ଭୁବନେଶ୍ୱର: ଆସନ୍ତା ଡିସେମ୍ୱର ୧ରୁ ରାଜ୍ୟରେ ଖୋଲିବ ସମସ୍ତ ମେଡିକାଲ କଲେଜ । ଏ ନେଇ ସୂଚନା ଦେଇଛନ୍ତି ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ ମହାପାତ୍ର । କୋଭିଡ ଗାଇଡଲାଇନ ଅନୁସାରେ ଖୋଲିବ ମେଡିକାଲ କଲେଜ । କେନ୍ଦ୍ରର ନୂଆ ଗାଇଡଲାଇନ ପାଳନ କରି ଖୋଲିବାକୁ ନିଷ୍ପତ୍ତି ନିଆଯାଇଛି । କରୋନା ଯୋଗୁଁ ପାଠପଢ଼ା ଓ ପ୍ରଶିକ୍ଷଣରେ ବ୍ୟାହତ ହେଉଥିଲା । ଏବେ ପାଠପଢା ସ୍ୱାଭାବିକ କରିବା ପାଇଁ ନିଷ୍ପତ୍ତି ନେଇଛନ୍ତି ସରକାର ।
ହାର ମାନିଲେ ସରକାର, ଦିଲ୍ଲୀରେ ଏଣ୍ଟ୍ରି ଦେବାକୁ ବାଧ୍ୟ ହେଲେ ! ୬ ମାସ ଆନ୍ଦୋଳନ ପାଇଁ ରାସନ ଆଣିଛନ୍ତି ଚାଷୀ
ନୂଆଦିଲ୍ଲୀ: ଚାଷୀଙ୍କ ଜିଦ୍ ଆଗରେ ହାର ମାନିଲେ ସରକାର । ଦିଲ୍ଲୀରେ ଏଣ୍ଟ୍ରି ପାଇଁ ଦେଲେ ଅନୁମତି । ବୁରାଡିରେ ଚାଷୀ ଆନ୍ଦୋଳନ କରିବେ । ଏଥିସହ ସୀମା ସିଲକୁ ମଧ୍ୟ ହଟାଯାଇଛି । କୃଷି ଆଇନକୁ ବିରୋଧ କରି ଚାଷୀଙ୍କ ଦିଲ୍ଲୀ ଚଲ୍ଲୋ ଅଭିଯାନ ଏକ ପ୍ରକାର ସଫଳ ହୋଇଛି । ଶୁକ୍ରବାର ସକାଳୁ ପ୍ରଥମେ ପୋଲିସଙ୍କ ସହ ଆନ୍ଦୋଳନକାରୀଙ୍କ ଆଲୋଚନା ହୋଇଥିବା ବେଳେ କୌଣସି ଫଳ ବାହାରି ପାରିନଥିଲା । ବରଂ ପାଣି ମାଡ କରି ଚାଷୀଙ୍କୁ ପଛଘୁଂଚା ଦେବା ପାଇଁ ବାଧ୍ୟ କରାଯାଇଥିଲା । କିନ୍ତୁ ପୋଲିସ ଏହି ଉଦ୍ୟମରେ ସଫଳ ହୋଇପାରିଲା ନାହିଁ । ଚାଷୀଙ୍କୁ ରାଜଧାନୀରେ ଆନ୍ଦୋଳନ କରିବାକୁ ଏବେ ଅନୁମତି ଦିଆଯାଇଛି ।
କୃଷି ଆଇନକୁ ବିରୋଧ କରି ଦ୍ୱିତୀୟ ଦିନରେ ପହଞ୍ଚିଛି ଚାଷୀଙ୍କ ଦିଲ୍ଲୀ ଚଲୋ ଅଭିଯାନ । ଦିଲ୍ଲୀରେ ବିରୋଧ ପ୍ରଦର୍ଶନ କରିବା ପାଇଁ ଜିଦ୍ରେ ଅଟଳ ଚାଷୀ । ରାତି ତମାମ ପାନିପତ ଟୋଲ ପ୍ଲାଜା ନିକଟରେ ଚାଷୀ ଶୋଇଥିବା ବେଳେ ସକାଳୁ ସକାଳୁ ପୁଣି ଦିଲ୍ଲୀ ଅଭିମୁଖେ ବାହାରିଥିଲେ । ସିନ୍ଧୁ ସୀମା ଦେଇ ସେମାନେ ଦିଲ୍ଲୀରେ ପ୍ରବେଶ କରିବା ପୂର୍ବରୁ ସେଠାରେ ତାଙ୍କୁ ପୋଲିସ ଅଟକାଇଥିଲା । ଥଣ୍ଡା ଦିନରେ ପାଣି ମାଡ଼ କରି ଚାଷୀଙ୍କୁ ଫେରାଇ ଦେବାକୁ ଉଦ୍ୟମ କରିଥିଲେ ପୋଲିସ କର୍ମୀ । କିନ୍ତୁ ନିଜ ଜିଦ୍ରେ ଅଟଳ ଚାଷୀ । ପୋଲିସର ନିର୍ଯାତନା ସତ୍ତ୍ୱେ ସେମାନେ ସିନ୍ଧୁ ସୀମାରୁ ହଟିନଥିଲେ । ପରେ ଚାଷୀଙ୍କ ଆଗରେ ପୋଲିସ କର୍ମୀ ହାର୍ ମାନି ଦିଲ୍ଲୀର ବୁରାଡି ଯାଇ ଆନ୍ଦୋଳ କାରିବାକୁ ଅନୁମତି ଦେଇଥିଲେ ।
