କଟକ: ଗ୍ୟାଙ୍ଗଷ୍ଟର ସକିଲର ଆଉ ଜଣେ ବାନ୍ଧବୀଙ୍କୁ ଅଟକ ରଖି କମିଶନରେଟ୍ ପୋଲିସର ପଚରାଉଚରା । ବ୍ୟବସାୟୀଙ୍କୁ ଦାଦା ବଟି ମାଗିବା ଘଟଣାରେ ସମ୍ପୃକ୍ତ ଥିବା ସୂଚନା ।
ଭାରତୀୟ ଷ୍ଟେଟ୍ ବ୍ୟାଙ୍କରେ ନିଯୁକ୍ତି ସୁଯୋଗ, ଜାଣନ୍ତୁ କେମିତି କରିବେ ଆବେଦନ
ନୂଆଦିଲ୍ଲୀ: ଭାରତୀୟ ଷ୍ଟେଟ ବ୍ୟାଙ୍କରେ ନିଯୁକ୍ତି ସୁଯୋଗ । ଏସବିଆଇରେ ୮୦୦୦ ଜୁନିୟର ଆସୋସିଏଟ୍ ପଦବୀ ପୂରଣ ଲାଗି ବିଜ୍ଞପ୍ତି ପ୍ରକାଶ ପାଇଛି ।ଆଜିଠୁ ଚାକିରି ଆଶାୟୀ ଅନ-ଲାଇନରେ ଆବେଦନ କରିପାରିବେ । ଯୋଗ୍ୟ ପ୍ରାର୍ଥୀ ୨୬ ଜାନୁଆରୀ ପର୍ଯ୍ୟନ୍ତ ଆବେଦନ କରିପାରିବେ । ତେବେ, ଆବେଦନକାରୀ କେବଳ ଗୋଟିଏ ରାଜ୍ୟ ପାଇଁ ଆବେଦନ କରିପାରିବେ ।
ଆଜିଠୁ ୨୬ ଜାନୁଆରୀ ଯାଏଁ ଆବେଦନ କରିହେବ । ତେବେ, ଆବେଦନ ପରେ ଏସବିଆଇର ନୋଟିସ ଅନୁସାରେ ଏହି ପଦବୀ ପାଇଁ ପ୍ରଥମ ପର୍ଯ୍ୟାୟ ପରୀକ୍ଷା ଫେବ୍ରୁଆରୀ କିମ୍ବା ମାର୍ଚ୍ଚ ୨୦୨୦ସୁଧା ସରିବ । ଦ୍ୱିତୀୟ ପର୍ଯ୍ୟାୟ ପରୀକ୍ଷା ୧୯ ମାର୍ଚ୍ଚ ୨୦୨୦ ସୁଧା ସରିବା ନେଇ ସମ୍ଭାବନା ରହିଛି ।
ପରୀକ୍ଷାର୍ଥୀଙ୍କ ପାଖରେ କୌଣସି ବି ବିଶ୍ୱବିଦ୍ୟାଳୟରୁ ଯେ କୌଣସି ବିଷୟ ଉପରେ ସ୍ନାତକୋତ୍ତର ଥିବା ଦରକାର । ପାର୍ଥୀଙ୍କ ବୟସ ୧ଜାନୁଆରୀ ୨୦୨୦ ସୁଧା ୨୦ ବର୍ଷରୁ ଅଧିକ ଏବଂ ୨୮ବର୍ଷରୁ କମ ରହିବା ଆବଶ୍ୟକ ।
ତେବେ, ପରୀକ୍ଷା ପାଇଁ ସାଧାରଣ, ଓବିସି, ଆର୍ଥିକ ପଛୁଆ ବର୍ଗର ଆବେଦନକାରୀ ୭୫୦ଟଙ୍କା ଲେଖାଏଁ ପରୀକ୍ଷା ଶୁଳ୍କ ଦେବାକୁ ପଡ଼ିବ ।
ଅନଲାଇନ ଆବେଦନ କରିବାକୁ ଚାହୁଁଥିଲେ କ୍ଲିକ୍ କରନ୍ତୁ: https://ibpsonline.ibps.in/sbijassdec19/
ସତ ହେବ କି ଜ୍ୟୋତିଷଙ୍କ ଭବିଷ୍ୟବାଣୀ ? ତୃତୀୟ ବିଶ୍ୱଯୁଦ୍ଧକୁ ସାମ୍ନା କରିବ କି ବିଶ୍ୱ ?
