ନନ୍ଦିଘୋଷ ବ୍ୟୁରୋ : ପାକିସ୍ତାନକୁ ସମର୍ଥନ ତୁର୍କୀକୁ ପଡିବ ମହଙ୍ଗା। ତୁର୍କୀ ସହ ବ୍ୟବସାୟ ବନ୍ଦ କରିବାକୁ ନେଇ ପ୍ରତିବାଦ ଅଭିଯାନ ଆରମ୍ଭ କରିଛନ୍ତି ଭାରତର ବିଭିନ୍ନ ବ୍ୟବସାୟିକ ସଂଗଠନ। ପୁଣି,ରାଜସ୍ଥାନ, ଗୁଜରାଟ ଭଳି ରାଜ୍ୟରେ ପ୍ରତିବାଦ ଜୋର ଧରିଛି। ଭାରତ-ପାକିସ୍ତାନ ଉତ୍ତେଜନା ମଧ୍ୟରେ ତୁର୍କୀ ସମର୍ଥନ କରିଥିବାରୁ ତୁର୍କୀକୁ ବିଭିନ୍ନ କ୍ଷେତ୍ରରେ ବ୍ୟାପକ କ୍ଷତି ସହିବାକୁ ପଡିପାରେ। ପର୍ଯ୍ୟଟନ କ୍ଷେତ୍ର ଅନେକ ମାତ୍ରାରେ ପ୍ରଭାବିତ ହୋଇଛି। ତୁର୍କୀର ପ୍ରାୟ ୩୦ ହଜାର କୋଟିରୁ ଅଧିକ କ୍ଷତି ହେବା ଆକଳନ କରାଯାଉଛି।
ରାଜ୍ୟ କ୍ୟାବିନେଟରେ ଆଜି ୬ଟି ପ୍ରସ୍ତାବକୁ ମଞ୍ଜୁରୀ
ଭୁବନେଶ୍ବର : ରାଜ୍ୟ କ୍ୟାବିନେଟରେ ଆଜି ୬ଟି ପ୍ରସ୍ତାବକୁ ମଞ୍ଜୁରୀ ମିଳିଛି । ସାମାଜିକ ଓ ଅର୍ଥନୈତିକ ପଛୁଆ ବର୍ଗର ଛାତ୍ରଛାତ୍ରୀଙ୍କ ପାଇଁ ନାମଲେଖାରେ ୧୧.୨୫ ପ୍ରତିଶତ ସଂରକ୍ଷଣ ଦେବାକୁ ରାଜ୍ୟ କ୍ୟାବିନେଟ ନିଷ୍ପତ୍ତି ନେଇଛି । ଏହି ସଂରକ୍ଷଣ ନୀତି ଚଳିତ ଶିକ୍ଷା ବର୍ଷରୁ ରାଜ୍ୟର ସବୁ ସରକାରୀ ବିଶ୍ବବିଦ୍ୟାଳୟ, ସରକାରୀ ଓ ଅନୁଦାନପ୍ରାପ୍ତ ଉଚ୍ଚ ଶିକ୍ଷାନୁଷ୍ଠାନରେ ଲାଗୁ କରାଯିବ । ଏହା ସହିତ ଉଚ୍ଚଶିକ୍ଷାରେ ଅନୁସୂଚିତ ଜନଜାତି ବର୍ଗର ଛାତ୍ରଛାତ୍ରୀଙ୍କ ଲାଗି ୨୨.୫ ପ୍ରତିଶତ, ଅନୁସୂଚିତ ଜାତି ବର୍ଗର ଛାତ୍ରଛାତ୍ରୀଙ୍କ ପାଇଁ ୧୬.୨୫ ପ୍ରତିଶତ, ଦିବ୍ୟାଙ୍ଗ ଛାତ୍ରଛାତ୍ରୀଙ୍କ ଲାଗି ୫ ପ୍ରତିଶତ ଓ ପୂର୍ବତନ ସେନାନୀଙ୍କ ପରିବାର ସଦସ୍ୟଙ୍କ ଲାଗି ୧ ପ୍ରତିଶତ ସଂରକ୍ଷଣ ପୂର୍ବ ପରି ପ୍ରଦାନ କରାଯିବ ବୋଲି ମୁଖ୍ୟମନ୍ତ୍ରୀ କହିଛନ୍ତି । ସେହିପରି ମମତା ଓ ପ୍ରଧାନମନ୍ତ୍ରୀ ମାତୃ ବନ୍ଦନା ଯୋଜନାକୁ ମିଳିତ ଭାବରେ ୧ ଏପ୍ରିଲ, ୨୦୨୫ ରୁ କାର୍ଯ୍ୟକାରୀ କରିବାପାଇଁ ନିଷ୍ପତ୍ତି ନିଆଯାଇଛି । ଏହି ଯୋଜନାକୁ ମମତା-ପ୍ରଧାନମନ୍ତ୍ରୀ ମାତୃ ବନ୍ଦନା ଭାବରେ ନାମିତ କରାଯିବ । ପୂର୍ବରୁ ମମତା ଯୋଜନାରେ ଝିଅ ଜନ୍ମ ହେଲେ ମା’ ମାନେ ୧୦,୦୦୦ ଟଙ୍କା ପାଉଥିଲେ । ଏବେ ୧୨,୦୦୦ ଟଙ୍କା ପାଇବେ । ପୁଅ ଜନ୍ମ ହେଲେ ମା’ ମାନେ ପାଉଥିବା ୧୦ ହଜାର ଟଙ୍କାର ସହାୟତା ପୂର୍ବପରି ଅପରିବର୍ତ୍ତିତ ରହିଛି । ଆଦିମ ଜନଜାତି ସମ୍ପ୍ରଦାୟର ମହିଳାଙ୍କୁ ପ୍ରଥମ ୨ ଟି ସନ୍ତାନ ପରେ ମଧ୍ଯ ଝିଅ ଜନ୍ମ ପାଇଁ ୧୨ ହଜାର ଟଙ୍କା ଓ ପୁଅ ଜନ୍ମ ପାଇଁ ୧୦ହଜାର ଟଙ୍କା ଦିଆଯିବ ବୋଲି ମୁଖ୍ୟମନ୍ତ୍ରୀ କହିଛନ୍ତି ।
ପାଣି ପାଇଁ ପାକିସ୍ତାନର ଭାରତ ନିକଟରେ ଗୁହାରି
