ନୂଆଦିଲ୍ଲୀ : ବିଶ୍ବ ଗୁଇନ୍ଦା ସ୍ତରରେ ବଢ଼ିବ ସହଭାଗିତା। ଆଜି ବସିବ ହାଇପ୍ରୋଫାଇଲ ବୈଠକ। ବୈଠକରେ ଆମେରିକାର ଜାତୀୟ ଗୁଇନ୍ଦା ନିର୍ଦ୍ଦେଶକ ତୁଲସୀ ଗାବାର୍ଡ, କାନାଡାର ସ୍ପାଏ ଚିଫ୍ ଡାନିଏଲ ରୋଗର୍ସ, ବ୍ରିଟେନର ଏମଆଇ-୧୬ ନିର୍ଦ୍ଦେଶକ ରିଚାର୍ଡ ମୋରେଙ୍କ ସମେତ ବହୁ ପଦାଧିକାରୀ ଏଥିରେ ସାମିଲ ହେବେ। ଆତଙ୍କବାଦ ମୁକାବିଲା ଓ ଅନ୍ଯ ଗୁରୁତ୍ବପୂର୍ଣ୍ଣ ପ୍ରସଙ୍ଗରେ ଏହି ବୈଠକରେ ଆଲୋଚନା ହେବ। ଏଥିରେ ଅଧ୍ଯକ୍ଷତା କରିବେ ଭାରତର ଜାତୀୟ ନିରାପତ୍ତା ପରାମର୍ଶଦାତା ଅଜିତ ଡୋଭାଲ। ନୂଆଦିଲ୍ଲୀରେ ଅନୁଷ୍ଠିତ ହେବାକୁ ଥିବା ବୈଠକରେ ଅଷ୍ଟ୍ରେଲିଆ, ଜର୍ମାନୀ, ନ୍ୟୁଜିଲାଣ୍ଡ ସମେତ ପ୍ରାୟ ୨୦ଟି ରାଷ୍ଟ୍ରର ଗୁଇନ୍ଦା ଅଧିକାରୀମାନେ ସାମିଲ ହେବେ। ବୈଠକ ପରେ ଭାରତ ଓ ଆମେରିକା ମଧ୍ୟରେ ବିଭିନ୍ନ ପ୍ରସଙ୍ଗରେ ଡୋଭାଲ ଓ ଗାବାର୍ଡଙ୍କ ମଧ୍ୟରେ ୱାନ-ଟୁ-ୱାନ ବୈଠକ ହେବ ବୋଲି ସୂଚନା ମିଳିଛି। ରୁଷ-ୟୁକ୍ରେନ ଯୁଦ୍ଧ ସମେତ ଅନ୍ଯାନ୍ୟ ଅସ୍ଥିରତା, ଆତଙ୍କବାଦୀ ମୁକାବିଲା ଆଦି ପ୍ରସଙ୍ଗରେ ବୈଠକରେ ଆଲୋଚନା ହେବ।
ରାଜ୍ୟରେ କଲବଲ କଲାଣି ତାତି, ଦେଶର ସବୁଠୁ ଉତ୍ତପ୍ତ ସହର ବୌଦ୍ଧ
ଭୁବନେଶ୍ବର : ରାଜ୍ୟରେ କଲବଲ କଲାଣି ତାତି। ଗତ ୨୪ ଘଣ୍ଟା ମଧ୍ୟରେ ଦେଶର ୧୮ ଉତ୍ତପ୍ତ ସହର ମଧ୍ୟରେ ଓଡ଼ିଶାର ୬ ସହର । ସେହିଭଳି ୪୦ ଡିଗ୍ରୀ ଟପିଛି ଓଡ଼ିଶାର ୧୩ ସହରର ତାପମାତ୍ରା । ୪୨.୫ ଡିଗ୍ରୀ ସହ ବୌଦ୍ଧ ଦେଶର ଏକ ନମ୍ବର ସହର ପାଲଟିଛି। ୪୨.୨ ଡିଗ୍ରୀ ସହ ଦ୍ବିତୀୟରେ ସମ୍ବଲପୁର ରହିଥିବା ବେଳେ ୪୧.