ନନ୍ଦିଘୋଷ ବ୍ୟୁରୋ : ଆମେରିକାରେ ରହୁଥିବା ପ୍ରାୟ ୯ ଲକ୍ଷ ପ୍ରବାସୀଙ୍କୁ ବଡ଼ ଝଟକା। ପୂର୍ବତନ ରାଷ୍ଟ୍ରପତି ଜୋ ବାଇଡେନଙ୍କ ସମୟରେ ପ୍ରଚଳିତ CBP ୱାନ୍ ଆପ୍ ନୀତିକୁ ହଟାଇଦେଇଛନ୍ତି ନୂଆ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପ୍ରଶାସନ। ଫଳରେ ଏବେ ପ୍ରାୟ ୯ ଲକ୍ଷ ପ୍ରବାସୀ ଆମେରିକା ଛାଡିବାକୁ ବାଧ୍ୟ ହେବେ। ଟ୍ରମ୍ପ ପ୍ରଶାସନ ବାଇଡେନଙ୍କ ନୀତିକୁ ଓଲଟାଇ ଦେଇଛି ଏବଂ ଏହି ପ୍ରବାସୀମାନଙ୍କର ଆମେରିକାରେ ରହିବା ପାଇଁ ଆଇନଗତ ଅନୁମତିକୁ ସମାପ୍ତ କରିଛି । ଆମେରିକାର ଗୃହ ସୁରକ୍ଷା ବିଭାଗ DHS ସୋମବାର ଜାରି ଏକ ବିବୃତ୍ତିରେ କହିଛି ଯେ CBP ଓ୍ବାନ ଆପ୍ ମାଧ୍ୟମରେ ଚିହ୍ନଟ ହୋଇଥିବା ପ୍ରବାସୀମାନଙ୍କୁ ତୁରନ୍ତ ଦେଶ ଛାଡିବାକୁ ପଡିବ। ଜାନୁଆରୀ 2023 ପରଠାରୁ, ବାଇଡେନ ପ୍ରଶାସନର ଏହି ଆପ୍ ନୀତି ଅଧୀନରେ ୯ ଲକ୍ଷରୁ ଅଧିକ ପ୍ରବାସୀ ଆମେରିକା ଆସିଥିଲେ । ଏହି କାର୍ଯ୍ୟକ୍ରମ ସେମାନଙ୍କୁ ଦୁଇ ବର୍ଷ ପାଇଁ ଅସ୍ଥାୟୀ ଭାବରେ ଆମେରିକାରେ ରହିବା ଏବଂ କାମ କରିବାର ଅନୁମତି ମିଳିଥିଲା। ଏବେ ଏହି ଅନୁମତିଗୁଡ଼ିକୁ ପ୍ରତ୍ୟାହାର କରାଯାଇଛି। ଡିଏଚଏସ କହିଛି ଯେ ସୀମା ସୁରକ୍ଷିତ କରିବା ଏବଂ ଜାତୀୟ ସୁରକ୍ଷାକୁ ମଜବୁତ କରିବା ପାଇଁ ଏହି ପଦକ୍ଷେପ ନିଆଯାଇଛି । ଇମେଲ୍ ମାଧ୍ୟମରେ ୯ ଲକ୍ଷ ପ୍ରବାସୀଙ୍କୁ ଆମେରିକା ଛାଡିବାକୁ କୁହାଯାଇଛି। ନୋଟିସ ପାଇଥିବା ଅଧିକାଂଶ ଲୋକ ହଣ୍ଡୁରାସ୍, ଏଲ୍ ସାଲଭାଡୋର ଏବଂ ମେକ୍ସିକୋର। ନୋଟିସ୍ ପାଇବା ପରେ ଏହି ଲୋକମାନଙ୍କ ମଧ୍ୟରେ ଅସ୍ଥିରତା ଦେଖାଦେଇଛି। ଏହି ଲୋକମାନେ ନିଜ ଭବିଷ୍ୟତକୁ ନେଇ ଚିନ୍ତାପ୍ରକଟ କରିଛନ୍ତି । ଚଳିତ ବର୍ଷ ଜାନୁଆରୀରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଦାୟିତ୍ୱ ନେବା ପରଠାରୁ ଯେଉଁ ନୀତିଗୁଡ଼ିକ ଉପରେ ସର୍ବାଧିକ ଧ୍ୟାନ ଦିଆଯାଇଛି।
ସାବରମତୀ ନିକଟରେ ଅନୁଷ୍ଠିତ ହେବ ଏଆଇସିସି ଅଧିବେଶନ
