ନନ୍ଦିଘୋଷ ବ୍ୟୁରୋ : ଦିନ ଦ୍ବିପ୍ରହରରେ ବୁଲିଲା ଖଣ୍ଡା । ଗୋଡାଇ ଗୋଡାଇ ଯୁବକଙ୍କୁ ଆକ୍ରମଣ । ଆକ୍ରମଣରେ ଲହୁଲୁହାଣ ଯୁବକ । ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି । ଏପରି ଏକ ସମ୍ବେଦନଶୀଳ ଘଟଣା ଘଟିଛି ପୁରୀ ବଳିଆପଣ୍ଡା ଅଞ୍ଚଳରେ । ଦିନ ଦ୍ବିପ୍ରହରରେ ଖଣ୍ଡା ଦ୍ୱାରା ଆତଙ୍କ ଖେଳାଇ ଦୃର୍ବୃତ୍ତମାନେ ଯୁବକଙ୍କୁ ଆକ୍ରମଣ କରିଥିବା ବେଳେ ଯୁବକ ଜଣଙ୍କ ଗୁରତର ଆହତ ହୋଇଛନ୍ତି । ଆହତ ହୋଇଥିବା ଯୁବକ ଜଣକ ହେଲେ ଅଟୋ ସଂଘ ସଭାପତି ଦୀପ୍ତି ରଞ୍ଜନ ମହାନ୍ତି । ଅଭିଯୁକ୍ତ ରାକେଶ କୁମାର ସାହୁ ଦୀପ୍ତିଙ୍କୁ ଆକ୍ରମଣ କରିଥିବାବେଳେ ଦୀପ୍ତିଙ୍କ ଦେହରେ ବିଭିନ୍ନ ଜାଗାରେ ଖଣ୍ଡା ଚୋଟ ଲାଗିଛି । ସିସିଟିଭିରେ ଆକ୍ରମଣ ବେଳର ଦୃଶ୍ଯ କଏଦ ହୋଇଛି । ଯାହାକୁ ଯାଞ୍ଚ କରୁଛି ପୋଲିସ । ରଥ ଯାତ୍ରା ପାଖେଇ ଆସୁଥିବାବେଳେ ଏପରି ଅପରାଧିକ କାର୍ଯ୍ୟକଳାପ ଲୋକଙ୍କ ସୁରକ୍ଷା ନେଇ ପ୍ରଶ୍ନବାଚୀ ସୃଷ୍ଟି କରିଛି । ପୋଲିସ ସଂପୂର୍ଣ୍ଣ ନିଷ୍କ୍ରିୟ ହୋଇପଡିଛି ବୋଲି ବୋଲି ସାଧାରଣରେ ପ୍ରତିକ୍ରିୟା ପ୍ରକାଶ ପାଇଛି ।
ଇଏ କେବଳ ଟ୍ରେଲର, ପାକିସ୍ତାନକୁ ରାଜନାଥଙ୍କ ଚେତାବନୀ
ନନ୍ଦିଘୋଷ ବ୍ୟୁରୋ : ଟ୍ରେଲର ଦେଖିଲେ ଫିଲ୍ମ ବାକି ଅଛି । ସୁଧୁରିଗଲେ ଭଲ ନହେଲେ କଠୋର ଦଣ୍ଡ ଦିଆଯିବ । ମାତ୍ର ୨୩ ମିନିଟରେ ଖେଳ ଖତମ କରିଦେଲା ସେନା । ଏବେ ପାକିସ୍ତାନକୁ ପରୀକ୍ଷା କରାଯାଉଛି । ପରୀକ୍ଷାରେ ବିଫଳ ହେଲେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବ ବୋଲି ଭୁଜ ଗସ୍ତରେ ଯାଇ ସେନାକୁ ଉଦବୋଧନରେ ଏହା କହିଛନ୍ତି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ । ଗୁଜୁରାଟର ଭୁଜ୍ ଏୟାର ବେସରେ ଯବାନ ଏବଂ ସେନା ଅଧିକାରୀଙ୍କ ସହ ସାକ୍ଷାତ କଲେ ପ୍ରତିରକ୍ଷାମନ୍ତ୍ରୀ ରାଜନାଥ ସିଂହ । ସେ ଦିନକ ପୂର୍ବରୁ ଶ୍ରୀନଗର ମଧ୍ୟ ଗସ୍ତ କରିଥିଲେ। ସେ ସେନାର ସଠିକତାର ସହିତ ଆକ୍ରମଣ କରିବାର କ୍ଷମତାକୁ ପ୍ରଶଂସା କରିଥିଲେ ଏବଂ ଆତଙ୍କବାଦୀମାନଙ୍କୁ ଏକ କଡ଼ା ବାର୍ତ୍ତା ଦେଇଥିଲେ।
