ନନ୍ଦିଘୋଷ ବ୍ୟୁରୋ : ୨୫ ଲକ୍ଷ ଟଙ୍କା ଲାଞ୍ଚ ନେବାବେଳେ ସିବିଆଇ ହାତରେ ଧରାପଡ଼ିଲେ ଭାରତୀୟ ରାଜସ୍ବ ସେବା ଅଧିକାରୀ ଅମିତ କୁମାର ସିଂ । ଦିଲ୍ଲୀ ଆୟକରଦାତା ସେବାର ଅତିରିକ୍ତ ମହାନିର୍ଦ୍ଦେଶକ ଥିବା ଅମିତ କୁମାର ସିଂ ଓ ତାଙ୍କ ବେସରକାରୀ ସହଯୋଗୀ ହର୍ଷ କୋଟାକଙ୍କୁ ଲାଞ୍ଚ ନେବା ଅଭିଯୋଗରେ ସିବିଆଇ ଗିରଫ କରିଛି । ସିବିଆଇ ସୂଚନା ମୁତାବକ ଜଣେ ଆୟକରଦାତାଙ୍କ ଆୟକର ରିଟର୍ଣ୍ଣ ଅନିୟମିତତା ହୋଇଥିବା ଦର୍ଶାଇ ତାଙ୍କ ଉପରେ ଜରିମାନା ବସାଇବାକୁ ଅମିତ ଓ ତାଙ୍କ ସହଯୋଗୀ ହର୍ଷ ଧମକାଉଥିଲେ । ଏପରିକି ଲାଞ୍ଚ ଦେଲେ ତାଙ୍କ ମାମଲାଟିକୁ ରଫାଦଫା କରିବାକୁ ଦେଇଥିଲେ ପ୍ରସ୍ତାବ । ଏଥିପାଇଁ ୪୫ ଲକ୍ଷ ଟଙ୍କା ଲାଞ୍ଚ ଦେବା ନେଇ ଡିଲ୍ ହୋଇଥିଲା । ଅଗ୍ରୀମ ଆକାରରେ ୨୫ ଲକ୍ଷ ଟଙ୍କା ଦେବାକୁ ସ୍ଥିର ହୋଇଥିଲା । ଏ ନେଇ ଅଭିଯୋଗ ପାଇବା ପରେ ଉଭୟଙ୍କୁ ରେଡ୍ ହ୍ୟାଣ୍ଡ ଧରିବାକୁ ଜାଲ ବିଛାଇଥିଲା ସିବିଆଇ । ଗତକାଲି ପଞ୍ଜାବର ମୋହାଲିରେ ଅଗ୍ରୀମ ଟଙ୍କା ପ୍ରଦାନ ବେଳେ ଦୁଇଜଣଙ୍କୁ ମାଡ଼ିବସିଲା ସିବିଆଇ । ଏ ନେଇ କେନ୍ଦ୍ରୀୟ ତଦନ୍ତ ବ୍ୟୁରୋ ଏକ ମାମଲା ଋଜୁ କରି ତଦନ୍ତ ଚଳାଇଛି । ସୂଚନା ମୁତାବକ ଦୁର୍ନୀତିର ମୂଳ ପର୍ଯ୍ୟନ୍ତ ଖୋଜି ବାହାର କରିବା ପାଇଁ ଦିଲ୍ଲୀ, ପଞ୍ଜାବ ଓ ମୁମ୍ବାଇରେ ଉଭୟ ଅଭିଯୁକ୍ତଙ୍କର ଲିଙ୍କକୁ ଅଧିକ ଖୋଳତାଡ଼ କରୁଛି ତଦନ୍ତକାରୀ ସଂସ୍ଥା ।
ବାଂଲାଦେଶ ହିଂସା ପଛରେ ହାଫିଜ୍ ସଇଦ ସଂଗଠନ, ଶେଖ ହସିନାଙ୍କୁ ଛାଡିବାକୁ ପଡିଲା ପଦ
ନନ୍ଦିଘୋଷ ବ୍ୟୁରୋ : ଏପର୍ଯ୍ୟନ୍ତ ଶେଖ ହାସିନାଙ୍କ ବିଦ୍ରୋହ ପଛରେ କେବଳ ଆମେରିକାର ହାତ ଥିବା ବିଶ୍ୱାସ କରାଯାଉଥିଲା। କିନ୍ତୁ ଏବେ ଧୀରେ ଧୀରେ ଏହା ସାମ୍ନାକୁ ଆସୁଛି ଯେ ଏଥିରେ ପାକିସ୍ତାନର ଆତଙ୍କବାଦୀ ସଂଗଠନଗୁଡ଼ିକ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି। ହାଫିଜ୍ ସଇଦର ନିଷିଦ୍ଧ ସଂଗଠନ ଜମାତ-ଉଦ୍-ଦାୱାର ନେତାମାନେ ଦାବି କରିଛନ୍ତି, ସେମାନେ ଗତ ବର୍ଷ ବାଂଲାଦେଶରେ ହୋଇଥିବା ବିରୋଧ ପ୍ରଦର୍ଶନରେ ପ୍ରମୁଖ ଭୂମିକା ଗ୍ରହଣ କରିଥିଲେ ଏବଂ ପ୍ରଧାନମନ୍ତ୍ରୀ ଶେଖ ହାସିନାଙ୍କୁ କ୍ଷମତା ଛାଡିବାକୁ ବାଧ୍ୟ କରିଥିଲେ। ଜାତିସଂଘ ଦ୍ୱାରା ଆତଙ୍କବାଦୀ ଘୋଷିତ ଜେୟୁଡି ନେତା ସୈଫୁଲ୍ଲା କସୁରୀ ଓ ମୁଜାମ୍ମିଲ ହାଶମୀ ସେମାନଙ୍କ ଭାଷଣରେ ଏହା କହିଛନ୍ତି।
କସୁରୀ କହିଥିଲେ, ୧୯୭୧ ମସିହାରେ ପାକିସ୍ତାନ ବିଭାଜନ ହେବା ସମୟରେ ମୁଁ ଚାରି ବର୍ଷ ବୟସର ଥିଲି। ତତ୍କାଳୀନ ଭାରତୀୟ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ଘୋଷଣା କରିଥିଲେ ଯେ ସେ ଦୁଇ ରାଷ୍ଟ୍ର ତତ୍ତ୍ୱକୁ ଖଲିଜରେ ବୁଡ଼ାଇ ଦେଇଛନ୍ତି। ମେ ୧୦ ତାରିଖରେ ମୁଁ କହିଥିଲି, ଆମେ ୧୯୭୧ର ପ୍ରତିଶୋଧ ନେଇଛୁ।
