ରାଉରକେଲା/ ଗଞ୍ଜାମ: ରାଜ୍ୟର ବିଭିନ୍ନ ସ୍ଥାନରେ ବଢ଼ିବାରେ ଲାଗିଛି ପରିବା ଦର । ପରିବା ଦର ବୃଦ୍ଧି କାରଣରୁ ହନ୍ତସନ୍ତ ହେଉଛନ୍ତି ଖାଉଟି । ଧିରେ ଧିରେ ରୋଷେଇ ଘରୁ ଗାଏବ ହେବାରେ ଲାଗିଲାଣି ପନିପରିବା । ପୂର୍ବରୁ ପିଆଜ ଦର ବୃଦ୍ଧି କାରଣରୁ ଲୋକେ ପନିପରିବା କିଣି ସେଥିରେ ନିଜର ଗୁଜୁରାଣ ମେଣ୍ଟାଉଥିଲେ । କିନ୍ତୁ ଏବେ ପରିବା ଦର ମଧ୍ୟ ବୃଦ୍ଧି ହେବାରେ ଲାଗିଲାଣି । ମଧ୍ୟବିତ ଶ୍ରେଣିର ଲୋକେ ପରିବାରେ ହାତ ମାରିବାକୁ ମଧ୍ୟ ଭୟ କରୁଛନ୍ତି । ଯେଉଁ ପରିବାରେ ହାତ ମାରିଲେ ତାହା ୬୦ ସେପଟେ ରହୁଛି । ସେଥିପାଇଁ ଲୋକେ ଏବେ ଚିନ୍ତାରେ ପଡ଼ିଛନ୍ତି ।

ରାଉରକେଲା ସହରରରେ ବଢିଚାଲିଛି ପନିପରିବା ଦର । ଖୁଚୁରା ବଜାରରେ ଆଳୁ କେଜି ୪୫ ଟଙ୍କା ଥିବା ବେଳେ  ପିଆଜ କେଜି ୬୦ଟଙ୍କାରୁ ୬୫ ଟଙ୍କା ରହିଛି । ରାଉରକେଲା ସହରର ଖୁଚୁରା ବଜାରରେ  ଫୁଲକୋବି ୬୦ରୁ ୭୦ ଟଙ୍କା, ଵନ୍ଦାକୋବି  ୪୦ରୁ ୫୦ଟଙ୍କା, ଟମାଟର ୫୦ ରୁ ୬୦  ଟଙ୍କା, ପୋଟଳ ୫୦ରୁ ୬୦  ଟଙ୍କା, ବାଇଗଣ ୪୦ରୁ ୫୦  ଟଙ୍କା, କଦଳୀ ୪୦ଟଙ୍କା, ମାଟିଆଳୁ ୪୦ ରୁ ୫୦ ଟଙ୍କା, କଖାରୁ ୩୦ ଟଙ୍କାରେ ବିକ୍ରି କରାଯାଉଛି । ରାଉରକେଲା ସହରରେ ପରିବା ସହିତ ଆଳୁ ଓ ପିଆଜ ଦର ନିୟନ୍ତ୍ରଣ କରିବା ପାଇଁ ଦାବି ହେଉଛି । ପନିପରିବା ଦର ବଢୁଥିବାରୁ ଗ୍ରାହକମାନଙ୍କ ମଧ୍ୟରେ ଅସନ୍ତୋଷ ବଢିଚାଲିଛି ।

ସପଟେ ବ୍ରହ୍ମପୁରରେ ପନିପରିବା ଦର ଏବେ ଆକାଶ ଛୁଆଁ । ଲାଗୁଛି ଯେପରି ପରିବା ଦରରେ ଲାଗିଛି ନିଆଁ। ସାଧାରଣ ଖାଉଟି ହୁ ହୁ ହୋଇ ବଢିଚାଲିଥିବା ପରିବା ଦରକୁ ନେଇ ଘୋର ଚିନ୍ତାରେ। ଗୋଟିଏ ପଟେ କାର୍ତ୍ତିକ ମାସ ଭଳି ଏକ ପୂଣ୍ୟ ମାସ ତାଲିଥିବା ବେଳେ ପନିପରିବା ଉପରେ ସଂପୂର୍ଣ୍ଣ ନିର୍ଭର କରିଆସୁଥିବା ବେଳେ ପରିବା ମାର୍କଟକୁ ଯିବାପାଇଁ ପକେଟରେ ଥିବା ବଜେଟ୍ ସୁହାଉନାହିଁ ।

ମାଲକାନାଗିରି: ଦିନିକିଆ ସ୍ୱାଭିମାନ ଅଞ୍ଚଳ ଗସ୍ତରେ ପୋଲିସ ଡିଜି ଅଭୟ । ଗୋରସେତୁରେ ପହଞ୍ଚିଲେ ଡିଜିପି । ଗତ କିଛିଦିନ ଧରି ସ୍ୱାଭିମାନ ଅଞ୍ଚଳକୁ ମାଓମୁକ୍ତ କରିବା ଲାଗି ପୋଲିସ ଓ ସୁରକ୍ଷା ବାହିନୀ ପଦକ୍ଷେପ ନେବା ଆରମ୍ଭ କରିଦେଇଛି । ପୋଲିସ ଲୋକଙ୍କ ନିକଟତର ହେବା ଲାଗି ସ୍ୱାଭିମାନ ଅଞ୍ଚଳରେ ବିଭିନ୍ନ ସ୍ଥାନରେ ପୋଲିସ ଥାନା, ବିଏସଏଫ କ୍ୟାମ୍ପ ଆଦି ପ୍ରତିଷ୍ଠା କରାଯାଇଛି ।

