ନନ୍ଦିଘୋଷ ବ୍ୟୁରୋ : ଭଦ୍ରକ ଜିଲ୍ଲାରେ ମହିଳାଙ୍କ ବେକରୁ ଝାମ୍ପିନେଲେ ସୁନା ଚେନ୍ । ଭଦ୍ରକ ଜିଲ୍ଲା ତୃପ୍ତି ପ୍ଲାଜା ନିକଟରୁ ସୁନା ଚେନ୍ ଲୁଟ୍ । ପଲସର ବାଇକରେ ୨ ଜଣ ଦୁର୍ବୃତ୍ତ ଆସି ବେକରୁ ଝାମ୍ପିନେଲେ୧୬ ଗ୍ରାମ ଓଜନର ସୁନା ଚେନ୍ । ଗେଲପୁର ପଞ୍ଚାୟତ ଚାରିଘରିଆ ଦୁଃଖନଗରର ପଦ୍ମାବତୀ ମିଶ୍ର ସ୍ଵାମୀ ଓ ଝିଅଙ୍କ ସହିତ ବାଇକରେ ମାର୍କେଟରୁ ଘରକୁ ଫେରୁଥିଲେ । ଘରକୁ ଫେରିବା ବାଟରେ ୨ଜଣ ଦୁର୍ବୃତ୍ତ ପଲସର ବାଇକରେ ଆସି ସୁନା ଚେନ୍ ଝାମ୍ପିନେଇ ଫେରାର ହୋଇଯାଇଛନ୍ତି । ଟାଉନ ଥାନାରେ ଅଭିଯୋଗ ପରେ ପୋଲିସର ଛାନଭିନ ଜାରି ।
ନିଶିକାନ୍ତ ଦୁବେଙ୍କ ବିରୋଧରେ ଆଗତ ପିଟିସନ ମାମଲା : ଆଜି ଶୁଣାଣି କରିବେ ସୁପ୍ରିମକୋର୍ଟ
ନନ୍ଦିଘୋଷ ବ୍ୟୁରୋ : ପ୍ରଧାନ ବିଚାରପତି ଓ ସୁପ୍ରିମକୋର୍ଟଙ୍କ ବିରୋଧରେ ଅରୁଚିକର ମନ୍ତବ୍ୟ ମାମଲା । ବିଜେପି ସାଂସଦ ନିଶିକାନ୍ତ ଦୁବେଙ୍କ ବିରୋଧରେ ଆଗତ ପିଟିସନର ଆଜି ଶୁଣାଣି କରିବେ ସୁପ୍ରିମକୋର୍ଟ।ବିଚାର ବିଭାଗର ମର୍ଯ୍ଯାଦା ଉପରେ ନିଶିକାନ୍ତଙ୍କ ବୟାନ ପ୍ରଶ୍ନ ସୃଷ୍ଟି କରିଛି ବୋଲି ପିଟିସନରେ ଉଲ୍ଲେଖ ହୋଇଛି । ଏହା ସହ ଓ୍ବାକଫ ସଂଶୋଧନ ଆଇନ ତଥା ଅନ୍ୟାନ୍ୟ ପ୍ରସଙ୍ଗରେ ବିଦ୍ଵେଷମୂଳକ ମତ ଦେଉଥିବା ରାଜନୈତିକ ନେତାମାନଙ୍କ ଉପରେ ରୋକ ଲଗାଇବା ଲାଗି ସମସ୍ତ ରାଜ୍ୟର ମୁଖ୍ୟ ଶାସନ ସଚିବମାନଙ୍କୁ କେନ୍ଦ୍ର ଗୃହ ମନ୍ତ୍ରାଳୟ ନିର୍ଦ୍ଦେଶ ଦେବା ସକାଶେ ସୁପ୍ରିମକୋର୍ଟ ନିର୍ଦ୍ଦେଶନାମା ଜାରି କରନ୍ତୁ ବୋଲି ପିଟିସନରେ ଉଲ୍ଲେଖ କରାଯାଇଛି। ସୁପ୍ରିମକୋର୍ଟ ନିଜ ସୀମା ଉଲ୍ଲଂଘନ କରୁଛନ୍ତି।ଯଦି ସବୁ କଥା ସୁପ୍ରିମକୋର୍ଟ ବିଚାର କରିବେ ତେବେ ସଂସଦକୁ ବନ୍ଦ କରିଦିଆଯାଉ। ବିଚାର ବିଭାଗ ଧାର୍ମିକ ବିଦ୍ଵେଷ ସୃଷ୍ଟି କରୁଛନ୍ତି।ଏପରିକି ତତକାଳୀନ ସିଜେଆଇ ଡି.