୨୦୨୦ ବିଶ୍ୱ ପାଇଁ ମଙ୍ଗଳକର ହେବନାହିଁ ବୋଲି ଅନେକ ଭବିଷ୍ୟବକ୍ତା ଆକଳନ କରିଥିଲେ । ବିଶ୍ୱରେ ହିଂସା ବଢ଼ିବା ସହ ଦେଶ ଦେଶ ମଧ୍ୟରେ ଅବିଶ୍ୱାସର ବାତାବରଣ ସୃଷ୍ଟି ହେବ । ମାନବ ସମାଜ ପାଇଁ ବିଧ୍ୱଂସକ ବର୍ଷ ହେବ । ୨୦୨୦ ପାଇଁ ଭବିଷ୍ୟବକ୍ତ।ଙ୍କ ଏହି ଆକଳନର ଆଭାସ ବର୍ଷ ଆରମ୍ଭରୁ ମିଳିଯାଇଛି । ଆମେରିକା ଓ ଇରାନ ମଧ୍ୟରେ ଉତ୍ତେଜନା ବୃଦ୍ଧି ପରିପ୍ରେକ୍ଷୀରେ ଏହି ଆକଳନ ସତ ହେବ ବୋଲି ଅନେକ ବିଶ୍ୱାସ କରୁଛନ୍ତି । ଏଭଳି ଉତ୍ତେଜନାମୂଳକ ପରିସ୍ଥିତିରେ ତୃତୀୟ ବିଶ୍ୱଯୁଦ୍ଧ ଆସିଗଲା ବୋଲି ଅନେକ ଟ୍ୱିଟର ବ୍ୟବହାରକାରୀ ଆଶଙ୍କା ପ୍ରକାଶ କରିଛନ୍ତି । ଏନେଇ ସେମାନେ ନିଜର ମନୋଭାବ ବ୍ୟକ୍ତ କରିବାକୁ ଲାଗିଲେଣି । ବିଶ୍ୱଯୁଦ୍ଧ-୩ ଟ୍ୱିଟରରେ ଟ୍ରେଣ୍ଡ କରୁଛି ।
ଆମେରିକା-ଇରାନ୍ ମୁହାଁମୁହିଁ
ବାଗଦାଦ୍ ବିମାନବନ୍ଦର ଉପରେ ଆମେରିକାର ଅଚାନକ ଏୟାର ଷ୍ଟ୍ର।ଇକ୍ । ଏହି ଏୟାର ଷ୍ଟ୍ର।ଇକ୍ରେ ଇରାନ୍ର ସେନା ଜେନେରାଲ ସୁଲେମାନି ସମେତ ୮ ଜଣଙ୍କ ମୃତ୍ୟୁ ହୋଇଛି । ଜେନେରାଲଙ୍କ ମୃତ୍ୟୁ ପରେ ଆମେରିକା ଓ ଇରାନ ମଧ୍ୟରେ ଚାଲିଥିବା ଶୀତଳ ଯୁଦ୍ଧ ବାହାରକୁ ଫୁଟି ବାହାରିଛି । ଆକ୍ରମଣର ପ୍ରତିଶୋଧ ନେବାକୁ ଫଁ ଫଁ ହେଉଛି ଇରାନ୍ । ଇରାନର ସୁପ୍ରିମ୍ ନେତା ଆୟୋତୁଲ୍ଲା ଖମେନି ପ୍ରତିଶୋଧ ନେବାକୁ ଘୋଷଣା କରିସାରିଛନ୍ତି । ଏହି ଘଟଣା ପରେ ଆମେରିକା-ଇରାନ ମୁହାଁମୁହିଁ ହୋଇଥିବା ବେଳେ ମଧ୍ୟ-ପ୍ରାଚ୍ୟରେ ଭୟଙ୍କର ତୋଫାନର ଆଶଙ୍କା ସୃଷ୍ଟି ହୋଇଛି ।
ସୁଲେମାନି କିଏ ?
ମୃତ ଜେନେରାଲ ସୁଲେମାନି କେବଳ ଇରାନରେ ନୁହେଁ, ସାରା ବିଶ୍ୱରେ ପରିଚିତ ଥିଲେ । ଏକ ଗରିବ ପରିବାରରେ ଜନ୍ମ ହୋଇଥିଲେ ହେଁ ପରେ ସେ ବହୁ ଉପରକୁ ଉଠିପାରିଥିଲେ । ମୃତ୍ୟୁ ବେଳକୁ ସେ ଇରାନର ଦ୍ୱିତୀୟ ଶକ୍ତିଶାଳୀ ବ୍ୟକ୍ତିର ମାନ୍ୟତା ପାଇଥିଲେ । ୧୯୯୮ରେ ସେ ଇରାନ ରିଭୋଲ୍ୟୁସନାରି ଗାର୍ଡସର ମୁଖ୍ୟ ହୋଇଥିଲେ । ତାଙ୍କ ନେତୃତ୍ୱରେ ଇରାନ ରିଭୋଲ୍ୟୁସନାରି ଗାର୍ଡ ଖୁବ୍ ଶକ୍ତିଶାଳୀ ହୋଇ ଉଠିଥିଲା । ମୁଖ୍ୟ ସେନା ଠାରୁ ଏହି ଗାର୍ଡସ ଅଧିକ ଶକ୍ତିଶାଳୀ ବିବେଚିତ ହୋଇଥାଏ । ସିରିଆ ଓ ଇରାକ୍ ଯୁଦ୍ଧରେ ଥିଲା ତାଙ୍କର ଗୁରୁତ୍ୱପୂର୍ଣ୍ଣ ଭୂମିକା । ଆମେରିକା ଓ ସାଉଦି ଆରବର ବିରୋଧକୁ ପ୍ରତିହତ କରି ମଧ୍ୟ ପ୍ରାଚ୍ୟରେ ଇରାନର ଶକ୍ତି ବୃଦ୍ଧି କରାଇବାରେ ସୁଲେମାନିଙ୍କ ଦିମାକ ଓ ଶକ୍ତି କାମ କରିଥିଲା । ମଧ୍ୟପ୍ରାଚ୍ୟରେ ସୁପର ଶକ୍ତିମାନ ଆମେରିକାକୁ ନାକରେ ପାଣି ପିଆଇ ଦେଇଥିଲେ ସେ । ସେଥିପାଇଁ ସୁଲେମାନିଙ୍କ ଗତିବିଧି ଆମେରିକାର ରାଡ଼ାରରେ ଥିଲା । ଦୁଇ ଦଶନ୍ଧି ଧରି ସୁଲେମାନିକୁ ମାରିବାକୁ ଇସ୍ରାଏଲ ଓ ସାଉଦି ଆରବ ସହ ମିଶି ଆମେରିକା ଯୋଜନା କରିଥିଲା । ଅନେକ ଥର ଶତ୍ରୁ କବଳରୁ ସେ ଖସିବାକୁ ସମର୍ଥ ହୋଇଥିଲେ । ଏଥର କିନ୍ତୁ ଆମେରିକା ହାବୁଡ଼ରୁ ଖସିପାରିନଥିଲେ ସୁଲେମାନି । ସେ ଓ ଅନ୍ୟ କିଛି ବରିଷ୍ଠ ଅଧିକାରୀ ବାଗଦାଦ୍ ବିମାନ ବନ୍ଦରରୁ ଦୁଇଟି ବିମାନ ଯୋଗେ ଯାଉଥିବା ଖବର ପାଇ ଏୟାର ଷ୍ଟ୍ର।