ମୁରିଦକେରେ ତାଙ୍କ ଭାଷଣରେ, କସୁରୀ ଭାରତୀୟ ବାୟୁସେନାର ଆକ୍ରମଣ ବିଷୟରେ ମଧ୍ୟ ଉଲ୍ଲେଖ କରିଥିଲେ ଯେଉଁଥିରେ ଭାରତୀୟ ସେନା ତାଙ୍କ ସହଯୋଗୀ ମୁଦାସରଙ୍କୁ ହତ୍ୟା କରିଥିଲା। ସେ ଦାବି କରିଥିଲେ ଯେ ତାଙ୍କୁ ମୁଦାସରଙ୍କ ଅନ୍ତିମ ସଂସ୍କାରରେ ଯୋଗଦେବାକୁ ଅନୁମତି ଦିଆଯାଇ ନଥିଲା। ତଥାପି, ମୁଦାସର ଏବଂ ଅନ୍ୟ ଦୁଇ ଜଣ ଜେୟୁଡି ସଦସ୍ୟଙ୍କ ଅନ୍ତିମ ସଂସ୍କାରରେ ପଞ୍ଜାବର ସାମରିକ ଏବଂ ପୋଲିସ ଅଧିକାରୀମାନେ ଯୋଗ ଦେଇଥିଲେ। କସୁରୀ କହିଥିଲେ, ଆମେ ପରବର୍ତ୍ତୀ ପିଢ଼ିକୁ ଜିହାଦ ପାଇଁ ପ୍ରସ୍ତୁତ କରୁଛୁ । ଆମେ ମରିବାକୁ ଭୟ କରୁନାହୁଁ। କସୁରୀଙ୍କ ଏହି ବୟାନ ପରେ ଭାରତୀୟ ସୁରକ୍ଷା ଏଜେନ୍ସିଗୁଡ଼ିକର ଚିନ୍ତା ବଢ଼ିପାରେ।
ମୁଜାମ୍ମିଲ ହାଶମି ଗୁଜରାନୱାଲାରେ ତାଙ୍କ ଭାଷଣରେ କହିଥିଲେ, ଗତ ବର୍ଷ ବାଂଲାଦେଶରେ ଆମେ ତୁମକୁ ପରାସ୍ତ କରିଥିଲୁ । ସେ ୫ ଅଗଷ୍ଟରେ ହସିନାଙ୍କ ଇସ୍ତଫା ଓ ତାଙ୍କ ଭାରତ ପଳାଇବା ଘଟଣା ସମ୍ପର୍କରେ ଏହା କହିଥିଲେ। ହସିନାଙ୍କ ପରେ ମହମ୍ମଦ ୟୁନୁସ୍ ମଧ୍ୟବର୍ତ୍ତୀକାଳୀନ ସରକାରର ନେତୃତ୍ୱ ନେଇଥିଲେ ଓ ବାଂଲାଦେଶ-ପାକିସ୍ତାନ ସମ୍ପର୍କରେ ସୁଧାର ଆସିଛି।
ଏହି ଭାଷଣଗୁଡ଼ିକ ଉପରେ ପ୍ରତିକ୍ରିୟା ଦେଇ ପୂର୍ବତନ ପାକିସ୍ତାନୀ କୂଟନୀତିଜ୍ଞ ହୁସେନ ହକ୍କାନି କହିଛନ୍ତି, ଏପରି ବୟାନ ବିଶ୍ୱକୁ ପାକିସ୍ତାନର ଏହି ଦାବି ଉପରେ ସନ୍ଦେହ ସୃଷ୍ଟି କରେ ଯେ ଏହା ଆତଙ୍କବାଦକୁ ପ୍ରୋତ୍ସାହିତ କରେ ନାହିଁ। ଜେୟୁଡି ମୁଖ୍ୟ ହାଫିଜ୍ ସଇଦକୁ ୨୦୦୮ ମୁମ୍ବାଇ ଆକ୍ରମଣର ମାଷ୍ଟରମାଇଣ୍ଡ ବୋଲି କୁହାଯାଉଛି ଓ ଭାରତ ତାକୁ ଆତଙ୍କବାଦୀ ବୋଲି ବିବେଚନା କରେ।
ଓଡ଼ିଶାରେ ପ୍ରଥମ କୋଭିଡ ମୃତ୍ୟୁ ଖବର ହଜାଇଲା ନିଦ !
ଭୁବନେଶ୍ବର : ରାଜ୍ୟରେ ୧୨ରେ ପହଞ୍ଚିଲା କୋଭିଡ ଆକ୍ରାନ୍ତଙ୍କ ସଂଖ୍ୟା । ଆଜି ପୁଣି ୩ ନୂଆ ମାମଲା ଚିହ୍ନଟ ହୋଇଥିବା ବେଳେ ଗତକାଲି ଜଣଙ୍କ ମୃତ୍ୟୁ ଖବର ସ୍ବାସ୍ଥ୍ୟ ବିଭାଗର ଚିନ୍ତା ବଢାଇ ଦେଇଛି । କୋଭିଡ ରୋଗୀଙ୍କ ମୃତ୍ୟୁକୁ ନେଇ ଖୋଜଖବର ପାଉନି ସ୍ବାସ୍ଥ୍ୟ ବିଭାଗ । ଗଣମାଧ୍ୟମରୁ ଜାଣିବା ପରେ ଘରୋଇ ମେଡିକାଲଠୁ ଆରମ୍ଭ କରି ସରକାରୀ ହସ୍ପିଟାଲ ଯାଏ ଟିମ୍ ପଠାଇ ସ୍ବାସ୍ଥ୍ୟ ବିଭାଗ କରିଛି ତନାଘନା । ହେଲେ କେଉଁଠାରୁ କୋଭିଡ ରୋଗୀଙ୍କ ମୃତ୍ୟୁ ନେଇ ସୂଚନା ମିଳୁନି । ସଂପୃକ୍ତ ବ୍ୟକ୍ତି ନିଜ ଆଡ଼ୁ ଘରୋଇ ହସପିଟାଲରେ ପରୀକ୍ଷା କରିବା ପରେ ତଥ୍ୟ ଚପାଇ ଦେଇଥିବା ନେଇ ସନ୍ଦେହ କରୁଛି ସ୍ବାସ୍ଥ୍ୟ ବିଭାଗ । କୋଭିଡ ପଜିଟିଭ ରୋଗୀଙ୍କ ତଥ୍ୟ ଲୁଚା ଯାଉଥିବାରୁ ଘରୋଇ ଓ ସରକାରୀ ହସ୍ପିଟାଲକୁ ଜନସ୍ବାସ୍ଥ୍ୟ ନିର୍ଦ୍ଦେଶକଙ୍କ ପକ୍ଷରୁ ତାଗିଦ କରାଯାଇଛି । ନୂଆ ରୋଗ କି ରୋଗୀ ନେଇ IDSP ସେଲକୁ ଆବଗତ କରାଇବେ ମଡିକାଲ କର୍ତ୍ତୃପକ୍ଷ । ଏହି ସେଲ ଡାଟା ସଂଗ୍ରହ କରି ସରକାରଙ୍କୁ ଅବଗତ କରିବ ।
