ହାଇଦ୍ରାବାଦ ‘ନିର୍ଭୟା’ ଘଟଣାକୁ ନେଇ ସବୁଠି ଆକ୍ରୋଶ, ସଂସଦରେ ଏମିତି କହିଲେ ଜୟା ବଚ୍ଚନ
ଭୁବନେଶ୍ୱର : ହାଇଦ୍ରାବାଦରେ ମହିଳା ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ଘଟଣାକୁ ନେଇ ସାରା ଦେଶରେ ପ୍ରବଳ ଆକ୍ରୋଶ ଦେଖିବାକୁ ମିଳିଛି । ସଂସଦରୁ ସଡ଼କ ସବୁଠି ପ୍ରତିବାଦ ତୀବ୍ର ହେଲାଣି । ଦୋଷୀଙ୍କୁ ଶୀଘ୍ର ଦଣ୍ଡ ଦେବାକୁ ଦାବି ହେଉଥିବା ବେଳେ, ବହୁ ସଂଗଠନ ଫାଶୀ ଦେବାକୁ ଦାବି କରୁଛନ୍ତି ।
ଆଜି ରାଜ୍ୟସଭାରେ ସାଂସଦ ଜୟା ବଚ୍ଚନ କହିଛନ୍ତି ଯେ, ଅଭିଯୁକ୍ତଙ୍କୁ କଠୋରରୁ କଠୋର ଦଣ୍ଡ ଦେବା ଦରକାର । ସେମାନଙ୍କୁ ସାଧାରଣ ଲୋକଙ୍କୁ ହସ୍ତାନ୍ତର କରାଯାଉ । ଲୋକେ ପ୍ରକୃତ ନ୍ୟାୟ ଦେବେ । କିଛି ଅଧିକାରୀ ସେମାନଙ୍କର କାମ ମଧ୍ୟ ଠିକରେ କରିନାହାନ୍ତି ତେଣୁ ସେମାନଙ୍କୁ ମଧ୍ୟ ଦଣ୍ଡ ଦିଆଯିବା ଦରକାର । ଲୋକସଭାରେ ସବୁ ଦଳର ସାଂସଦ ଏହାକୁ ନେଇ ପ୍ରତିକ୍ରିୟା ପ୍ରକାଶ କରିଥିଲେ । ଦେଶରେ ଏଭଳି ଘଟଣା ମାନବିକତା ପ୍ରତି ଲଜ୍ୟା ବୋଲି କହିଥିଲେ । ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ କହିଥିଲେ ଯେ, ସରକାର ଆହୁରି କଡ଼ା ଆଇନ୍ ଆଣିବାକୁ ପ୍ରସ୍ତୁତ ଅଛନ୍ତି । ବିଜେଡି ସାଂସଦମାନେ ମଧ୍ୟ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଓ ମହିଳାଙ୍କୁ ସୁରକ୍ଷା ନେଇ ପ୍ରସ୍ତାବ ରଖିଥିଲେ ।
ସଂସଦ ପରିସରରେ ଥିବା ଗାନ୍ଧି ମୂର୍ତ୍ତି ତଳେ ତେଲେଙ୍ଗାନାର ସାଂସଦମାନେ ପ୍ରତିଦାବ କରିଥିଲେ । ହାଇଦ୍ରାବାଦରେ ମଧ୍ୟ ତୃତୀୟ ଦିନ ପାଇଁ ଜୋରଦାର ପ୍ରତିବାଦ ଜାରି ରହିଛି । ଗତକାଲି କୋର୍ଟ ରୁମକୁ କଡ଼ା ସୁରକ୍ଷା ମଧ୍ୟରେ ଅଭିଯୁକ୍ତଙ୍କୁ ନିଆଯାଉଥିବା ବେଳେ ଢେଲା ପଥର ମାଡ଼ କରିଥିଲେ ସ୍ଥାନୀୟ ଲୋକେ । ଡାକ୍ତରାଣୀଙ୍କୁ ନ୍ୟାୟ ଦେବାକୁ ଦେଶର ସବୁ ସହରରେ ଆନ୍ଦୋଳନ ହେଉଛି । କେନ୍ଦ୍ର ଗୃହ ମନ୍ତ୍ରାଳୟ ଏ ଘଟଣାକୁ ନେଇ ରିପୋର୍ଟ ମାଗିବା ସହ ଅନୁଧ୍ୟାନ କରୁଛି ।
https://nandighoshatv.comburnt-body-of-woman-veterinary-doctor-found-two-suspects-detained/
ଦୋଷୀଙ୍କୁ ଫାଶୀ ଦେବାକୁ ବିଭିନ୍ନ ସଂଗଠନ ପକ୍ଷରୁ ଦାବି କରାଯାଉଛି । ସେପଟେ ୪ ଅଭିଯୁକ୍ତ ଏବେ ବିଚାର ବିଭାଗୀୟ ହାଜତରେ ଅଛନ୍ତି । ଅଧିକ ୧୦ ଦିନ ରିମାଣ୍ଡରେ ନେବାକୁ ପୋଲିସ ଆବେଦନ କରିବ ବୋଲି ଜଣାପଡ଼ିଛି ।
https://nandighoshatv.comanother-woman-brunt-dead-body-recovered-hyderabad/
ରାଷ୍ଟ୍ରପତିଙ୍କ ଗସ୍ତ ନେଇ ଡିଜିପିଙ୍କ ବୈଠକ, ମୁତୟନ ହେବେ ୫୦ ପ୍ଲାଟୁନ ପୋଲିସ ଫୋର୍ସ
ଭୁବନେଶ୍ୱର: ଓଡ଼ିଶା ଆସୁଛନ୍ତି ରାଷ୍ଟ୍ରପତି ରାମନାଥ କୋବିନ୍ଦ । ଆସନ୍ତା ୭ ତାରିଖରେ ଦୁଇ ଦିନିଆ ଓଡ଼ିଶା ଗସ୍ତରେ ଆସୁଛନ୍ତି ରାଷ୍ଟ୍ରପତି ରାମନାଥ କୋବିନ୍ଦ । ଏଥିପାଇଁ ଭୁବନେଶ୍ୱରରେ ପୋଲିସ ଡିଜିଙ୍କ କ୍ୟାମ୍ପ ଅଫିସରେ ସୁରକ୍ଷା ବ୍ୟବସ୍ଥାର ସମୀକ୍ଷା କରିଛନ୍ତି ଅନ୍ତରୀଣ ଡିଜିପି ସତ୍ୟଜିତ୍ ମହାନ୍ତି । ୭ ତାରିଖ ସନ୍ଧ୍ୟାରେ ରାଷ୍ଟ୍ରପତି ଭୁବନେଶ୍ୱରରେ ପହଞ୍ଚିବା ପରେ ରାଜଭବନରେ ରାତ୍ରି ଯାପନ କରିବେ । ୮ ତାରିଖ ସକାଳ ସାଢେ ୧୦ଟାରେ ଖୋର୍ଦ୍ଧା ବରୁଣେଇ ପାଇକ ମହୋତ୍ସବରେ ଯୋଗଦେବ ରାଷ୍ଟ୍ରପତି । ଅପରାହ୍ନରେ ଉତ୍କଳ ବିଶ୍ୱବିଦ୍ୟାଳୟର ପ୍ଲାଟିନମ ଜୁବଲି କାର୍ଯ୍ୟକ୍ରମରେ ଯୋଗଦେବେ ।