ନନ୍ଦିଘୋଷ ବ୍ୟୁରୋ : ଅପରେସନ ସିନ୍ଦୂରରେ ଭାରତର ଦମ୍ ଦେଖି ମୁଣ୍ଡ ନୁଆଁଇଥିଲା ପାକିସ୍ତାନ। ଏବେ ପାଣି ଲାଗି ହେଲାଣି ଡହଳ ବିକଳ। ସିନ୍ଧୁ ଜଳ ଚୁକ୍ତି ପ୍ରସଙ୍ଗରେ ପୁନର୍ବିଚାର ଲାଗି ଭାରତ ନିକଟରେ ଅନୁରୋଧ କରିଛି ପାକିସ୍ତାନ। ଏନେଇ ଜଳଶକ୍ତି ମନ୍ତ୍ରାଳୟ ନିକଟକୁ ପତ୍ର ଲେଖିଛନ୍ତି ପାକିସ୍ତାନ ଜଳ ସମ୍ପଦ ସଚିବ ସୟଦ ଅଲି ମୁର୍ତାଜା। ଏପ୍ରିଲ ୨୨ ପହଲଗାଓଁ ହମଲା ପରେ ଉତ୍ତ୍ୟକ୍ତ ହୋଇ ସିନ୍ଧୁ ଜଳ ଚୁକ୍ତି ରଦ୍ଦ କରିଥିଲା ଭାରତ। ୧୯୬୦ ସିନ୍ଧୁ ଜଳ ଚୁକ୍ତି ଅନୁସାରେ ସିନ୍ଧୁ ନଦୀରୁ ଭାରତ ୩୦ ପ୍ରତିଶତ ଓ ପାକିସ୍ତାନ ୭୦ ପ୍ରତିଶତ ଜଳ ପାଇଥାଏ। ଜଳ ଚୁକ୍ତି ରଦ୍ଦ ହେବା ପରେ ପାକିସ୍ତାନ ଜଳାଭାବରେ ଛଟପଟ ହେବା ପରିଲକ୍ଷିତ ହୋଇଛି। ଏପରିକି ପାକିସ୍ତାନକୁ ବିନା ସୂଚନାରେ ନଦୀ ବନ୍ଧର ଗେଟ ଖୋଲିଦେଉଛି ଭାରତ।
ମଧ୍ୟପ୍ରଦେଶ ବିଜେପି ମନ୍ତ୍ରୀ ବିଜୟ ଶାହାଙ୍କ ଲାଗି ବଢ଼ିଲା ଅଡୁଆ
ନନ୍ଦିଘୋଷ ବ୍ୟୁରୋ : ମଧ୍ୟପ୍ରଦେଶ ବିଜେପି ମନ୍ତ୍ରୀ ବିଜୟ ଶାହାଙ୍କ ଲାଗି ବଢ଼ିଲା ଅଡୁଆ। ତାଙ୍କ ବିରୋଧରେ ଏଫଆଇଆର ରୁଜୁ ଲାଗି ନିର୍ଦ୍ଦେଶ ଦେଇଛନ୍ତି ମଧ୍ୟପ୍ରଦେଶ ହାଇକୋର୍ଟ। କର୍ଣ୍ଣେଲ ସୋଫିଆ କ୍ୟୁରେସିଙ୍କ ବିରୋଧରେ ଆଦିବାସୀ ବ୍ଯାପାର ମନ୍ତ୍ରୀ ବିଜୟ ଦେଇଥିଲେ ବୟାନ। ଅପରେସନ ସିନ୍ଦୂର ସମ୍ପର୍କରେ ପ୍ରେସ ବ୍ରିଫିଂ ସୋଫିଆ କରିଥିବାବେଳେ ତାଙ୍କୁ ଟାର୍ଗେଟ କରିଥିଲେ ମନ୍ତ୍ରୀ। ଏହି ପ୍ରସଙ୍ଗରେ ମଧ୍ଯପ୍ରଦେଶ ହାଇକୋର୍ଟ ନିଜ ଆଡୁ କରିଥିଲେ ମାମଲା ରୁଜୁ। କର୍ଣ୍ଣେଲ ସୋଫିଆ ଜଣେ ଆତଙ୍କୀଙ୍କ ଭଉଣୀ ବୋଲି କହିଥିଲେ ବିଜୟ। ରାମକୁଣ୍ଡ ଗ୍ରାମରେ ଆୟୋଜିତ ଏକ ସଭାରେ ବିଜୟ ଏହି ବିବାଦୀୟ ବୟାନ ଦେଇଥିଲେ। ବିଜୟଙ୍କ ଏହି ବୟାନକୁ ବିଭିନ୍ନ ଦଳ ପକ୍ଷରୁ ସମାଲୋଚନା କରାଯାଇଥିଲା। ଗତକାଲି ସେ ଏହି ବୟାନ ନେଇ କ୍ଷମା ପ୍ରାର୍ଥନା କରିଥିଲେ। ଦୁଃଖ ପରିସ୍ଥିତି ସମୟରେ ମନ୍ତ୍ରୀ ମୁସଲିମଙ୍କ ବିରୋଧରେ କହିବାକୁ ପଛାଇନଥିଲେ ବୋଲି କହିଥିଲେ ଏଆଇଏମଆଇଏମ ନେତା ଅସଦୁଦ୍ଦିନ ଓବେସୀ।
ବିପର୍ଯ୍ୟସ୍ତ ସ୍ଵାସ୍ଥ୍ୟସେବା ମୁଖା ଖୋଲିଲେ ଜନସଂଗଠନ, ଅବ୍ୟବସ୍ଥାକୁ ନେଇ ସରକାରଙ୍କ ଉପରେ ବର୍ଷିଲେ
ଭୁବନେଶ୍ୱର : ରାଜ୍ୟରେ ନୂଆ ସରକାର ଆସିବା ପରେ ବିଗିଡି ଯାଇଛି ସ୍ୱାସ୍ଥ୍ୟ ବ୍ୟବସ୍ଥା। ଏଭଳି ଅଭିଯୋଗ କରିଛନ୍ତି ବିଭିନ୍ନ ଜନ ସଂଗଠନ। ଅବ୍ୟବସ୍ଥାକୁ ନେଇ ସରକାରଙ୍କ ଉପରେ ବର୍ଷିଛନ୍ତି।ସରକାରୀ ହସ୍ପିଟାଲରେ ରୋଗୀଙ୍କୁ ଡାକ୍ତର ନିଶିଦ୍ଧ ଔଷଧ ଦେଉଥିବା ଭଳି ବଡ଼ ଅଭିଯୋଗ ହୋଇଛି। ଏସସିବି ମେଡ଼ିକାଲରେ ଚାଲିଥିବା ଅଭିଯୋଗ କରିଛି ଜନସ୍ୱାସ୍ଥ୍ୟ ଅଭିଯାନ ଓ ଅନ୍ୟ ପ୍ରମୁଖ ଜନ ସଂଗଠନ।