ଆଠଗଡ : ବିଜେପି-ବିଜେଡି କର୍ମୀ ମୁହାଁମୁହିଁ । ପଞ୍ଚାୟତ ବୈଠକ ପୂର୍ବରୁ ବ୍ଲକ କାର୍ଯ୍ୟାଳୟ ଆଗରେ ଉଭୟ ବିଜେପି-ବିଜେଡି କର୍ମୀ ମୁହାଁମୁହିଁ ହୋଇଛନ୍ତି । ଢେଲା ପଥର ମାଡ଼ । ପୋଲିସର ଲାଠିଚାର୍ଜ । ବିଜେପି କର୍ମୀଙ୍କ ଦ୍ଵାରା ପୋଲିସ ଉପରକୁ ଢେଲା ପଥର ମାଡ଼ରେ ଅନେକ ପୋଲିସ ଆହତ ହୋଇଛନ୍ତି । ଘଟଣାସ୍ଥଳରେ ତିନି ପ୍ଲାଟୁନ ଫୋର୍ସ ସମେତ ଜଣେ ଅତିରିକ୍ତ ଏସପି, ଦୁଇ ଜଣ ଡିଏସପି ଓ ଆଠରୁ ଅଧିକ ଆଇଆଇସି ମୁତୟନ ଅଛନ୍ତି । ଘଟଣା ଘଟିଛି ଆଠଗଡରେ । ଆଠଗଡ ବ୍ଲକରେ ଆଜି ପଞ୍ଚାୟତ ବୈଠକରେ ସ୍ଥାନୀୟ ବିଧାୟକ ଯୋଗ ଦେବାର ଥିଲା । ବିଧାୟକ ଯୋଗ ଦେବା ପୂର୍ବରୁ ଉଭୟ କର୍ମୀ ନାରାବାଜି ଦେଇ ବ୍ଲକ ଆଗରେ ହୋହଲ୍ଲା କରିଥିଲେ । ପରେ ଏହା ଉଗ୍ର ରୂପ ଧାରଣ କରିଥିଲା । ଟେକାପଥର ମାଡ ହେବା ସହ ନିୟନ୍ତ୍ରଣ କରିବାକୁ ଯାଇ ପୋଲିସ ଲାଠିଚାର୍ଜ କରିଥିଲା । ଆଇନ ଶୃଙ୍ଖଳା ପରିସ୍ଥିତିକୁ ଆଖିରେ ରଖି ପ୍ରଶାସନ ପକ୍ଷରୁ ବିଏନଏସ ୧୬୩ ଧାରା ଲାଗୁ କରାଯାଇଛି ।
ଯୁଦ୍ଧ ଶେଷ ! ଯୁଦ୍ଧ ବିରତୀ ଦ୍ୱନ୍ଦ୍ୱର ଅନ୍ତ, ଇରାନର ଶେଷ ଆକ୍ରମଣରେ ୪ ଇସ୍ରାଏଲଙ୍କ ମୃତ୍ୟୁ
ନନ୍ଦିଘୋଷ ବ୍ୟୁରୋ : ଶେଷରେ ଇସ୍ରାଏଲ ଓ ଇରାନ ମଧ୍ୟରେ ୧୨ ଦିନ ଧରି ଚାଲିଥିବା ଯୁଦ୍ଧ ବର୍ତ୍ତମାନ ଥମିଛି। ଏହାକୁ ନେଇ ପ୍ରାରମ୍ଭିକ ଦ୍ୱନ୍ଦ୍ୱ ପରେ ଇରାନର ସରକାରୀ ଟେଲିଭିଜନ ଯୁଦ୍ଧବିରାମ ଲାଗୁ ହେବାର ଘୋଷଣା କରିଛି। ଇରାନୀ ସରକାରୀ ଟେଲିଭିଜନ ମଙ୍ଗଳବାର ଦିନ ଜଣାଇଛି ଯେ ଇସ୍ରାଏଲ ସହିତ ଯୁଦ୍ଧରେ ବିରାମ ଲାଗିଛି । ଇସ୍ରାଏଲ ମଧ୍ୟ ଇରାନୀ ଆକ୍ରମଣକୁ ନେଇ ଜାରିଥିବା ଆଲର୍ଟ ହଟାଇବା ସହ ଲୋକଙ୍କୁ ବଙ୍କରରୁ ବାହାରକୁ ଆସିବାକୁ ଅନୁମତି ମିଳିଛି ।
ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ମଧ୍ୟସ୍ଥତା ପରେ ଉଭୟ ଦେଶ ଯୁଦ୍ଧବିରତି ପାଇଁ ରାଜି ହୋଇଥିଲେ। କିନ୍ତୁ ଯୁଦ୍ଧବିରତି ଲାଗୁ ହେବା ପରେ ମଧ୍ୟ ଇରାନ ଇସ୍ରାଏଲ ଉପରେ ବୋମାମାଡ଼ ଜାରି ରହିବା ଯୋଗୁଁ ଏହାକୁ ନେଇ ସନ୍ଦେହ ପରିସ୍ଥିତି ସୃଷ୍ଟି ହୋଇଥିଲା। ଇସ୍ରାଏଲ ଡିଫେନ୍ସ ଫୋର୍ସ କହିଛି ଯେ ଗୋଟିଏ ଘଣ୍ଟା ମଧ୍ୟରେ ତିନି ଥର ଇରାନ ମିସାଇଲ ଆକ୍ରମଣ କରିଛି । ଏଥିରେ ଛଅ ଜଣ ନାଗରିକଙ୍କର ମୃତ୍ୟୁ ହୋଇଛି। ଇସ୍ରାଏଲରେ ଆକ୍ରମଣକୁ ଯୁଦ୍ଧ ସାଇରନ ବାଜିଥିଲା ଓ ଲୋକମାନେ ସୁରକ୍ଷିତ ଆଶ୍ରୟସ୍ଥଳୀକୁ ସ୍ଥାନାନ୍ତରିତ ହୋଇଥିଲେ।