୮ ତାରିଖ ସନ୍ଧ୍ୟା ୫ଟା ୨୦ରେ ଭୁବନେଶ୍ୱର ବିମାନ ବନ୍ଦରରୁ ରାଷ୍ଟ୍ରପତି ଦିଲ୍ଲୀ ଫେରିଯିବେ । ରାଷ୍ଟ୍ରପତିଙ୍କ ଗସ୍ତ ପାଇଁ ୫୦ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯିବ । ଜଣେ ଏସିପି ପାହ୍ୟାର ପୋଲିସ ଅଧିକାରୀ କାର୍କେଡ୍ ଦାୟିତ୍ୱରେ ରହିବେ । ଖୋର୍ଦ୍ଧା ପୋଲିସ ଓ କମିଶନରେଟ ପୋଲିସ ମଧ୍ୟରେ ସମନ୍ୱୟ ରକ୍ଷା ଉପରେ ଗୁରୁତ୍ୱ ଦିଆଯାଇଛି । ଭୁବନେଶ୍ୱର ବିମାନବନ୍ଦର, ରାଜଭବନ, ଖୋର୍ଦ୍ଧା, ବାଣୀବିହାର ଏବଂ ରୁଟ୍ ଲାଇନରେ ବ୍ୟାପକ ସୁରକ୍ଷା ବ୍ୟବସ୍ଥା କରାଯିବ ବୋଲି ଅନ୍ତରୀଣ ପୋଲିସ ଡିଜି କହିଛନ୍ତି । ଅନ୍ତରୀଣ ଡିଜିପି ସତ୍ୟଜିତ ମହାନ୍ତିଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ପୋଲିସ କମିଶନର, ଆଇନ ଶୃଙ୍ଖଳା ଏଡିଜି, ଆଇଜି ଅପରେସନ, ଆଇଜି ଗୁଇନ୍ଦା, ଭୁବନେଶ୍ୱର ଡିସିପି, ସିଆଇଏସ୍ଏଫ୍, ଏୟାରପୋର୍ଟ କର୍ତ୍ତୃପକ୍ଷ ପ୍ରମୁଖ ଉପସ୍ଥିତ ଥିଲେ ।
https://nandighoshatv.compresident-kovind-will-come-utkal-university/
ପୁରୀ ଆକାଶରେ ଘୂରି ବୁଲୁଛି ବିକାଶର ପକ୍ଷୀ; ଭାଇରାଲ ହେଲା ନବୀନଙ୍କ ଭିଡିଓ
ସେଠି ଶ୍ରୀମନ୍ଦିର ଅଛି। ସେଠି ସଂସ୍କୃତି ଅଛି। ସେଠି ସମୃଦ୍ଧି ବି ଅଛି। ହେଲେ ଶ୍ରୀକ୍ଷେତ୍ର ଦିନେ ତାଳପତ୍ର ପୋଥିରେ ସ୍ମୃତି ହୋଇ ରହିଯିବନି ତ ? ଆଜି ଯାହା ସମୃଦ୍ଧି କାଲି ତାହା ସଂସ୍କୃତି । ବିଶ୍ୱର ଅନେକ ପୁରାତନ ସମୃଦ୍ଧି ଓ ସଂସ୍କୃତି ଆଜି କେବଳ ବଞ୍ଚି ରହିଛନ୍ତି ଇତିହାସ ପୃଷ୍ଠାରେ । ସମୟ ସହ ସଂସ୍କୃତି କଣଠେସା ହୋଇଯାଏ, ପୋଥିବିଡ଼ା, ସ୍ମୃତି ଓ ବିଶ୍ୱାସ ଭିତରେ ।
