ଆଠଗଡ: ଆଠଗଡ ଅଂଶୁପା ଫାଣ୍ଡି ଘୋଳପୁର ଗାଁରେ ବମିଂ ହୋଇଥିବା ସୂଚନା ମିଳିଛି । ଏହି ବୋମାମାଡରେ ଜଣଙ୍କର ମୃତ୍ୟୁ ହୋଇଥିବା ବେଳେ କିଛି ଲୋକ ଆହତ ମଧ୍ୟ ହୋଇଛନ୍ତି । ମୃତ ଜଣଙ୍କ ହେଲେ ଉକ୍ତ ଗ୍ରାମର ବୋବିନ୍ଦ ବେହେରା ।
ତେବେ ବୋମା ମାଡ କାହିଁକି ହେଲା ସେ ନେଇ କୌଣସି ସ୍ପଷ୍ଟ ସୂଚନା ମିଳିବା ସମ୍ଭବପର ହୋଇ ପାରିନାହିଁ । ତେବେ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
ଭୁବନେଶ୍ୱର: ଆଇପିଏଲ ରୋଚକ ମୋଡ ନେବା ଆରମ୍ଭ କଲାଣି । ଦିଲ୍ଲୀ, ମୁମ୍ୱାଇ ଓ ବାଙ୍ଗାଲୋର ପ୍ରଥମ ୩ଟି ସ୍ଥାନରେ ଥିବା ବେଳେ ପ୍ରାୟତଃ ପ୍ଲେ-ଅଫରେ ସ୍ଥାନ ପକ୍କା କରିବା ଏକପ୍ରକାର ନିଶ୍ଚିତ । ତେବେ ୪ର୍ଥ ସ୍ପଟ୍ ପାଇଁ ଏବେ ମଧ୍ୟ ଭିଡା ଓଟରା ଚାଲିଛି । କୋଲକତା, ପଞ୍ଜାବ, ସନରାଇଜର୍ସ ହାଇଦ୍ରାବାଦ ଓ ରାଜସ୍ଥାନ ରୟାଲ ମଧ୍ୟରୁ କେହି ଜଣେ ଟପ୍ ୪ରେ ପ୍ରବେଶ କରିବେ । ତେବେ ଏହି ୪ଙ୍କ ମଧ୍ୟରୁ କିଏ ଏହି ସୁଯୋଗ ହାତେଇବା ତା’ ପାଇଁ ଏବେ ଲଢେଇ ଜୋରସୋରରେ ହେଉଛି ।
ଇତିହାସ କଣ କହୁଛି :
ଏହିକ୍ରମରେ ଆଜି ସନରାଇଜର୍ସ ହାଇଦ୍ରାବାଦ୍ ଭେଟିବ କିଙ୍ଗ୍ସ ଏକାଦଶ ପଞ୍ଜାବକୁ । ଉଭୟ ଟିମ୍ ୪ଟି ଲେଖାଏଁ ମ୍ୟାଚ ଜିତି ୮ ପଏଣ୍ଟ ହାତେଇଥିବା ହେତୁ ଆଜିର ମ୍ୟାଚ୍ ଉଭୟଙ୍କ ପାଇଁ ଗୁରୁତ୍ୱପୂର୍ଣ୍ଣ । ପ୍ଲେ-ଅଫକୁ ଯିବାକୁ ହେଲେ ଆଜିର ମ୍ୟାଚ ଜିତିବା ଏକପ୍ରକାରର ବାଧ୍ୟତା । ଉଭୟଙ୍କ ପାଖରେ ଆଉ ୪ଟି ମ୍ୟାଚ୍ ବାକି ଥିବା ହେତୁ, ୪ଟିରୁ ୪ଟି ଜିତିବା ହିଁ ଦଳର ଏକମାତ୍ର ଲକ୍ଷ୍ୟ ରହିବ । ଅନ୍ୟପକ୍ଷରେ ୨୦୧୩ରୁ ଆଜି ପର୍ଯ୍ୟନ୍ତ ଉଭୟ ଟିମ୍ ୧୫ଟି ମୁକାବିଲାରେ ସାମ୍ନାସାମ୍ନି ହୋଇଥିବା ବେଳେ କିଙ୍ଗ୍ସ ଇଲଭେନ୍ ପଞ୍ଜାବ ମାତ୍ର ୪ଟିରେ ବିଜୟ ହୋଇଛି । ସେହିଭଳି ଏହି ସିଜିନରେ ମଧ୍ୟ ଦୁଇ ଟିମଙ୍କ ମଧ୍ୟରେ ଗୋଟିଏ ମୁକାବିଲା ଶେଷ ହୋଇଛି । ଉକ୍ତ ମ୍ୟାଚରେ ସନରାଇଜର୍ସ ୬୯ ରନରେ ବିଜୟ ଲାଭ କରିଥିଲା । ଅର୍ଥାତ୍ ଇତିହାସର ରେର୍କଡ ଆଧାରରେ ଦେଖିଲେ ପଞ୍ଜାବ ଯଥେଷ୍ଟ ଖରାପ ପ୍ରଦର୍ଶନ କରିଛି ।
କର ବା ମର ସ୍ଥିତି :