ସବୁ ଆକ୍ରମଣର ଦଣ୍ଡ ମିଳିବ
ଇରାନର ବୈଦେଶିକ ମନ୍ତ୍ରୀ ଅବାସ ଅରାଘଚୀ ଆକ୍ରମଣକୁ ନେଇ କହିଛନ୍ତି ଯେ ଆମର ଶକ୍ତିଶାଳୀ ସୈନ୍ୟ ବାହିନୀ ଶେଷ ମୁହୂର୍ତ୍ତ ପର୍ଯ୍ୟନ୍ତ ଇସ୍ରାଏଲକୁ ତା’ର ଆକ୍ରମଣ ପାଇଁ ଦଣ୍ଡ ଦେବ। ସେ କହିଛନ୍ତି, ‘ସମସ୍ତ ଇରାନବାସୀ ସହ ଆମର ସାହସୀ ସଶସ୍ତ୍ର ବାହିନୀଙ୍କୁ ଧନ୍ୟବାଦ ଜଣାଉଛି । ଯେଉଁମାନେ ନିଜ ରକ୍ତ ବନଳରେ ଦେଶର ରକ୍ଷା କରୁଛନ୍ତି । ଶତ୍ରୁର ସମସ୍ତ ଆକ୍ରମଣର ଶେଷ ମୁହୂର୍ତ୍ତ ପର୍ଯ୍ୟନ୍ତ ଜବାବ ଦେଇଛନ୍ତି। କିନ୍ତୁ ଯୁଦ୍ଧବିରତି ଘୋଷଣା ପରେ ଇରାନ ଆକ୍ରମଣ କରି କ’ଣ ପ୍ରମାଣ କରିବାକୁ ଚାହୁଁଛି?
୧୩ ଜୁନରେ ଇସ୍ରାଏଲ ବିରୋଧରେ ଆରମ୍ଭ ହୋଇଥିବା ଏହି ଯୁଦ୍ଧରେ ଇରାନକୁ ବହୁତ କ୍ଷତି ସହିବାକୁ ପଡ଼ିଛି। ତା’ର ତିନୋଟି ପ୍ରମୁଖ ପରମାଣୁ କେନ୍ଦ୍ର ଫୋର୍ଡୋ, ନାଟାଞ୍ଜ ଓ ଇସଫାହାନରେ ଆମେରିକା ବଙ୍କର ବଷ୍ଟର ବୋମା ଦ୍ୱାରା ଆକ୍ରମଣ କରିଥିଲା। ଇସ୍ରାଏଲ ଆକ୍ରମଣରେ ଇରାନୀ ରେଭୋଲ୍ୟୁସନାରୀ ଗାର୍ଡସର ମୁଖ୍ୟ ହୁସୈନ ସଲାମୀଙ୍କ ସମେତ ଅନେକ ପ୍ରମୁଖ ସୈନ୍ୟ କମାଣ୍ଡରଙ୍କ ସହ ପରମାଣୁ ବୈଜ୍ଞାନିକ ନିହତ ହୋଇଛନ୍ତି। ଏହା ବ୍ୟତୀତ ଇରାନରେ ପ୍ରାୟ ଏକ ହଜାର ନିରୀହ ଲୋକଙ୍କର ମୃତ୍ୟୁ ହୋଇଛି
ଇରାନକୁ ମିଳିଲା ନାହିଁ କୌଣସି ସାହାଯ୍ୟ
ଇସ୍ରାଏଲ ସହିତ ଯୁଦ୍ଧରେ ଇରାନ ବିରୋଦ୍ଧରେ ଆମେରିକା ମଧ୍ୟ ଇରାନ ଉପରେ ଆକ୍ରମଣ କରିଥିଲା ଓ ଦେଶର ସବୁଠାରୁ ପ୍ରମୁଖ ପରମାଣୁ କେନ୍ଦ୍ର ଫୋର୍ଡୋ ସମେତ ତିନୋଟି ସ୍ଥାନରେ ବୋମାବର୍ଷଣ କରିଥିଲା । ଅନ୍ୟପକ୍ଷେ ଇରାନକୁ ମଧ୍ୟ ପୂର୍ବର କୌଣସି ଦେଶର ସାହାର୍ଯ୍ୟ ମିଳି ନଥିଲା । ତାକୁ ଏକାକୀ ନିଜର ଲଢେ଼ଇ ଲଢିବାକୁ ପଡ଼ିଥିଲା। ରୁଷ ଏବଂ ଚୀନ ଭଳି ଶକ୍ତିଶାଳୀ ଦେଶଗୁଡ଼ିକ ଇରାନକୁ ନୈତିକ ସମର୍ଥନ ତ ଦେଇଥିଲେ କିନ୍ତୁ ଆମେରିକା- ଇସ୍ରାଏଲ ବିରୋଧରେ ଯୁଦ୍ଧରେ ଖୋଲାଖୋଲି ଇରାନ ସହ ଠିଆ ହୋଇ ନଥିଲେ।
ଆଭ୍ୟନ୍ତରୀଣ ଚାପ ଯୁଦ୍ଧ ବିରୀତିର କାରଣ କି?