ଏହି ବ୍ୟାନ ମେଡ଼ିସିନ ଖାଇ ୨୭ ଜଣ କିଡନୀ ରୋଗୀଙ୍କ ମୃତ୍ୟୁ ହୋଇଥିବା କହିଛନ୍ତି।ସରକାରଙ୍କ ଛତ୍ରଛାୟାରେ ଚାଲିଛି କିଡନି ରାକେଟ। ଯନ୍ତ୍ରଣାରେ ଡାକ୍ତରଙ୍କ ସହଯୋଗ ନପାଇ ରୋଗୀ ଆତ୍ମହତ୍ୟା କରୁଛନ୍ତି। ଆଗକୁ ଯାହା କହୁଥିଲେ ସରକାର ଆସିବା ପରେ ଓଲଟା କାମ କରୁଛନ୍ତି। ଦୂଷିତପାନୀୟ ଜଳ ପିଇ କିଡନୀ ରୋଗରେ ଆକ୍ରାନ୍ତ ହେଉଛନ୍ତି।ଡାକ୍ତର ଚିକିତ୍ସାର ବିଧିବ୍ୟବସ୍ଥା ମାନୁନାହାନ୍ତି। କିଡନୀ ପ୍ରତିରୋପଣ ପରେ ମିଳୁନି ଆବଶ୍ୟକ ସେବା ଓ ଚିକିତ୍ସା। ତେଣୁ ରୋଗୀ ଭୟରେ ମେଡ଼ିକାଲ ଆସୁ ନାହାନ୍ତି।ସରକାରଙ୍କ ପାଖରେ ବାରମ୍ବାର ଦାବି ପରେ ସମସ୍ୟାର ସମାଧାନ ହେଉନି ବୋଲି କହିଛନ୍ତି ଜନ ସଂଗଠନ ।
ଯେଉଁ ଡାକ୍ତରଙ୍କ ବିରୋଧରେ ଅଭିଯୋଗ ଥିଲା ସେମାନଙ୍କୁ ଗୁରୁ ଦାୟିତ୍ୱ ଦିଆଯାଇଛି।ରୋଗୀଙ୍କ ପାଇଁ ବାରମ୍ବାର ଔଷଧ ପରିବର୍ତ୍ତନ କରାଯାଉଛି। ଗତ ୬ ମାସରେ ଏସସିବିରେ ମାତ୍ର ଗୋଟିଏ କିଡନୀ ପ୍ରତିରୋପଣ ହୋଇଛି।ପ୍ରତିରୋପଣ ସଂଖ୍ୟା ବଢିବା ତୁଳନାରେ କମିଛି।ଦାନ ହେଉଥିବା କିଡନୀ କୁଆଡେ ଯାଉଛି ବୋଲି ପ୍ରଶ୍ନ ଉଠୁଛି।ଗରିବଙ୍କ ଉପରେ ପରୀକ୍ଷା କରାଯାଉଛି। ଯାହା ଫଳରେ ଅନେକ ଜୀବନ ଯାଉଛି। SCB ନେଫ୍ରୋଲୋଜି ବିଭାଗରେ ୩ ପ୍ରଫେସର ଓ ୩ ଆସିଷ୍ଟାଣ୍ଟ ପ୍ରଫେସର ରହିବା କଥା। କିନ୍ତୁ ଜଣେବି ପ୍ରଫେସର ନାହାନ୍ତି। କିଡନୀ ରୋଗୀଙ୍କ ପାଇଁ ୩୦ ଜିଲ୍ଲାରେ ଡାୟାଲିସିସ ଵ୍ୟଵସ୍ଥା ରହିଛି।କିନ୍ତୁ ମେସିନ ଚଳାଇବାକୁ କେହି ନାହାନ୍ତି। ରାଜ୍ୟରେ କିଡନୀ ରୋଗୀ ଚିହ୍ନଟ ସହ ଅଭିଯୋଗ ପ୍ରକୋଷ୍ଠ ପାଇଁ ଦାବି ହୋଇଛି। ଘରୋଇ ହସ୍ପିଟାଲକୁ ଅନୁକମ୍ପା ଦେଖାଇ ସରକାରୀ ମେଡିକାଲକୁ ମାରିବାକୁ ଉଦ୍ୟମ ହେଉଥିବା ଅଭିଯୋଗ କରିଛନ୍ତି ଜନସଂଗଠନ ସମୂହ। ରାଜ୍ୟରେ ନୂଆ ସରକାର ଆସିବା ପରେ ଅନେକ ଜିଲ୍ଲାରେ ସିଡିଏମଓ ନାହାନ୍ତି। ପଦବୀ ସୃଷ୍ଟି ହୋଇଥିଲେ ମଧ୍ୟ ନିଯୁକ୍ତି ଦିଆଯାଉ ନାହିଁ।ଏହାକୁ ନେଇ ଅସନ୍ତୋଷ ବ୍ୟାପକ ହେବାରେ ଲାଗିଛି।
ଶିକ୍ଷା କ୍ଷେତ୍ରରେ ବିପ୍ଲବ ଆଣିଛି ନବୀନଙ୍କ ଦୂରଦୃଷ୍ଟି, ସଫଳତାର ଶିଖର ଛୁଇଁଛି ଓଡ଼ିଶା ଆଦର୍ଶ ବିଦ୍ୟାଳୟ
ନନ୍ଦିଘୋଷ ବ୍ୟୁରୋ : ଶିକ୍ଷା କ୍ଷେତ୍ରରେ ବିପ୍ଲବ ଆଣିଛି ନବୀନଙ୍କ ଦୂରଦୃଷ୍ଟି । ସଫଳତାର ଶିଖର ଛୁଇଁଛି ଓଡିଶା ଆଦର୍ଶ ବିଦ୍ୟାଳୟ । ନବୀନଙ୍କ ଏହି ପରିକଳ୍ପନା ବାସ୍ତବ ରୂପ ନେଇଥିବାରୁ ପ୍ରଶଂସା କରିଛନ୍ତି ଶିକ୍ଷାର୍ଥୀ ଓ ଶିକ୍ଷାବିତ। ଘରୋଇ ସିବିଏସଇ ସ୍କୁଲ ଭଳି ଓଡିଆ ଛାତ୍ରଛାତ୍ରୀଙ୍କି ଇଂରାଜୀ ମାଧ୍ୟମରେ ପାଠ ପଢିବାର ସୁଯୋଗ ସୃଷ୍ଟି କରିବାକୁ ୨୦୧୫ରେ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆରମ୍ଭ କରିଥିଲେ ଓଡିଶା ଆଦର୍ଶ ବିଦ୍ୟାଳୟ । ତତକାଳୀନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗରିବ ମଧ୍ୟବିତ୍ତ ପିଲାଙ୍କ ଶିକ୍ଷାର ବିକାଶ ପାଇଁ ପ୍ରତି ବ୍ଲକରେ ଓଡ଼ିଶା ଆଦର୍ଶ ବିଦ୍ୟାଳୟ ଗଢିଥିଲେ । ଗତକାଲି ପ୍ରକାଶ ପାଇଥିବା ସିବିଏସଇ ପରୀକ୍ଷାରେ ଘରୋଇ ସିବିଏସଇ ସ୍କୁଲକୁ ବି ମାତ ଦେଇଛନ୍ତି ଓଡିଶା ଆଦର୍ଶ ବିଦ୍ୟାଳୟର ଛାତ୍ରଛାତ୍ରୀ । ଓଡିଶା ଆଦର୍ଶ ବିଦ୍ୟାଳୟର ଦଶମ ପରୀକ୍ଷାରେ ପାସ ହାର ୯୧.୮ପ୍ରତିଶତ । ୧୦୬୨ ଜଣ ୯୦ ପ୍ରତିଶତରୁ ଅଧିକ ନମ୍ବର ରଖି ଉତ୍ତୀର୍ଣ୍ଣ ହୋଇଛନ୍ତି । ସେହିପରି ଦ୍ବାଦଶ ଶ୍ରେଣୀରେ ବିଜ୍ଞାନରେ ୭୨.୦୫ ପ୍ରତିଶତକୁ ବୃଦ୍ଧି ପାଇଥିବାବେଳେ ବାଣିଜ୍ୟରେ ପାସ ହାର ୭୭.୬୦ ପ୍ରତିଶତକୁ ବୃଦ୍ଧି ପାଇଛି । ଏହାକୁ ନେଇ ନବୀନ ସମସ୍ତ କୃତି ଛାତ୍ରଛାତ୍ରୀଙ୍କୁ ଅଭିନନ୍ଦନ ଜଣାଇଛନ୍ତି । ଓଡ଼ିଶା ଆଦର୍ଶ ବିଦ୍ୟାଳୟର ଏହି ସଫଳତା ନବୀନ ପଟ୍ଟନାୟକଙ୍କ ଶ୍ରେୟ ବୋଲି କହିଛନ୍ତି ପୂର୍ବତନ ଗଣଶିକ୍ଷା ମନ୍ତ୍ରୀ ପ୍ରମିଳା ମଲ୍ଲିକ ।
ସିବିଏସଇ ଦଶମରେ ଓଡ଼ିଶା ଟପ୍ପର ହୋଇଛନ୍ତି ଭଦ୍ରକର କାବ୍ୟରଞ୍ଜନ ମାଝୀ। ସେ ମୋଟ ୫୦୦ରୁ ୪୯୭ ମାର୍କ ତଥା ୯୯.୭ ପ୍ରତିଶତ ରଖିବାର ସୌଭାଗ୍ୟ ହାସଲ କରିଛନ୍ତି। କାବ୍ୟରଞ୍ଜନ ଭଦ୍ରକ ଜିଲ୍ଲା ବନ୍ତ ବ୍ଲକ ପଳାଶଗଢିଆ ସ୍ଥିତ ଓଡିଶା ଆଦର୍ଶ ବିଦ୍ୟାଳୟର ଛାତ୍ର । ତାଙ୍କୁ ଶୁଭେଚ୍ଛା ଜଣାଇବାକୁ ବିଭିନ୍ନ ମହଲରୁ ଭିଡ଼ ଜମିଛି। ସେହିଭଳି ଭୁବନେଶ୍ବର ଉପକଣ୍ଠ ବାରଙ୍ଗର ଟପର ହୋଇଛନ୍ତି ସ୍ବାଗତ ପାଣିଗ୍ରାହୀ । ବାରଙ୍ଗ ଓଡିଶା ଆଦର୍ଶ ବିଦ୍ୟାଳୟ ପକ୍ଷରୁ ମୋଟ ୫୧ ଜଣ ଛାତ୍ରଛାତ୍ରୀ ପରୀକ୍ଷା ଦେଇଥିବା ବେଳେ ସମସ୍ତ ଛାତ୍ରଛାତ୍ରୀ ସଫଳତାର ସହିତ କୃତକାର୍ଯ୍ୟ ହୋଇଛନ୍ତି । ସ୍ବାଗତ ପାଣିଗ୍ରାହୀ ମୋଟ ୫୦୦ ନମ୍ବର ରୁ ୪୭୦ ନମ୍ବର ରଖି ଉତ୍ତିର୍ଣ୍ଣ ହେବା ସହିତ ବିଦ୍ୟାଳୟର ଟପର ହୋଇ ବିଦ୍ୟାଳୟ ତଥା ଅଞ୍ଚଳ ପାଇଁ ଗୌରବ ଅର୍ଜନ କରିଛନ୍ତି । ଓଡ଼ିଶାର ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସାରା ରାଜ୍ଯରେ ଶିକ୍ଷା କ୍ଷେତ୍ରରେ ଯେଉଁ ବୈପ୍ଲବିକ ପରିବର୍ତ୍ତନ ଆଣିଥିଲେ ସେଥିରୁ ଆଦର୍ଶ ବିଦ୍ୟାଳୟ ଅନ୍ୟତମ । ଯାହା ଦ୍ବାରା ଗ୍ରାମାଞ୍ଚଳର ଗରିବ ମେଧାବୀ ଛାତ୍ରଛାତ୍ରୀ ମାନେ ମାଗଣାରେ ସିବିଏସଇ ପାଠ ପଢିବାର ସୁଯୋଗ ପାଇଛନ୍ତି ।
ଚୀନ ଓ ତୁର୍କୀ ବିରୋଧରେ ଭାରତର ବଡ଼ କାର୍ଯ୍ୟାନୁଷ୍ଠାନ