ଭାରତ-ପାକିସ୍ତାନ ଯୁଦ୍ଧବିରତି ପରେ, ପ୍ରଧାନମନ୍ତ୍ରୀ ମୋଦିଙ୍କଠାରୁ ଆରମ୍ଭ କରି ସମସ୍ତ ନେତା ସେନାର ମନୋବଳ ବୃଦ୍ଧି କରିବାରେ ବ୍ୟସ୍ତ। ଏହା ପୂର୍ବରୁ, ପ୍ରଧାନମନ୍ତ୍ରୀ ମୋଦି ପଞ୍ଜାବର ଆଦମପୁର ଏୟାରବେସରେ ପହଞ୍ଚି ସେନାଙ୍କୁ ସମ୍ୱୋଧନ କରିଥିଲେ। ଏହା ପରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଗୁରୁବାର ଶ୍ରୀନଗରରେ ପହଞ୍ଚିଥିଲେ ଏବଂ ଆଜି ସେ ଗୁଜରାଟର ଭୁଜ ଏୟାରବେସ୍ ପରିଦର୍ଶନ କରିଥିଲେ। ଏଠାରେ ସେ ସେନା ସୈନିକମାନଙ୍କୁ ଭେଟିଲେ। ଏହା ସହିତ, ସେ ଅପରେସନ ସିନ୍ଦୂର ସମୟରେ ପରିସ୍ଥିତି ବିଷୟରେ ମଧ୍ୟ ସୂଚନା ନେଇଥିଲେ। ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଭୁଜ ଏୟାରବେସରେ ସୈନିକମାନଙ୍କୁ ସମ୍ବୋଧିତ କରିଥିଲେ। ଏଠାରେ ସେ ପାକିସ୍ତାନକୁ ଚେତାବନୀ ଦେଇ କହିଛନ୍ତି ଯେ, ଏପର୍ଯ୍ୟନ୍ତ କେବଳ ଟ୍ରେଲର ଦେଖାଯାଇଛି, ଯଦି ଅସ୍ତ୍ରବିରତି ଭଙ୍ଗ ହୁଏ ତେବେ ଏହାଠୁ ଆହୁରି ଭୟଙ୍କର ହେବ ଆକ୍ରମଣ ।
ଏହା ଛଡା ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ପାକିସ୍ତାନକୁ IMF ପାଣ୍ଠି ଉପରେ ମଧ୍ୟ ପ୍ରଶ୍ନ ଉଠାଇଥିଲେ। ସେ କହିଥିଲେ ଯେ IMF ଟଙ୍କା ଆତଙ୍କବାଦୀଙ୍କ ପାଖରେ ପହଞ୍ଚୁଛି କେମିତି ? କ’ଣ IMF ପରୋକ୍ଷ ଭାବରେ ଆତଙ୍କବାଦକୁ ପାଣ୍ଠି ଯୋଗାଇବାକୁ ଚାହୁଁଛି ? ଯଦି ଚାହୁଁଛି ତେବେ ପାକିସ୍ତାନକୁ ପାଣ୍ଠି ଦେବା ପୂର୍ବରୁ IMFକୁ ଭାବିବା ଉଚିତ ।
କ’ଣ କହିଲେ ପ୍ରତିରକ୍ଷା ମନ୍ତ୍ରୀ?
ରାଜନାଥ ସିଂହ କହିଛନ୍ତି, ମୁଁ ଆଜି ତୁମମାନଙ୍କୁ ଅଭିନନ୍ଦନ ଜଣାଇବା ପାଇଁ ତୁମମାନଙ୍କ ମଧ୍ୟରେ ଆସିଛି। ଆପଣମାନେ ସିନ୍ଦୂର ଅପରେସନରେ ପ୍ରକୃତରେ ଏକ ଚମତ୍କାର କାମ କରିଛନ୍ତି ଏବଂ ଆପଣମାନେ ସାରା ବିଶ୍ୱରେ ଭାରତକୁ ଗର୍ବିତ କରିଛନ୍ତି । ସିନ୍ଦୂର ଅପରେସନ ସମୟରେ ସହିଦ ହୋଇଥିବା ଆମର ସମସ୍ତ ସୈନିକ ଏବଂ ସାଧାରଣ ନାଗରିକଙ୍କୁ ମୁଁ ପ୍ରଣାମ କରୁଛି ଏବଂ ଆହତ ହୋଇଥିବା ଆମର ସାହସୀ ସୈନିକଙ୍କ ଶୀଘ୍ର ଆରୋଗ୍ୟ ପାଇଁ ମୁଁ ଭଗବାନଙ୍କ ନିକଟରେ ପ୍ରାର୍ଥନା କରୁଛି।
ଏହା ଛଡା ସେ କହିଥିଲେ, ‘ଏହା କୌଣସି ଛୋଟ କଥା ନୁହେଁ ଯେ ଆମର ବାୟୁସେନାର ପାକିସ୍ତାନର ପ୍ରତ୍ୟେକ କୋଣରେ ପ୍ରବେଶରେ ପଶି ଆତଙ୍କବାଦୀ ଆଡ୍ଡା ଧ୍ୱଂସ କରିଛି । ହେଲେ ଏବେ ଭାରତର ଲଢ଼ୁଆ ବିମାନଗୁଡ଼ିକ ସୀମା ପାର ନକରି ଏଠାରୁ ଦେଶର ପ୍ରତ୍ୟେକ କୋଣରେ ସିଧାସଳଖ ଆକ୍ରମଣ କରିବାକୁ ସମ୍ପୂର୍ଣ୍ଣ ସକ୍ଷମ।’ ସାରା ବିଶ୍ୱ ଦେଖିଛି ଯେ ଆମେ ପାକିସ୍ତାନ ମାଟିରେ ୯ଟି ଘାଟିକୁ କିପରି ଧ୍ୱଂସ କରିଛୁ।