ଏହା ବ୍ୟତୀତ ଇରାନ ଉପରେ ଅତ୍ୟଧିକ ଆଭ୍ୟନ୍ତରୀଣ ଚାପ ରହିଛି, କାରଣ ତା’ର ଶହ ଶହ ନାଗରିକଙ୍କର ମୃତ୍ୟୁ ହୋଇସାରିଛି, ଏପରିକି ସୁପ୍ରିମ ଲିଡର ଆୟାତୁଲ୍ଲା ଖାମେନେଇଙ୍କୁ ମଧ୍ୟ ଇସ୍ରାଇଲ ଟାର୍ଗଟାେ ଥିଲେ । କିନ୍ତୁ ଶେଷ ମୁହୂର୍ତ୍ତରେ ଟ୍ରମ୍ପଙ୍କ ହସ୍ତକ୍ଷେପ ପରେ ତାଙ୍କୁ ହତ୍ୟା କରିବାର ଯୋଜନା ବାତିଲ କରାଯାଇଥିଲା। ଏହା ବ୍ୟତୀତ ଇରାନର କଟ୍ଟରପନ୍ଥୀ ଗୋଷ୍ଠୀମାନଙ୍କର ଚାପ ଥିଲା ଯେ ଯୁଦ୍ଧରେ ସେ ଇସ୍ରାଇଲ ଓ ଆମେରିକା ବିରୋଧରେ କଠୋର କାର୍ଯାନୁଷ୍ଠାନ ଗ୍ରହଣ କରିବା ସହ ନିରୀହ ଲୋକଙ୍କ ମୃତ୍ୟୁର ପ୍ରତିଶୋଧ ନେଉ ।
ଏହା ସହିତ ସାମ୍ପ୍ରତିକ ଆକ୍ରମଣ ଦ୍ୱାରା ଇରାନ ସଙ୍କେତ ଦେବାକୁ ଚାହୁଁଛି ଯେ ସେ କାହାର ଆଦେଶ କିମ୍ବା ଚାପରେ ଯୁଦ୍ଧବିରାମ ପାଇଁ ରାଜି ହୋଇନାହିଁ, ବରଂ ନିଜର ସର୍ତ୍ତରେ ସହମତ ହୋଇଛି। ଇରାନ ପୂର୍ବରୁ କହିସାରିଛି ଯେ ସେ ନା ଯୁଦ୍ଧ ଆରମ୍ଭ କରିଥିଲା ନା ସେ ଯୁଦ୍ଧ ଚାହୁଁଛି। କିନ୍ତୁ ସେ ଇଜରାଏଲର ଆକ୍ରମଣାର ଜବାବ ନିଶ୍ଚିତ ଦେବ ।
ବାହାଘର ଭୋଜି ଖାଇ ୩୫ ଜଣ ଝାଡା ବାନ୍ତି ରୋଗରେ ଆକ୍ରାନ୍ତ
ଅନୁଗୁଳ : ଅନୁଗୁଳ ଜିଲ୍ଲା ଆଠମଲ୍ଲିକ ବ୍ଲକ ଟୁସର୍ ଗାଁରେ ବାହାଘର ଭୋଜି ଖାଇ ୩୫ ଜଣ ଝାଡା ବାନ୍ତି ରୋଗରେ ଆକ୍ରାନ୍ତ ହୋଇଛନ୍ତି । ସେମାନଙ୍କ ମଧ୍ୟରୁ ୨୦ ଜଣ ନିକଟସ୍ଥ ମାଧପୁର ସ୍ୱାସ୍ଥ୍ୟକେନ୍ଦ୍ର ଚିକିତ୍ସା ହେଉଥିବା ବେଳେ ଅନ୍ୟମାନଙ୍କୁ ଆଠମଲ୍ଲିକ ଓ ବୌଦ୍ଧ ଜିଲ୍ଲା ଡାକ୍ତର ଖାନାକୁ ସ୍ଥାନାନ୍ତର କରାଯାଇଛି। ଝାଡ଼ାବାନ୍ତି ବ୍ୟାପିବା ଖବର ପାଇ ଆଠମଲ୍ଲିକ, ମାଧପୁରରୁ ଡାକ୍ତରୀ ଦଳ ପହଞ୍ଚି ଚିକିତ୍ସା ଆରମ୍ଭ କରିଛନ୍ତି। ଅନୁଗୁଳରୁ ଡାକ୍ତରୀ ଦଳ ନମୁନା ସଂଗ୍ରହ କରି ଫେରିଯାଇଛନ୍ତି। ପ୍ରଶାସନ ପକ୍ଷରୁ ପ୍ରତିଷେଧକ ବ୍ୟବସ୍ଥା ଗ୍ରହଣ କରାଯାଇଛି। ପରିସ୍ଥତି ନିୟନ୍ତ୍ରଣାଧୀନ ଥିବା ସ୍ୱାସ୍ଥ୍ୟ ବିଭାଗ କହିଛି।