ଇକ୍ କରିଦେଇଥିଲା ଆମେରିକା । ଏହି ଏୟାର ଷ୍ଟ୍ର।ଇକ୍ରେ ସୁଲେମାନିଙ୍କର ଅନ୍ତ ହୋଇଥିଲା ।
ଟ୍ରମ୍ପ ଜିତିଲେ ଚ୍ୟାଲେଞ୍ଜ
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଓ ଇରାନ ଜେନେରାଲ ସୁଲେମାନି ପରସ୍ପରକୁ ଧ୍ୱଂସ ନେଇ ଚ୍ୟାଲେଞ୍ଜ କରିଥିଲେ । ୨୦୧୮ରେ ରାଷ୍ଟ୍ରପତି ଟ୍ରମ୍ପଙ୍କୁ ଚ୍ୟାଲେଞ୍ଜ କରିଥିଲେ ସୁଲେମାନି । ସେ କହିଥିଲେ, ‘ମିଷ୍ଟର ଟ୍ରମ୍ପ, ଆମେ ଆପଣଙ୍କ ନିକଟରେ ପହଞ୍ଚି ଯାଇଛୁ । ଆମେ ଏଭଳି ସ୍ଥାନରେ ପହଞ୍ଚିଛୁ ଯାହା ଆପଣଙ୍କ ଚିନ୍ତାର ବାହାରେ । ଯୁଦ୍ଧ ଆପଣ ଆରମ୍ଭ କରିପାରନ୍ତି, କିନ୍ତୁ ଶେଷ କରିବୁ ଆମେ ।’ ଡିସେମ୍ବର ଶେଷ ସପ୍ତାହରେ ଇରାକ୍ର ବାଗଦାଦରେ ଆମେରିକା ଦୂତାବାସ ଉପରେ ଆକ୍ରମଣକୁ ନେଇ ଇରାନକୁ ଧମକ ଦେଇଥିଲେ ଟ୍ରମ୍ପ । ୨୦୨୦ ଜାନୁଆରୀ ୧ରେ ଟ୍ୱିଟ୍ କରି ଏଥିପାଇଁ ବଡ଼ ମୂଲ୍ୟ ଦେବାକୁ କହିଥିଲେ । ସେ ଏକଥା ମଧ୍ୟ କହିଥିଲେ ଯେ, ଏହା କେବଳ ଏକ ଚେତାବନୀ ନୁହେଁ, ଧମକ । ତା ସହ ହାପି ନ୍ୟୁ ଇୟର ମଧ୍ୟ ଲେଖିଥିଲେ ଟ୍ରମ୍ପ । ଏହି ଧମକର ଗୋଟିଏ ଦିନ ପରେ ଟ୍ରମ୍ପଙ୍କ ନିର୍ଦ୍ଦେଶ ପରେ ବାଗଦାଦ ବିମାନ ବନ୍ଦରରେ ହୋଇଥିଲା ଏୟାର ଷ୍ଟ୍ର।ଇକ୍ ।
ବଢ଼ିଲା ତେଲ ଦର
ଏୟାର ଷ୍ଟ୍ର।ଇକ୍କୁ ନେଇ ଆମେରିକା-ଇରାନ ମୁହାଁମୁହିଁ ହୋଇଥିବା ବେଳେ ଅଶୋଧିତ ତେଲ ଦର ବଢ଼ିବା ଆରମ୍ଭ ହୋଇଯାଇଛି । ଏହି ଘଟଣା ପରେ ପରେ ଅଶୋଧିତ ତେଲ ଦର ୪ରୁ ୫ ପ୍ରତିଶତ ବଢ଼ିଯାଇଛି । ଇରାନ ଯଦି ପ୍ରତିଶୋଧ ପରାୟଣ ହୋଇ ଅନ୍ୟ କିଛି କଠୋର ପଦକ୍ଷେପ ଗ୍ରହଣ କରେ ତାହେଲେ ଆଗକୁ ସ୍ଥିତି ସଙ୍ଗୀନ ହେବ । ତେଲ ଉପରେ ନିର୍ଭର କରୁଥିବା ଦେଶଗୁଡ଼ିକରେ ସ୍ଥିତି ଅସମ୍ଭାଳ ହୋଇଯିବ ।
ଇରାନ-ଆମେରିକା ମୁହାଁମୁହିଁ ହୋଇଥିବା ବେଳେ ଆଶଙ୍କାରେ ରହିଛନ୍ତି ବିଶ୍ୱବାସୀ । ଯଦି ମଧ୍ୟ ପ୍ରାଚ୍ୟରେ ପୁଣି ଏକ ଯୁଦ୍ଧ ହୁଏ ସେଥିପାଇଁ ସମସ୍ତଙ୍କୁ ମୂଲ୍ୟ ଦେବାକୁ ପଡ଼ିବ । ତେଣୁ ଏବେଠାରୁ ଜାତିସଂଘକୁ ଆଗେଇ ଆସିବାକୁ ହେବ । ଯୁଦ୍ଧ ରୋକିବାକୁ ହେବ । ଯୁଦ୍ଧ ହେଲେ କେବଳ ଯେ ଦୁର୍ବଳ ରାଷ୍ଟ୍ରର କ୍ଷତି ହେବ ତାନୁହେଁ, ସବଳର ମଧ୍ୟ କ୍ଷତି ହେବ । ସାରା ବିଶ୍ୱ ସହିବ କଷ୍ଟ ।
ଇରାନ ଜେନେରାଲ କାସେମ ସୋଲେମାନିଙ୍କୁ ହତ୍ୟା କରିବାକୁ ଡୋନାଲ୍ଡ ଟ୍ରମ୍ଫ ଦେଇଥିଲେ ନିର୍ଦ୍ଦେଶ !
