ଦାଉଦ୍ ଇବ୍ରାହିମ୍ । ନାଁ ନିଶ୍ଚୟ ଶୁଣିଥିବେ । ଭାରତୀୟ ଅପରାଧ ଦୁନିଆର ସବୁଠୁ ବଡ ନାଁ,ସବୁଠାରୁ କୁଖ୍ୟାତ ଚେହେରା । ସେଇ ଦାଉଦ୍ ଯାହାକୁ ଭାରତୀୟ ସୁରକ୍ଷା ଏଜେନ୍ସୀ ଗଲା ୨୮ ବର୍ଷ ହେଲା ଖୋଜୁଛନ୍ତି । କିନ୍ତୁ ସେ ସିବିଆଇଠାରୁ ର’ ସମସ୍ତଙ୍କ ହାତ ପାହନ୍ତାରୁ ଦୂରରେ । ସଂଗଠିତ ଅପରାଧ ଦୁନିଆରୁ ଜିହାଦ । ଦାଉଦ ତା’ର ଅପରାଧ ଜୀବନରେ ଟ୍ରାକ୍ ବଦଳାଇଛି । ଆଇନ ସହ ଲୁଚକାଳି ଖେଳି ଆସୁଥିବା ଏହି କୁଖ୍ୟାତ ଡନର ମୃତ୍ୟୁ ଖବରକୁ ନେଇ ଏବେ ସୋସିଆଲ ମିଡିଆରେ ହଇଚଇ । ଦାଉଦ ମରିଗଲା,ଏଇ ଖବର ଆଗରୁ ବି ଅନେକ ଥର ଆସିଛି କିନ୍ତୁ ପରେ ସବୁ ଖବରକୁ ମିଛ ବୋଲି ପ୍ରମାଣିତ କରି ଦାଉଦ୍ ଫେରିଛି । ଦାଉଦ୍ ସତରେ କରୋନା ସଂକ୍ରମିତ ହୋଇ ପ୍ରାଣ ହରାଇଛି କି ନାହିଁ ତାହା ଆଉ କିଛି ଦିନ ପରେ ଜଣା ପଡିଯିବ । ତେବେ ଆସନ୍ତୁ ଜାଣିବା ଏସିଆର ସବୁଠୁ ବଡ ଡ୍ରଗ୍ସ ମାଫିଆ,ଆଇଏସଆଇର ଗେହ୍ଲାପୁଅ ଦାଉଦ୍ କେମିତି ଦାଉଦ୍ ବନିଲା ଓ ତିଆରି କଲା ପୃଥିବୀର ସବୁଠୁ ବଡ କ୍ରାଇମ୍ ସିଣ୍ଡିକେଟ୍-ଡି କଂପାନୀ । ତେବେ ତା’ ଆଗରୁ..କେତେଥରେ ଏମିତି ମିଛ ମୃତ୍ୟୁରୁ ସତ ସତିକା ଜୀବିତ ହୋଇ ଫେରିଛି ବିଗ୍ ବସ,ଆସନ୍ତୁ ଜାଣିବା

ଆଗରୁ ବହୁତ ଥର ମରିକି ଫେରିଛି ଦାଉଦ୍

ଦାଉଦ୍ ଇବ୍ରାହିମ ମରିଗଲା । ୨୦୧୦ରେ ଭାରତୀୟ ନ୍ୟୁଜ୍ ଚ୍ୟାନେଲ ଗୁଡିକ ହଠାତ ଏମିତି ବ୍ରେକିଂ ମାଡ ଆରମ୍ଭ କଲେ । ଦାଉଦକୁ କରାଚୀ ମାଫିଆ ବିଚ୍ ରାସ୍ତାରେ ଗୁଳି ମାରି ହତ୍ୟା କରିଛି ବୋଲି ଗୁପ୍ତ ସୂତ୍ର ଉଦ୍ଧାର କରି ଚ୍ୟାନେଲ ଦାବି କଲେ । କୁହାଗଲାଯେ, କରାଚୀରେ ଆଗରୁ ସକ୍ରିୟ ଥିବା ସ୍ଥାନୀୟ ମାଫିଆ ଦାଉଦକୁ ନେଇ ଅସନ୍ତୁଷ୍ଠ ଥିଲା । ଆଇଏସଆଇ ଓ ପାକ୍ ସେନା ସମର୍ଥନରେ ଦାଉଦ୍ ସେମାନଙ୍କ ଧନ୍ଦା ମାନ୍ଦା କରୁଛି,ଏହା ଥିଲା ସେମାନଙ୍କ ରାଗିବା ପଛର କାରଣ । ତେଣୁ ଦାଉଦକୁ ସେମାନେ ହତ୍ୟା କରିଛନ୍ତି  ବୋଲି ଖବର ଆସିଥିଲା ।

କେବେ ଏଡସ ପାଇଁ ତ’ କେବେ ଡାଇବେଟିସ

କେବଳ ଏତିକି ନୁହେଁ ୨୦୧୬ରେ  ଦାଉଦ ଘରେ ୱାକ୍ କରୁଥିବା ବେଳେ ତଳେ ପଡିଯିବାରୁ ଗୋଡେର ଆଘାତ ଲାଗିଥିଲା । ଡାଇବେଟିସ କାରଣରୁ ଘା’ ଶୁଖି ନଥିଲା ଓ  ଗ୍ୟାଙ୍ଗରିନ୍ କାରଣରୁ ପରେ ଗୋଡ କଟାଯାଇଥିଲା କିନ୍ତୁ ଦାଉଦ୍ ଆଉ ବିଛଣାରୁ ଉଠି ନପାରି ପ୍ରାଣ ହରାଇଥିଲା ବୋଲି ସେତେବେଳେ ଖବର ଉଡିଥିଲା । ଏହା ପରେ ଆଉଥରେ ଦାଉଦ୍ ମରିଥିଲା । ଏଥରକ ଦାଉଦ୍ ଏଡସରେ ପୀଡିତ ହୋଇ ପ୍ରାଣ ହରାଇଛି ବୋଲି କୁହାଯାଇଥିଲା ।

ହାର୍ଟ ଆଟାକରେ ବି ଥରେ ମରିଥିଲା ଦାଉଦ୍ !