ପୋଲିସକୁ ଛାଡିଲେନି ଦୁର୍ବୃତ୍ତ ଲୁଟର ଶିକାର ହେଲେ ପୋଲିସ ବାବୁ
ବାଲେଶ୍ବର : ପୋଲିସକୁ ଛାଡିଲେନି ଦୁର୍ବୃତ୍ତ । ଲୁଟର ଶିକାର ହେଲେ ପୋଲିସ ବାବୁ । ଖନ୍ତାପଡ଼ା ଥାନାର ଏଏସଆଇ ଲୋକନାଥ ସୋରେନ ଗୁରୁତର ଅବସ୍ଥାରେ ଆମ୍ବୁଲାନ୍ସରେ କଟକ ସ୍ଥାନାନ୍ତର ବେଳେ ସେରଗଡ ଟୋଲଗେଟ୍ ପରେ ହେଲା ଛିନତାଇ। ଆମ୍ବୁଲାନ୍ସ ଆଗରେ ଆଡ୍ଡା ପକାଇ ଦୁର୍ବୃତ୍ତ ଭାଙ୍ଗିଦେଲେ ଆମ୍ବୁଲାନ୍ସର କାଚ। ଡ୍ରାଇଭର ପାଖରୁ ଟଙ୍କା ଲୁଟ୍ ହୋଇଥିବା ଅଭିଯୋଗ ହୋଇଛି। ଘଟଣାର ତଦନ୍ତ ଜାରି ରଖିଛି ପୋଲିସ। ଗତକାଲି ବିଳମ୍ବିତ ରାତିରେ ଘଟିଛି ଏଭଳି ଘଟଣା । ଖନ୍ତାପଡ଼ା ଥାନାରେ ଆମ୍ବୁଲାନ୍ସ ଅଟକ ରଖି ତଦନ୍ତ ଚଳାଇଛି ପୋଲିସ ।
ଅଟୋ ଓଲଟି ୭ ଛାତ୍ରଛାତ୍ରୀ ଗୁରୁତର
ବାଲେଶ୍ବର : ଅଟୋ ଓଲଟି ୭ ଛାତ୍ରଛାତ୍ରୀ ଗୁରୁତର। ବାଲେଶ୍ବର ସୋର ପଦୁନା ନିକଟରେ ଦୁର୍ଘଟଣା। ଏକ ସାଇକେଲ ଆରୋହୀକୁ ବଞ୍ଚାଇବାକୁ ଯାଇ ଅଟୋଟି ଭାରସାମ୍ୟ ହରାଇ ରାସ୍ତା ତଳକୁ ଓଲଟି ପଡିଥିଲା। ସ୍କୁଲ ଯାଉଥିବାବେଳେ ଦୁର୍ଘଟଣା ଘଟିଛି। ସମସ୍ତେ ପଲସା ସ୍ଥିତି ଆଦର୍ଶ ବିଦ୍ୟାଳୟର ଛାତ୍ରଛାତ୍ରୀ। ଅଟୋରେ ଥିବା ସମସ୍ତ ୭ ଜଣ ଛାତ୍ରଛାତ୍ରୀ ମାନଙ୍କୁ ସ୍ଥାନୀୟ ଲୋକ ମାନଙ୍କ ସହଯୋଗରେ ଉଦ୍ଧାର କରାଯାଇ ଖଇରା ମେଡିକାଲ ରେ ଭର୍ତ୍ତି କରାଯାଇଛି l ସମସ୍ତଙ୍କ ଅବସ୍ଥା ସ୍ଥିର ଥିବା ନେଇ ସୂଚନା ମିଳିଛି l
ଇରାନ-ଇସ୍ରାଏଲ ଯୁଦ୍ଧ ମଧ୍ୟରେ ଏୟାର ଇଣ୍ଡିଆର ବଡ଼ ନିଷ୍ପତ୍ତି
ନନ୍ଦିଘୋଷ ବ୍ୟୁରୋ : କତାରରେ ଥିବା ଆମେରିକୀୟ ବାୟୁସେନା ବେସ୍ ଉପରେ ଇରାନ ପକ୍ଷରୁ ମିସାଇଲ୍ ନିକ୍ଷେପ ପରେ ସୋମବାର ଏୟାର ଇଣ୍ଡିଆ ମଧ୍ୟପ୍ରାଚ୍ୟକୁ ସମସ୍ତ ଉଡ଼ାଣକୁ ତୁରନ୍ତ ବାତିଲ କରିଦେଇଛି। ବିମାନ କମ୍ପାନୀ କହିଛି ଯେ ପରବର୍ତ୍ତୀ ନୋଟିସ୍ ପର୍ଯ୍ୟନ୍ତ ଆମେରିକାର ଉତ୍ତର ଉପକୂଳରୁ ଇଉରୋପ ପର୍ଯ୍ୟନ୍ତ ସମସ୍ତ ବିମାନ ବାତିଲ କରାଯାଉଛି। ଟାଟା ଗୋଷ୍ଠୀ ଦ୍ୱାରା ପରିଚାଳିତ ଏୟାରଲାଇନ୍ସ କମ୍ପାନୀ କହିଛି ଯେ ଉତ୍ତର ଆମେରିକାରୁ ଭାରତକୁ ଆସୁଥିବା ସମସ୍ତ ଫ୍ଲାଇଟକୁ ଫେରାଇ ଦିଆଯାଉଛି, ଯେତେବେଳେ ଅନ୍ୟ ବିମାନଗୁଡ଼ିକୁ ଭାରତକୁ ଫେରାଇ ଆଣାଯାଉଛି କିମ୍ବା ବନ୍ଦ ହୋଇଥିବା ଏୟାରସ୍ପେସରୁ ଦୂରକୁ ପଠାଯାଉଛି।
ଉତ୍ତେଜନା ମଧ୍ୟରେ ଏୟାର ଇଣ୍ଡିଆର ପଦକ୍ଷେପ
ଏୟାର ଇଣ୍ଡିଆର ଜଣେ ମୁଖପାତ୍ର କହିଛନ୍ତି ଯେ ସେମାନେ ସମସ୍ତ ପ୍ରଭାବିତ ଯାତ୍ରୀଙ୍କୁ ବର୍ତ୍ତମାନର ପରିସ୍ଥିତି ବୁଝିବାକୁ ଅନୁରୋଧ କରୁଛନ୍ତି, ଯାହା ସେମାନଙ୍କ ନିୟନ୍ତ୍ରଣ ବାହାରେ। ସେ କହିଛନ୍ତି ଯେ ଏୟାର ଇଣ୍ଡିଆ ସୁରକ୍ଷା ପରାମର୍ଶଦାତାଙ୍କ ସହ ନିରନ୍ତର ଯୋଗାଯୋଗରେ ଅଛି ଏବଂ ପରିସ୍ଥିତି ଉପରେ କଡ଼ା ନଜର ରଖିଛି। ସମସ୍ତ ଅପଡେଟ୍ ବିଷୟରେ ଯାତ୍ରୀମାନଙ୍କୁ ଅବଗତ କରାଯିବ। ଯାତ୍ରୀଙ୍କ ସୁରକ୍ଷା ହେଉଛି ଏୟାରଲାଇନ୍ସର ପ୍ରଥମ ପ୍ରାଥମିକତା। ସୂଚନାଯୋଗ୍ୟ ଯେ ସୋମବାର ଦିନ ଇରାନ କତାରରେ ଥିବା ଆମେରିକୀୟ ଏୟାରବେସକୁ ଟାର୍ଗେଟ କରିବା ସମୟରେ ଏୟାରଲାଇନ୍ସ ପକ୍ଷରୁ ଏହି ଘୋଷଣା କରାଯାଇଥିଲା। ଏହା ପୂର୍ବରୁ ଆମେରିକା ଇରାନର ତିନୋଟି ଗୁରୁତ୍ୱପୂର୍ଣ୍ଣ ପ୍ରତିଷ୍ଠାନ ଉପରେ ଏକ ବଡ଼ ଆକ୍ରମଣ କରିଥିଲା।
କାତାରରେ ଥିବା ଆମେରିକୀୟ ଘାଟି ଉପରେ ଆକ୍ରମଣ
ନ୍ୟୁଜ୍ ଏଜେନ୍ସି ରଏଟର୍ସ ଜଣେ କୂଟନୀତିଜ୍ଞଙ୍କୁ ଉଦ୍ଧୃତ କରି ରିପୋର୍ଟ କରିଛି ଯେ କତାରର ରାଜଧାନୀରେ ବିସ୍ଫୋରଣର ଜୋରଦାର ଶବ୍ଦ ଶୁଣାଯାଇଛି। କତାରରେ ଛଅଟି ବାଲିଷ୍ଟିକ୍ ମିସାଇଲ୍ ନିକ୍ଷେପ କରାଯିବା ପରେ ଇରାନର ସଶସ୍ତ୍ର ବାହିନୀ କହିଛି ଯେ ଇରାନର ପରମାଣୁ ପ୍ରତିଷ୍ଠାନ ଉପରେ ଆମେରିକା ପକ୍ଷରୁ ଯେତିକି ମିସାଇଲ୍ ନିକ୍ଷେପ କରାଯାଇଥିଲା, ଏହି ଅପରେସନ ସମୟରେ ଆମେରିକୀୟ ଏୟାରବେସ ଉପରେ ସେତିକି ମିସାଇଲ ନିକ୍ଷେପ କରାଯାଇଛି।