ଓ୍ବାଇ. ଚନ୍ଦ୍ରଚୂଡ଼ ଗୃହଯୁଦ୍ଧ ଲାଗି ଦାୟୀ ବୋଲି କହିଥିଲେ ନିଶିକାନ୍ତ । ଧାରା ୩୭୭ ସମ୍ପର୍କରେ ସୁପ୍ରିମକୋର୍ଟ ଦେଇଥିବା ରାୟକୁ ମଧ୍ୟ ନିଶିକାନ୍ତ ସମାଲୋଚନା କରିଥିଲେ। ନିଶିକାନ୍ତଙ୍କ ଏହି ମତଠାରୁ ନିଜକୁ ଦୂରେଇଥିଲା ବିଜେପି।
ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ବଡ଼ ଘୋଷଣା, ଶତ୍ରୁଙ୍କୁ ଦିଆଯିବ କଡ଼ା ଜବାବ
ନନ୍ଦିଘୋଷ ବ୍ୟୁରୋ : ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ବଡ଼ ଘୋଷଣା। ଶତ୍ରୁଙ୍କୁ ଦିଆଯିବ କଡ଼ା ଜବାବ। ଶତ୍ରୁ ବିରୋଧରେ ପଦକ୍ଷେପ ନେବାକୁ ଦେଶବାସୀ ଚାହାଁନ୍ତି ବୋଲି କହିଛନ୍ତି ରାଜନାଥ। ଦ୍ବିପାକ୍ଷିକ ପ୍ରତିରକ୍ଷା ସମ୍ପର୍କରେ ଆଜି ଜାପାନ ପ୍ରତିରକ୍ଷା ମନ୍ତ୍ରୀ ଜେନେରାଲ ନାକତାନିଙ୍କ ସହ ଆଲୋଚନା କରିବେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ। ଆଞ୍ଚଳିକ ଓ ଅନ୍ତର୍ଜାତୀୟ ନିରାପତ୍ତା ପ୍ରସଙ୍ଗରେ ହେବ ଆଲୋଚନା। ୬ ମାସରେ ଦୁଇ ଦେଶର ପ୍ରତିରକ୍ଷା ମନ୍ତ୍ରୀଙ୍କ ଏହା ହେବ ଦ୍ବିତୀୟ ଆଲୋଚନା।
ୱାକଫ ସଂଶୋଧନ ଆଇନ ପ୍ରସଙ୍ଗ : ଆଜି ସୁପ୍ରିମକୋର୍ଟରେ ଶୁଣାଣି
ନନ୍ଦିଘୋଷ ବ୍ୟୁରୋ : ୱାକଫ ସଂଶୋଧନ ଆଇନ ପ୍ରସଙ୍ଗ। ଆଜି ସୁପ୍ରିମକୋର୍ଟରେ ଏହି ମାମଲାର ହେବ ପରବର୍ତ୍ତୀ ଶୁଣାଣି। ପରବର୍ତ୍ତୀ ଶୁଣାଣି ଯାଏ ୱାକଫ ବୋର୍ଡ ଓ କାଉନସିଲରେ ନିଯୁକ୍ତି ଉପରେ ରୋକ୍ ଲଗାଇଥିଲେ କୋର୍ଟ। ୱାକଫ ସଂଶୋଧନ ଆଇନ ପ୍ରସଙ୍ଗରେ ସୁପ୍ରିମକୋର୍ଟରେ ଶୁଣାଣି ଚାଲିଥିବାବେଳେ କେନ୍ଦ୍ରକୁ କେତେକ କଠୋର ପ୍ରଶ୍ନ କରିଥିଲେ ସୁପ୍ରିମକୋର୍ଟ। ୱାକଫ ବୋର୍ଡରେ ହିନ୍ଦୁମାନଙ୍କୁ ସଦସ୍ୟ ରଖିବା ଲାଗି ଆଇନରେ ବ୍ୟବସ୍ଥା ରହିଛି। ହେଲେ ହିନ୍ଦୁ ଦେବୋତ୍ତର ବୋର୍ଡରେ ମୁସଲିମମାନଙ୍କ ରଖାଯାଇଛି କି ବୋଲି ପ୍ରଶ୍ନ କରିଥିଲେ କୋର୍ଟ। ସିଜେଆଇ ସଞ୍ଜୀବ ଖାନ୍ନା, ଜଷ୍ଟିସ ସଞ୍ଜୟ କୁମାର ଓ ଜଷ୍ଟିସ କେ. ଭି. ବିଶ୍ବନାଥନଙ୍କୁ ନେଇ ଗଠିତ ଖଣ୍ଡପୀଠ କରିବେ ପିଟିସନର ଶୁଣାଣି।
