ଭୁବନେଶ୍ବର : ରାଜ୍ୟରେ ବୃଦ୍ଧି ପାଉଥିବା ନାରୀ ନିର୍ଯାତନା, ଧର୍ଷଣ, ଗଣଧର୍ଷଣ ଓ ବାଳିକା ନିଖୋଜ ପ୍ରତିବାଦରେ ରାଜ୍ୟବ୍ୟାପୀ କଂଗ୍ରେସର ବିଶାଳ ମଶାଲ ଶୋଭାଯାତ୍ରା । ଭୁବନେଶ୍ବର କଂଗ୍ରସଭବନରୁ ଏହି ଶୋଭାଯାତ୍ରା ବାହାରି ରାମ ମନ୍ଦିର ପର୍ଯ୍ୟନ୍ତ ଯାଇଥିଲା । ଭଦ୍ରକ ବନ୍ତ ଛକରୁ ଏକ ବିଶାଳ ଶୋଭାଯାତ୍ରା ବାହାରି ସହର ପରିକ୍ରମା କରି ଭଦ୍ରକ ଟାଉନ ହଲରେ ପହଞ୍ଚିଥିଲା ଶୋଭାଯାତ୍ରା । ପୁରୀ ଜିଲ୍ଲା ଅସ୍ତରଙ୍ଗ କଂଗ୍ରେସ ଦଳ ତରଫରୁ ଅସ୍ତରଙ୍ଗ ମୁଖ୍ୟ ବଜାର ତାରିଣୀ ମନ୍ଦିର ଠାରୁ ଥାନା ପର୍ଯ୍ୟନ୍ତ ଶତାଧିକ କଂଗ୍ରେସ କର୍ମୀ ମଶାଲ ଶୋଭାଯାତ୍ରା କରିଥିଲେ । ବାଙ୍କୀ କଂଗ୍ରେସ କାର୍ଯ୍ୟାଳୟ ଠାରୁ ମାଆ ଚର୍ଚ୍ଚିକା ମନ୍ଦିର ପର୍ଯ୍ୟନ୍ତ ହାତରେ ମଶାଲ ଜାଳି ବିରାଟ ଶୋଭାଯାତ୍ରା ରେ ଆସି ପହଞ୍ଚିଥିଲେ ।ଅନୁଗGଳ ଜିଲ୍ଲା ଛେଣ୍ଡିପଦା ବ୍ଳକ କଂଗ୍ରେସ ପକ୍ଷରୁ ଛେଣ୍ଡିପଦା ବ୍ଲକ ଅଫିସ ଯାଏଁ ଯାଇଥିଲା ଶୋଭାଯାତ୍ରା । ଧର୍ମାଗଡ ବ୍ଲକ କଂଗ୍ରେସ ତରଫରୁ ଶହଶହ କର୍ମୀ ଶୋଭାଯାତ୍ରାରେ ସାମିଲ ହୋଇଥିଲେ । ପରେ ଏକ ପ୍ରତିବାଦ ସଭା ଆୟୋଜିତ ହୋଇଥିଲା । ଏଥିରେ କଂଗ୍ରେସର ବରିଷ୍ଠ ନେତୃବୃନ୍ଦ ରାଜ୍ୟ ସରକାରଙ୍କ ଉପରେ ବର୍ଷିଥିଲେ ।
ବିହାର ବିଧାନସଭା ନିର୍ବାଚନ ଲାଗି ଦିଲ୍ଲୀରେ ରଣନୀତି
ନୂଆଦିଳ୍ଲୀ ; ବିହାର ବିଧାନସଭା ନିର୍ବାଚନ ଲାଗି ଦିଲ୍ଲୀରେ ରଣନୀତି। ଏଆଇସିସି ସଭାପତି ମଲ୍ଲିକାର୍ଜୁନ ଖଡଗେ ଓ ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କୁ ଭେଟିଲେ ଆରଜେଡି ନେତା ତେଜସ୍ବୀ ଯାଦବ। ରାଜ୍ୟରେ ବିଧାନସଭା ନିର୍ବାଚନ ପାଖେଇଆସୁଥିବାବେଳେ ଆସନ ବୁଝାମଣା ପ୍ରସଙ୍ଗରେ ଆଲୋଚନା ହୋଇଥିବା ସୂଚନା ମିଳିଛି। ଦିଲ୍ଲୀ ବୈଠକ ପରେ ପାଟନାରେ ଅନ୍ୟ ଏକ ବୈଠକ ହେବ ବୋଲି କହିଛନ୍ତି ତେଜସ୍ବୀ। ବିହାରକୁ ଆଗେଇ ନେବା ଲାଗି କଂଗ୍ରେସ ଓ ଆରଜେଡି ହିଁ ବିକଳ୍ପ ବୋଲି ତେଜସ୍ବୀ କହିଛନ୍ତି। ସେ ଆହୁରି କହିଛନ୍ତି- ଗତ ୨୦ ବର୍ଷ ଧରି ରାଜ୍ୟର କୌଣସି ବିକାଶ ସାଧନ ହୋଇନାହିଁ। ବିଜେପି ଶାସନରେ ରାଜ୍ୟବାସୀ ତଳିତଳାନ୍ତ ହୋଇଛନ୍ତି। ତେବେ ବିହାର ଲାଗି କିଏ ସିଏମ ଫେସ ହେବେ ସେ ନେଇ ନୀରବ ରହିଛନ୍ତି ତେଜସ୍ବୀ। ରାଜ୍ୟର ବିଭିନ୍ନ ପ୍ରସଙ୍ଗକୁ ଆଧାର କରି ଦଳ ନିର୍ବାଚନ ଲଢିବ ବୋଲି ସେ କହିଛନ୍ତି।
ସମ୍ବଲପୁରରେ ବିଜେଡି ପ୍ରତିବାଦ ସଭାରେ ପୋଲିସର ଦମନଲୀଳା
