ବାଲିଗୁଡ଼ା: କନ୍ଧମାଳ ଜିଲ୍ଲା କ.ନୂଆଗାଁ ପୋଲିସ ଓ ଅବକାରୀ ବିଭାଗ ପକ୍ଷରୁ ମିଳିତ ଚଢ଼ାଉ । ଚଢ଼ାଉରେ ୧କୋଟି ୭୦ଲକ୍ଷ ଟଙ୍କାର ବେଆଇନ୍ ଗଞ୍ଜେଇ ଗଛକୁ ନଷ୍ଟ କରାଯାଇଛି । କ.ନୂଆଗାଁ ଥାନା କଡ଼ୁତୁଲି,ଜମାପଦର ଓ ଜନାଗୁଲ୍ ଅଞ୍ଚଳରେ ୧୭୦ ଏକର ସରକାରୀ ଜମିରେ ହୋଇଥିଲା ବେଆଇନ୍ ଗଞ୍ଜେଇ ଚାଷ ହୋଇଥିଲା । କନ୍ଧମାଳ ଏସପି ଓ ଅବକାରୀ ଏସପିଙ୍କ ନିର୍ଦ୍ଦେଶରେ ଜିଲ୍ଲାର ବିଭିନ୍ନ ଅଞ୍ଚଳରେ ଲଗାତାର ଭାବେ ଚାଲିଛି ବେଆଇନ୍ ଗଞ୍ଜେଇ ଚାଷ ନଷ୍ଟ ଅଭିଯାନ ।

ସେପଟେ କନ୍ଧମାଳ ଜିଲ୍ଲା ବ୍ରାହ୍ମଣୀଗାଁ ଥାନା ଆଡ଼ିବଙ୍ଗାରେ ବିଷାକ୍ତ ମଦର ଆତଙ୍କ । ସଲପ ମଦ ପିଇ ୪ ଜଣ ବ୍ୟକ୍ତି ଗୁରୁତର ହୋଇଛନ୍ତି । ଗୁରୁତର ମାନେ ହେଲେ ଆଡ଼ିବଙ୍ଗାର ଅଶୋକ ବଳିଆରସିଂ, ପ୍ରକାଶ ପଡ୍ରା, ସନ୍ତୋଷ ମଲ୍ଲିକ ଓ ବ୍ରାହ୍ମଣୀ ଗାଁର ଦେବେନ୍ଦ୍ର ନାୟକ । ଗତକାଲି ସମସ୍ତେ ସଲପ ମଦ ପିଇ ହଠାତ ଅସୁସ୍ଥ ହୋଇପଡିଥିଲେ । ସମସ୍ତ ଗୁରୁତରଙ୍କୁ ପ୍ରଥମେ ବ୍ରାହ୍ମଣୀଗାଁ ମେଡିକାଲରେ ଭର୍ତ୍ତି କରାଯାଇଥିଲା । ପରେ ଅବସ୍ଥା ଗୁରୁତର ହେବାରୁ ସମସ୍ତଙ୍କୁ ବ୍ରହ୍ମପୁର ବଡ଼ ମେଡିକାଲକୁ ସ୍ଥାନାନ୍ତର କରାଯାଇଛି ।

ବଲାଙ୍ଗୀର: ବଲାଙ୍ଗୀର ଜିଲ୍ଲା ପାଟଣାଗଡ଼ର ୬ ଜଣଙ୍କୁ ହତ୍ୟା ଘଟଣାରେ ପୋଲିସ ମୋଟ ଚାରି ଜଣଙ୍କୁ ଅଟକ ରଖି ପଚରାଉଚରା କରୁଛି । ଗତ ୧୧ ତାରିଖରେ ପାଟଣାଗଡ଼ କୁସୁମପଡ଼ାରେ ରହୁଥିବା ବୁଲୁ ଯାନୀଙ୍କ ପରିବାରର ଛଅ ଜଣଙ୍କୁ ହତ୍ୟା କରାଯାଇଥିଲା । ଘଟଣାରେ ସଂପୃକ୍ତି ସନ୍ଦେହରେ ପୋଲିସ ପ୍ରଥମେ ପଡ଼ୋଶୀ ବାବୁଲା ଯାନୀର ଦୁଇପୁଅ ଭୋଳା ଯାନୀ ଏବଂ ଶିଵା ଯାନୀଙ୍କୁ ଅଟକ ରଖି ପଚରାଉଚରା ଜାରି ରଖିଥିଲା । ଗତକାଲି ରାତିରେ ଭୋଳା ଏବଂ ଶିଵାର ବାପା ବାବୁଲା ଯାନୀ ଏବଂ ଭିଣୋଇ ସୁରେଶ ମାଝୀକୁ ପୋଲିସ କୌଣସି ସ୍ଥାନରୁ ଆଣି ଅଟକ ରଖି ତଦନ୍ତ କରୁଛି ।

