ଭୁବନେଶ୍ବର : କେନ୍ଦ୍ରରେ ରାଜ୍ୟର ଦାବି ବାରମ୍ବାର ଅବହେଳିତ। ୨୦୧୪ରୁ ସ୍ବତନ୍ତ୍ର ରାଜ୍ୟପାହ୍ୟା ନେଇ ଓଡିଶା ଦାବି କରି ଆସୁଥିଲେ ବି ଏହାକୁ ଗ୍ରହଣ କରୁନାହିଁ କେନ୍ଦ୍ର । ଓଡିଶାକୁ ଫୋକସ ଷ୍ଟେଟର ମାନ୍ୟତା ଦେବା ସହ ଦିଆଯାଉ ସ୍ବତନ୍ତ୍ର ପ୍ୟାକେଜ । ଉପାନ୍ତ ଅଂଚଳରେ ମୋବାଇଲ ଟାଓ୍ବାର ବ୍ୟବସ୍ଥା ସୁଦୁଢ଼ କରିବା ସହ ଗ୍ରାମାଞ୍ଚଳରେ ଅଧିକ ବ୍ୟାଙ୍କିଙ୍ଗ ସେବା ଯୋଗାଇ ଦିଆଯାଉ । ନୀତି ଆୟୋଗ ବୈଠକରେ ମୁଖ୍ୟମନ୍ତ୍ରୀ ଓଡିଶାର ହକ ଉପରେ ସଠିକ୍ ଦାବି ଉପସ୍ଥାପନ କରି କେନ୍ଦ୍ର ଉପରେ ଚାପ ପକାନ୍ତୁ । ରାଜ୍ୟରେ ଡବଲ ଇଞ୍ଜିନ ସରକାର ହେବା ପରେ ବି ଆନ୍ଧ୍ର ଓ ବିହାର ପରି ଓଡ଼ିଶାକୁ ସ୍ବତନ୍ତ୍ର ପ୍ୟାକେଜ ମିଳୁନାହିଁ । ବରିଷ୍ଠ ବିଜେଡି ନେତା ପ୍ରଶାନ୍ତ ମୁଦୁଲି କହିଛନ୍ତି- ପୂର୍ବତନ ମୁଖ୍ୟମନ୍ତ୍ରୀ ସବୁବେଳେ ନୀତି ଆୟୋଗ ବୈଠକରେ ଓଡ଼ିଶାର ହକ ପାଇଁ ଲଢ଼େଇ କରିଥିଲେ । ପୂର୍ବ ସରକାର ଉପାନ୍ତ ଅଂଚଳରେ ମୋବାଇଲ ଟାଓ୍ବାର ବସାଇ ସେବାକୁ ତ୍ବରାନ୍ବିତ କରିବା, ବ୍ୟାଙ୍କିଙ୍ଗ ସେବା ଓ କୋଇଲା ରୟାଲଟି ବୃର୍ଦ୍ଧି କରିବାକୁ ଯେଉଁ ଦାବି କରି ଆସୁଥିଲା ତାହାକୁ ଗୁରୁତ୍ବ ଦେବାକୁ ସେ ଦାବି କରିଛନ୍ତି । ରାଜ୍ୟ ସ୍ୱାର୍ଥ ପାଇଁ ବିଜେଡ଼ି ଲଢେଇ କରୁଛି ଓ କରିବ ବୋଲି ସେ କହିଛନ୍ତି।..
ଓଡ଼ିଶାରେ ଡ଼ବଲ ଇଂଜିନ ସରକାର ହେବା ଦିନଠୁ ଓଡ଼ିଶା ଅଧିକ ଅବହେଳିତ ହୋଇଛି । ଡବଲ ଇଞ୍ଜିନ ସରକାର ଯୋଗୁଁ କେନ୍ଦ୍ରୀୟ ଅନୁଦାନ କମିବା ସହ ବିଭିନ୍ନ କ୍ଷେତ୍ରରେ ଓଡିଶା ସ୍ୱାର୍ଥକୁ ଗୁରୁତ୍ବ ଦିଆଯାଉ ନାହିଁ । ତେଣୁ ମୁଖ୍ୟମନ୍ତ୍ରୀ ନୀତି ଆୟୋଗ ବୈଠକରେ ଓଡିଶା ପାଇଁ ହକ ମାଗନ୍ତୁ ବୋଲି କଂଗ୍ରେସ କହିଛି। ସେପଟେ ବିଜେପି ସରକାର ସବୁବେଳେ ରାଜ୍ୟ ସ୍ୱାର୍ଥ ପାଇଁ କାମ କରୁଛି ବୋଲି କହିଛନ୍ତି ମନ୍ତ୍ରୀ। ଡବଲ ଇଞ୍ଜିନ ସରକାରରେ ଓଡିଶାକୁ ହକ ମିଳୁଛି ନାଁ ପୁଣି ଅବହେଳା କରାଯାଉଛି ତାକୁ ନେଇ ଆରମ୍ଭ ହୋଇଛି ବୟାନବାଜି ।