ସମ୍ବଲପୁର : ସମ୍ବଲପୁରରେ ବିଜେଡି ପ୍ରତିବାଦ ସଭାରେ ପୋଲିସର ଦମନଲୀଳା। ବର୍ଦ୍ଦିରେ ଲାଗିଲା କଳଙ୍କ। ବିଜୁବାବୁଙ୍କ ପ୍ରତିମୂର୍ତ୍ତି ପୋଡିବା ଘଟଣାରେ ବିଜେଡି ଶାନ୍ତିପୂର୍ଣ୍ଣ ପ୍ରତିବାଦ ଆନ୍ଦୋଳନ କରୁଥିବାବେଳେ ପୋଲିସ କରିଛି ଅମାନୁଷିକ ଆକ୍ରମଣ। ଏପରିକି ମହିଳା କର୍ମୀଙ୍କୁ ବି ଛାଡ଼ି ନଥିଲା ପୋଲିସ। ମହିଳା କର୍ମୀଙ୍କୁ ପୋଲିସ ଘୋଷାରି ଘୋଷାରି ନେଇଥିଲା। କିଛି ମହିଳାଙ୍କ ଉପରକୁ ବି ପୋଲିସ ହାତ ଉଠାଇଥିବା ଦେଖାଯାଇଛି। ବିହାର ଓ ଉତ୍ତରପ୍ରଦେଶକୁ ଓଡ଼ିଶା ପୋଲିସ ବଳିଗଲା ବୋଲି କହିଛନ୍ତି ଆନ୍ଦୋଳନକାରୀ। ସରକାରୀ କଳର ଅପବ୍ୟବହାର କରି ଆନ୍ଦୋଳନକାରୀଙ୍କୁ ଦମନ କରାଯାଇଛି ବୋଲି କହିଛନ୍ତି ଆନ୍ଦୋଳନକାରୀ। ପୋଲିସର ଆକ୍ରମଣରେ ବିଜେଡି ନେତ୍ରୀ ସଂଯୁକ୍ତା ମେହେରଙ୍କୁ ଆଘାତ ଲାଗିଛି। ସଂଯୁକ୍ତାଙ୍କ ଦୁଇଟି ଆଙ୍ଗୁଠି ଭାଙ୍ଗି ଯାଇଛି। ତାଙ୍କୁ ସଦର ମେଡ଼ିକାଲରେ ଭର୍ତ୍ତି କରାଯାଇ ଚିକିତ୍ସା କରାଯାଉଛି। ପୋଲିସର ଏଭଳି ଆଚରଣକୁ ଚାରିଆଡୁ ନିନ୍ଦା କରାଯାଇଛି।
୧୮ ଜିଲ୍ଲାକୁ ମିଳିଲା ବିଜେଡି ଜିଲ୍ଲା ସଭାପତି
ଭୁବନେଶ୍ବର ; ବିଜେଡିର ୧୮ ଜଣିଆ ଜିଲ୍ଲା ସଭାପତି ତାଲିକା ପ୍ରକାଶ। ୧୮ ଜିଲ୍ଲାର ପ୍ରକ୍ରିୟାରେ ସିଙ୍ଗଲ ନୋମିନେସନ ହେବା ଯୋଗୁ ସଭାପତିମାନେ ନିର୍ଦ୍ୱନ୍ଦରେ ନିର୍ବାଚିତ ହୋଇଛନ୍ତି। ତିନି ଦିନ ଯାଏ ଅର୍ଥାତ ୧୩ ରୁ ୧୫ ଯାଏ ଅର୍ଥାତ ଆଜି ପର୍ଯ୍ୟନ୍ତ ଜିଲ୍ଲା ସଭାପତି ନିର୍ବାଚନ ପ୍ରକ୍ରିୟା ହୋଇଥିଲା। ଆସନ୍ତାକାଲିଠୁ ଆଉ ନିର୍ବାଚନର ଆଉ ଏକ ପର୍ଯ୍ୟାୟ ଆରମ୍ଭ ହେବ। ରାଜ୍ୟ ପରିଷଦ ସଦସ୍ୟ ପାଇଁ ବିଧିବଦ୍ଧ କମିଟି ଓ ତା ପରେ ଏକଜିକ୍ୟୁଟିଭ କମିଟି ଗଠିତ ହେବ। ତା ପରେ ସଭାପତି ନିର୍ବାଚନ ପ୍ରକ୍ରିୟା ଆରମ୍ଭ ହେବ। ସଭାପତି ପଦ ପାଇଁ ନୋମିନେସନ କେବେ ଓ ନିର୍ବାଚନ କେବେ ପରବର୍ତ୍ତୀ ପର୍ଯ୍ୟାୟରେ ଚୂଡାନ୍ତ ହେବ ବୋଲି ସୂଚନା ଦେଇଛନ୍ତି ନିର୍ବାଚନ ଅଧିକାରୀ ପ୍ରତାପ ଦେବ। ଅନୁଗୁଳ ପାଇଁ ବ୍ରଜକିଶୋର ପ୍ରଧାନ, ବରଗଡ଼ ପାଇଁ ସୁଶାନ୍ତ କୁମାର ମହାପାତ୍ର, ଭଦ୍ରକ ପାଇଁ ଜଗନ୍ନାଥ ସ୍ବାଇଁ, ବୌଦ୍ଧ ପାଇଁ ପ୍ରଦୀପ ଅମାତ, ଦେବଗଡ଼ ପାଇଁ ରୋମାଞ୍ଚ ରଞ୍ଜନ ବିଶ୍ବାଳଙ୍କୁ ଜିଲ୍ଲା ସଭାପତି ହୋଇଛନ୍ତି। ସେହିପରି ଗଜପତି ଲାଗି ପ୍ରଦୀପ ନାୟକ, ଜଗତସିଂହପୁର ପାଇଁ ପ୍ରଶାନ୍ତ ମୁଦୁଲି, ଯାଜପୁର ପାଇଁ ସରୋଜ କୁମାର ମହାପାତ୍ର, ଝାରସୁଗୁଡା ପାଇଁ ହରିଶ ଗଣତ୍ରା, କନ୍ଧମାଳ ପାଇଁ ପଦ୍ମନାଭ ବେହେରା, ମାଲକାନଗିରି ପାଇଁ ମାନସ ମାଡ଼କାମୀ, ମୟୂରଭଞ୍ଜ ପାଇଁ ସୁଦାମ ମାର୍ଣ୍ଡି, ନବରଙ୍ଗପୁର ପାଇଁ ମନୋହର ରନ୍ଧାରୀ, ନୟାଗଡ଼ ପାଇଁ ରମେଶ ଚନ୍ଦ୍ର ବେହେରା, ନୂଆପଡ଼ା ପାଇଁ ଅବନୀ ରଞ୍ଜନ ଯୋଶୀ, ପୁରୀ ପାଇଁ ଉମାକାନ୍ତ ସାମନ୍ତରାୟ, ସୁବର୍ଣ୍ଣପୁର ପାଇଁ ସରୋଜ କୁମାର କମ୍ପ ଓ ସୁନ୍ଦରଗଡ଼ ପାଇଁ ଯୋଗେଶ ସିଂ ଜିଲ୍ଲା ସଭାପତି ଭାବେ ମନୋନୀତ ହୋଇଛନ୍ତି।