ନନ୍ଦିଘୋଷ ବ୍ୟୁରୋ : ପାକିସ୍ତାନର ଦୁଇ ବନ୍ଧୁ ରାଷ୍ଟ୍ର ଚୀନ ଓ ତୁର୍କୀ ବିରୋଧରେ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି ଭାରତ ସରକାର। ଅପରେସନ ସିନ୍ଦୂର, ଭାରତୀୟ ସେନା ଓ ଭାରତ ସରକାରଙ୍କ ବିରୋଧରେ ବିଭ୍ରାନ୍ତିକର ଖବର ପ୍ରସାରଣ କରିବା ଦୁଇ ଦେଶର ଗଣମାଧ୍ୟମକୁ ମହଙ୍ଗା ପଡ଼ିଛି। ଭାରତୀୟ ସେନା ବିରୋଧରେ ମିଛ ପ୍ରଚାର କରୁଥିବା ଆଜି ଭାରତ ସରକାର ଚୀନର ଗ୍ଲୋବାଲ ଟାଇମ୍ସ ଓ ଜିନହୁଆର ଏକ୍ସ ଆକାଉଣ୍ଟକୁ ବ୍ୟାନ କରିଛନ୍ତି।
ଏଣିକି ଭାରତରେ ଏହି ଆକାଉଣ୍ଟରୁ ପୋଷ୍ଟ ହେଉଥିବା ତଥ୍ୟ ଦୃଶ୍ୟମାନ ହେବନି। ଗ୍ଲୋବାଲ ଟାଇମ୍ସ ଓ ଜିନହୁଆ ଚାଇନିଜ ସରକାରଙ୍କ ମୁଖପତ୍ର ଭାବେ ଜଣାଶୁଣା। ଏହି ଦୁଇ ଗଣମାଧ୍ୟମ ପାକିସ୍ତାନ କଥାରେ ଭାରତୀୟ ସେନା ବିରୋଧରେ ମିଥ୍ୟାର ପ୍ରଚାର କରୁଥିବାରୁ ଭାରତ ସରକାର ଏପରି କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ଗ୍ଲୋବାଲ ଟାଇମ୍ସ ହେଉଛି ଗୋଟିଏ ଇଂରାଜୀ ଖବରକାଗଜ। ଚାଇନିଜ କମ୍ୟୁନିଷ୍ଟ ପାର୍ଟି ମାଲିକାନାରେ ଥିବା ପିପୁଲ୍ସ ଡେଲୀ ଅଧୀନରେ ଏହା ରହିଛି। ସେହିପରି ଜିନହୁଆ ଚାଇନାର ଅଫିସିଆଲ ନ୍ୟୁଜ ଏଜେନ୍ସି।
ଭାରତୀୟ ସେନାର ଆତଙ୍କବାଦୀ ନିରୋଧ ଅପରେସନକୁ ନେଇ ଗ୍ଲୋବାଲ ଟାଇମ୍ସ ବିଭ୍ରାନ୍ତିକର ତଥ୍ୟ ପ୍ରକାଶ କରୁଥିବାରୁ ବେଜିଂରେ ଥିବା ଭାରତୀୟ ଦୂତାବାସ ଆପତ୍ତି ଉଠାଇଥିଲା। ଦୂତାବାସ ପକ୍ଷରୁ କୁହାଯାଇଥିଲା ଯେ ଏପରି ମିଥ୍ୟା ଓ ବିଭ୍ରାନ୍ତିକର ଖବର ପ୍ରସାରଣ କରିବା ପୂର୍ବରୁ ଗ୍ଲୋବାଲ ଟାଇମ୍ସ ତଥ୍ୟକୁ ଯାଞ୍ଚ କରୁ ଓ ନିଜର ସୂତ୍ରକୁ ଭଲ ଭାବେ ତଦାରଖ କରୁ। ଦୂତାବାସର ତାଗିଦ ପରେ ମଧ୍ୟ ଗ୍ଲୋବାଲ ଟାଇମ୍ସର ପାକିସ୍ତାନୀ ପ୍ରେମ କମି ନଥିଲା। ଖାସ ଏହି କାରଣ ପାଇଁ ଏବେ ଭାରତରେ ଗ୍ଲୋବାଲ ଟାଇମ୍ସର ଏକ୍ସ ଆକାଉଣ୍ଟକୁ ବ୍ୟାନ କରାଯାଇଛି।
ଅନ୍ୟପକ୍ଷରେ ଅପରେସନ ସିନ୍ଦୂର ପରେ ପାକିସ୍ତାନ ସେନା ଭାରତ ବିରୋଧରେ ଆକ୍ରମଣାତ୍ମକ ଆଭିମୁଖ୍ୟ ପ୍ରଦର୍ଶନ କରିଥିଲା। ଏହି ଘଟଣାରେ ତୁର୍କୀ ଖୋଲାଖୋଲି ଭାବେ ପାକିସ୍ତାନକୁ ସହାୟତା କରିଥିଲା। ତୁର୍କୀ ପକ୍ଷରୁ ପାକିସ୍ତାନକୁ ଡ୍ରୋନ ମଧ୍ୟ ଯୋଗାଇ ଦିଆଯାଇଥିଲା। ଏପରି କି ତୁର୍କୀର ବ୍ରଡକାଷ୍ଟର ଟିଆରଟି ୱାର୍ଲ୍ଡ ଭାରତ ବିରୋଧରେ ପ୍ରଚାର କରିଥିଲା। ଏଥିପାଇଁ ଭାରତ ସରକାର ଟିଆରଟି ୱାର୍ଲ୍ଡର ଏକ୍ସ ଆକାଉଣ୍ଟକୁ ମଧ୍ୟ ବ୍ୟାନ କରିଛନ୍ତି। ଏବେ ଭାରତରେ ଏଥିରେ ପୋଷ୍ଟ ହେଉଥିବା ଖବର ଦେଖାଯାଉ ନାହିଁ। ତୁର୍କୀରୁ ଆସୁଥିବା ସେଓକୁ ଭାରତରେ ବୟକଟ କରାଯାଇଛି। ସେହିପରି ତୁର୍କୀ ବୁଲିବା ପାଇଁ ପୂର୍ବରୁ ବୁକିଂ କରିଥିବା ଲୋକମାନେ ମଧ୍ୟ ଏହାକୁ ବାତିଲ କରିବାରେ ଲାଗିଛନ୍ତି। ତୁର୍କୀ ସହ ସବୁ ପ୍ରକାରର ସମ୍ପର୍କଚ୍ଛିନ୍ନ କରିବାକୁ ସୋସିଆଲ ମିଡିଆରେ ଲୋକମାନେ ମତ ରଖିବାରେ ଲାଗିଛନ୍ତି। ବୟକଟ ତୁର୍କୀ ଏବେ ଟ୍ରେଣ୍ଡ କରୁଛି।
