ନୂଆପଡା: କରୋନା ମାଡରେ ଦୁନିଆ ଠପ୍ । ଲୋକଙ୍କ ପାଖରେ କାମ ନାହିଁ । ମୁଠାଏ ଦାନା ପାଇଁ ହନ୍ତସନ୍ତ ହେଉଛନ୍ତି ଖଟିକିଆ,ନିରାଶ୍ରୟ । ଏମିତିରେ ସରକାର ସେମାନଙ୍କ ଆକାଉଣ୍ଟକୁ କିଛି ଟଙ୍କା ପଠାଉଛନ୍ତି । ମହଙ୍ଗା ବଜାରରେ ସେଇ ଟଙ୍କାର ମୂଲ୍ୟ କିଛି ନାହିଁ । କିନ୍ତୁ ବୁଡିଯାଉଥିବା ଲୋକ ପାଇଁ କୁଟାଖିଅ ଆଶ୍ରା ଭଳି ଅନେକ ଏହି ଟଙ୍କା ଉପରେ ନିର୍ଭରଶୀଳ । କିନ୍ତୁ ବ୍ୟାଙ୍କରୁ ଟଙ୍କା ନେବା ପାଇଁ ସେମାନଙ୍କୁ କରିବାକୁ ପଡୁଛି ସଂଘର୍ଷ । ସେହିଭଳି ଗୋଟିଏ ହୃଦୟ ବିଦାରକ ଖବର ଆସିଛି ନୂଆପଡା ଜିଲ୍ଲାରେ ଖଡ଼ିଆଲ ବରଗାଁରୁ । ଏମିତି ଦୃଷ୍ୟ ଯାହାକୁ ଦେଖିଲେ ଆପଣଙ୍କ ହୃଦୟ ଖିନଭିନ୍ ହୋଇଯିବ । ଆପଣ ନିଜକୁ ନିଜେ ପ୍ରଶ୍ନ କରିବେ ଯେ, ମାନବତା କ’ଣ ସତରେ ବଂଚିଛି ନା ଭୂତାଣୁ ଭୟରେ ମାନବତା ମଧ୍ୟ ଲକଡାଉନ୍ ଭିତରେ ଅଛି?

 ସରକାରଙ୍କ ନିର୍ଦ୍ଦେଶ ଅଛି ବରିଷ୍ଠ ନାଗରିକଙ୍କୁ ଘର ଦୁଆର ମୁହଁରେ ବ୍ୟାଙ୍କ ସେବା ଯୋଗାଇ ଦେବେ । କିନ୍ତୁ ଲାଗୁଛି ସେସବୁ ଫାଇଲରେ ଅଛି । ନାଲିଫିତା ଟପି ତାହା ବରିଷ୍ଠ ନାଗରିକଙ୍କ ପାଖରେ ପହଂଚିନାହିଁ କିମ୍ବା ତାକୁ ପହଂଚାଇବା ନିଜ କାମ ବୋଲି ଭାବୁନାହାନ୍ତି ବ୍ୟାଙ୍କ କର୍ତ୍ତୁପକ୍ଷ । ଯଦି ସେମିତି ହୋଇନଥାନ୍ତା ତେବେ ଖଡିଆଳ ବରଗାଁର ୧୨୦ ବର୍ଷୀୟ ବୃଦ୍ଧାଙ୍କୁ ଟଙ୍କା ୧୫ଶହ ପାଇଁ ଏମିତି ସଂଘର୍ଷ କରିବାକୁ ପଡିନଥାନ୍ତା । ଜନଧନ ଆକାଉଣ୍ଟରେ ଆସିଥିବା ୧୫ଶହ ଟଙ୍କା ପାଇଁ ତାଙ୍କୁ ଖଟିଆରେ ଶୁଆଇ ବ୍ୟାଙ୍କକୁ ଟାଣିଟାଣି ନେଇନଥାନ୍ତେ ତାଙ୍କ ଝିଅ ।