ହେଲେ ବୁରାଡିରେ ଆନ୍ଦୋଳନ କରିବାକୁ ସିଧା ସିଧା ମନାକରିଛନ୍ତି ଚାଷୀ । ଆନ୍ଦୋଳନ ପାଇଁ ଆସନ୍ତା ୬ ମାସ ପର୍ଯ୍ୟନ୍ତ ରାସନ ସାମଗ୍ରୀ ସାଙ୍ଗରେ ରଖିଛନ୍ତି ଚାଷୀ । ଅନିର୍ଦ୍ଦିଷ୍ଟ କାଳ ପାଇଁ ଏହି ଆନ୍ଦୋଳନ ଜାରି ରହିବ । ସରକାର ସେମାନଙ୍କ ଦାବି ନମାନିଲେ ଆନ୍ଦୋଳନ ଆହୁରି ତେଜିବ ବୋଲି ଚେତାବନୀ ଦେଇଛନ୍ତି । ତେବେ ଚାଷୀଙ୍କ ଆନ୍ଦୋଳନ ଯୋଗୁଁ ଦିଲ୍ଲୀବାସୀଙ୍କ ଜୀବନ ବ୍ୟାପକ ପ୍ରଭାବିତ ହୋଇଛି । ଟ୍ରାଫିକ ଜାମ୍ ଥିବା ବେଳେ ମେଟ୍ରୋ ଓ ରେଳ ଚଳାଚଳ ବନ୍ଦ ରହିଛି । ହରିୟାଣାରୁ ଦିଲ୍ଲୀ ଯାଉଥିବା ଲୋକଙ୍କର ଯାଞ୍ଚ କରାଯାଉଛି । ଆନ୍ଦୋଳନ ଯୋଗୁଁ ଘଣ୍ଟା ଘଣ୍ଟା ଧରି ରାସ୍ତା ବନ୍ଦ ରହୁଛି ।
ସେପଟେ ଖୁବଶୀଘ୍ର ଚାଷୀଙ୍କ ସହ ଆଲୋଚନା କରିପାରନ୍ତି କେନ୍ଦ୍ର ସରକାର । ଏନେଇ କେନ୍ଦ୍ରମନ୍ତ୍ରୀ ପରୋକ୍ଷରେ ସୂଚନା ଦେଇଛନ୍ତି । ଏପଟେ ହରିୟାଣା ମୁଖ୍ୟମନ୍ତ୍ରୀ ମଧ୍ୟ ଚାଷୀଙ୍କୁ କେନ୍ଦ୍ର ସରକାରଙ୍କ ସହ ଆଲୋଚନା କରିବାକୁ ପରାମର୍ଶ ଦେଇଛନ୍ତି । ସରକାର ଚାଷୀଙ୍କ ସହ ଆଲୋଚନା କରି ସମସ୍ୟାର ସମାଧାନ ବାହାର କରିବେ ବୋଲି ଆଶା କରାଯାଉଛି ।
ଭ୍ୟାକସିନ ୯୫ ପ୍ରତିଶତ ସଫଳ ହେବା ପଛର ସତ୍ୟତା କ’ଣ?
ନୂଆଦିଲ୍ଲୀ: କରୋନା ଭ୍ୟାକସିନ ରେସରେ ସାରା ବିଶ୍ୱ। ଭ୍ୟାକସିନକୁ ସଫଳ ରୂପାୟନ ଦେବାପାଇଁ ପ୍ରଚେଷ୍ଟା ଜାରି ରହିଛି । ଏହାକୁ ନେଇ ଫ୍ରଣ୍ଟ-ରନର-କ୍ୟାଣ୍ଡିଡେଟସ୍ ଯଥେଷ୍ଟ ଉନ୍ନତି କଲେଣି । PHIZER ଏବଂ BIONTECH ଚଳିତ ସପ୍ତାହରେ ଭ୍ୟାକସିନର ୯୫ ପ୍ରତିଶତ ପ୍ରଭାବଶାଳୀ ହେବାକୁ ନେଇ ଦାବି କରିଛନ୍ତି । ଅନ୍ୟପଟେ ଋଷର Sputnik ଏବଂ ଆମେରିକାର Modernaର ଏଫିକେସି ରେଟ୍ ୯୦ରୁ ୯୫ ପ୍ରତିଶତ ବୋଲି କୁହାଯାଉଛି ।
ମାୟୋ କ୍ଲିନିକାଲ ଭ୍ୟାକସିନ ଡେଭଲପର ଡାକ୍ତର.ଗ୍ରେଗରି ପୋଲାଣ୍ଡ ଏହାକୁ ଏକ ବିରାଟ ଗେମ୍ ଚେଞ୍ଜର ଭାବିଛନ୍ତି । ତେବେ ଏହାକୁ ନେଇ ୫୦ରୁ ୭୦ ପ୍ରତିଶତ ଆଶା ବଢିଥିବା ସେ ବୟାନରେ ଉଲ୍ଲେଖ କରିଛନ୍ତି । ଅନ୍ୟପଟେ ଫୁଡ୍ ଆଣ୍ଡ୍ ଡ୍ରଗ୍ ଆଡମିନଷ୍ଟ୍ରେସନ ବା FDA ଏଭଳି ଭ୍ୟାକସିନକୁ ତତ୍କାଳୀନ ଅନୁମତି ଦେବାପାଇଁ କହିଛନ୍ତି ଯାହାର ଏଫିକେସି ରେଟ୍ ଅତିକମରେ ୫୦ ପ୍ରତିଶତ ହୋଇଥିବ ।
ନିକଟରେ ଆପଣ ଏଭଳି କିଛି ଭ୍ୟାକସିନ ବିଷୟରେ ଶୁଣିଥିବେ, ଯାହା କିଛି ସୀମିତ ଲୋକଙ୍କୁ ଦିଆଯାଇଛି । ଏଥିରେ ୧୦୦ରୁ ୯୫ ରୋଗୀଙ୍କୁ ବଞ୍ଚାଇଥିବା ଦାବି କରାଯାଉଛି । କିନ୍ତୁ ଏଭଳି ଦାବି ସତ୍ୟଠାରୁ ବହୁ ଦୂରରେ । ପୂରା ବିଶ୍ୱରେ ଭ୍ୟାକସିନ କେଉଁଭଳି ପ୍ରଭାବ ପକାଉଛି, ତାହା କେତେକ କଥା ଉପରେ ନିର୍ଭର କରେ ଏବଂ ଆମ ନିକଟରେ ଏପର୍ଯ୍ୟନ୍ତ କୌଣସି ଉତ୍ତର ନାହିଁ । ଯେପରିକି କ’ଣ ଭ୍ୟାକ୍ସିନେଟ ହୋଇଥିବା ମଣିଷକୁ ଏସିମ୍ପ୍ଟୋମୋଟିକ ଇନଫେକ୍ସନ ହୋଇପାରେ କିମ୍ବା କେତେ ଲୋକଙ୍କୁ ଟୀକା ଦିଆଯିବ ?