ଓବିସି ସଂରକ୍ଷଣ ଏକ ଧୋକା ଓ ପ୍ରବଞ୍ଚନା, ରାଜ୍ୟ ସରକାରଙ୍କୁ ଘେରିଲା ବିଜେଡି
ନନ୍ଦିଘୋଷ ବ୍ୟୁରୋ : ସରକାରଙ୍କ ଓବିସି ସଂରକ୍ଷଣ ପ୍ରସଙ୍ଗକୁ ନେଇ ବିଜେପି ସରକାରକୁ ସାମ୍ଵାଦିକ ସମ୍ମିଳନୀରେ କଟୁ ସମାଲୋଚନା କଲା ବିଜେଡି । ଓବିସି ସଂରକ୍ଷଣ ପ୍ରସଙ୍ଗରେ ବିଜେଡି ଓବିସି ସେଲ୍ ଉପସଭାପତି ଅରୁଣ ସାହୁ । ବିଜେପି ସରକାରଙ୍କୁ କଟାକ୍ଷ କରିଛନ୍ତି । ‘ଓବିସି ସଂରକ୍ଷଣ ଏକ ଧୋକ୍କା ଓ ପ୍ରବଞ୍ଛନା’ । ଗତ ବିଧାନସଭାରେ ବିଜେଡି ଏନେଇ ସରକାରଙ୍କୁ ଘେରିଥିଲା । ଉଚ୍ଚ ଶିକ୍ଷାରେ ଓବିସିଙ୍କୁ ସଂରକ୍ଷଣ ନେଇ ଦାବି କରିଥିଲେ ବିରୋଧୀ ଦଳ ନେତା ନବୀନ ପଟ୍ଟନାୟକ । ବିଜେଡିର ଚାପରେ ସରକାର ନଇଁଛନ୍ତି ।
ଆଗାମୀ ୨୧ ତାରିଖରେ ରାଜଭବନ ଆଗରେ ଗଣଧାରଣା ଅନୁଷ୍ଠିତ ହେବ । ମେଡିକାଲ, ଇଞ୍ଜିନିୟରିଂରେ ସଂରକ୍ଷଣ ନଦେବା ଦୁର୍ଭାଗ୍ୟଜନକ ବୋଲି ବିଜେଡି କହିଛି । ଜୁନ୍ ୧୨ ତାରିଖକୁ ବିଜେପି ସରକାରକୁ ବର୍ଷେ ପୁରୁଛି । ସଂରକ୍ଷିତ ବର୍ଗଙ୍କ ପାଇଁ କିଛି କରିନାହାନ୍ତି ସରକାର । ଲୋକଙ୍କୁ ଦେଖାଇବା ପାଇଁ କ୍ୟାବିନେଟରେ ର, ବ, ଟ, କ, ଖ କରି ନିଷ୍ପତ୍ତି ନେଇଛନ୍ତି । ରାଜ୍ୟରେ ଓବିସିଙ୍କ ସଂଖ୍ୟା ୫୪ ପ୍ରତିଶତ । ମେଡିକାଲ, ଇଞ୍ଜିନିୟରିଂ ଓ ବୃତ୍ତିଗତ ଶିକ୍ଷାରେ ପଛୁଆବର୍ଗଙ୍କୁ ସଂରକ୍ଷଣ ମିଳିବା ଆବଶ୍ୟକ । ସେ ଦିଗରେ ସରକାର ନିଷ୍ପତ୍ତି କାହିଁକି ନେଲେନି ? ବିଜେଡି ପଛୁଆବର୍ଗଙ୍କ ପାଇଁ ଉଚ୍ଚଶିକ୍ଷା ସମେତ ମେଡିକାଲ, ଇଞ୍ଜିନିୟରିଂ ଓ ବୃତ୍ତିଗତ ଶିକ୍ଷାରେ ୨୭ ପ୍ରତିଶତ ସଂରକ୍ଷଣ ଦାବି କରିଆସୁଛି । ଏହାର ଅର୍ଥ ସରକାର ଚାହୁଁନାହାନ୍ତି ପଛୁଆବର୍ଗ ଡାକ୍ତର ଓ ଇଞ୍ଜିନିୟର ହୁଅନ୍ତୁ । ଏହା ବିରୋଧରେ ବିଜୁ ଜନତା ଦଳ ଦୁର୍ବାର ଆନ୍ଦୋଳନ କରିବ । ଯେପର୍ଯ୍ୟନ୍ତ ଦାବି ପୂରଣ ନହୋଇଛି ଆନ୍ଦୋଳନ ଜାରି ରହିବ ବୋଲି କହିଛନ୍ତି ବିଜେଡି ଓବିସି ସେଲ୍ ଉପସଭାପତି ଅରୁଣ ସାହୁ ।
ଅପରେସନ ସିନ୍ଦୂରରେ ବିଶ୍ବ ଦେଖିଲା ଭାରତର ଦମ୍ : ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ
ନନ୍ଦିଘୋଷ ବ୍ୟୁରୋ : ଅପରେସନ ସିନ୍ଦୂରରେ ଭାରତର ଦମ୍ ଦେଖିଲା ବିଶ୍ବ। ତିନି ବାହିନୀର ଶକ୍ତି ଦେଖିଲା ଦେଶ। ଭାରତର ସୁରକ୍ଷା ବର୍ତ୍ତମାନ ବଡ଼ ଆହ୍ବାନ ବୋଲି କହିଛନ୍ତି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ। ଗୁଜରାଟ ଭୁଜରେ ରାଜନାଥ କହିଛନ୍ତି,୧୯୬୫ ଯୁଦ୍ଧରେ ଭାରତର ହୋଇଥିଲା ବିଜୟ। ଅପରେସନ ସିନ୍ଦୂରର ନାମ ଦେଇଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଏହି ଅପରେସନ ସିନ୍ଦୂର ନେଇ ସମସ୍ତେ ଗର୍ବିତ। ଏହା ସହ ପାକିସ୍ତାନ ଦେଖିଲା ଭାରତର ଶକ୍ତି। ଏହି ଅପରେସନରେ ଭାରତୀୟ ବାୟୁସେନା ନେଇଥିଲା ପ୍ରମୁଖ ଭୂମିକା। ଏୟାରଫୋର୍ସର ଭୂମିକା ଥିଲା ସବୁଠାରୁ ଗୁରୁତ୍ବପୂର୍ଣ୍ଣ। ଦୁନିଆ ଦେଖିଲା ପାକିସ୍ତାନର ୯ଟି ଠିକଣାକୁ କିପରି ଧ୍ବଂସ କରାଗଲା। ନୂଆ ଭାରତର ସନ୍ଦେଶ ସାରା ବିଶ୍ବରେ ପହଞ୍ଚାଯାଇଛି। ଭାରତ କେବଳ ଆମଦାନୀ ଅସ୍ତ୍ରରେ ଶକ୍ତ ନୁହେଁନିଜ ଅସ୍ତ୍ରରେ ଭାରତ ଦେଖାଇଲା ପରାକ୍ରମ। ଭାରତରେ ନିର୍ମିତ ବ୍ରହ୍ମୋସ ପାକିସ୍ତାନକୁ କରିଥିଲା ଚିତପଟାଙ୍ଗ।
ରାଜନାଥ ଆହୁରି ମଧ୍ୟ କହିଛନ୍ତି, ଭାରତର ଏୟାର ଡିଫେନ୍ସ ସିଷ୍ଟମ ଦେଖାଇଛି ଦମ୍ । ଲସ୍କର ଓ ଜୈସର ଭିତ୍ତିଭୂମିକୁ ଧ୍ବଂସ କରିଦେଲା ଭାରତ। ଆଇଏମଏଫର ଅନୁଦାନ ଆତଙ୍କୀ କାର୍ଯ୍ୟକଳାପରେ ବ୍ୟବହୃତ ହୋଇପାରେ ବୋଲି ଆଶଙ୍କା ବ୍ୟକ୍ତ କରିଛନ୍ତି ରାଜନାଥ। ଏହା ସହ ପାକିସ୍ତାନକୁ ଆର୍ଥିକ ସହାୟତା ଆତଙ୍କୀଙ୍କୁ ସହାୟତା ସହ ସମାନ ବୋଲି ସେ କହିଛନ୍ତି। ଭୁଜର ରୁଦ୍ର ମାତା ଏୟାର ଫୋର୍ସ ଷ୍ଟେସନ ଭାରତୀୟ ବାୟୁସେନାର ଏକ ଗୁରୁତ୍ବପୂର୍ଣ୍ଣ ପ୍ରତିଷ୍ଠାନ। ଭୁଜ ବେସାମରିକ ବିମାନବନ୍ଦରର ରନୱେ ସହ ଏୟାରଫୋର୍ସ ଷ୍ଟେସନ ରନୱେ ସମ୍ପୃକ୍ତ ରହିଛି। ଭାରତ-ପାକିସ୍ତାନ ସୀମାନ୍ତ ଅଞ୍ଚଳରେ ଭୁଜ ଏୟାରଫୋର୍ସ ଷ୍ଟେସନ ଥିବାରୁ ଏୟାର ଡିଫେନ୍ସ ଓ ସର୍ଭେଲାନ୍ସ କ୍ଷେତ୍ରରେ ଏହା ପ୍ରମୁଖ ଗୁରୁତ୍ବ ବହନ କରିଥାଏ। ଦକ୍ଷିଣ ପଶ୍ଚିମ କମାଣ୍ଡ ଅଧୀନରେ ଭୁଜ ଏୟାରଫୋର୍ସ ଷ୍ଟେସନ ରହିଛି। ପଶ୍ଚିମାଞ୍ଚଳ ଏୟାର କମାଣ୍ଡ ଅଧୀନରେ ରହିଛି ଜାମୁ ଓ କାଶ୍ମୀର, ରାଜସ୍ଥାନ, ହିମାଚଳ ପ୍ରଦେଶ, ପଞ୍ଜାବ, ହରିୟାଣା, ଦିଲ୍ଲୀ ଓ ପଶ୍ଚିମାଞ୍ଚଳ ଉତ୍ତରପ୍ରଦେଶ।
ଧରାପଡିଲା କାନପୁରର ନକଲି ଡାକ୍ତର ଅନୁଷ୍କାଙ୍କ ମିଛ; MBBS ଡିଗ୍ରୀ ନାହିଁ କିନ୍ତୁ କରୁଥିଲେ ସର୍ଜରୀ