ପୁଣି ଫେରିଲା ପେଗାସସ ବିବାଦ, ଚୋରି ହୋଇଛି ଭାରତୀୟଙ୍କ ହ୍ବାଟ୍ସଆପ୍ ଡାଟା
ଭୁବନେଶ୍ବର : ଶହେ ଜଣ ଭାରତୀୟଙ୍କ ହ୍ବାଟସ୍ଆପ୍ ହ୍ୟାକ ହୋଇଛି ! ମେକସିକୋ ପରେ ଭାରତୀୟଙ୍କ ଡାଟା ଚୋରି ବିଶ୍ବରେ ଦ୍ବିତୀୟ । ୬ ବର୍ଷ ପରେ ପୁଣି ଥରେ ଫେରିଲା ପେଗାସସ୍ ବିବାଦ । ୨୦୧୯ରେ ଫେସ୍ବୁକ ଓ ହ୍ବାଟସ୍ଆପ୍ ପ୍ରତିଷ୍ଠାତା ମାର୍କ ଜୁକରବର୍ଗ ପେଗାସସ୍ ବିକଶିତ କରିଥିବା ଇସ୍ରାଏଲି ସଂସ୍ଥା ଏନ୍ଏସ୍ଓ ବିରୋଧରେ ଆମେରିକା କୋର୍ଟରେ ମାମଲା ଦାଏର କରିଥିଲେ । ଏକ ଜାତୀୟସ୍ତରର ଗଣମାଧ୍ୟମରେ ପ୍ରକାଶିତ ଖବର ଅନୁଯାୟୀ ଜୁକରବର୍ଗଙ୍କ ମାମଲାରୁ ଏହି ନୂଆ ତଥ୍ୟ ସାମନାକୁ ଆସିଛି । ୨୦୨୧ରେ ୨୯ ଜଣ ବିଶିଷ୍ଟ ବ୍ୟକ୍ତିଙ୍କ ଫୋନ ହ୍ୟାକ୍ ନେଇ ଅଭିଯୋଗ ଉଠିଥିଲା । ଯେଉଁଥିରେ ବିଶିଷ୍ଟ ରାଜନେତା ଓ ସାମ୍ବାଦିକଙ୍କ ସାମିଲ ଥିଲେ । ଏହାକୁ ନେଇ ସଂସଦରେ ଝଡ ଉଠିବା ସହ ସୁପ୍ରିମକୋର୍ଟରେ ଏକାଧିକ ମାମଲା ଦାୟର ହୋଇଥିଲା । ପରେ ସୁପ୍ରିମକୋର୍ଟଙ୍କ ଦ୍ବାରା ଗଠିତ ଦୁଇଟି କମିଟିର ତଦନ୍ତ ପରେ ମାତ୍ର ୫ ଜଣଙ୍କ ଫୋନ ପ୍ରଭାବିତ ହୋଇଥିବା ଖବର ସାମନାକୁ ଆସିଥିଲା । ଏବେ ପୁଣି ଥରେ ଏନ୍ଏସ୍ଓ ଗୃପ୍ର କାରନାମା ସାମନାକୁ ଆସିବା ପରେ କେନ୍ଦ୍ର ସରକାରଙ୍କୁ ସିଧା ସିଧା ଟାର୍ଗେଟ୍ କରିଛନ୍ତି ବିରୋଧୀ ।
ସାଧାରଣ ଲୋକଙ୍କ ବ୍ୟକ୍ତିଗତ ଡିଜିଟାଲ ଡାଟାକୁ ସୁରକ୍ଷା ଦେବା କେନ୍ଦ୍ର ସରକାରଙ୍କ ଦାୟିତ୍ବ । ଆଜିକାଲି ଟଙ୍କାଠୁ ଆରମ୍ଭ କରି ଜମିବାଡ଼ି ସବୁ କିଛି ଲୋକେ ଡିଜିଟାଲରେ କାରବାର କରୁଛନ୍ତି । ଏଥିପାଇଁ କେନ୍ଦ୍ର ସରକାର ମଧ୍ୟ ଡିଜିଟାଲ ପ୍ଲାଟଫର୍ମର ବିକାଶ କରିଛନ୍ତି । କିନ୍ତୁ ଏହି ଡାଟା ଯେ କାଲି କୌଣସି ମାଲଓ୍ବେର୍ କିମ୍ବା ସ୍ପାଇଓ୍ବେର ଜରିଆରେ ଚୋରି ହେଉନଥିବା କିଏ କହିବ ? ଖୋଦ ସରକାରୀ ଓ୍ବେବସାଇଟ ବି ହ୍ୟାକ ହେଉଛି । ଯଦି ବିକଶିତ ରାଷ୍ଟ୍ର ଆମେରିକାରେ ଉଦବେଗ ପ୍ରକାଶ ପାଉଛି । ଏଠି କେନ୍ଦ୍ର ସରକାର ଭାରତୀୟଙ୍କ ଡାଟା କିପରି ସୁରକ୍ଷିତ ରହିବ ? ସେ ନେଇ ଦୃଢ଼ ପଦକ୍ଷେପ ନେବାକୁ ବିଶେଷଜ୍ଞ ଦାବି କରିଛନ୍ତି । ପୋଗାସସ୍ ଜରିଆରେ ୫୧ଟି ରାଷ୍ଟ୍ରର ୧୨୨୩ ଲୋକଙ୍କ ଡାଟା ଚୋରି ନେଇ ତଥ୍ୟ ଆସିଛି । ମେକ୍ସିକୋରେ ସର୍ବାଧିକ ୪୫୬ ଡଣଙ୍କର ଥିବାବେଳେ ଭାରତରେ ୧୦୦ ଜଣ, ବାହାରିନରେ ୮୨, ମରୋକ୍କୋରେ ୬୦, ପାକିସ୍ତାନରେ ୫୮, ଇଣ୍ଡୋନେସିଆରେ ୫୪ ଓ ଇସ୍ରାଏଲରୁ ୫୧ ଜଣଙ୍କର ଡାଟା ଚୋରି ହୋଇଥିବା ଅଭିଯୋଗ ହୋଇଛି ।