ସେପଟେ ପ୍ରତି ଜିନମ ସିକୁଏନସିଂ ସହ ଓମିକ୍ରନର ନୂଆ ନୂଆ ସବ-ଭ୍ୟାରିଆଣ୍ଟ ଚିହ୍ନଟ ହେବାରେ ଲାଗୁଛି । ପ୍ରଥମ ରୋଗୀଙ୍କ ଠାରେ ଓମିକ୍ରନର ସବ ଭ୍ୟାରିଆଣ୍ଟ ଜେଏନ ଡଟ୍୧ ବାହାରିଥିବା ସ୍ପଷ୍ଟ ହୋଇଥିଲା । ହେଲେ ଆହୁରି ୫ଟି ଜିନମ ସିକୁଏନସିଂରୁ ଆଉ ଦୁଇଟି ଭିନ୍ନ ସବ-ଭାରିଆଣ୍ଟ ବାହାରିଛି । ଦୁଇଟି ମାମଲାରେ ଓମିକ୍ରନର ସବ ଭ୍ୟାଇରାଣ୍ଟ LF.9 ଓ ତିନୋଟି ମାମଲାରେ XFG ଚିହ୍ନଟ କରାଯାଇଛି । ପୂର୍ବରୁ ଚିହ୍ନଟ ହୋଇଥିବା ସବ-ଭାରିଆଣ୍ଟ ପରି ଏହି ଦୁଇଟିର ବି ଲକ୍ଷଣ ରହିଛି । ଏ ନେଇ ବହୁବିଧ ରୋଗୀ ଓ ବୟସ୍କ ରୋଗୀଙ୍କୁ ବିଶେଷ ସତର୍କତା ଅବଲମ୍ବନ କରିବାକୁ ପରାମର୍ଶ ଦିଆଯାଇଛି । ଗତ ଏକ ସପ୍ତାହ ମଧ୍ୟରେ ଭାରତରେ କୋଭିଡ ଆକ୍ରାନ୍ତଙ୍କ ସଂଖ୍ୟା ୧୨୦୦ % ରୁ ଅଧିକ ବୃଦ୍ଧି ପାଇଛି । ବର୍ତ୍ତମାନ ଦେଶରେ ଆକ୍ରାନ୍ତଙ୍କ ସଂଖ୍ୟା ୩ ହଜାର ୭୫୮ ଥିବା ବେଳେ, ଦିନକରେ ବଢିଛନ୍ତି ୩୬୩ ଜଣ ପଜିଟିଭ । କେରଳ, ମହାରାଷ୍ଟ୍ର ଓ ଦିଲ୍ଲୀ ସବୁଠାରୁ ଅଧିକ ପ୍ରଭାବିତ ରାଜ୍ୟ। କେରଳରେ ଆକ୍ରାନ୍ତଙ୍କ ସଂଖ୍ୟା ୧୪୦୦ ଟପିଥିବା ବେଳେ, ମହାରାଷ୍ଟ୍ରରେ ୪୮୫, ଦିଲ୍ଲୀ ୪୩୬, ଗୁଜରାଟ ୩୨୦, ତାମିଲନାଡୁ ୧୯୯, ପଶ୍ଚିମବଙ୍ଗରେ ୨୮୭, କର୍ଣ୍ଣାଟକରେ ୨୩୮ ଆକ୍ରାନ୍ତ ଚିହ୍ନଟ ହୋଇଛନ୍ତି ।
ସରଣ୍ଡା ଜଙ୍ଗଲରେ କମ୍ବିଂ ଓ ସର୍ଚ୍ଚ ଅପରେସନ୍ ଜୋରଦାର
ରାଉରକେଲା : ମାଓ ଗଡ଼ରେ ମାଓବାଦୀଙ୍କୁ ଖୋଜୁଛନ୍ତି ସୁରକ୍ଷାବାହିନୀ । ସରଣ୍ଡା ଜଙ୍ଗଲରେ କମ୍ବିଂ ଓ ସର୍ଚ୍ଚଅପରେସନ୍ ଜୋରଦାର । ଓଡିଶା ଓ ଝାଡଖଣ୍ଡ ପୋଲିସ ସହ SOG, COBRA, CRPF ଓ ଝାଡ଼ଖଣ୍ଡ ଜାଗୁଆର ପକ୍ଷରୁ ଚପ୍ପା ଚପ୍ପା ଚାଲିଛି ଯାଞ୍ଚ । ମାଓବାଦୀମାନେ ସରଣ୍ଡା ଜଙ୍ଗଲର ବିଭିନ୍ନ ସ୍ଥାନରେ ଲ୍ୟାଣ୍ଡମାଇନ ବିଛାଇ ଥିବାରୁ ଏହାକୁ ନଷ୍ଟ କରିବା ପାଇଁ ପୋଲିସ ପକ୍ଷରୁ ଉଦ୍ୟମ ଜାରି ରହିଛି। ଝାରଖଣ୍ଡ ବାଜିନାଡେରା ନିକଟରେ ଶନିବାର ଲ୍ୟାଣ୍ଡ ମାଇନ ବିସ୍ଫୋରଣରେ ଗୁରୁତର ଆହତ ହୋଇଥିଲେ ନିକଟ ଅଞ୍ଚଳର ସାହୁ ବାର୍ଜୋ । ତାଙ୍କୁ ଅଧିକ ଚିକିତ୍ସା ପାଇଁ ରାଉରକେଲା ସରକାରୀ ଡାକ୍ତରଖାନାରୁ ଆଜି ଵୁର୍ଲା ସ୍ଥାନାନ୍ତରିତ କରାଯାଇଛି । ଗତକାଲି ମଧ୍ୟାହ୍ନରେ ସରଣ୍ଡା ଜଙ୍ଗଲକୁ ପତ୍ର ତୋଳିବା ପାଇଁ ଯାଇଥିବା ସାହୁ ଵାର୍ଜୋ ଲ୍ୟାଣ୍ଡମାଇନ ବିସ୍ଫୋରଣରେ ଗୁରୁତର ଆହତ ହୋଇଥିବା ଅଭିଯୋଗ ହୋଇଥିଲା । ସରଣ୍ଡା ଜଙ୍ଗଲରେ ମାଓବାଦୀମାନେ ରହିଥିବାରୁ ଜଙ୍ଗଲ ଭିତରକୁ ଯିବାକୁ ଭୟ ଲାଗୁଥିବା ଆହତ ଯୁବକଙ୍କ ସମ୍ପର୍କୀୟ ସୂଚନା ଦେଇଛନ୍ତି।…..