୮ ଡିଗ୍ରୀ ଛୁଇଁଛି ଝାରସୁଗଡାର ତାପମାତ୍ରା। ସୂଚନା ଅନୁସାରେ ୧୯ ତାରିଖରୁ ତାତିରୁ ମିଳିବ ତ୍ରାହି। ୧୯, ୨୦ ଓ ୨୧ରେ ସ୍ୱଳ୍ପରୁ ମଧ୍ୟମ ଧରଣର ବର୍ଷା ସମ୍ଭାବନା ରହିଛି । ସୁନ୍ଦରଗଡ, କେନ୍ଦୁଝର, ମୟୂରଭଞ୍ଜ, ବାଲେଶ୍ୱରରେ ବର୍ଷା ହେବା ନେଇ ଆକଳନ କରିଛି ପାଣିପାଗ କେନ୍ଦ୍ର ।
ରାଜ୍ୟରେ ବିଗିଡିଛି ଆଇନ ଶୃଙ୍ଖଳା, ଗୋଟିଏ ଦିନରେ ଗଡିଲା ୬ ମୁଣ୍ଡ
ଭୁବନେଶ୍ବର ; ରାଜ୍ୟରେ ବିଗିଡିଛି ଆଇନ ଶୃଙ୍ଖଳା । ରକ୍ତ ରଞ୍ଜିତ ହେଲା ଓଡ଼ିଶା । କଥା କଥାକେ ଫୁଟୁଛି ଗୁଳି, ବୁଲୁଝି ଭୁଜାଲି। ଗତକାଲି ଗୋଟିଏ ଦିନରେ ଗଡିଛି ୬ ମୁଣ୍ଡ। ଭୁବନେଶ୍ଵରରୁ ବ୍ରହ୍ମପୁର, କଟକରୁ ଅନୁଗୁଳ । ସବୁଠି ବୀଭତ୍ସ ହତ୍ୟା କାଣ୍ଡ ଘଟିଛି । ଗତକାଲି ଦିନ ଦ୍ଵିପହରରେ କାହାକୁ ଖାତିର ନ କରି ମାତିଥିଲେ ଅପରାଧୀ। ରାଜଧାନୀରେ ଗତକାଲି ଏତେ ସୁରକ୍ଷା ସତ୍ତ୍ଵେ ଦୁଇ ଦୁଇଟି ମର୍ଡର ହୋଇଛି । ହାଇପ୍ରୋଫାଇଲ ସହିଦ ନଗର ଅଞ୍ଚଳର ଶାନ୍ତିପଲ୍ଲୀରେ ଜଣେ ଯୁବକକୁ ହତ୍ୟା କରାଯାଇଥିବା ବେଳେ ମଞ୍ଚେଶ୍ଵର ଥାନା ସମେଇଗଡ଼ିଆ ଅଞ୍ଚଳରେ ହୋଇଛି ଦ୍ଵିତୀୟ ହତ୍ୟାକାଣ୍ଡ। ଭୁବନେଶ୍ଵରରେ ଗୋଟିଏ ଦିନରେ ଦୁଇଟି ଦୁଇଟି ମର୍ଡର ଚାଞ୍ଚଲ୍ୟ ଖେଳାଇ ଦେଇଛି। କେବଳ ଭୁବନେଶ୍ଵରରେ ନୁହେଁ ସମ୍ଵଲପୁରରେ ବି ଘଟି ଯାଇଛି ଏକ ହତ୍ୟାକାଣ୍ଡ। ସାହୁ କଲୋନିରେ ଜଣେ ଯୁବକକୁ ଘରୁ ଡାକି ନେଇ ତାର ଜୀବନ ନେଇଛନ୍ତି ଦୁର୍ବୃତ୍ତମାନେ। ସେହିପରି ଅନୁଗୁଳ ନାଖରାସାହିରେ ଭୁଜାଲି ଚୋଟରେ ଜଣେ ବ୍ୟକ୍ତିଙ୍କ ଜୀବନ ଯାଇଛି। ସେହିପରି ବ୍ରହ୍ମପୁରରେ ବି ଏକ ମର୍ଡର ହୋଇଛି। ଲାଞ୍ଜିପଲ୍ଲୀ ଚାଣକ୍ୟ ନଗର ଅଞ୍ଚଳର କଣ୍ଟ୍ରାକ୍ଟର ଟି. ରାମଚନ୍ଦ୍ର ପାତ୍ରଙ୍କୁ ଛୁରି