ଏପ୍ରିଲ ୨୦୧୭ରେ ପାକ୍ ମିଡିଆ ଦାଉଦ ମୃତ୍ୟୁ ଖବର ଦେଇଥିଲା । ପାକିସ୍ତାନୀ ମିଡିଆ କହିଥିଲା ଯେ,ଦାଉଦ୍ ହୃଦଘାତରେ ପ୍ରାଣ ହରାଇଛି । ସେତେବେଳେ କୁହାଯାଇଥିଲା ଯେ, ଦାଉଦକୁ କରାଚୀର ଆଗା ଖାନ୍ ହସ୍ପିଟାଲକୁ ନିଆଯାଇଥିଲା କିନ୍ତୁ ସେଠାରେ ସେ ପ୍ରାଣ ହରାଇଥିଲା । ତେବେ ପରେ ସେହି ଖବର ମିଛ ଥିଲା ବୋଲି ଜଣା ପଡିଥିଲା ।

ଦାଉଦର ମୃତ୍ୟୁକୁ ନେଇ ଆଉ ଗୋଟିଏ ଖବର ମଧ୍ୟ କିଛି ବର୍ଷ ତଳେ ଆସିଥିଲା । କରାଚୀରେ ୨୪ ଘଣ୍ଟା ପାକ୍ ସେନା ସୁରକ୍ଷା ଘେର ମଧ୍ୟରେ ରହୁଥିବା ଦାଉଦର ଘର ଉପରେ ବେଲୁଚ୍ ଜାତିୟତାବାଦୀ ଆକ୍ରମଣ କରି ତାକୁ ହତ୍ୟା କରିଥିଲେ ବୋଲି ସେତେବେଳେ କୁହାଯାଇଥିଲା  । କିନ୍ତୁ ପରେ ତାହା ମିଛ ବୋଲି ଜଣା ପଡିଥିଲା । ସେହିଭଳି ଦାଉଦର ସାନ ଭାଇ ଅନିସ୍ ଇବ୍ରାହିମ ଓ ମୁଖ୍ୟ ସେନପତି ଛୋଟା ସକିଲ ମଧ୍ୟରେ ସଂଘର୍ଷରେ ଦାଉଦ୍ ବଳି ପଡିଥିବା ଖବର ମଧ୍ୟ ମଝିରେ ଆସିଥିଲା । ଏମିତି ମଧ୍ୟ ଖବର ଆସିଥିଲା ଯେ, ଦାଉଦ ରୋଗରେ ପଡି ମରିଯାଇଛି । ତେଣୁ କିଛି ଦିନ ତଳେ ଯଦି ଦାଉଦ୍ ରିଟର୍ଣ୍ଣ ମାରେ ତେବେ ଆଶ୍ଚର୍ଯ୍ୟ ହେବାର କିଛି ନାହିଁ ।

ଭାରତର ପବ୍ଲିକ୍ ଏନିମି ନମ୍ବର ୱାନ,ଆମେରିକାର ଗ୍ଲୋବାଲ ଜିହାଦୀ

ଦାଉଦ ଇବ୍ରାହିମ୍ କିଏ ? ପାବ୍ଲୋ ଏସ୍କୋବାର ପରେ ଦାଉଦ୍ ହେଉଛି ବିଶ୍ୱର ସବୁଠୁ ବଡ ଡ୍ରଗ୍ ମାଫିଆ ବୋଲି କୁହଯାଏ । ଭାରତ ନଜରରେ ସେ ହେଉଛି ଜଣେ ଆତଙ୍କବାଦୀ । ଯିଏ ୧୯୯୩ର ବମ୍ବେ ବ୍ଲାଷ୍ଟ ଫଛରେ ଥିଲା । ୧୯୯୩ର ସେହି ସିରିଜ୍ ବିସ୍ଫୋରଣରେ ୨୫୦ରୁ ଅଧିକ ପ୍ରାଣ ହରାଇଥିଲେ । ଭାରତ ପାଇଁ ଦାଉଦ୍ ଯଦି ପବ୍ଲିକ୍ ଏନିମି ନମ୍ବର ୱାନ୍ ତେବେ ଆମେରିକା ପାଇଁ ସିଏ ହେଉଛି ଗ୍ଲୋବାଲ ଜିହାଦୀ । ୨୦୦୩ ମସିହାରେ ଆମେରିକାର ଷ୍ଟେଟ୍ ଡିପାର୍ଟମେଣ୍ଟ୍ ଦାଉଦକୁ ଗ୍ଲୋବାଲ ଜିହାଦୀ ଭାବେ ଘୋଷଣା କରିଥିଲା । ଏମିତି କରି ଆମେରିକାରେ ଥିବା ଦାଉଦର ସମ୍ପତିକୁ ବ୍ୟଜାପ୍ତି କରିବା ଥିଲା ଆମେରିକାର ଲକ୍ଷ୍ୟ । ୟୁରୋପ ଓ ଆମେରିକାକୁ ଯାଉଥିବା ଡ୍ରାଗ୍ସର ବଡ ଭାଗର ସପ୍ଲାୟର ହେଉଛି ଦାଉଦ୍ ।