ବିବାଦ ଘେରରେ ରାଜ୍ୟ ସରକାରଙ୍କ ଆଉ ଏକ ନିଷ୍ପତ୍ତି
ଭୁବନେଶ୍ବର : ବିବାଦ ଘେରରେ ରାଜ୍ୟ ସରକାରଙ୍କ ଆଉ ଏକ ନିଷ୍ପତ୍ତି। ଶିକ୍ଷକଙ୍କ ବଦଳି ଭାଗ୍ୟ ବିଧାୟକ ଓ ସାଂସଦଙ୍କ ହାତକୁ ଟେକି ଦେଲେ ସରକାର। ପ୍ରତି ସାଂସଦ ଓ ବିଧାୟକ ନିଜ ଜିଲ୍ଲା ବା ନିର୍ବାଚନମଣ୍ଡଳୀର ୧୫ ଜଣ ଶିକ୍ଷକଙ୍କୁ ଜିଲ୍ଲା ଭିତରେ ବଦଳି ପାଇଁ ସୁପାରିଶ କରି ପାରିବେ। ଏନେଇ ବିଜ୍ଞପ୍ତି ପ୍ରକାଶ କରିଛି ବିଦ୍ୟାଳୟ ଓ ଗଣଶିକ୍ଷା ବିଭାଗ। ହେଲେ ଏଥିରେ ଥିବା ସର୍ତ୍ତାବଳୀକୁ ନେଇ ଆପତ୍ତି ଉଠାଇଛନ୍ତି ଶିକ୍ଷକ। ବଦଳି ପ୍ରକ୍ରିୟାରେ ବିଧାୟକ ଓ ସାଂସଦଙ୍କ ସୁପାରିଶ ଉପରେ ପ୍ରଶ୍ନ ଉଠାଇଛି ଓଷ୍ଟା। ଅଫଲାଇନ ସହ ଅନଲାଇନରେ ବି ଆବେଦନ ପାଇଁ ବି ଦାବି କରିଛି । କେବଳ ଅଫଲାଇନରେ ସୁପାରିଶ କରାଗଲେ ମେଡିକାଲ କେଶ୍ ବା ସ୍ବାମୀ-ସ୍ତ୍ରୀଙ୍କ ବଦଳି କ୍ଷେତ୍ରରେ ସମସ୍ୟା ଉପୁଜିବ। ଯେଉଁ ସ୍କୁଲରେ ଶିକ୍ଷକ ନାହାନ୍ତି, ସେଠାକୁ ଶିକ୍ଷକଙ୍କୁ ବଦଳି କରାଯାଉ। ଗାଁରୁ ସହରକୁ ବଦଳି ନ ହେବାର ନିୟମରେ ପରିବର୍ତ୍ତନ କରିବାକୁ ଦାବି କରିଛି ଓଷ୍ଟା । ଏବେ ଶିକ୍ଷକଙ୍କ ଭିତରେ ରାଜନୈତିକ ବଦଳିର ଭୟ ପଶିଛି । ପରିବର୍ତ୍ତିତ ରାଜନୈତିକ ସ୍ଥିତିରେ କେବଳ ସରକାରୀ ଦଳର ନିର୍ବାଚିତ ପ୍ରତିନିଧିଙ୍କ କଥାକୁ ସରକାର ଅଗ୍ରାଧିକାର ଦେବେ ବୋଲି ଓଷ୍ଟା ଆଶଙ୍କା ପ୍ରକାଶ କରିଛି ।
ବିରୋଧୀଙ୍କ ଅଭିଯୋଗ ସରକାର ବଦଳି ପ୍ରକ୍ରିୟାରେ ରାଜନୈତିକ ସୁପାରିଶକୁ ବିଧିବଦ୍ଧ ମାନ୍ୟତା ଦେଇଛନ୍ତି । ଏହାଦ୍ବାରା ବିରୋଧୀ ଦଳର ଜନପ୍ରତିନିଧି ଅଣଦେଖା ହେବାର ମଧ୍ୟ ଆଶଙ୍କା ରହିଛି । କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି ଅଭିଯୋଗ କରିଛନ୍ତି ଯେ, ଗଣଶିକ୍ଷା ମନ୍ତ୍ରୀ କେବେ ବିରୋଧୀ ଦଳ କଥା ଶୁଣନ୍ତି ନାହିଁ । ବିଜେଡି କିନ୍ତୁ ବଦଳି ପାଇଁ ସୁପାରିଶ କରିବ ନାହିଁ ବୋଲି ସ୍ପଷ୍ଟ କରିଛି । ତେବେ ଏଥିରେ ସ୍ବାସ୍ଥ୍ୟଗତ ଦିଗକୁ ଗୁରୁତ୍ବ ଦେବାକୁ ବିଜେଡି ପ୍ରସ୍ତାବ ଦେଇଛି । ସେପଟେ ବଦଳି ପ୍ରକ୍ରିୟାରେ ସ୍ବଚ୍ଛତା ଆଣିବାକୁ ସରକାର ଏଭଳି ନିଷ୍ପତ୍ତି ନେଇଥିବା କହିଛନ୍ତି ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ। ଶିକ୍ଷକଙ୍କ ବଦଳି ଓ ପୋଷ୍ଟିଂ ପାଇଁ ବିଭିନ୍ନ ସମୟରେ ନିର୍ବାଚିତ ପ୍ରତିନିଧିମାନେ ସୁପାରିଶ କରିଥାନ୍ତି । ତେବେ ଚଳିତ ଶିକ୍ଷା ବର୍ଷ ପାଇଁ ଏହାକୁ ରାଜ୍ୟ ସରକାର ବୈଧ କରିବା ପରେ ସର୍ତ୍ତାବଳୀ ପ୍ରକ୍ରିୟାକୁ ସରଳ ବଦଳରେ ଜଟିଳ କରୁଥିବା ନେଇ ଚର୍ଚ୍ଚା ଜୋର ଧରିଛି ।