ଗ୍ରାମସଭା ବ୍ୟବସ୍ଥାକୁ ପଙ୍ଗୁ କରିଦେବାକୁ ଚକ୍ରାନ୍ତ
ଭୁବନେଶ୍ବର : ବାଟବଣା ବିକଶିତ ଗାଁ, ବିକଶିତ ଓଡ଼ିଶା ଯୋଜନା। ବିରୋଧୀ ଦଳରେ ଥିବାବେଳେ ଗ୍ରାମସଭାକୁ ନେଇ ଚାଲିଥିଲା ହୋହଲ୍ଲା। ହେଲେ ସରକାରକୁ ଆସିବା ପରେ ଗ୍ରାମସଭାକୁ ଫୁ। ନବୀନ ସରକାର ଅମଳରେ ନାଁ ଥିଲା ଆମ ଓଡ଼ିଶା, ନବୀନ ଓଡ଼ିଶା। ହେଲେ ଏବେ ନାଁ ବଦଳାଇ ରଖାଗଲା ବିକଶିତ ଗାଁ, ବିକଶିତ ଓଡ଼ିଶା। ଜାନୁଆରୀ ୨୮ରେ ପ୍ରଥମ ଗାଇଡ଼ଲାଇନ ଜାରି କରିଥିଲା ପଞ୍ଚାୟତିରାଜ ବିଭାଗ। ଏଥିରେ ବିଭିନ୍ନ କାମ ପାଇଁ ଡ଼େଡ଼ଲାଇନ ସ୍ଥିର କରାଯିବା ସହ ସବୁକିଛି ଗ୍ରାମସଭା ଜରିଆରେ ହେବ ବୋଲି କୁହାଯାଇଥିଲା। ମାତ୍ର ମାର୍ଚ୍ଚ ୧୨ରେ ଗାଇଡ଼ଲାଇନରେ ପରିବର୍ତ୍ତନ ହେଲା। ୨୦ ପ୍ରତିଶତ କାମ ବିନା ଗ୍ରାମସଭାରେ ବିଧାୟକ, ସାଂସଦଙ୍କ ସୁପାରିଶରେ ହେବ। ପୁଣି ମାର୍ଚ୍ଚ ୨୫ରେ ଏହି ସୀମା ୪୦ ପ୍ରତିଶତ କରିଦେଇ ଗ୍ରାମସଭାକୁ ଗୁରୁତ୍ବହୀନ କରିଦେଲେ ସରକାର। ଜିଲ୍ଲାପାଳ ଚାହିଁଲେ ପ୍ରକଳ୍ପ ଯୋଡ଼ିପାରିବେ କିମ୍ବା କାଟିପାରିବେ। ସରକାରଙ୍କ ଏପରି ଚାଲାକିକୁ ନେଇ ବର୍ଷିଛନ୍ତି ବିରୋଧୀ।
ବିଜେପି ବିରୋଧୀ ଦଳରେ ଥିବା ବେଳେ ଗ୍ରାମସଭାକୁ ଗୌଣ କରାଯାଉଥିବାର ଅଭିଯୋଗ କରୁଥିଲା। ହେଲେ ସରକାରକୁ ଆସିବା ପରେ ନିଜର ଡ଼ବଲ ଷ୍ଟାଣ୍ଡାର୍ଡ଼ ରୂପ ଦେଖାଇଛି। ବିରୋଧିଙ୍କ ତୀବ୍ର ସମାଲୋଚନା ପରେ ପ୍ରତିକ୍ରିୟା ରଖିଛନ୍ତି ବିଭାଗୀୟ ମନ୍ତ୍ରୀ। କହିଛନ୍ତି- ବିଧାୟକ ଓ ସାଂସଦ ହେଉଛନ୍ତି ଜନ ପ୍ରତିନିଧି। ଏମାନେ ମଧ୍ୟ ଗାଁରେ କିଛି ଭଲ କାମ କରିବାକୁ ଇଚ୍ଛା ପ୍ରକାଶ କରିଥାନ୍ତି। ହେଲେ ଏମାନେ ଗ୍ରାମସଭାରେ ଉପସ୍ଥିତ ରହୁନଥିବାରୁ ସେମାନଙ୍କ ମନରେ ଥିବା ପ୍ରକଳ୍ପ ଯୋଜନାରେ ସ୍ଥାନ ପାଏନାହିଁ। ୨୦୦୨ ପଞ୍ଚାୟତିରାଜ ଓପିଡ଼ବ୍ଲ୍ୟୁଡ଼ି କୋଡ଼୍ ଅନୁସାରେ କାମ ହେଉଛି ବୋଲି ମନ୍ତ୍ରୀ କହୁଛନ୍ତି। ମାତ୍ର କାହିଁକି ୪୦ ପ୍ରତିଶତ କାମ ବିନା ଗ୍ରାମସଭାରେ ହେବ, ସେହି ପ୍ରଶ୍ନର ସନ୍ତୋଷଜନକ ଉତ୍ତର ଦେଇପାରିନାହାନ୍ତି ମନ୍ତ୍ରୀ। ବିକଶିତ ଗାଁ ବିକଶିତ ଓଡ଼ିଶା ଯୋଜନାରେ ଟଙ୍କାଟିଏ ନ ଦେଇ ବିଜେପି ସରକାର ବାହାବା ନେବାକୁ ବସିଛନ୍ତି ବୋଲି ବିଜେଡ଼ି ଅଭିଯୋଗ କରିଛି। ସେପଟେ ବିଭାଗୀୟ ମନ୍ତ୍ରୀ କହିଛନ୍ତି ଏହି ଯୋଜନାରେ ବର୍ଷକୁ ହଜାରେ କୋଟି ବଦଳରେ ମୁଖ୍ୟମନ୍ତ୍ରୀ ୨ ହଜାର କୋଟି ଟଙ୍କା ଦେବାକୁ ନିଷ୍ପତ୍ତି ନେଇଛନ୍ତି।
ମିଶନ ଶକ୍ତିକୁ ଶକ୍ତିହୀନ କରିବାକୁ ବିଜେପିର ଷଡ଼ଯନ୍ତ୍ର ଅଭିଯୋଗ
