ଅମର ପଟ୍ଟନାୟକ । ଏହା ସହିତ ଖୋର୍ଦ୍ଧା-ବଲାଙ୍ଗୀର ପ୍ରକଳ୍ପ କାମ ଅଧପନ୍ତରିଆ ଅବସ୍ଥାରେ ରହିଛି । ପଶ୍ଚିମ ଓଡ଼ିଶାରେ ରେଳ ଯୋଗାଯୋଗର ଉନ୍ନତି ଦାବି ସହ ପଶ୍ଚିମ ଓଡ଼ିଶାକୁ ରାଜଧାନୀ ଓ ତେଜସ୍ ଏକ୍ସପ୍ରେସ ଚଳାଇବାକୁ ଦାବି କରିଛନ୍ତି ବିଜେଡି ସାଂସଦ ଅମର ପଟ୍ଟନାୟକ ।