ଉଲ୍ଲେଖଯୋଗ୍ୟ ଯେ ତେହେରାନ ବିରୋଧରେ ଇସ୍ରାଏଲର ଏହି ଯୁଦ୍ଧରେ ଆମେରିକାର ସାମିଲ ହେବା ଫଳରେ ସମଗ୍ର ମଧ୍ୟପ୍ରାଚ୍ୟରେ ଆଲୋଡ଼ନ ସୃଷ୍ଟି ହୋଇଛି। ଯୁଦ୍ଧରେ ପ୍ରବେଶ କରି ଆମେରିକା ଇରାନର ତିନୋଟି ଭୂଗର୍ଭସ୍ଥ ପରମାଣୁ ପ୍ରତିଷ୍ଠାନ ଉପରେ ୩୦ ହଜାର ପାଉଣ୍ଡର ବଙ୍କର ବଷ୍ଟର ବ୍ୟବହାର କରି ତାକୁ ଉଡ଼ାଇ ଦେଇଥିଲା। ଏହାର ଦୁଇ ଦିନ ପରେ ଇରାନ ପକ୍ଷରୁ ଏହି ପ୍ରତିଶୋଧମୂଳକ ଆକ୍ରମଣ କତାରରେ ଥିବା ଆମେରିକୀୟ ବେସ ଉପରେ କରାଯାଇଥିଲା।
ଇରାନ ଓ ଇସ୍ରାଏଲ ମଧ୍ୟରେ ଅସ୍ତ୍ରବିରତି ଘୋଷଣା
ଇରାନ ଓ ଇସ୍ରାଏଲ ମଧ୍ୟରେ ଅସ୍ତ୍ରବିରତି ଘୋଷଣା। ଏହି ଘୋଷଣା ନିଜେ କରିଛନ୍ତି ଆମେରିକାର ରାଷ୍ଟ୍ରପତି ଡୋନାଲଡ ଟ୍ରମ୍ପ। ସୋସିଆଲ ମିଡିଆରେ ସେ ପୋଷ୍ଟ କରିଛନ୍ତି, “ସମସ୍ତଙ୍କୁ ଅଭିନନ୍ଦନ! ଇସ୍ରାଏଲ ଏବଂ ଇରାନ ମଧ୍ୟରେ ସମ୍ପୂର୍ଣ୍ଣ ଅସ୍ତ୍ରବିରତି ହେବ। ଏଥିପାଇଁ ସମସ୍ତେ ସହମତ ହୋଇଛନ୍ତି। ଉଭୟ ଦେଶ “ଚୂଡ଼ାନ୍ତ ମିଶନ” ସମାପ୍ତ କରିବା ପରେ ପ୍ରାୟ ଛଅ ଘଣ୍ଟା ମଧ୍ୟରେ ଅସ୍ତ୍ର ବିରତି ଆରମ୍ଭ ହେବ। ଇରାନ ଅସ୍ତ୍ରବିରତି ଆରମ୍ଭ କରିବ ଏବଂ ଇସ୍ରାଏଲ ୧୨ ଘଣ୍ଟା ପରେ ପରେ ଏହା ପାଳନ କରିବ। ୨୪ ଘଣ୍ଟା ପରେ ଯୁଦ୍ଧ ସମାପ୍ତ ବୋଲି ଆନୁଷ୍ଠାନିକ ଭାବରେ ବିଚାର କରାଯିବ। ଟ୍ରମ୍ପ କହିଛନ୍ତି ୧୨ ଦିନିଆ ଯୁଦ୍ଧର ସମାପ୍ତିକୁ ବିଶ୍ୱ ସ୍ୱାଗତ କରିବ। ଅସ୍ତ୍ରବିରତି ସମୟରେ, ପରିସ୍ଥିତି ଶାନ୍ତିପୂର୍ଣ୍ଣ ଏବଂ ସମ୍ମାନଜନକ ରହିବ। ସେ ଉଭୟ ଦେଶକୁ ମଧ୍ୟ ଅଭିନନ୍ଦନ ଜଣାଇଛନ୍ତି।
ଅଣବସରରେ ମହାପ୍ରଭୁଙ୍କୁ ଦଶମୂଳ ମୋଦକ ଲାଗି ପୂର୍ବରୁ ଚୋରୀ।