ନନ୍ଦିଘୋଷ ବ୍ୟୁରୋ : ପଦାରେ ପଡିଲା ନକଲି ଡାକ୍ତରଙ୍କ ସତ । MBBS ଡିଗ୍ରୀ ନାହିଁ କିନ୍ତୁ କରୁଥିଲେ ସର୍ଜରୀ । ଏପରି ଚାଞ୍ଚଲ୍ୟକର ତଥ୍ୟର ଖୁଲାସା କରିଛି କାନପୁର ପୋଲିସ । ନିକଟରେ କାନପୁରରେ ହେୟାର ଟ୍ରାନ୍ସପ୍ଲାଣ୍ଟ ପରେ ୨ ଇଞ୍ଜିନିୟରଙ୍କ ମୃତ୍ୟୁ ପରେ ଚର୍ଚ୍ଚାକୁ ଆସିଥିଲେ ଡାକ୍ତର ଅନୁଷ୍କା ତିଓ୍ବାରୀ । ଦୁଇ ଇଞ୍ଜିନିୟରଙ୍କ ପରିବାର ଲୋକ ମୃତ୍ୟୁ ପାଇଁ ଏହି ଡାକ୍ତରଙ୍କୁ ଦାୟୀ କରିଥିଲେ । ଘଟଣାର ଯାଞ୍ଚ ପରେ ପୋଲିସକୁ ଅନେକ ତଥ୍ୟ ମଧ୍ୟ ମିଳିଛି । ତଦନ୍ତ ବଢିବା ସହ ଅନୁଷ୍କାଙ୍କର ଅନେକ ମିଛ ମଧ୍ୟ ସାମ୍ନାକୁ ଆସିଛି ।
ପୋଲିସ ସୂଚନା ଅନୁଯାୟୀ, ଘଟଣାରେ ତଦନ୍ତରେ ଜଣାପଡିଛି ଯେ, ଡାକ୍ତର ଅନୁଷ୍କାଙ୍କର MBBS ଡିଗ୍ରୀ ମଧ୍ୟ ନାହିଁ, ଆଉ ନିଜକୁ ଡର୍ମାଟୋଲୋଜିଷ୍ଟ ବୋଲି କହି କରୁଥିଲେ ହେୟାର ଟ୍ରାନ୍ସପ୍ଲାଣ୍ଟ ସର୍ଜରୀ । ତଦନ୍ତରୁ ଆହୁରି ମଧ୍ୟ ଜଣାପଡିଛି ଯେ, ତାଙ୍କ ପାଖରେ କୌଣସି ତାଲିମପ୍ରାପ୍ତ ସହାୟକ ମଧ୍ୟ ନଥିଲେ । ସର୍ଜରୀ ସମୟରେ ଯାହାଙ୍କ ସାହଯ୍ୟ ନେଉଥିଲେ ମେମାନେ ମଧ୍ୟ ନକଲି ହେଲପର ଥିଲେ । ଏହି ଦୁଇ ମାମଲା ପଦାକୁ ଆସିବା ପରଠାରୁ ଅନୁଷ୍କା ତିଓ୍ୱାରୀ ଓ ତାଙ୍କ ସ୍ୱାମୀ ଫେରାର ଅଛନ୍ତି । ଏବେ ପୋଲିସ ତାଙ୍କୁ ଗିରଫ କରିବା ପାଇଁ ନିରନ୍ତର ଚଢାଉ କରୁଛି ।
ମିସ୍ ଓ୍ୱାର୍ଲଡ଼ ପ୍ରତିଯୋଗୀଙ୍କ ପାଦ ଧୋଇବା ଘଟଣାକୁ ନେଇ ବଢିଲା ରାଜନୀତି
ନନ୍ଦିଘୋଷ ବ୍ୟୁରୋ : ମିସ୍ ୱାର୍ଲଡ ପ୍ରତିଯୋଗୀଙ୍କ ପାଦ ଧୋଇବା ଘଟଣାକୁ ନେଇ ବଢିଲା ରାଜନୀତି। ଏକ ମନ୍ଦିରରେ ପ୍ରତିଯୋଗୀଙ୍କ ପାଦ ଧୋଇବା ଘଟଣାକୁ ନେଇ କଂଗ୍ରେସ ସରକାରଙ୍କୁ ଟାର୍ଗେଟ କରିଛନ୍ତି ବିଜେପି ଓ ବିଆରଏସ। ଭାରତୀୟ ମହିଳାଙ୍କ ସମ୍ମାନ ଉପରେ ଏହି ଘଟଣା ଆଞ୍ଚ ଆଣିଛି ବୋଲି କହିଛନ୍ତି ବିରୋଧୀ।
ତେଲଙ୍ଗାନାର ମୁଲୁଗୁ ଜିଲ୍ଲା ଅନ୍ତର୍ଗତ ରାମାପ୍ପା ମନ୍ଦିରରେ କେତେକ ମହିଳା ମିସ୍ ୱାର୍ଲଡ ପ୍ରତିଯୋଗୀଙ୍କ ପାଦ ଧୋଇବା ଓ ପୋଛିବାର ଭିଡିଓ ପଦାକୁ ଆସିବା ପରେ ସୃଷ୍ଟି ହୋଇଥିଲା ବିବାଦ। ମନ୍ଦିରର ପରାମ୍ପରା ରହିଛି ମନ୍ଦିରରେ ପ୍ରବେଶ କରିବା ପୂର୍ବରୁ ଗୋଡହାତ ଧୋଇବା। ଶାରୀରିକ ଓ ଆଧ୍ୟାତ୍ମିକ ପବିତ୍ରତା ଲାଗି ଗୋଡ ଧୋଇବା ବ୍ୟବସ୍ଥା ରହିଛି। ତେଲଙ୍ଗାନାର ସ୍ବାଭିମାନ ପ୍ରତି ଏହି ଘଟଣା ଆଞ୍ଚ ଆଣିଛି ବୋଲି କହିଛନ୍ତି ଭାରତ ରାଷ୍ଟ୍ର ସମିତିର କେତେକ ପୂର୍ବତନ ମନ୍ତ୍ରୀ। ନିଃସର୍ତ୍ତ କ୍ଷମା ପ୍ରାର୍ଥନା ଲାଗି କଂଗ୍ରେସ ହାଇକମାଣ୍ଡଙ୍କ ନିକଟକୁ ସେମାନେ ପତ୍ର ଲେଖିଛନ୍ତି।
