ଉତ୍ତରପ୍ରଦେଶ: କରୋନା ପାଇଁ ଅନେକ କିଛି ବିଗିଡ଼ି ଯାଇଛି ସତ, ହେଲେ କିଛି ମଧ୍ୟ ସଜାଡ଼ି ହୋଇଯାଇଛି । ବର୍ଷବର୍ଷ ଧରି ପ୍ରଦୂଷିତ ରହୁଥିବା ପବିତ୍ର ଗଙ୍ଗାରେ ଏବେ କାଚକେନ୍ଦୁ ଭଳି ପାଣି ଦିଶୁଛି । ଲକଡ଼ାଉନ ପାଇଁ ଜନସମାଜ ଘରେ । ଗଙ୍ଗା ଘାଟରେ ଆଉ ଭିଡ଼ ନାହିଁ । କାରଖାନା,ହୋଟେଲ ଓ ଘର ସହିତ ଅନେକ ବ୍ୟବବସାୟିକ ପ୍ରତିଷ୍ଠାନର ଦୂଷିତ ପାଣି ଗଙ୍ଗାକୁ କରିଥିଲା ପ୍ରଦୂଷିତ । ଚିନ୍ତା ଏତେ ମାତ୍ରାରେ ବଢିଥିଲା ଯେ କେନ୍ଦ୍ରସରକାରଙ୍କ ତରଫରୁ ଆରମ୍ଭ ହୋଇଥିଲା ଗଙ୍ଗା ସଫେଇ ଅଭିଯାନ ।

ଏବେ କିନ୍ତୁ କମୁଛି ପ୍ରଦୂଷଣର ମାତ୍ରା । ସଫା ଦିଶୁଛି ପାଣି । ନଦୀରେ ଜାହାଜ, ମାଛଧରା ବୋଟ ଯାଆସ ବନ୍ଦଥିବା ହେତୁ ଡ଼ଲଫିନ କୂଳରେ ଖେଳୁଥିବା ଦେଖିବାକୁ ମିଳୁଛି ।  ସେଥିପାଇଁ ଡଲଫିନ ପ୍ରଜନନ ପ୍ରକ୍ରିୟାରେ ଆସିଛି ବ୍ୟାପକ ପରିବର୍ତ୍ତନ । ଅଧିକ ସଂଖ୍ୟାରେ ବଢିଚାଲିଛି ଡଲଫିନଙ୍କ ସଂଖ୍ୟା ।

ବିଶେଷ କରି ୟୁପି ବର୍ଡର ଚୌସାରୁ କଟିହାର ପର୍ଯ୍ୟନ୍ତ ପରିବ୍ୟାପ୍ତ ଗଙ୍ଗାରେ ବଢିଛି ଡଲଫିନଙ୍କ ସଂଖ୍ୟା । ଜୁଲୋଜିକାଲ ସର୍ଭେ ଅଫ ଇଣ୍ଡିଆର ବୈଜ୍ଞାନିକ ଡାକ୍ତର ଗୋପାଲ ଶର୍ମା କୁହନ୍ତି ଯେ ଯଦି ଏଭଳି ଭାବରେ ଲକଡାଉନ ଜାରି ରହେ ଓ ଗଙ୍ଗାକୁ ଯିବାଆସିବା ୩ମାସ ପର୍ଯ୍ୟନ୍ତ ଲାଗିରହେ ତେବେ ଡଲଫିନଙ୍କ ସଂଖ୍ୟା ୨୦ପ୍ରତିଶତ ବଢିଯିବ । ଡଲଫିନ ମଧୁର ପାଣିରେ ରହିବାକୁ ପସନ୍ଦ କରନ୍ତି, ଏବଂ ପ୍ରଦୂଷିତ ଜଳ ହିଁ ଡଲଫିନ ମୃତ୍ୟୁ ସହ ପ୍ରଜନନ ବାଧକର ମୁଖ୍ୟ କାରଣ । ନଦୀରେ ଛୋଟ ମାଛ ମୃଧ୍ୟ ବଢିଥିବାରୁ ଡଲଫିନଙ୍କ ଖାଦ୍ୟରେ ସମସ୍ୟା ହେଉନାହିଁ ।