ଯାହାର ସେବାର ପାକ୍ ସେନା,ସିଏ ହେଉଛି ଦାଉଦ୍

ଏ ପୋଟ୍ରେଟ୍ ଅଫ୍ ଡନ୍ । ଇଏ ହେଉଛି ଜଣେ ପାକିସ୍ତାନୀ ସାମ୍ବାଦିକଙ୍କ ଦ୍ୱାରା ଦାଉଦ୍ ଉପରେ ଲେଖାଯାଇଥିବା ଏକ ପୁସ୍ତକ । ଏଥିରେ କୁହାଯାଇଛି ଯେ, ଦାଉଦ୍ କରାଚୀର ଆର୍ମୀ ଏରିଆରେ ଥିବା ଏକ ବିଶାଳ ଦୁର୍ଗରେ ରୁହେ । ଯାହାର ସୁରକ୍ଷା ଦାୟିତ୍ୱରେ ଅଛି ପାକ୍ ସେନା । ଦାଉଦର ସେବା କରିବାକୁ ପାକ୍ ଆର୍ମି ଅଫିସର ନିଜ ଭାଗ୍ୟ ମନେ କରନ୍ତି । ସେମାନେ ଦାଉଦର ବ୍ୟକ୍ତିଗତ କାମ କରିବାରେ ଆଗ୍ରହ ରଖିଥାନ୍ତି କାରଣ ସେଥିପାଇଁ ଦାଉଦ ଭଲ ପେମେଣ୍ଟ୍ କରିଥାଏ ।

ଲାଇଫ୍ କିଙ୍ଗ୍ ସାଇଜ୍

ଦାଉଦ୍ ରାଜକୀୟ ଜୀବନ ବଂଚିବାକୁ ଭଲ ପାଏ । ତା’ର ଦିନ ଆରମ୍ଭ ହୁଏ ଦି’ପହର ଗୋଟାଏରେ । ନିଜ ଘର ଲନରେ ସେ ଆଗରୁ କ୍ରିକେଟ୍ ଖେଳୁଥିଲା । ସଂଧ୍ୟା ସମୟରେ ସେ ନିଜ ସୁରକ୍ଷାକର୍ମୀଙ୍କ ସହ କରାଚୀରେ ଥିବା ତାର ଅନେକ ସୁରକ୍ଷିତ ଆଡ୍ଡା ମଧ୍ୟରୁ ଗୋଟିକକୁ ଯାଇଥାଏ । ଯେଉଁଠି ନାଚଗୀତ ଓ ଜୁଆ ଖେଳର ଆସର ଜମେ । କୁହାଯାଏ ଯେ,କରାଚୀର ନାମିଦାମୀ କଲଗର୍ଲ ଏଠାକୁ ଆସିଥାନ୍ତି ।

ଅଲକାଏଦା ସହ ସମ୍ପର୍କ

ଦାଉଦ୍ ଇବ୍ରାହିମର ଅଲକାଏଦା ସହ ସମ୍ପର୍କ ରହିଛି । ତାଲିବାନ ମାଧ୍ୟମରେ ଦାଉଦ୍ ଅଲ କାଏଦା ଟପ୍ ଲିଡରସିପ୍ ସଂପର୍କରେ ଆସିଥିଲା । ୧୯୯୬ରେ ଦାଉଦ୍ ପ୍ରଥମ ଥର ପାଇଁ ଆଇଏସଆଇ ସୁରକ୍ଷାଘେରରେ ଆଫଗାନିସ୍ତାନ ଯାଇଥିଲା । ତା’ପରେ ସେ ତାଲିବାନ ସହ ନିୟମିତ ସଂପର୍କରେ ରହିଥିଲା । ଅଲ କାଏଦା ଆଫଗାନିସ୍ତାନ ଆସିବା ପରେ ଦାଉଦ୍ ସିଣ୍ଡିକେଟ୍ ସହ ଗ୍ଲୋବାଲ ଆତଙ୍କବାଦୀଙ୍କ ମେଣ୍ଟ୍ ହୋଇଥିଲା । ତାଞ୍ଜାନାଇଟ୍ ନାମକ ମୁଲ୍ୟବାନ ପଥର ସ୍ମଗ୍ଲିଂ ଜରିଆରେ ଅଲ କାଏଦା ନିଜ ଆତଙ୍କ ପ୍ରୋଜେକ୍ଟ ପାଇଁ ଫଣ୍ଡ୍ ଯୋଗାଡ କରିବାକୁ ଚାହୁଁଥିଲା । ତେଣୁ ସେମାନେ ଦାଉଦ୍ ଦୁଆରେ ପହଞ୍ଚିଥିଲେ । କାରଣ ଦାଉଦ ନେଟୱର୍କ ପୁରା ବିଶ୍ୱରେ ବିସ୍ତାରିତ ।