ଜୁନ୍ ଶେଷ ସୁଦ୍ଧା ସମସ୍ତ ପଞ୍ଚାୟତରେ ହେବ ଦିବ୍ୟାଙ୍ଗ ଶକ୍ତି ଗ୍ରୁପ
ଭୁବନେଶ୍ବର : ପ୍ରତି ଗାଁରେ ଗଢାହେବ ଦିବ୍ୟାଙ୍ଗ ଶକ୍ତି ଗ୍ରୁପ। ଜୁନ୍ ଶେଷ ସୁଦ୍ଧା ସମସ୍ତ ପଞ୍ଚାୟତରେ ହେବ ଦିବ୍ୟାଙ୍ଗ ଶକ୍ତି ଗ୍ରୁପ । ମେ ଶେଷ ସୁଦ୍ଧା ସବୁ ଗାଁରେ ଦିବ୍ୟାଙ୍ଗମାନଙ୍କୁ ଚିହ୍ନଟ କରାଯାଇ ତାଲିକା ପ୍ରସ୍ତୁତ ହେବ। ନିଜ ନିଜର ଦକ୍ଷତା ଅନୁସାରେ ସେମାନଙ୍କ କାର୍ଯ୍ୟ ଖସଡ଼ା ପ୍ରସ୍ତୁତ କରିବ ପଞ୍ଚାୟତିରାଜ ବିଭାଗ। ଏହା କାର୍ଯ୍ୟକାରୀ କରିବାକୁ ସମସ୍ତ ଜିଲ୍ଲାପାଳଙ୍କୁ ଚିଠି ଲେଖିଛି ସାମାଜିକ ସୁରକ୍ଷା ବିଭାଗ। ମହାତ୍ମାଗାନ୍ଧୀ ନରେଗା ଯୋଜନାରେ ଦିବ୍ୟାଙ୍ଗମାନଙ୍କୁ ୧୦୦ ଦିନର କାମ ସୁନିଶ୍ଚିତ କରାଯିବ। ପଞ୍ଚାୟତରେ ଥିବା ସମସ୍ତ ଦିବ୍ୟାଙ୍ଗମାନଙ୍କୁ ଜବ୍ କାର୍ଡ ପ୍ରଦାନ କରାଯିବ। ଏଥିପାଇଁ ପଞ୍ଚାୟତିରାଜ ବିଭାଗ ଏକ ସ୍ବତନ୍ତ୍ର ଏସଓପି ପ୍ରସ୍ତୁତ କରିଛି। ଦିବ୍ୟାଙ୍ଗମାନଙ୍କୁ ଚିହ୍ନଟ କରିବା, ସେମାନଙ୍କୁ ସମ୍ମାନର ସହ ସମ୍ବୋଧିତ କରିବା ପାଇଁ ବିଭାଗ ନିର୍ଦ୍ଦେଶ ଦେଇଛି। ଏହା ବାଦ୍ କାର୍ଯ୍ୟକ୍ଷେତ୍ରରେ ଶ୍ରମିକଙ୍କ ପିଲାମାନଙ୍କ ପାଇଁ ସବୁ ପ୍ରକାର ସୁବିଧା ଥାଇ କ୍ରେଚ କରାଯିବ। ଆବଶ୍ୟକ ପଡ଼ିଲେ ଜଣେ ମହିଳା ଦିବ୍ୟାଙ୍ଗଙ୍କୁ ସହାୟକ ଭାବେ ନିୟୋଜିତ କରାଯିବ। ମହିଳା ଦିବ୍ୟାଙ୍ଗମାନଙ୍କୁ କାର୍ଯ୍ୟକ୍ଷେତ୍ରରେ ଥିବା ଶ୍ରମିକମାନଙ୍କୁ ଜଳ ଯୋଗାଣ କରିବେ।
ଦିବ୍ୟାଙ୍ଗ ଶକ୍ତି ଗ୍ରୁପ ଗଠନ ଠାରୁ ଆରମ୍ଭ କରି ଦିବ୍ୟାଙ୍ଗମାନଙ୍କୁ କାମ ଯୋଗାଇବା କାମର ନିୟମିତ ତଦାରଖ କରିବେ ଜିଲ୍ଲାପାଳ। ଏଥିପାଇଁ ବିଭିନ୍ନ ସ୍ତରରେ ପ୍ରଚାର ପ୍ରସାର କରାଯିବା ସହ ଏନଜିଓମାନଙ୍କୁ ସାମିଲ କରାଯିବ । ହେଲେ ସରକାରଙ୍କ ଯୋଜନା ବାସ୍ତବତା ଠାରୁ ଅନେକ ଦୂରରେ ବୋଲି ବିଜେଡି କହିଛି । ନରେଗା ଯୋଜନାରେ ଲୋକଙ୍କ ବଦଳରେ ମେସିନ କାମ କରୁଛି । ଗାଁ ଗଣ୍ଡାରେ ଲୋକଙ୍କୁ କାମ ମିଳୁନଥିବା ବେଳେ ଦିବ୍ୟାଙ୍ଗମାନଙ୍କ ପାଇଁ ୧୦୦ ଦିନର କାମ ଯୋଗାଇବା ଅବାସ୍ତବ। କେବଳ ନିଜର ପ୍ରଚାର କରିବାକୁ ଏହି ଯୋଜନା ଆସିଛି ବୋଲି ବିଜେଡି କହିଛି । ତେବେ ସରକାରଙ୍କ ଏହି ଯୋଜନା ବହୁ ଆଡମ୍ବରେ ଲଘୁ କ୍ରିୟାରେ ପରିଣତ ହେବନି ତ ?
