କେନ୍ଦୁଝର: କରୋନା ମହାମାରୀ ଯୋଗୁଁ ଲକଡାଉନ୍ ସହିତ ବ୍ୟକ୍ତିଗତ ଜୀବନ ମଧ୍ୟ ଲକ୍ ହୋଇଯାଇଛି । କେଉଁଠି କିଏ ନିଜ ଛୁଆପିଲାଠୁ ଅଲଗା ରହୁଛି ତ କିଏ କାହା ମାଆ ବାପଙ୍କଠାରୁ ଦୂରେଇ ଅଛି । ଏଭଳି ସମୟରେ ଏମିତି ଅନେକ ଘଟଣା ସୋସିଆଲ ମିଡିଆରେ ଭାଇରାଲ ହେଉଛି ଯାହା ସମସ୍ତଙ୍କ ମନକୁ ଆଘାତ ଦେଉଛି । ଠିକ୍ ସେହିଭଳି ପୁଣି ଏକ ହୃଦୟ ବିଦାରକ ଦୃଶ୍ୟ ସାମ୍ନାକୁ ଆସିଛି । କରୋନା କାଳରେ ପୁଅର ଶବ ଛୁଇଁ ପାରିଲାନି ମାଆ। ଦୂରରୁ ପୁଅର ମୃତଦେହ ଦେଖି ବାହୁନି କାନ୍ଦିଲେ ଅସହାୟ ମାଆ । ପାଖକୁ ଯିବାକୁ ଚାହୁଁଥିଲେ ବି ଯାଇପାରିନଥିଲେ । ଶେଷଥର ପାଇଁ ପୁଅର ମୁଖ ଦେଖିପାରିନଥିଲେ ମାଆ । ଅସହାୟ ମାଆ କେବେ ଚିନ୍ତା କରିନଥିବ ଯେ, ଏଭଳି ଏକ ଦିନ ଆସିବ । କେନ୍ଦୁଝର ସଦର ବ୍ଲକ ମହାଦେଇଯୋଡ଼ା ମଦରଙ୍ଗାଯୋଡି ଗାଁରେ ଏଭଳି ଘଟଣା ସାମ୍ନାକୁ ଆସିଛି ।

https://www.facebook.com/NandighoshaTV/videos/831201147686138/

ଗାଁର ୨୨ ବର୍ଷର ଜଣେ ଯୁବକ ବାଲେଶ୍ୱରରେ କାମ କରୁଥିଲେ। ଘରେ ତାଙ୍କ ମାଆ ରହୁଥିଲେ। ଗତ କିଛି ଦିନ ତଳେ ଜ୍ୱର ହେବାରୁ ବାଲେଶ୍ୱରରେ ପ୍ରାଥମିକ ଚିକିତ୍ସା ପରେ  ସେ ଘରକୁ ଫେରି ଆସିଥିଲେ । ପ୍ରଥମେ କେନ୍ଦୁଝର ଓ ପରେ ତାଙ୍କୁ କଟକ ନିଆଯାଇଥିଲା । ସେଠାରେ ତାଙ୍କୁ ଏକ ଘରୋଇ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ତେବେ ସେଠାରେ ତାଙ୍କର ମୃତ୍ୟୁ ହୋଇଥିଲା । କରୋନା ସନ୍ଦେହରେ ଗାଁଲୋକେ ତାଙ୍କ ମୃତଦେହ ଗାଁ ଭିତରକୁ ପୁରାଇ ନଥିଲେ । କିଛି ସ୍ଥାନୀୟ ଲୋକେ ତାଙ୍କ ମୃତଦେହ ଶ୍ମଶାନକୁ ନେଇଯାଥିଲେ । ସେଥିପାଇଁ ପୁଅକୁ ଶେଷ ଥର ପାଇଁ ଦେଖିପାରିନଥିଲେ ମାଆ । କରୋନା କାଳରେ ପୁଅକୁ ନଦେଖିପାରି ବାହୁନି ବାହୁନି କାନ୍ଦିଥିଲେ । ପରେ ଏକ ମେସିନ ମାଧ୍ୟମରେ ଗାତ ଖୋଳି ମୃତଶରୀରକୁ ପୋତା ଯାଇଥିଲା ।