ଘଟଣା ହେଉଛି ଏମିତି  । ବରଗାଁର ପୁଞ୍ଜିମତି ଶିଖାଙ୍କ ମା ହେଉଛନ୍ତି ଲବେ ବାଗ । ପୁଞ୍ଜିମତିଙ୍କ ବୟସ ୬୦ ହୋଇଥିବା ବେଳେ ତାଙ୍କ ମା’ଙ୍କ ବୟସ ୧୨୦ ବୋଲି ସେ କୁହାନ୍ତି । ପୁଞ୍ଜିମତି ଓ ତାଙ୍କ ପରିବାରର ଆର୍ଥିକ ଅବସ୍ଥା ସ୍ୱଛଳ ନୁହେଁ । ପୁଞ୍ଜିମତି ଓ ତାଙ୍କ ସ୍ୱାମୀ ବାର୍ଦ୍ଧକ୍ୟ ଭତ୍ତାରେ ଚଳନ୍ତି । ତାଙ୍କ ମା’ ଲବେ ବାଗଙ୍କ ଜନଧନ ଆକାଉଣ୍ଟକୁ ୧୫ଶହ ଟଙ୍କା ଆସିଥିଲା । ଏହି ଟଙ୍କା ପାଇଁ ସେ  ଉତ୍କଳ ଗ୍ରାମୀଣ ବ୍ୟାଙ୍କକୁ ଯାଇଥିଲେ । ବ୍ୟାଙ୍କ କର୍ତ୍ତୁପକ୍ଷ କିନ୍ତୁ ତାଙ୍କୁ ମା’ଙ୍କୁ ନେଇ ବ୍ୟାଙ୍କ୍ ଆସିଲେ ଟଙ୍କା ମିଳିବ ବୋଲି ରୋକଠୋକ୍ ଶୁଣାଇ ଦେଇଥିଲେ । ୧୨୦ ବର୍ଷର ବୟସ୍କ ଜଣେ ବ୍ୟକ୍ତି କେମିତି ବ୍ୟାଙ୍କ ଆସିବ ବୋଲି ଝିଅ ପୁଞ୍ଜିମତି  ଯେତେ କହିଥିଲେ ମଧ୍ୟ ବ୍ୟାଙ୍କ ମ୍ୟାନେଜର କିଛି ମଧ୍ୟ ଶୁଣିନଥିଲେ । କୌଣସି ଉପାୟ ନପାଇଁ ପୁଞ୍ଜିମତି ଗାଁ ୱାର୍ଡ ମେମ୍ବର ହୁମାୟୁନ ବାଘେଲଙ୍କୁ ସାହାଯ୍ୟ ପାଇଁ ଅନୁରୋଧ କରିଥିଲେ । ହୁମାୟୁନ ତାଙ୍କ ସହିତ ବ୍ୟାଙ୍କକୁ ଯାଇ ବୃଦ୍ଧାଙ୍କ ଟଙ୍କା ତାଙ୍କ ଝିଅକୁ ଦେବାକୁ ଅନୁରୋଧ କରିଥିଲେ । କିନ୍ତୁ ମ୍ୟାନେଜର ସିଧାସଳଖ ସେପରି ହୋଇ ପାରିବ ନାହିଁ ବୋଲି କହିଥିବା ଅଭିଯୋଗ କରିଛନ୍ତି ପୁଞ୍ଜିମତି । ଅନେକ ଥର ଚେଷ୍ଟା କରିବା ପରେ ସେ ନିଜ ମା’ଙ୍କୁ ବ୍ୟାଙ୍କ ନେବାକୁ ପ୍ରସ୍ତୁତ ହୋଇଥିଲେ । ବ୍ୟାଙ୍କ ଯିବାକୁ ନିଜର କୌଣସି ଯାନବାହାନ ସୁବିଧା ନଥିବାରୁ ଖଟିଆରେ ମା’ଙ୍କୁ ଶୁଆଇ ପୁଞ୍ଜିମତି ବ୍ୟାଙ୍କ ପର୍ଯ୍ୟନ୍ତ ଟାଣି ଟାଣି ନେଇଥିଲେ । ଘରଠାରୁ ୪ଶହ ମିଟର ଦୂରରେ ଥିବା ବ୍ୟାଙ୍କକୁ ପୁଞ୍ଜିମତି ଖଟିଆ ଟାଣିଟାଣି ଯାଇଥିଲେ । ପୁଞ୍ଜିମତିଙ୍କ ବୟସ ୬୦ । ସେ ମଧ୍ୟ ବରିଷ୍ଠ ନାଗରିକ । କିନ୍ତୁ ତାଙ୍କ ଦୟନୀୟ ଅବସ୍ଥା ବ୍ୟାଙ୍କ ମ୍ୟାନେଜରଙ୍କ ଉପରେ କୌଣସି ପ୍ରଭାବ ପକାଇ ନଥିଲା । ଏହାପରେ ତାଙ୍କୁ ଟଙ୍କା ମିଳିଥିଲା ।