ଭୁସି ହତ୍ୟା କରାଯାଇଛି। ସେହିଭଳି କଟକ ବୟାଳିଶମୌଜା ଶ୍ରୀକୃଷ୍ଣ ବିହାରରେ ଯୁବକଙ୍କୁ ଗୁଳିକରି ହତ୍ୟା କରାଯାଇଛି । ପୋଲିସ ପହଞ୍ଚି ତଦନ୍ତ କରିଛି। ହୋଲି ପରି ଦିନରେ ରାଜ୍ୟର ୫ ପ୍ରମୁଖ ସହରରେ ୬ଟି ହତ୍ୟାକାଣ୍ଡ । ସତେ ଯେମିତି ପୋଲିସକୁ ଖୋଲାଖୋଲି ଚ୍ୟାଲେଞ୍ଜ ଦେଇଛନ୍ତି ଅପରାଧୀ। ଘରୁ ବାହାରିବାକୁ ମଧ୍ୟ ଡର ଲାଗିଲାଣି।
ନେତାଙ୍କ ଦେହରେ ଲାଗିଲା ଅବିର,ହୋଲିର ରଙ୍ଗରେ ଦେଖିଲେ ରାଜନୀତିର ରଙ୍ଗୀନ ସ୍ବପ୍ନ
ନନ୍ଦିଘୋଷ ବ୍ୟୁରୋ: ନେତାଙ୍କ ଦେହରେ ଲାଗିଲା ଅବିର । ହୋଲିର ରଙ୍ଗରେ ଦେଖିଲେ ରାଜନୀତିର ରଙ୍ଗୀନ ସ୍ବପ୍ନ । ସଶକ୍ତ ସଙ୍ଗଠନ ପାଇଁ ବିଜେଡିର ସଙ୍କଳ୍ପ । ଗେରୁଆ ରଙ୍ଗରେ ବିକାଶର ଚିତ୍ର ଆଙ୍କିଲା ବିଜେପି । କଂଗ୍ରେସ ବି ହାତରେ ଜନତାଙ୍କୁ ରଙ୍ଗ ବୋଳିବାକୁ ଚେଷ୍ଟା । ନାଚ, ଗୀତ ସାଙ୍ଗକୁ ପଣା,ଦହିବରା, ମିଠାର ଆସର l ପୁଣି ରଂଗ ବୋଳାବୋଳି ସହ ହୋଲିର ଅଭିନନ୍ଦନ l କିଏ ଦଳୀୟ କାର୍ଯ୍ୟାଳୟରେ କର୍ମୀ, ନେତା ଓ ଶୁଭେଚ୍ଛୁଙ୍କ ସହ ତ ଆଉ କିଏ ନିଜ ବାସଭବନରେ ପାଳିଲେ ହୋଲି ଉତ୍ସବ l ରଙ୍ଗର ପର୍ବ ହୋଲିକୁ ଆନନ୍ଦ ଉଲ୍ଲାସରେ ପାଳନ କରିଛନ୍ତି ରାଜ୍ୟର ୩ ପ୍ରମୁଖ ରାଜନୈତିକ ଦଳର ନେତାମାନେ l ହୋଲିର ରଙ୍ଗ ଖେଳ ଭିତରେ ଓଡିଶାକୁ ଅଧିକ ରଙ୍ଗୀନ କରିବାର ଦାୟିତ୍ୱକୁ ବି ଭୁଲିନାହାନ୍ତି ନେତାମାନେ l ବିଜେଡି ବିଧାୟକ ଅନନ୍ତ ନାରାୟଣ ଜେନା ରଙ୍ଗର ପର୍ବ ହୋଲିକୁ ନିଜ ସରକାରୀ ବାସଭବନରେ ଧୁମଧାମରେ ପାଳନ କରିଛନ୍ତି l ବିଜେଡିକୁ ଅଧିକ ସଶକ୍ତ କରି ନବୀନ ପଟ୍ଟନାୟକଙ୍କ ହାତମୁଠାକୁ ଟାଣ କରିବାକୁ ଆଦ୍ୱାନ ଦେଇଛନ୍ତି l ଏହାସହ ଶାସକ ବିଜେପିକୁ ରଙ୍ଗବଦଳାର ସରକାର କହି ରାଜନୀତିର ପିଚକାରୀ ମାରିଛନ୍ତି ଅନନ୍ତ l ଅନ୍ୟପଟେ ପ୍ରଥମ ଥର ବିଧାୟକ ହୋଇଥିବା ବିଜେଡିର ଅରବିନ୍ଦ ମହାପାତ୍ର ଓ ବିଜେପିର ଅମର ନାୟକ ନିଜ ନିର୍ବାଚନୀ ମଣ୍ଡଳୀର ସମର୍ଥକଙ୍କ ଗ୍ରହଣରେ ହୋଲି ପାଳନ କରିଛନ୍ତି l ମହାନଦୀ ଶୁଖି ଯାଇଥିବାରୁ ଆଗକୁ ରାଜ୍ୟରେ ପାଣି ସଂକଟ ଉଗ୍ରରୂପ ନେବାକୁ ଯାଉଥିବାରୁ ଏବେ ଠାରୁ ରାଜ୍ୟ ସରକାର ଏହା ଉପରେ ଦୃଷ୍ଟି ଦେବାକୁ ବିଜେଡିର ଯୁବ ବିଧାୟକ ଦାବି କରିଛନ୍ତି l ସେହିପରି ବିଜେପି ବିଧାୟକ ରଙ୍ଗ ଖେଳ ଭିତରେ ନିଜ ନିର୍ବାଚନୀ ମଣ୍ଡଳୀର ବିକାଶର ଚିତ୍ର ଆଙ୍କିଛନ୍ତି l
ସେପଟେ ହୋଲି ପାଇଁ କଂଗ୍ରେସ ଶିବିରରେ ବି ଉତ୍ସାହ କିଛି କମ ନଥିଲା l ରଙ୍ଗ ଉତ୍ସବରେ ଉତ୍ସବମୁଖର ହୋଇଉଠିଥିଲା ରାଜ୍ୟ କଂଗ୍ରେସ ଭବନ l ବରିଷ୍ଠ କଂଗ୍ରେସ ନେତା ସୁରେଶ କୁମାର ରାଉତରାୟ ଦଳୀୟ ନେତା ଓ କର୍ମୀଙ୍କ ଗହଣରେ ବାଜାର ତାଳେ ତାଳେ ନାଚି ରଙ୍ଗର ପର୍ବ ସେଲିବ୍ରେସନ କରିଛନ୍ତି l ସେହିପରି ବରିଷ୍ଠ କଂଗ୍ରେସ୍ ନେତା ଜୟଦେବ ଜେନା ନିଜ ବାସଭବନରେ ସମର୍ଥକଙ୍କ ସହ ହୋଲି ପାଳିଛନ୍ତି l କଂଗ୍ରେସ୍ ବିଧାୟକ ଦଳ ନେତା ରାମଚନ୍ଦ୍ର କାଡାମ ମଧ୍ୟ କର୍ମୀ ଓ ଶୁଭେଚ୍ଛୁଙ୍କୁ ରଙ୍ଗ ବୋଳି ଶୁଭେଚ୍ଛା ଜଣାଇଛନ୍ତି । ରାଜନୀତିର ବ୍ୟସ୍ତତା ଭିତରେ ନେତାମାନେ ରଙ୍ଗ ଖେଳିବାକୁ ଭୁଲି ନାହାନ୍ତି । ଆଉ ଚଳିତ ବର୍ଷ ଫଗୁର ରଂଗରେ ଲାଗିଛି ରାଜନୀତିର ଛିଟା ।
ମୁଖ୍ୟମନ୍ତ୍ରୀଙ୍କ ବିଭାଗ ୮ ମାସ ହେଲା ସ୍ଥାଣୁ, ନବୀନଙ୍କ ସମୟରେ ଆରମ୍ଭ ହୋଇଥିବା ଆନ୍ତଃ ନଦୀ ଜଳଭଣ୍ଡାର ପ୍ରକଳ୍ପ କାମ ଠପ୍!