ଭୁବନେଶ୍ଵର : ପୁଣି ରାଜନୀତି ପଶାପାଲିରେ ମହିଳା ସ୍ବୟଂ ସହାୟକ ଗୋଷ୍ଠୀ । ଉପମୁଖ୍ୟମନ୍ତ୍ରୀଙ୍କ ପୋଷ୍ଟକୁ ନେଇ ଉଠିଲା ପ୍ରଶ୍ନ । ଘେରିଲେ ବିଜେଡି ଓ କଂଗ୍ରେସ । ମାଆଙ୍କୁ କିଏ କରିଛି ସଶକ୍ତ ? ଆରମ୍ଭ ହେଲା ବାକଯୁଦ୍ଧ । ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡାଙ୍କ କଥାରେ ଭରସା କରିବେ ତ ରାଜ୍ୟର ମହିଳାମାନେ । ରାଜନୈତିକ ଉଦ୍ଦେଶ୍ୟ ରଖି ମିଶନ ଶକ୍ତିର ପୁନର୍ଗଠନ ପ୍ରକ୍ରିୟାକୁ ନେଇ ସୃଷ୍ଟି ହୋଇଥିବା ଦ୍ଵନ୍ଦ୍ଵ ଦୂର କରିପାରିବ କି ସୋସିଆଲ ମିଡିଆ ପୋଷ୍ଟ ? ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱରେ ୭୦ ଲକ୍ଷ ମହିଳା ମିଶନ ଶକ୍ତି ଜରିଆରେ ସଶକ୍ତ ହୋଇଥିଲେ । ମହିଳାମାନଙ୍କୁ ୫ ହଜାରରୁ ୧୫ ଲକ୍ଷ ଯାଏ ବିଭିନ୍ନ ଯୋଜନାରେ ନବୀନ ସହାୟକ ହୋଇ ସେମାନଙ୍କୁ ସ୍ବାବଲମ୍ବୀ କରିଥିଲେ । ଯାହା ବିଜେପି ସରକାର ଆସିବା ପରେ ବିଭିନ୍ନ ବାହାନା ଦେଖାଇ ମିଶନ ଶକ୍ତିକୁ ଶକ୍ତିହୀନ କରାଯାଇଛି । ସୁଭଦ୍ରା ଯୋଜନାରେ ମାତ୍ର ୫ ହଜାର ଟଙ୍କା ଦେଇ କିପରି ଲକ୍ଷପତି ଦିଦି କଲେ ତାହାର ହିସାବ ମାଗିଛି ବିଜେଡି । ବିରୋଧୀ ଦଳ ମୁଖ୍ୟ ସଚେତକ କହିଛନ୍ତି ମହିଳାମାନଙ୍କୁ ଘରର ଚାରି କାନ୍ଥରୁ ବାହାରକରି ନବୀନ ସ୍ବାବଲମ୍ବୀ କରିବା ସହ ସାମାଜିକ ଓ ଆର୍ଥିକ କ୍ଷେତ୍ରରେ ସଶକ୍ତ କରିଥିଲେ । ଏଥିରେ ବିଜେଡି, କଂଗ୍ରେସ, ବିଜେପି ସବୁ ଦଳର ମହିଳା ସାମିଲ ହୋଇଥିଲେ । ହେଲେ ଶାସନ ବଦଳିବା ପରେ ବିଜେପି ସରକାର ସ୍ବୟଂ ସହାୟକ ଗୋଷ୍ଠୀକୁ ଦଳୀୟ ଭିତ୍ତିରେ ବିଚାର କରୁଛି । ଏଥିରେ ମହିଳା କିପରି ସ୍ବାବଲମ୍ବୀ ହେବେ ବୋଲି ପ୍ରମିଳା ମଲ୍ଲିକ ପ୍ରଶ୍ନ କରିଛନ୍ତି । ତେଣୁ ଯେତେ ପୋଷ୍ଟ କଲେ ବି ମହିଳାମାନେ ବିଜେପି ସରକାରର ନେତୃତ୍ବକୁ ବିଶ୍ଵାସ କରିବେ ନାହିଁ ବୋଲି ବିଜେଡି କହିଛି ।
ସେପଟେ କଂଗ୍ରେସ ମଧ୍ୟ ସମାନ ଅଭିଯୋଗ ଆଣିଛି । ବରିଷ୍ଠ କଂଗ୍ରେସ ନେତା ସୁରେଶ ରାଉତରାୟ କହିଛନ୍ତି ନବୀନ ପଟ୍ଟନାୟକ ସ୍ବୟଂ ସହାୟକ ଗୋଷ୍ଠୀ ଜରିଆରେ ମହିଳାଙ୍କୁ ଶକ୍ତିଶାଳୀ କରିଥଲେ । ହେଲେ ବିଜେପି ୨୮ ଟଙ୍କାରେ କିପରି ଉଦ୍ଯୋଗୀ କରିବ ବୋଲି ସୁର ପ୍ରଶ୍ନ କରିଛନ୍ତି । ସେପଟେ ବିଜେପି ବିଧାୟକ ଅଶୋକ ମହାନ୍ତି କହିଛନ୍ତି ମହିଳାମାନଙ୍କୁ ସୁଭଦ୍ରା ଯୋଜନାରେ ସଶକ୍ତ କରାଯିବ । ଯାହାକୁ ନେଇ ବିଜେପି ଓ କଂଗ୍ରେସ ମୁହାଁମୁହିଁ ହୋଇଛନ୍ତି । ମିଶନ ଶକ୍ତି ପୁନର୍ଗଠନକୁ ନେଇ ସୃଷ୍ଟି ହୋଇଥିବା ଅବିଶ୍ବାସ ବାତାବରଣ ଦୂର କରିବାକୁ ସରକାର ଯେତେ ଚେଷ୍ଠା କଲେ ମଧ୍ୟ ସେଥିରେ ସଫଳ ହେଉନାହାନ୍ତି । ଯାହା ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ାଙ୍କ ସୋସିଆଲ ପୋଷ୍ଟରୁ ସ୍ପଷ୍ଟ ସଙ୍କେତ ମିଳୁଛି । ଯାହାକୁ ନେଇ ସରକାରଙ୍କୁ ଘେରିଛନ୍ତି ବିଜେଡି ଓ କଂଗ୍ରେସ ।