ଗତ କିଛି ଦିନ ପୂର୍ବେ ଗୋରାସେତୁ ନିକଟରେ ଏକ ବିଏସଏଫ କ୍ୟାମ୍ପ ପ୍ରତିଷ୍ଠା ହୋଇଥିଲା । ଇତି ମଧ୍ୟରେ ମାଓ ଦମନ ଅଭିଯାନ କରି ପୋଲିସ ଅନେକ ସଫଳତା ମଧ୍ୟ ହାସଲ କରିଛି । ଆନ୍ଧ୍ର, ଓଡିଶା ଓ ବିଏସଏଫ ମିଳିତ ଭାବେ ସର୍ଚ୍ଚ ଓ କୁମ୍ବିଂ ଅପରେସନ ଜାରି ରଖିଛନ୍ତି । ମାଓ ଦମନ ନେଇ ଚାଲିଥିବା ବିଭିନ୍ନ ନୀତି ତଥା ଉନ୍ନୟନ ଯୋଜନାର କାର୍ଯ୍ୟକାରୀ ନେଇ ସମୀକ୍ଷା କରିବେ ଆଜି ପୋଲିସ ଡିଜି।

ଅନୁଗୁଳ: ଚାଷୀଙ୍କ ପାଇଁ ଆମେ ପେଟକୁ ଦାନା ମୁଠାଏ ଖାଇବାକୁ ପାଉଛେ । ଆମ ଦେଶରେ ଚାଷୀଙ୍କୁ ଭଗବାନଙ୍କର ସମ୍ମାନ ଦିଆଯାଇଥାଏ । ହେଲେ ଅନେକ ସମୟରେ ନିରିହ ଚାଷୀ ମାନେ ଅତ୍ୟାଚାରୀ ଲୋକଙ୍କ ଦ୍ୱାରା ପ୍ରତିଟି ସମୟରେ କଠୋର ଅତ୍ୟାଚାରର ଶିକାର ହେଉଛନ୍ତି । ଅନେକ ସମୟରେ ଚାଷୀ ଅତ୍ୟାଚାରର ଶିକାର ହୋଇ ଆତ୍ମହତ୍ୟା କରୁଛି । ତେବେ ଅନୁଗୁଳ ଜିଲ୍ଲା କିଶୋରନଗର ତହସିଲଦାର ଚାଷୀଙ୍କୁ ଉଠବସ କରାଇବାରୁ ସାଧାରଣ ଲୋକଙ୍କ ମଧ୍ୟରେ ଅସନ୍ତୋଷ ଦେଖା ଦେଇଛି  । କିଶୋରନଗର ତହସିଲଦାର ଲକ୍ଷ୍ମୀପ୍ରସାଦ ସାହୁଙ୍କ ଵିରୁଦ୍ଧରେ ଆସିଛି ଏକ ସଙ୍ଗୀନ ଅଭିଯୋଗ । ତେବେ ଏହି ଉଠବସ୍‌ ଭିଡ଼ିଓ ଏବେ ଗୋଟିଏ ଫୋନରୁ ଆଉଗୋଟିଏ ଫୋନଙ୍କୁ ଭାଇରାଲ ହେବାରେ ଲାଗିଛି ।

ସୂଚନା ଅନୁସାରେ ମାକ୍ସ ଯାଞ୍ଚ କରୁଥିବା ସମୟରେ  ଦୁଇ ଜଣ ଚାଷୀ ତାଙ୍କ ବିଲରୁ ଚାଷ କାର୍ଯ୍ୟ ସାରି ଫେରୁଥିବା ସମୟରେ ତହସିଲଦାର ଲକ୍ଷ୍ମୀପ୍ରସାଦ ସାହୁଙ୍କ ହାବୁଡ଼ରେ ପଡିଯାଇଥିଲେ । ତହସିଲଦାର ଦୁଇ ଚାଷୀଙ୍କୁ ମାସ୍କ କାହିଁକି ନାକ ତଳକୁ ହୋଇଛି ବୋଲି ୫ ଶହ ଟଙ୍କା ଲେଖାଏଁ ଜରିମାନା କରିଥିଲେ  । ଚାଷୀଙ୍କ ପାଖରେ ଟଙ୍କା ନ ଥିବା ଦର୍ଶାଇ ଫାଇନ ଦେବାରେ ନିଜର ଅକ୍ଷମତା ଦର୍ଶାଇଥିଲେ । କିନ୍ତୁ ପାୱାର ଫୁଲ ତହସିଲଦାର ନିଜର ପାୱାର ନିଶାରେ ମସଗୁଲ ଚାଷୀଙ୍କୁ ଉଠ୍ ବସ୍ କରାଇ ଥିଲେ ଓ କିଛି ଅସ୍ରାବ୍ୟ ଭାଷାରେ ବ୍ୟବହାର କରିଥିଲେ ବୋଲି ଚାଷୀଙ୍କ ଏକ ସଙ୍ଗୀନ ଅଭିଯୋଗ ଆସିଛି  । କିଶୋର ନଗର ବ୍ଲକ ଅଂଚଳରେ ଏପରି ଘଟଣା କୁ ନିନ୍ଦା କରିଛନ୍ତି ଚାଷିମାନେ ।