ସେପଟେ ୱାକଫ ସଂଶୋଧନ ଆଇନର ସାମ୍ବିଧାନିକ ବୈଧତା ପ୍ରସଙ୍ଗରେ ଆଗତ ଏକ ପିଟିସନକୁ ମେ ୨ରେ ରଦ୍ଦ କରିଥିଲେ ଅଦାଲତ। ସୁପ୍ରିମକୋର୍ଟରେ ଦାୟର ୭୨ଟି ପିଟିସନରୁ ମାତ୍ର ୫ଟି ପିଟିସନର ଶୁଣାଣି କରିବେ କୋର୍ଟ। ଗତ ଏପ୍ରିଲ ୨୯ରେ ୧୩ଟି ପିଟିସନକୁ ଗ୍ରହଣ କରିବାକୁ ମନା କରିଥିଲେ କୋର୍ଟ। ଏଆଇଏମଆଇଏମ, ଅଲ ଇଣ୍ଡିଆ ମୁସଲିମ ପର୍ସନାଲ ଲ ବୋର୍ଡ , ଜମାଏତ ଉଲମା –ଇ-ହିନ୍ଦ, ଦ୍ରାବିଡ ମୁନେତ୍ର କାଗାଗମ ଓ କଂଗ୍ରେସ ପକ୍ଷରୁ ବି ଦାୟର ହୋଇଛି ପିଟିସନ। ଗତ ଏପ୍ରିଲ ୨ରେ ଲୋକସଭାରେ ଓ ଏପ୍ରିଲ ୩ ତାରିଖରେ ରାଜ୍ୟସଭାରେ ଗୃହୀତ ହୋଇଥିଲା ବିଲ୍। ଏପ୍ରିଲ ୫ରେ ମିଳିଥିଲା ରାଷ୍ଟ୍ରପତିଙ୍କ ଅନୁମୋଦନ।
ମର୍ମନ୍ତୁଦ ସଡ଼କ ଦୁର୍ଘଟଣାରେ ଚାଲିଗଲା ୨ ଜୀବନ
ନନ୍ଦିଘୋଷ ବ୍ୟୁରୋ: ମର୍ମନ୍ତୁଦ ସଡ଼କ ଦୁର୍ଘଟଣାରେ ଚାଲିଗଲା ଦୁଇ ଜଣଙ୍କ ଜୀବନ । ଉଦଳା ଶରତ ଥାନା ଭଣ୍ଡାର ଛକ ନିକଟରେ ଘଟିଛି ମର୍ମନ୍ତୁଦ ଦୁର୍ଘଟଣା । ଗଛରେ ବାଡେଇ ହେଲା ବାଇକ୍ । ଘଟଣା ସ୍ଥଳରେ ହିଁ ଦୁଇ ଜଣଙ୍କ ମୃତ୍ୟୁ ହୋଇଛି । ୩ ଜଣ ଯୁବକ କଳମଗଡିଆ ଅଞ୍ଚଳକୁ ଆସୁଥିବା ବେଳେ ପ୍ରଧାନ ଦେହୁରୀ ସାହି ଛକ ନିକଟରେ ଭାରସାମ୍ୟ ହରାଇ ଏକ ଶାଳ ଗଛକୁ ବାଡେଇ ହୋଇଥିଲା ବାଇକ । ଯାହା ଫଳରେ ଘଟଣାସ୍ଥଳରେ ୨ ଜଣଙ୍କ ମୃତ୍ୟୁ ହୋଇଥିବା ବେଳେ ଅନ୍ୟଜଣେ ଗୁରୁତର ହୋଇଛନ୍ତି । ଗୁରୁତରଙ୍କୁ ସ୍ଥାନୀୟ ଲୋକେ ଚିକିତ୍ସା ନିମନ୍ତେ ଡାକ୍ତରଖାନା ପଠାଇ ଥିବା ବେଳେ ଅବସ୍ଥା ସଂକଟାପନ୍ନ ରହିଛି । ମୃତକ ଏବଂ ଗୁରୁତର କାହାରି ପରିଚୟ ମିଳିପାରିନାହିଁ । ଖବର ପାଇ ଶରତ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