ଦାଉଦ୍, ବଲିଉଡ୍ ଓ ଡି-କମ୍ପାନୀ

ଦାଉଦର ପସନ୍ଦର ମଦ ହେଉଛି ଜନି ୱାକର ବ୍ଲାକ ଲେବଲ । ସେ ବ୍ଲାକ୍ ଲେବଲକୁ ଯେତିକି ଭଲ ପାଏ ବଲିଉଡ୍ ପ୍ରତି ମଧ୍ୟ ତା’ର ଦୁର୍ବଳତା ସେତିକି । ୧୯୯୦ ଦଶକ ଶେଷ ପର୍ଯ୍ୟନ୍ତ ଦାଉଦର ବଲିଉଡ୍ ଉପରେ ଏକାଧିପତ୍ୟ ଥିଲା । ଫିଲ୍ମ ଫାଇନାନ୍ସ ଜରିଆରେ ସେ ନିଜ କଳା ଟଙ୍କାକୁ ଧଳା କରୁଥିଲା । ଡି-କମ୍ପାନୀ ସେ ସମୟରେ କିଏ କେଉଁ ଫିଲ୍ମରେ ହିରୋ ହେବ,କିଏ ହିରୋଇନ୍ ହେବ ତାହା ନିର୍ଦ୍ଧାରଣ କରୁଥିଲା । ବିଗତ ଦିନର ନାୟୀକା ମନ୍ଦାକିନୀଙ୍କ ସହ ଦାଉଦର ସମ୍ପର୍କ ଥିଲା ବୋଲି ମିଡିଆ ଦାବି କରେ । ଏହ ମଧ୍ୟ କୁହାଯାଏ ଯେ, ଦାଉଦ୍ ତାର ହାରମକୁ ବଲିଉଡ୍ ହିରୋଇନଙ୍କୁ ନିମନ୍ତ୍ରଣ କରିଥାଏ ।

ଦାଉଦର ଉତ୍ତରାଧିକାରୀ କିଏ ?

ଦାଉଦ୍ ବୁଢା ହୋଇ ଗଲାଣି । ୨୮ ବର୍ଷ ତଳେ ମୁମ୍ବାଇ ସିରିଜ୍ ବ୍ଲାଷ୍ଟ୍ ତାକୁ ମୁମ୍ବାଇଠାରୁ ଦୂର କରିଦେଇଥିଲା । କିନ୍ତୁ ତା’ର ମୁଖ୍ୟ ବ୍ୟବସାୟୀକ ଇଣ୍ଟ୍ରେଷ୍ଟ ହେଉଛି ମୁମ୍ବାଇ । ମୁମ୍ବାଇ ଅଣ୍ଡରୱାର୍ଲଡ ଉପରେ ୧୯୮୦ ଦଶକ ଆରମ୍ଭରୁ ଦାଉଦ୍ ରାଜ୍ କରି ଆସୁଛି । ଏହା ଭିତରେ ତାକୁ ପୁରୁଣା ସାଥୀ ଛୋଟା ରାଜନ ଓ ଡାଡି ଓରଫ ଅରୁଣ ଗୱାଲୀ ଚ୍ୟାଲେଞ୍ଜ କରିଛନ୍ତି । କିନ୍ତୁ ଦାଉଦକୁ କେହି ତା’ସ୍ଥାନରୁ ହଟାଇ ପାରିନାହାନ୍ତି । ଛୋଟା ରାଜନ ଜେଲରେ ,ଗୱାଲୀ ନିଷ୍କ୍ରିୟ କିନ୍ତୁ କରାଚୀରୁ ଦାଉଦ୍ ଏବେବି ରାଜ୍ କରୁଛି । ତେବେ ପ୍ରଶ୍ନ ହେଉଛି ଦାଉଦ୍ ପରେ ଡି-କମ୍ପାନୀର ମଙ୍ଗ କିଏ ଧରିବ ? ଦୁଇଟି ନାଁ । ଗୋଟିଏ ହେଉଛି ପୁରୁଣା ବିଶ୍ୱସ୍ତ,ମୁଖ୍ୟ ସେନାପତି ଛୋଟା ସକିଲ ଓ ଅନ୍ୟ ଜଣକ ହେଉଛି ସାନ ଭାଇ ଅନିସ ଇବ୍ରାହିମ୍ । ତେବେ ଦୁଇ ଜଣଙ୍କ ମଧ୍ୟରେ ଅହି ନକୁଳ ସମ୍ପର୍କ ଥିବା କୁହାଯାଉଛି । କେଇ ମାସ ତଳେ ଖବର ଆସିଥିଲା ଯେ, ଛୋଟା ସକିଲକୁ ଅନିସ ଆଦେଶରେ ହତ୍ୟା କରାଯାଇଛି । ଏମିତିରେ ଡି-କମ୍ପାନୀକୁ କିଏ ଟେକ୍ ଓଭର କରିବ ତାହା ଗୋଟିଏ ବଡ ପ୍ରଶ୍ନ । କିନ୍ତୁ ଯେଉଁ ପ୍ରଶ୍ନକୁ ନେଇ କୌଣସି ସନ୍ଦେହ ନାହିଁ ତାହା ହେଉଛି ଡି-କମ୍ପାନୀ ଦୁର୍ବଳ ହେବା ଭାରତ ପାଇଁ ଭଲ ଖବର ।

ନୂଆଦିଲ୍ଲୀ: କରୋନା ସଙ୍କଟ ଯୋଗୁଁ ଅନେକ ଲୋକଙ୍କ ରୋଜଗାର ଠପ୍‌ ହେବା ସହ ଚାକିରି କ୍ଷେତ୍ର ମଧ୍ୟ ପ୍ରଭାବିତ ହୋଇଛି । ଏଭଳି ପରିସ୍ଥିତିରେ ଯେଉଁମାନେ ବ୍ୟାଙ୍କରୁ ଋଣ ନେଇଥିଲେ ସେହିମାନେ ଅଧିକ ହଇରାଣ ହୋଇଛନ୍ତି । ତେବେ ରୋଜଗାର ଠପ୍‌ ହୋଇଯାଇଥିବା ବେଳେ ଋଣ କରିିଥିବା ଲୋକମାନେ କିସ୍ତି ସୁଝିବେ କେମିତି ? କିସ୍ତି ସୁଝିବା ତାଙ୍କ ପାଇଁ ଏକ ବଡ଼ ସମସ୍ୟା ପାଲଟିଛି ।

