ଭୁବନେଶ୍ୱର: କରୋନା ପାଇଁ ଜାରି ରହିଛି ଲକଡାଉନ । ବିଭିନ୍ନ ସ୍ଥାନରେ ଫସିରହିଛନ୍ତି ଲୋକେ । ଗରିବ ଓ ଦିନ ମଜୁରିଆ ଖାଇବାକୁ ପାଉନାହାଁନ୍ତି । ରାସନ କାର୍ଡ ନଥିବା ଲୋକେ ବି ନାନା ହଇରାଣ ହେଉଛନ୍ତି । ଏହାକୁ ଦୃଷ୍ଟିରେ ରଖି ସୁପ୍ରିମକୋର୍ଟଙ୍କ ଓ୍ୱାନ୍‌ ନେସନ୍‌ ଓ୍ୱାନ୍‌ ରାସନ୍‌ ନୀତିକୁ ଅସ୍ଥାୟୀ ଭାବେ ଲାଗୁ କରିବାକୁ କେନ୍ଦ୍ରକୁ ପରାମର୍ଶ ଦେଇଛନ୍ତି । ଯାହାକୁ ନେଇ ଏବେ ଗୋଟିଏ ଦେଶ ଗୋଟିଏ ରାସନ ଚର୍ଚ୍ଚା ପୁଣି ତାଜା ହୋଇଛି । ବିଜେପି କଂଗ୍ରେସ ବର୍ତ୍ତମାନ ସମୟରେ ଏହାକୁ ଲାଗୁ କରିବା ନେଇ ଭିନ୍ନ ଭିନ୍ନ ମତ ରଖିଛନ୍ତି । ସେପଟେ ଶାସକ ବିଜେଡି କହିଛି ରାସନକାର୍ଡ ନଥିଲେ ମଧ୍ୟ ଗରିବ ଲୋକଟିଏ ରାସନ ପାଇବ, ଏ ଘୋଷଣା ମୁଖ୍ୟମନ୍ତ୍ରୀ କରି ସାରିଛନ୍ତି । ତେବେ ସୁପ୍ରିମକୋର୍ଟଙ୍କ ପରାମର୍ଶ ସମୟସାପେକ୍ଷ ବୋଲି ଦଳ କହିଛି

ଓ୍ୱାନ୍‌ ନେସନ୍‌ ଓ୍ୱାନ୍‌ ରାସନ୍‌। ଲକ୍‌ଡାଉନ ସମୟରେ ଦାନା ବାନ୍ଧିଛି ଏ ଚର୍ଚ୍ଚା। କାର୍ଡ ନଥିବା ଓ ରାସନକାର୍ଡ ଥାଇ ବାହାର ରାଜ୍ୟରେ ଫସିଥିବା ଲୋକେ ରାସନ ସାମଗ୍ରୀ ପାଉନାହାଁନ୍ତି । ତେଣୁ ସୁପ୍ରିମକୋର୍ଟ ଅସ୍ଥାୟୀ ଭାବେ ଗୋଟିଏ ଦେଶ ଗୋଟିଏ ରାସନକାର୍ଡ ବ୍ୟବସ୍ଥା ଲାଗୁ କରିବାକୁ କେନ୍ଦ୍ରକୁ ପରାମର୍ଶ ଦେଇଛନ୍ତି । ଏହାଦ୍ଵାରା ଲୋକମାନେ ଯେକୈାଣସି ସ୍ଥାନରେ ଥାଇ ମଧ୍ୟ ସାମଗ୍ରୀ ପାଇପାରିବେ । ସୁପ୍ରିମକୋର୍ଟଙ୍କ ବିଚାରପତି ଏନ.ବି. ରମନ୍ନା, ଜଷ୍ଟିସ ସଂଜୟ କିଷନ କାଉଲ, ଜଷ୍ଟିସ ବି.ଆର. ଗ୍ରାଭାଇଙ୍କୁ ନେଇ ଗଠିତ ଖଣ୍ଡପୀଠ କେନ୍ଦ୍ରକୁ ଏହି ପରାମର୍ଶ ଦେଇଛନ୍ତି ।