ସହଯୋଗୀଙ୍କ ସହ ଲୁଟିଲା, ପରେ ଯାଇ ଥାନାରେ ଦେଲା ଏତଲା
ନନ୍ଦିଘୋଷ ବ୍ୟୁରୋ: ଲୁଟେରା ସାଜିଥିଲା ଏତଲାକାରୀ । ପ୍ରଥମେ ନିଜ ସହଯୋଗୀ ସହ ଲୁଟକଲା ଓ ପରେ ଲୁଟ ହୋଇଥିବା ନେଇ ଥାନାରେ ଏତଲା ଦେଲା । ଏଭଳି ଧୁର୍ତ୍ତ ଲୁଟେହା ଓ ତାର ସହଯୋଗୀକୁ ଗିରଫ କରିଛି ବିଞ୍ଝାରପୁର ପୋଲିସ । ଅଭିଯୁକ୍ତ ଗଣେଶ ଚନ୍ଦ୍ର ଜେନା ବିଞ୍ଝାରପୁର ସ୍ଥିତ ଏକ କୋରିଅର କମ୍ପାନୀ କମ୍ପାନୀରେ କାର୍ଯ୍ୟ କରନ୍ତି । କୋରିଅର କମ୍ପାନୀର ଲକରରେ ଥିବା ପ୍ରାୟ ୩ ଲକ୍ଷ ଟଙ୍କା ସହ ସିସିଟିଭି ହାର୍ଡଡିସ୍କ ଲୁଟ ହୋଇଯାଇଥିବା ନେଇ ସେ ଗତ ୧ ତାରିଖ ଦିନ ବିଞ୍ଝାରପୁର ଥାନାରେ ଲିଖିତ ଅଭିଯୋଗ କରିଥିଲେ । ବିଞ୍ଝାରପୁର ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା । ପୋଲିସ ତଦନ୍ତ କରି ଗଣେଶକୁ ଅଟକ ରଖି ପଚରାଉଚରା ପରେ ସେ ସବୁ ସତ ମାନି ଯାଇଥିଲା । ମାମଲାରେ ବିଞ୍ଝାରପୁର ପୋଲିସ ଗଣେଶ ଓ ତାର ସହଯୋଗୀ ଯାଜପୁର ଅଂଚଳର ଲିକୁ ବେହେରାକୁ ଗିରଫ କରି କୋର୍ଟ ଚାଲାଣ କରିବା ସହ ତାଙ୍କ ନିକଟରୁ ୩୦ ହଜାର ଟଙ୍କା ସହ ଲୁଟରେ ବ୍ୟବହୃତ ସ୍କୁଟି ଜବତ କରିଛି ।
ସ୍ୱାସ୍ଥ୍ୟ ସେବା କ୍ଷେତ୍ରରେ ଚାଲିଥିବା ସ୍ବର୍ଣ୍ଣିମ ଅଧ୍ୟାୟରେ ପଡିଛି ଯବନିକା
ନନ୍ଦିଘୋଷ ବ୍ୟୁରୋ: ସ୍ୱାସ୍ଥ୍ୟ ସେବା କ୍ଷେତ୍ରରେ ଚାଲିଥିବା ସ୍ବର୍ଣ୍ଣିମ ଅଧ୍ୟାୟରେ ପଡିଯାଇଛି ଯବନିକା। ଘରୋଇ ହସ୍ପିଟାଲରେ ସ୍ୱାସ୍ଥ୍ୟ ସେବା କ୍ଷେତ୍ରରେ ବରଦାନ ସାଜିଥିବା ବିଏସକେୱାଇ ବନ୍ଦ ହେବା ପରେ ଏବେ ସରକାରୀ ଚିକିତ୍ସା କ୍ଷେତ୍ର ବି ଧରାଶାୟୀ। ୧୧ ଟି ଜିଲ୍ଲାରେ ନାହାଁନ୍ତି ସିଡିଏମଓ। ରାଜ୍ୟରେ ଡାକ୍ତର, ପାରା ମେଡ଼ିକାଲ ଷ୍ଟାଫର ଘୋର ଅଭାବ। ଏହାକୁ ନେଇ ତୀବ୍ର ହୋଇଛି ଅସନ୍ତୋଷ।