ପ୍ରାୟ ୧୦୦ ବର୍ଷ ପୂର୍ବେ ବୈଜ୍ଞାନିକମାନେ ଭ୍ୟାକସିନ ଟ୍ରାଏଲର ନିୟମ ଆରମ୍ଭ କରିଥିଲେ । ଏହି ପ୍ରକ୍ରିୟା ଦ୍ୱାରା ଟ୍ରାଏଲରେ ବାସ୍ତବରେ କିଛି ଭଲ୍ୟୁଣ୍ଟିୟର୍ସଙ୍କୁ ଟୀକା ଦିଆଯାଏ । ଯେପରିକି ଭଲ୍ୟୁଣ୍ଟିୟର୍ସଙ୍କୁ ପ୍ଲେସିବୋ ବା ଆର୍ଟିଫିସିଆଲ ଟୀକା ଦିଆଯାଏ । ଏହାପରେ ଭ୍ୟାକସିନ କେତେ ପ୍ରଭାବ ପକାଇଛି ତାହାକୁ ଗବେଷକ ପର୍ଯ୍ୟାଲୋଚନା କରନ୍ତି ।
ଫାଇଜର ୪୮,୬୬୧ ଲୋକଙ୍କୁ ପରୀକ୍ଷଣରେ ସାମିଲ କରିଥିଲା, ଯେଉଁଥିରେ ୧୭୦ ଲୋକଙ୍କ ନିକଟରେ ଲକ୍ଷଣ ନଜର ଆସିଲା । ୮ ଜଣଙ୍କୁ ଅସଲି ଭ୍ୟାକସିନ ଦିଆଯାଇଥିବାବେଳେ ୧୬୨ ଜଣଙ୍କୁ ପ୍ଲେସିବୋ ଦିଆଯାଇଥିଲା । ଗବେଷକମାନେ ସେହିମାନଙ୍କୁ ଏଥିରେ ସାମିଲ କରିଥିଲେ ଯେଉଁମାନେ ରୋଗାକ୍ରାନ୍ତ ହୋଇଥିଲେ । ନକଲି ଭ୍ୟାକସିନ ଦିଆଯାଇଥିବା ଲୋକଙ୍କ ତୁଳନାରେ ଆର୍ଟିଫିସିଆଲ ଭ୍ୟାକସିନ ନେଇଥିବା ଲୋକ ଅଧିକ ଅସୁସ୍ଥ ହୋଇପଡ଼ିଲେ । ବୈଜ୍ଞାନିକ ଦୁଇ ଗୋଷ୍ଠୀର ଭ୍ୟାକସିନରକୁ ରେଖାଙ୍କିତ କଲେ । ଉଭୟ ମଧ୍ୟରେ ଆସିଥିବା ଅନ୍ତରକୁ ଏଫିକେସି କୁହାଯାଏ । ଯଦି ଅସଲି ଭ୍ୟାକସିନ ଦିଆଯାଇଥିବା ଲୋକଙ୍କ ମଧ୍ୟରେ କେହି ମଧ୍ୟ ଅସୁସ୍ଥ ନହୁଅନ୍ତି ତେବେ ଭ୍ୟାକସିନ ୧୦୦ ପ୍ରତିଶତ ପ୍ରଭାବଶାଳୀ ବୋଲି ମାନିବାକୁ ପଡ଼ିବ ।
ଏଭଳି ପରିସ୍ଥିତିରେ ୯୫ ପ୍ରତିଶତ ଏଫିକେସି ରେଟ୍ ର ଅର୍ଥ ଭ୍ୟାକସିନ କାମ କରୁଛି, କିନ୍ତୁ ଏହି ସ୍ତର ଧାର୍ଯ୍ୟ କରିପାରିବ ନାହିଁଯେ, ଭ୍ୟାକସିନ ଦିଆଯିବା ପରେ ଆପଣ ଅସୁସ୍ଥ ହେବାର ସମ୍ଭାବନା କେତେ ।
ଜନ୍ସ ହୋପକିନ୍ସ ବ୍ଲମବର୍ଡ଼ ଅଫ୍ ପବ୍ଲିକ ହେଲଥର ଏପିଡେମିୟୋଲୋଜିଷ୍ଟ ନୋ.ଆର ଜୀବଙ୍କ ମତରେ ଏଫିକେସି ଏବଂ ଇଫେକ୍ଟିଭନେସ ଉଭୟ ପରସ୍ପର ଜଡ଼ିତ । କିନ୍ତୁ ଖୁବ ଭିନ୍ନ ।
ଖାରଜ ହେଲା ଜାମିନ ଆବେଦନ, ୧୪ ଦିନିଆ ବିଚାର ବିଭାଗୀୟ ହାଜତକୁ ପଠାଇଲେ କୋର୍ଟ
ଭୁବନେଶ୍ୱର: ଜେଲ ଗଲେ ପାଠକ ବାପ-ପୁଅ । ଦୁଇ ଜଣଙ୍କୁ ଆଜି କୋଭିଡ ପରୀକ୍ଷା ପରେ ଗିରଫ କରାଯାଇଥିଲା । ଗିରଫ ପରେ ସ୍ୱତନ୍ତ୍ର ଭିଜିଲାନ୍ସ କୋର୍ଟରେ ହାଜର ହୋଇଥିଲେ ବାପ-ପୁଅ । ତେବେ ସେଠାରେ ସେଠାରେ ପାଠକଙ୍କ ଓକିଲ ତାଙ୍କର ଜାମିନ ଆବେଦନ କରିଥିଲେ ।
କିନ୍ତୁ କୋର୍ଟ ପାଠକଙ୍କର ଜାମିନ ଆବେଦନକୁ ଖାରଜ କରିଛନ୍ତି । ଜାମିନ ଆବେଦନକୁ ଖାରଜ ପରେ ବିଚାର ବିଭାଗୀୟ ହାଜତକୁ ଗଲେ ଆଇଏଫ୍ଏସ୍ ଅଭୟକାନ୍ତ । ଦୁଇଜଣଙ୍କୁ ୧୪ ଦିନିଆ ବିଚାର ବିଭାଗୀୟ ହାଜତକୁ ପଠାଇଲେ କୋର୍ଟ ।
ଆଇଏଫ୍ଏସ୍ ଅଫିସର ଅଭୟକାନ୍ତ ପାଠକଙ୍କ ଆୟ ବହିର୍ଭୂତ ସଂପତ୍ତି ଭିଜିଲାନସକୁ ତାଜୁବ କରିଛି । ଦୁଇ ଦିନ ଧରି ୧୩ଟି ସ୍ଥାନରେ ରେଡ୍ କରାଯାଇଥିଲା । ଯେଉଁଥିରେ ଭିଜିଲାନ୍ସ ମାଳ ମାଳ ପ୍ଲଟ, କୋଠାବାଡି ସାଙ୍ଗକୁ କୋଟି କୋଟି ଟଙ୍କାର ସମ୍ପତ୍ତି ଖୋଜି ବାହାର କରିଥିଲା । ଏପରି ଭାବେ ୫୦ କୋଟିରୁ ଅଧିକ ସଂପତ୍ତି ଠାବ ହୋଇଥିବା ଜଣାପଡିଛି ।
ବିଧାନସଭାରେ ପ୍ରବଳ ହଟ୍ଟଗୋଳ, ତେଜସ୍ୱୀ କହିଲେ ନୀତିଶଙ୍କୁ ଝିଅ ଜନ୍ମର ଭୟ ଥିଲା !