ପୁଣି ନବୀନଙ୍କ ହାତରେ ମଙ୍ଗ, ନବମ ଥର ହେବେ ସଭାପତି
ଭୁବନେଶ୍ବର : ନବମ ଥର ସଭାପତି ହେବେ ନବୀନ । ସଶକ୍ତ ହେବ ବିଜେଡି, ଲଢେଇ ହେବ ଆରପାର । ୧୬ରୁ ଅଧିକ ଜିଲ୍ଲା ସଭାପତି ନିର୍ଦ୍ବନ୍ଦ୍ବରେ ନିର୍ବାଚିତ । ଶେଷ ପର୍ଯ୍ୟାୟରେ ସାଂଗଠନିକ ନିର୍ବାଚନ, ଉତ୍ସାହିତ କର୍ମୀ । ପୁଣିଥରେ ବିଜେଡିର ମଙ୍ଗ ଧରିବେ ସୁପ୍ରିମୋ ନବୀନ ପଟ୍ଟନାୟକ । ବିଜେଡିରେ ନବମ ଇଂନିସ ଆରମ୍ଭ କରିବେ ନବୀନ ଓଡି଼ଶାର ନୂଆ ବିନ୍ଧାଣୀ । ଯାହାକୁ ନେଇ ବିଜେଡି ନେତା ଓ କର୍ମୀ ଉତ୍ସାହିତ । କାରଣ ୩ମାସ ଧରି ଚାଲିଥିବା ବିଜେଡିର ସାଂଗଠନିକ ନିର୍ବାଚନ ପ୍ରକ୍ରିୟା ଶେଷ ପର୍ଯ୍ୟାୟରେ ପହଞ୍ଚିଛି । ୧୬ରୁ ଅଧିକ ଜିଲ୍ଲା ସଭାପତି ନିର୍ଦ୍ବନ୍ଦ୍ବରେ ନିର୍ବାଚିତ ହୋଇଛନ୍ତି । ତୃଣମୂଳସ୍ତରେ ବିଜେଡି ସଂଗଠନ ନୂଆରୂପ ନେବା ସହ ସଶକ୍ତ ହୋଇଛି। ବରିଷ୍ଠ ବିଜେଡି ନେତ୍ରୀ ତଥା ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ କହିଛନ୍ତି ପୁଣିଥରେ ନବୀନଙ୍କ ନେତୃତ୍ବରେ ବିଜେଡି ଶକ୍ତିଶାଳୀ ହେବା ସହ ଓଡିଶାର ବିକାଶ ଓ ସ୍ବାଭିମାନ ପାଇଁ ଲଢେଇ ଜାରି ରଖିବ । ଆଗକୁ ପଂଚାୟଚ ଓ ପୌର ନିର୍ବାଚନ । ଦଳ ପୁଣିଥରେ ବଡ଼ ବିଜୟଲାଭ କରିବ ବୋଲି ନେତା କହିଛନ୍ତି ।
ନବୀନ ପଟ୍ଟନାୟକଙ୍କ ନେତୃତ୍ବରେ ବିଜେଡି ଓଡିଶାବାସୀଙ୍କ ସେବା କରୁଛି । ତୃଣମୂଳସ୍ତରରୁ ରାଜ୍ୟ ନେତୃତ୍ବ ଯାଏ ସଂଗଠନ ନୂଆରୂପ ନେଇଛି । ବିଜେଡି ସଶକ୍ତ ବିରୋଧୀ ଦଳ ଭାବେ ଓଡିଶାର ହକ ଓ ସ୍ବାଭିମାନ ପାଇଁ ଲଢେଇ କରୁଛି । ଆଗକୁ ଗାଁ ଗାଁରେ ଏହି ଲଢେଇକୁ ଜୋରଦାର କରିବାକୁ ରାଜନୈତିକ ଖସଡ଼ା ପ୍ରସ୍ତୁତ କରିବ ଦଳ । ନବୀନ ପଟ୍ଟନାୟକ ନବମ ଥର ବିଜେଡି ସୁପ୍ରିମୋ ହେବା ପରେ ନବୀନଙ୍କ ଟିମରେ କିଏ ସ୍ଥାନ ପାଇବେ ତାହାକୁ ନେଇ ମଧ୍ୟ ବିଜେଡି ଅନ୍ଦର ମହଲରେ ଜୋରଦାର ଚର୍ଚ୍ଚା ଆରମ୍ଭ ହୋଇଯାଇଛି । ବିଜେଡି ସାଂଗଠନିକ ନିର୍ବାଚନକୁ ନେଇ ତୃଣମୂଳସ୍ତରରେ ଦଳୀୟ କର୍ମୀମାନେ ବେଶ ଉତ୍ସାହିତ ହୋଇଛନ୍ତି ବୋଲି ବିଜେଡି ନେତା ପ୍ରଶାନ୍ତ ମୁଦୁଲି କହିଛନ୍ତି । ବିଜେଡିର ସାଂଗଠନିକ ନିର୍ବାଚନ କସରତ ଶେଷ ପର୍ଯ୍ୟାୟରେ ପହଞ୍ଚିଛି । ଆସନ୍ତା ୧୯ ତାରିଖ ଦିନ ନବୀନ ପଟ୍ଟନାୟକ ପୁଣିଥରେ ସଭାପତି ଭାବେ ନିର୍ବାଚିତ ହେବେ । ରାଜ୍ୟ ସଭାପତିଙ୍କ ଅନୁମୋଦନ ପରେ ବିଜେଡିର ଛାମୁଆ ସଂଗଠନ ମହିଳା, ଯୁବ, ଛାତ୍ର , ସଭାପତି ଚୟନ କରାଯିବ ।
ବିଜୁ ଲିଗାସିକୁ ବନ୍ଦ କରିବାକୁ ବଡ଼ ଚକ୍ରାନ୍ତ