ପ୍ରତିଯୋଗୀମାନଙ୍କ ପାଦ ଧୋଇବା କାମରେ ଦଳିତ, ଆଦିବାସୀ ଓ ଆର୍ଥିକ ପଛୁଆ ବର୍ଗ ମହିଳାକୁ ନିୟୋଜିତ କରାଯାଇଥିଲା ବୋଲି ସେମାନେ ଅଭିଯୋଗ କରିଛନ୍ତି। ଏହି ପ୍ରତିଯୋଗିତା ଲାଗି ସରକାର ୨୦୦ କୋଟି ଟଙ୍କା ଖର୍ଚ୍ଚ କରୁଥିବା ଅଭିଯୋଗ କରିଛନ୍ତି ବିଭିନ୍ନ ସଂଗଠନ। ତେବେ ପବିତ୍ରତା ରକ୍ଷା ଲାଗି ଏହା ଏକ ପାରମ୍ପରିକ ବ୍ୟବସ୍ଥା ଥିଲା ବୋଲି କହିଛନ୍ତି ମିସ୍ ୱାର୍ଲଟ ସଂଗଠନ।
ବଢ଼ିବ ଭାରତର ପ୍ରତିରକ୍ଷା ବଳ, ପ୍ରତିରକ୍ଷା ବଜେଟ୍ ପରିମାଣ ବଢ଼ାଇବା ଲାଗି ଯୋଜନା
ନନ୍ଦିଘୋଷ ବ୍ୟୁରୋ : ବଢ଼ିବ ଭାରତର ପ୍ରତିରକ୍ଷା ବଳ। ଅପରେସନ ସିନ୍ଦୂର ପରେ ଭାରତର ପ୍ରତିରକ୍ଷା ଶକ୍ତିକୁ ଅଧିକ ବଢାଇବା ଲାଗି ସରକାର ନେଇପାରନ୍ତି ବଡ଼ ପଦକ୍ଷେପ। ପ୍ରତିରକ୍ଷା ବଜେଟ ପରିମାଣ ବଢାଇବା ଲାଗି ଯୋଜନା ହୋଇଥିବା ସୂଚନା ମିଳିଛି। ଅତିରିକ୍ତ ବଜେଟର ଅସ୍ତ୍ରଶସ୍ତ୍ର କ୍ରୟ ଲାଗି ପ୍ରତିରକ୍ଷା ଲାଗି ଅଧିକ ୫୦ ହଜାର କୋଟି ଟଙ୍କାର ବ୍ୟୟବରାଦ କରାଯାଇପାରେ ବୋଲି କୁହାଯାଇଛି।
ଆସନ୍ତା ଶୀତକାଳୀନ ଅଧିବେଶନରେ ଅତିରିକ୍ତ ବଜେଟକୁ ମଞ୍ଜୁର କରାଯାଇପାରେ। ସେନାବାହିନୀର ଆବଶ୍ଯକତା ପୂରଣ କରିବା ଲାଗି ସରକାର ଏହି ଗୁରୁତ୍ବପୂର୍ଣ୍ଣ ପଦକ୍ଷେପ ନେବେ ବୋଲି ସୂଚନା ମିଳିଛି। ଗତ ୧୦ ବର୍ଷ ମଧ୍ଯରେ ଭାରତର ପ୍ରତିରକ୍ଷା ବ୍ୟୟଭାର ପ୍ରାୟ ୩ ଗୁଣ ହୋଇଛି। ୨୦୧୪-୧୫ରେ ପ୍ରତିରକ୍ଷା ବଜେଟ ପରିମାଣ ୨.୨୯ ଲକ୍ଷ କୋଟି ଟଙ୍କା ଥିବାବେଳେ ଚଳିତବର୍ଷ ପ୍ରତିରକ୍ଷା ବଜେଟ ପରିମାଣ ଥିଲା ୬.୮୧ ଲକ୍ଷ କୋଟି ଟଙ୍କା। ଯାହାକି ମୋଟ ବଜେଟର ୧୩.୪୫ ପ୍ରତିଶତ। ଅପରେସନ ସିନ୍ଦୂର ବେଳେ ଭାରତର ଶୌର୍ଯ୍ୟ ନିକଟରେ ପରାହତ ହୋଇଥିଲା ପାକିସ୍ତାନ। ଭାରତର ଆକ୍ରମଣରେ ଧ୍ବସ୍ତବିଧ୍ବସ୍ତ ହୋଇଥିଲା ପାକିସ୍ତାନ। ସେପଟେ ପାକିସ୍ତାନର ମୁଖା ଖୋଲିବା ଲାଗି ବିଭିନ୍ନ ରାଷ୍ଟ୍ରକୁ ଏକ ବହୁଦଳୀୟ ପ୍ରତିନିଧି ମଣ୍ଡଳୀ ପଠାଯାଇପାରେ ବୋଲି ସୂଚନା ମିଳିଛି।
ନୀରବ ମୋଦିଙ୍କୁ ପୁଣି ଧକ୍କା : ୧୦ମ ଥର ପାଇଁ ଜାମିନ ଆବେଦନ ଖାରଜ କଲା ଲଣ୍ଡନ କୋର୍ଟ