ନନ୍ଦିଘୋଷ ବ୍ୟୁରୋ : ଆଜି ସାବରମତୀ ନିକଟରେ ଅନୁଷ୍ଠିତ ହେବ ଏଆଇସିସି ଅଧିବେଶନ। ଏଥିରେ ଦେଶବ୍ୟାପୀ କଂଗ୍ରେସକୁ ମଜଭୁତ କରିବା ଲାଗି ଯୋଜନା ପ୍ରସ୍ତୁତ ହେବ। ତୃଣମୂଳସ୍ତରରରୁ ଦଳକୁ ସୁଶକ୍ତ କରିବା ଲାଗି ନିର୍ଦ୍ଧାରଣ ହେବ ପ୍ଲାନ। ନ୍ୟାୟପଥ ନାମରେ ନାମିତ ଏହି ଅଧିବେଶନରେ କଂଗ୍ରେସର ଭିଜନ ସମ୍ପର୍କରେ ଘୋଷଣା କରାଯିବ। ଆଞ୍ଚଳିକ ୟୁନିଟଗୁଡିକୁ ଅଧିକ କ୍ଷମତା ପ୍ରଦାନ କରିବା, ମେଣ୍ଟ ପ୍ରସଙ୍ଗରେ କ୍ଷେତ୍ର ପ୍ରସ୍ତୁତ କରିବା ଆଦି ସମ୍ପର୍କରେ ବି ଆଲୋଚନା ହେବ। ୨୦୨୭ ଗୁଜରାଟ ନିର୍ବାଚନ ସମେତ ୬ଟି ରାଜ୍ୟର ନିର୍ବାଚନ ପ୍ରସଙ୍ଗରେ ପ୍ରସ୍ତୁତ ହେବ ବ୍ଲୁପ୍ରିଣ୍ଟ। ରୋଡମ୍ୟାପ ପ୍ରସଙ୍ଗରେ କେତେକ ଚିଠା ପ୍ରସ୍ତାବ ସମ୍ପର୍କରେ ଆଲୋଚନା ହେବ। ଏହି ଅଧିବେଶନରେ ନ୍ୟାୟପଥ, ସଂକଳ୍ପ, ସମର୍ପଣ ଓ ସଂଘର୍ଷ ଥିମ ଅନୁସାରେ ବିଭିନ୍ନ ପ୍ରସ୍ତାବ ଗୃହୀତ ହେବ। ଦେଶର ପ୍ରାୟ ୧୭୦୦ ପ୍ରତିନିଧି ଏହି ଅଧିବେଶନରେ ଯୋଗଦେବେ। ଅଧିବେଶନରେ ରାଜନୈତିକ, ଅର୍ଥନୈତିକ, ସାମାଜିକ, ଅନ୍ତର୍ଜାତୀୟ ଓ ସାଂଗଠନିକ ବିଷୟ ସମ୍ପର୍କରେ ପ୍ରସ୍ତାବ ଗୃହୀତ ହେବ। ସେହିପରି ଜାତିଜନଗଣନା, ସଂରକ୍ଷକ୍ଷ ସୀମା ୫୦ ପ୍ରତିଶତକୁ ବୃଦ୍ଧି, ପଛୁଆ ବର୍ଗଙ୍କୁ ସମର୍ଥନ ଆଦି ପ୍ରସଙ୍ଗରେ ବି କେତେକ ପ୍ରସ୍ତାବ ଗୃହୀତ ହେବ ବୋଲି ସୂଚନା ମିଳିଛି। ଗତକାଲି ଅନୁଷ୍ଠିତ କଂଗ୍ରେସ କାର୍ଯ୍ୟକାରିଣୀରେ କେତେକ ଗୁରୁତ୍ବପୂର୍ଣ୍ଣ ପ୍ରସଙ୍ଗରେ ଆଲୋଚନା ହୋଇଥିଲା।
ବିବାଦୀୟ ସାରଥି ବାବାଙ୍କ ପୂଜା ସ୍ଥଳକୁ ଅଣ୍ଡା ଓ ଟମାଟୋ ମାଡ଼
ନନ୍ଦିଘୋଷ ବ୍ୟୁରୋ : ସାରଥିଙ୍କ ପୂଜା ସ୍ଥଳକୁ ଅଣ୍ଡା ଓ ଟମାଟୋ ମାଡ଼ । ପଟ୍ଟାମୁଣ୍ଡାଇ ତନୁପୁର ଗାଁରେ ଚାଲିଥିଲା ବିବାଦୀୟ ସାରଥି ବାବାଙ୍କ ପୂଜା । ଭୁବନେଶ୍ୱର ଓ ଅସୁରେଶ୍ୱରରୁ ଆସିଥିଲେ ଶତାଧିକ ଭକ୍ତ । ଏହି ପୂଜା ସମୟରେ ଗ୍ରାମବାସୀଙ୍କ ଘୋର ବିରୋଧ ଦେଖିବାକୁ ମିଳିଥିଲା । ଉତ୍ତେଜନା ପାଇଁ ଘଟଣା ସ୍ଥଳରେ ପୋଲିସ ମୁତୟନ ରହିଛନ୍ତି । ଦୀର୍ଘ ଦିନ ଧରି ବିବାଦୀୟ ସାରଥି ବାବାଙ୍କ ପୂଜାର୍ଚନା ବନ୍ଦ ଥିବା ବେଳେ ଆଜି ଏପରି କାର୍ଯ୍ୟ କୁ ଗ୍ରାମବାସୀ ମାନେ ବିରୋଧ କରିଥିଲେ । ଗ୍ରାମବାସୀ ମାନେ ଭକ୍ତଙ୍କ ଉପରକୁ ଅଣ୍ଡା ଓ ଟମାଟର ମାଡ଼ କରିଥିଲେ । ସବୁ ସତ୍ୱେ ବି ସାରଥି ଭକ୍ତ ଭଜନ କୀର୍ତ୍ତନ ବନ୍ଦ କରିନଥିଲେ। ବାଧ୍ୟ ହୋଇ ଲୋକଙ୍କ ବିରୋଧକୁ ଦେଖି ପୋଲିସ ସାରଥି ଭକ୍ତଙ୍କୁ ସେଠାରୁ ବାହାର କରିଦେଇଛନ୍ତି ।
ପ୍ରସ୍ତୁତ ହେବ କଂଗ୍ରେସ ରଣନୀତି : ଅହମ୍ମଦାବାଦରେ କଂଗ୍ରେସର ଗୁରୁତ୍ବପୂର୍ଣ୍ଣ କାର୍ଯ୍ୟକାରିଣୀ ବୈଠକ
ନନ୍ଦିଘୋଷ ବ୍ୟୁରୋ : ଅହମ୍ମଦାବାଦ କଂଗ୍ରେସ କାର୍ଯ୍ୟକାରିଣୀରେ ବିଜେପିର ସାମ୍ପ୍ରଦାୟିକ ନୀତିକୁ ଟାର୍ଗେଟ। ଦେଶରେ ସାମ୍ପ୍ରଦାୟିକ ବିଭାଜନ କରିବା ଲାଗି ବିଜେପି ଉଦ୍ୟମ କରୁଥିବାରୁ ଏହା ବିରୋଧରେ ଅଭିଯାନ ଚାଲିବ ବୋଲି ହୋଇଛି ଘୋଷଣା। ଏହା ସହ ଦେଶର ସମ୍ପଦକୁ ଯେପରି ଭାବେ କିଛି ନିର୍ଦ୍ଦିଷ୍ଟ ବ୍ୟକ୍ତିଙ୍କ ହାତରେ ଟେକି ଦିଆଯାଇଛି ତାହାକୁ ସମାଲୋଚନା କରାଯାଇଛି। ଅହମ୍ମଦାବାଦ ସର୍ଦ୍ଦାର ବଲ୍ଲଭ ଭାଇ ପଟେଲ ସ୍ମାରକୀସ୍ଥଳରେ ଆୟୋଜିତ ସମ୍ମିଳନୀରେ ସାଂଗଠନିକ ବିନ୍ୟାସ ଲାଗି ରୋଡମ୍ୟାପ ପ୍ରସ୍ତୁତ କରାଯାଇଛି। ବିଭିନ୍ନ ରାଜ୍ୟର ବିଧାନସଭା ନିର୍ବାଚନ, ବିଭିନ୍ନ ଦଳ ସହ ମେଣ୍ଟ ଆଦି ପ୍ରସଙ୍ଗରେ ବି ଆଲୋଚନା ହୋଇଥିବା ସୂଚନା ମିଳିଛି। ଦଳର ସାଂଗଠନିକ ବିକେନ୍ଦ୍ରୀକରଣ, ଚଳିତବର୍ଷ ଓ ଆସନ୍ତା ବର୍ଷ ପ୍ରାରମ୍ଭରେ ୬ଟି ରାଜ୍ୟର ବିଧାନସଭା ନିର୍ବାଚନ ହେବାକୁ ଯାଉଛି । ତା ପୂର୍ବରୁ କଂଗ୍ରେସକୁ ଅଧିକ ମଜଭୁତ କରିବା ଲାଗି ପଦକ୍ଷେପ ନିଆଯାଇଛି।
କଂଗ୍ରେସ ସଭାପତି ଭାବେ ମହାତ୍ମା ଗାନ୍ଧୀ ନିର୍ବାଚିତ ହେବାର ୧୦୦ ବର୍ଷ ପୂର୍ତ୍ତିକୁ ଦୃଷ୍ଟିରେ ରଖି ଏହି କାର୍ଯ୍ୟକାରିଣୀ ଗୁରୁତ୍ବ ବହନ କରୁଛି । ସାବରମତୀ ନଦୀ କୂଳରେ ଏହି କନଭେନସେନ ହେଉଛି । ଏଥିରେ ଦେଶର ଦୁଇ ହଜାରରୁ ଅଧିକ ନେତା ସାମିଲ ହୋଇଛନ୍ତି । ଏହା ସହ ଏଆଇସିସି ସଭାପତି ମଲ୍ଲିକର୍ଜୁନ ଖଡଗେ, ବିରୋଧୀ ଦଳ ନେତା ରାହୁଲ ଗାନ୍ଧୀ, ସୋନିଆ ଗାନ୍ଧୀ ପ୍ରମୁଖ ସାମିଲ ହୋଇଛନ୍ତି।
କଂଗ୍ରେସର ବିଧାନସଭା ଘେରାଉ ବେଳେ ଗଣ୍ଡଗୋଳ ପ୍ରସଙ୍ଗ : କଂଗ୍ରେସର ସବୁ ବିଧାୟକଙ୍କ ବିରୋଧରେ ମାମଲା ଦାୟର