ତେବେ ଅନ୍ୟପକ୍ଷରେ ପଞ୍ଜାବ ଏହି ଟୁର୍ଣ୍ଣାମେଣ୍ଟରେ ଆରମ୍ଭରୁ ଖରାପ ଖେଳୁଥିଲେ ମଧ୍ୟ ଗତ ତିନୋଟି ମ୍ୟାଚରେ ନିଜ ପ୍ରଦର୍ଶନକୁ ଉଚ୍ଚକୋଟୀର କରିଛି । ତିନି ଟେବୁଲ ଟପର୍ ଦିଲ୍ଲୀ, ମୁମ୍ୱାଇ ଓ ବାଙ୍ଗାଲୋରକୁ ହରାଇ ପଞ୍ଜାବ ନିଜ ଆତ୍ମବିଶ୍ୱାସ ଫେରି ପାଇଛି । ଏଣୁ ବଳକା ମ୍ୟାଚରେ ପଞ୍ଜାବ ପ୍ରଦର୍ଶନ ଭଲ ରହିବ ବୋଲି ଆଶା କରାଯାଇପାରେ । ତେବେ ଉଭୟଙ୍କ ପାଇଁ ଏହା ଏକ ଅଗ୍ନି ପରୀକ୍ଷାଠାରୁ କିଛି କମ୍ ନୁହେଁ । ଆସନ୍ତା ୪ଟି ଯାକ ମ୍ୟାଚ ଜିତିବା ପରେ ହିଁ ଏକ ନିଶ୍ଚିତ ଟପ୍-୪ତାଲିକାରେ ନିଜକୁ ଦେଖିପାରିବେ । ଏଣୁ ଆଜି ସନ୍ଧ୍ୟାର ଏହି ମ୍ୟାଚ୍ ଉଭୟ ଦଳ ଜିତିବା ପାଇଁ ପାରୁ ପର୍ଯ୍ୟନ୍ତ ଚେଷ୍ଟା କରିବେ ।
କାହା ଉପରେ ରହିବ ନଜର :
ଧୁରନ୍ଧର ବ୍ୟାଟିଂ ଲାଇନ୍ ଅପ୍ ସହ ପଞ୍ଜାବ ଓ ସନରାଇଜର୍ସ ପଡିଆକୁ ଓହ୍ଲାଇବେ । କିଙ୍ଗ୍ସ ପକ୍ଷରୁ କେ ଏଲ ରାହୁଲ, ଖ୍ରୀଷ୍ଟୋଫେନ୍ ଗେଲ୍, ମୟଙ୍କ ଅଗ୍ରୱାଲ୍ ଓ ନିକୋଲସ୍ ପୁରନଙ୍କ ଭଳି ଇନଫର୍ମ ବ୍ୟାଟ୍ସ ମ୍ୟାନ ବ୍ୟାଟିଂ ଭାର ସମ୍ଭାଳିବେ । ସେହିଭଳି ହାଇଦ୍ରାବାଦର ମଙ୍ଗ ଧରିବେ, ଡେଭିଡ୍ ଓ୍ୱାର୍ଣ୍ଣର, କେନ୍ ଉଇଲିମସନ୍, ଇନ ଫର୍ମ ମନୀଷ ପାଣ୍ଡେ ଓ ଜନି ବେୟାରଷ୍ଟୋ । ଦେଖିବାକୁ ବାକି ରହିଲା କେଉଁ ଯୋଡି ଆଜିର ହାଇଭୋଲଟେଜ୍ ମ୍ୟାଚରେ ପ୍ରଦର୍ଶନକୁ ଆଶାନୂରୁପ ରଖିପାରିବେ । ତେବେ ବୋଲିଂ ୟୁନିଟରେ କିଙ୍ଗସ୍ କ୍ରମାଗତ ଭାବେ ଏକ୍ସପିରିମେଣ୍ଟ କରି ଚାଲିଥିବା ବେଳେ ଭୁବନେଶ୍ୱର କୁମାର ଟୁର୍ଣ୍ଣାମେଣ୍ଟରୁ ବାଦ ପଡିବା ପରେ ହାଇଦ୍ରାବାଦର ବୋଲିଂ ୟୁନିଟରେ ଧାର କମିଛି । କିନ୍ତୁ ଏବେ ମଧ୍ୟ ନଟରାଜନ୍ ଉଚ୍ଚକୋଟୀର ବୋଲିଂ କରିବାରେ ସିଦ୍ଧହସ୍ତ । ସେହିଭଳି ରସିଦ୍ ଖାନ ହାଇଦ୍ରାବାଦ ବୋଲିଂ ୟୁନିଟର ମଞ୍ଜି । ମ୍ୟାଚକୁ ହାଇଦ୍ରବାଦ ସପକ୍ଷରେ ମୋଡିବା ପାଇଁ ସେ ଏକାହିଁ ଯଥେଷ୍ଟ । ଅନ୍ୟପକ୍ଷରେ ପଞ୍ଜାବର ସାମି, ଅର୍ଶଦୀପ ଓ ମୃଗାନ ଅଶ୍ୱୀନି ଭଲ ପ୍ରଦର୍ଶନ କରୁଛନ୍ତି । ଦେଖିବାକୁ ବାକି ରହିଲା, ଆଜିର ମ୍ୟାଚରେ ସ୍ଥିତି କିଭଳି ରହୁଛି ।
ନୂଆଦିଲ୍ଲୀ: ଅର୍ଥମନ୍ତ୍ରାଳୟର ବଡ଼ ନିଷ୍ପତ୍ତି, କରୋନା କାଳରେ ବ୍ୟାଙ୍କ ଯଦି ସୁଧ ଉପରେ ସୁଧ ନେଇଛି, ଏବେ ତାହା ଫେରାଇବ । କେନ୍ଦ୍ର ଅର୍ଥ ମନ୍ତ୍ରାଳୟ ପକ୍ଷରୁ ଲୋନ୍ ମୋରାଟୋରିୟମ ଅବଧି ମଧ୍ୟରେ ସୁଧ ଉପରେ ସୁଧ ଛାଡ଼ କରିବା ପାଇଁ ନିର୍ଦ୍ଦେଶ ଦିଆଯାଇଛି । ଅର୍ଥମନ୍ତ୍ରାଳୟର ଏହି ନିଷ୍ପତ୍ତି, ପ୍ରାୟ ୨ କୋଟି ଟଙ୍କା ପର୍ଯ୍ୟନ୍ତ ଋଣ ନେଇଥିବା ସବୁ ଲୋକଙ୍କ ପାଇଁ ଲାଭଦାୟକ ହେବ ।