କାରଣ ଅଭାବୀ ଓ ପ୍ରବାସୀ ଶ୍ରମିକମାନେ ନିଜ ରାସନକାର୍ଡ ବଳରେ ଯେକୈାଣସି ସ୍ଥାନରେ ବି ସରକାରଙ୍କ ସବସିଡି ସାମଗ୍ରୀ ପାଇପାରିବ ବୋଲି ଖଣ୍ଡପୀଠ କହିଛି । ସୁପ୍ରିମକୋର୍ଟଙ୍କ ଏହି ନିର୍ଦ୍ଦେଶ ସ୍ୱାଗତଯୋଗ୍ୟ, ହେଲେ ଏହା ସମୟସାପେକ୍ଷ ବୋଲି ବିଜେପି କହିଛି । ଏପଟେ କଂଗ୍ରେସ କହିଛି, ସରକାର ତୁରନ୍ତ ଏହାକୁ ଲାଗୁ କରନ୍ତୁ ।  ସେପଟେ ରାଜ୍ୟକୁ ଫେରୁଥିବା ପ୍ରବାସୀ ଓଡିଆଙ୍କ ପାଖରେ ରାସନକାର୍ଡ ଥାଉ କି ନଥାଉ ଚାଉଳ ମିଳିବ । ମୁଖ୍ୟମନ୍ତ୍ରୀ ପୂର୍ବରୁ ଏ ଘୋଷଣା କରି ସାରିଛନ୍ତି । ତେବେ ଗୋଟିଏ ଦେଶ, ଗୋଟିଏ ରାସନକାର୍ଡକୁ ବିଜେଡି ମଧ୍ୟ ସ୍ୱାଗତ କରିଛି । ହେଲେ ଏହା ସମୟସାପେକ୍ଷ ।

କେନ୍ଦ୍ର ସରକାର ପୂର୍ବରୁ ଗୋଟିଏ ଦେଶ ଗୋଟିଏ ରାସନ କାର୍ଡ ବ୍ୟବସ୍ଥା ଲାଗୁ କରିବାକୁ ଚିନ୍ତା କରୁଛନ୍ତି । ଜୁନ ମାସରେ ପରୀକ୍ଷାମୂଳକ ଭାବେ ଆରମ୍ଭ କରିବାକୁ ଯୋଜନା କରୁଥିଲେ।

ଭୁବନେଶ୍ୱର: ବାଆ ନରମିଲେ, ବତାସ ଆସିବ । ଅର୍ଥାତ ଓଡିଶା କରୋନା ସଂକ୍ରମଣ ରୋକିବାରେ ଓଡିଶାର ସ୍ଥିତି ଭଲ ରହିଥିଲେ ବି ସତର୍କତା ଅବଲମ୍ବନ ନକଲେ ଆଗକୁ ବିସ୍ଫୋରଣମୂଳକ ସ୍ଥିତି ହେବ । ମଧ୍ୟପ୍ରଦେଶରେ ୬ ଦିନରେ ୧୦୦ ଜଣ ସଂକ୍ରମିତ ହେଲେ ।

୪ଦିନରେ ୨୦୦ ଏବଂ ୫ ଦିନରେ ୫୦୦ ଛୁଇଁଲା ସଂକ୍ରମଣ । ସେପଟେ ଓଡିଶାରେ ୪୧ ଦିନରେ ୧୦୦ ଜଣ ସଂକ୍ରମିତ ହୋଇଛନ୍ତି । ଏହାର ଅର୍ଥ ନୁହେଁ, ୫ ଦିନରେ ୨୦୦ ଛୁଇଁବନି ସତର୍କ କରାଇଦେଇଛନ୍ତି ରାଜ୍ୟ ସରକାରଙ୍କ କରୋନା ସମ୍ପର୍କିତ କରୋନା ମୁଖ୍ୟ ମୁଖପାତ୍ର ।

ବିଶ୍ୱରେ ଆମେରିକାରେ ଏବେ କରୋନା ସଂକ୍ରମଣ ବିସ୍ଫୋରକ ସ୍ଥିତିରେ ରହିଛି । ସେଠାରେ ୧୦ ଲକ୍ଷରୁ ଅଧିକ ଲୋକ ସଂକ୍ରମିତ ହୋଇଛନ୍ତି । ସେଠାରେ ମଧ୍ୟ ଜାନୁଆରୀଠୁ ମାର୍ଚ୍ଚ ଯାଏଁ କରୋନା ଭୂତାଣୁ ଅତି ସନ୍ତର୍ପଣରେ ବଢୁଥିଲା । ଏବେ ଏହା ବିସ୍ଫୋରକ ସ୍ଥିତି ନେଇଛି । ଭାରତରେ ମଧ୍ୟ କରୋନା ଏବେ ସନ୍ତର୍ପଣରେ ବଢୁଛି । ବିସ୍ଫୋରଣ ପାଇଁ ପ୍ରସ୍ତୁତ ହୋଇ ରହିବାକୁ ପଡିବ ବୋଲି ଚେତାଇ ଦେଇଛନ୍ତି ସୁବ୍ରତ ବାଗଚୀ ।