ନନ୍ଦିଘୋଷ ବ୍ୟୁରୋ : ପଳାତକ ହୀରା ବ୍ୟବସାୟୀ ନୀରବ ମୋଦିଙ୍କୁ ପୁଣି ଧକ୍କା। ଲଣ୍ଡନ କୋର୍ଟରେ ଜାମିନ ଆବେଦନ ହୋଇଛି ଖାରଜ। ଲଣ୍ଡନର ହାଇକୋର୍ଟ ଅଫ ଜଷ୍ଟିସ ମୋଦିଙ୍କ ପିଟିସନକୁ କରିଛନ୍ତି ଖାରଜ। ବ୍ରିଟେନରେ ରହିବା ପରଠାରୁ ନୀରବଙ୍କ ଏହା ହେଉଛି ଦଶମ ପିଟିସନ। ନୀରବଙ୍କ ପିଟିସନ ବିରୋଧରେ ସିବିଆଇର ବଳିଷ୍ଠ ଯୁକ୍ତି ଯୋଗୁ ତାଙ୍କ ପିଟିସନ ଖାରଜ ହୋଇଛି। ନୀରବଙ୍କ ପିଟିସନକୁ ସଫଳ ଭାବେ ବିରୋଧ କରିଥିଲେ କ୍ରାଉନ ପ୍ରସିକ୍ୟୁସନ ସର୍ଭିସ ଆଡଭୋକେଟ। ୨୦୧୯ରୁ ଅର୍ଥନୈତିକ ଅପରାଧରେ ସମ୍ପୃକ୍ତ ନୀରବ ବ୍ରିଟେନ ଜେଲରେ ରହିଛନ୍ତି। ୬ ହଜାର କୋଟି ଟଙ୍କାର ପିଏନବି ଘୋଟାଲାର ଅଭିଯୁକ୍ତ ଅଛନ୍ତି ନୀରବ। ଭାରତ ହାତରେ ତାଙ୍କୁ ପ୍ରତ୍ୟର୍ପଣ କରିବା ଲାଗି ଭାରତର ଅନୁରୋଧକୁ ବ୍ରିଟେନ ହାଇକୋର୍ଟ ମଞ୍ଜୁର କରିସାରିଛନ୍ତି। ନୀରବଙ୍କ ୧ ହଜାର ୫୨ କୋଟି ଟଙ୍କାର ସମ୍ପତ୍ତି ବିଭିନ୍ନ ଘରୋଇ ବ୍ୟାଙ୍କ ଓ ଲୋକଙ୍କୁ ଫେରାଯାଇଛି ବୋଲି ଗତ ଡିସେମ୍ବରରେ କହିଥିଲେ ଅର୍ଥମନ୍ତ୍ରୀ ନିର୍ମଳା ସୀତାରମଣ। ପିଏନବି ଜାଲିଆତି ମାମଲାରେ ସିବିଆଇର ଏଫଆଇଆର ପରେ ଇଡି ପକ୍ଷରୁ ତଦନ୍ତ ଜାରି ରହିଛି।
ପହଲଗାଓଁ ହମଲା ପ୍ରସଙ୍ଗ : ଆଫଗାନିସ୍ତାନ ବିଦେଶମନ୍ତ୍ରୀଙ୍କୁ ଧନ୍ୟବାଦ ଜଣାଇଲେ ଏସ. ଜୟଶଙ୍କର
ନନ୍ଦିଘୋଷ ବ୍ୟୁରୋ : ପହଲଗାଓଁ ହମଲା ପ୍ରସଙ୍ଗ। ପ୍ରଥମ ଥର ଲାଗି ଆଫଗାନିସ୍ତାନ ବିଦେଶ ମନ୍ତ୍ରୀ ଆମିର ଖାଁ ମୁତ୍ତାକୀଙ୍କୁ ଧନ୍ୟବାଦ ଜଣାଇରେ ଭାରତ ବିଦେଶ ମନ୍ତ୍ରୀ ଏସ. ଜୟଶଙ୍କର। ପହଲଗାଓଁ ହମଲାକୁ ଆଫଗାନିସ୍ତାନ ନିନ୍ଦା କରିବା ସହ ଭାରତ ନିକଟରେ ଠିଆ ହୋଇଥିବାଯୋଗୁ ଜୟଶଙ୍କର ଜଣାଇଛନ୍ତି ଧନ୍ୟବାଦ। ଜୟଶଙ୍କର କହିଛନ୍ତି- ଆଫଗାନିସ୍ତାନବାସୀଙ୍କ ସହ ଭାରତର ପାରମ୍ପରିକ ବନ୍ଧୁତା ରହିଆସିଛି। ଏହା ସହ ଆଫଗାନିସ୍ତାନର ବିକାଶ ପ୍ରକ୍ରିୟାକୁ ଭାରତ ସହଯୋଗ କରିବ। ଆଫଗାନିସ୍ତାନର ତାଲିବାନ ଶାସନକୁ ବର୍ତ୍ତମାନ ସୁଦ୍ଧା ସରକାରୀ ଭାବେ ଭାରତ ସ୍ବୀକୃତି ଦେଇ ନଥିଲେ ମଧ୍ୟ ପହଲଗାଓଁ ହମଲାକୁ ତାଲିବାନ ସରକାର ନିନ୍ଦା କରିଥିବାରୁ ଭାରତ ଧନ୍ୟବାଦ ଜଣାଇଛି। ପହଲଗାଓଁ ହମଲା ପରେ ଭାରତର ସ୍ବତନ୍ତ୍ର ଦୂତ ତଥା ବିଦେଶ ମନ୍ତ୍ରାଳୟର ଆଫଗାନିସ୍ତାନ, ଇରାନ, ପାକିସ୍ତାନ ଡିଭିଜନ ମହାନିର୍ଦ୍ଦେଶକ ଆନନ୍ଦ ପ୍ରକାଶ କାବୁଲ ଯାଇ ଆମିର ଖାଁ ମୁତ୍ତାକୀଙ୍କୁ ସାକ୍ଷାତ କରିଥିଲେ।
ଜାରି ହେଲା କୋର୍ଡ ୮୬୪୭ : ଟ୍ରମ୍ପଙ୍କୁ ହତ୍ୟା କରିବାକୁ ଯୋଜନା କରୁଛନ୍ତି ପୂର୍ବତନ FBI ନିର୍ଦ୍ଦେଶକ !