ଦିନ ଥିଲା….ଘରୋଇ ହସ୍ପିଟାଲ ହେଉ କିମ୍ବା ସରକାରୀ ହସ୍ପିଟାଲ। ସବୁଆଡେ ଗରିବ ରୋଗୀଟିଏ ବିଶ୍ୱସ୍ତରୀୟ ସେବା ପାଉଥିଲା। ପୂର୍ବ ସରକାର ସମୟରେ ଅପହଞ୍ଚ ବଣ ଜଙ୍ଗଲରେ ବି ସେବା ପହଞ୍ଚାଯାଉଥିଲା। କିନ୍ତୁ ଏବେ ସେସବୁ ଇତିହାସ । ଓଲଟି ବିଗିଡିଯାଇଛି ରାଜ୍ୟର ସ୍ୱାସ୍ଥ୍ୟସେବା। ବିନା ମୁଖିଆରେ ଚାଲିଛି ରାଜ୍ୟର ୧୧ଟି ଜିଲ୍ଲାର ସ୍ୱାସ୍ଥ୍ୟସେବା। ୧୧ଟି ଜିଲ୍ଲାରେ ସିଡିଏମଓ ନାହାନ୍ତି। କାମଚଳା ସିଡିଏମଓ କାମ ଚଳାଉଛନ୍ତି। ଓଡ଼ିଶାରେ ବିଜେପି ସରକାର ଆସିବା ପରେ ଏଭଳି ସ୍ଥିତି ସୃଷ୍ଟି ହୋଇଛି। ସିଡିଏମଓ ନିଯୁକ୍ତି ଏକ ରୁଟିନ କାମ ହୋଇଥିଲେ ବି ତାହା ଘଟୁନାହିଁ। ଯେଉଁମାନେ ଅତିରିକ୍ତ ଦାୟିତ୍ୱରେ ଅଛନ୍ତି ସେମାନେ ସଠିକ୍ କାମ କରିବାକୁ ଅସମର୍ଥ। ଲଗାତର ଭାବେ ରାଜ୍ୟର ସ୍ୱାସ୍ଥ୍ୟ ସେବା ତଳକୁ ତଳକୁ ଯାଉଛି। ଏପରିକି ଆୟୁଷ୍ମାନ ଭାରତ ଲାଗୁ ହେବା ପରେ ବି ବଦଳୁନି ସ୍ଥିତି। ଏନେଇ ସରକାରକୁ ଟାର୍ଗେଟ କରିଛନ୍ତି ଓଡିଶା ମେଡ଼ିକାଲ ସେବା ସଂଘର ପୂର୍ବତନ ସଭାପତି।
୧୧ ଜିଲ୍ଲାରେ ସିଡିଏମଓ ନଥିବାବେଳେ ସ୍ବାସ୍ଥ୍ୟ ସେବା କେମିତି ଚାଲିବ ବୋଲି ପ୍ରଶ୍ନ କରିଛି ଜନସ୍ଵାସ୍ଥ୍ୟ ମିଶନ। ରାଜ୍ୟରେ ଡାକ୍ତର, ପାରା ମେଡ଼ିକାଲ ଷ୍ଟାଫର ବ୍ୟାପକ ଅଭାବ ରହିଛି। ପାଖାପାଖି ୬୦ ପ୍ରତିଶତରୁ ଅଧିକ ପଦ ଫାଙ୍କା। ପାରା ମେଡ଼ିକାଲ ଷ୍ଟାଫ ବହୁତ ସଂଖ୍ୟାରେ ରହିଥିବା ବେଳେ ସେମାନଙ୍କୁ ମଧ୍ୟ ନିଯୁକ୍ତି ଦିଆଯାଉ ନାହିଁ। ଗରିବ ରୋଗୀଟିଏ କରିବ କଣ ବୋଲି ଉଠିଛି ପ୍ରଶ୍ନ। ଏପରିକି ଇଣ୍ଡିଆନ ପବ୍ଲିକ ହେଲଥ ଷ୍ଟାଣ୍ଡାର୍ଡ ନର୍ମକୁ ମଧ୍ୟ ଓଡିଶା ପୂରଣ କରିପାରୁ ନାହିଁ ବୋଲି କୁହାଯାଇଛି। ସେପଟେ ବିଜେପି ସରକାର କାହିଁକି ସବୁ କ୍ଷେତ୍ରରେ ଓଡ଼ିଶାର ଲୋକଙ୍କୁ ସଙ୍କଟ ଭିତରୁ ଠେଲି ଦେଉଛି ବୋଲି ପ୍ରଶ୍ନ କରିଛି ନାଗରିକ ସୁରକ୍ଷା ମଞ୍ଚ।