ପାଟନା: ବିହାର ବିଧାନସଭାରେ ପ୍ରବଳ ହଟ୍ଟଗୋଳ । ବିରୋଧୀଦଳ ନେତା ତେଜସ୍ୱୀ ଯାଦବ, ମୁଖ୍ୟମନ୍ତ୍ରୀ ନୀତୀଶ କୁମାରଙ୍କୁ ବ୍ୟକ୍ତିଗତ ଆକ୍ଷେପ କରିବା ପରେ ଗୃହରେ ପ୍ରବଳ ହଟ୍ଟଗୋଳ ଦେଖିବାକୁ ମିଳିଥିଲା । ଏହି ପ୍ରଚଣ୍ଡ ହୋ-ହଲ୍ଲା ମଧ୍ୟରେ ଉପମୁଖ୍ୟମନ୍ତ୍ରୀ ତାରକିଶୋର ପ୍ରସାଦ ତେଜସ୍ୱୀଙ୍କ ବିବୃତ୍ତିକୁ ଲଜ୍ଜାଜନକ ବୋଲି କହିଛନ୍ତି । ଖାଲି ସେତିକି ନୁହେଁ ଗୃହ ଭିତରେ ଏପରି ବିବୃତ୍ତି ଦେବା ଅତ୍ୟନ୍ତ ଅଶୋଭନୀୟ । ତେଜସ୍ୱୀଙ୍କୁ ବିଧାନସଭାର ସମ୍ମାନ ରକ୍ଷା କରିବାକୁ ହେବ । ମୁଖ୍ୟମନ୍ତ୍ରୀଙ୍କ ଉପରେ ଏଭଳି ମନ୍ତବ୍ୟ ଦେବା ଉଚିତ ନୁହେଁ । ଏହା ଏକ ଖରାପ ପରମ୍ପରା ଆରମ୍ଭ ହେବାକୁ ଯାଉଛି ବୋଲି ତାରକିଶୋର କହିଥିଲେ ।
କୁହାଯାଉଛି ଯେ, ନିର୍ବାଚନ ପ୍ରଚାର ବେଳେ ତେଜସ୍ୱୀ ଯେଭଳି ନୀତିଶଙ୍କୁ ଟାର୍ଗେଟ୍ କରୁଥିଲେ, ସେହିଭଳି ବିଧାନସଭା ଭିତରେ ମଧ୍ୟ ଏବେ ଟାର୍ଗେଟ୍ କରିବାକୁ ଚେଷ୍ଟା କରୁଛନ୍ତି । ତେଜସ୍ୱୀଙ୍କ ମୁଣ୍ଡରୁ ପ୍ରଚାର ଭୂତ ଏବେ ସୁଦ୍ଧା ଉତୁରି ନାହିଁ । ତେଣୁ ସେ ମୁଖ୍ୟମନ୍ତ୍ରୀଙ୍କୁ ବିଧାନସଭା ଭିତରେ ବ୍ୟକ୍ତିଗତ ଆକ୍ଷେପ କରିବାକୁ ବି ପଛାଉ ନାହାନ୍ତି ।
ତେଜସ୍ୱୀ କହିଥିଲେ ଯେ, ପ୍ରଚାର ସମୟରେ ନୀତିଶ ଲାଲୁ ଯାଦବଙ୍କ ବିଷୟରେ ଅନେକ କଥା କହି କଟାକ୍ଷ କରିଛନ୍ତି । ଏମିତିକି ପୁଅଟିଏ ପାଇଁ ଲାଲୁ ଯାଦବ ୯ଟି ଛୁଆ ଜନ୍ମ କରିଥିବା କଥା ମଧ୍ୟ ନୀତିଶ କହିଛନ୍ତି । ତେବେ ନୀତିଶଙ୍କର କା’ଣ ଝିଅ ଜନ୍ମ ହେବାର ଭୟ ଥିଲା କି ? ସେଥିପାଇଁ ସେ ଦ୍ୱିତୀୟ ଛୁଆ ଜନ୍ମ କଲେ ନାହିଁ କି ?
ତେବେ ଏଭଳି ବିବୃତ୍ତିକୁ ସରକାରୀ ଦଳର ବିରୋଧ ସତ୍ତ୍ୱେ ତେଜସ୍ୱୀଙ୍କ ବିବୃତ୍ତିକୁ ରକ୍ଷା ଆର୍ଜେଡି ନେତାମାନେ ସମର୍ଥନ କରିଥିବା ଦେଖାଯାଇଛି । ଆରଜେଡି ନେତା ସୁବୋଧ ରାୟ କହିଛନ୍ତି ଯେ, ‘ଗୃହରେ ବ୍ୟକ୍ତିଗତ ଆକ୍ଷେପ ହେବା ଉଚିତ ନୁହେଁ, କିନ୍ତୁ ଯଦି ବିପକ୍ଷ ଦଳ ବ୍ୟକ୍ତିଗତ ଆକ୍ଷେପ କରେ ତେବେ ଆମେ ମଧ୍ୟ ଚୁପ୍ ରହିବୁ ନାହିଁ । ନୀରଜ କୁମାର କେଉଁ ଭାଷାରେ କଥା ହୁଅନ୍ତି ତାହା ସମସ୍ତେ ଜାଣନ୍ତି । ଏହା ତ କିଛି ନୁହେଁ ଆଗକୁ ଅନେକ କିଛି ହେବାର ଅଛି ।’ ସୁବୋଧଙ୍କ ଏଭଳି ବୟାନ୍ ପରେ ଗୃହରେ ହୋ-ହଲ୍ଲା ଅଧିକ ବଢ଼ିଥିଲା ।