୧୧ ମାସରେ ଭୟଙ୍କର ସ୍ଥିତି, ରାଜ୍ୟରେ ନାରୀ ନିର୍ଯାତନାରେ ରେକର୍ଡ
ଭୁବନେଶ୍ଵର : ଓଡ଼ିଶାରେ ବଢୁଛି ନାରୀ ନିର୍ଯାତନା । ଉଦବେଗ ପ୍ରକାଶ କଲା ବିଧାନସଭା ଷ୍ଟାଣ୍ଡିଂ କମିଟି । ମୋହନ ସରକାର ଉପରେ ବର୍ଷିଲେ ମହିଳା ବିଧାୟିକା । ୧୧ମାସରେ ମାମଲା ବଢିଥିବା ନେଇ ମାନିଲା ଗୃହ ବିଭାଗ । ରାଜ୍ୟରେ ଅସୁରକ୍ଷିତ ହୋଇପଡିଛନ୍ତି ମହିଳା l ବିଜେପି ସରକାରର ୧୧ମାସରେ ଦୁଷ୍କର୍ମ, ହତ୍ୟା ଓ ନାରୀ ନିର୍ଯାତନା ରେକର୍ଡ କରିଛି l ନାବାଳିକାମାନେ ସ୍କୁଲ ଓ ହଷ୍ଟେଲ ଗର୍ଭବତୀ ହେବା ସହ ଶିଶୁ ନିଖୋଜ ଓ ହତ୍ୟା ବି ସୀମା ଟପିଲାଣି l ରାଜ୍ୟରେ ଆଇନ ଶୃଙ୍ଖଳା ବିପର୍ଯ୍ୟସ୍ତ ହୋଇ ପଡିଥିବାରୁ ପୋଲିସ ପ୍ରତି ଦୁର୍ବୃତ୍ତଙ୍କ ଭୟ ରହୁନାହିଁ l ଫଳରେ ମହିଳାମାନେ ଆଉ ନିଜକୁ ସୁରକ୍ଷିତ ମନେ କରୁନାହାନ୍ତି l ଏହାକୁ ନେଇ ବିଧାନସଭା ଷ୍ଟାଣ୍ଡିଂ କମିଟିରେ ମହିଳା ବିଧାୟକମାନେ ଉଦବେଗ ପ୍ରକାଶ କରିଛନ୍ତି । ଆଜି ଅନୁଷ୍ଠିତ ତୃତୀୟ ବୈଠକରେ ଗୃହ ବିଭାଗ ସହିତ ଆଲେଚନା କରି ମହିଳା ବିଧାୟିକମାନେ ରାଜ୍ୟରେ ମହିଳାଙ୍କୁ ସୁରକ୍ଷା ଯୋଗାଇ ଦେବାକୁ ଦାବି କରିଛନ୍ତି । ଗୃହ ବିଭାଗ ବି ମହିଳା ନିର୍ଯ୍ୟାତନା ମାମଲା ବଢିଥିବା ସ୍ବୀକାର କରିଥିବା ବିଧାୟିକାମାନେ କହିଛନ୍ତି । ପୋଲିସ ମାମଲା ରୁଜୁ କରୁନି । ହିନ୍ଦୋଳ ଏବଂ ତାଳଚେର ମାମଲାରେ ତୁରନ୍ତ ଚାର୍ଜସିଟ୍ କରି କାର୍ଯ୍ୟାନୁଷ୍ଠାନ ନେବା ପାଇଁ ଦାବି ହୋଇଛି ।
ସେପଟେ କମିଟିର ଅଧ୍ୟକ୍ଷ ତଥା ଶାସକ ଦଳର ବିଧାୟିକା ସୀମାରାଣୀ ନାଏକ କହିଛନ୍ତି ରାଜ୍ୟରେ ଶିଶୁ ଶ୍ରମିକ ଏବଂ ଭିକାରୀଙ୍କ ସଂଖ୍ୟା ଅଧିକ ରହିଛି । ସେମାନଙ୍କୁ ଉଦ୍ଧାର କରାଯିବ । ଇ_ଏଫଆଇଆର ଉପରେ ସଚେତନତା କରିବା ପାଇଁ ଗୃହ ବିଭାଗକୁ ନିର୍ଦ୍ଦେଶ ଦିଆଯାଇଛି। କମିଟିର ସମସ୍ତ ସଦସ୍ୟ ଏନେଇ ଆଲୋଚନା କରିଛନ୍ତି । ଆସନ୍ତା ୧୮ ତାରିଖରେ କମିଟି କ୍ଷେତ୍ର ପରିଦର୍ଶନ କରିବ। ମହିଳା ଓ ଶିଶୁ ନିର୍ଯାତନା ମାମଲା କିପରି କମିବ ତାହା ଉପରେ ବୈଠକରେ ଆଲୋଚନା କରାଯାଇଛି l ବିଜେପି ସରକାର ବର୍ଷ ପୂର୍ତ୍ତି ପାଳନ କରିବାକୁ ସଜବାଜ ଆରମ୍ଭ କରିଥିବା ବେଳେ ରାଜ୍ୟରେ ମହିଳା ନିର୍ଯାତନା ନେଇ ଖୋଦ ମହିଳା ଜନ ପ୍ରତିନିଧିମାନେ ଉଦବେଗ ପ୍ରକାଶ କରିବା ବିଜେପି ସରକାରର ବିଫଳତାକୁ ପଦାକୁ ଆଣିଛି l ତେଣୁ ସୁଭଦ୍ରା ନୁହେଁ ମହିଳାଙ୍କୁ ରାଜ୍ୟରେ ସୁରକ୍ଷା ଦରକାର ବୋଲି ବିଧାୟିକାମାନେ ଦାବି କରିଛନ୍ତି l