ଏହି ଘଟଣା ପ୍ରଚାରିତ ହେବା ପରେ ବ୍ୟାଙ୍କ ମ୍ୟାନେଜର ନିଜ ମୁଣ୍ଡରୁ ଦୋଷ ଛଡାଇବା ପାଇଁ ବୟାନ ଦେଇଛନ୍ତି । କହିଛନ୍ତି ଯେ, ବ୍ୟାଙ୍କ ଭିଡ ଥିଲା ତେଣୁ ତାଙ୍କୁ ସାହାଯ୍ୟ କରି ପାରିନଥିଲୁ । କିନ୍ତୁ ତାଙ୍କର ଏହି କୈଫତ ବ୍ୟାଙ୍କର ଦୋଷକୁ ଘୋଡାଇ ପାରିବ ନାହିଁ । ୧୨୦ ବର୍ଷର ଜଣେ ବୃଦ୍ଧାଙ୍କୁ ୬୦ ବର୍ଷର ଆଉ ଜଣେ ବୃଦ୍ଧା ଖଟିଆରେ ଟାଣିଟାଣି ନେବା ଘଟଣାକୁ ସହଜରେ ସାଧାରଣ ଲୋକ ଗ୍ରହଣ କରୁନାହାନ୍ତି । ଭୂତାଣୁଠାରୁ ବ୍ୟାଙ୍କର ହୃଦୟହୀନତା ବଢିଗଲା ବୋଲି ସାଧାରଣରେ ଆଲୋଚନା ହେଉଛି ।

କୋରାପୁଟ : ବାପା ଛେଉଁଣ୍ଡଠୁ ବଳିଗଲା ଜାତିରେ ମିଶାଇବାର ଚିନ୍ତା । କୋରାପୁଟ ଜିଲ୍ଲା ଜୟପୁର ବଦଳିଗୁଡ଼ାରେ କୁତ୍ସିତ ସାମାଜିକ ପ୍ରଥାର ବିକଳ ଚିତ୍ର । ସବୁ ବେଳେ ସବୁ କ୍ଷେତ୍ରରେ ପ୍ରଥମେ ନାରୀଙ୍କୁ ପ୍ରାଧାନ୍ୟ ଦିଆଯାଉଛି । କିନ୍ତୁ କିଛି ଏମିତି କୁତ୍ସିତ ଚିନ୍ତାଧାରା ଏବେ ବି ଜୀବିତ ଅଛି । ଯେଉଁଠି ବାପାଙ୍କ ଶେଷକୃତ୍ୟ କରିବାରୁ ଝିଅମାନଙ୍କୁ ଲଣ୍ଡା କରାଯାଇଛି ।