ବାଙ୍କୋ ପଥର ଖଣି ନିକଟରୁ ୫ ହଜାର କେଜି ଓଜନର ବିସ୍ଫୋରକ ଲୁଟ ଘଟଣାର ତଦନ୍ତ ମଧ୍ୟ ଜାରି ରହିଛି। ଆଡିସନାଲ ଏସପିଙ୍କ ନେତୃତ୍ବରେ ୫ ଜଣିଆ SIT ଟିମ ତଦନ୍ତକୁ ଜୋରଦାର କରିଛନ୍ତି। ବିସ୍ପୋରକ ସାମଗ୍ରୀ ଯାଇଥିବା ଗୋଦାମ ମାଲିକ, କର୍ମଚାରୀ, ପଥର ଖଣି କର୍ମଚାରୀଙ୍କୁ ଆଜି ବି ପୋଲିସ ପକ୍ଷରୁ ପଚରାଉଚରା କରାଯାଉଛି । ବିସ୍ଫୋରକ ସାମଗ୍ରୀ ପଥର ଖଣିକୁ ଯାଉଥିବା ମାଓବାଦୀମାନେ କିପରି ସୂଚନା ପାଇଲେ ? ମାଓବାଦୀଙ୍କ ସହ କାହାର ଲିଙ୍କ୍ ରହିଛି ? ସେନେଇ ତଦନ୍ତ କରାଯାଉଛି। ଝାଡ଼ଖଣ୍ଡ ରାଜ୍ୟ ଅଧିନରେ ଥିବା ସରଣ୍ଡା ଜଙ୍ଗଲରେ ଵହୁ ସଂଖ୍ୟାରେ ମାଓବାଦୀ ରହିଥିବା ସୂଚନା ମିଳିବା ପରେ ଝାଡ଼ଖଣ୍ଡ ଓଡିଶା ସୀମାନ୍ତ ବର୍ତ୍ତି ଅଞ୍ଚଳରେ ସୁରକ୍ଷା ବ୍ୟବସ୍ଥା ଓ ଯାଞ୍ଚ ବ୍ୟବସ୍ଥା ମଧ୍ୟ କଡାକଡି କରାଯାଇଛି ।
NEPର ୪ ବର୍ଷିଆ ବିଏଡ୍ କୋର୍ସକୁ ନେଇ ଦ୍ଵନ୍ଦ୍ଵ
ଭୁବନେଶ୍ୱର : ବିଏଡ଼ ପଢିବାକୁ ଏ ବର୍ଷ ଆବେଦନ କରିଛନ୍ତି ୧ ଲକ୍ଷ ୨୯ ହଜାର ୭୧୨ ଛାତ୍ରଛାତ୍ରୀ। ୮୬୦୯୩ ଜଣ ମହିଳା ପ୍ରାର୍ଥୀ, ୪୩୬୧୨ ଜଣ ପୁରୁଷ ଆବେଦନ କରିଛନ୍ତି। କିନ୍ତୁ ରାଜ୍ୟରେ ସିଟ୍ ଅଛି ମାତ୍ର ୨୭୫୦। ଏତେ ସଂଖ୍ୟକ ଛାତ୍ରଛାତ୍ରୀ ଶିକ୍ଷକ ହେବାକୁ ମନ ବଳାଇ ଥିବା ବେଳେ କମ୍ ସିଟ ଓ ପରୀକ୍ଷା ପରିଚାଳନାକୁ ପ୍ରଶ୍ନ ଉଠାଇଛି ଓଡ଼ିଶା ଅଭିଭାବକ ମହାସଂଘ। ଆଉ ଏକ ସମସ୍ୟା ହେଲା, ଜାତୀୟ ଶିକ୍ଷା ନୀତିରେ ଶିକ୍ଷକ ତାଲିମକୁ ନେଇ ସ୍ପଷ୍ଟତା ନାହିଁ। ବିଏଡ଼ ପାଠ୍ୟକ୍ରମରେ ଯିଏ ଚାରି ବର୍ଷିଆ କୋର୍ସ କରିବ ସେ ପ୍ରାଥମିକ ଓ ହାଇସ୍କୁଲ ପାଇଁ ଯୋଗ୍ୟ ହେବ। କିନ୍ତୁ ଏହା ତ୍ରୁଟିପୂର୍ଣ୍ଣ ବୋଲି କୁହାଯାଉଛି। ପ୍ରାଇମେରୀ, ପ୍ରି ପ୍ରାଇମେରୀ , ହାଇସ୍କୁଲ ପାଠ୍ୟକ୍ରମ ଅଲଗା। ତେଣୁ ସେମାନଙ୍କୁ ଅଲଗା ଅଲଗା ଟ୍ରେନିଂ ଦରକାର। NEP ରେ ଏ ନେଇ କିନ୍ତୁ ସ୍ପଷ୍ଟ କରାଯାଇ ନାହିଁ। ଶିକ୍ଷକ ନିଯୁକ୍ତି ହେଉନି, କିନ୍ତୁ ବଡ଼ ବଡ଼ କଥା କୁହାଯାଉଛି। ସରକାର ଖୋଲା ମନରେ ଏ ନେଇ ଆଲୋଚନା କରିବା ଆବଶ୍ୟକ ବୋଲି କୁହାଯାଇଛି।
ସେପଟେ ଶିକ୍ଷକ ସଂଗଠନ ଅଭିଯୋଗ କରିଛି, ଶିକ୍ଷାର ସଙ୍କୋଚନ ନୀତି ଆପଣାଉଛନ୍ତି ସରକାର। ବିଏଡ ରେ ଏହା ଦେଖାଯାଉଛି। ଶିକ୍ଷକ ହେବା ପାଇଁ ରାଜ୍ୟର ବହୁ ମେଧାବୀ ଛାତ୍ରଛାତ୍ରୀ ଆଗ୍ରହୀ ଥିଲେ ମଧ୍ୟ ସୁଯୋଗ ନାହିଁ। ତେଣୁ ରାଜ୍ୟର ଅନୁଦାନପ୍ରାପ୍ତ ଅନୁଷ୍ଠାନକୁ ବିଏଡ୍ ଖୋଲିବାକୁ ଅନୁମତି ଦିଆଯାଉ ବୋଲି ଉଠିଛି ଦାବି। ଆଉ ଏକ ଦାବି ହେଲା ମୁଖ୍ୟମନ୍ତ୍ରୀ ଶିକ୍ଷାକୁ ନେଇ ଏକ କନକ୍ଳେଭ କରନ୍ତୁ। ସରକାର କହୁଛନ୍ତି ଗୋଟିଏ କଥା କରୁଛନ୍ତି ଗୋଟିଏ କଥା। ଏହା ବିରୋଧରେ ଆନ୍ଦୋଳନ ହୋଇଛି। ଓଡ଼ିଶାର