ଅନ୍ୟପକ୍ଷରେ ତେଜଶ୍ୱୀଙ୍କ ବିବୃତ୍ତିକୁ ଦୃଢ଼ ବିରୋଧ କରି ଜେଡିୟୁ ନେତା ଗୁଲାମ ରସୁଲ ବଲିଆବି କହିଛନ୍ତି ଯେ, ଗୃହରେ ତେଜସ୍ୱୀ ଦେଇଥିବା ବିବୃତ୍ତି ଅତ୍ୟନ୍ତ ଲଜ୍ଜାଜନକ । ସେହିଭଳି ବିଜେପି ନେତା ସଞ୍ଜୟ ସରବାଗୀ କହିଛନ୍ତି ଯେ, ଏହା ତେଜସ୍ୱୀଙ୍କ ହତାଶା ପଣକୁ ଦର୍ଶାଉଛି । ସରବାଗୀ କହିଛନ୍ତି ଯେ, ନିର୍ବାଚନ ଫଳାଫଳ ପୂର୍ବରୁ ତେଜସ୍ୱୀ ନିଜକୁ ମୁଖ୍ୟମନ୍ତ୍ରୀ ବୋଲି ଭାବି ସାରିଥିଲେ । କିନ୍ତୁ ଏବେ ସେ ଅତ୍ୟନ୍ତ ବିଶାଦଗ୍ରସ୍ତ ଅଛନ୍ତି । ତେଣୁ ତାଙ୍କ ମୁହଁରୁ ଏଭଳି ଏଣୁତେଣୁ କଥା ବାହାରୁଛି ।
ଲଳିତ କଳା ଏକାଡେମୀ ଘୋଷଣା କଲା ଧର୍ମପଦ ପୁରସ୍କାର ତାଲିକା, ଜାଣନ୍ତୁ କିଏ ପାଇବେ ପୁରସ୍କାର
ଭୁବନେଶ୍ୱର: ଓଡ଼ିଶା ଲଳିତ କଳା ଏକାଡେମୀ ଘୋଷଣା କଲା ଧର୍ମପଦ ପୁରସ୍କାର ଓ ଶିଳ୍ପୀ ସମ୍ବର୍ଦ୍ଧନା ର ତାଲିକା । ୨୦୧୬ରୁ ୨୦୨୦ ପର୍ଯ୍ୟନ୍ତ ପାଇବାକୁ ଥିବା ୫ ବର୍ଷ ପାଇଁ ଧର୍ମପଦ ପୁରସ୍କାର, ଓଡ଼ିଆ ଭାଷା ପାଇଁ ପୁରସ୍କାର ଘୋଷଣା କରାଜାଇଛି । ୨୦୧୬ ମସିହା ପାଇଁ ବରିଷ୍ଠ ଚିତ୍ରଶିଳ୍ପୀ ବିପିନ ବିହାରୀ ପରିଡା, ୨୦୧୭ ମସିହା ପାଇଁ ବିଶିଷ୍ଟ ସ୍ଥପତି ଶ୍ୟାମ ସୁନ୍ଦର ପଟ୍ଟନାୟକ, ୨୦୧୮ ପାଇଁ ଜଗଦୀଶ ଚନ୍ଦ୍ର କାନୁନଗୋ, ୨୦୧୯ ଲାଗି ବିଶିଷ୍ଟ ପଟଚିତ୍ର ଶିଳ୍ପୀ ବିନୋଦ ମହାରଣା ଏବଂ ୨୦୨୦ ଲାଗି ବିଶିଷ୍ଟ ଚିତ୍ରଶିଳ୍ପୀ ମହେନ୍ଦ୍ର ମହାପାତ୍ର ଙ୍କୁ ପୁରସ୍କାର ଲାଗି ଯୋଗ୍ୟ ବିବେଚିତ ହୋଇଛନ୍ତି । ଧର୍ମଶିଳ୍ପୀ ଙ୍କୁ ୫ ଲକ୍ଷ୍ୟ ଟଙ୍କାର ଚେକ, ତାମ୍ର ଫଳକ ଏବଂ ଉପଢୌକନ ପ୍ରଦାନ କରାଯିବ । ସମ୍ବର୍ଦ୍ଧିତ ଶିଳ୍ପୀ ଙ୍କୁ ୧ ଲକ୍ଷ୍ୟ ଟଙ୍କା ତାମ୍ର ଫଳକ ଏବଂ ଉପଢୌକନ ପ୍ରଦାନ କରାଯିବ । ଚଳିତ ବର୍ଷ ଏକ ବିଶେଷ କାର୍ଯ୍ୟକ୍ରମ ରେ ତାଙ୍କୁ ସମ୍ବର୍ଦ୍ଧିତ କରାଯିବ ବୋଲି ଓଡ଼ିଶା ଲଳିତ କଳା ଏକାଡେମୀ ପକ୍ଷରୁ କୁହାଯାଇଛି ।
ପ୍ରଥମ ଦିନିକିଆରେ ଭାରତକୁ ୬୬ ରନ୍ରେ ପରାଜିତ କଲା ଅଷ୍ଟ୍ରେଲିଆ
ନୂଆଦିଲ୍ଲୀ: ଅଷ୍ଟ୍ରେଲିଆ ସହ ୩ଟି ଦିନିକିଆ ମ୍ୟାଚ୍ ବିଶିଷ୍ଟ ସିରିଜ୍ର ପ୍ରଥମ ମ୍ୟାଚ୍ରେ ପରାଜୟ ବରଣ କଲା ଭାରତ । ଅଷ୍ଟ୍ରେଲିଆଠାରୁ ୬୬ ରନ୍ରେ ପରାଜୟ ସ୍ୱୀକାର କରିଛି ଭାରତ । ପ୍ରଥମେ ବ୍ୟାଟିଂ କରିବାକୁ ମଇଦାନକୁ ଓହ୍ଲାଇଥିବା ଅଷ୍ଟ୍ରେଲିଆ ଦଳ ନିର୍ଦ୍ଧାରିତ ୫୦ ଓଭରରେ ୬ ଓ୍ୱିକେଟ୍ ହରାଇ ୩୭୪ ରନ୍ କରିଥିଲା । ଏହାର ଜବାବରେ ଭାରତ ୩୭୫ ରନ୍ର ବିଜୟ ଲକ୍ଷ୍ୟ ନେଇ ମଇଦାନକୁ ଓହ୍ଲାଇଥିବା ବେଳେ ୫୦ ଓଭରରେ ୩୦୮ ରନ୍ କରି ୮ ଓ୍ୱିକେଟ୍ ହରାଇଛି । ଆଉ ୬୬ ରନ୍ର ଲମ୍ବା ବ୍ୟବଧାନରେ ପରାଜୟ ସ୍ୱୀକାର କରିଛି ।