ଜାତୀୟ ରିପୋର୍ଟ ଅନୁଯାୟୀ ସ୍ୱାସ୍ଥ୍ୟ ସେବା କ୍ଷେତ୍ରରେ ଓଡ଼ିଶାର ରାଙ୍କ ବହୁ ତଳେ ରହିଛି। ସ୍ୱାସ୍ଥ୍ୟରେ ଉନ୍ନତି କରିବା କ୍ଷେତ୍ରରେ ସରକାରଙ୍କ ଆନ୍ତରିକତା ନାହିଁ ବୋଲି ଅଭିଯୋଗ ହେଉଛି।
ପାକିସ୍ତାନ ବିରୋଧରେ ଗର୍ଜିଲେ ଏଆଇଏମଆଇଏମ ନେତା ଅସଦୁଦ୍ଦିନ ଓବେସୀ
ନନ୍ଦିଘୋଷ ବ୍ୟୁରୋ: ପାକିସ୍ତାନ ବିରୋଧରେ ଗର୍ଜିଲେ ଏଆଇଏମଆଇଏମ ନେତା ଅସଦୁଦ୍ଦିନ ଓବେସୀ। ସେ କହିଛନ୍ତି-ପାକିସ୍ତାନ ଏକ ବିଫଳ ରାଷ୍ଟ୍ର। ଏହା ସହ ଭାରତ ବିରୋଧୀ ଚିନ୍ତାଧାରାକୁ ନେଇ ପାକ୍ ଆର୍ମି ଚିଫ ଜେନେରାଲ ଅସିମ ମୁନୀରଙ୍କ ବିରୋଧରେ ବି ଗର୍ଜିଛନ୍ତି ଓବେସୀ। ପାକିସ୍ତାନ ବିରୋଧରେ କେନ୍ଦ୍ର ସରକାର ପଦକ୍ଷେପ ନିଅନ୍ତୁ ବୋଲି ସେ ଆହ୍ବାନ ଦେଇଛନ୍ତି। ଏପ୍ରିଲ ୨୨ ପହଲଗାଓଁ ହମଲା ପରଠାରୁ ପାକିସ୍ତାନ ବିରୋଧରେ ସ୍ବର ଉତ୍ତୋଳନ କରିଆସୁଛନ୍ତି ଓବେସୀ। ଏହା ସହ ଆତଙ୍କବାଦକୁ ପ୍ରାୟୋଜିତ କରୁଥିବାରୁ ପାକିସ୍ତାନକୁ ଫିନାନସିଆଲ ଆକ୍ସନ ଟାସ୍କ ଫୋର୍ସ ବା FATF ଗ୍ରେ ଲିଷ୍ଟରେ ସ୍ଥାନୀତ କରିବା ଲାଗି ସେ ଦାବି କରିଛନ୍ତି।
ମୋହନଙ୍କ ତୁଣ୍ଡରେ ନବୀନ ସରକାରଙ୍କ କୃତିତ୍ବର ଉପଲବ୍ଧି, ମୁମ୍ଵାଇରେ ନ କହି ରହିପାରିଲେନି ମୁଖ୍ୟମନ୍ତ୍ରୀ
ନନ୍ଦିଘୋଷ ବ୍ୟୁରୋ: ଓଡ଼ିଶା କ୍ରୀଡ଼ା ଭିତ୍ତିଭୂମି ନିର୍ମାଣରେ ଏକ୍ସଲେଣ୍ଟ । ଏ ସଫଳତା ୧୦ ମାସର ସରକାର ଭିତରେ ମିଳିନି । ପୂର୍ବ ନବୀନ ସରକାରଙ୍କ କୃତିତ୍ବର ଉପଲବ୍ଧି ଏବେ ମୁଖ୍ୟମନ୍ତ୍ରୀ ମୋହନ ମାଝୀଙ୍କ ତୁଣ୍ଡରେ । ଖୋ-ଖୋ ଓ କବାଡ଼ି ପରି ସ୍ବଦେଶୀ କ୍ରୀଡ଼ାର ହାଇ ପରଫରମାନ୍ସ ସେଣ୍ଟର ପୂର୍ବ ସରକାରଙ୍କ ସମୟରେ ହୋଇଥିଲା ବୋଲି ମୁମ୍ବାଇରେ ମୁଖ୍ୟମନ୍ତ୍ରୀଙ୍କ ମୁହଁରୁ ବାହାରି ପଡ଼ିଛି । ମୁଖ୍ୟମନ୍ତ୍ରୀଙ୍କ ସ୍ବୀକାରୋକ୍ତି ବିଜେପିର ମିଛ ନ୍ୟାରେଟିଭ୍ ଗୁମର ଖୋଲିଥିବା ବିରୋଧୀ ଅଭିଯୋଗ କରିଛନ୍ତି ।