ପୁରୀ : ଅଣବସରରେ ମହାପ୍ରଭୁଙ୍କୁ ଦଶମୂଳ ମୋଦକ ଲାଗି ପୂର୍ବରୁ ଚୋରୀ। ଗାରଦ ଘରୁ ଚୋରୀ କରିନେଲେ ଅମୁଣିଆ ମୋଦକ। ଶ୍ରୀମନ୍ଦିର ଗାରଦରେ ଜମାଥିବା ଦଶମୂଳ ମୋଦକ ଚୋରି ହୋଇଥିବା ଅଭିଯୋଗ ହୋଇଛି। ରାଜବୈଦ୍ୟ ଦେଇଥିବା ସମୁଦାୟ ୩୧୩ଟି ଅମୁଣିଆ ମୋଦକରୁ ୭୦ଟି କମ୍ ଥିବା ଦେଖିବାକୁ ମିଳିଥିଲା। ଅଣବସର ଏକାଦଶୀ ରାତିରେ ମହାପ୍ରଭୁଙ୍କ ସର୍ବାଙ୍ଗ ପରେ ଦଶମୂଳ ମୋଦକ ଲାଗି ହେବାର ବିଧି ଥିବାବେଳେ ୭୦ଟି ମୋଦକ କମ୍ ଥିବା ଦେଖିବାକୁ ମିଳିଥିଲା। ତେବେ ମାରା ହୋଇଯାଇଥିବା ମୋଦକକୁ କିଭଳି ମହାପ୍ରଭୁଙ୍କୁ ଭୋଗ ସମର୍ପିତ କରାଗଲା ଏହି ଅପରାଧ ପାଇଁ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କୁ ଚିଠି ଲେଖିଲେ ବଳଭଦ୍ରଙ୍କ ବାଡଗ୍ରାହୀ ହଳଧର ଦାସ ମହାପାତ୍ର। ଏହି ଚିଠିର ଏକ ନକଲ ଶ୍ରୀମନ୍ଦିର କମାଣ୍ଡର ଉପମୁଖ୍ୟ ପ୍ରଶାସକ ତଥା ଜିଲ୍ଲାପାଳଙ୍କୁ ଅବଗତ କରାଯାଇଛି।
ସ୍ଵଦେଶ ଫେରିଲେ ୨୯୦ ଭାରତୀୟ
ଇରାନ : ଇରାନ-ଇସ୍ରାଏଲ ଯୁଦ୍ଧର ଘନଘଟା ମଧ୍ୟରେ ଭାରତୀୟଙ୍କ ପ୍ରତ୍ୟାବର୍ତ୍ତନ ଜାରି। ଗତକାଲି ସ୍ଵଦେଶ ଫେରିଲେ ୨୯୦ ଭାରତୀୟ। ଜଣେ ଶ୍ରୀଲଙ୍କା ନାଗରିକ ମଧ୍ୟ ଦିଲ୍ଲୀରେ ଆସି ପହଞ୍ଚିଛନ୍ତି। ଇରାନର ମଶାଦରୁ ଦିଲ୍ଲୀରେ ଆସି ପହଞ୍ଚିଛନ୍ତି ସମସ୍ତ ଲୋକେ। ବର୍ତ୍ତମାନ ସୁଦ୍ଧା ଇରାନରୁ ୨ ହଜାର ୩ ଜଣ ଭାରତୀୟ ନାଗରିକଙ୍କୁ ସୁରକ୍ଷିତ ଉଦ୍ଧାର କରାଗଲାଣି। ଯୁଦ୍ଧ ଆରମ୍ଭ ପରଠାରୁ ଇରାନରୁ ଭାରତୀୟ ନାଗରିକଙ୍କ ପ୍ରତ୍ୟାବର୍ତ୍ତନ ଜାରି ରହିଛି। ଇରାନରୁ ଫେରିଥିବା ଭାରତୀୟଙ୍କ ମଧ୍ୟରେ ଅଧିକାଂଶ ହେଉଛନ୍ତି କାଶ୍ମୀର ଛାତ୍ରଛାତ୍ରୀ। ଇରାନ-ଇସ୍ରାଏଲ ଯୁଦ୍ଧ ଚାଲିଥିବାରୁ ଇରାନରେ ରହୁଥିବା ଭାରତୀୟଙ୍କ ସୁରକ୍ଷାକୁ ନେଇ ଚିନ୍ତା ପ୍ରକାଶ ପାଇଛି। ସମସ୍ତ ଭାରତୀୟଙ୍କୁ ଉଦ୍ଧାର ଲାଗି ପ୍ରୟାସ ଜାରି ରହିଛି। କେନ୍ଦ୍ର ସରକାରଙ୍କ ପକ୍ଷରୁ ଅପରେସନ ସିନ୍ଧୁ ଜରିଆରେ ନାଗରିକଙ୍କ ଉଦ୍ଧାର ଜାରି ରହିଛି। ରିପୋର୍ଟ ଅନୁସାରେ ଇରାନରେ ୧୩ ହଜାରରୁ ଅଧିକ ଭାରତୀୟ ଛାତ୍ର ପଢୁଛନ୍ତି। ଅଧିକାଂଶ ମେଡିକାଲ ପଢୁଛନ୍ତି। ଛାତ୍ରମାନଙ୍କ ବ୍ୟତୀତ, ତୀର୍ଥଯାତ୍ରୀ ଓ ଅନେକ ଭାରତୀୟ ନାଗରିକ ଇରାନରେ ଫସି ରହିଛନ୍ତି। ଇରାନରୁ ଫେରିଥିବା ଭାରତୀୟ ଦିଲ୍ଲୀରେ ପହଞ୍ଚିବା ପରେ ଖୁସି ପ୍ରକାଶ କରିଛନ୍ତି।