୨ବର୍ଷ ପୂର୍ବେ ସରକାରଙ୍କ ତିନି ସଂଗଠନ ତରଫରୁ ହୋଇଥିଲା ଡଲଫିନ ଗଣନା । ୧୮ ନଭେମ୍ବରରୁ ୧୦ ଡିସେମ୍ବର ସୁଦ୍ଧା ହୋଇଥିବା ସର୍ଭେର ରିପୋର୍ଟ ଆଧାରରେ ମୋକାମାରୁ ମନୀହାରୀ ପର୍ଯ୍ୟନ୍ତ ୩୦୦ କିଲୋମିଟର ଇଲାକାରେ ୮୨୫ ଡଲଫିନ ମିଳିଥିଲେ । ପାଟନା ଜୁଲୋଜିକାଲ ସର୍ଭେ ଅଫ ଇଣ୍ଡିଆ, ଭାଗଲପୁର ତିଲକା ମାଝୀ ବିଶ୍ୱବିଦ୍ୟାଳୟ ଏବଂ ଭାରତୀୟ ବନ୍ୟପ୍ରାଣୀ ଟ୍ରଷ୍ଟ ମିଳିତ ହିସାବରେ ଏ ସେର୍ଭେ କରିଥିଲେ । ତେବେ ମହାମାରୀ କରୋନା ଜନସମାଜକୁ ମନେପକାଇଦେଇଛି ଆମର ପ୍ରକୃତି, ପଶୁପକ୍ଷୀ ଓ ଜୀବଜଗତ ପାଇଁ ଅନେକ କର୍ତ୍ତବ୍ୟ ଅଛି । ନିଜ ସ୍ୱାର୍ଥ ପାଇଁ ଆମେ ପ୍ରକୃତିକୁ ଏତେ ମାତ୍ରାରେ ପ୍ରଦୂଷିତ କରିବାର ଆମର କୌଣସି ଅଧିକାର ନାହିଁ ।

ଆଉ ଏକ ରିପୋର୍ଟ ଅନୁଯାୟୀ ଟଙ୍କାଟିଏ ବି ଖର୍ଚ୍ଚ ନକରି ୬୦ ପ୍ରତିଶତ ସ୍ୱଚ୍ଛ ହେଇଯାଇଛି ଯମୁନା ନଦୀର ପାଣି ।

                                                                                                                                                                       ( ସ୍ମୃତିଲଗ୍ନା ନନ୍ଦ)

ନୂଆଦିଲ୍ଲୀ: ପ୍ରଥମେ ନୋ ହେଲମେଟ ନୋ ପେଟ୍ରୋଲ ଆଉ ଏବେ ନୋ ମାସ୍କ ନୋ ପେଟ୍ରୋଲ । ଦିଲ୍ଲୀର ସମସ୍ତ ପେଟ୍ରୋଲ ପମ୍ପରେ ଦେଖିବାକୁ ମିଳିଛି ନୋ ମାସ୍କ ନୋ ପେଟ୍ରୋଲ ପୋଷ୍ଟର । ଲୋକେ କରୋନର କିଭଳି ମୁକାବିଲା କରିପାରିବେ ସେଥି ପାଇଁ ଏଭଳି ନିଷ୍ପତ୍ତି ନିଆଯାଇଛି । ଯେଉଁମାନେ ମାସ୍କ ପିନ୍ଧି ଆସୁ ନାହାଁନ୍ତି ସେମାନଙ୍କୁ ପେଟ୍ରୋଲ ପମ୍ପରୁ ଫେରିବାକୁ ପଡୁଛି ।

ନିଦ ହଜାଇଲାଣି ମହାମାରୀ କରୋନା । ଭୂତାଣୁର ମୁକାବିଲା ପାଇଁ ସାରା ଦେଶରେ ପଡିଛି ତାଲା । ପ୍ରଥମେ ନୋ ହେଲମେଟ ନୋ ପେଟ୍ରୋଲ ଆଉ ଏବେ ନୋ ମାସ୍କ ନୋ ପେଟ୍ରୋଲ । ଦିଲ୍ଲୀର ସମସ୍ତ ପେଟ୍ରୋଲ ପମ୍ପରେ ଦେଖିବାକୁ ମିଳିଛି ନୋ ମାସ୍କ ନୋ ପେଟ୍ରୋଲ ପୋଷ୍ଟର । ଲୋକେ କରୋନର କିଭଳି ମୁକାବିଲା କରିପାରିବେ ସେଥି ପାଇଁ ଏଭଳି ନିଷ୍ପତ୍ତି ନିଆଯାଇଛି । ଦେଶର ସମସ୍ତ ପେଟ୍ରୋଲ ପମ୍ପରେ ଏହି ନିୟମ ଲାଗୁ କରିବା ପାଇଁ ନିର୍ଦ୍ଦେଶ ଦେଇଛି ସର୍ବ ଭାରତୀୟ ପେଟ୍ରୋଲ ଡିଲର ସଂଘ । ଯ଼ଦି କେହି ବିନା ମାସ୍କରେ ପେଟ୍ରୋଲ ପାଇଁ ଆସୁଛନ୍ତି ତେବେ ସେମାନଙ୍କୁ ଫେରାଇ ଦିଆଯାଉଛି । କରୋନାର ମୁକାବିଲା ପାଇଁ ଏଭଳି ପଦକ୍ଷେପ ନିଆଯାଇଥିବା କହଛନ୍ତି ସର୍ବ ଭାରତୀୟ ପେଟ୍ରୋଲ ଡିଲର ସଂଘର ସଭାପତି ଅଜୟ ବନସଲ ।