ଅଷ୍ଟ୍ରେଲିଆ ପକ୍ଷରୁ ଫିଞ୍ଚ ସର୍ବାଧିକ ୧୪୪ ରନ୍ କରିଥିବା ବେଳେ ସ୍ଟିଭେନ୍ ସ୍ମିଥ୍ ଦ୍ୱିତୀୟ ସର୍ବାଧିକ ୧୦୫ ରନ୍ କରି ଦଳକୁ ଏକ ବଡ଼ ସ୍କୋର ଦେବାରେ ସକ୍ଷମ ହୋଇଥିଲେ । ଏହାସହ ଓ୍ୱାର୍ଣ୍ଣର ୬୯ ଓ ମାକ୍ସଓ୍ୱେଲ ୪୫ ରନ୍ କରି ଦଳକୁ ଏକ ମଜଭୁତ ସ୍ଥିତିକୁ ଆଣିଥିଲେ ।
ଅନ୍ୟପଟେ ଭାରତ ପକ୍ଷରୁ ଅଲରାଉଣ୍ଡର ହାର୍ଦ୍ଦିକ୍ ପାଣ୍ଡିଆ ସର୍ବାଧିକ ୯୦ ରନ୍ କରିଥିବା ବେଳେ ଶିଖର ଧାଓ୍ୱନ ୭୪, ନବଦୀପ ସାଇନି ୨୯, ଜାଡେଜା ୨୫, ମୟଙ୍କ ଅଗ୍ରଓ୍ୱାଲ ୨୨ ରନ୍ କରିଥିଲେ ।
ଭାରତୀୟ ବୋଲରଙ୍କ ପକ୍ଷରୁ ମହମ୍ମଦ ସାମୀ ସର୍ବାଧିକ ୩ଟି ଓ୍ୱିକେଟ୍ ନେଇଥିବା ବେଳେ ବୁମରା, ନବଦୀପ ଓ ଚହଲ ଗୋଟିଏ ଲେଖାଏଁ ଓ୍ୱିକେଟ୍ ନେବାରେ ସଫଳ ହୋଇଛନ୍ତି ।
ସେହିଭଳି ଅଷ୍ଟ୍ରେଲିଆ ପକ୍ଷରୁ ଆଡାମ୍ ଜାମ୍ପା ସର୍ବାଧିକ ୪ଟି ଓ୍ୱିକେଟ୍ ନେଇଥିବା ବେଳେ ଜୋସ୍ ହାଜଲେଉଡ୍ ୩ଟି ଓ୍ୱିକେଟ୍ ନେବାରେ ସଫଳ ହୋଇଛନ୍ତି । ମିଚେଲ୍ ଷ୍ଟାର୍କ ଗୋଟିଏ ଓ୍ୱିକେଟ୍ ନେବାରେ ସଫଳ ହୋଇଛନ୍ତି ।
ଆକାଶଙ୍କ ବ୍ୟାଙ୍କ ଆକାଉଣ୍ଟରେ ଜମା ହୋଇଛି ୮ କୋଟିରୁ ଅଧିକ ଟଙ୍କା, ହେଲେ ଦେଖାଇ ପାରିଲେନାହିଁ ସାଲାରୀ ସ୍ଲିପ୍
ଭୁବନେଶ୍ୱର: ଭୁବନେଶ୍ୱରରେ ଥିବା ଆକାଶଙ୍କ ବ୍ୟାଙ୍କ୍ ଆକାଉଣ୍ଟରେ ୮ କୋଟି ୪୦ ଲକ୍ଷ ଅଧିକ ଟଙ୍କା ଡିପୋଜିଟ ହୋଇଛି । ଖାଲି ସେତିକି ନୁହେଁ ବ୍ରହ୍ମପୁରରେ ମଧ୍ୟ କ୍ୟାସ୍ ଡିପୋଜିଟ ହୋଇଛି । ଟଙ୍କାର ଦରିଆ ଥିଲେ ବାପ ପୁଅଙ୍କ ପାଖରେ । ଲକଡାଉନ ସମୟରେ ଅଭୟ ଏବଂ ତାଙ୍କ ପରିବାର ଲୋକ ଚାଟର ପ୍ଲେନରେ ଫରେନକୁ ଯାଇ ବୁଲାବୁଲି ମଧ୍ୟ କରିଛନ୍ତି ।
ସେପଟେ ଆକାଶ ଏକ କୋଟି ଟଙ୍କା ଦରମା ପାଉଥିଲେ ବୋଲି ଅଭୟ କହିଥିଲେ । କିନ୍ତୁ ତାକୁ ନେଇ ଆକାଶ କୌଣସି ସାଲାରୀ କାଗଜପତ୍ର ଦେଖାଇ ପାରିନାହାନ୍ତି । ତେବେ ସେମାନେ କଣ କରନ୍ତି ? କେଉଁଠୁ ଟଙ୍କା ଆଣୁଥିଲେ ? ଏଥିରେ ଆଉ କେଉଁମାନେ ଜଡ଼ିତ ରହିଛନ୍ତି ତାହା ଅଧିକ ତଦନ୍ତ ପରେ ଜଣାପଡ଼ିବ ବୋଲି ଭିଜିଲାନ୍ସ ଏସ୍ପି ସୂଚନା ଦେଇଛନ୍ତି । ତେବେ ଆଗକୁ ରିମାଣ୍ଡ ଆବେଦନ ନେଇ ବିଚାର ହୋଇନି ବୋଲି ଏସପି କହିଛନ୍ତି ।
ଖାଲି ସେତିକି ନୁହେଁ, ଖୋଜାଖୋଜି ବେଳେ ଅଭୟକାନ୍ତଙ୍କ ନିକଟରୁ ଜବତ ହୋଇଛି ପିସ୍ତଲ । ତେବେ କାହିଁକି ପାଖରେ ମାରଣାସ୍ତ୍ର ରଖିଥିଲେ ଅଭୟ, ତାକୁ ନେଇ ପ୍ରଶ୍ନ ଉଠୁଛି । ଜଣେ ସରକାରୀ ଅଧିକାରୀ, ପାଖରେ ମାରଣାସ୍ତ୍ର ରଖିବା ପଛରେ କାରଣ କଣ ହୋଇପାରେ। ଆଗରୁ ବାପା ପୁଅ ସୁରକ୍ଷା ପାଇଁ ବଡିଗାର୍ଡ ଓ ବାଉନ୍ସର ରଖିଥିବା କଥା ସାମନାକୁ ଆସିଥିଲା। ଆଉ ଏବେ ଜବତ ହୋଇଛି ପିସ୍ତଲ ।