ଏହି ସ୍କିମ୍ ଅଧିନରେ ମାର୍ଚ୍ଚ ଆରମ୍ଭରୁ ୩୧ ଅଗଷ୍ଟ ମଧ୍ୟରେ ଯେଉଁମାନଙ୍କଠାରୁ ସୁଧ ଉପରେ ସୁଧ ନିଆଯାଇଛି ସେମାନଙ୍କୁ ସୁଧ ଫେରାଯିବ ବୋଲି ନିଷ୍ପତ୍ତି ହୋଇଛି । ଏହି ଫାଇଦା କେବଳ ଦୁଇ କୋଟି ଟଙ୍କା ପର୍ଯ୍ୟନ୍ତ ଋଣ ନେଇଥିବା ବ୍ୟକ୍ତି ହିଁ ପାଇପାରିବେ । ସୁପ୍ରିମ୍କୋର୍ଟ ଏହି ମାମଲାରେ ଶୁଣାଣି କରି ଯଥାଶୀଘ୍ର ଏନେଇ ପଦକ୍ଷେପ ନେବାକୁ ନିର୍ଦ୍ଦେଶ ଦେଇଥିଲେ ।
ଅର୍ଥମନ୍ତ୍ରାଳୟର ସୂଚନାନୁଯାୟୀ, ଫେବ୍ରୁଆରୀ ୨୯ ମଧ୍ୟରେ ଯେଉଁମାନଙ୍କ ଋଣ ପରିମାଣ ଦୁଇ କୋଟିରୁ କମ୍ ରହିଛି ସେହିମାନେ ହିଁ ଏହି ସୁବିଧା ପାଇପାରିବେ । ଏହି ସ୍କିମ୍ ଏମ୍ଏସ୍ଏମ୍ଇ ଓ ବ୍ୟକ୍ତିଗତ ଋଣ ପାଇଁ ଉପଲବ୍ଧ ।
ମୋରାଟୋରିୟମ୍ ଅବଧି ସମୟରେ ନିଆଯାଇଥିବା ସୁଧ ଉପରେ ସୁଧକୁ ଉକ୍ତ ବ୍ୟାଙ୍କ ପକ୍ଷରୁ ଗ୍ରାହକଙ୍କ ଆକାଉଣ୍ଟକୁ ପଠାଯିବ ବୋଲି ସ୍ଥିର ହୋଇଛି ।
ଏହି ସୁବିଧା ମୁଖ୍ୟତଃ ଏମ୍ଏସ୍ଏମ୍ଇ, ଶିକ୍ଷା, ଘର, ଗାଡ଼ି ପାଇଁ ଋଣ ନେଇଥିବା ବ୍ୟକ୍ତି ହିଁ ଉଠାଇପାରିବେ । ତେବେ ଅଗଷ୍ଟରେ ଏହି ମାମଲାରେ ଶୁଣାଣି କରି ସୁପ୍ରିମକୋର୍ଟ କେନ୍ଦ୍ର ସରକାରଙ୍କୁ କଡ଼ା ଟିପ୍ପଣୀ ଦେଇଥିଲେ । ସୁପ୍ରିମକୋର୍ଟ କହିଥିଲେ ଯେ, କେନ୍ଦ୍ର ସରକାର କେବଳ ବ୍ୟବସାୟ ଉପରେ ଆଗ୍ରହ ଦେଖାଇ ପାରିବେ ନାହିଁ । ଲୋକଙ୍କ ସମସ୍ୟାକୁ ମଧ୍ୟ ଦେଖିବାକୁ ପଡ଼ିବ ।
ସୂଚନାଯୋଗ୍ୟ, କରୋନା ସଂକ୍ରମଣ ସମୟରେ ଦେଶର ଅର୍ଥନୀତି ଉପରେ ପଡ଼ିଥିବା ପ୍ରଭାବ କାରଣରୁ ରିଜର୍ଭ ବ୍ୟାଙ୍କ ପକ୍ଷରୁ ଋଣ ସୁଝିବା ପାଇଁ ଅଧିକ ସମୟ ଦିଆଯାଇଥିଲା ।
ଭୁବନେଶ୍ୱର: ବହୁ ବାଦ ବିବାଦ ପରେ ଓଡ଼ିଶା ସମେତ ୧୬ଟି ରାଜ୍ୟକୁ ପ୍ରଥମ ଦଫାରେ କେନ୍ଦ୍ର ସରକାର ୬ହଜାର କୋଟି ଟଙ୍କାର ଜିଏସଟି କ୍ଷତିପୂରଣ ଦେବାର ବ୍ୟବସ୍ଥା କରିଛନ୍ତି । ଜିଏସଟି ପ୍ରସଙ୍ଗକୁ ନେଇ ରାଜନୀତି ଥମି ନ ଥିବାବେଳେ କେନ୍ଦ୍ର ସରକାର ୨୦୨୦ -୨୧ ପାଇଁ ସ୍ୱତନ୍ତ୍ର ବରୋଇଂ ବ୍ବିଣ୍ଡୋ ବ୍ୟବସ୍ଥାରେ କ୍ଷତିଭରଣ ନିଷ୍ପତି ନେଇ ପୁଣି ଉଠିଛି ପ୍ରଶ୍ନ । ଏହାକୁ ନେଇ କଂଗ୍ରେସ କେନ୍ଦ୍ର ସରକାରଙ୍କ ଉପରେ ବର୍ଷିଥିବାବେଳେ ଏହା ଓଡିଶାକୁ ଦୟା ନୁହେଁ ବରଂ ଓଡିଶା କେବଳ ଏତିକି ଅର୍ଥ ନୁହେଁ ବରଂ ବଳକା ପାଖାପାଖି ସାତ ହଜାର କୋଟି ଟଙ୍କାରୁ ଅଧିକ ଜିଏସଟି କ୍ଷତିପୂରଣ ବାବଦରେ ପାଇବାକୁ ହକଦାର ବୋଲି ବିଜେଡି କହିଛି । ଯାହାର ଜବାବା ରଖିଛି ବିଜେପି ।