କେବଳ ନିହାତି ଜରୁରି କାମ ଥିଲେ ବାହାରକୁ ବାହାରୁଛନ୍ତି ଲୋକେ । ଦିଲ୍ଲୀରେ କରୋନା ସ୍ଥିତି ଭୟାନକ ଥିବାରୁ ସରକାର ଅନେକ ପଦକ୍ଷେପ ନେଇଛନ୍ତି । ଏଭଳିକି ସାରା ଦେଶରେ ଆଜିଠୁ କିଛି କଟକଣା ହଟିଥିଲେ ମଧ୍ୟ ଦିଲ୍ଲୀରେ ପୂର୍ବ ପରି ସମସ୍ତ କଟକଣା ବଳବତ୍ତର ରହିଛି । ତେଣୁ ଯେଉଁମାନେ ମାସ୍କ ପିନ୍ଧି ଆସୁ ନାହାଁନ୍ତି ସେମାନଙ୍କୁ ପେଟ୍ରୋଲ ପମ୍ପରୁ ଫେରିବାକୁ ପଡୁଛି ।

କେବଳ ଦିଲ୍ଲୀ ନୁହେଁ ସାରା ଦେଶ ଲଢୁଛି କରୋନା ଲଢେଇ । ସଚେତନ ମାଧ୍ୟମରେ କରୋନାର ମୁକାବିଲା ହୋଇପାରିବ,ଏଥି ପାଇଁ ସଭିଏଁ ମାସ୍କ ବ୍ୟବହାର କରିବା ବାଧ୍ୟତାମୂଳକ ହୋଇଛି ।

ମୁମ୍ବାଇ: କରୋନା ପାଇଁ ସାରା ଦେଶ ଚିନ୍ତାରେ ଥିବା ବେଳେ ମହାରାଷ୍ଟ୍ରରୁ ଆସିଛି  ବର୍ବତାର ଏମିତି କାହାଣୀ ଯାହା ମାନବତାକୁ ଲଜ୍ଜିତ କରିବ ।  ମହାରାଷ୍ଟ୍ରର ପାଲଘର ଜିଲ୍ଲାରେ ଜୁନା ଅଖଡାର ଦୁଇଜଣ ସାଧୁଙ୍କ ସମେତ ତିନି ଜଣଙ୍କୁ ମାଡ ମାରି ହତ୍ୟା କରିବା ଘଟଣାରେ ୧୧୦ ଜଣଙ୍କୁ ଗିରଫ କରାଯାଇଛି। ଗିରଫ ହୋଇଥିବା ସମସ୍ତଙ୍କ ବିରୋଧରେ ଗମ୍ଭୀର ମାମଲା ରୁଜୁ ହୋଇଛି । ଗିରଫ ୧୧୦ ଜଣଙ୍କ ମଧ୍ୟରୁ ୯ ଜଣ ନାବାଳକ । ନାବାଳକଙ୍କୁ ଆଶ୍ରୟ ଗୃହକୁ ପଠାଯାଇଥିବା ବେଳେ ସମସ୍ତ ଅଭିଯୁକ୍ତଙ୍କୁ ଏପ୍ରିଲ ୩୦ ପର୍ଯ୍ୟନ୍ତ ପୋଲିସ ହେପାଜତରେ ରଖାଯାଇଛି । ଏହି ମାମଲା ମହାରାଷ୍ଟ୍ରର ରାଜନୀତି ଉପରେ ପ୍ରଭାବ ପକାଇଛି ।