ସେପଟେ ଚାକିରୀ ନକରି ଦାମୀ ଗାଡ଼ିରେ ଚଢୁଥିଲେ, ଆଲିସାନ୍ କୋଠାରେ ରହୁଥିଲେ ଅଭୟକାନ୍ତ ପାଠକ ଓ ତାଙ୍କ ପୁଅ ଆକାଶ । ଭିଜିଲାନ୍ସ ଖୋଳତାଡ଼ ବେଳେ ସାମନାକୁ ଆସିଛି ସଉକର ଏମିତି ନମୁନା । ଆକାଶଙ୍କ ନାଁରେ ମର୍ସିଡିଜ୍, ବିଏମଡବ୍ଲୁ, ଟାଟା ହ୍ୟାରିୟର ଏବଂ ତିନୋଟି ମହଙ୍ଗା ୟାମାହା FzS ବାଇକ୍ ରହିଛି । ପୁଣେରେ ଖୋଜାଖୋଜି ବେଳେ ଦୁଇଟି ମର୍ସିଡିଜ୍ ସମେତ ତିନିଟି ଗାଡ଼ି ସେ ଭଡା ନେଇଥିବା ଜଣାପଡିଛି । ଦେଖନ୍ତୁ, କେମିତି ଦାମୀ ଗାଡ଼ିର ସଉକ ରଖୁଥିଲେ କୋଟିପତି ବାବୁଙ୍କ ପୁଅ। ସଉକ ପୂରଣ ପାଇଁ ଚଢୁଥିଲେ ମହଙ୍ଗା ଗାଡ଼ି ।
ତେଜସ୍ୱୀଙ୍କ ଉପରେ ବର୍ଷିଲେ ନୀତିଶ, କହିଲେ ସାଙ୍ଗର ପୁଅ ବୋଲି ଚୁପ୍ ରହିଛି…
ପାଟନା: ବିହାର ବିଧାନସଭା ଭିତରେ ରାଜ୍ୟପାଳ ଫାଗୁ ଚୌହାନଙ୍କ ଅଭିଭାଷଣକୁ ନେଇ ଆଲୋଚନା ବେଳେ ମୁଖ୍ୟମନ୍ତ୍ରୀ ନୀତୀଶ କୁମାରଙ୍କୁ ଦେଖିବାକୁ ମିଳିଥିଲା ଭିନ୍ନ ରୂପରେ । ବିରୋଧୀ ଦଳ ନେତା ତେଜସ୍ୱୀ ଯାଦବଙ୍କ ଉପରେ ପ୍ରଚଣ୍ଡ କ୍ରୋଧିତ ହୋଇଥିଲେ ନୀତିଶ । ଏହା ପୂର୍ବରୁ ନୀତିଶଙ୍କ ଏଭଳି ରୂପ ବୋଧ ହୁଏ କେହି କେବେ ଦେଖିଥିବେ । ରାଗିଯାଇ ନୀତିଶ କହିଥିଲେ ଯେ, ତେଜସ୍ୱୀ ହେଉଛନ୍ତି ତାଙ୍କ ଭାଇ ଭଳିଆ ସାଙ୍ଗ ଲାଲୁ ଯାଦବଙ୍କ ପୁଅ । ତେଣୁ ତାଙ୍କ ବାଚାଳାମୀ ବା କଥା ସେ ଆଜି ଯାଏଁ ସହ୍ୟ କରି ଆସୁଛନ୍ତି ।
ଗୃହରେ ତେଜସ୍ୱୀ, ନୀତିଶଙ୍କ ନାଁରେ ଅନେକ ଅଭିଯୋଗ ଆଣିଥିଲେ । ୧୯୯୧ରେ ହୋଇଥିବା ଏକ ହତ୍ୟାକାଣ୍ଡରେ ନୀତିଶଙ୍କ ସମ୍ପୃକ୍ତି ଥିବା କଥା କହିବା ସହ ପୂର୍ବରୁ କଣ୍ଟେଣ୍ଟ ଚୋରି ଅଭିଯୋଗରେ ନୀତିଶ ୨୫ ହଜାର ଟଙ୍କା ଜୋରିମାନା ଦେଇଥିବା କଥା ମଧ୍ୟ ଉଠାଇଥିଲେ ।
ତେଜସ୍ୱୀଙ୍କ ଏଭଳି ସଙ୍ଗୀନ୍ ଆରୋପ ପରେ ସଂସଦୀୟ କାର୍ଯ୍ୟମନ୍ତ୍ରୀ ବିଜୟ ଚୌଧରୀ, ମୁଖ୍ୟମନ୍ତ୍ରୀ ନୀତିଶଙ୍କ ସପକ୍ଷରେ ବାହାରି କହିଥିଲେ ଯେ, ୧୯୯୧ ହତ୍ୟାକାଣ୍ଡ ଘଟଣା ସୁପ୍ରିମ୍କୋର୍ଟରେ ସମାସ୍ତ ହୋଇସାରିଛି । ତେଣୁ ଏଭଳି ଭିତ୍ତିହୀନ ଘଟଣାକୁ ନେଇ ସଂସଦରେ ଆଲୋଚନା ହେବା ଉଚିତ୍ ନୁହେଁ । ବିଜୟ ଚୌଧୁରୀ ବାଚସ୍ପତିଙ୍କ ନିକଟରେ ଦାବି କରିଥିଲେ ଯେ, ତେଜସ୍ୱୀ ଯାଦବଙ୍କ ଏହି ଅଭିଯୋଗ ଗୃହର ପ୍ରକ୍ରିୟାରୁ ହଟାଯିବା ଉଚିତ୍ । ବିଜୟଙ୍କ ଏଭଳି ବୟାନ ପରେ ପୁଣି ତେଜସ୍ୱୀ ଉତ୍ତର ଦେଇଥିଲେ ଯେ, ନୀତୀଶ କୁମାରଙ୍କ ଉପରେ ଯେଉଁ ଅଭିଯୋଗ ରହିଛି ତାହା ମିଥ୍ୟା ନୁହେଁ ।
ସିଏମ ନୀତୀଶ କୁମାର କ’ଣ କହିଥିଲେ ?