ଶିକ୍ଷାକୁ ନେଇ ଏକ ସମ୍ମିଳନୀ ହେବ। ଅଗଷ୍ଟ ୩୦ ରେ ପ୍ରଧାନମନ୍ତ୍ରୀଙ୍କ ନିର୍ବାଚନ ମଣ୍ଡଳୀରେ ପ୍ରତିବାଦ ହେବ ବୋଲି ସୂଚନା ଦେଇଛି ଜଏଣ୍ଟ ଫୋରମ ଫର୍ ମୁଭମେଣ୍ଟ ଅନ୍ ଏଜୁକେସନ। ଭିତ୍ତିଭୂମି ନାହିଁ କି ଆବଶ୍ୟକ ସଂଖ୍ୟକ ଶିକ୍ଷକ ନାହାନ୍ତି। ତଥାପି ଶିଶୁ ବାଟୀକା ଖୋଲିଥିବାରୁ ପାଠପଢା ହୋଇପାରୁନି। ସରକାର କୌଣସି ପଦକ୍ଷେପ ନେଉ ନ ଥିବାରୁ ଆଗକୁ ସ୍ଥିତି ଆହୁରି ବିଗିଡ଼ିବାର ଆଶଙ୍କା ଅଛି।
ସମ୍ପତ୍ତି ଲୋଭରେ ଘର ମାଲିକକୁ ପୋଡି ମାରିଦେଲେ ଭଡାଟିଆ ମହିଳା
ବ୍ରଡ୍ମପୁର : ବୀଭତ୍ସ, ହୃଦୟ ବିଦାରକ, ଅମାନୁଷିକ । ସମ୍ପତ୍ତି ଲୋଭରେ ଘର ମାଲିକକୁ ପୋଡି ମାରିଦେଲେ ଭଡାଟିଆ ମହିଳା । ଘଟଣା ଘଟିଛି ବ୍ରହ୍ମପୁର ସୁବାସନଗର ଦ୍ବିତୀୟ ଲାଇନରେ । ନିଜ ତିନିମହଲା ଘରର ଦ୍ବିତୀୟ ମହଲାରେ ରହୁଥିବା ଅବସରପ୍ରାପ୍ତ ଆରଆଇ ହରିହର ସାହୁଙ୍କୁ ଜୀଅନ୍ତା ପୋଡି ମାରିବା ଉଦ୍ୟମ କରିଥିଲେ ଭଡାଟିଆ ସୁଦେଷ୍ଣା ଜେନା । ପୁଣି ନିଜେ ତାଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଥିଲେ ସୁଦେଷ୍ଣା । ୨୮ତାରିଖ ବିଳମ୍ବିତ ରାତିରେ ସୁଦେଷ୍ଣା,ଘର ମାଲିକ ହରିହରଙ୍କୁ ତାଙ୍କ କୋଠରୀରେ କିରୋସିନୀ ପକାଇ ନିଆଁ ଲଗାଇ ଦେଇଥିଲେ । ନିଆଁ ଲଗାଇଦେବା ପରେ, ବାହାରୁ କବାଟ ଦେଇ ନିଜ କୋଠରୀକୁ ଚାଲିଯାଇଥିଲା । ସକାଳୁ ସୁଦେଷ୍ଣା, ହରିହର ରହୁଥିବା କୋଠରୀ ଖୋଲି ତାଙ୍କୁ ସ୍ଥାନୀୟ ଲୋକଙ୍କ ସହାୟତାରେ ଏମକେସିଜିକୁ ନେଇ ଭର୍ତ୍ତି କରିଥିଲେ । ଦୁଇଜଣ ଅଜଣା ଲୋକ ହରିହରଙ୍କୁ ପୋଡି ଦେଇଥିଲେ ବୋଲି ପୋଲିସକୁ କହିଥିଲେ ସୁଦେଷ୍ଣା । ହରିହର ତାଙ୍କ ଝିଅକୁ ମୃତ୍ୟୁ ପୂର୍ବରୁ ଘଟଣା ସଂପର୍କରେ ସମସ୍ତ କଥା କହିଥିଲେ । କେହି ଜଣେ ମହିଳା ତାଙ୍କ ଉପରେ କିରୋସିନୀ ପକାଇ ନିଆଁ ଲଗାଇ ଦେଇଥିବା ହରିହର ତାଙ୍କ ଝିଅକୁ କହିଥିଲେ । ଅଧିକ ଚିକିତ୍ସା ପାଇଁ ହରିହରଙ୍କୁ କଟକ ଏସସିବିରେ ଭର୍ତ୍ତି କରାଯାଇଥିଲା । ଶୁକ୍ରବାର ରାତିରେ ଚିକିତ୍ସାଧିନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା । ପୋଲିସ ତଦନ୍ତରେ ସୁଦେଷ୍ଣାଙ୍କ ଉପରେ ସନ୍ଦେହ ହୋଇଥିଲା । ପଚରା ଉଚରା ସମୟରେ ସୁଦେଷ୍ଣା ପୋଡିମାରିଥିବା କଥାକୁ ସ୍ବୀକାର କରିଥିଲେ । ସୁଦେଷ୍ଣାଙ୍କ କହିବା ଅନୁସାରେ ହରିହର ତାଙ୍କ ସହ ଅନୈତିକ ସଂପର୍କ ରଖୁଥିଲେ ଓ ଘର ଛାଡିଯିବାକୁ ଦେଉନଥିଲେ ବୋଲି କହିଛନ୍ତି ସୁଦେଷ୍ଣା । ପୁରା ଘଟଣାର କ୍ରାଇମ ସିନ୍ ରିକ୍ରିଏସନ କରାଯାଇଥିଲା । ବ୍ରହ୍ମପୁର ଏସପି ସାମ୍ବାଦିକ ସମ୍ମିଳନୀ କରି ପୁରା ଘଟଣା ଉପରୁ ପରଦା ହଟାଇଥିଲେ