ଓଡ଼ିଶା ସମେତ ୧୬ଟି ରାଜ୍ୟକୁ ଜିଏସଟି କ୍ଷତିପୂରଣ କରିବା ପାଇଁ କେନ୍ଦ୍ର କରିଛି ବ୍ୟବସ୍ଥା । ପ୍ରାଥମିକ ପର୍ଯ୍ୟାୟରେ ୨୦୨୦-୨୧ ପାଇଁ ସ୍ୱତନ୍ତ୍ର ବରୋଇଂ ବ୍ବିଣ୍ଡୋ ମାଧ୍ୟମରେ ଆର୍ଥିକ କ୍ଷତିଭରଣାର ବ୍ୟବସ୍ଥା କରିଛନ୍ତି । ଏଥିପାଇଁ କେନ୍ଦ୍ର ସରକାର ମୋଟ ୬ ହଜାର କୋଟି ଟଂକା ଦେଇଛନ୍ତି । ଯାହାକୁ ନେଇ କଂଗ୍ରେସ କେନ୍ଦ୍ର ସରକାରଙ୍କ ଉପରେ ବର୍ଷିଛି । ସାମ୍ବିଧାନିକ ବ୍ୟବସ୍ଥା ଏବଂ ଜିଏସଟି ଆଇନ ଅନୁଯାୟୀ ଓଡିଶା ବର୍ତ୍ତମାନ ସୁଦ୍ଧା ସାତ ହଜାର କୋଟିରୁ ଅଧିକ ଜିଏସଟି କ୍ଷତିପୂରଣ ବାବଦରେ କେନ୍ଦ୍ରଠୁ ପାଇବା କଥା । କିନ୍ତୁ କରୋନା ଆଳ ଦେଖାଇ ଏହାକୁ ନ ଦେଇ ବର୍ତ୍ତମାନ ସାମାନ୍ୟ କିଛି ଅର୍ଥ ଭରଣା କରିବାର ମାନେ କଣ ବୋଲି କଂଗ୍ରେସ ପ୍ରଶ୍ନ କରିଛି । ଏହାସହ କୋଇଲା ସେସ ବାବଦରେ ଓଡିଶା ୨୨ ହଜାର କୋଟି ଟଙ୍କା ହରାଇଥିବା କଂଗ୍ରେସ ଅଭିଯୋଗ କରିଛି । ଏପରିକି ଏ ଯାଏ କାହିକିଁ କୋଇଲା ରୟାଲଟିକୁ ସଂଶୋଧନ କରାଯାଇ ନାହିଁ ବୋଲି ଦଳ ପ୍ରଶ୍ନ କରିଛି କଂଗ୍ରେସ । ଅପରପକ୍ଷରେ ଏ ପ୍ରସଙ୍ଗରେ ବିଜେଡି ମଧ୍ୟ ରାଜ୍ୟର ଦାବିକୁ ପୁଣି ଦୋହରାଇଛି । ଜିଏସଟି ବାବଦରେ ଓଡିଶା ପାଇବାକୁ ଥିବା ହକ କେନ୍ଦ୍ର ସରକାର ପ୍ରଦାନ କରନ୍ତୁ ଏବଂ କୋଇଲା ରୟାଲିଟି ତିନିବର୍ଷରେ ଥରେ ସଂଶୋଧନ କରିବାକୁ ଦଳ ପୁଣି ଦାବି କରିଛି ।
ଜିଏସ୍ଟି ଓ କୋଇଲା ରୟାଲିଟି ସଂଶୋଧନ ପ୍ରସଙ୍ଗରେ ବିଜେଡି ଓ କଂଗ୍ରେସ ଦାବିର ଚିରାଚରିତ ଉତ୍ତର ରଖିଛି ବିଜେପି । କେନ୍ଦ୍ର ସରକାର ମାଗିବା ପୂର୍ବରୁ ଅର୍ଥ ଦେଉଥିବା ଦଳ କହିଛି ।
ସାରା ବିଶ୍ୱରେ କୋଭିଡ୍ ସଂକ୍ରମଣ ଆହୁରି ଗୁରୁତର ହେବା ନେଇ ଆଶଙ୍କା, ସତର୍କ ରହିବାକୁ WHOର ନିର୍ଦ୍ଦେଶ
ସ୍ୱତନ୍ତ୍ର ବରୋଇଁ ଓ୍ୱିଣ୍ଡୋ ମାଧ୍ୟମରେ ଅର୍ଥ ପାଇବା ପାଇଁ ୨୧ଟି ରାଜ୍ୟ ଏବଂ ୨ଟି କେନ୍ଦ୍ର ଶାସିତ ଅଂଚଳ ନିଜର ସମ୍ମତି ଜଣାଇଥିଲେ । ଏ ବାବଦରେ କେନ୍ଦ୍ର ପ୍ରସ୍ତାବକୁ ରାଜ୍ୟ ଗ୍ରହଣ କରି ଋଣ କରିଛି । ଜିଏସଟି କ୍ଷତି ବାବଦକୁ ବକେୟା ଅର୍ଥ କେନ୍ଦ୍ର ଉପରେ ପଡ଼ୁଥିବାରୁ ଏହାକୁ ନେଇ ପୁଣି ଜୋର ଧରିଛି ରାଜନୀତି ।
ବଲାଙ୍ଗିର: ବଲାଙ୍ଗିର ସହରରେ ଗତ କିଛି ଦିନ ତଳେ ଏୟାରଟେଲ୍ ଅଫିସ ଓ ମେହେର ବ୍ୟାଟ୍ରୀ ଦୋକାନରୁ ବନ୍ଧୁକ ଦେଖାଇ ଡକାୟତି ଘଟଣା ସାମ୍ନାକୁ ଆସିଥିଲା । ଏବେ ଏହି ଘଟଣାରେ ୪ଜଣ ଅଭିଯୁକ୍ତଙ୍କୁ ଗିରଫ କରିଛି ପୋଲିସ । ବଲାଙ୍ଗିର ଟାଉନ୍ ପୋଲିସ୍ ୪ ଅଭିଯୁକ୍ତଙ୍କ ପାଖରୁ ଗୋଟିଏ ଦେଶୀ ପିସ୍ତଲ, ତିନୋଟି ଜୀବନ୍ତ ଗୁଳି, ୭ଟି ମୋବାଇଲ୍ ଫୋନ୍ , ୨ଟି ବ୍ୟାଟ୍ରୀ ଓ ୩ ଟି ବାଇକ୍ ଜବତ କରିଛି ପୋଲିସ । ଗିରଫ ଅଭିଯୁକ୍ତମାନଙ୍କ ମଧ୍ୟରେ ପଶ୍ଚିମ ଓଡିଶାର କୁଖ୍ୟାତ ଅପରାଧି ସମ୍ବଲପୁରର ବଣ୍ଟି ଓରଫ୍ ରାଧେ ଓରଫ ବିଭୁତିଭୁଷଣ ସୁନା, ବୌଦ୍ଧ ଜିଲ୍ଲା ପେଙ୍ଗାଲବେଡା ଗାଁର ମଙ୍ଗଲୁ ଓରଫ୍ ଅମିତ ଝାଙ୍କର, ବଲାଙ୍ଗିର ସହର ଜୁହାଁଡିହି ପଡାର ମମିଲ୍ ମହାଲିଙ୍ଗ ଓ ମେଘନାଦପଡାର ମହାଦେବ ସାହୁ ରହିଥିବା ନେଇ ଟାଉନ ପୋଲିସ ସୂଚନା ଦେଇଛି ।
ଗତ ଜାନୁୟାରୀ ୨୦ ତାରିଖ ରାତି ୮ଟା ସମୟରେ ବଲାଙ୍ଗିର ରେଳ ଷ୍ଟେସନ ରାସ୍ତାରେ ଥିବା ଏୟାରଟେଲ୍ ଅଫିସରୁ ବନ୍ଧୁକ ଦେଖାଇ ୪ ଲକ୍ଷ ଟଙ୍କା ଲୁଟ୍ ହୋଇଥିବା ନେଇ ଅଭିଯୋଗ ହୋଇଥିଲା । ସେହିପରି ମେହେର ବ୍ୟାଟ୍ରୀ ଦୋକାନରୁ ଗତ ସେପ୍ଟେମ୍ବର ୧୩ ତାରିଖ ରାତି ପ୍ରାୟ ୮ ଟା ୩୦ ମିନିଟରେ ବନ୍ଧୁକ ମୁନରେ ୪୦ ଗ୍ରାମ ଓଜନର ଏକ ସୁନାଚେନ୍, ସୁନାମୁଦି ଓ ୫ ହଜାର ଟଙ୍କା ଡକାୟତି ହୋଇଥିଲା । ବଲାଙ୍ଗିର ଟାଉନ୍ ପୋଲିସ ଉଭୟ ଘଟଣାର ତଦନ୍ତ ଜାରି ରଖିଥିବା ବେଳେ ବଲାଙ୍ଗିର ସହର ଜୁନ୍ହାଡିହିପଡାର ମମିଲ ମହାଲିଙ୍ଗ ନାମକ ଅଭିଯୁକ୍ତ ଉଭୟ ଲୁଟ୍ ଓ ଡକାୟତି ଘଟଣାରେ ସଂପ୍ରୁକ୍ତ ରହିଥିବା ପୋଲିସ ତଦନ୍ତରୁ ଜଣାପଡିଥିଲା ।
ସେହିପରି ଘଟଣାର ମୁଖ୍ୟ ଅଭିଯୁକ୍ତ ସମ୍ବଲପୁର ଷ୍ଟେସନ୍ ରୋଡର କୁଖ୍ୟାତ ଅପରାଧି ବଣ୍ଟି ଓରଫ ରାଧେ ଓରଫ ବିଭୁତିଭୁଷଣ ସୁନା ବ୍ୟାଙ୍କ ଲୁଟ୍, ଗୁଳି ଚାଳନା ସହ ହତ୍ୟା ଘଟଣାରେ ସଂପୃକ୍ତ ରହିଥିବା ନେଇ ପୋଲିସ ସୂଚନା ଦେଇଛି । ଏହି ଦୁଇଟି ଯାକ ଲୁଟ୍ ଓ ଡକାୟତି ଘଟଣାରେ ୨ଜଣ ବିହାରୀ ଅପରାଧୀଙ୍କ ସମେତ ୫ ଅଭିଯୁକ୍ତ ଫେରାର୍ ରହିଥିବା ନେଇ ବଲାଙ୍ଗିର ଟାଉନଥାନାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ବଲାଙ୍ଗିର ଏସଡିପିଓ ଶ୍ରୀମନ୍ତ ବାରିକ ସୂଚନା ଦେଇଛନ୍ତି ।
କୋଲକତା: ସାରା ଦେଶରେ ଏବେ ମା’ ଦୁର୍ଗାଙ୍କ ପୂଜା ଉତ୍ସବ ପାଳନ କରାଯାଉଛି । ଏହି ଦୁର୍ଗାଷ୍ଟମୀ ଅବସରରେ ଅଭିନେତ୍ରୀ ତଥା ତୃଣମୁଳ କଂଗ୍ରେସର (ଟିଏମସି) ସାଂସଦ ନୁସରତ ଜାହାଁ ମଧ୍ୟ କୋଲକାତାରେ ମାତା ଦୁର୍ଗାଙ୍କୁ ପୂଜା କରିଛନ୍ତି । ତାଙ୍କ ସ୍ୱାମୀ ନିଖିଲ ଜୈନଙ୍କ ସହ ସେ ଦୁର୍ଗା ମଣ୍ଡପରେ ପହଞ୍ଚି ମାତା ଦୁର୍ଗାଙ୍କ ଆଶୀର୍ବାଦ ନେଇଛନ୍ତି ।
ଏହି ଦୁର୍ଗାଷ୍ଟମୀ ଅବସରରେ ମଧ୍ୟ ନୁସରତ କୋଲକତାର ସୁରୁଚି ସଂଘରେ ପହଞ୍ଚିଥିଲେ । ଯେଉଁଠାରେ ସେ ମା ଦୁର୍ଗାଙ୍କ ପୂଜା କରିଥିଲେ ଏବଂ ପବିତ୍ର ମନୋଭାବ ସହ ମା’ଙ୍କୁ ସୁମରଣା କରିଥିଲେ ।
ତେବେ ଏହି ଦୁର୍ଗା ପୂଜା ସମୟରେ ସେ କିଛି ଫଟୋ ସୋସିଆଲ ମିଡିଆରେ ପୋଷ୍ଟ କରିଥିଲେ । ଯାହାକୁ ନେଇ ଏବେ ଚର୍ଚ୍ଚା ଆରମ୍ଭ ହୋଇଯାଇଛି । ଏହି ଫଟୋରେ ୟୁଜର୍ସମାନେ ଅନେକ କମେଣ୍ଟ ମଧ୍ୟ କରୁଛନ୍ତି ।
ନସୁରତ ଜାହାଁ ମା’ ଦୁର୍ଗାଙ୍କ ଆଳତୀ କରିବା ପରେ ତିଲକ ମଧ୍ୟ ଲଗାଇଥିଲେ । ଏହାପରେ ସେ ଧର୍ମ ଭେଦଭାବକୁ ଭୁଲି ଢ଼ାକା ବଜାଇଥିଲେ ଏବଂ ସେହି ତାଳରେ ନୃତ୍ୟ ମଧ୍ୟ କରିଥିଲେ ।
ଏହାପୂର୍ବରୁ ଗତ ବର୍ଷ ମଧ୍ୟ ନସରୁତ ଜାହାଁ ଦୁର୍ଗା ପୂଜା କରିଥିଲେ । ସେ ସିନ୍ଦୂର ଖେଳରେ ଭାଗ ନେଇଥିଲେ । ଏହାପରେ ଅନେକ ବିବାଦ ଉପୁଜିଥିଲା ।
ନୂଆଦିଲ୍ଲୀ: କରୋନାଭାଇରସ ସଂକ୍ରମଣର ଏବେ ହେଉଛି ସବୁଠୁ ଗୁରୁତ୍ୱପୂର୍ଣ୍ଣ ସମୟ । କିଛି ଦେଶରେ ପୁଣି ଥରେ ସଂକ୍ରମଣ ବଢିବାରେ ଲାଗିଛି । ମୁକାବିଲା ପାଇଁ ନିଆଯାଇଥିବା ସମସ୍ତ ପଦକ୍ଷେପ ବିଫଳ ହେବାରେ ଲାଗିଛି । ଅନେକ ଦେଶରେ କୋଭିଡ କଟକଣାରେ କୋହଳ କରିବା ଯୋଗୁଁ ଏପରି ସ୍ଥିତି ଦେଖାଦେଇଛି ବୋଲି ବିଶ୍ୱ ସ୍ୱାସ୍ଥ୍ୟ ସଂଗଠନ ପକ୍ଷରୁ କୁହାଯାଇଛି ।
ଯେଉଁ ଦେଶରେ କରୋନା ସଂକ୍ରମଣ ବଢୁଛି ସେମାନେ ତୁରନ୍ତ ପଦକ୍ଷେପ ନିଅନ୍ତୁ ବୋଲି WHO ପରାମର୍ଶ ଦେଇଛି । ନହେଲେ ସ୍ଥିତି ପୁଣିଥରେ ଅଣାୟତ ହେବ ବୋଲି ଚେତାବନି ଦିଆଯାଇଛି । କରୋନାକୁ ଆଦୌ ହାଲୁକା ଭାବେ ନନେବାକୁ ବିଶ୍ୱ ସ୍ୱାସ୍ଥ୍ୟ ସଂଗଠନ ଚେତାବନୀ ଦେଇଛି । ଅଧିକରୁ ଅଧିକ ଟେଷ୍ଟିଂ ଓ କଣ୍ଟାକ୍ଟ ଟ୍ରେସିଂ କରି କରୋନାକୁ ମୁକାବିଲା କରିବା ପାଇଁ ବିଭିନ୍ନ ଦେଶକୁ ପରାମର୍ଶ ଦିଆଯାଇଛି ।
WHO ମୁଖ୍ୟ କହିଛନ୍ତି ଯେ, ସବୁ ଦେଶ ଭୂତାଣୁ ବିସ୍ତାରକୁ ସୀମିତ ରଖିବା ପାଇଁ ଜରୁରୀ ପଦକ୍ଷେପ ନେବା ଉଚିତ୍। କରୋନା ପରୀକ୍ଷଣରେ ଉନ୍ନତି ଆଣିବା ସହ ପୂର୍ବ ଭଳି ସଂକ୍ରମିତ ବ୍ୟକ୍ତିଙ୍କ କଣ୍ଟାକ୍ଟ ଟ୍ରେସିଂ କରିବା ଜରୁରୀ । ଏହା ଦ୍ୱାରା ସମସ୍ତେ ସତର୍କ ହୋଇପାରିବେ । କରୋନା ହେବାର ଆଶଙ୍କା ଥିବା ଲୋକଙ୍କୁ ଆଇସୋଲେଟ୍ କରିଲେ ଲକଡାଉନ ଭଳି ସ୍ଥିତି ପୁଣି ହେବ ନାହିଁ । ଏହା ସହିତ ନେତାମାନଙ୍କୁ ମଧ୍ୟ ଉଚିତ୍ ପଦକ୍ଷେପ ନେବାକୁ WHO ଅନୁରୋଧ କରୁଛି । ମୃତ୍ୟୁ ହାର ରୋକିବାକୁ ସ୍ୱାସ୍ଥ୍ୟ ସେବାରେ ପରିବର୍ତ୍ତନ ଆଣିବା ପାଇଁ ମଧ୍ୟ ନିର୍ଦ୍ଦେଶ ଦିଆଯାଇଛି ।
ଭୁବନେଶ୍ୱର: ଆଉ କିଛିଟା ଦିନ ଅପେକ୍ଷା ପରେ ଆସିବ ପବିତ୍ର ଦୀପାବଳି । ପ୍ରତିବର୍ଷ ହଜାର ହଜାର ଶ୍ରଦ୍ଧାଳୁ ପୁରୀ ଯାଇ ସେଠାରେ ଦୀପାବଳି ପାଳନ କରିଥାନ୍ତି । କାଉଁରିଆ କାଠିଜାଳି ତାଙ୍କର ପୂର୍ବପୁରୁଷଙ୍କୁ ଧ୍ୟାନ କରିଥାନ୍ତି । କିନ୍ତୁ ଚଳିତ ବର୍ଷ କରୋନା କଟକଣା ସହ ପୁରୀରେ ବାୟୁ ପ୍ରଦୂଷଣକୁ ନଜରରେ ରଖି କିଛି କଟକଣା ସହ କାଉଁରିଆ ଜାଳିବେ ଶ୍ରଦ୍ଧାଳୁ । ଦୀପାବଳି ଅମାବାସ୍ୟା ରେ ବଡ଼ବଡ଼ୁଆ ଡାକିବା ନେଇ ଶ୍ରୀମନ୍ଦିର ନିକଟରେ ସ୍ୱତନ୍ତ୍ର ସ୍ଥାନ ଅନୁଧ୍ୟାନ କଲା ଜିଲ୍ଲା ପ୍ରଶାସନ । ଏଥର ମନ୍ଦିର ସାମ୍ନାରେ ଶ୍ରଦ୍ଧାଳୁ କାଉଁରିଆ ଜାଳିବେ ନାହିଁ ।
ମାତ୍ରାଧିକ କାଉଁରିଆ କାଠି ଜାଳିବା ହେତୁ ବାୟୁ ପ୍ରଦୂଷଣ ସମେତ ଅଗ୍ନି ନିରାପତା ପ୍ରତି ଧ୍ୟାନ ଦିଆଯାଇଛି । ସେଦିନ ଯେମିତି କାହାର କୌଣସି କ୍ଷତି ନହେଉ ସେଥିପାଇଁ ଏଭଳି ବ୍ୟବସ୍ଥା କଲା ପ୍ରଶାସନ । ଶ୍ରୀମନ୍ଦିର ସିଂହଦ୍ଵାର ସମ୍ମୁଖ ପରିବର୍ତ୍ତେ ଚଳିତ ବର୍ଷ ଏମାର ମଠ ପଛପାର୍ଶ୍ଵ ଖାଲି ଥିବା ସ୍ଥାନରେ ବଡବଡୁଆ ଡାକିବା ନେଇ ପ୍ରାଥମିକ ସ୍ଥରରେ ହୋଇଛି ଯୋଜନା । ଏନେଇ ଆଜି ଉପଜିଲ୍ଲାପାଳଙ୍କ ନେତୃତ୍ୱରେ ଏକ ଟିମ ସ୍ଥିତି ଅନୁଧ୍ୟାନ କରିଥିବା ଜଣାପଡ଼ିଛି ।
ନୂଆଦିଲ୍ଲୀ: ଦେଶରେ ଆଉ ଆର୍ମି କ୍ୟାଣ୍ଟିନରେ ମିଳିବନି ବିଦେଶୀ ସାମଗ୍ରୀ । ୪ ହଜାର ଆର୍ମି କ୍ୟାଣ୍ଟିନକୁ ଏନେଇ କେନ୍ଦ୍ର ସରକାର ନିର୍ଦ୍ଦେଶ ଦେଇଛନ୍ତି । ଆମଦାନୀ ହେଉଥିବା ସାମଗ୍ରୀ ମଧ୍ୟରେ ବିଦେଶୀ ମଦ ରହିଛି । ଆତ୍ମନିର୍ଭର ଭାରତ ଯୋଜନାକୁ ପ୍ରୋତ୍ସାହନ ଦେବା ପାଇଁ ଏଭଳି ନିଷ୍ପତି ନିଆଯାଇଛି ।
CSD କାଉଣ୍ଟର ମାଧ୍ୟମରେ ଏହି ଜିନିଷଗୁଡ଼ିକର ବିକ୍ରୟ ଉପରେ ପ୍ରତିବନ୍ଧକ ଲଗାଯିବ ଏବଂ ସେମାନଙ୍କୁ ଭାରତୀୟ ଉତ୍ପାଦଗୁଡ଼ିକ ବଦଳାଇ ଦିଆଯିବ ବୋଲି ସୂଚନା ମିଳିଛି। ସୂଚନାଯୋଗ୍ୟ ଯେ କ୍ୟାଣ୍ଟିନରେ ବିକ୍ରି ପାଇଁ ବିଦେଶୀ ମଦ ଆମଦାନୀ ବନ୍ଦ ହୋଇପାରେ।
ପୂର୍ବରୁ ମଧ୍ୟ ଗୃହ ବିଭାଗ ପକ୍ଷରୁ ଆର୍ମି କ୍ୟାଣ୍ଟିନକୁ ଏଭଳି ନିର୍ଦ୍ଦେଶ ଦିଆଯାଇଥିଲା । ଆମଦାନୀ ହେଉଥିବା ବିଦେଶୀ ସାମଗ୍ରୀର ତାଲିକା ପ୍ରକାଶ ପାଇନାହିଁ । ପାଖାପାଖି ୭ ପ୍ରତିଶତ ଆମଦାନୀ ସାମଗ୍ରୀ କ୍ୟାଣ୍ଟିନରେ ବିକ୍ରି ହେଉଥିବା ଜଣାପଡିଛି । କ୍ୟାଣ୍ଟିନରେ ଏଣିକି ଲୋକାଲ ସାମଗ୍ରୀ ବିକ୍ରି କରିବା ପାଇଁ ପ୍ରୟାସ କରାଯିବ ବୋଲି କୁହାଯାଇଛି । ଆର୍ମି କ୍ୟାଣ୍ଟିନରେ ବିକ୍ରି ହେଉଥିବା ୧୦ ଟି ବୋତଲ ମଧ୍ୟରୁ ଚାରିଟି ପ୍ରାୟତଃ ସାଧାରଣତ ଲୋକମାନଙ୍କ ମଧ୍ୟରେ ବିକ୍ରି ହୋଇଥାଏ । ଯେମିତିକି ବନ୍ଧୁ ଏବଂ ପରିବାର ଯେଉଁମାନେ ସେନାରେ କାମ କରନ୍ତି ନାହିଁ । ଗତ କିଛି ମାସ ଧରି, ଅଧିକାଂଶ ୟୁନିଟରେ ଚାଲୁଥିବା କ୍ୟାଣ୍ଟିନରେ ମଧ୍ୟ ବିଦେଶୀ ମଦ ବ୍ରାଣ୍ଡ ଉପଲବ୍ଧ ହୋଇ ନାହିଁ ।
ଲୁଧିଆନା: କରୋନା କାଳରେ ଯୋଡ଼ି ହେବାକୁ ଲାଗିଛି ଗୋଟିଏ ପରେ ଗୋଟିଏ ଦୁଷ୍କର୍ମର କଳା ଧର୍ଦ୍ଦ । ଦୁଷ୍କର୍ମର ଲଜ୍ଜିତ କାହଣୀ କମିବାର ନା ହିଁ ଧରୁନାହିଁ । ହାଥରସର ଘଟଣା ମନରୁ ନଲିଭୁଣୁ ଦେଶରେ ଆଉ ଏକ ଘଟଣା ମନରେ ନିଆଁ ଲଗାଇଛି । ପଞ୍ଜାବରୁ ଏକ ଲଜ୍ଜାଜନକ ଘଟଣା ପୁଣି ସାମ୍ନାକୁ ଆସିଛି । ଜଣେ ସାଙ୍ଗଙ୍କ ଜନ୍ମଦିନ ସେଲିବ୍ରେଟ୍ କରିବା ପରେ ଯୁବତୀଙ୍କ ସହ ଘଟିଥିଲା ଦୁଷ୍କର୍ମ ଘଟଣା । ଯୁବତୀ ଜଣକଙ୍କୁ ଜବରଦସ୍ତ ଗାଡ଼ିରେ ବସାଇ ଚଳନ୍ତା କାରରେ ଦୁଷ୍କର୍ମ କରିଥିଲେ । ଏଭଳି ଏକ ଘଟଣା ପଞ୍ଜାବର ଲୁଧିଆନା ସହରରେ ଘଟିଛି ।
ପୀଡ଼ିତା ତାଙ୍କ ଅଭିଯୋଗରେ ପୋଲିସକୁ କହିଛନ୍ତି ଯେ, ଉଭୟ ଅଭିଯୁକ୍ତ ମାନେ ଏକ ଘରୋଇ ହୋଟେଲରେ କାମ କରନ୍ତି । ଯୁବତୀ ଜଣକ ତାଙ୍କ ସାଙ୍ଗ ଜନ୍ମଦିନ ପାର୍ଟୀ ପାଳନ କରିବାକୁ ଯାଇଥିଲେ । ଘଟଣା ଦିନ ସେମାନେ ଜନ୍ମଦିନ ପାଳନ କରିବା ପରେ ଲୁଧିଆନାର ସାରଳା ନଗରକୁ ଫେରିଥାନ୍ତେ । ତେବେ ଘରକୁ ଫେରିବା ବଦଳରେ ଯୁବତୀଙ୍କୁ ଅଭିଯୁକ୍ତମାନେ ସେମାନଙ୍କ ଗାଡ଼ିରେ ଜବରଦସ୍ତି ବସାଇ ନେଇଯାଇଥିଲେ । ଏହା ପରେ ଜଣେ ଅଭିଯୁକ୍ତ ଗାଡ଼ି ଚଳାଇବା ଜାରି ରଖିଥିଲେ ଏବଂ ଅନ୍ୟ ଜଣେ ଅଭିଯୁକ୍ତ ଉକ୍ତ ମହିଳାଙ୍କ ସହ ଦୁଷ୍କର୍ମ କରିଥିଲେ । ଚଳନ୍ତା କାରରେ ଘଟିଥିଲା ପୁରା କଳା କାହାଣୀ । ଦୁଷ୍କର୍ମ ପରେ ମହିଳାଙ୍କୁ କାରରୁ ଓହ୍ଲାଇ ପଳାଇଥିଲେ ।
ଦାୟିତ୍ୱରେ ଥିବା ସରାଭା ନଗର ପୋଲିସ କହିଛି ଯେ, ପୋଲିସ ଅଭିଯୁକ୍ତଙ୍କ ବିରୋଧରେ ଅପରାଧିକ ମାମଲା ରୁଜୁ କରି ଉଭୟ ଅଭିଯୁକ୍ତଙ୍କୁ ଗିରଫ କରିଛି । ଏହି ଘଟଣାରେ ସମ୍ପୃକ୍ତ କାରକୁ ମଧ୍ୟ ପୋଲିସ ଜବତ କରିଛି । ପୋଲିସ ବର୍ତ୍ତମାନ ଆଇନଗତ ପ୍ରକ୍ରିୟା ଶେଷ କରିବାରେ ବ୍ୟସ୍ତ ଅଛି ।