ନନ୍ଦିଘୋଷ ବ୍ୟୁରୋ : ଗତ ୨୭ ତାରିଖ କଂଗ୍ରେସର ବିଧାନସଭା ଘେରାଉ ବେଳେ ଉପୁଜିଥିବା ଆଇନଶୃଙ୍ଖଳା ପରିସ୍ଥିତିକୁ ନେଇ ପିସିସି ସଭାପତିଙ୍କ ସମେତ କଂଗ୍ରେସର ସବୁ ବିଧାୟକଙ୍କ ବିରୋଧରେ ମାମଲା କରିଛି ପୋଲିସ। କ୍ୟାପିଟାଲ ଥାନା ପିସିସି ସଭାପତିଙ୍କ ସମେତ ୫ ହଜାରରୁ ଅଧିକ କଂଗ୍ରେସ କର୍ମୀଙ୍କ ବିରୋଧରେ ମାମଲା ରୁଜୁ ହୋଇଛି। ବିଏନଏସ ୧୮୯(୨), ୧୯୧(୨), ୧୨୬(୨), ୧୩୨, ୧୨୧(୧), ୩୨୪(୪)ରେ ମାମଲା ରୁଜୁ ହୋଇଛି। ଏହାକୁ ନେଇ ଆଜି ପିସିସି ସଭାପତି ଓ ସବୁ ବିଧାୟକ ହାଇକୋର୍ଟରେ ଆଗୁଆ ଜାମିନ ଆବେଦନ କରିଛନ୍ତି। ରାଜ୍ୟରେ ମହିଳା ନିର୍ଯାତନା ରୋକିବାରେ ରାଜ୍ୟ ସରକାରଙ୍କ ବିଫଳତା ବିରୋଧରେ କଂଗ୍ରେସ ବିଧାନସଭା ଘେରାଉ କରିଥିଲା। ତାପୂର୍ବରୁ ବିଧାନସଭାରେ କଂଗ୍ରେସ ଏହାକୁ ନେଇ ବାରମ୍ବାର ହଟ୍ଟଗୋଳ କରି ଗାନ୍ଧି ମୂର୍ତ୍ତି ତଳେ ଧାରଣା ଦେଇ ଆସୁଥିଲା। କିନ୍ତୁ ସରକାରୀ ଦଳ କଂଗ୍ରେସ ବିଧାୟକଙ୍କ ଉଦବେଗକୁ ଗୁରୁତ୍ବ ଦେବା ବଦଳରେ ସବୁ ବିଧାୟକଙ୍କୁ ନିଲମ୍ବନ କରିଥିଲା।
ଓପିଏସସି ବିଜ୍ଞପ୍ତିକୁ ନେଇ ଉଠିଲା କେଁ, ସିଭିଲ ସର୍ଭିସ ପରୀକ୍ଷାରେ ସଂରକ୍ଷଣରେ ଅସଂଗତି ଅଭିଯୋଗ
ଭୁବନେଶ୍ୱର : ୨୦୨୫ ଓଡିଶା ସିଭିଲ ସର୍ଭିସ ପରୀକ୍ଷା ବିଜ୍ଞପ୍ତିକୁ ନେଇ କେଁ । ସଂରକ୍ଷିତ ବର୍ଗଙ୍କ ପାଇଁ ୫୦ ପ୍ରତିଶତରୁ ଅଧିକ ପଦବୀ ରହୁଛି ସଂରକ୍ଷିତ । ଯାହାକି ସୁପ୍ରିମକୋର୍ଟଙ୍କ ଦ୍ବାରା ଧାର୍ଯ୍ୟ ନିୟମ ଓ ୧୯୭୫ ଓଆର୍ଭି ଆଇନ ଧାରା ୭ର ଖୋଲା ଉଲ୍ଲଂଘନ । ଏ ନେଇ ଅଭିଯୋଗ କରିଛନ୍ତି ସଚିବାଳୟ ସେବା କ୍ୟାଡରର ପୂର୍ବତନ ଅଧିକାରୀ । ଚଳିତ ବର୍ଷ OAS, OFS,OCS ଓ ORS ସେବାର ୨୦୦ ପଦବୀ ପୂରଣ ପାଇଁ ଓଡ଼ିଶା ଲୋକସେବା ଆୟୋଗ ୨୦୨୫ ସିଭିଲ ସର୍ଭିସ ନିଯୁକ୍ତି ପରୀକ୍ଷା ପାଇଁ ବିଜ୍ଞପ୍ତି ପ୍ରକାଶ କଲେ । ସେଥିରେ ସଦ୍ୟ ଖାଲି ପଦବୀ ସହିତ ଏକସଙ୍ଗେ ବଳକା ସଂରକ୍ଷିତ ବର୍ଗଙ୍କ ପାଇଁ ଖାଲି ପଦବୀ ପ୍ରକାଶ କରିଛନ୍ତି । ଯାହାକି ନିୟମ ବିରୁଦ୍ଧ ।
ପୂର୍ବତନ ଅଧିକାରୀଙ୍କ ମତରେ ସିଭିଲ ସର୍ଭିସ ମେଧା ଚୟନ ବିଜ୍ଞପ୍ତିରେ ସାଧାରଣ ବର୍ଗ ଓ ସଂରକ୍ଷିତ ବର୍ଗ ବି ସାମିଲ । କିନ୍ତୁ କୌଣସି ବି ସ୍ଥିତିରେ ଗୋଟିଏ ବିଜ୍ଞପ୍ତିରେ ବ୍ୟାକ ଲଗ୍ ଖାଲି ପଦବୀ ପୂରଣ ନେଇ ପରୀକ୍ଷା କରାଯାଇପାରିବନି । ଏପରି କଲେ ସଂରକ୍ଷିତ ବର୍ଗଙ୍କ ପାଇଁ ସ୍ବତନ୍ତ୍ର ନିଯୁକ୍ତି ଡ୍ରାଇଭର ଅର୍ଥ କଣ ରହିବ ? ଏହାଦ୍ବାରା ସରକାରୀ ପଦୋନ୍ନତି କ୍ଷେତ୍ରରେ ଅସଂଗତି ସୃଷ୍ଟି