ରାଜସ୍ଥାନର କୋଟାରେ ଶିଶୁ ମଡ଼କ : ସେପଟେ ମନ୍ତ୍ରୀଙ୍କ ସ୍ୱାଗତ ପାଇଁ ବିଛାଗଲା ରେଡ୍ କାରପେଟ୍
କୋଟା : ରାଜସ୍ଥାନର କୋଟା ହସ୍ପିଟାଲରେ ଶିଶୁ ମଡ଼କକୁ ନେଇ ରାଜନୀତି ତେଜିବାରେ ଲାଗିଛି । ଏହି ପ୍ରସଙ୍ଗରେ ରାଜ୍ୟରେ କ୍ଷମତାସୀନ ଗେହଲଟ ସରକାରଙ୍କୁ ଭାଜପା ଏବଂ ବିଏସ୍ପି ଟାର୍ଗେଟ କରିଛନ୍ତି। ମୁଖ୍ୟମନ୍ତ୍ରୀ ଅଶୋକ ଗେହଲଟ ଶିଶୁ ମୃତ୍ୟୁକୁ ନେଇ ରାଜନୀତି ନ କରିବାକୁ ଅନୁରୋଧ କରିଛନ୍ତି ଉଭୟ ଦଳ । ସ୍ଥିତି ଅନୁଧ୍ୟାନ କରି ଡାକ୍ତରୀ ସୁବିଧା ଉପଲବ୍ଧ କରାଇବା ପାଇଁ ଆଜି ଏକ କେନ୍ଦ୍ରୀୟ ଟିମ୍ କୋଟା ଗସ୍ତ କରିବାର କାର୍ଯ୍ୟକ୍ରମ ରହିଛି ।
ରାଜସ୍ଥାନର କୋଟା ସ୍ଥିତ ଜେକେ ଲୋନ ଡାକ୍ତରଖାନାରେ ନବଜାତ ଶିଶୁଙ୍କ ମୃତ୍ୟୁ ସଂଖ୍ୟା ଏଯାବତ ୧୦୫କୁ ଟପିବା ସୂଚନା ମିଳିଛି । ଜାନୁଆରୀ ୧ ତାରିଖରେ ତିନି ଜଣ ଶିଶୁଙ୍କ ମୃତ୍ୟୁ ହୋଇଥିବା ବେଳେ ଗୁରୁବାର ଦିନ ଆଉ ଏକ ଶିଶୁର ମୃତ୍ୟୁ ହୋଇଛି । ଏଭଳି ପରିସ୍ଥିତିରେ ମନ୍ତ୍ରୀ ପ୍ରତାପ ସିଂହ ଏବଂ କୋଟାର ସ୍ୱାସ୍ଥ୍ୟ ମନ୍ତ୍ରୀ ରଘୁ ଶର୍ମା କୋଟା ପହଞ୍ଚିଥିଲେ । ତେବେ ମନ୍ତ୍ରୀଙ୍କ ଆସିବା ଖବର ପାଇ ଡାକ୍ତରଖାନାରେ ରଙ୍ଗ ଦେବା କାର୍ଯ୍ୟ ଆରମ୍ଭ ହୋଇଥିଲା । ତାଙ୍କ ସ୍ୱାଗତ ପାଇଁ ରେଡ୍ କାରପେଟ ମଧ୍ୟ ବିଛା ଯାଉଛି । ଅନ୍ୟପଟେ ଅନେକ ଲୋକ ବିରୋଧ ପ୍ରଦର୍ଶନରେ ସାମିଲ ହେବା କାରଣରୁ ଅନେକଙ୍କୁ ଅଟକ ରଖାଯାଇଛି ।
କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ହର୍ଷବର୍ଦ୍ଧନ ରାଜସ୍ଥାନ ସରକାରଙ୍କୁ ଏକ ପତ୍ର ଲେଖି ଏହି ବିଷୟ ଉପରେ ଦୃଷ୍ଟିଦେବାକୁ ପରାମର୍ଶ ଦେଇଛନ୍ତି। ଏହାସହ କେନ୍ଦ୍ର ପକ୍ଷରୁ ଆବଶ୍ୟକ ସମସ୍ତ ପ୍ରକାର ସହଯୋଗ କରାଯିବ ବୋଲି ସେ ପ୍ରତିଶ୍ରୁତି ଦେଇଛନ୍ତି। ଗେହଲଟ ହର୍ଷବର୍ଦ୍ଧନଙ୍କୁ ଫୋନ୍ କରି ହସ୍ପିଟାଲ ପରିଦର୍ଶନ ପାଇଁ ଡାକିଛନ୍ତି। ଏହି ସରକାରୀ ହସ୍ପିଟାଲରେ ସ୍ୱାସ୍ଥ୍ୟ ବିଭାଗ ପକ୍ଷରୁ କିପରି ଉନ୍ନତ ଚିକିତ୍ସା ଯୋଗାଇ ଦିଆଯାଉଛି ତାହା ହର୍ଷବର୍ଦ୍ଧନ ନିଜେ ଆସି ଦେଖନ୍ତୁ ବୋଲି ସେ ଟୁଇଟ୍ କରିଛନ୍ତି। ଇତିମଧ୍ୟରେ ରାଜସ୍ଥାନ ସ୍ୱାସ୍ଥ୍ୟମନ୍ତ୍ରୀ ରଘୁ ଶର୍ମା ପୂର୍ବ ଭାଜପା ସରକାରକୁ ସମାଲୋଚନା କରିଛନ୍ତି। ଭାଜପା କ୍ଷମତାରେ ଥିବାବେଳେ ହସ୍ପିଟାଲଗୁଡ଼ିକରେ ଉପଯୁକ୍ତ ସୁବିଧା କରି ନ ଥିବାରୁ ଏଭଳି ପରିସ୍ଥିତି ସୃଷ୍ଟି ହେଉଥିବା ସେ କହିଛନ୍ତି ।