ଆଜି ଆଷାଢ଼ ମାସ କୃଷ୍ଣ ଚତୁର୍ଦଶୀ ତିଥି। ଶ୍ରୀନଅରକୁ ଖଡ଼ି ପ୍ରସାଦ ବିଜେ ନୀତି ଅନୁଷ୍ଠିତ ହେବ।
ପୁରୀ: ଆଜି ଆଷାଢ଼ ମାସ କୃଷ୍ଣ ଚତୁର୍ଦଶୀ ତିଥି। ଶ୍ରୀନଅରକୁ ଖଡ଼ି ପ୍ରସାଦ ବିଜେ ନୀତି ଅନୁଷ୍ଠିତ ହେବ। ପରମ୍ପରା ଅନୁସାରେ ଦତ୍ତମହାପାତ୍ର ଓ ଦଇତାପତି ସେବକମାନେ ଶ୍ରୀନଅରକୁ ଖଡି ପ୍ରସାଦ ବିଜେ କରାଇବେ। ରୂପା ଥାଳିରେ ମହାପ୍ରଭୁଙ୍କ ଲାଗି ଫୁଲ, ତୁଳସୀ ଓ ତିନି ରୂପା ପିଙ୍ଗଣରେ ଖଡି ପ୍ରସାଦ ବିଜେ କରାଇବେ। ଶ୍ରୀନଅରରେ ଖଡି ପ୍ରସାଦ ବିଜେ ନୀତି ପରେ ରାଜଗୁରୁଙ୍କ ହସ୍ତରୁ ଶାଢି ନେଇ ପାଟ୍ଟଶାଣୀ ସେବକ ତଳୁଚ୍ଛ, ଦେଉଳକରଣ, ବେହେରା ଖୁଣ୍ଟିଆ, ପତିମହାପାତ୍ର ଓ ତିନି ବାଡର ଦଇତାପତିଙ୍କୁ ଶାଢି ବାନ୍ଧିବେ। ସ୍ନାନବେଦିରେ ୧୦୮ ଗରା ଅଧିବାସ ଜଳରେ ସ୍ନାନ ପରେ ଜ୍ୱରରେ ପଡ଼ି ମହାପ୍ରଭୁ ଶ୍ରୀମନ୍ଦିର ଅଣସର ପିଣ୍ଡିରେ ଅବସ୍ଥାନ କରୁଥିଲେ। ଦଇତାପତିମାନେ ଅଣସର ଘରେ ନାନାଦି ଗୁପ୍ତନୀତି ସଂପାଦନ କରିବା ପରେ ଅସୁସ୍ଥ ମହାପ୍ରଭୁ ଏହା ଭିତରେ ସୁସ୍ଥ ହୋଇଛନ୍ତି। ମହାପ୍ରଭୁଙ୍କଠାରେ ଫୁଲୁରି ତେଲ, ଓଷ ଲାଗି, ଦଶମୂଳ ଲାଗି, ସର୍ବାଙ୍ଗ ଚନ୍ଦନ, ରାଜପ୍ରସାଦ ବିଜେ ପରେ ଅସୁସ୍ଥ ମହାପ୍ରଭୁଙ୍କ ଶ୍ରୀଅଙ୍ଗ ବଜ୍ର, ସଶକ୍ତ ଓ ସୁଶୋଭିତ ପାଇଁ ଶ୍ରୀମନ୍ଦିରକୁ ଖଳି ବିଜେ କରାଯାଇଥିଲା। ତିନି ଠାକୁରଙ୍କ ମୁଖ୍ୟ ଶୁଦ୍ଧ ସୁଆର ସେବକମାନେ ଖଳି ପ୍ରସାଦକୁ ନିଜ ନିଜ ଘରେ ପ୍ରସ୍ତୁତ କରି ଶ୍ରୀମନ୍ଦିରକୁ ବିଜେ କରିବା ପରେ ଏହାକୁ ମହାପ୍ରଭୁଙ୍କୁ ବିଳମ୍ବିତ ରାତିରେ ଲାଗି କରାଯାଇଥିଲା। ପରମ୍ପରା ମୁତାବକ ରାଜନଅରକୁ ରାଜପ୍ରସାଦ ବିଜେ ନୀତି ସଂପନ୍ନ ପରେ ଆଜି ଖଡ଼ିପ୍ରସାଦ ବିଜେ କରାଯିବ।