ସମୟ ଗତିଶୀଳ । ସମୃଦ୍ଧି ଓ ବିକାଶ ଏହା ସହ ତାଳ ଦେଇ ଆଗକୁ ପାଦ ନଥାପିଲେ ସଂସ୍କୃତି ବଞ୍ଚି ରହି ପାରିବନି । ଏଭଳି ଏକ ଘଡିସନ୍ଧି ମୁହୂର୍ତ୍ତରେ ଭବିଷ୍ୟତ ପିଢ଼ି ପାଇଁ ଆମ ଜଗନ୍ନାଥ ସଂସ୍କୃତିକୁ ବଞ୍ଚାଇ ରଖିବାକୁ ଏକମାତ୍ର ଉପାୟ ହେଉଛି ଶ୍ରୀକ୍ଷେତ୍ରର ବିକାଶ ଓ ସମୃଦ୍ଧି । ହୁଏତ ଏ ବାସ୍ତବତାକୁ ଅନୁଭବ କରି ପାରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ବିଗତ ଦିନର ଉତ୍କର୍ଷକୁ ମନେ ପକାଇ ପୁରୀକୁ ଆଗାମୀ ଶହ ଶହ ବର୍ଷ ପାଇଁ ଓଡ଼ିଆ ସମୃଦ୍ଧିର ପରିଚୟ ଭାବେ ନବ ନିର୍ମାଣ କରିବାକୁ ଆଗେଇ ଆସିଛନ୍ତି ସେ ।
ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଟ୍ୱିଟର ପେଜ୍ରେ ପୋଷ୍ଟ ହୋଇଥିବା ଏକ ସନ୍ଦେଶଭରା ଭିଡିଓ ସୋସିଆଲ୍ ମିଡିଆରେ ଭିନ୍ନ ଏକ ଆବେଗ ସୃଷ୍ଟି କରିଛି ।
ଭାବାବେଗ ଓ ଭାବପ୍ରବଣତାର ଏକ ଫେଣ୍ଟାଫେଣ୍ଟି ଅନୁଭୂତି ଭିତରେ ଶ୍ରୀମନ୍ଦିର ଓ ଶ୍ରୀକ୍ଷେତ୍ରର ବିକାଶ ପାଇଁ ରାଜ୍ୟ ସରକାର ଆଙ୍କିଥିବା ନକ୍ସାକୁ ଅତି ସୁନ୍ଦର ଭାବେ ଉପସ୍ଥାପନ କରାଯାଇଛି ଏହି କ୍ଷୁଦ୍ର ସିନେମାରେ । ସୁକ୍ଷ୍ମ କାରୁକାର୍ଯ୍ୟଭରା ତାଳପତ୍ର ପୋଥିରୁ ଜୀବନ୍ୟାସ ପାଉଛି ବିକାଶର ବିହଙ୍ଗ । ସୌନ୍ଦର୍ଯ୍ୟର ଡେଣା ଝାଡ଼ି, ବିକାଶର ବାର୍ତ୍ତା ବୁଣି ସେ ଉଡ଼ି ଚାଲୁଛି ନିବିଡ଼ ସଂସ୍କୃତିରୁ ଅସୀମ ସମୁଦ୍ର ଆକାଶକୁ । କେତେ କଥା, କେତେ କାହାଣୀ, କେତେ କିମ୍ବଦନ୍ତୀ । ପୁଣି କେତେ ବିଶ୍ୱାସ । ….ଏ ସବୁକୁ ଜାବୁଡ଼ି ଧରି କାଳିଆ ସାଆନ୍ତଙ୍କ ଶ୍ରୀକ୍ଷେତ୍ରର ସମୃଦ୍ଧ ସଂସ୍କୃତି କେମିତି ସବୁ ସମୟରେ ସତେଜ ରହିବ ସେ ନେଇ ବାର୍ତ୍ତା ଦେଉଛି ଏ ପକ୍ଷୀ ।
ପାଞ୍ଚ ପାଞ୍ଚଥରର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓଡ଼ିଆଙ୍କ ଆବେଗକୁ ବୁଝନ୍ତି । ସେ ଅନୁଭବ କରିଛନ୍ତି ପୁରୀ ସହ ଏ ଜାତିର ଆବେଗ ଜଡ଼ିତ । ପୁରୀର ଦାଣ୍ଡ ହେଉଛି ବଡ଼ଦାଣ୍ଡ, ଶ୍ରୀଜଗନ୍ନାଥ ହେଉଛନ୍ତି ବଡ଼ ଠାକୁର, ପୁରୀ ମନ୍ଦିର ହେଉଛି ବଡ଼ ଦେଉଳ । ଆଉ ପୁରୀ ସମୁଦ୍ରର ଦୃଶ୍ୟ ଅତୁଳନୀୟ । ଏଠି ସବୁ ବଡ଼, ସବୁ ଅଦ୍ୱିତୀୟ, ସବୁ ସ୍ୱତନ୍ତ୍ର । ଏହାର ବିକଳ୍ପ ନା କେଉଁଠି ଅଛି, ନାଁ କେଉଁଠି ହୋଇପାରିବ ।
ହେଲେ ବାସ୍ତବରେ କିନ୍ତୁ ବଡ଼ଦାଣ୍ଡ ଦିନକୁ ଦିନ ସଂକୁଚିତ ହୋଇଯାଉଥିଲା । ବଡ଼ ଦେଉଳର ଚାରିପାଖ ଜବରଦଖଲ ଯୋଗୁଁ ଶ୍ରୀମନ୍ଦିରର ସୌନ୍ଦର୍ଯ୍ୟ ହାନି ହେଉଥିଲା । ସବୁ କିଛି ଶୃଙ୍ଖଳିତ କରିବାକୁ ମୁଖ୍ୟମନ୍ତ୍ରୀ ଏକ ବଡ଼ ପଦକ୍ଷେପ ନେଇଛନ୍ତି । ପୁରୀ ସହରର ନବକଳେବର ପାଇଁ ମୁଖ୍ୟମନ୍ତ୍ରୀ ଏକ ଐତିହାସିକ ନିଷ୍ପତ୍ତି ନେଇଛନ୍ତି । ଶ୍ରୀମନ୍ଦିର ଚତୁଃପାର୍ଶ୍ୱରୁ ୭୫ ମିଟର ପରିଧି ପର୍ଯ୍ୟନ୍ତ ଜବରଦଖଲ ଉଚ୍ଛେଦ ପରେ ଥଇଥାନ ଓ ବିକାଶମୂଳକ କାର୍ଯ୍ୟ ପାଇଁ ତୁରନ୍ତ ୫ଶହ କୋଟି ଟଙ୍କାର ପ୍ୟାକେଜ୍ ଘୋଷଣା କରିଛନ୍ତି । ବଡ଼ଠାକୁରଙ୍କ ନବକଳେବର ପାରମ୍ପରିକ ରୀତିନୀତି ଅନୁଯାୟୀ ହେଉଥିବା ବେଳେ ନବୀନ ପଟ୍ଟନାୟକ ହେଉଛନ୍ତି ପ୍ରଥମ ମୁଖ୍ୟମନ୍ତ୍ରୀ ଯିଏ ପୁରୀ ସହରର ନବକଳେବର ପାଇଁ ଏକ ମନେ ରଖିବା ଭଳି ନିଷ୍ପତ୍ତି ନେଇଛନ୍ତି ।
TVDS ଓ ସିସିଟିଭିରେ ଧରାପଡ଼ିଲେ ୯୫ ଜଣ ଟ୍ରାଫିକ ନିୟମ ଉଲ୍ଲଂଘନକାରୀ