କୋଟାର ଏହି ଜେକେଲୋନ ଡାକ୍ତରଖାନାରେ ୩୦ ଏବଂ ୩୧ ଡିସେମ୍ବରରେ ୯ ନବଜାତ ଶିଶୁଙ୍କର ମୃତ୍ୟୁ ହୋଇଥିଲା । ଏହାସହିତ ଶିଶୁଙ୍କ ମୃତ୍ୟୁ ସଂଖ୍ୟା ୧୦୫ରେ ପହଞ୍ଚିଛି । ଗତ ଦୁଇ ଦିନ ମଧ୍ୟରେ ଆଉ ଚାରି ଜଣ ଶିଶୁଙ୍କ ମୃତ୍ୟୁ ହୋଇଛି । ଅନ୍ୟପଟେ ଡାକ୍ତରଖାନାର ଶିଶୁ ରୋଗ ବିଶେଷଜ୍ଞ କହିଛନ୍ତି ଯେ, ୨୦୧୮ ମସିହାରେ ୧୦୦୫ ଜଣଙ୍କ ମୃତ୍ୟୁ ହୋଇଥିବା ବେଳେ ୨୦୧୯ରେ ଏହାର ସଂଖ୍ୟ ବହୁତ୍ କମିଛି । ଅଧିକାଂଶ ଶିଶୁଙ୍କ ମୃତ୍ୟୁ, ଜନ୍ମ ସମୟରେ କମ ଓଜନ ଥିବା କାରଣରୁ ହୋଇଛି ବୋଲି ହସ୍ପିଟାଲ ପକ୍ଷରୁ ସରକାରୀ ଭାବେ କୁହାଯାଇଛି ।
ବାପାଙ୍କ ମୃତଦେହ ସହ ଏମିତି ରହୁଥିଲା ପୁଅ
କୋଲକାତା: ବାପାଙ୍କ ମରଶରୀର ସହ ୫ ଦିନ ବିତାଇଲା ପୁଅ । ପୋଲିସ ଗୁରୁବାର ଦିନ କୋଲକତା ସହରର ବୋହାଲା ଅଞ୍ଚଳର ଏକ ଘରୁ ଜଣେ ବୃଦ୍ଧଙ୍କ ଗଳିତ ମୃତଦେହ ଉଦ୍ଧାର କରିଛି । ଯେଉଁଠି ବୃଦ୍ଧଙ୍କ ପୁଅ ୫ ଦିନ ହେବ ତାଙ୍କ ବାପାଙ୍କ ମରଶରୀର ସହ ରହି ଆସିଥିଲା ।
ସୂଚନା ଅନୁସାରେ ବୃଦ୍ଧଙ୍କ ବଡ଼ ପୁଅ ଅଶୋକ କୁମାର ଘୋଷ ପୋଲିସଙ୍କୁ ଫୋନ କରି ତାଙ୍କ ବାପାଙ୍କ ମୃତ୍ୟୁ କଥା କହିବା ସହ ତାଙ୍କ ସାନ ଭାଇ ଅଜିତ୍ କୁମାରଙ୍କ ବିଷୟରେ କହିଥିଲେ ।
ସାନପୁଅ ଅଜିତ୍ ତାଙ୍କ ବାପାଙ୍କ ମୃତ୍ୟୁ କଥା ବଡ଼ଭାଇକୁ ମଧ୍ୟ ଜଣେଇ ନଥିଲେ । ବଡ଼ଭାଇ ଅଶୋକ ଅନ୍ୟ ସ୍ଥାନରେ ରହିବା ହେତୁ ସେ ମଧ୍ୟ ଏ ବିଷୟରେ କୌଣସି ସୂଚନା ପାଇପାରି ନଥିଲା । ତେବେ ଅଶୋକ ସନ୍ଦେହ କରି ବାପାଙ୍କ ପାଖକୁ ଆସି ବାପାଙ୍କ ଗଳିତ ମୃତଦେହ ଦେଖି ପୋଲିସକୁ ଫୋନ କରି ଏ ବିଷୟରେ ଜଣାଇଥିଲେ ।
ଅଶୋକଙ୍କ କହିବା ଅନୁସାରେ ଅଜିତଙ୍କର ମାନସିକ ବିକୃତି ଥିବାରୁ ସେ ବାପାଙ୍କ ମୃତ୍ୟୁକୁ ସହଜରେ ଗ୍ରହଣ କରିପାରୁ ନଥିଲେ । ଏବଂ ବାପାଙ୍କ ମୃତ୍ୟୁରେ ସେ ଅତ୍ୟନ୍ତ ନିରାଶ ହୋଇଯାଇଥିଲେ । ତେଣୁ ସେ ଏବିଷୟରେ କାହାରିକୁ ନଜଣେଇ ତାଙ୍କ ମର ଶରୀର ସହ ୫ ଦିନ ବିତାଇଛନ୍ତି । ପୋଲିସ ଗଳିତ ମୃତଦେହକୁ ଉଦ୍ଧାର କରିବା ସହ ଅଜିତଙ୍କୁ ହେପାଜତରେ ନେଇଛି ।
ବୟଫ୍ରେଣ୍ଡ କଣ ଏମିତି କଲା ଯେଉଁଥିପାଇଁ ଇଞ୍ଜିନିୟରିଂ ଛାତ୍ରୀ ଝୁମା ହାରିଲେ ଜୀବନ ?