ଧରା ପଡ଼ିଲା ବିଜେପି ସରକାରର ରାଜନୀତି ଏଜେଣ୍ଡା । ବିଧାନସଭା ଭିତରେ ଓ ବାହାରେ ଶ୍ରେୟ ନେବା ନିଶା ଘାରିଛି ସରକାରଙ୍କୁ । ଖୋଦ ପୂର୍ବ ନବୀନ ସରକାରଙ୍କ କ୍ରୀଡ଼ା ଉପଲବ୍ଧିକୁ ପ୍ରଶଂସା କରିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ । ତା ପୁଣି ମୁମ୍ବାଇରେ । ସ୍ଵଦେଶୀ କ୍ରୀଡ଼ା ଉପରେ ହେଉଥିବା ଏକ କାର୍ଯ୍ୟକ୍ରମରେ ଭାଗ ନେଇ ନିଜ ବକ୍ତବ୍ୟରେ ନବୀନଙ୍କ ସମୟରେ ହୋଇଥିବା କ୍ରୀଡ଼ାର ବିକାଶକୁ ମୋହର ମାରିଛନ୍ତି । ସ୍ବଦେଶୀ କ୍ରୀଡା ଖୋ-ଖୋର ବିକାଶ ପାଇଁ ଆର୍ସେଲର ମିତ୍ତଲ ନିପନ୍ ଷ୍ଟିଲ ସହଭାଗୀତାରେ ୨୦୨୩ ନଭେମ୍ବର ୧୦ ତାରିଖରେ ତତ୍କାଳୀନ ସରକାର କରିଥିଲେ ବୁଝାମଣା ପତ୍ର । ଖୋ-ଖୋ ସେଣ୍ଟର ବି ପ୍ରତିଷ୍ଠା ହୋଇଥିଲା । ହାଇ ପରଫରମାନ୍ସ ସେଣ୍ଟର ପ୍ରତିଷ୍ଠା କରିବାରେ ଓଡ଼ିଶା ଦେଶର ପ୍ରଥମ ରାଜ୍ୟ ବୋଲି ଗର୍ବର ସହ କହିଥିଲେ ମୁଖ୍ୟମନ୍ତ୍ରୀ । ନବୀନ ଯୁଗର ବିକାଶର ସତ୍ୟ ମାନିଥିବାରୁ ମୁଖ୍ୟମନ୍ତ୍ରୀ ମୋହନ ମାଝୀଙ୍କୁ ଧନ୍ୟବାଦ ଦେଇଛି ବିଜୁ ଜନତା ଦଳ । ନବୀନ ସରକାରଙ୍କ ବିରୋଧରେ ବିଜେପି ଅନେକ ମିଛ ନ୍ୟାରେଟିଭ ଦେଇ ରାଜ୍ୟବାସୀଙ୍କୁ ଭ୍ରମିତ କରିଥିବାରୁ ମୁଖ୍ୟମନ୍ତ୍ରୀ ଏବେ ସତ କହିଛନ୍ତି ବୋଲି ବିଜେଡି ଦାବି କରିଛି ।
କ୍ରୀଡ଼ା ସହ ରାଜ୍ୟର ସାମଗ୍ରିକ ବିକାଶରେ ନବୀନ ପଟ୍ଟନାୟକଙ୍କ ଅବଦାନ ଅତୁଳନୀୟ । ସମାଲୋଚନା ନ କରି ସେ ଦିଗରେ କାମ କରିବାକୁ ସରକାରଙ୍କୁ ପରାମର୍ଶ ଦେଇଛି ବିଜେଡି । କଂଗ୍ରେସ ବି ସ୍ବୀକାର କରିଛି ନବୀନ ସରକାର ସମୟର କ୍ରୀଡ଼ା ବିକାଶକୁ । ହେଲେ ଏବର ସରକାର ଅଥର୍ବ ପାଲଟି ଯାଇଥିବା ଦଳ ଅଭିଯୋଗ କରିଛି । ସେପଟେ ମୁଖ୍ୟମନ୍ତ୍ରୀ କ୍ରୀଡ଼ା ଏକ୍ସଲେନ୍ସ୍ ନେଇ କହିବା ପରେ ବିଜେପି ବି ପୂର୍ବ ସରକାରଙ୍କ ବିକାଶ କାର୍ଯ୍ୟକ୍ରମକୁ ପରୋକ୍ଷରେ ସ୍ବୀକାର କରିଛି ।