ନନ୍ଦିଘୋଷ ବ୍ୟୁରୋ : ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ହତ୍ୟା କରିବାକୁ ଷଡ଼ଯନ୍ତ୍ର ରଚିବାର ଏକ ମାମଲା ସାମ୍ନାକୁ ଆସିଛି। ଟ୍ରମ୍ପଙ୍କୁ ହତ୍ୟା କରିବା ପାଇଁ କୋଡ୍ ୮୬୪୭ ଜାରି କରାଯାଇଥିଲା। ସିକ୍ରେଟ୍ ସର୍ଭିସ୍ ଏବଂ ଏଫବିଆଇ ଏହି ସମ୍ପୂର୍ଣ୍ଣ ମାମଲାର ତଦନ୍ତ କରୁଛନ୍ତି। ପ୍ରକୃତରେ, ପୂର୍ବତନ ଏଫବିଆଇ ନିର୍ଦ୍ଦେଶକ ଟ୍ରମ୍ପଙ୍କୁ ହତ୍ୟା କରିବାକୁ ଷଡ଼ଯନ୍ତ୍ର କରିଥିବା ସନ୍ଦେହ କରାଯାଉଛି। ଆମେରିକାର ଜାତୀୟ ଗୁଇନ୍ଦା ନିର୍ଦ୍ଦେଶକ ତୁଳସୀ ଗାବାର୍ଡ ଏ ସମ୍ପର୍କରେ ସୂଚନା ଦେଇଛନ୍ତି।
ସେ କହିଛନ୍ତି ଯେ, ଜେମ୍ସ କୋମି ସମ୍ପ୍ରତି ଆମେରିକାର ରାଷ୍ଟ୍ରପତିଙ୍କୁ ହତ୍ୟା କରିବାକୁ ଅପିଲ କରିଥିଲେ। ସେ ଜଣେ ପୂର୍ବତନ FBI ନିର୍ଦ୍ଦେଶକ ଥିଲେ ଯିଏ ତାଙ୍କ କ୍ୟାରିୟରର ଅଧିକାଂଶ ସମୟ ମାଫିଆ ଏବଂ ଗ୍ୟାଙ୍ଗଷ୍ଟରଙ୍କ ବିରୋଧରେ ମାମଲା ରୁଜୁ କରିଥିଲେ, ଜଣେ ବ୍ୟକ୍ତି ଭାବରେ ସେ ଭଲ ଭାବରେ ଜାଣିଥିଲେ ଯେ ସେ କ’ଣ କରୁଛନ୍ତି ଏବଂ ଆଇନର ପୂର୍ଣ୍ଣ ବଳରେ ତାଙ୍କୁ ଦାୟୀ କରାଯିବା ଉଚିତ। ସେ କହିଛନ୍ତି ଯେ, ଆମେ କୋମିଙ୍କ ସିକ୍ରେଟ୍ ସର୍ଭିସ୍ ତଦନ୍ତକୁ ପୂର୍ଣ୍ଣ ସମର୍ଥନ କରୁଛୁ । ଟ୍ରମ୍ପଙ୍କୁ ହତ୍ୟା କରିବା ପାଇଁ କୋଡ୍ ନମ୍ବର ୮୬୪୭ ଜାରି କରାଯାଇଥିବା ରିପୋର୍ଟ ହୋଇଛି। ପ୍ରକୃତରେ, ୮୬ ହେଉଛି ହତ୍ୟାର କୋଡୱାର୍ଡ ଏବଂ ଟ୍ରମ୍ପ ବର୍ତ୍ତମାନ ୪୭ତମ ରାଷ୍ଟ୍ରପତି। ଏହି କାରଣରୁ ତାଙ୍କ ହତ୍ୟା ପାଇଁ ମାମଲା ନମ୍ବର ୮୬୪୭ ଜାରି କରାଯାଇଥିଲା।