ଭୁବନେଶ୍ୱର : ରାଜଧାନୀର ଏକ ଘରୋଇ ଇଞ୍ଜିନିୟରିଂ କଲେଜରେ ପଢ଼ୁଥିବା ଜଣେ ଛାତ୍ରୀଙ୍କ ସନ୍ଦେହ ଜନକ ମୃତ୍ୟୁ ଏବେ ଘଟଣାକୁ ଅଧିକ ରହସ୍ୟାବୃତ କରିଛି । ଘରୋଇ ଇଞ୍ଜିନିୟରିଂ କଲେଜର ତୃତୀୟ ବର୍ଷ କମ୍ପ୍ୟୁଟର ସାଇନ୍ସର ଛାତ୍ରୀ ଥିଲେ ଝୁମା ଦେବନାଥ । ଝୁମାଙ୍କ ଘର ପଶ୍ଚିମବଙ୍ଗରେ ବୋଲି ପୋଲିସ ସୂଚନା ଦେଇସାରିଛି ।
ତେବେ ଯେଉଁ ଯୁବକ ଜଣଙ୍କୁ ପୋଲିସ ଅଟକ ରଖି ପଚରା ଉଚୁରା କରୁଛି ସେ ହେଉଛନ୍ତି ଝୁମା ପଢ଼ୁଥିବା କଲେଜର ଚତୁର୍ଥ ବର୍ଷର କମ୍ପ୍ୟୁଟର ସାଇନ୍ସ ଛାତ୍ର ରାହୁଲ କୁମାର । ରାହୁଲଙ୍କ ଘର ଝାଡ଼ଖଣ୍ଡରେ ବୋଲି ସୂଚନା ଦେଇଛି ପୋଲିସ । ସନ୍ଦେହ କରାଯାଉଛି ଯେ, ରାହୁଲ ଓ ଝୁମାଙ୍କ ମଧ୍ୟରେ ପ୍ରେମ ସଂପର୍କ ଥିଲା । ଉଭୟ ଗୋଟିଏ କଲେଜରେ ମଧ୍ୟ ପାଠ ପଢୁଥିଲେ । ତେବେ କଣ ହେଲା ଯେଉଁ କାରଣରୁ ଜୀବନ ହାରିଲେ ଝୁମା ।
ପୋଲିସର ସୂଚନା ଅନୁସାରେ ବୟଫ୍ରେଣ୍ଡ ରାହୁଲ, ଝୁମା ରହୁଥିବା ହଷ୍ଟେଲ ଆଗରେ ହଙ୍ଗାମା କରିଥିଲେ । ଝୁମା ଫୋନ୍ ନଉଠାଇବାରୁ ସାଇକୋ ଭଳି ବ୍ୟବହାର କରୁଥିଲେ ରାହୁଲ । ପାଟିତୁଣ୍ଡ ଶୁଣି ପାଖଆଖ ଲୋକ ଆସିବା ସହ ପୋଲିସକୁ ଖବର ଦିଆଯାଇଥିଲା । ଏହାପରେ ପୋଲିସ ଆସି ମୃତଦେହ ଉଦ୍ଧାର କରି ପରିବାର ଲୋକଙ୍କୁ ସୂଚନା ପ୍ରଦାନ କରିଥିଲା । ଆଜି ପଶ୍ଚିମବଙ୍ଗରୁ ଝୁମାଙ୍କ ପରିବାର ଲୋକ ଭୁବନେଶ୍ୱରରେ ଆସି ପହଞ୍ଚିଛନ୍ତି । କ୍ୟାପିଟାଲ ହସ୍ପିଟାଲରେ ଝୁମାଙ୍କ ଶବ ବ୍ୟବଚ୍ଛେଦ ପରେ ତାଙ୍କ ପରିବାର ଲୋକଙ୍କୁ ହସ୍ତାନ୍ତର କରାଯିବ ।
ତେବେ ରାହୁଲ କାହିଁକି ବାରମ୍ବାର ଝୁମାଙ୍କୁ ଫୋନ୍ କରୁଥିଲା । ଉଭୟଙ୍କ ମଧ୍ୟରେ କିଛି କଳି ଝଗଡ଼ା ହୋଇଥିଲା କି ? ଉଭୟଙ୍କ ମଧ୍ୟରେ ସତରେ କଣ ଥିଲା ପ୍ରେମ ସଂପର୍କ ? ନା ରାହୁଲ ଝୁମାଙ୍କୁ ଏକତରଫା ପ୍ରେମ କରୁଥିଲେ ? ରାହୁଲ ସ୍ୱଭାବରେ ସାଇକୋ ପ୍ରବୃତ୍ତିର ଥିଲେ କି ? ତାଙ୍କର ଏହି ପ୍ରବୃତ୍ତି ପାଇଁ ଝୁମା ଏଭଳି ଚରମ ପଦକ୍ଷେପ ନେଇ ନାହାନ୍ତି ତ ? ତେବେ ସବୁ କିଛି ସନ୍ଦେହ ଘେରରେ ରହିଛି । ପୋଲିସ ତଦନ୍ତ ପରେ ହିଁ ସବୁ ସତକଥା ସାମ୍ନାକୁ ଆସିବ ବୋଲି କୁହାଯାଉଛି । ଝୁମାଙ୍କ ମୃତ୍ୟୁ ପଛରେ ବୟଫ୍ରେଣ୍ଡ କାରଣ ନା ଅନ୍ୟ କିଛି ଘଟଣା ପାଇଁ ତାଙ୍କର ମୃତ୍ୟୁ ହୋଇଛି ତାହା ତଦନ୍ତ ପରେ ହିଁ ସାମ୍ନାକୁ ଆସିବ ।
ବିଭାଗୀୟ ମନ୍ତ୍ରୀ ଓ ସଚିବଙ୍କ ସହ ପ୍ରଧାନମନ୍ତ୍ରୀ କରିବେ ଆଲୋଚନା, ୨୦୨୦ର ପ୍ରଥମ କ୍ୟାବିନେଟ୍ ଆଜି