ସଂସଦରେ ଏଭଳି କଥା କଟାକଟି ମଧ୍ୟରେ ନୀତୀଶ କୁମାର ଅତ୍ୟନ୍ତ ରାଗିଯାଇଥିଲେ । ସେ ନିଜ ଚୌକିରୁ ଉଠି କହିଥିଲେ ଯେ, ତେଜସ୍ୱୀ ଯାହା କହୁଛନ୍ତି ସେନେଇ ତଦନ୍ତ କରାଯାଉ । ଯଦି ତେଜସ୍ୱୀ ଭୁଲ୍ କହୁଥିବେ ତେବେ ତାଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ତେଜସ୍ୱୀ ମୋର ଜଣେ ଭାଇ ଭଳିଆ ବନ୍ଧୁର ପୁଅ ତେଣୁ ତାଙ୍କ କଥା ମୁଁ ସହ୍ୟ କରୁଛି । ସେ ବୋଧ ହୁଏ ଜାଣି ନାହନ୍ତି ତାଙ୍କ ବାପାଙ୍କୁ କିଏ ବିଧାୟକ ଦଳର ନେତା କରିଥିଲା । ଆଉ ଏହା ମଧ୍ୟ ସେ ସେ ନିଜେ ଜାଣି ନାହାନ୍ତି ଯେ, ତାଙ୍କୁ କିଏ ଉପମୁଖ୍ୟମନ୍ତ୍ରୀ ପଦ ଦେଇଥିଲା ।
ତେଜସ୍ୱୀଙ୍କ ନାଁରେ ଅନେକ ଅଭିଯୋଗ ରହିଛି । ଯେତେବେଳେ ତେଜସ୍ୱୀଙ୍କ ନାଁରେ ଦୁର୍ନୀତି ଅଭିଯୋଗ ଆସିଲା ସେତେବେଳେ ତାଙ୍କୁ ଜବାବ ମଗାଗଲା । ହେଲେ ସେ ଜବାବ ଦେଲେନି । ତେଣୁ ଆମେ ତାଙ୍କଠାରୁ ଅଲଗା ହେଲୁ । ତେଜସ୍ୱୀଙ୍କ ନାଁରେ ଦୁର୍ନୀତି ଅଭିଯୋଗ ରହିଛି ଏମିତି କି ତାଙ୍କ ନାଁରେ ଚାର୍ଜସିଟ୍ ମଧ୍ୟ ଦାଖଲ ହୋଇଛି । ୨୦୧୭ରେ ଦୁର୍ନୀତି ଅଭିଯୋଗ ନେଇ ତେଜସ୍ୱୀ କୌଣସି ସ୍ପଷ୍ଟି କରଣ ଦେଇନଥିଲେ କାହିଁକି ?
ତେଜସ୍ୱୀଙ୍କ ବିରୋଧରେ ଏଭଳି ଅଭିଯୋଗର ବର୍ଷା କରି ଚିତ୍କାର କରିଥିଲେ ନୀତିଶ । ସଂସଦରେ ମୁଖ୍ୟମନ୍ତ୍ରୀ ନୀତିଶଙ୍କ ଏଭଳି ରୂପ ଦେଖି ଅନ୍ୟମାନେ ମଧ୍ୟ ତାଙ୍କ କଥାରେ ତାଳ ଦେଇ ହୋ-ହଲ୍ଲା କରିବାକୁ ଲାଗିଥିଲେ । ଏହାପରେ ବାଧ୍ୟ ହୋଇ ବାଚସ୍ପତି ଗୃହକୁ ମୁଲତବୀ କରିଥିଲେ ।
ତେଲନଦୀକୁ ଡେଇଁଲେ ଦିବ୍ୟାଙ୍ଗ ଯୁବକ, ପ୍ରେମିକାଙ୍କ ପରିବାର ଲୋକେ ଗୁଣ୍ଡା ପଠାଇଥିବା ଭାବି ଡ଼େଇଁପଡ଼ିଲେ
ବଲାଙ୍ଗୀର: ବଲାଙ୍ଗୀର ଜିଲ୍ଲାରେ ଅଭାବନୀୟ ଘଟଣା । ତେଲନଦୀକୁ ଡେଇଁ ଆତ୍ମହତ୍ୟା ଉଦ୍ୟମ କରିଛନ୍ତି ଜଣେ ଦିବ୍ୟାଙ୍ଗ ଯୁବକ । ତୁଷୁରା ତେଲନଦୀ ବ୍ରିଜରେ ବାଇକ ରଖି ସେ ନଦୀକୁ ଡେଇଁ ପଡ଼ିଥିଲେ । ଯୁବକ ଜଣକ ହେଲେ ବେଲପଡ଼ା ବ୍ଲକ ଅଞ୍ଚଳର ସନ୍ତୋଷ ମିଶ୍ର । ସ୍ଥାନୀୟ ଯୁବକ ଓ ଆମ୍ବୁଲାନ୍ସ କର୍ମଚାରୀ ତାଙ୍କୁ ଉଦ୍ଧାର କରି ତୁଷୁରା ଡାକ୍ତରଖାନାରେ ଭର୍ତ୍ତି କରିଛନ୍ତି ।
ସନ୍ତୋଷ ଆଜି କୌଣସି କାମରେ ବଲାଙ୍ଗୀର ଆସିଥିବା ବେଳେ ଦୁଇ ଜଣ ଯୁବକ ତାଙ୍କୁ ପିଛା କରିଥିଲେ । ପ୍ରେମିକାଙ୍କ ପରିବାର ଲୋକେ ତାଙ୍କୁ ମାରିବାକୁ ଗୁଣ୍ଡା ପଠାଇଥିବା ଭାବି ସନ୍ତୋଷ ତୁଷୁରା ନଦୀ ପଟକୁ ଚାଲିଯାଇଥିଲେ । ତେବେ ଭୟରେ ମାନସିକ ଭାରସାମ୍ୟ ହରାଇ ସେ ନଦୀକୁ ଡେଇଁ ପଡ଼ିଥିବା ଜଣାପଡ଼ିଛି ।
ସନ୍ତୋଷ ନଦୀକୁ ଡେଉଁଥିବା ଦେଖି ସେହି ରାସ୍ତା ଦେଇ ଯାଉଥିବା ଆମ୍ବୁଲାନ୍ସ ସେଠାରେ ଅଟକିଥିଲା । ନଦୀରେ ଗାଧୋଉଥିବା ଯୁବକଙ୍କ ସହାୟତାରେ ଆମ୍ବୁଲାନ୍ସ କର୍ମଚାରୀ ସନ୍ତୋଷଙ୍କୁ ଉଦ୍ଧାର କରିଥିଲେ । ଖବରପାଇ ପୋଲିସ ଘଟଣାସ୍ଥଳରୁ ବାଇକ ଉଦ୍ଧାର କରିବା ସହ ତଦନ୍ତ ଜାରି ରଖିଛି ।