ଏଭଳି ନିନ୍ଦନୀୟ ଘଟଣା ଘଟିଛି ବଦଳିଗୁଡା ଗାଁରେ ।  ସୂଚନା ଅନୁଯାୟୀ ଗାଁର ଅର୍ଜୁନ ମାଳୀଙ୍କର ଗତ ୫ ତାରିଖରେ ମୃତ୍ୟୁ ହୋଇଥିଲା । ମାତ୍ର ତାଙ୍କର ପୁଅ ନଥିବାରୁ ଦୁଇ ଝିଅ ଶେଷକୃତ୍ୟ କରିଥିଲେ । ଯାହାକୁ ବିରୋଧ କରିଥିଲା ମାଳି ସମାଜ । ଏପରିକି ଜୋର୍‌ ଜବରଦସ୍ତ ଦୁଇଝିଅଙ୍କୁ ଲଣ୍ଡାକରି ପରେ ଜାତିରେ ମିଶାଇଥିବା ଅଭିଯୋଗ ହୋଇଛି ।

ବାପାଙ୍କ ଶେଷକୃତ୍ୟ କରିବା ସହ ଅନ୍ୟଜାତିର ଲୋକଙ୍କ ଘରେ ଖାଇଥିବାରୁ ଏହି ଦୁଇ ଝିଅଙ୍କୁ ସମାଜର ବଡପଣ୍ଡାମାନେ ଏଭଳି ଦଣ୍ଡ ଦେଇଛନ୍ତି । ଏଦି ଦୁଇ ଝିଅଙ୍କ ସହ ଏଭଳି ଅମାନବୀୟ ବ୍ୟବହାରର ଦୁଇଟି କାରଣ ରହିଛି । ପ୍ରଥମତଃ ସେମାନେ ଝିଅ ହୋଇ କିଭଳି ପିତାଙ୍କ ଶେଷକୃତ୍ୟ କଲେ ତାହା ସମାଜର ବଡପଣ୍ଡାଙ୍କ ପାଇଁ ଅସହନୀୟ ଥିଲା । ଦ୍ୱିତୀୟତଃ,ଏହି ଦୁଇ ଝିଅ ଅନ୍ୟ ଜାତିର ଲୋକଙ୍କ ଘରେ ଭୋଜନ କରିବା ମଧ୍ୟ ଏହି ଅସାମାଜିକ ଲୋକଙ୍କ ନଜରରେ ଦଣ୍ଡନୀୟ ଅପରାଧ ଥିଲା । ତେଣୁ ସେମାନଙ୍କୁ ଲଣ୍ଡା କରି ଜାତିରେ ମିଶାଇବାକୁ ଉଦ୍ୟମ ହୋଇଥିଲା ।

ଏହି ଘଟଣାକୁ ରାଜ୍ୟବ୍ୟାପି ନିନ୍ଦା କରାଯାଉଛି ।  ସ୍ଥାନୀୟ ସରପଞ୍ଚ ଘଟଣାକୁ ନିନ୍ଦା କରିଛନ୍ତି । ସେପଟେ କୋରାପୁଟ ଜିଲ୍ଲା ମାଳି ସମାଜ ପକ୍ଷରୁ ଜୟପୁର ଏସ୍‌ଡିପିଓଙ୍କ ପାଖରେ ଅଭିଯୋଗ କରାଯାଇଛି । ଗୋଟିଏ ପଟେ ଝିଅ ଓ ପୁଅଙ୍କ ମଧ୍ୟରେ ପ୍ରଭେଦ ନକରି ସାମାଜିକ ଭେଦଭାବ ଦୁର କରିବା ପାଇଁ ବିଭିନ୍ନସ୍ତରରେ ଉଦ୍ୟମ ହେଉଥିବା ବେଳେ କୋରାପୁଟରୁ ଆସୁଥିବା ଏହି ଖବର ନିଶ୍ଚିତ ଭାବେ ଚିନ୍ତାଜନକ ।

