ଖୋର୍ଦ୍ଧା: ତୁଟୁନି ସାରୁଅ ବିବାଦ । ଲଗାତର ୧୪ଦିନ ଧରି ସାରୁଅ ଷ୍ଟୁଡିଓ ଆଗରେ ଠିକା କର୍ମଚାରୀଙ୍କ ଧାରଣା ଜାରି ରହିଛି । ହେଲେ ଓଡ଼ିଶା ଇନଫ୍ରାଟେକ୍ ଲିମିଟେଡର ଏଥିପ୍ରତି ନିଘା ନାହିଁ । ଧାରଣାରେ ବସିଥିବା ୩୩ଜଣଙ୍କ ମଧ୍ୟରୁ ୨ଜଣଙ୍କ ସ୍ୱାସ୍ଥ୍ୟାବସ୍ଥା ମଧ୍ୟ ବିଗିଡ଼ିଗଲାଣି । ତଥାପି ଆନ୍ଦୋଳନକାରୀଙ୍କ ଦାବି ପୂରଣ କରୁନି ସଂସ୍ଥା । ବାଧ୍ୟହୋଇ ଗତକାଲି ସାରୁଅ ଷ୍ଟୁଡିଓ ଛାଡ଼ି ରାଜଭବନ ଆଗରେ ଧାରଣା  ଦେଇଥିଲେ ଠିକା କର୍ମଚାରୀ । ଏହାସହ ରାଜ୍ୟପାଳ ଓ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ସ୍ମାରକପତ୍ର ପ୍ରଦାନ କରିଥିଲେ ।

୫ ଦଫା ଦାବି ନେଇ ରାଜଭବନ ଆଗରେ ୩୧ ଠିକା କମର୍ଚାରୀ ଧାରଣାରେ ବସିଥିଲେ । ସାରୁଅରେ ଚାଲିଥିବା ଆନ୍ଦୋଳନରେ ହସ୍ତକ୍ଷେପ ଲୋଡିଛନ୍ତି ଠିକା କର୍ମଚାରୀ । ତୁରନ୍ତ ସେମାନଙ୍କୁ ଉପଯୁକ୍ତ ଦରମାରେ ସ୍ଥାୟୀ ନିଯୁକ୍ତି ଦିଆଯାଉ ବୋଲି ଦାବି ହୋଇଛି । ଏମାନଙ୍କୁ ନିଯୁକ୍ତି ଦିଆୟାଇଥିବା ବେଳେ ପ୍ରତିଶ୍ରୁତି ପରେ ବି ଠିକା କର୍ମଚାରୀ ହୋଇନଥିଲେ ସ୍ଥାୟୀ ।  କମ୍ପାନୀ ପ୍ରତିଶ୍ରୁତିରେ ଖିଲାପ କରିବା ସହ ଲକଡାଉନ ପିରିୟଡରେ ଟଙ୍କାଟିଏ ବି ଦରମା ଦେଇନଥିଲା ।

ଅନୁସୂଚିତ ଜାତିଙ୍କ ଠାରୁ ଚଞ୍ଚକତା କରି ଜମି କିଣା ଯାଇଥିବା ଗ୍ରାମବାସୀ ଜିଲ୍ଲାପାଳଙ୍କ ଆଗରେ ଅଭିଯୋଗ କରିଥିଲେ । ଏହି ଅଭିଯୋଗକୁ ପ୍ରତ୍ୟାହାର କରିବାକୁ କମ୍ପାନୀ ନିର୍ଦ୍ଦେଶ ଦେଇଥିଲା । ଏହା ନକରିବାରୁ ସେମାନଙ୍କୁ ଚାକିରିରୁ ବହିଷ୍କାର କରାଯାଇଛି ବୋଲି ଅଭିଯୋଗ ହୋଇଛି । ପ୍ରାୟ ୬ବର୍ଷ କାମ କଲା ପରେ ବି କାର୍ଯ୍ୟଦକ୍ଷତାରେ ପ୍ରଶ୍ନ ଉଠାଇ ଚାକିରିରୁ ବହିଷ୍କୃତ ପରେ ସାରୁଅର ଷ୍ଟୁଡିଓ ଆଗରେ ଧାରଣା ଦେଇଛନ୍ତି ଠିକା କର୍ମଚାରୀ । ଏଥିରେ ବୈଜୟନ୍ତ ପଣ୍ଡାଙ୍କ ଶ୍ୱଶୂର ଏବଂ ଶଳା ହସ୍ତକ୍ଷେପ କରିବା ସହ ଆମକୁ ଧମକ ଚମକ ଦେଇଆସୁଛନ୍ତି ।

ବୈଜୟନ୍ତଙ୍କ ଶ୍ୱଶୂର ରଣଧୀର ସିଂ ସେମାନଙ୍କୁ ମିଛ ଆରୋପରେ ଫସାଇବାକୁ ଚେଷ୍ଟା କରୁଛନ୍ତି । ପୂର୍ବରୁ ଠିକା କର୍ମଚାରୀଙ୍କୁ ଧମକାଇ ସଂସ୍ଥାର ୨କର୍ମଚାରୀ ଗିରଫ ହୋଇଛନ୍ତି । ସେପଟେ ନଭେମ୍ବର ୧୧ରେ ଭୁବେନେଶ୍ୱର ଡିଭିଜନ ଉପ ଶ୍ରମ ଆୟୁକ୍ତ ଉଭୟ ପକ୍ଷକୁ ନୋଟିସ ଦେଇ ସମାଧାନ ପାଇଁ ଡକାଇଥିଲେ । ହେଲେ ଓଡିଶା ଇନଫ୍ରାଟେକ କର୍ତ୍ତୃପକ୍ଷ ଆସିନଥିଲେ । ଆଗାମୀ ୧୦ ଦିନ ଭିତରେ ସମସ୍ୟାର ସମାଧାନ ପାଇଁ ଉପ ଶ୍ରମ ଆୟୁକ୍ତ ପ୍ରତିଶ୍ରୁତି ଦେଇଛନ୍ତି ।

ଭୁବନେଶ୍ୱର: ଦୀପାବଳି ପାଇଁ ସାମୟିକ ଭାବେ ବନ୍ଦ ରହିବ ମୋ ବସ ସେବା । ଦିନ ୨ଟା ପରେ ବନ୍ଦ ରହିବ ‘ମୋ ବସ’ ଚଳାଚଳ । କ୍ୟାପିଟାଲ ରିଜିୟନ ଅରବାନ ଟ୍ରାନ୍ସପୋର୍ଟ ପକ୍ଷରୁ ଭୁବନେଶ୍ବରର ବିଭିନ୍ନ ରୁଟ୍ ପାଇଁ ମୋବସ୍ ଚଳାଚଳର ସମୟ ଧାର୍ଯ୍ୟ କରାଯାଇଛି । ସେପଟେ ଓଏସ୍‌ଆରଟିସିର ବସ ଚଳାଚଳ ମଧ୍ୟ ବନ୍ଦ ରହିଛି । ଦୀପାବଳି ପାଇଁ ସକାଳ ୬ରୁ ଆସନ୍ତାକାଲି ସକାଳ ୬ଟା ପର୍ଯ୍ୟନ୍ତ ବସ୍‌ଚଳାଚଳବନ୍ଦ ରହିଛି ।