ବଲାଙ୍ଗୀର ଏସ୍‌ପିଙ୍କ ନିର୍ଦେଶକ୍ରମେ ଦୁଇଟି ସ୍ୱତନ୍ତ୍ର ପୋଲିସ ଟିମ୍‌ ଜ଼ିଲ୍ଲା ବାହାରକୁ ଯାଇଛି  । କିଛି ଅଭିଯୁକ୍ତ ଛତିଶଗଡ଼ ଯାଇ ଲୁଚିଥିବା ଅନୁମାନ କରାଯାଉଛି । ହତ୍ୟାକାଣ୍ଡ ଗତ ମଙ୍ଗଳବାର ଦିନ ବିଳମ୍ବିତ ରାତି ପ୍ରାୟ ୧୨ଟାରୁ ୨ଟା ମଧ୍ୟରେ ଘଟିଥିଲା । ପାଟଣାଗଡ଼ କୁସୁମପଡ଼ାରେ ରହୁଥିବା ବୁଲୁ ଜାନୀ, ସ୍ତ୍ରୀ ଜ୍ୟୋତି, ୩ ଶିଶୁ ସମେତ ନାତୁଣୀ ଶ୍ରୀୟାକୁ ଦୁର୍ବୃତ୍ତ ହତ୍ୟା କରି ଫେରାର ହୋଇଯାଇଥିଲେ । ପୋଲିସ ଘଟଣାର ପର୍ଦାଫାସ କରିପାରିନଥିବା ବେଳେ ୬ଟି ଦିଗକୁ ନେଇ ଚଳାଇଛି ତନାଘନା ।

ପ୍ରଥମ ନାମ କରଣକୁ ନେଇ ବିବାଦ, ଦ୍ଵିତୀୟ- ଚୋରା ବନ୍ଧୁକ ଲୁଚାଇ ରଖିବା, ତୃତୀୟ- ଚୋରି ସୁନା ଅଳଙ୍କାର ବା ସାମଗ୍ରୀ ଘରେ ଗାତ ଖୋଳି ଲୁଚାଇ ରଖିବା, ଚତୁର୍ଥ- ଖୁଡ଼ୀ ପୁତୁରା ପ୍ରେମ ସମ୍ପର୍କ, ପଞ୍ଚମ- ବୁଲୁ ଜାନୀର ବଡ଼ ପୁଅ ସଂଗ୍ରାମର ହତ୍ୟା ଘଟଣା ଓ ଷଷ୍ଠ – ପୂର୍ବରୁ ରହିଥିବା ଜମିବାଡ଼ି ବିବାଦ । ପୂର୍ବରୁ ବୁଲୁ ଜାନୀ ଅନେକ ବିବାଦରେ ସାମିଲ ଥିବା ବେଳେ ହତ୍ୟାପରେ ସେହି ଘର ଭିତରେ ଖୋଲା ଯାଇଥିବା ଦୁଇ ଫୁଟର ଗାତ ଏବେ ଅନେକ ପ୍ରଶ୍ନବାଚୀ ସୃଷ୍ଟି କରିଛି । ସେହି ଗାତରେ ଚୋରା ବନ୍ଧୁକ ଲୁଚା ଯାଇଥିଲା ନା ଚୋରି ସୁନା ଅଳଙ୍କାର ଲୁଚା ଯାଇଥିଲା, ତାକୁ ନେଇ ପୋଲିସ ତଦନ୍ତ କରୁଛି । କ’ଣ ପାଇଁ ଘରେଗାତ ଖୋଳା ଯାଇଥିଲା ତାହା ସନ୍ଦେହ ଘେରରେ ଅଛି ।

ସୁନ୍ଦରଗଡ଼: ପବିତ୍ର ଦୀପାବଳିରେ ଅଘଟଣ । ଅଜଣା ଗାଡ଼ି ଧକ୍କାରେ ଚାଲିଗଲା ଦୁଇ ଭାଇଙ୍କର ଜୀବନ । ଦୀପାବଳିରେ ଲିଭିଗଲା ଦୁଇଭାଇଙ୍କ ଜୀବନ ଦୀପ । ସୁନ୍ଦରଗଡ଼ ଜିଲ୍ଲା ବଣାଇଁ ଉପଖଣ୍ଡର କୋଇଡ଼ା ଥାନା ଅନ୍ତର୍ଗତ ବାଲିଯୋଡି ନିକଟରେ ଘଟିଛି ଏଭଳି ଘଟଣା । ଗତକାଲି ରାତିରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣାରେ ବାଇକ୍ ଆରୋହି ଦୁଇ ଭାଇ ଙ୍କର ମୃତ୍ୟୁ ଘଟିଥିବା ଜଣା ପଡ଼ିଛି । କାଦଡ଼ିହା ଗ୍ରାମର ଅରୁଣ ମାଝୀ ଓ ଅଜୟ ମାଝୀ ଦୁଇ ଭାଇ ଏକ ବାଇକ୍‌ରେ ଡେଙ୍ଗୁଳା ଗ୍ରାମକୁ ଯାଉଥିବା ବେଳେ ବାଲିଯୋଡ଼ି ନିକଟରେ କୌଣସି ଗାଡି ଧକ୍କା ଦେଇଥିଲା ।

ଘଟଣାସ୍ଥଳରେ ଅରୁଣଙ୍କ ମୃତ୍ୟୁ ଘଟିଥିବା ବେଳେ ଗୁରୁତର ଅଜୟଙ୍କ ମୃତ୍ୟୁ କୋଇଡ଼ା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ହୋଇଛି  । କୋଇଡ଼ା ପୋଲିସ ପକ୍ଷରୁ ତଦନ୍ତ ଆରମ୍ଭ ହୋଇଛି । ଧକ୍କା ଦେଇଥିବା ଗାଡ଼ି ସମ୍ପର୍କରେ କୌଣସି ସୂଚନା ମିଳିନଥିବା ବେଳେ ଏକ ମାସ ମଧ୍ୟରେ ଏଭଳି ସଡ଼କ ଦୁର୍ଘଟଣାରେ କୋଇଡ଼ା ଅଞ୍ଚଳରେ ଆଠ ଜଣଙ୍କ ଜୀବନ ଯିବା ନେଇ ଅସନ୍ତୋଷ ପ୍ରକାଶ ପାଇଛି ।

ଖୋର୍ଦ୍ଧା: ତୁଟୁନି ସାରୁଅ ବିବାଦ । ଲଗାତର ୧୪ଦିନ ଧରି ସାରୁଅ ଷ୍ଟୁଡିଓ ଆଗରେ ଠିକା କର୍ମଚାରୀଙ୍କ ଧାରଣା ଜାରି ରହିଛି । ହେଲେ ଓଡ଼ିଶା ଇନଫ୍ରାଟେକ୍ ଲିମିଟେଡର ଏଥିପ୍ରତି ନିଘା ନାହିଁ । ଧାରଣାରେ ବସିଥିବା ୩୩ଜଣଙ୍କ ମଧ୍ୟରୁ ୨ଜଣଙ୍କ ସ୍ୱାସ୍ଥ୍ୟାବସ୍ଥା ମଧ୍ୟ ବିଗିଡ଼ିଗଲାଣି । ତଥାପି ଆନ୍ଦୋଳନକାରୀଙ୍କ ଦାବି ପୂରଣ କରୁନି ସଂସ୍ଥା । ବାଧ୍ୟହୋଇ ଗତକାଲି ସାରୁଅ ଷ୍ଟୁଡିଓ ଛାଡ଼ି ରାଜଭବନ ଆଗରେ ଧାରଣା  ଦେଇଥିଲେ ଠିକା କର୍ମଚାରୀ । ଏହାସହ ରାଜ୍ୟପାଳ ଓ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ସ୍ମାରକପତ୍ର ପ୍ରଦାନ କରିଥିଲେ ।

୫ ଦଫା ଦାବି ନେଇ ରାଜଭବନ ଆଗରେ ୩୧ ଠିକା କମର୍ଚାରୀ ଧାରଣାରେ ବସିଥିଲେ । ସାରୁଅରେ ଚାଲିଥିବା ଆନ୍ଦୋଳନରେ ହସ୍ତକ୍ଷେପ ଲୋଡିଛନ୍ତି ଠିକା କର୍ମଚାରୀ । ତୁରନ୍ତ ସେମାନଙ୍କୁ ଉପଯୁକ୍ତ ଦରମାରେ ସ୍ଥାୟୀ ନିଯୁକ୍ତି ଦିଆଯାଉ ବୋଲି ଦାବି ହୋଇଛି । ଏମାନଙ୍କୁ ନିଯୁକ୍ତି ଦିଆୟାଇଥିବା ବେଳେ ପ୍ରତିଶ୍ରୁତି ପରେ ବି ଠିକା କର୍ମଚାରୀ ହୋଇନଥିଲେ ସ୍ଥାୟୀ ।  କମ୍ପାନୀ ପ୍ରତିଶ୍ରୁତିରେ ଖିଲାପ କରିବା ସହ ଲକଡାଉନ ପିରିୟଡରେ ଟଙ୍କାଟିଏ ବି ଦରମା ଦେଇନଥିଲା ।

ଅନୁସୂଚିତ ଜାତିଙ୍କ ଠାରୁ ଚଞ୍ଚକତା କରି ଜମି କିଣା ଯାଇଥିବା ଗ୍ରାମବାସୀ ଜିଲ୍ଲାପାଳଙ୍କ ଆଗରେ ଅଭିଯୋଗ କରିଥିଲେ । ଏହି ଅଭିଯୋଗକୁ ପ୍ରତ୍ୟାହାର କରିବାକୁ କମ୍ପାନୀ ନିର୍ଦ୍ଦେଶ ଦେଇଥିଲା । ଏହା ନକରିବାରୁ ସେମାନଙ୍କୁ ଚାକିରିରୁ ବହିଷ୍କାର କରାଯାଇଛି ବୋଲି ଅଭିଯୋଗ ହୋଇଛି । ପ୍ରାୟ ୬ବର୍ଷ କାମ କଲା ପରେ ବି କାର୍ଯ୍ୟଦକ୍ଷତାରେ ପ୍ରଶ୍ନ ଉଠାଇ ଚାକିରିରୁ ବହିଷ୍କୃତ ପରେ ସାରୁଅର ଷ୍ଟୁଡିଓ ଆଗରେ ଧାରଣା ଦେଇଛନ୍ତି ଠିକା କର୍ମଚାରୀ । ଏଥିରେ ବୈଜୟନ୍ତ ପଣ୍ଡାଙ୍କ ଶ୍ୱଶୂର ଏବଂ ଶଳା ହସ୍ତକ୍ଷେପ କରିବା ସହ ଆମକୁ ଧମକ ଚମକ ଦେଇଆସୁଛନ୍ତି ।

ବୈଜୟନ୍ତଙ୍କ ଶ୍ୱଶୂର ରଣଧୀର ସିଂ ସେମାନଙ୍କୁ ମିଛ ଆରୋପରେ ଫସାଇବାକୁ ଚେଷ୍ଟା କରୁଛନ୍ତି । ପୂର୍ବରୁ ଠିକା କର୍ମଚାରୀଙ୍କୁ ଧମକାଇ ସଂସ୍ଥାର ୨କର୍ମଚାରୀ ଗିରଫ ହୋଇଛନ୍ତି । ସେପଟେ ନଭେମ୍ବର ୧୧ରେ ଭୁବେନେଶ୍ୱର ଡିଭିଜନ ଉପ ଶ୍ରମ ଆୟୁକ୍ତ ଉଭୟ ପକ୍ଷକୁ ନୋଟିସ ଦେଇ ସମାଧାନ ପାଇଁ ଡକାଇଥିଲେ । ହେଲେ ଓଡିଶା ଇନଫ୍ରାଟେକ କର୍ତ୍ତୃପକ୍ଷ ଆସିନଥିଲେ । ଆଗାମୀ ୧୦ ଦିନ ଭିତରେ ସମସ୍ୟାର ସମାଧାନ ପାଇଁ ଉପ ଶ୍ରମ ଆୟୁକ୍ତ ପ୍ରତିଶ୍ରୁତି ଦେଇଛନ୍ତି ।