ମୋରେଟୋରିୟମ୍‌ ସୁବିଧା

ତେବେ ରିଜର୍ଭ ବ୍ୟାଙ୍କର ଅନୁରୋଧ କ୍ରମେ ଗ୍ରାହକମାନଙ୍କୁ ବ୍ୟାଙ୍କ ପକ୍ଷରୁ ମୋରେଟୋରିୟମ୍‌ ସୁବିଧା ଦିଆଯାଉଛି । ଏହି ସୁବିଧା କାରଣରୁ ଋଣ ନେଇଥିବା ବ୍ୟକ୍ତି କିସ୍ତି ବିଳମ୍ବରେ ଦେଇପାରିବ ବା କିସ୍ତି ଟାଳିବାରେ ସକ୍ଷମ ହେବ ।

ମାର୍ଚ୍ଚରୁ ଆରମ୍ଭ ହୋଇଥିବା ଏହି ସୁବିଧାରେ ଯୋଡ଼ିହେବା ପାଇଁ ୩୧ ଅଗଷ୍ଟ ପର୍ଯ୍ୟନ୍ତ ସମୟ ଦିଆଯାଇଛି । ଯଦି ଆପଣ ମାର୍ଚ୍ଚ ମାସରୁ ଏହି ସୁବିଧା ନେଉଛନ୍ତି, ତେବେ ଆପଣ ଏହାକୁ ଅଗଷ୍ଟ ୩୧ ପର୍ଯ୍ୟନ୍ତ ବୃଦ୍ଧି କରିପାରିବେ । ଏହାର ଅର୍ଥ ହେଉଛି ଅଗଷ୍ଟ ୩୧ ପର୍ଯ୍ୟନ୍ତ ଆପଣଙ୍କୁ କିସ୍ତି ଦେବାକୁ ପଡିବ ନାହିଁ । ତେବେ ଏହାର ଅର୍ଥ ନୁହେଁ ଯେ, ଆପଣଙ୍କର କିସ୍ତି ଛାଡ଼ କରାଗଲା ।

ତେବେ ସବୁଠାରୁ ବଡ଼ କଥା ହେଲା ଋଣ ଧାରକଙ୍କୁ ମାର୍ଚ୍ଚରୁ ଅଗଷ୍ଟ ପର୍ଯ୍ୟନ୍ତ ବାକିଥିବା କିସ୍ତି ଦେବା ସହ ଅଧିକ ସୁଧ ଦେବାକୁ ପଡ଼ିବ ।

ମନେକର ସଚିନ୍ ନାମକ ଜଣେ ବ୍ୟକ୍ତି ଏସବିଆଇରୁ ୩୦ ଲକ୍ଷ ଟଙ୍କାର ଗୃହ ଋଣ ନେଇଛନ୍ତି ଏବଂ ୧୫ ବର୍ଷର କିସ୍ତି ବାକି ଅଛି । ଏଭଳି ସ୍ଥିତିରେ ଯଦି ସଚିନ୍ ମାର୍ଚ୍ଚରୁ ଅଗଷ୍ଟ ପର୍ଯ୍ୟନ୍ତ ଏହି ମୋରାଟୋରିୟମ୍‌ ସୁବିଧା ନେଉଛନ୍ତି ତେବେ ପରେ ତାଙ୍କୁ ୪.୫୪ ଲକ୍ଷ ଟଙ୍କାର ଅତିରିକ୍ତ ସୁଧ ଦେବାକୁ ପଡ଼ିବ । ଏହା ବ୍ୟାଙ୍କର ୧୬ଟି କିସ୍ତି ସହ ସମାନ ।

ସେହିଭଳି ଧରାଯାଉ କୁନ୍ଦନ ନାମକ ବ୍ୟକ୍ତି ଏସବିଆଇରୁ ୬ ଲକ୍ଷ ଟଙ୍କା ଅଟୋ ଋଣ ନେଇଛନ୍ତି । ତାଙ୍କର ୫୪ଟି କିସ୍ତି ବାକି ରହିଛି । ଏଭଳି ସ୍ଥିତିରେ ଯଦି କୁନ୍ଦନ ୬ ମାସର ଏହି ମୋରାଟୋରିୟମ ସୁବିଧା ନେଉଛନ୍ତି ତେବେ, ତାଙ୍କୁ ଅତିରିକ୍ତ ୩୬ ହଜାର ଟଙ୍କା ଦେବାକୁ ପଡିବ । କୁନ୍ଦନ ଏହାକୁ କିସ୍ତି ଭାବରେ ଦେବାକୁ ଚାହିଁବେ, ତେବେ ତାଙ୍କୁ ତିନୋଟି ଅତିରିକ୍ତ କିସ୍ତି ଦେବାକୁ ପଡିବ ।

ତେବେ ଏହା ହେଉଛି କେବଳ ଉଦାହରଣ । ବାସ୍ତବରେ ବ୍ୟାଙ୍କର ଋଣ ଓ ଅବଧି ଅନୁସାରେ ଆପଣଙ୍କ ଉପରେ ବୋଝ ବଢ଼ି ଚାଲିବ ।