ନନ୍ଦିଘୋଷ ବ୍ୟୁରୋ: ମୁଖ୍ୟମନ୍ତ୍ରୀଙ୍କ ବିଭାଗ । ଖର୍ଚ୍ଚ ହୋଇପାରୁନି ବଜେଟ୍ ଅର୍ଥ । ସରକାର ପରିବର୍ତ୍ତନର ୮ ମାସ ପରେ ବି କାମ ଠପ୍ । କୋମାରେ କି ଜଳ ସମ୍ପଦ ବିଭାଗ ! ଗ୍ରୀଷ୍ମ ଆରମ୍ଭରୁ ଶୁଖିଗଲାଣି ନଦୀ ନାଳ । ଦେଖାଦେଳାଣି ଜଳ ସଂକଟ । ଆଗକୁ ସ୍ଥିତି ଅସମ୍ଭାଳ ଥୟ । ମେଗା ଜଳସେଚନ ପ୍ରକଳ୍ପ କଥା ଦୂରେ ଥାଉ । ଆଗେଇପାରୁନି ଚାଲୁ ରହିଥିବା ଆନ୍ତଃନଦୀ ଜଳାଶୟ ପ୍ରକଳ୍ପ କାମ । କେମିତି ହେବ ଜଳସଂକଟ ମୁକାବିଲା ? ଚିନ୍ତାରେ ଚାଷୀ ଓ ସାଧାରଣ ଲୋକେ । ସ୍ଥିତି ଏମିତି ହେଲାଣି ରାଜଧାନୀ ସମେତ ସବୁ ସହରାଞ୍ଚଳକୁ ଖରାଦିନେ ପାଣି ଯୋଗାଇବା ମୁସ୍କିଲ ହେବାକୁ ଯାଉଛି । ଉଦବେଗ ପ୍ରକାଶ କଲେଣି ପୂର୍ବତନ ଜଳ ସମ୍ପଦ ମନ୍ତ୍ରୀ ଓ ନାଗରିକ ସୁରକ୍ଷା ମଞ୍ଚ । ଅଭିଯୋଗ ହୋଇଛି, ଏବର ମୁଖ୍ୟମନ୍ତ୍ରୀ ବିରୋଧୀ ଭୂମିକାରେ ଥିଲାବେଳେ ତତ୍କାଳୀନ ସରକାରଙ୍କ ବିରୋଧରେ ବିଧାନସଭାରେ ଗଳାଫଟେଇ ଗର୍ଜୁଥିଲେ । ଏବେ ନିଜେ ଶାସନର ମୁଖିଆ ହେବାରୁ ଲୋକଙ୍କ ଦରଦ କଣ ଶୁଣିପାରୁନାହନ୍ତି ? କାହିଁକି ଚଳଚଞ୍ଚଳ ହୋଇପାରୁନି ଜଳସମ୍ପଦ ବିଭାଗ ? ବିସ୍ଥାପିତ ସମସ୍ୟା ଓ ଜଳ ସଂକଟ ଦୂର କରିବାକୁ ନବୀନ ସରକାର ୭୨ଟି ଆନ୍ତଃନଦୀ ଜଳାଶୟ ନିର୍ମାଣ ପାଇଁ କାମ ଆରମ୍ଭ କରିଥିଲେ । ହେଲେ ସରକାର ପରିବର୍ତ୍ତନ ପରେ କାମ ସବୁ ଅଧପନ୍ତରିଆ ପଡ଼ିରହିଛି । ବଲାଙ୍ଗୀର ଲୋୟର ସୁକତେଲ ଓ ହେଉ କି ବରଗଡ଼ ଗଙ୍ଗାଧର ମେହେର ମେଗା ଉଠାଜଳସେଚନ ପ୍ରକଳ୍ପ କାମ ସମ୍ପୂର୍ଣ୍ଣ ହୋଇଥିଲା ତତ୍କାଳୀନ ସରକାରଙ୍କ ସମୟରେ ।
ମହାନଦୀ ଜଳ ବିବାଦ ମାମଲା ଟ୍ରିବ୍ୟୁନାଲରେ ଝୁଲିଛି । ଟ୍ରିବ୍ୟୁନାଲର ରାୟକୁ ଅପେକ୍ଷା ନ କରି ଏବେ ସରକାର ