ନୂଆଦିଲ୍ଲୀ: କରୋନା ମୁକାବିଲା ନେଇ ରେଳ ବିଭାଗର ଗୁରୁତ୍ୱପୂର୍ଣ୍ଣ ଭୂମିକା ରହିଛି । ଶ୍ରମିକଙ୍କୁ ନିଜ ଘରକୁ ଆଣିବା ହେଉ କିମ୍ବା ଟ୍ରେନର ବଗିକୁ କୋଭିଡ୍‌ କେୟାର ସେଣ୍ଟରରେ ପରିଣତ କରିବା ହେଉ । ସବୁ କ୍ଷେତ୍ରରେ ଆଗରେ ରହିଛି ରେଳ ବିଭାଗ । ଆଜି ଏନେଇ ଗୃହମନ୍ତ୍ର।ଳୟ ଓ ରେଳ ମନ୍ତ୍ର।ଳୟ ମିଳିତ ଭାବେ ସାମ୍ବାଦିକ ସମ୍ମିଳନୀ କରିଥିଲେ । ଆଗାମୀ ଦଶ ଦିନରେ ୨୬୦୦ ଶ୍ରମିକ ଟ୍ରେନରେ ଯାତ୍ରା କରିବେ ୩୬ ଲକ୍ଷ ଯାତ୍ରୀ । ଏବେ ସୁଦ୍ଧା ଦେଶରେ ୨୬୦୦ ରୁ ଅଧିକ ସ୍ୱତନ୍ତ୍ର ଟ୍ରେନ ଚଳାଚଳ କରୁଛି ।

ଅନେକ ପ୍ରବାସୀ ଏହି ରେଳ ସେବାର ଲାଭ ଉଠାଇ ପାରିଛନ୍ତି । ବର୍ତ୍ତମାନ ସ୍ଥିତିରେ  ପ୍ରତିଦିନ ଶ୍ରମିକ ଟ୍ରେନ୍‌ର ସଂଖ୍ୟା ୨୦୦ରୁ ଅଧିକ ରହିଛି । ବସ୍‌ରେ ୪୦ଲକ୍ଷରୁ ଅଧିକ ଲୋକ ଯାତାୟତ କରିସାରିଛନ୍ତି । ୧ ଜୁନ୍‌ରୁ ଚାଲିବାକୁ ଥିବା ସ୍ୱତନ୍ତ୍ର ଟ୍ରେନ ପାଇଁ ୧୪ ଲକ୍ଷରୁ ଅଧିକ ବୁକିଂ ସରିଲାଣି । କିଛି କିଛି ଟ୍ରେନ୍‌ରେ ୧୦୦% ସିଟ୍‌ ବୁକିଂ ସରିଛି । ୮୦% ରେଳ ଯାତ୍ରା ବିହାର ଏବଂ ଉତ୍ତରପ୍ରଦେଶ ଶ୍ରମିକଙ୍କ ଦ୍ଵାରା ହୋଇଛି । ଆଗାମୀ ଦିନରେ ଆର୍ଥିକ ସ୍ଥିତି ପ୍ରଭାବିତ ନକରିବା ପାଇଁ ଆହୁରି ଅଧିକ ରେଳ ଚଳାଚଳ କରାଯିବ । ପ୍ରତ୍ୟେକ ଟ୍ରେନ୍‌ ଚଳାଚଳ ରାଜ୍ୟ ସରକାରଙ୍କ ସହ ସମନ୍ୱୟ ରଖି କରାଯାଉଛି । ଉଭୟ ରାଜ୍ୟ ଓ କେନ୍ଦ୍ର ସରକାର ମିଳିତ ଭାବରେ ଆଗାମୀ ଦଶଦିନ ପାଇଁ ଏକ ଖସଡ଼ା ପ୍ରସ୍ତୁତ କରିଛନ୍ତି ।