ଭୁବନେଶ୍ୱର(ଅରୁଣ ସାହୁ): ନୂଆ ଟ୍ରାଫିକ ନିୟମ ଲାଗୁ ପରେ ରାଜଧାନୀରେ ଚାଲିଛି ଜୋରଦାର ଚେକିଂ । ଦ୍ୱିତୀୟ ଦିନରେ ଭୁବନେଶ୍ୱରରେ ନିୟମ ଭାଙ୍ଗିବା ଅଭିଯୋଗରେ ୨୭ଟି ଜାଗାରେ ଚେକିଂ କରାଯିବା ସହ ଆଇନ ଉଲ୍ଲଂଘନକାରୀଙ୍କ ବିରୋଧରେ କଟିଛି ଇ-ଚାଲାଣ । ଅନ୍ୟପଟେ ରାଜଧାନୀରେ TVDS ଓ ସିସିଟିଭିରେ ୯୫ ଜଣ ଟ୍ରାଫିକ ନିୟମ ଉଲ୍ଲଂଘନକାରୀ ଚିହ୍ନଟ ହୋଇଛନ୍ତି । ସେମାନଙ୍କ ବିରୋଧରେ ମଧ୍ୟ ଇ-ଚାଲାଣ କାଟିଛି ପୋଲିସ ।
ସିସିଟିଭି କାଟିଲା ଇ-ଚାଲାଣ । TVDS ଦେଲା ଉଲ୍ଲଂଘନର ପ୍ରମାଣ । ଚିହ୍ନଟ ହୋଇଛନ୍ତି ଆଇନ ଖିଲାପକାରୀ ବାଇକ ଆରୋହୀ । ରଙ୍ଗ ରୁଟ ହେଉକି, ସ୍ପିଡ ବାଇକ ଡ୍ରାଇଭିଂ, ବିନା ହେଲମେଟ ଓ ସିଟ ବେଲ୍ଟ ନ ପିନ୍ଧି ଗାଡ଼ି ଚଳାଇ ଟ୍ରାଫିକ ନିୟମ ଭାଙ୍ଗିଥିବା ପ୍ରମାଣ ପାଇଛି ପୋଲିସ । ରୁପାଲି ଛକରେ ଲାଗିଥିବା ଟ୍ରାଫିକ ଭାଓଲେସନ ଡିକ୍ଟେସନ୍ ସିଷ୍ଟମ ଦ୍ଵାରା ଚିହ୍ନଟ ହୋଇଛନ୍ତି ୩୬ ଜଣ ଉଲ୍ଲଂଘନକାରୀ । ଅନ୍ୟପଟେ ସହରର ପ୍ରମୁଖ ଛକରେ ଲାଗିଥିବା ସିସିଟିଭିରେ ୫୯ ଜଣ ଟ୍ରାଫିକ ନିୟମ ଉଲ୍ଲଂଘନ କରିଥିବା ଚିହ୍ନଟ ହୋଇଛନ୍ତି । ଟ୍ରାଫିକ ପୋଲିସ ୯୫ ଜଣଙ୍କ ଘରକୁ ଡାକରେ ଇ-ଚାଲାଣ ପଠାଇଛି ।
ଅନ୍ୟପଟେ ଭୁବନେଶ୍ୱରରେ ଦ୍ୱିତୀୟ ଦିନରେ ପଟିଆ, ନାଲକୋ, ଜୟଦେବ ବିହାର, କଳ୍ପନା ସମେତ ୨୭ଟି ଛକରେ ଜୋରଦାର ଚେକିଂ କରିଛି ପୋଲିସ । ନୂଆ ଟ୍ରାଫିକ ନିୟମ ଲାଗୁ ହେବା ପରେ ଜାତୀୟ ରାଜପଥ ଓ ସହର ଭିତରେ ଗାଡି ସ୍ପିଡ ଲିମିଟ୍ କରିଛି କମିଶନରେଟ ପୋଲିସ । ଭୁବନେଶ୍ୱର ଦେଇ ଯାଉଥିବା ଜାତୀୟ ରାଜପଥରେ ଗାଡିର ବେଗ ୭୦ କିଲୋମିଟର ଓ ସହର ଭିତରେ ଗାଡିର ବେଗ ୫୦ କିଲୋମିଟର ଘଣ୍ଟା ପ୍ରତି ରହିବ । ଅନ୍ୟପଟେ ମେଡିକାଲ ଓ ଶିକ୍ଷାନୁଷ୍ଠାନ ଅଞ୍ଚଳରେ ସ୍ପିଡ ଲିମିଟ୍ ୨୦ରୁ ୩୦ କିଲୋମିଟର ରହିବ । ଏହାକୁ ଖିଲାପ କଲେ କାର୍ଯ୍ୟାନୁଷ୍ଠାନ ହେବ ବୋଲି କହିଛନ୍ତି ଟ୍ରାଫିକ ଡିସିପି ।