ଓଡିଶାରେ ଯେତେ ଲୋକ ସଂକ୍ରମିତ ହେଉଛନ୍ତି ସେମାନଙ୍କ ମଧ୍ୟରୁ ୮୨ ପ୍ରତିଶତ ଲୋକଙ୍କ ଠାରେ କୈାଣସି ସଂକ୍ରମଣର ଲକ୍ଷଣ ନାହିଁ । ତେଣୁ ଏହା ପ୍ରମାଣିତ କରୁଛି ଯେ, ଲକ୍ଷଣ ନଥିବା ଲୋକଙ୍କ ଠାରୁ ବି ସଂକ୍ରମଣ ହେବ । ନିକଟରେ ରାଜ୍ୟ ସରକାର କେତେକ କ୍ଷେତ୍ରରେ ଲକଡାଉନକୁ କୋହଳ କରିଛନ୍ତି । ଏହାପରେ ରାଜ୍ୟବାସୀଙ୍କ ଦାୟିତ୍ୱ ବଢିଯାଇଛି । ଆମ ସମସ୍ତଙ୍କୁ ଆହୁରି ସତର୍କ, ସାବଧାନ ଓ ଯତ୍ନବାନ ହେବାକୁ ପଡ଼ିବ । ଏହା କହିଛନ୍ତି ଜାତୀୟ ସ୍ୱାସ୍ଥ୍ୟ ମିଶନର ନିର୍ଦ୍ଦେଶିକା ଶାଳିନୀ ପଣ୍ଡିତ । କରୋନା ମୁକାବିଲାରେ ପରୀକ୍ଷା ଏକ ପ୍ରଭାବଶାଳୀ ଅସ୍ତ୍ର ।

ଦେଶରେ ପ୍ରତି ୧୦ ଲକ୍ଷ ଲୋକଙ୍କ ମଧ୍ୟରୁ ୪୫୨ଜଣଙ୍କ ନମୂନା ପରୀକ୍ଷା ହେଉଥିବା ବେଳେ ଓଡିଶାରେ 666 ଜଣଙ୍କ ପରୀକ୍ଷଣ କରାଯାଉଛି । ସେହିଭଳି ଦିଲ୍ଲୀରେ ପ୍ରତି 100ଜଣଙ୍କ ନମୂନା ପରୀକ୍ଷାରୁ 8.4ଜଣ ସଂକ୍ରମିତ ବାହାରୁଥିବା ବେଳେ ମହାରାଷ୍ଟ୍ରରେ 7ଜଣ ଓ ଜାତୀୟ ହାର ହେଉଛି 4.3 । ଓଡିଶାରେ ସଂକ୍ରମଣର ହାର ହେଉଛି 0.4 । ଅର୍ଥାତ ରାଜ୍ୟରେ ୨୫୦ଜଣଙ୍କ ନମୂନା ପରୀକ୍ଷା ହେଲେ ଜଣେ ପଜିଟିଭ ବାହାରିବେ । ତେଣୁ ରାଜ୍ୟ ସରକାର ପରୀକ୍ଷଣ ହାର ବଢାଇଛନ୍ତି । ଗତ ୪ ସପ୍ତାହ ମଧ୍ୟରେ ରାଜ୍ୟରେ ୧୫ହଜାରରୁ ଅଧିକ ନମୂନା ପରୀକ୍ଷା କରାଯାଇଛି । 8ଟି ଲ୍ୟାବରେ ଟେଷ୍ଟିଂ ହେଉଛି, ଖୁବଶୀଘ୍ର କୋରାପୁଟ, ବଲାଙ୍ଗିର, ବାଲେଶ୍ୱର ଓ ବାରିପଦାରେ ହେବ ଟେଷ୍ଟିଂ ସୁବିଧା ।

ଇଣ୍ଡିଆନ କାଉନସିଲ ଅଫ ମେଡିକାଲ ରିସର୍ଚ୍ଚ ବା ଆଇସିଏମଆର ନିର୍ଦ୍ଦେଶନାମା ଅନୁଯାୟୀ ରାଜ୍ୟ ସରକାର ପ୍ରଥମେ ଲକ୍ଷଣ ଥିବା ବ୍ୟକ୍ତିଙ୍କ ନମୂନା ପରୀକ୍ଷଣ କରୁଛନ୍ତି । ଦ୍ୱିତୀୟ ସଂକ୍ରମିତଙ୍କ ସଂସ୍ପର୍ଶରେ ଆସିଥିବା ବ୍ୟକ୍ତି, ତୃତୀୟରେ ଦେଶ ଓ ରାଜ୍ୟ ବାହାରୁ ଆସିଥିବା ବ୍ୟକ୍ତି ଏବଂ ଚତୁର୍ଥରେ କରୋନା ମୁକାବିଲାରେ କାମ କରୁଥିବା ସ୍ୱାସ୍ଥ୍ୟକର୍ମୀଙ୍କ ନମୂନା ପରୀକ୍ଷାକୁ ପ୍ରଥମିକତା ଦିଆଯାଉଛି । ଗତ ୧୦ ଦିନ ମଧ୍ୟରେ ରାଜ୍ୟରେ ଚିହ୍ନଟ ହୋଇଥିବା ୬୦ଜଣ କରୋନା ପଜିଟିଭଙ୍କ ମଧ୍ୟରୁ 38 ଜଣଙ୍କର ରହିଛି ପଶ୍ଚିମୃବଙ୍ଗ ଲିଙ୍କ । ଏହି ସୂଚନା ଦେଇଛନ୍ତି ଜାତୀୟ ସ୍ୱାସ୍ଥ୍ୟ ମିଶନ ନିର୍ଦ୍ଦେଶିକା ଶାଳିନୀ ପଣ୍ଡିତ ।

ବାଲେଶ୍ୱର: ରାଜ୍ୟରେ ବଢ଼ିବାରେ ଲାଗିଛି କରୋନା ଆକ୍ରାନ୍ତଙ୍କ ସଂଖ୍ୟା । ପୁଣି ବାଲେଶ୍ୱରରୁ ଚିହ୍ନଟ ହେଲ ଆଉ ୩ କରୋନା ଆକ୍ରାନ୍ତ ।  ଚିହ୍ନଟ ହୋଇଥିବା ସମସ୍ତ ଆକ୍ରାନ୍ତ ପଶ୍ଚମବଙ୍ଗ ଫେରନ୍ତା । ଏଥିସହିତ ବାଲେଶ୍ୱରରୁ ମୋଟ ଆକ୍ରାନ୍ତଙ୍କ ସଂଖ୍ୟା ୧୯ରେ ପହଞ୍ଚିଥିବା ବେଳେ ରାଜ୍ୟରେ ମୋଟ ଆକ୍ରାନ୍ତଙ୍କ ସଂଖ୍ୟା ୧୨୫ରେ ପହଞ୍ଚିଛି । ଚିହ୍ନଟ ହୋଇଥିବା ୩ ଜଣ ଯାକ ଆକ୍ରାନ୍ତ ପୁରୁଷ, ସେମାନଙ୍କ ବୟସ ୪୪, ୬୧ ଓ ୬୩ ବର୍ଷ ।

3rd Health Update, 29 April

Three Positive Case in Balasore
44 yr Male, 61 yr Male & 63 yr Male

(All Kolkata returnees. All asymptomatic. All were in quarantine)
Contact tracing and follow-up action is being done.

Total Positive Case: 125

— I & PR Department, Odisha (@IPR_Odisha) April 29, 2020

ଚିହ୍ନଟ ହୋଇଥିବା ସମସ୍ତ ଆକ୍ରାନ୍ତ କ୍ୱରେଣ୍ଟାଇନ୍‌ରେ ଥିଲେ । ରାଜ୍ୟର ମୋଟ ଆକ୍ରାନ୍ତଙ୍କ ମଧ୍ୟରୁ ଏଯାବତ୍‌ ମୋଟ ୩୯ ଜଣ ସୁସ୍ଥ ହୋଇସାରିଛନ୍ତି । ତେବେ ଆଜି ପୂର୍ବାହ୍ନରେ ଦେବଗଡ଼, ଝାରସୁଗୁଡା ଓ କେନ୍ଦୁଝରରେ ଜଣେ ଲେଖାଏଁ ପଜିଟିଭ ଚିହ୍ନଟ ହୋଇଛନ୍ତି । ପ୍ରଥମ ଥର ପାଇଁ ଏହି ଜିଲ୍ଲାଗୁଡ଼ିକରୁ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ଏଥିସହିତ ମୋଟ ୧୪ଟି ଜିଲ୍ଲାକୁ ବ୍ୟାପିଛି କରୋନା ।