ଶ୍ରୀଜଗନ୍ନାଥଙ୍କ ରଥରେ ଲାଗିବ ଯୁଦ୍ଧ ବିମାନ ସୁଖୋଇର ଚକ, କୋଲକାତା ଇସ୍କନ ନେଇଛି ଏହି ନିଷ୍ପତ୍ତି
ନନ୍ଦିଘୋଷ ବ୍ୟୁରୋ : ଶ୍ରୀଜଗନ୍ନାଥଙ୍କ ରଥରେ ଲାଗିବ ଯୁଦ୍ଧ ବିମାନ ସୁଖୋଇର ଚକ। କୋଲକାତା ଇସ୍କନ ନେଇଛି ଏହି ନିଷ୍ପତ୍ତି। କର୍ତ୍ତୃପକ୍ଷଙ୍କ ସୂଚନା ଅନୁସାରେ ଏଥର ଆଷାଡ଼ ଦ୍ଵିତୀୟାରେ ସୁଖୋଇର ଚକରେ ଗଡ଼ିବ ମହାପ୍ରଭୁଙ୍କ ରଥ। ୪୮ ବର୍ଷ ଧରି ଲାଗିଥିଲା ବୋଇଂ ବିମାନର ଚକ। ୨୦୦୫ରେ ଦେଖା ଯାଇଥିଲା ଯେ, ସେହି ଚକ ଖରାପ ହେବାକୁ ଲାଗିଲାଣି। ସୁଖୋଇର ଚକ ସହିତ ବୋଇଂ ଚକର ଆକାଶ ପ୍ରାୟତଃ ସମାନ। ତେଣୁ ସୁଖୋଇର ଚକ ରଥରେ ଲଗାଇବାକୁ ନିଷ୍ପତ୍ତି ହୋଇଛି। ସେଥିପାଇଁ MRF କୁ ଅନୁରୋଧ କରି ପ୍ରସ୍ତାବ ପଠାଯାଇଥିଲା। ଏଥର ଏମଆରଏଫ୍ ସମ୍ମତି ଜଣାଇ ଚକ ଯୋଗାଇ ଦେଇଛନ୍ତି। ଗତକାଲି ଟ୍ରାଏଲ ହୋଇଛି। ଭାରତ-ପାକିସ୍ତାନ ଯୁଦ୍ଧ ପରିପ୍ରେକ୍ଷୀରେ କୋଲକାତା ଇସ୍କନର ରାଧା ରମଣ କହିଛନ୍ତି, ବୋଧହୁଏ ମହାପ୍ରଭୁ ଚାହୁଁଛନ୍ତି ଶାନ୍ତି ପ୍ରତିଷ୍ଠା ହେଉ।
ବର୍ଷା ଓ ବନ୍ୟାରେ ଭାସୁଛି ଉତ୍ତର ପୂର୍ବାଞ୍ଚଳ । ୩୨ରୁ ଅଧିକ ଲୋକ ମୃତ, ଲକ୍ଷାଧିକ ପ୍ରଭାବିତ
ନନ୍ଦିଘୋଷ ବ୍ୟୁରୋ : ବର୍ଷା ଓ ବନ୍ୟାରେ ଭାସୁଛି ଦେଶର ଉତ୍ତର ପୂର୍ବାଞ୍ଚଳ । ୩୨ରୁ ଅଧିକ ଲୋକଙ୍କ ମୃତ୍ୟୁ ହେଲାଣି । ଲକ୍ଷାଧିକ ଲୋକ ପ୍ରଭାବିତ ହୋଇଥିବା ବେଳେ ହଜାର ହଜାର ଲୋକ ବାସହରା ହୋଇଛନ୍ତି। ଆସାମ, ଅରୁଣାଚଳ ପ୍ରଦେଶ, ମଣିପୁର, ମିଜୋରମ ସବୁଠି ପ୍ରବଳ ବର୍ଷା ଓ ବନ୍ୟା। ଗାଁରୁ ସହର ସବୁ ଯେମିତି ଭାସୁଛି। ଆସାମର ଦିବ୍ରୁଗଡ଼, ଗୁଆହାଟୀ ସହରରେ ପ୍ରବେଶ କରିଛି ବ୍ରହ୍ମପୁତ୍ର ନଦୀର ପାଣି। ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଛନ୍ତି। ମଣିପୁରରେ ମଧ୍ୟ ସମାନ ସ୍ଥିତି। କିଛି ଦିନ ହେଲାଣି ଉତ୍ତର ପୂର୍ବାଞ୍ଚଳରେ ଜାରି ରହିଛି ମୂଷଳଧାରା ବର୍ଷା। ଆହୁରି ବର୍ଷା ହେବାର ସମ୍ଭାବନା ଥିବାରୁ କର୍ତ୍ତୃପକ୍ଷ ସମଗ୍ର ଅଞ୍ଚଳରେ ସତର୍କତା ଜାରି କରିଛନ୍ତି। ସିକିମରେ ପ୍ରବଳ ବର୍ଷାରେ ଏକ ପୋଲ ଧୋଇ ଯାଇଛି। ମଣିପୁରରେ ତିନି ଦିନ ଧରି ଲଗାଣ ବର୍ଷା ଯୋଗୁଁ ରାଜଧାନୀ ଇମ୍ଫାଲରେ ଦୈନନ୍ଦିନ ଜୀବନ ଠପ୍ ହୋଇଯାଇଛି। ସହରର ବିଭିନ୍ନ ସ୍ଥାନରୁ ଜଳବନ୍ଦୀ ହୋଇଥିବା ଖବର ମିଳିଛି, ଯାହା ଫଳରେ କର୍ତ୍ତୃପକ୍ଷ ବନ୍ୟା ଚେତାବନୀ ଜାରି କରିଛନ୍ତି ଏବଂ ଇମ୍ଫାଲ ନଦୀର ବନ୍ୟା କୂଳରେ ରହୁଥିବା ବାସିନ୍ଦାଙ୍କୁ ସ୍ଥାନାନ୍ତର କରିବାକୁ ଅନୁରୋଧ କରିଛନ୍ତି। ଅବିରତ ବର୍ଷା ଯୋଗୁଁ ଭୂସ୍ଖଳନ ହେବାରୁ ସିକିମର ପ୍ରମୁଖ ରାସ୍ତା ଅବରୋଧ ହୋଇଛି। ତେଣୁ ବିଭିନ୍ନ ସ୍ଥାନରେ ଫସି ରହିଛନ୍ତି ୧୫୦୦ ପର୍ଯ୍ୟଟକ। ମାଙ୍ଗାନ ଜିଲ୍ଲାରେ ଏକ ଗାଡ଼ି