ନୂଆ ନିୟମ ଲାଗୁ ହେବା ପରେ ଓଡ଼ିଶାରେ ସେପ୍ଟେମ୍ବର ମାସ ଅପେକ୍ଷା ନଭେମ୍ବର ମାସରେ ମଦ୍ୟପ ଗାଡ଼ି ଚାଳକଙ୍କ ସଂଖ୍ୟା କମିଛି । ସେପ୍ଟେମ୍ବର ମାସରେ ୨୩୯୪ ଜଣ ଗିରଫ ହୋଇଥିବା ବେଳେ ଅକ୍ଟୋବର ମାସରେ ୩୪୬୨ ଜଣ ଓ ନଭେମ୍ବର ମାସରେ ୨୭୨୭ ଜଣ ମଦ୍ୟପାନ କରି ଗାଡ଼ି ଚଳାଇ ଗିରଫ ହୋଇଛନ୍ତି । ନଭେମ୍ବର ମାସରେ ସର୍ବାଧିକ ଗଞ୍ଜାମ ଜିଲ୍ଲାରେ ୬୦୮ ଜଣ ମଦୁଆ ଡ୍ରାଇଭରଙ୍କୁ ଗିରଫ କରିଛି ପୋଲିସ ।
ପ୍ରିୟଙ୍କା ଗାନ୍ଧିଙ୍କ ସହ ସେଲଫି ନେବାକୁ ଘରକୁ ପଶିଗଲେ ଅଜଣା ଯୁବକ
ନୂଆଦିଲ୍ଲୀ : କଂଗ୍ରେସର ସାଧାରଣ ସଂପାଦିକା ପ୍ରିୟଙ୍ଗା ଗାନ୍ଧିଙ୍କ ସୁରକ୍ଷା ଭଙ୍ଗ ନେଇ ସାଂଘାତିକ ଅଭିଯୋଗ । ଗତ ସପ୍ତାହରେ ତାଙ୍କର ବିନା ଅନୁମତିରେ ଜଣେ ବ୍ୟକ୍ତି ଲୋଧି ଇଷ୍ଟେଟ୍ ସ୍ଥିତ ତାଙ୍କ ବାସଭବନକୁ ପଶିଯାଇଥିବା ଅଭିଯୋଗ ହୋଇଛି । ବ୍ୟକ୍ତି ଜଣଙ୍କ ପ୍ରିୟଙ୍କାଙ୍କ ସହ ସେଲଫି ସେବାକୁ ଘରକୁ ଯାଇଥିବା ଜଣାପଡ଼ିଥିଲା ।
ପ୍ରିୟଙ୍କା ଗାନ୍ଧିଙ୍କ କାର୍ଯ୍ୟାଳୟର ସୂଚନା ଅନୁସାରେ, ନଭେମ୍ୱର ୨୫ ତାରିଖରେ ଏକ କାର୍ ପ୍ରିୟଙ୍କାଙ୍କ ଗାର୍ଡେନ ଏରିଆ ମଧ୍ୟକୁ ପ୍ରବେଶ କରିଯାଇଥିଲା । ଏଥିରେ ଜଣେ ମହିଳାଙ୍କ ସମେତ ୫ ଜଣ ବ୍ୟକ୍ତି ଥିଲେ । ସେମାନଙ୍କ ମଧ୍ୟରୁ ଜଣେ ବ୍ୟକ୍ତି କହୁଥିଲା ଯେ, ସେମାନେ ଉତ୍ତର ପ୍ରଦେଶରୁ ଆସିଛନ୍ତି । ପ୍ରିୟଙ୍ଗା ଗାନ୍ଧିଙ୍କ ସହ ସେଲଫି ନେବାକୁ ସେମାନେ ଏତେ ବାଟକୁ ଆସିଥିବା କହିଥିଲେ ।
ତେବେ ସେ ଲୋକଙ୍କୁ ସାକ୍ଷାତ କରିବାକୁ ପ୍ରିୟଙ୍କା ନା ପୂର୍ବରୁ ଅନୁମତି ଦେଇଥିଲେ ନା ସେମାନେ ମଧ୍ୟ ଉପଯୁକ୍ତ ଆବେଦନ କରି ଆସିଥିଲେ । ଏ ସଂପର୍କରେ ସିଆରପିଏଫ୍ ଅଧିକାରୀଙ୍କୁ ମଧ୍ୟ କୌଣସି ସୂଚନା ଦିଆଯାଇନଥିଲା ।