ରେଲ୍‌ଓ୍ୱେ ବୋର୍ଡ ଚେୟର୍‌ମ୍ୟାନ୍‌ କହିଛନ୍ତି ଯେ, RAC ଟିକେଟ୍ ଏବେ କନ୍‌ଫର୍ମ ହେବାର ଅଧିକ ସମ୍ଭାବନା ରହିଛି । ସାମ୍ବାଦିକ ସମ୍ମିଳନୀରେ ବିନୋଦ କୁମାର ଯାଦବ କହିଛନ୍ତି ଯେ, କେବଳ କନ୍‌ଫର୍ମ ଟିକେଟ୍‌ଧାରୀଙ୍କୁ ହିଁ ଟ୍ରେନ୍‌ ଯାତ୍ରା ପାଇଁ ଅନୁମତି ଦିଆଯାଇଛି । ତେଣୁ ରାସ୍ତାରେ କୌଣସି ଯାତ୍ରୀଙ୍କୁ ଟ୍ରେନ୍‌ରେ ଚଢ଼ିବାକୁ ଅନୁମତି ନାହିଁ, ତେଣୁ RAC ଟିକେଟ୍ କନ୍‌ଫର୍ମ ହେବାର ଅଧିକ ସମ୍ଭାବନା ରହିଛି ।

ଶ୍ରମିକ ସ୍ୱତନ୍ତ୍ର ଟ୍ରେନ୍‌ ମୁମ୍ବାଇରୁ ଗୋରଖପୁରକୁ ଯାଉଥିବା ବେଳେ ତାହା ଓଡିଶାର ରାଉରକେଲାରେ ପହଞ୍ଚିଥିଲା । ଏନେଇ ଏକ ମାମଲା ସାମ୍ନାକୁ ଆସିଥିଲା । ପୂର୍ବତନ କେନ୍ଦ୍ର ମନ୍ତ୍ରୀ ତଥା କଂଗ୍ରେସ ନେତା ଆରପିଏନ୍‌ ସିଂ ନିଜ ଟ୍ୱିଟର ହ୍ୟାଣ୍ଡେଲରେ ଏକ ଭିଡିଓ ସେୟାର କରି ଲେଖିଛନ୍ତି ଯେ, ମୁମ୍ବାଇରୁ ଗୋରଖପୁର ଅଭିମୁଖେ ଯାଇଥିବା ଶ୍ରମିକ ସ୍ପେଶାଲ ଟ୍ରେନ ଓଡ଼ିଶାର ରାଉରକେଲାରେ ପହଞ୍ଚିଛି, କାରଣ ଡ୍ରାଇଭର ରାସ୍ତା ଭୁଲି ଯାଇଥିଲା । ବର୍ତ୍ତମାନ ଏହି ପ୍ରସଙ୍ଗରେ ରେଳବାଇ ପକ୍ଷରୁ ସଫେଇ ଦିଆଯାଇଛି । ରେଳ ବୋର୍ଡର ଚେୟାରମ୍ୟାନ୍ କହିଛନ୍ତି ଯେ, କିଛି ଟ୍ରେନ୍‌କୁ ଭିନ୍ନ ଦିଗରେ ଛଡ଼ାଯାଇଥିଲା । କାରଣ ରୁଟ୍‌ରେ ଅଧିକ ଜାମ୍‌ ରହିଥିଲା ।