ଭୁବନେଶ୍ୱର: କରୋନା ସଂକ୍ରମଣର ଭୂତାଣୁ କବଳରେ ସାହା ରାଜ୍ୟ । ଏଥିରୁ ମୂକୁଳିବା ପାଇଁ ରାଜ୍ୟ ସରକାର ବିଭିନ୍ନ ପ୍ରକାରର ପଦକ୍ଷେପ ନଇଛନ୍ତି । ଯେଉଁଥି ପାଇଁ ରାଜ୍ୟରେ ଏପର୍ଯ୍ୟନ୍ତ କରୋନା ସଂକ୍ରମଣ ବଢ଼ିଥିଲେ ମଧ୍ୟ ସୁସ୍ଥତା ହାର କ୍ରମାଗତ ଭାବରେ ବଢ଼ିବାକୁ ଲାଗିଛି । ଅନ୍ୟ ରାଜ୍ୟ ତୁଳନାରେ ଓଡ଼ିଶା ସୁସ୍ଥତା ହାରରେ ଆଗୁଆ ରହିଛି । ଏହାର ଏକ ମାତ୍ର କାରଣ ହେଉଛି ରାଜ୍ୟ ସରକାରଙ୍କର କରୋନା ବିରୁଦ୍ଧରେ ଉନ୍ନତ ପଦକ୍ଷେପ ।  ତେବେ କୋଭିଡରେ ବିଭିନ୍ନ ପଦକ୍ଷେପ ସଂକ୍ରାନ୍ତରେ ବିଜୁ ଯୁବ ଜନତାଦଳ ଓ ବିଜୁ ଛାତ୍ର ଜନତାଦଳ ପକ୍ଷରୁ ଆଜି ଏକ ୱେବିନାର ଅନୁଷ୍ଠିତ ହୋଇଯାଇଛି ।

ୱେବିନାରରେ ପ୍ରଥମେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବାର୍ତ୍ତା ରଖିଥିଲେ । ବିଜୁ ଯୁବ ଜନତାଦଳ ଓ ଛାତ୍ର ଜନତାଦଳର ଏଭଳି ଆୟୋଜନ ପାଇଁ ମୁଖ୍ୟମନ୍ତ୍ରୀ ଧନ୍ୟବାଦ ଦେବା ସହିତ କରୋନା ଯୁଦ୍ଧରେ ସହଯୋଗ ଲାଗି କହିଥିଲେ । ମୁଖ୍ୟମନ୍ତ୍ରୀ କହିଥିଲେ ଓଡିଶାରେ କୋଭିଡ-୧୯ ପରୀକ୍ଷା ଅନ୍ୟ ରାଜ୍ୟ ତୁଳନାରେ ଅଧିକ ଥିବାବେଳେ କରୋନା ମୃତ୍ୟୁସଂଖ୍ୟା ସବୁଠାରୁ କମ୍‍ ରହିଛି । ରାଜ୍ୟ ସରକାର କରୋନା ମୁକାବିଲା ଲାଗି ନେଇଥିବା ଏକାଧିକ ପଦକ୍ଷେପରୁ ଏଭଳି ସୁଫଳ ମିଳିଛି ।

ସେପଟେ ୱେବିନାରରେ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ନବକିଶୋ ଦାସ ରାଜ୍ୟ ସରକାର ନେଇଥିବା ବିଭିନ୍ନ ପଦକ୍ଷେପ ସଂକ୍ରାନ୍ତରେ ସୂଚନା ଦେଇଥିଲେ । ବିଶେଷକରି ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ରାଜ୍ୟରେ ଆରମ୍ଭ ହୋଇଥିବା ପ୍ଲାଜମା ଚିକିତ୍ସା କିଭଳି ଫଳବତୀ ହୋଇ ଜୀବନ ରକ୍ଷା କରିପାରୁଛି ତାହା ଉଲ୍ଲେଖ କରିଥିଲେ । ଟେଲି ମେଡିସିନ, କୋଭିଡ ଡାକ୍ତରକାନା, ଟିମଏମ୍‍ସି, ନମୂନା ପରୀକ୍ଷା, ଟ୍ରେସିଂ ଆଦି ସଂକ୍ରାନ୍ତରେ ବିସ୍ତୃତ ସୂଚନା ଦେଇଥିଲେ ମନ୍ତ୍ରୀ । ଏହି ଅବସରରେ ପ୍ଲାଜମା ଦାନ କରିଥିବା ଏବଂ କରୋନାକୁ ହରାଇଥିବା ବ୍ୟକ୍ତି ତାଙ୍କର ଅନୁଭୂତିକୁ ବଖାଣିଥିଲେ । ରାଜ୍ୟ ସରକାର ବିଶେଷକରି ଠିକ୍‌ ସମୟରେ ଗ୍ରହଣ କରିଥିବା ବିଭିନ୍ନ ପଦକ୍ଷେପ ଯୋଗୁଁ ଓଡିଶାରେ କରୋନା ନିୟନ୍ତ୍ରଣ ହୋଇପାରିଥିବା ଅଷ୍ଟ୍ରେଲିଆରୁ ଡାକ୍ତର ପତି ଓ ଲଣ୍ଡନରୁ ଲଲାଟେନ୍ଦୁ ଦାସ କହିଥିଲେ ।

ଆଜିର ଏହି ସଫଳ ୱେବିନାରରେ ୨,୩୩,୪୫୫ ଜଣ ବ୍ୟକ୍ତି ଯୋଡ଼ି ହୋଇଥିଲେ । ଏହାକୁ ଏକ ଲକ୍ଷରୁ ଉର୍ଧ ଲୋକ ଦେଖିଥିଲେ ଏବଂ ୨ହଜାରରୁ ଅଧିକ ଲାଇକ୍‍ କରିଥିଲେ ।