କିଛିଦିନ ତଳେ ପୂର୍ବରୁ ପାଇଆସୁଥିବା ଏସପିଜି ସୁରକ୍ଷାକୁ ହଟାଇ ଗାନ୍ଧି ପରିବାରକୁ ଜେଡ୍ ପ୍ଲସ୍ ସୁରକ୍ଷା ଦିଆଯିବାକୁ ନିଷ୍ପତ୍ତି ନେଇଥିଲା ଗୃହ ମନ୍ତ୍ରାଳୟ । ପ୍ରଧାନମନ୍ତ୍ରୀଙ୍କୁ ଏସପିଜି ସୁରକ୍ଷା ପ୍ରଦାନ କରାଯାଉଛି ।
ଭାରତୀୟ ନୌସେନାର ପ୍ରଥମ ମହିଳା ପାଇଲଟ୍ କାର୍ଯ୍ୟରେ ଯୋଗଦେଲେ
କୋଚି : ଭାରତୀୟ ନୌସେନାର ପ୍ରଥମ ମହିଳା ପାଇଲଟ୍ ଭାବେ ଶିଭାଙ୍ଗି ଆଜିଠାରୁ କୋଚିରେ କାର୍ଯ୍ୟରେ ଯୋଗଦେଇଛନ୍ତି । ଏହି ଅବସରରେ ତାଙ୍କୁ ନୌସେନା ପକ୍ଷରୁ ଭବ୍ୟ ସ୍ୱାଗତ କରାଯାଇଥିଲା । ଅପରେସନାଲ୍ ଟ୍ରେନିଂ ଶେଷ ପରେ ସବ୍-ଲେଫ୍ଟନାଣ୍ଟ ଶିଭାଙ୍ଗି କାର୍ଯ୍ୟାରମ୍ଭ କରିଛନ୍ତି ।
ବିହାରର ମୁଜାଫରପୁରରେ ଜନ୍ମିତ ଶିଭାଙ୍ଗି ଡିଏଭି ପବ୍ଲିକ୍ ସ୍କୁଲରେ ଶିକ୍ଷାଲାଭ ପରେ ନୌସେନାରେ ଯୋଗଦେବାକୁ ପଢ଼ା ଆରମ୍ଭ କରିଥିଲେ । ଗତବର୍ଷ ସେ ନୌସେନାରେ କମିଶନଡ୍ ହୋଇଥିଲେ । ଦ୍ୱିତୀୟ ପର୍ଯ୍ୟାୟ ଟ୍ରେନିଂ ଶେଷ ପରେ ଏବେ ସେ ତୃତୀୟ ପର୍ଯ୍ୟାୟ ଟ୍ରେନିଂ ନେବେ ବୋଲି ଜଣାପଡ଼ିଛି ।
ସବ୍ ଲେଫ୍ଟନାଣ୍ଟ ଶିଭାଙ୍ଗି କୋଚିରେ ଭାରତୀୟ ନୌସେନାର ଡ୍ରୋନିୟର ସର୍ଭେଲାନ୍ସ ଏୟାରକ୍ରାଫ୍ଟ ଉଡ଼ାଇବେ ବୋଲି ଜଣାପଡ଼ିଛି । ଶିଭାଙ୍ଗିଙ୍କୁ ଆଜି ନୌସେନାର ପାରଂମ୍ପରିକ ଓ୍ୱିଙ୍ଗ୍ସ ପ୍ରଦାନ କରିଥିଲେ ଭାଇସ୍ ଆଡମିରାଲ୍ ଏ.କେ ଚାଓ୍ୱଲା । ସେ ଏବେ ସାମ୍ନାରେ ରହି ସୁଦ୍ଧ ସଂପର୍କିତ ସମସ୍ତ କାର୍ଯ୍ୟ ପାଇଁ ପ୍ରସ୍ତୁତ ରହିବେ । କକପିଟରେ ରହି ପୁରା ବିମାନକୁ ନିଜ ଅଧୀନରେ ରଖିବେ । ତେବେ ଉଭୟ ପୁରୁଷ ଓ ମହିଳାଙ୍କ ପାଇଁ ନୌସେନାରେ ଏହା ସମାନ ପାଠ୍ୟକ୍ରମ ଓ ତାଲିମ୍ ରହିଥିବା ଭାଇସ୍ ଆଡମିରାଲ୍ କହିଛନ୍ତି ।