ମୁମ୍ୱାଇ: ଦେଶରେ ବିଦେଶ ପୁଞ୍ଜିର ଭଣ୍ଡାର ବା ଫରେକ୍ସ ରିଜର୍ଭ ମଇ ମାସ ଶେଷ ସପ୍ତାହ ଅର୍ଥାତ ୨୯ ମଇ ସୁଦ୍ଧା ୩.୪୩ ଅରବ ଡଲାରର ବୃଦ୍ଧି ହୋଇଛି ।  ଏଥିସହିତ ୪୯୩.୪୮ ଅରବ ଡଲାର ଅର୍ଥାତ (୩୭ ଲକ୍ଷ କୋଟି ଟଙ୍କା)ର ରେକର୍ଡ ସ୍ତରରେ ପହଞ୍ଚିଛି । ବିଦେଶୀ ମୁଦ୍ରାରେ ବୃଦ୍ଧି ଯୋଗୁଁ ପୁଞ୍ଜି ଭଣ୍ଡାରରେ ରେକର୍ଡ ବୃଦ୍ଧି ଘଟିଛି । ଏ ନେଇ ଶୁକ୍ରବାର ଭାରତୀୟ ରିଜର୍ଭ ବ୍ୟାଙ୍କ ପକ୍ଷରୁ ସୂଚନା ଦେଇଛନ୍ତି । ବିଦେଶୀ ପୁଞ୍ଜି ଭଣ୍ଡାରକୁ ଦେଶର ଅର୍ଥବ୍ୟବସ୍ଥାର ମଜବୁତ ପ୍ରତୀକଭାବେ ଗ୍ରହଣ କରାଯାଏ । ଗତ ସପ୍ତାହରେ ୩ ଅରବ ଡଲାରର ବୃଦ୍ଧି ସହିତ ୪୯୦.୦୪୪ ଅରବ ଡଲାରରେ ପହଞ୍ଚିଛି । ଆରବିଆଇର ଏହି ସଂଖ୍ୟା ଅନୁଯାୟୀ ୨୯ ମଇ ସପ୍ତାହ ଶେଷରେ ମୋଟ ରିଜର୍ଭର ସବୁଠାରୁ ଗୁରୁତ୍ୱପୂର୍ଣ୍ଣ ଅଂଶ ଅର୍ଥାତ ବିଦେଶୀ ମୁଦ୍ରା ୩.୫୦ ଅରବ ଡଲାରକୁ ବୃଦ୍ଧି ଘଟି ୪୫୫.୨୧ ଡଲାରରେ ପହଞ୍ଚିଛି ।  ସୂଚନା ଯୋଗ୍ୟ ଗତ ଅପ୍ରେଲ ଶେଷ ସପ୍ତାହରେ ୧୧୩ ମିଲିୟନ ଡଲାରର ବିଦେଶ ପୁଞ୍ଜି ହ୍ରାସ ହୋଇଥିବା ବେଳେ ମଇ ମାସରେ ଏଥିରେ ବୃଦ୍ଧି ଘଟିଛି । ଯାହା ଅର୍ଥନୀତି ପାଇଁ ଏକ ଭଲ ଖବର ।

ନୂଆଦିଲ୍ଲୀ: ଭାରତ-ଚୀନ୍ ମଧ୍ୟରେ ଚାଲିଥିବା ସୀମା ବିବାଦକୁ ନେଇ କମାଣ୍ଡର ସ୍ତରୀୟ ଆଲୋଚନା ଚାଲିଛି । ହେଲେ ଦୁଗ୍ଧଜାତ ଦ୍ରବ୍ୟ ପ୍ରସ୍ତୁତ କରିବାରେ ସାରା ବିଶ୍ୱରେ ନିଜକୁ ପରିଚିତ କରିଥିବା ଅମୁଲର ଟ୍ୱିଟର ହ୍ୟାଣ୍ଡେଲକୁ ପ୍ରଥମେ ଡିଆକ୍ଟିଭ ଓ ପରେ ପୁଣି ଆକ୍ଟିଭ କରି ବିବାଦ ଭିତରକୁ ଆସିଛି ଟ୍ୱିଟର ।   ଅମୁଲ ପକ୍ଷରୁ ଏକ ପୋଷ୍ଟ କରାଯାଇଥିଲା ଯେଉଁଥିରେ ଲେଖାଥିଲା, ‘ଏକ୍‌ଜିଟ୍‌ ଡ୍ରାଗନ୍’ ବା ଡ୍ରାଗନ୍‌ ଛାଡ଼ । ଏହି ପୋଷ୍ଟ କରିବା ପରେ ଟ୍ୱିଟର୍‌ ପକ୍ଷରୁ ଅମୁଲ କମ୍ପାନୀର ଆକାଉଣ୍ଟକୁ ବ୍ଲକ୍‌ କରି ଦିଆଯାଇଥିଲା ।

ତେବେ ଅମୁଲର ଟ୍ୱିଟର ହ୍ୟାଣ୍ଡେଲକୁ ବ୍ଲକ୍‌ କରାଯିବା ପରେ ଲୋକମାନେ ଏହାର ଘୋର ବିରୋଧ କରିଥିଲେ । ସୋସିଆଲ ସାଇଟ୍‌ରେ ଲୋକମାନେ ଅନେକ ପ୍ରକାରର ଫଟୋ, ଭିଡିଓ ଏବଂ ମେସେଜ୍‌ ଲେଖି ଆକାଉଣ୍ଟକୁ ଆକ୍ଟିଭ୍‌ କରିବା ପାଇଁ ଦାବି କରିଥିଲେ ।