ତିସ୍ତା ନଦୀକୁ ଖସି ପଡ଼ିବାରୁ ୮ ଜଣ ନିଖୋଜ ଅଛନ୍ତି। ସେମାନଙ୍କୁ ଖୋଜାଖୋଜି ଚାଲିଛି। ସେମାନଙ୍କ ମଧ୍ୟରେ କିଛି ଓଡ଼ିଆ ବି ଅଛନ୍ତି। କିନ୍ତୁ ତିସ୍ତା ନଦୀର ଜଳସ୍ତର ଅଧିକ ଥିବାରୁ ଅପରେସନରେ ବାଧା ଉପୁଜିଛି। ଆସାମରେ, ବନ୍ୟା ଏବଂ ଭୂସ୍ଖଳନର ମୋଟ ୧୭ଟି ଜିଲ୍ଲା ପ୍ରଭାବିତ ହୋଇଛି ଏବଂ ଲକ୍ଷାଧିକ ଲୋକ ପ୍ରଭାବିତ ହୋଇଛନ୍ତି। ଲୋକଙ୍କୁ ରିଲିଫ କ୍ୟାମ୍ପରେ ରଖାଯାଇଛି। ପ୍ରଭାବିତ ଆସାମରେ ରିଲିଫ୍ ଏବଂ ଉଦ୍ଧାର କାର୍ଯ୍ୟ ଜୋରଦାର ହୋଇଛି। NDRF, SDRF, ପୋଲିସ ଏବଂ ଅଗ୍ନିଶମ ସେବା ଟିମ୍ ଲୋକଙ୍କୁ ଉଦ୍ଧାର କରିଛନ୍ତି। ପ୍ରବଳ ବର୍ଷା ପବନ ଯୋଗୁଁ ଗୁଆହାଟୀର ବିମାନ ଚଳାଚଳ ବି ପ୍ରଭାବିତ ହୋଇଥିଲା।
ଏମରଜେନ୍ସି ପାଇଁ ସିଭିଲ ଡିଫେନ୍ସର ଟ୍ରେନିଂ
ଭୁବନେଶ୍ବର : ଏମରଜେନ୍ସି ପାଇଁ ସିଭିଲ ଡିଫେନ୍ସର ଟ୍ରେନିଂ । ଡେମୋ ବେଳେ ପ୍ରଦର୍ଶିତ ହେଲା ବଞ୍ଚିବାର କଳା । ଏହି ଚିତ୍ର ଦେଖିଲେ ଯୁଦ୍ଧ ପୂର୍ବର ମକଡ୍ରିଲ କଥା ମନେ ପଡୁଥିବ । କିନ୍ତୁ ଚାଲିଛି ସିଭିଲ ଡିଫେନ୍ସର ତାଲିମ । ଯୁଦ୍ଧ ଭଳି ସ୍ଥିତି ଉପୁଜିଲେ ବେସାମରିକ ପ୍ରତିରକ୍ଷା ବାହିନୀ କିଭଳି ସାଧାରଣ ଜନତାଙ୍କ ରକ୍ଷା କରିପାରିବ, ସେ ନେଇ ହୋଇଛି ମକଡ୍ରିଲ । ଜରୁରିକାଳୀନ ପରିସ୍ଥିତି ଉପୁଜିଲେ ସଚେତନତା ଓ ସୁରକ୍ଷା ଦିଗରେ ସିଭିଲ ଡିଫେନ୍ସ ଭଲ୍ୟୁଣ୍ଟରଙ୍କ କାର୍ଯ୍ୟକଳାପ କିପରି ରହିବ ସେ ନେଇ ତାଲିମ ଦିଆଯାଇଥିଲା । ମୁଖ୍ୟତଃ ଯୁଦ୍ଧ ସମୟରେ ଶତ୍ରୁପକ୍ଷର ବିମାନ ଓ ଡ୍ରୋନ ଆକ୍ରମଣରେ ସାଧାରଣ ଜନତାଙ୍କ ଜନଜୀବନର ସୁରକ୍ଷା ଓ ଉଦ୍ଧାର ପାଇଁ ଆରମ୍ଭ ହୋଇଥିବା ୬ ଦିନିଆ କର୍ମଶାଳାକୁ ଅଗ୍ନିଶମ ଓ ବେସାମରିକ ପ୍ରତିରକ୍ଷା ବାହିନୀର ନିର୍ଦ୍ଦେଶକ ସୁଧାଂଶୁ ଷଡଙ୍ଗୀ ଉଦଘାଟନ କରିଥିବା ବେଳେ ଡ଼ିଆଇଜି ଉମାଶଙ୍କର ଦାସ ସମ୍ମାନିତ ଅତିଥି ଭାବେ ଯୋଗ ଦେଇଥିଲେ । ଯୁଦ୍ଧ ସମୟରେ ମାନସିକ ସ୍ତରରେ କ୍ଷତିଗସ୍ତଙ୍କୁ ସାହାଯ୍ୟ, ପ୍ରାଥମିକ ଚିକିତ୍ସା, ମୃତ ଶରୀରର ସୁରକ୍ଷା ଓ ଉଦ୍ଧାର, ରିଲିଫ ସହ ଯୁଦ୍ଧ ସତର୍କବାଣୀ ପ୍ରଣାଳୀ ସମ୍ପର୍କରେ ଅବଗତ କରାଯାଇଥିଲା । ଏହାସହ ବିସ୍ଫୋରକର ଅନୁସନ୍ଧାନ, ଜଳର ବିଶୁଦ୍ଧିକରଣ, ମହିଳା ଓ ଶିଶୁଙ୍କ କିଭଳି ସୁରକ୍ଷା କରାଯିବ ସେ ନେଇ ଦେଖାଯାଇଥିଲା ଡେମୋ ।
ବରମୁଣ୍ଡା ଓଡିଶା ଅଗ୍ନିଶମ ଗ୍ରାଉଣ୍ଡରେ NDRF ପକ୍ଷରୁ ଏହି ଡେମୋ ଦେଖାଯାଇଥିଲା । ଗତମାସ ୭ ତାରିଖରେ ଅପରେସନ ସିନ୍ଦୂର ପୂର୍ବରୁ ରାଜମହଲ ଛକରେ ଦେଖାଯାଇଥିଲା ଡେମୋ । ସିଭିଲ ଡିଫେନ୍ସ ପକ୍ଷରୁ କୌଣସି ପରିସ୍ଥିତିରେ ଶତ୍ରୁପକ୍ଷ ଆକ୍ରମଣରୁ ଜୀବନ ରକ୍ଷା ଲାଗି ଦିଆଯାଇଥିଲା ତାଲିମ । ସପ୍ତାହେ ପର୍ଯ୍ୟନ୍ତ ବିଭିନ୍ନ ସ୍ଥାନରେ ପର୍ଯ୍ୟାୟ କ୍ରମରେ ହୋଇଥିଲା ମକ୍ଡ୍ରିଲ୍ । ପ୍ରଥମ ଦିନରେ ଶତ୍ରୁପକ୍ଷରୁ ଆକାଶମାର୍ଗରୁ ବୋମା ବର୍ଷଣ ହେଲେ କିପରି ଆତ୍ମରକ୍ଷା କରିବେ ତାହାର ମକ୍ଡ୍ରିଲ୍ କରାଯାଇଥିଲା। ପ୍ରାୟ ୧୫ ଶହ ସ୍ବେଛାସେବୀ ଏବେ କାର୍ଯ୍ୟରତ ଥିବା ବେଳେ ଏହି ସଂଖ୍ୟାକୁ ୧୦ ହଜାର ରେ ପହଞ୍ଚାଇବା ପାଇଁ ତାଲିମ ଶିବିରରେ ଗୁରୁତ୍ୱାରୋପ ହୋଇଥିଲା । ଏହାସହ ସ୍ୱେଚ୍ଛାସେବୀଙ୍କୁ ମିଳୁଥିବା ଦୈନିକ ଭତ୍ତାରେ ବୃଦ୍ଧି କରିବା ପାଇଁ ଦୃଷ୍ଟି ଆକର୍ଷଣ କରାଯାଇଥିଲା ।
ଗଡ଼କଣ ଅଳିଆ ଗଦା ଆଗରେ ଗର୍ଜିଲେ ଜନତା, ପ୍ଲାଣ୍ଟର ଗେଟରେ ତାଲା ପକାଇ ଆନ୍ଦୋଳନ
ଭୁବନେଶ୍ବର : ପ୍ରତିବାଦ ନୁହେଁ ପକାଇଲେ ତାଲା । ଗାଡକଣ ଅଳିଆ ଗଦା ଗେଟ୍ ଆଗରେ ଗର୍ଜିଲେ ଜନତା । ରାଜ୍ଯ ସରକାରଙ୍କ ପ୍ରତିଶ୍ରୁତି ପାଣିର ଗାର ଅଭିଯୋଗ । ୨୪ ଘଣ୍ଟା ନୁହେଁ ବର୍ଷେ ପରେ ହଟିଲାନି ଅଳିଆ ଗଦା । ବିଏମସି ଫଣ୍ଡାରେ ନେତା, ମନ୍ତ୍ରୀ ଓ କମିଶନରଙ୍କ ଘରେ ଅଳିଆ ଫିଙ୍ଗିବେ ଜନତା । ଅଳିଆ ଗଦା ହଟାଓ, ସୈନିକ ସ୍କୁଲ ବଞ୍ଚାଓ ଅଭିଯାନର ଗାଡକଣ ଅଳିଆ ଗଦା ଗେଟ ଆଗରେ ଜନ ପ୍ରତିବାଦ । କିଏ ନାକରେ ରୁମାଲ ବାନ୍ଧିଛି ତ, ଆଉ କିଏ ମୁହରେ ଶାଢୀ ବାନ୍ଧିଛି । ପ୍ରତିବାଦ ବେଳେ ଅଳିଆ ଗନ୍ଧରେ ଅଚେତ ହେଲେ ଲୋକେ । ପ୍ରବେଶ ଦ୍ବାରାର ତାଲା ପକାଇବା ସହିତ ଅଳିଆ ଗାଡିକୁ ଅଟକାଇଲେ । ଏକ ଘଣ୍ଟା ଧରି ଚାଲିଲା ପ୍ରତିବାଦ । ଅଳିଆ ଗଦା ଯୋଗୁଁ ଅଞ୍ଚଳର ପ୍ରାୟ ୧୦ କିମି ପରିଧିରେ ବଞ୍ଚିବା ଦୁର୍ବିସହ ହୋଇ ପଡିଛି । ଆଗକୁ ବର୍ଷା ହେଲେ ସ୍ଥିତି ସଂଗୀନ ହେବ । ପଳାଶୁଣିରେ ଶୁଖିଲା ପ୍ରୋସେସିଂଙ୍ଗ ୟୁନିଟ କାମ ସରିଥିଲେ ବି ସରକାର କାର୍ଯ୍ୟକ୍ଷମ କରୁ ନଥିବା ଅଭିଯୋଗ ହୋଇଛି ।
ଗାଡକଣରେ ଅଳିଆ ଗଦାକୁ ନେଇ ପୂର୍ବରୁ ବିଜେପି ସରକାର ବିରୋଧୀରେ ଥିବା ବେଳେ ସତ୍ୟାଗ୍ରହ କରିଥିଲେ । ସରକାରକୁ ଆସିଲେ ୨୪ ଘଣ୍ଟାରେ ଅଳିଆ ଗଦା ହଟେଇବା ପାଇଁ ପ୍ରତିଶ୍ରୁତି ଦେଇଥିଲେ । ଏବେ ସରକାରକୁ ବର୍ଷେ ପୁରିବ । କିନ୍ତୁ ଅଳିଆ ଗଦା ହଟିଲା ନାହିଁ । ଗାଡକଣକୁ ଏବେ ଦୈନିକ ୩୫୦ ମେଟ୍ରିକ ଟନ ଶୁଖିଲା ଓ ଓଦା ଅଳିଆ ଆସୁଛି । ବିଏମସିକ କମିଶନରଙ୍କ ସହ ବୈଠକ ପରେ ଜୁନ ଶୁଦ୍ଧା ପଳାଶୁଣି ପ୍ରୋସେସିଙ୍ଗ ୟୁନିଟ କାର୍ଯ୍ଯକ୍ଷମ ହେବ କହିଥିଲେ । ତେବେ କାର୍ଯ୍ଯକାରୀ ହୋଇ ନଥିବାରୁ ଆଗକୁ ବିଏମସି ଫଣ୍ଡାରେ ନେତା, ମନ୍ତ୍ରୀ ଓ କମିଶନରଙ୍କ ଘରେ ଅଳିଆ ଫିଙ୍ଗିବେ ବୋଲି ଚେତାବନୀ ଦେଇଛନ୍ତି । ଅଳିଆ ଗଦା ହଟେଇବେ କଣ ଓଲଟି ସୈନିକ ସ୍କୁଲକୁ ଏଠୁ ହଟାଇବା ପାଇଁ ବିଜେପି ସରକାର ଷଡ଼ଯନ୍ତ୍ର କରୁଛି ବୋଲି ଭୁବନେଶ୍ବର ଉନ୍ନୟନ ପରିଷଦ ଅଭିଯୋଗ କରିଛି ।