ହେବ । ପିଛିଲା ବର୍ଷର ସଂରକ୍ଷିତ ପଦବୀକୁ ଚଳିତବର୍ଷ ସଂରକ୍ଷିତ ପଦବୀ ସହିତ ମିଶାଇ ହିସାବ କରିବା ପରିବର୍ତ୍ତେ ତାକୁ ପୃଥକ ଭାବେ ହିସାବ କରାଯାଇଛି । ପ୍ରକାଶିତ ବିଜ୍ଞପ୍ତିରେ ଶବ୍ଦକୁ ଏପଟସେପଟ କରି ବ୍ୟାକ୍ ଲଗ୍ ଖାଲି ପଦବୀ ପୂରଣ ପାଇଁ ସୁଯୋଗ ସୃଷ୍ଟି କରାଯାଇଥିବା ଅଭିଯୋଗ ହୋଇଛି ।
ପ୍ରକାଶିତ ବିଜ୍ଞପ୍ତି ଅନୁଯାୟୀ ଓଏଏସର ୩୦ ପଦବୀ ମଧ୍ୟରୁ ୧୫ ପଦବୀ ବଦଳରେ ମାତ୍ର ୬ଟି ପଦବୀ ସାଧାରଣ ବର୍ଗଙ୍କ ପାଇଁ ରହିଛି । ଓଏଫଏସ ୪୬ ପଦବୀରୁ ୨୩ଟି ପଦବୀ ସାଧାରଣ ବର୍ଗଙ୍କ ପାଇଁ ରହିବା ବଦଳରେ ମାତ୍ର ୧୭ଟି ରଖାଯାଇଛି । ସେହିପରି ଓଡ଼ିଶା ରାଜସ୍ବ ସେବାରେ ମଧ୍ୟ ଅସଂଗତି ରହିଥିବା ଅଭିଯୋଗ ହୋଇଛି । ଖୋଦ ସାଧାରଣ ବର୍ଗର ଆଶାୟୀ ପ୍ରାର୍ଥୀଙ୍କ ଅଭିଯୋଗ ଏବର ସରକାରଙ୍କ ସମୟରେ ସାଧାରଣ ବର୍ଗର ପ୍ରାର୍ଥୀ ପ୍ରତିଯୋଗିତା ମୂଳକ ନିଯୁକ୍ତି ପରୀକ୍ଷା ପାଇଁ ବର୍ଷ ତମାମ ପ୍ରସ୍ତୁତ ହେଉଥିବାବେଳେ ସେମାନଙ୍କ ପାଇଁ ନିଯୁକ୍ତି ପଦବୀ କମ୍ ପ୍ରକାଶ ପାଉଛି । ଏ ଦିଗଟିକୁ ସରକାର ବିଚାର କରିବା ଆବଶ୍ୟକ ।
ଚତୁର୍ଥ ପର୍ଯ୍ୟାୟକୁ ଗଲା ପ୍ରକ୍ରିୟା, ଖୁବଶୀଘ୍ର ବିଜେଡି ଜିଲ୍ଲା ସଭାପତି ଓ ରାଜ୍ୟ ପରିଷଦ ନିର୍ବାଚନ
ନନ୍ଦିଘୋଷ ବ୍ୟୁରୋ : ବିଜୁ ଜନତା ଦଳର ନବକଳେବର ହେବାକୁ ଯାଉଛି । କିଛି ମାସ ତଳେ ଦଳର ଛାମୁଆ ସଂଗଠନ ଗୁଡ଼ିକୁ ଭାଙ୍ଗି ନିର୍ବାଚନ ପ୍ରକ୍ରିୟାକୁ ଓହ୍ଲାଇଥିଲା ବିଜୁ ଜନତା ଦଳ । ଚଳିତ ଏପ୍ରିଲ ମାସ ଶେଷ ସୁଦ୍ଧା ବିଜୁ ଜନତା ଦଳର ସାଙ୍ଗଠନିକ ନିର୍ବାଚନ ସଂପୂର୍ଣ୍ଣ କରିବାକୁ ଜିଲ୍ଲା ଓ ନିର୍ବାଚନ ମଣ୍ଡଳୀ ସ୍ତରରେ ଚାଲିଥିବା କସରତ ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛି । ଗତକାଲି ୩୩ ଟି ସାଂଗଠନିକ ଜିଲ୍ଲାର ଜିଲ୍ଲା ନିର୍ବାଚନ ଅଧିକାରୀମାନେ ଏଆରଓମାନଙ୍କ ତାଲିକା ସହ ଫୋନ ନମ୍ବର ଓ ଠିକଣା ସହ ପୌର ଓ ପଞ୍ଚାୟତ ୱାର୍ଡ ସଭାପତି, ବ୍ଳକ ସଭାପତି ମାନଙ୍କ ଫୋନ ନମ୍ବର ଏବଂ ଠିକଣା ରାଜ୍ୟ ନିର୍ବାଚନ ଅଧିକାରୀ ପ୍ରତାପ ଦେବଙ୍କ ପାଖରେ ଦାଖଲ କରିଥିଲେ । ଆଜି ଏ ସବୁ ନେଇ ପ୍ରସ୍ତୁତିର ଚୂଡ଼ାନ୍ତ ରିପୋର୍ଟ ବିଜେଡି ସୁପ୍ରିମୋଙ୍କୁ ପାଖରେ ସେ ଦାଖଲ କରିଛନ୍ତି । ଏଥିସହ ଦଳର ଅନ୍ୟ ବରିଷ୍ଠ ନେତାମାନଙ୍କ ଫିଡବ୍ୟାକ ବି ନିଆଯାଇଥିଲା । ସାଂଗଠନିକ ନିର୍ବାଚନର ୬ଟି ପର୍ଯ୍ୟାୟରୁ ତୃତୀୟ ପର୍ଯ୍ୟାୟ ନିର୍ବାଚନ ଶେଷ ହୋଇଛି । ଚତୁର୍ଥ ପର୍ଯ୍ୟାୟକୁ ଯାଇଛି ପ୍ରକ୍ରିୟା । ଖୁବଶୀଘ୍ର ଜିଲ୍ଲା ସଭାପତି ଚୟନ କାର୍ଯ୍ୟ ସମାପ୍ତ ହେବ । ଏହା ପରେ ୫ମ ପର୍ଯ୍ୟାୟରେ ରାଜ୍ୟ ପରିଷଦ ଓ ରାଜ୍ୟ କାର୍ଯ୍ୟକାରୀ କମିଟି ଗଠନ କରାଯାଇ ଦଳର ସଭାପତି ନିର୍ବାଚନ କାର୍ଯ୍ୟ ସଂପୂର୍ଣ୍ଣ ହେବ । ନବୀନ ପଟ୍ଟନାୟକଙ୍କ ନେତୃତ୍ବରେ ଦଳ ପୁଣି ଥରେ ଆଗେଇବାକୁ ସମସ୍ତେ ଅଣ୍ଟା ଭିଡ଼ିଛନ୍ତି ।
ଏହି ନିର୍ବାଚନ ପ୍ରକ୍ରିୟାରେ ତୃଣମୂଳ ସ୍ତରରୁ ରାଜ୍ୟସ୍ତର ଯାଏଁ ଦଳର ଯୁବ, ଛାତ୍ର, ମହିଳା ଓ ସାଧାରଣ ଛାମୁଆଁ ସଂଗଠନର ସଦସ୍ୟମାନେ ସକ୍ରିୟ ଭାବେ ଭାଗ ନେଉଛନ୍ତି । ରାଜ୍ୟର ସମସ୍ତ ପଞ୍ଚାୟତ, ବ୍ଲକ ଓ ସହରାଞ୍ଚଳର ୱାର୍ଡ ଏବଂ ସହରାଞ୍ଚଳ ସଭାପତି ଓ ସମସ୍ତ କମିଟି ଗଠନ କାର୍ଯ୍ୟ ସଂପୂର୍ଣ୍ଣ ହୋଇଯାଇଛି । ଜିଲ୍ଲା ସଭାପତି ଓ ବ୍ଲକ ସଭାପତି ଚୟନ ନେଇ ବି ନବୀନ କରିଛନ୍ତି ସମୀକ୍ଷା । କେମିତି ଚାଲିଛି ଚୟନ ଓ କେଉଁଠି ରହୁଛି ଅସୁବିଧା, ତାହା ସମସ୍ତଙ୍କଠାରୁ ସେ ଟିକିନିଖି ବୁଝିଛନ୍ତି । ବିଜେଡିର ସାଂଗଠନିକ ନିର୍ବାଚନରେ ଦଳର ବାଇ-ଲ’ର ଗୁରୁତ୍ବପୂର୍ଣ୍ଣ ଭୂମିକା ରହିଛି । ନୂଆ ପଦ ସୃଷ୍ଟି ହେଉ କି କାହାକୁ ପଦୋନ୍ନତି, ତାହା ନେତାଙ୍କ ପ୍ରଦର୍ଶନ ଓ ଗ୍ରହଣୀୟତା ଉପରେ ନିର୍ଭର କରେ ।
ଦେଶରେ ୱାକଫ ଆଇନ ଲାଗୁ ପରେ ସବୁଠି ପ୍ରତ୍ୟାହାର ଦାବି, ପଶ୍ଚିମବଙ୍ଗରେ ସ୍ଥିତି ଅଣାୟତ୍ତ
ନନ୍ଦିଘୋଷ ବ୍ୟୁରୋ : ଆଜିଠୁ ସାରା ଦେଶରେ ୱାକଫ ଆଇନ ଲାଗୁ ହୋଇଥିବା ବେଳେ ଏହାର ପ୍ରତ୍ୟାହାର ଦାବିରେ ଭୟଙ୍କର ପରିସ୍ଥିତି ଦେଖିବାକୁ ମିଳିଛି । ସାରାଦେଶରେ ପ୍ରତିବାଦ ଜାରି ରହିଛି । ସଂଖ୍ଯାଲଘୁ ସଂପ୍ରଦାୟର ଭାଇମାନେ ରାଜରାସ୍ତାକୁ ଓହ୍ଲାଇ ଆସି ଆଇନ ପ୍ରତ୍ୟାହାର ପାଇଁ ପ୍ରତିବାଦ କରୁଛନ୍ତି । ତେବେ ଆଜି ପଶ୍ଚିମବଙ୍ଗରେ ସ୍ଥିତି ଅଣାୟତ୍ତ ହୋଇଛି । ମୁର୍ସିଦାବାଦ ଜିଲ୍ଲା ରଘୁନାଥଗଞ୍ଜର ଉମରପୁରରେ ପୋଲିସ ଏବଂ ପ୍ରଦର୍ଶନକାରୀଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଛି । ୩ଟି ପୋଲିସ ଗାଡ଼ି ପୋଡ଼ିଦେଇଛନ୍ତି ଆନ୍ଦୋଳନକାରୀ ।
