ନବରଙ୍ଗପୁର: ପୋଲିସ ଆକ୍ସନରେ ଛାନିଆ ହେଲେଣି ଗଞ୍ଜେଇ ମାଫିଆ । ବେଆଇନ୍ ଗଞ୍ଜେଇ କାରବାରର ମୂଳତ୍ପୋଟନ ଲାଗି ନବରଙ୍ଗପୁର ପୋଲିସ ପଦକ୍ଷେପ ନେଇଛି । ଗଞ୍ଜେଇ କାରବାରରେ ସମ୍ପୃକ୍ତ ଜିଲ୍ଲାର ୩ ଜଣଙ୍କ ସମସ୍ତ ସ୍ଥାବର ଓ ଅସ୍ଥାବର ସମ୍ପତ୍ତିକୁ ଜବତ କରିଛି ପୋଲିସ । ଏହି ସବୁ ସମ୍ପତ୍ତି ବେଆଇନ୍ ଉପାୟରେ ଅର୍ଜିତ ଧନରେ କରାଯାଇଥିଲା । ସମ୍ପତ୍ତିର ମୂଲ୍ୟ ପ୍ରାୟ ୪.୫୯ କୋଟି ଟଙ୍କା ହେବ ବୋଲି ଜିଲ୍ଲା ପୋଲିସ ସୂଚନା ଦେଇଛି ।
ତିନି ଗଞ୍ଜେଇ ମାଫିଆ ହେଲେ କଷାଗୁମୁଡ଼ା ପନରାଗୁଡା ଗାଁର ପ୍ରଭାକର ମାଳି, ଅନିରୁଦ୍ଧ ମାଳି ଓ ରମେଶ ମାଳି । ଏମାନେ ପରଦା ପଛରେ ରହି ବେଆଇନ୍ ଗଞ୍ଜେଇ କାରବାର କରୁଥିଲେ । ଓଡ଼ିଶା ସମେତ ଛତିଶଗଡ଼, ବିହାର, ଉତ୍ତରପ୍ରଦେଶ, ରାଜସ୍ଥାନ ଓ ମଧ୍ୟପ୍ରଦେଶ ଆଦି ୬ ରାଜ୍ୟରେ ଗଞ୍ଜେଇ ସାମ୍ରାଜ୍ୟ ବିସ୍ତାର କରିଥିଲେ । ନବରଙ୍ଗପୁରରୁ ଚଳାଉଥିଲେ ବେଆଇନ୍ ଗଞ୍ଜେଇ ନେଟୱର୍କ । ଏମାନେ ଏକାଧିକ NDPS ଆକ୍ଟ ମାମଲାରେ ସମ୍ପୃକ୍ତ ରହିଛନ୍ତି । ଏମାନଙ୍କ ବିରୋଧରେ କଷାଗୁମୁଡ଼ା ସହ ପାପଡ଼ାହାଣ୍ଡି ଥାନାରେ NDPS ଆକ୍ଟରେ ମାମଲା ରହିଛି ।
NDPS ଆକ୍ଟ ୧୯୮୫ ଆଧାରରେ ଅସ୍ଥାବର ସମ୍ପତ୍ତି- ୪ଟି ବିଲ୍ଡିଂ, ୪ ଏକର ୮୨ ସେଣ୍ଟ ଜମିକୁ ଜବତ କରାଯାଇଛି । ସେହିଭଳି ସ୍ଥାବର ସମ୍ପତ୍ତି- ଗୋଟିଏ ବୁଲେଟ୍, ଗୋଟିଏ ସ୍କୁଟି, ଗୋଟିଏ କାର, ୨ଟି ଟ୍ରାକ୍ଟର ସହ ଟ୍ରଲି ଏବଂ ନଗଦ ୯ ଲକ୍ଷ ୩୯ ହଜାର ୪୩୩ ଟଙ୍କା ଜବତ କରିଛି ପୋଲିସ । ଏମାନଙ୍କ ଆକାଉଣ୍ଟରେ ୪ କୋଟି ୫୯ ଲକ୍ଷ ୬୮ ହଜାର ୨୮୯ ଟଙ୍କା ଦେଣନେଣ ହୋଇଛି ।
ଅନ୍ୟ ଦେଣନେଣ ପୋଲିସ NDPS ଆକ୍ଟ ଅନୁଯାୟୀ ଖୋଳତାଡ଼ କରୁଛି । କମ୍ପିଟେଣ୍ଟ ଅଥରିଟି କୋଲକାତାଙ୍କ ନିର୍ଦ୍ଦେଶରେ ନବରଙ୍ଗପୁର ପୋଲିସ ସମ୍ପତ୍ତି ଜବତ କରିଛି । ପ୍ରଭାକର ମାଳି ଗଞ୍ଜେଇ ଚୋରା ଚାଲାଣ ଘଟଣାରେ ନବରଙ୍ଗପୁର ଜେଲରେ ଥିବା ବେଳେ ରମେଶ ମାଳି ଓ ଅନିରୁଦ୍ଧ ମାଳି ଫେରାର ଅଛନ୍ତି ।