କିଛି ମାସ ତଳେ କଳିଙ୍ଗ ଷ୍ଟାଡିଅମରେ ବ୍ୟାଡମିଣ୍ଟନର ହାଇ ପରଫର୍ମାନସ୍ ସେଣ୍ଟର ଉଦଘାଟନ କରିଥିଲେ ସରକାର । ଏହାର ମୂଳଦୁଆ ନବୀନ ସରକାର ସମୟରି ପଡ଼ିବା ସହ ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ ହୋଇଥିଲା । ହେଲେ ଡବଲ ଇଞ୍ଜିନ ନୂଆ କରିବେ କଣ ଖାଲି ରଙ୍ଗ ଓ ନାମ ବଦଳାଇ ବାହାବା ନେବାକୁ ଚେଷ୍ଟା କରିଛନ୍ତି ବୋଲି ଚର୍ଚ୍ଚା ଏବେ ଜୋର ଧରିଛି ।
ହୁତି ବିଦ୍ରୋହୀଙ୍କ ହମଲା ପରେ ଇସ୍ରାଏଲ ଯାଉଥିବା ଏୟାର ଇଣ୍ଡିଆ ବିମାନ ଗତି ପଥ ପରିବର୍ତ୍ତନ
ନନ୍ଦିଘୋଷ ବ୍ୟୁରୋ: ବେନ୍ ଗୁରିଅନ ଏୟାରପୋର୍ଟରେ ଘଟିଥିବା ହମଲା ପାଇଁ ଦିଲ୍ଲୀରୁ ତେଲ ଅବିବ ଯାଉଥିବା ଏୟାର ଇଣ୍ଡିଆ ବିମାନ AI139ର ଗତିପଥ ବଦଳିବାକୁ ପଡ଼ିଛି । ଏହି ଏୟାର ଇଣ୍ଡିଆ ବିମାନଟି ଆବୁଧାବିରେ ଅବତରଣ କରିଥିବାବେଳେ ପୁଣିଥରେ ଦିଲ୍ଲୀକୁ ପ୍ରତ୍ୟାବର୍ତ୍ତନ କରିବ । ଏୟାର ଇଣ୍ଡିଆ ପକ୍ଷରୁ ଏକ ବିଜ୍ଞପ୍ତିରେ ପ୍ରକାଶ କରାଯାଇଛି କି, ଯାତ୍ରୀ ଏବଂ କର୍ମଚାରୀଙ୍କ ସୁରକ୍ଷା ଦୃଷ୍ଟିରୁ ଏଭଳି ନିଷ୍ପତ୍ତି ନିଆଯାଇଛି । ସେପଟେ ୬ ମେ ପର୍ଯ୍ୟନ୍ତ ତେଲ ଅବିବକୁ ବିମାନ ଚଳାଚଳ ବାତିଲ କରାଯାଇଛି । ସେପଟେ ୩ରୁ ୬ ତାରିଖ ପର୍ଯ୍ୟନ୍ତ ଯେଉଁ ଯାତ୍ରୀମାନେ ଟିକେଟ୍ ବୁକିଂ କରିଛନ୍ତି ସେମାନଙ୍କ ଅର୍ଥ ସମ୍ପୂର୍ଣ୍ଣ ଭାବେ ଫେରସ୍ତ କରାଯିବ ।
ରବିବାର ହୁତି ବିଦ୍ରୋହୀମାନେ ଇସ୍ରାଏଲର ବେନ୍ ଗୁରିଅନ ବିମାନବନ୍ଦରରେ ଏକ ବାଲିଷ୍ଟିକ ଆକ୍ରମଣ କରିଛନ୍ତି । ଯାହାକୁ ରୋକିବାରେ ବିଫଳ ହୋଇଛନ୍ତି । ଇସ୍ରାଏଲ ସୁରକ୍ଷା ବାହିନୀ । କ୍ଷେପଣାସ୍ତ୍ର ଆକ୍ରମଣ ପରେ ବିମାନବନ୍ଦରରେ ଅବତରଣ ଓ ଉଡ଼ାଣ ବନ୍ଦ କରାଯାଇଛି ।