ଉମରପୁରରେ ୱାକଫ ଆଇନ ପ୍ରତ୍ୟାହାର ଦାବି ବେଳେ ପରିସ୍ଥିତି ନିୟନ୍ତ୍ରଣ ବାହାରକୁ ଚାଲିଯାଇଥିଲା । ପୋଲିସ ରାସ୍ତା ଅବରୋଧ ହଟାଇବାକୁ ଚେଷ୍ଟା କରିବା ମାତ୍ରେ ଆନ୍ଦୋଳନକାରୀ ଉଗ୍ରରୂପ ଧାରଣ କରିଥିଲେ । ପୋଲିସ ଉପରକୁ ଇଟା ଏବଂ ପଥର ଫିଙ୍ଗିବା ଆରମ୍ଭ କରିଦେଇଥିଲେ । ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ପୋଲିସକୁ ଲାଠିଚାର୍ଜ କରିବାକୁ ପଡିଥିଲା । ଲୁହ ବୁହା ଗ୍ୟାସ ମଧ୍ୟ ମାଡ଼ କରାଯାଇଥିଲା। ଏହି ହିଂସାତ୍ମକ ସଂଘର୍ଷରେ ଏପର୍ଯ୍ୟନ୍ତ ଦୁଇ ଜଣ ପୋଲିସ କର୍ମଚାରୀ ଆହତ ହୋଇଥିବା ସୂଚନା ମିଳିଛି । ଜାଙ୍ଗିପୁର ପୋଲିସ ଜିଲ୍ଲାର ଏସପି ଆନନ୍ଦ ରାୟଙ୍କ ନେତୃତ୍ୱରେ ଘଟଣାସ୍ଥଳରେ ପୋଲିସ ଫୋର୍ସ ମୁତୟନ କରାଯାଇଛି । ଗତ ଦୁଇ ଦିନ ଧରି, ମୁର୍ସିଦାବାଦ ଜିଲ୍ଲାର ସୁତି, ସମସେରଗଞ୍ଜ ଏବଂ ରଘୁନାଥଗଞ୍ଜ ଭଳି ଅନେକ ଅଞ୍ଚଳରେ ୱାକଫ ଆଇନ ବିରୋଧରେ ନିରନ୍ତର ପ୍ରତିବାଦ ଜାରି ରହିଛି । ପୋଲିସ ପରିସ୍ଥିତି ଉପରେ ନଜର ରଖିଛି ।
କୋଡିଏ ଟଙ୍କା ପାଇଁ ଜନ୍ମ କଲା ଝିଅକୁ ପିଟି ପିଟି ଦରମରା କରିଲା ବାପା
ନନ୍ଦିଘୋଷ ବ୍ୟୁରୋ : କୋଡିଏ ଟଙ୍କା ପାଇଁ ନିଜର ଜନ୍ମ କଲା ଝିଅକୁ ବାପାର ନିସ୍ତୁକ ମାଡ଼ । ଘରର କବାଟ ବନ୍ଦ କରି ରସିରେ ବାନ୍ଧି ପିଟି ପିଟି ଅଧାମରା କରିଦେଲା ବାପା । ବିକଳରେ ଘରର କବାଟ ଖୋଲି ବାହାରକୁ ଦୌଡ଼ି ପଳାଇ ଆସିଥିଲା ୧୦ ବର୍ଷ ଝିଅ ଖୁସି । ଏହିଭଳି ଏକ ହୃହୟ ବିଦାରକ ଘଟଣା ଘଟିଛି ଖୋର୍ଦ୍ଧା ଜିଲ୍ଲା ଚିଲିକା ବ୍ଲକ ଜରିପଡ଼ା ପଞ୍ଚାୟତ ଜଗନ୍ନାଥପୁର ଗାଁରେ ।
ବାପା ପୂର୍ଣ୍ଣ ବେହେରା ଝିଅ ଖୁସିକୁ ୧୨୦ ଟଙ୍କା ଦେଇ କିରାନା ଦୋକାନକୁ ରାସନ ସାମଗ୍ରୀ କିଣିବାକୁ ପଠାଇଥିଲେ । ଜିନିଷ କିଣିବା ପରେ ବଳକା ୨୦ ଟଙ୍କା ଖର୍ଚ୍ଚ କରିଦେଇଥିଲା ଏବଂ ଘରକୁ ଫେରିବାରେ ବିଳମ୍ବ କରିଥିଲା ଖୁସି । ଏହାକୁ ନେଇ ବାପା ପୂର୍ଣ୍ଣ ବେହେରା ଝିଅ ଖୁସୀକୁ ରସିରେ ବାନ୍ଧି ନିସ୍ତୁକ ପିଟିଥିଲେ । ଖୁସିର ପାଦଠାରୁ ମୁହଁ ପର୍ଯ୍ୟନ୍ତ ମାଡ଼ର ଚିହ୍ନ ରହିଛି । ନିସ୍ତୁକ ମାଡ଼ରେ ନାବାଳିକା ଜଣକ ଚାଲିପାରୁନଥିବା ବେଳେ ଠିକସେ କଥା କହିପାରୁନାହିଁ । ନାବାଳିକା ଜଣକ ଜୀବନ ବିକଳରେ ଘରୁ ପଳାଇ ଆସି ଜରିପଡ଼ା ଖମାର ସାହିରେ ବସି କାନ୍ଦୁଥିବା ସମୟରେ ଲୋକେ ନାବାଳିକାକୁ ଉଦ୍ଧାର କରି ଟାଙ୍ଗୀ ପୋଲିସକୁ ଖବର ଦେଇଥିଲେ । ଘଟଣାସ୍ଥଳରେ ଟାଙ୍ଗୀ ପୋଲିସ ପହଞ୍ଚି ନାବାଳିକାକୁ ଚିକିତ୍ସା ପାଇଁ ମେଡିକାଲ ପଠାଇ ତଦନ୍ତ ଆରମ୍ଭ କରିଛି ।
ମାଟି ଚୋରି କରୁଥିଲେ ମାଫିଆ : ବିରୋଧ କରିବାରୁ ଖଣ୍ଡାରେ ହାଣି କଲେ ଲହୁଲୁହାଣ
ନନ୍ଦିଘୋଷ ବ୍ୟୁରୋ : ରାତି ଅଧରେ ସରକାରୀ ଜାଗାରୁ ମାଟି ଚୋରି କରୁଥିଲେ । ବିରୋଧ କରିବାରୁ ୩ ଜଣ ଯୁବକଙ୍କୁ ଖଣ୍ଡାରେ ହାଣି ଲହୁଲୁହାଣ କରିଛନ୍ତି ମାଟି ମାଫିଆ । ରାଜଧାନୀ ଉପକଣ୍ଠ ବାଲିଅନ୍ତା ଅଂଚଳରେ ବର୍ବରତାର ସୀମା ଟପି ଯାଇଛନ୍ତି ମାଟି ମାଫିଆ । ଗୁରୁତର ଅବସ୍ଥାରେ ୩ ଯୁବକଙ୍କୁ ପ୍ରଥମେ କ୍ୟାପିଟାଲ୍ ପରେ ଏମ୍ସ ଏବଂ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି ।
ସୋମବାର ବିଳମ୍ବିତ ରାତି ପ୍ରାୟ ୨ ଟାରେ ବାଲିଅନ୍ତା ତହସିଲ୍ ଅଧିନ ଜିତିକାଲସୁଆଁଲୋ ଗାଁରେ ଥିବା ଗୋଚର ଜମିରୁ ମାଟି ମାଫିଆ ମାଟି ଚୋରି କରୁଥିଲେ । ଏହି ଖବର ନିକଟସ୍ଥ ଗଡ଼ଭିଙ୍ଗାରପୁର ଗାଁର କିଛି ଯୁବକ ପାଇଥିଲେ । ତୁରନ୍ତ ଯୁବକ ମାନେ ଘଟଣା ସ୍ଥଳରେ ପହଁଞ୍ଚି ଥିଲେ । ସେତେବେଳେ ୨ଟି ଜେସିବି ମେସିନ ଯୋଗେ ହାଇୱା ଟ୍ରକ୍ ରେ ଲୋଡ କରାଯାଇ ମାଟି ଚୋରି ହେଉଥିଲା । ଯୁବକ ମାନେ ଏହାକୁ ବିରୋଧ କରିବାରୁ ସେଠାରେ ଉପସ୍ଥିତ ମାଟି ମାଫିଆ ମାନେ ଗାଳି ଗୁଲଜ କରି ମାଡ଼ ମାରିଥିଲେ ।
ପରେ ପ୍ରାୟ ୨୦ ଜଣ ମାଟି ମାଫିଆ ଏବଂ ତାଙ୍କ ସହଯୋଗୀ ଘଟଣା ସ୍ଥଳରେ ପହଁଞ୍ଚି ଲୁହା ରଡରେ ମାଡ ମାରିବା ସହ ଖଣ୍ଡାରେ ହାଣି ପକାଇଥିଲେ । ଖବର ପାଇ ଗ୍ରାମବାସୀ ଘଟଣା ସ୍ଥଳକୁ ଦୌଡି ଯାଇଥିଲେ । ଘଟଣା ସ୍ଥଳରୁ ରକ୍ତ ଜୁଡୁବୁଡୁ ଗୁରୁତର ୩ ଜଣ ଯୁବକଙ୍କୁ ଉଦ୍ଧାର କରିଥିଲେ । ଆକ୍ରମଣକାରୀ ୪ ଜଣ ଯୁବକଙ୍କୁ କାବୁ କରିବା ସହ ପୋଲିସ ଜିମା ଦେଇଥିଲେ । ଏହା ସହ ଆକ୍ରମଣକାରୀଙ୍କ ଦୁଇଟି ମଟରସାଇକେଲକୁ ଅଟକ ରଖିଥିଲେ ଗ୍ରାମବାସୀ ।