ସେୟାର ହୋଇଥିବା ଭିଡିଓରେ ଜଣେ ଯାତ୍ରୀ କହୁଛନ୍ତି ଯେ, ଆମେ ୟୁପିର ଗୋରଖପୁର ଯିବା ପାଇଁ ମୁମ୍ବାଇରୁ ଟ୍ରେନ୍‌ରେ ଚଢ଼ିଥିଲୁ କିନ୍ତୁ ଆମକୁ ଆଣି ଓଡ଼ିଶାରେ ଛିଡ଼ା କରିଛନ୍ତି । ଏବେ ଆମେ କିପରି ଯିବୁ ? ଆମେ କ’ଣ କରିବୁ, ଆମେ ବହୁତ ଅସୁବିଧାରେ ପଡ଼ିଛୁ ବୋଲି କହିଛନ୍ତି ଯାତ୍ରୀ ଜଣକ । ଟ୍ରେନ୍‌ ଡ୍ରାଇଭର ରାସ୍ତା ଭୁଲିଗଲା । ଟ୍ୱିଟରରେ ଏହି ଘଟଣାକୁ ନେଇ ଅନେକ ଟ୍ରୋଲ୍‌ କରାଯାଇଛି ।

ରେଳ ବିଭାଗର ସଫେଇ
ରେଳ ବୋର୍ଡ ଅଧ୍ୟକ୍ଷ ବିନୋଦ କୁମାର ଯାଦବ କହିଛନ୍ତି ଯେ, ଉତ୍ତରପ୍ରଦେଶ ଏବଂ ବିହାର ଆଡ଼କୁ ଅଧିକ ସଂଖ୍ୟକ ଟ୍ରେନ୍ ଯାଉଛି । ଯାହା ଫଳରେ ଏହି ମାର୍ଗରେ ଅଧିକ ଜାମ୍‌ ରହୁଛି । ଏମିତି ପରିସ୍ଥିତିରେ ଆମେ ଅନ୍ୟ ଏକ ମାର୍ଗ ଦେଇ କିଛି ଟ୍ରେନ୍ ନେବାକୁ ସ୍ଥିର କରିଛୁ ଏବଂ ଏଭଳି ସାଧାରଣତଃ କରାଯାଇଥାଏ ।

ସେ ଆହୁରି କହିଛନ୍ତି, ଏହି ରୁଟ୍‌ ଗୁଡ଼ିକରେ ଅଧିକ ଟ୍ରାଫିକ୍‌ ଜାମ୍‌ ରହିଥାଏ । ତେଣୁ ଅଧିକ ସମୟ ଧରି ଠିଆ ହେବା ଅପେକ୍ଷା ଳମ୍ବା ରୁଟ୍‌ ଦେଇ ଶିଘ୍ର ପହଞ୍ଚିଯିବା ଭଲ । ରେଳ ବିଭାଗର ଏଭଳି ପ୍ରୋଟୋକଲ୍ ମଧ୍ୟ ରହିଛି । କିଛି ଟ୍ରେନ୍‌ ରୁଟ୍‌ ବଦଳାଯାଇଛି । କାରଣ ଯଦି ସମାନ ମାର୍ଗରେ ଟ୍ରେନ୍ ଚଳାଇବା ଜାରି ରଖାଯାଏ, ତେବେ କୌଣସି ଟ୍ରେନ୍ ଗନ୍ତବ୍ୟ ସ୍ଥଳରେ ପହଞ୍ଚିପାରିବ ନାହିଁ ।

ବିନୋଦ କୁମାର ଯାଦବ କହିଛନ୍ତି ଯେ ସେଥିପାଇଁ ଆମେ ସେହି ଟ୍ରେନକୁ ଅନ୍ୟ ରୁଟ୍‌ରେ ପଠାଇଛୁ । ଏହା ଏକ ସାଧାରଣ ପଦ୍ଧତି, ଯାହା ସାଧାରଣ ଦିନରେ ମଧ୍ୟ ଗ୍ରହଣ କରାଯାଇଥାଏ । ସେ କହିଛନ୍ତି ଯେ ଏହା ଲମ୍ବା ରୁଟ୍‌ ସତ କିନ୍ତୁ ଟ୍ରେନ୍ ନିଶ୍ଚିତ ଭାବରେ ଗନ୍ତବ୍ୟ ସ୍ଥଳରେ ପହଞ୍ଚିବ ଏବଂ ଯାତ୍ରୀଙ୍କୁ ପହଞ୍ଚାଇବ ।