ନନ୍ଦିଘୋଷ ବ୍ୟୁରୋ : ବିଜେପି ସରକାର କ୍ଷମତାକୁ ଆସିବା ପରେ ପ୍ରବାଦପୂରୁଷ ବିଜୁ ବାବୁଙ୍କ ପ୍ରତି ବଢୁଛି ଅସମ୍ମାନ । ବିଜୁ ବାବୁଙ୍କୁ ଜନମାନସରୁ ହଜେଇ ଦେବାକୁ ଆରମ୍ଭ ହୋଇଛି ଷଡଯନ୍ତ୍ର । ମହାଙ୍ଗାରେ ପ୍ରତିମୂର୍ତ୍ତୀ ହାଣିବା ପରେ ବଲାଙ୍ଗୀରରେ ବିଜୁଙ୍କ ଷ୍ଟାଚୁରେ ଲଗାଇଲେ ନିଆଁ । ରାଜ୍ୟରେ ବିଜେପି ସରକାର ଶାସନ ଗାଦିକୁ ଆସିବା ପରେ ବିଜୁ ପଟ୍ଟନାୟକଙ୍କ ବିରୋଧରେ ଆରମ୍ଭ ହୋଇଛି ଷଡଯନ୍ତ୍ର । ତାଙ୍କ ପ୍ରତି ଲଗାତର ଭାବେ ଗୋଟିଏ ପରେ ଗୋଟିଏ ଅସମ୍ମାନଜନକ ଘଟଣା ଘଟୁଛି । ପ୍ରଥମେ ବିଜୁ ପଟ୍ଟନାୟକଙ୍କ ନାଁରେ ଥିବା ଜନକଲ୍ୟାଣକାରୀ ଯୋଜନାର ନାଁ ପରିବର୍ତ୍ତନ କରାଗଲା । ବିଜୁ ବାବଙ୍କ ଜନ୍ମ ଦିବସକୁ ପଞ୍ଚାୟତିରାଜ ଦିବସ ଭାବେ ପାଳନକୁ ବନ୍ଦ କଲେ ରାଜ୍ୟ ସରକାର। ତାଙ୍କ ଜନ୍ମଦିନ ପୂର୍ବରୁ ମାହାଙ୍ଗାରେ ବିଜୁ ପ୍ରତିମୂର୍ତ୍ତିକୁ ହଣାଗଲା । କଟକରେ ବିଜୁ ପ୍ରତିମୂର୍ତ୍ତିର ରଙ୍ଗ ପରିବର୍ତ୍ତନ କରାଗଲା । ଆଉ ଏବେ ବଲାଙ୍ଗୀର ପାଟଣାଗଡ଼ରେ ବିଜୁ ବାବୁଙ୍କ ପ୍ରତିମୂର୍ତ୍ତିକୁ ଜାଳି ଦିଆଗଲା। ଏଭଳି ହୀନ ପ୍ରୟାସ ଓ ଷଡ଼ଯନ୍ତ୍ର ଯାହା ଧାରାବାହିକ ଭାବେ ଚାଲିଛି, ତାକୁ ନିନ୍ଦା କରିଛି ବିଜୁ ଜନତା ଦଳ। ଖୋଦ ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓଙ୍କ ନିର୍ବାଚନମଣ୍ଡଳିରେ ଏହି ଘଟଣା ଘଟିଛି । ପ୍ରବାଦ ପୁରୁଷଙ୍କ ପ୍ରତି ହେଉଥିବା ଏହି ଷଡ଼ଯନ୍ତ୍ର ପାଇଁ ବିଜେପି ଆଡ଼କୁ ଆଙ୍ଗୁଳି ନିର୍ଦ୍ଦେଶ କରିଛି ବିଜେଡି । ବିଧାନସଭା ଭିତରେ ଓ ବାହାରେ ବିଜୁ ବାବୁଙ୍କୁ ସମ୍ମାନ ଦେବା କଥା କହି ଚାଲିଛି ବିଜେପି । ହେଲେ ଓଡ଼ିଆ ଅସ୍ମିତାର ପ୍ରତୀକ ବିଜୁ ପଟ୍ଟନାୟକଙ୍କୁ ବାରମ୍ବାର ଅପମାନିତ କରାଯାଉଛି ବୋଲି ଅଭିଯୋଗ କରିଛି ବିଜେଡି।
ରାଜ୍ୟବାସୀଙ୍କ ସ୍ମୃତିରୁ ବିଜୁ ବାବୁଙ୍କୁ ଲିଭାଇବାକୁ ବିଜେପି ସରକାରର ଷଡଯନ୍ତ୍ରକୁ ଲୋକେ ଗ୍ରହଣ କରିବେ ନାହିଁ ବୋଲି କହିଛି ବିଜେଡି। ସରକାର ଦୁର୍ବଳ ହୋଇଗଲେ ଅପରାଧିକ କାର୍ଯ୍ୟକଳାପ ବଢେ। ଯାହା ବିଜେପି ସରକାର ସମୟରେ ସ୍ପଷ୍ଟ ହୋଇଥିବା ନେଇ କଟାକ୍ଷ କରିଛି ବିଜେଡି। ଏହି ଘଟଣାକୁ ନେଇ ପାଟଣାଗଡରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । ପାଟଣାଗଡ ବିଜେଡି ପକ୍ଷରୁ ଏହି ଘଟଣାରେ ନିରପେକ୍ଷ ତଦନ୍ତ ଦାବି କରି ଥାନାରେ ଏଫଆଇଆର ରୁଜୁ କରାଯାଇଛି । ସେପଟେ ଗଣମାଧ୍ୟମରୁ ଜାଣିବା ପରେ ତଦନ୍ତର ପ୍ରତିଶୃତି ଦେଇଛନ୍ତି ସଂସ୍କୃତି ମନ୍ତ୍ରୀ।