ତେବେ ଆଜି ମୋ ବସ୍‌ ଦିନ ୨ଟା ପର୍ଯ୍ୟନ୍ତ ଚାଲିବ । ରୁଟ୍-୧୧ରେ ଥିବା ନନ୍ଦନବିହାରରୁ ସକାଳ ୭ଟା ୧୫, ୮ଟା ୧୦, ୯ଟା ୫, ୧୦ଟା ୩୦ରେ ଲିଙ୍ଗିପୁରକୁ ବସ ଚଳାଚଳ କରିବ  । ସେହିଭଳି ଲିଙ୍ଗିପୁରରୁ ନନ୍ଦନବିହାରକୁ  ସକାଳ ୮ଟା, ୯ଟା, ୧୦ଟା, ୧୧ଟା ଓ ୧୧ଟା ୩୦ରେ ବସ ଚଳାଚଳ କରିବ । ରୁଟ୍-୧୨ରେ ଥିବା ମାଷ୍ଟରକ୍ୟାଣ୍ଟିନରୁ ୭ଟା୪୦,୮ଟା୨୦, ୯ ଟା, ୯ଟା ୪୦,୧୦ଟା ୨୦,୧୧ଟା ସମୟ ମଧ୍ୟରେ ନନ୍ଦନକାନନକୁ ବସ ଚଳାଚଳ କରିବା ।

ନନ୍ଦନକାନନରୁ ମାଷ୍ଟରକ୍ୟାଣ୍ଟିନକୁ ୭ଟା ୪୦, ୮ଟା୨୦, ୮ଟା ୫୦,୯ଟା ୩୦,୧୦ଟା ୧୦, ୧୦ଟା ୫୦ ଓ ୧୧ଟା ୩୦ରେ ବସ ଚଳାଚଳ କରିବ । ସେହିଭଳି ମାଷ୍ଟରକ୍ୟାଣ୍ଟିନରୁ ପୁରୀକୁ ମଧ୍ୟ ସକାଳ ୬ଟା ୩୦ରୁ ୮ଟା ୩୦ ପର୍ଯ୍ୟନ୍ତ ଏକ ଘଣ୍ଟା ବ୍ୟବଧାନରେ ଗଡିବ ମୋବସ୍  । ତେବେ ଦିନ ୨ଟା ପରେ ବନ୍ଦ ରହିବ ‘ମୋ ବସ’ଚଳାଚଳ  । ମାଷ୍ଟରକ୍ୟାଣ୍ଟିନ ଟର୍ମିନାଲ ପାସ୍ କାଉଣ୍ଟର ଦିନକ ବନ୍ଦ ରଖାଯିବ ବୋଲି କ୍ରୁଟ ପକ୍ଷରୁ ସୂଚନା ଦିଆଯାଇଛି ।

ଭୁବନେଶ୍ୱର: ରାଜଧାନୀରେ ଜଳିଗଲା କାର । ବିଳମ୍ବିତ ରାତିରେ ରାସ୍ତା ଉପରେ ହୁତ ହୁତ ହୋଇ ଜଳିଲା କାର । ଚନ୍ଦ୍ରଶେଖପୁର ପେଟ୍ରୋଲ ପମ୍ପ ନିକଟରେ  ଦୁର୍ଘଟଣା । କାରଟି ରାସ୍ତା ଉପରେ ଛିଡା ହେଇଥିବା ବେଳେ ହଠାତ୍ ନିଆଁ ଲାଗିଯାଇଥିଲା। ଖବର ପାଇ ଚନ୍ଦ୍ର ଶେଖରପୁର ଫାୟାର ୟୁନିଟ ଓ ପୋଲିସ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ କରିଥିଲେ । ନିଆଁରେ କାରଟି ପୋଡି ନଷ୍ଟ ହୋଇଯାଛି । ଅଗ୍ନିକାଣ୍ଡ ସମୟରେ କାରରେ ଥିବା ୨ଜଣ ବ୍ୟକ୍ତି  ସୁରକ୍ଷିତ ଅଛନ୍ତି । ତେବେ ଅଗ୍ନିକାଣ୍ଡର କାରଣ ଅସ୍ପଷ୍ଟ ରହିଛି । ସର୍ଟ ସର୍କିଟ ଯୋଗୁଁ ନିଆଁ ଲାଗିଥିବା ସନ୍ଧେହ କରାଯାଉଛି ।