ଗଞ୍ଜାମ: କରୋନା ଯୋଦ୍ଧା କରୋନା ଆକ୍ରାନ୍ତ  । କଳାହାଣ୍ଡିରେ ଦୁଇ ଜଣ ଡାକ୍ତର କରୋନା ସଂକ୍ରମିତ ହେବା ପରେ ଏବେ ଦୁଇଜଣ ପୋଲିସ ଅଧିକାରୀ କରୋନା ସଂକ୍ରମିତ ହୋଇଛନ୍ତି । କରୋନା ବିରୋଧ ଯୁଦ୍ଧରେ ଫ୍ରଣ୍ଟ ଲାଇନରେ ଥିବା ଏହି ଯୋଦ୍ଧା କରୋନା ସଂକ୍ରମିତ ହେବା ଚିନ୍ତା ବଢାଇ ଦେଇଛି । ନୂଆ ଖବର ଅନୁସାରେ ଛତ୍ରପୁରର ଏସଡିପିଓ ଓ ଆଇଆଇସିଙ୍କ କରୋନା ରିପୋର୍ଟ ପଜିଟିଭ୍ ଆସିଛି । ଏନେଇ ଜିଲ୍ଲା ଏସପି ବ୍ରିଜେଶ କୁମାର ରାୟ ସୂଚନା ଦେଇଛନ୍ତି ।

ଗଞ୍ଜାମ ପୋଲିସର ଆଉ ୨ଜଣ ପୋଲିସ ଅଧିକାରୀ ଛତ୍ରପୁର ଏସଡିପିଓ ଓ ଆଇଆଇସି କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ତାଙ୍କ ଟେଷ୍ଟ ରିପୋର୍ଟ ପଜିଟିଭ୍‌ ଆସିଥିବା ଗଞ୍ଜାମ ଏସପି ଟ୍ୱିଟ୍‌ କରି ଜଣାଇଛନ୍ତି। କରୋନା ନିୟନ୍ତ୍ରଣରେ ଯୋଦ୍ଧା ସାଜିଥିବା ଏହି ଅଫିସରଙ୍କ କାର୍ଯ୍ୟାଦକ୍ଷତା ପ୍ରେରଣାଦାୟୀ ବୋଲି ଏସପି କହିବା ସହ ସେମାନଙ୍କ ଆଶୁ ଆରୋଗ୍ୟ କାମନା କରିଛନ୍ତି।

In the line of duty our two covid warriors SDPO Chatrapur & IIC Chatrapur tested covid positive.We wish speedy recovery of them. Inspiring by their services we take this fight against covid with great zeal to save our citizens from this disease.@CMO_Odisha @DGPOdisha

— SP Ganjam (@sp_ganjam) June 13, 2020

ଏହା ପୂର୍ବରୁ ଗଞ୍ଜାମ ଜିଲ୍ଲାର ଜରଡ଼ା ଥାନାର ପୂରା ଷ୍ଟାଫ ହୋମ କ୍ୱାରେଣ୍ଟାଇନରେ ଯାଇଥିଲେ । ଅପରାଧିଙ୍କୁ ଧରିବାକୁ ଯାଇ ଜରଡ଼ା ଥାନାର ଦୁଇ ଅଧିକାରୀ କରୋନା ସଂକ୍ରମିତ ହୋଇଥିଲେ । ଗିରଫ ଅଭିଯୁକ୍ତଙ୍କ ରିପୋର୍ଟ ପଜିଟିଭ୍ ଆସିବା ପରେ ପୋଲିସ ଅଧିକାରୀଙ୍କ ଟେଷ୍ଟ ହୋଇଥିଲା  ପରେ ରିପୋର୍ଟ ପଜିଟିଭ୍ ଆସିଥିଲା ।

ସୁରଟରୁ ପ୍ରବାସୀ ଶ୍ରମିକଙ୍କ ଫେରିବା ପରଠାରୁ ଗଞ୍ଜାମରେ ସଂକ୍ରମିତଙ୍କ ସଂଖ୍ୟା ବଢିବାରେ ଲାଗିଛି । ଏଠାରେ ସୂଚନା ଯୋଗ୍ୟ ଯେ, ସୁରଟରୁ ଅଧିକ ସଂଖ୍ୟାକ ପ୍ରବାସୀ ଗଞ୍ଜାମ ଜିଲ୍ଲାରୁ ଫେରିଛନ୍ତି । ପ୍ରବାସୀଙ୍କ ପରେ ଏବେ କରୋନା ଯୋଦ୍ଧାଙ୍କୁ ତା କବଳକି ଆଣିଛି କରୋନା ।