ବିଜୁ ବାବୁ କୌଣସି ଗୋଟିଏ ନିର୍ଦ୍ଧିଷ୍ଟ ଦଳରେ ଆବଦ୍ଧ ନଥିଲେ । ତେଣୁ ତାଙ୍କ ପ୍ରତି ଅସମ୍ମାନକୁ ଅନ୍ୟ ଦଳର ନେତାମାନେ ମଧ୍ୟ ଗ୍ରହଣ କରିପାରୁନାହାଁନ୍ତି । କଂଗ୍ରେସ ଓ ବାମ ଦଳ ନେତାମାନେ ବି ଏହି ଘଟଣାକୁ ତୀବ୍ର ନିନ୍ଦା କରିଛନ୍ତି । ଏଭଳି ହୀନ କାର୍ଯ୍ୟ ଦ୍ବାରା ରାଜ୍ୟ ନିନ୍ଦିତ ହୋଇଥିବାରୁ ଦୃଢ କାର୍ଯ୍ୟାନୁଷ୍ଠାନ ଦାବି କରିଛନ୍ତି ବିରୋଧୀ। ବିଜୁ ବାବୁଙ୍କ ଆଦର୍ଶ ଓ ବିଚାର ଧାରାକୁ କେହି ମାନି ନପାରନ୍ତି, ହେଲେ ଅସମ୍ମାନ କରିବାର ଅଧିକାର କିଏ ଦେଲା ବୋଲି ପ୍ରଶ୍ନ ଉଠିଛି। କଂଗ୍ରେସ କହିଛି, ଖୋଦ ଉପମୁଖ୍ୟମନ୍ତ୍ରୀଙ୍କ ନିର୍ବାଚନମଣ୍ଡଳିରେ ଏହି ଘଟଣା ଘଟିଥିବାରୁ ସେ ଦାୟିତ୍ବ ନିଅନ୍ତୁ । ବିଜୁ ବାବୁଙ୍କ ପ୍ରତିମୂର୍ତ୍ତିରେ ନିଆଁ ଲଗାଇବା କେବଳ ଏକ ଜଘନ୍ୟ ଅପରାଧ ନୁହେଁ, ଓଡ଼ିଶାର ସ୍ଵାଭିମାନ ଓ ଅସ୍ମିତାକୁ ଭୁଲୁଣ୍ଠିତ କଲା ଭଳି ଦୁର୍ଭାଗ୍ୟଜନକ ଘଟଣା। ବିଜେପି ସରକାରରେ ଏକାଧିକ ଥର ବିଜୁ ବାବୁଙ୍କ ଅମ୍ଳାନ ସ୍ମୁତି ପ୍ରତି ଅପମାନ ଦେଲା ଭଳି ଘଟଣା ଘଟି ଚାଲିଛି। ହେଲେ ରାଜ୍ୟ ସରକାରଙ୍କ ନିରବତା ସୃଷ୍ଟି କରିଛି ରହସ୍ୟମୟ ପରିସ୍ଥିତି।
୯ ବର୍ଷ ହେଲା ଆଗକୁ ବଢୁନି ଜୟପୁର-ନବରଙ୍ଗପୁର ରେଳ ପ୍ରକଳ୍ପ କାମ
ଜୟପୁର : ଆଶା ଦେଖାଇ ଠକିଦେଲା କେନ୍ଦ୍ର । ଡବଲ ଇଞ୍ଜିନ ସରକାର ବି ଫେଲ୍ । ୯ ବର୍ଷ ହେଲା ଆଗକୁ ବଢୁନି ଜୟପୁର-ନବରଙ୍ଗପୁର ରେଳ ପ୍ରକଳ୍ପ । ପୂର୍ବ ସରକାର ଜମି ଦେବାକୁ ଘୋଷଣା କରିବା ସହିତ ଜମି ଅଧିଗ୍ରହଣ କାମ ବି ଆରମ୍ଭ କରିଥିଲେ । କିନ୍ତୁ ସରକାର ବଦଳିବା ପରେ ଜମି ଅଧିଗ୍ରହଣ କରିବାରେ ଫେଲ୍ ମାରିଛି । ନିର୍ବାଚନ ବେଳେ ବଡ଼ ବଡ଼ ପ୍ରତିଶ୍ରୁତି ଦେଇଥିବା ବିଜେପି ସରକାର ଧୋକ୍କା ଦେଇଥିବା ଅଭିଯୋଗ କରିଛନ୍ତି ଅଞ୍ଚଳବାସୀ । କେନ୍ଦ୍ର ରେଳ ମନ୍ତ୍ରୀ ଅଶ୍ବିନୀ ବୈଷ୍ଣବ କୋରାପୁଟ ଜିଲ୍ଲା ଗ୍ରସ୍ତ ବେଳେ ରେଳ ପ୍ରକଳ୍ପ ପାଇଁ ପ୍ରତିଶ୍ରୁତି ଦେଇଥିଲେ । ହେଲେ କେବଳ ପ୍ରତିଶ୍ରୁତିରେ ଅଟକି ରହିଛି ଅଗ୍ରଗତି ।
ପ୍ରକଳ୍ପ ପାଇଁ କେନ୍ଦ୍ର ସରକାରଙ୍କ ଆନ୍ତରିକତା ନଥିବା ଅଭଯୋଗ କରିଛନ୍ତି ଜୟପୁର ବିଧାୟକ । କିଛି କାମ ନକରି କେବଳ ଲୋକଙ୍କୁ ଭ୍ରମିତ କରିଛନ୍ତି ଡବଲ ଇଞ୍ଜିନ ସରକାର । ଜୟପୁର ନବରଙ୍ଗପୁର ରେଳ ପ୍ରକଳ୍ପ ପାଇଁ ଅଧିଗ୍ରହଣ ଅଧିକାରୀ କିପରି କାମ କରୁଛନ୍ତି ତାହା ଜଣା ପଡୁନାହିଁ ବୋଲି କହିଛନ୍ତି ବିଧାୟକ । ସେପଟେ କୋରାପୁଟ ସାଂସଦ କହିଛନ୍ତି, ବାରମ୍ବାର ସଂସଦରେ ପ୍ରଶ୍ନ କରିଥିଲେ ସୁଦ୍ଧା କୌଣସି ଉତ୍ତର ମିଳୁନାହିଁ । ସେପଟେ ଜମି ଅଧିଗ୍ରହଣବେଳେ ଜମିର ମୁଲ୍ୟକୁ ନେଇ ସମସ୍ଯା ଉଠିଥିବାରୁ ଏହାର ବେଞ୍ଚମାର୍କ ମୁଲ୍ୟ ବୃଦ୍ଧି ପାଇଁ ସରକାରଙ୍କୁ ପ୍ରସ୍ତାବ ଦିଆଯାଇଥିବା କହିଛନ୍ତି ଜିଲ୍ଲାପାଳ ।