ସାଧୁମାନଙ୍କ ଉପରେ ବର୍ଷି ପଡ଼ିଲେ ଲୋକେ

ମହାରାଷ୍ଟ୍ରର ପାଲଘରର ଗାଡଚିଞ୍ଚଲେ ଗ୍ରାମରେ ଦୁଇଜଣ ସାଧୁଙ୍କୁ ଅତି ନିର୍ମମ ଭାବେ ପିଟିପିଟି ହତ୍ୟା କରାଯାଇଛି । ଘଟଣା ଦିନ ଦୁଇ ସାଧୁ ମୁମ୍ବାଇରୁ ଗୁଜୁରାଟ  ଯାତ୍ରା କରୁଥିଲେ। ସେହି ସମୟରେ କେହି ଜଣେ ଚୋର ବୋଲି ଗୁଜବ ପ୍ରଚାର କରିଥିଲେ। ଏହା ପରେ, ତାଙ୍କ ଉପରେ ସେଠାରେ ଥିବା ଶତାଧିକ ଲୋକ ଆକ୍ରମଣ କରିଥିଲେ ତେବେ ପୂରା ଘଟଣା ସେଠାରେ ଉପସ୍ଥିତ ଥିବା କିଛି ପୋଲିସ କର୍ମଚାରୀଙ୍କ ସାମ୍ନାରେ ହିଁ ଘଟିଥିଲା। ଅଭିଯୁକ୍ତମାନେ ସାଧୁଙ୍କ ସହ ଡ୍ରାଇଭର ଏବଂ ପୋଲିସ ଉପରେ ମଧ୍ୟ ଆକ୍ରମଣ କରିଥିଲେ। ଏହି ଆକ୍ରମଣ ପରେ ସାଧୁମାନଙ୍କୁ ଡାକ୍ତରଖାନା ନିଆଯାଇଥିଲା । କିନ୍ତୁ ସେଠାରେ ସେମାନଙ୍କୁ ମୃତ ଘୋଷଣା କରାଯାଇଥିଲା।

କେମିତି ହେଲେ ୧୧୦ଲୋକ ଗିରଫ ?

ପାଲଘର ଡିଏମ କହିଛନ୍ତି ଯେ, ଘଟଣାର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି। ଭିଡିଓରେ ଗ୍ରାମବାସୀମାନେ ବାଡ଼ି ଓ ପଥରରେ କାର ଉପରେ ଆକ୍ରମଣ କରୁଥିବା ଦେଖାଯାଇଛି । ଏବଂ ଏହି ଭିଡିଓ ଆଧାରରେ ଏବଂ ଅନୁସନ୍ଧାନ ପରେ ୧୧୦ ଜଣଙ୍କ ବିରୋଧରେ ଏକ ମାମଲା ରୁଜୁ କରାଯାଇ ସମସ୍ତଙ୍କୁ ଗିରଫ କରାଯାଇଥିଲା।

ସାଧୁସନ୍ଥମାନେ NSA ଲଗାଇବାକୁ ଦାବି କରିଛନ୍ତି

ପାଲଘରରେ ସାଧୁଙ୍କ ହତ୍ୟା ପରେ ସନ୍ଥ ସମାଜ ଅତ୍ୟନ୍ତ କ୍ରୋଧିତ ହୋଇଛନ୍ତି । ଏହି ଘଟଣାରେ ଅଖିଲ ଭାରତ ଆଖଡ଼ା ପରିଷଦର ସଭାପତି ମହନ୍ତ ନରେନ୍ଦ୍ର ଗିରି ସରକାରଙ୍କୁ ଚେତାବନୀ ଦେଇଛନ୍ତି ଯେ, ଯଦି ହତ୍ୟାକାରୀଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରା ନ ଯାଏ ତେବେ ମହାରାଷ୍ଟ୍ର ସରକାର ବିରୋଧରେ ଆନ୍ଦୋଳନ ହେବ । ଅନ୍ୟପକ୍ଷରେ ବିଜେପି ସାଂସଦ ସାକ୍ଷୀ ମହାରାଜ ମଧ୍ୟ ଟ୍ୱିଟ୍ କରି ଅଭିଯୁକ୍ତଙ୍କ ଉପରେ ରାସୁକା ଲଗାଇବାକୁ ଦାବି କରିଛନ୍ତି। ଅନ୍ୟଥା, ସାଧୁମାନଙ୍କ କ୍ରୋଧର ସମ୍ମୁଖୀନ ହେବାକୁ ସେ ମହାରାଷ୍ଟ୍ର ସରକାରଙ୍କୁ ମଧ୍ୟ ଚେତାବନୀ ଦେଇଛନ୍ତି।

‘ଲଜ୍ଜାଜନକ, ଭୟଙ୍କର ଏବଂ ବର୍ବର ଘଟଣା’

ତେବେ ଏହି ଘଟଣାକୁ ନେଇ ରାଜନୀତି ଆରମ୍ଭ ହୋଇଛି। ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍ କହିଛନ୍ତି ଯେ, ପାଲଘର ମାଓବାଦୀ ହିଂସା  ଘଟଣାର ଭିଡିଓ ଆଶ୍ଚର୍ଯ୍ୟଜନକ ଏବଂ ଅମାନବୀୟ । ଏପରି ବିପଦ ସମୟରେ ଏଭଳି ଘଟଣା ଆହୁରି ବିଚଳିତ ହୋଇପଡ଼ିଛି । ପୂର୍ବତନ ଭାରତୀୟ କ୍ରିକେଟର ଇରଫାନ ପଠାନ ମଧ୍ୟ ଏହି ଘଟଣାକୁ ଲଜ୍ଜାଜନକ, ଭୟଙ୍କର ଏବଂ ବର୍ବର ବୋଲି ବର୍ଣ୍ଣନା କରିଛନ୍ତି।