ନୂଆଦିଲ୍ଲୀ : ୨୦୨୦ର ପ୍ରଥମ କେନ୍ଦ୍ର କ୍ୟାବିନେଟ୍ ବୈଠକ ଆଜି ପ୍ରବାସୀ ଭାରତୀୟ ସମ୍ମିଳନୀ କକ୍ଷରେ ଅନୁଷ୍ଠିତ ହେବ । ଦୁଇଦିନ ଧରି ଚାଲିବାକୁ ଥିବା ଏହି ବୈଠକରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବିଭିନ୍ନ ବିଭାଗର କାର୍ଯ୍ୟ ସଂପର୍କରେ ସମୀକ୍ଷା କରିବେ । ସଚିବମାନେ ପ୍ରଧାନମନ୍ତ୍ରୀଙ୍କୁ ବିସ୍ତୃତ ଭାବେ ପାଓ୍ୱାର ପଏଣ୍ଟ ମାଧ୍ୟମରେ ଭିଜନ୍-୨୦୨୦ ସଂପର୍କରେ ଅବଗତ କରାଇବେ । ଏହି ବୈଠକ ୨ ଦିନ ଧରି କରାଯିବାର ଯୋଜନା ରହିଛି । ବୈଠକରେ ବିଭନ୍ନ ସମସ୍ୟା ଉପରେ ଆଲୋଚନା କରାଯିବ । ତେବେ ଏହା ପୂର୍ବରୁ ଗତବର୍ଷ ଡିସେମ୍ବର ୨୧ରେ ପ୍ରଧାନମନ୍ତ୍ରୀ ଏଭଳି ଏକ ବୈଠକ କରିଥିଲେ । ମନ୍ତ୍ରୀପରିଷଦରେ ସବୁ ମନ୍ତ୍ରୀ ସାମିଲ ହେବାର ପୂର୍ବ ସୂଚନା ରହିଛି । ତେବେ ଆସନ୍ତା ସପ୍ତାହରେ ମଧ୍ୟ ଏହି ବୈଠକ ଆଉ ଥରେ ହେବାର ସମ୍ଭାବନା ରହିଛି ।
ପ୍ରଧାନମନ୍ତ୍ରୀ ମୋଦି ତାଙ୍କର ସବୁ ମନ୍ତ୍ରୀଙ୍କ ସହ ବୈଠକ ଡାକିଛନ୍ତି । ଆଜି ଓ ଶନିବାରରେ ହେବାକୁ ଥିବା ଏହି ମାରାଥନ ବୈଠକରେ ଏପର୍ଯ୍ୟନ୍ତ ସରକାରଙ୍କ ଦ୍ୱାରା ନିଆଯାଇଥିବା ବିଭିନ୍ନ ପଦକ୍ଷେପର କାର୍ଯ୍ୟକାରିତା ଏବଂ ଆଗକୁ ହେବାକୁ ଥିବା ଯୋଜନା ଉପରେ ସମୀକ୍ଷା କରାଯିବ । ଏହାସହ ନିଜ ନିଜ ମନ୍ତ୍ରାଳୟକୁ ନେଇ କିଛି ନୂଆ ଯୋଜନାକୁ ଉପସ୍ଥାପନା କରିବାକୁ ନିର୍ଦ୍ଦେଶ ଦିଆଯାଇଛି । ତେବେ ଆଜି ଓ ଶନିବାର ଛଡ଼ା , ଏହି ବୈଠକ ୭,୮ ଓ ୧୦,୧୧ ତାରିଖରେ ହେବା ନେଇ ସମ୍ଭାବନା ରହିଛି ।
ବେଙ୍ଗଳୁରୁରେ ୧୦୭ତମ ଭାରତୀୟ ବିଜ୍ଞାନ କଂଗ୍ରେସ, ଗବେଷଣା ଉପରେ ପ୍ରଧାନମନ୍ତ୍ରୀଙ୍କ ଗୁରୁତ୍ୱ
ବେଙ୍ଗଳୁରୁ : ଭାରତୀୟ ବିଜ୍ଞାନ କଂଗ୍ରେସର ୧୦୭ତମ ଅଧିବେଶନ ବେଙ୍ଗଳୁରୁରେ ଉଦଘାଟିତ ହୋଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏଥିରେ ମୁଖ୍ୟ ଅତିଥିଭାବେ ଯୋଗଦେଇ ଭାରତର ଗବେଷଣା ଏବଂ ମହାକାଶ ବିଜ୍ଞାନ କ୍ଷେତ୍ରରେ ଉଲ୍ଲେଖନୀୟ ଅବଦାନ ସଂପର୍କରେ ଆଲୋକପାତ କରିଛନ୍ତି ।
ପ୍ରଧାନମନ୍ତ୍ରୀ କହିଛନ୍ତି ଯେ, ନୂଆବର୍ଷରେ ତାଙ୍କର ପ୍ରଥମ କାର୍ଯ୍ୟକ୍ରମ ଓ ଦଶନ୍ଧି ଆରମ୍ଭରୁ କାର୍ଯ୍ୟକ୍ରମ ବିଜ୍ଞାନ ସମ୍ବନ୍ଧିତ ରହିଛି । ଏବଂ ସଂଯୋଗ ବସତ ଏ କାର୍ଯ୍ୟକ୍ରମ ବେଙ୍ଗଳୁରୁର ସହରରେ ହିଁ ହେଉଛି ଯାହାର ବିଜ୍ଞାନ ଓ ଉଦ୍ଭାବନ ସହିତ ଖୁବ୍ ଅଧିକ ସଂପର୍କ ରହିଛି ।
ଭାରତର ସ୍ଥାନ ଇନୋଭେସନ୍ ଇନ୍ଡେକ୍ସରେ ୫୨କୁ ଉଠିବା ଏକ ଖୁସି ଖବର ବୋଲି ମୋଦି କହିଛନ୍ତି । ଗତ ୫ ବର୍ଷ ମଧ୍ୟରେ ବିଭିନ୍ନ ସରକାରୀ ଯୋଜନା ବୈଷୟିକ କ୍ଷେତ୍ରରେ ଉଲ୍ଲେଖନୀୟ ସହାୟତା ପ୍ରଦାନ କରିଛି । ଏଥିରେ ବୈଜ୍ଞାନିକଙ୍କ କାର୍ଯ୍ୟକ୍ରମକୁ ମୋଦି ବେଶ୍ ପ୍ରଶଂସା କରିଛନ୍ତି ।
ଭାରତରେ ଥିବା ସର୍ବବୃହତ୍ ସାମୁଦ୍ରିକ ଜଳରାଶି, ଶକ୍ତି, ଖାଦ୍ୟ ଓ ଖଣିଜ ପଦାର୍ଥରେ ଅଧିକ କାର୍ଯ୍ୟର ଆବଶ୍ୟକତା ଥିବା ପ୍ରଧାନମନ୍ତ୍ରୀ କହିଛନ୍ତି । ଗଭୀର ସମୁଦ୍ରରେ ଆମର ମହାକାଶ କାର୍ଯ୍ୟକଳାପର ପ୍ରତିଫଳନ ହେବା ଦରକାର ବୋଲି ମଧ୍ୟ ଗୁରୁତ୍ୱାରୋପ କରିଛନ୍ତି ମୋଦି ।
ସ୍ତ୍ରୀକୁ ହତ୍ୟା କରି ସ୍ୱାମୀର ଆତ୍ମସମର୍ପଣ
ଝାରସୁଗୁଡ଼ା: ପତ୍ନୀକୁ ହତ୍ୟା ପରେ ଫାଣ୍ଡିରେ ଆତ୍ମସମର୍ପଣ କଲା ସ୍ୱାମୀ । ଝାରସୁଗୁଡ଼ା ସାହାସପୁର ଫାଣ୍ଡି ପାକେଲପଡ଼ାର ଘଟିଛି ଏଭଳି ଅଭାବନୀୟ ଘଟଣା । ମୃତକ ହେଲେ ହୀରାମତି ସ୍ୱାଇଁ ।
ହୀରାମତିଙ୍କ ବେକକୁ ଲୁଙ୍ଗିରେ ଗୁଡ଼ାଇ ହତ୍ୟା କରିଛି ସ୍ୱାମୀ । ହତ୍ୟା ପରେ ପତ୍ନୀହନ୍ତା ସ୍ୱାମୀ ଡିଲେଶ୍ୱର ଛୁରା ସାହାସପୁର ଫାଣ୍ଡିରେ ଆତ୍ମସମର୍ପଣ କରିଛି । ଘରୋଇ କଳହକୁ କେନ୍ଦ୍ରକରି ହତ୍ୟାକାଣ୍ଡ ଘଟିଥିବା ପୋଲିସ ସୂଚନା ଦେଇଛି । ଅଭିଯ଼ୁକ୍ତ ସ୍ୱାମୀଙ୍କୁ ଅଟକ ରଖିବା ସହ ଘଟଣାସ୍ଥଳରେ ତଦନ୍ତ ଆରମ୍ଭ କରିଛି ପୋଲିସ ।
ଛତ୍ରପୁରର ପୂର୍ବତନ ବିଧାୟକ ଦୈତାରୀ ବେହେରାଙ୍କ ମୃତ୍ୟୁ, ମୁଖ୍ୟମନ୍ତ୍ରୀଙ୍କ ଶୋକ
ଭୁବନେଶ୍ୱର : ଛତ୍ରପୁରର ପୂର୍ବତନ ବିଧାୟକ ଦୈତାରୀ ବେହେରାଙ୍କର ୮୫ ବର୍ଷ ବୟସରେ ମୃତ୍ୟୁ ହୋଇଛି । ତାଙ୍କ ମୃତ୍ୟୁରେ ଶୋକ ପ୍ରକାଶ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏ ନେଇ ସେ ଟ୍ୱିଟରରେ ଦୁଃଖ ପ୍ରକାଶ କରିବା ସହ ସ୍ଥାନୀୟ ଅଞ୍ଚଳ ପାଇଁ ତାଙ୍କର ଅବଦାନ ସବୁବେଳେ ସ୍ମରଣୀୟ ହୋଇ ରହିବ ବୋଲି କହିଛନ୍ତି । ମୁଖ୍ୟମନ୍ତ୍ରୀ ଲେଖିଛନ୍ତି ଯେ…
‘ଛତ୍ରପୁରର ପୂର୍ବତନ ବିଧାୟକ ଦୈତାରୀ ବେହେରାଙ୍କ ଦେହାନ୍ତ ବିଷୟରେ ଜାଣି ମୁଁ ଦୁଃଖିତ। ବିଧାୟକ ଭାବେ ସ୍ଥାନୀୟ ଅଞ୍ଚଳର ବିକାଶ ପାଇଁ ସେ କରିଥିବା ଉଦ୍ୟମ ସର୍ବଦା ସ୍ମରଣୀୟ ରହିବ। ତାଙ୍କ ଅମର ଆତ୍ମାର ସଦଗତି କାମନା କରିବା ସହିତ ଶୋକସନ୍ତପ୍ତ ପରିବାରବର୍ଗଙ୍କ ପ୍ରତି ମୋର ସମବେଦନା ଜଣାଉଛି।’ ବୋଲି ଉଲ୍ଲେଖ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।