ଅମୁଲ ପକ୍ଷରୁ ଏହି ପୋଷ୍ଟ କରାଯାଇଥିଲା…

ଅମୁଲ ପାକ୍ଷରୁ ଚୀନ୍‌ର ଡ୍ରାଗନ୍‌କୁ ଛାଡ଼ (ଏକ୍‌ଜିଟ୍‌ ଦ ଡ୍ରାଗନ୍‌) ବୋଲି ଏକ ପୋଷ୍ଟ କରାଯାଇଥିଲା । ଯାହା ଉଦ୍ଦେଶ୍ୟ ଥିଳା ଚାଇନା ପ୍ରଡକ୍ଟକୁ ବର୍ଜନ କରନ୍ତୁ । ଏହା ସହ ଇଂରାଜୀରେ ମଧ୍ୟ ଏକ କ୍ୟାପ୍‌ସନ୍‌ ଲେଖିଥିଲା ଯେ, ବୟ କଟ୍‌ ଦ ଚାଇଟା ପ୍ରଡକ୍ଟ….

Regarding controversy on Twitter on Amul's Buttergirl topic 'Exit the Dragon'… Our account was blocked on June 4. Following some protocols, it was reactivated. We've asked Twitter why account was blocked, but haven't received formal reply yet: RS Sodhi, Managing Director, Amul pic.twitter.com/CL0xcu9WrR

— ANI (@ANI) June 6, 2020

ଚୀନ୍ ବିରୋଧରେ ଆମୁଲ ପ୍ରଚାର କରିଥିଲା

ଅମୁଲ୍‌ର ପୋଷ୍ଟରେ, ଆଇକନିକ ଅମୁଲ ଗାର୍ଲ ଏକ ଡ୍ରାଗନ୍ ସହିତ ଯୁଦ୍ଧ କରି ନିଜ ଦେଶକୁ ବଞ୍ଚାଇବା ପାଇଁ ଚାଷ୍ଟା କରୁଥିବା ଦେଖାଯାଇଛି । ଖାଲି ସେତିକି ନୁହେଁ ଏହି ପୋଷ୍ଟରେ ଚାଇନାର ଭିଡିଓ ସେୟାରିଂ ଆପ୍‌ ଟିକ୍‌ଟକ୍‌ର ଲୋଗୋ ମଧ୍ୟ ରହିଥିବା ଦେଖାଯାଇଛି । ସବୁଠାରୁ ବଡ଼ କଥା ହେଲା ଏହି ପୋଷ୍ଟରେ ବଡ ଅକ୍ଷରରେ ଲେଖାଯାଇଛି, ଅମୁଲ ହେଉଛି ‘ମେଡ୍ ଇନ୍ ଇଣ୍ଡିଆ’ ।

ଏଥି ସହିତ, ଏହି ପ୍ରସଙ୍ଗରେ କମ୍ପାନୀର ପରିଚାଳନା ନିର୍ଦ୍ଦେଶକ ଆର.ଏସ୍ ସୋଡି କହିଛନ୍ତି ଯେ, ଆମୁଲ ଆକାଉଣ୍ଟକୁ ଜୁନ୍ ୪ରେ ବ୍ଲକ୍‌ କରାଯାଇଥିଲା । କିଛି ପ୍ରୋଟୋକଲ୍‌କୁ ଅନୁସରଣ କରିବା ପରେ, ଏହା ପୁନଃ ଆକ୍ଟିଭ୍‌ କରାଯାଇଛି ।

ଟୁଇଟର ଇଣ୍ଡିଆର ଏମ୍‌ଡି ମନୀଷ ମହେଶ୍ୱରୀଙ୍କ ଅନୁଯାୟୀ, ଅମୁଲ ଆକାଉଣ୍ଟ ଟେକ୍ନିକାଲ କାରଣ ଯୋଗୁଁ ଡିଆକ୍ଟିଭ୍‌ ହୋଇଥିଲା, ନାଁ କି କୌଣସି ପ୍ରକାର ଟ୍ୱିଟ କାରଣରୁ ।

#Twitter blocked Amul for few mins for doing this and the Chinese do not even allow twitter in the mainland. How Shameful are Commies of California. pic.twitter.com/WjwZzenWvi

— Archie (@ADenzing) June 6, 2020

ତେବେ ଏହାକୁ ନେଇ ନେଟିଜନ ଟ୍ୱିଟରକୁ ଟାର୍ଗେଟ୍ କରିଛନ୍ତି । ଉପରେ ଦିଆଯାଇଥିବା ଫଟୋରେ ଜଣେ ଟ୍ୱିଟର ୟୁଜର ଲେଖିଛନ୍ତି ଯେ, ଚୀନରେ ଟ୍ୱିଟରକୁ ଅନୁମତି ନାହିଁ କିନ୍ତୁ ଟ୍ୱିଟର ଏହି ପୋଷ୍ଟ୍ ପାଇଁ ଅମୁଲକୁ ବ୍ଲକ୍ କରୁଛି,କାଲିଫର୍ଣ୍ଣିଆର କମ୍ୟୁନିଷ୍ଟ୍ କେତେ ବେଲଜ୍ୟା !

ନୂଆଦିଲ୍ଲୀ: ଗତ ମାସ ଧରି ପୂର୍ବ ଲଦାଖରେ ଭାରତ ଏବଂ ଚୀନ୍ ମଧ୍ୟରେ ଚାଲିଥିବା ସୀମା ବିବାଦକୁ ନେଇ ଶନିବାର ଉଭୟ ଦେଶର ଲେପ୍ଟେନାଣ୍ଟ ଜେନେରାଲ ସ୍ତରୀୟ ଆଲୋଚନା ହୋଇଯାଇଛି । ସରକାରୀ ସୂତ୍ରରୁ ପ୍ରକାଶ ଯେ, ଉଭୟ ଦେଶ ମଧ୍ୟରେ ସୀମାରେ ଲାଗିରହିଥିବା ତିକ୍ତତାକୁ ସମାଧାନ କରିବା ପାଇଁ ସରକାରୀ ସ୍ତରରେ ଏହି ଆଲୋଚନା ଏକ ବଡ଼ ପ୍ରୟାସ ଥିଲା । ଦୁଇ ଦେଶ ମଧ୍ୟରେ ଏବେ ବି ସାମରିକ ଏବଂ କୂଟନୈତିକ ଆଲୋଚନା ଜାରି ରହିଛି ।

ଲେହ ସ୍ଥିତ ୧୪ତମ କୋର୍‌ର ଜେନେରାଲ କମାଣ୍ଡିଂ ଅଫିସର ଲେଫ୍ଟନାଣ୍ଟ ଜେନେରାଲ ହରିନ୍ଦର ସିଂଙ୍କ ଉକ୍ତ ବୈଠକରେ ଭାରତ ପକ୍ଷରୁ ଯାଇଥିବା ପ୍ରତିନିଧି ମଣ୍ଡଳିର ନେତୃତ୍ୱ କରିଥିଲେ । ସେହିଭଳି ଚୀନ୍‌ ପକ୍ଷରୁ ତିବ୍ଦତ ମିଲିଟାରୀ ଡିଷ୍ଟ୍ରିଟ୍‌ର କମାଣ୍ଡର ପ୍ରତିନିତ୍ୱ କରିଥିଲେ ।

ଏହି ବୈଠକ ପୂର୍ବ ଲଦାଖର ଚୀନ୍ ନିକଟକରେ ଥିବା ଲାଇନ୍ ଅଫ୍ ଆକ୍‌ଚୁଆଲ୍ କଣ୍ଟ୍ରୋଲ୍‌ର ମାଲ୍‌ଡୋରେ ହୋଇଥିଲା । ଏହି ସ୍ଥାନରେ ଉଭୟ ଦେଶର ସୀମାକୁ ନେଇ ବିଶେଷ ଆଲୋଚନା କରାଯାଇଥାଏ ।

ଭାରତୀୟ ସେନାର ଜଣେ ଅଧିକାରୀ କହିଛନ୍ତି ଯେ, ଭାରତ-ଚୀନ୍ ସୀମାରେ ସାମ୍ପ୍ରତିକ ପରିସ୍ଥିତିକୁ ଦୃଷ୍ଟିରେ ରଖି ଭାରତ ଏବଂ ଚୀନ୍‌ର ଅଧିକାରୀମାନେ ସାମରିକ ଏବଂ କୂଟନୈତିକ ଆଲୋଚନା ମଧ୍ୟମରେ ଯୋଡ଼ି ହୋଇ ରହିବେ ।

ଶନିବାର ଉଭୟ ପକ୍ଷର ଲେଫ୍ଟନାଣ୍ଟ ଜେନେରାଲ ସ୍ତରୀୟ ଆଲୋଚନା ପୂର୍ବରୁ ଦୁଇ ସେନା ମଧ୍ୟରେ ସ୍ଥାନୀୟ କମାଣ୍ଡର ସ୍ତରରେ ୧୨ ରାଉଣ୍ଡ ଆଲୋଚନା ହୋଇସାରିଛି । ଏହା ବ୍ୟତୀତ ୩ଟି ମେଜର ଜେନେରାଲ ସ୍ତରୀୟ ଆଲୋଚନା ମଧ୍ୟ ହୋଇସାରିଛି ।

ସୂତ୍ରରୁ ପ୍ରକାଶ ଯେ, ଅନେକ ଆଲୋଚନା ପରେ ମଧ୍ୟ କୌଣସି ସମାଧାନ ନବାହାରିବାରୁ, ଏହି ଉଚ୍ଚସ୍ତରୀୟ ଆଲୋଚନା ରଖାଯାଇଥିଲା । ଗୋଟିଏ ଦିନ ପୂର୍ବରୁ ଦୁଇ ଦେଶ ପରସ୍ପରର ସମ୍ବେଦନଶୀଳତା ଏବଂ ଚିନ୍ତାଧାରାକୁ ସମ୍ମାନ ଜଣାଇ ଶାନ୍ତିପୂର୍ଣ୍ଣ ଆଲୋଚନା ମାଧ୍ୟମରେ ନିଜର ‘ମତଭେଦ’କୁ ଦୂର କରିବା ପାଇଁ ସହମତି ପ୍ରକାଶ କରିଥିଲେ ।

ସୂତ୍ରରୁ ପ୍ରକାଶ ଯେ, ଆଲୋଚନା ସମୟରେ ଭାରତୀୟ ପ୍ରତିନିଧି ଦଳ ପୂର୍ବ ଲଦାଖର ଗାଲଭାନ୍ ଘାଟିର, ପାଙ୍ଗୋଙ୍ଗ ସୋ ଏବଂ ଗୋଗ୍ରାଠାରେ ପୂର୍ବ ସ୍ଥିତିର ସୁଧାର ପାଇଁ ଜୋରଦାର ଦାବି କରିବେ ।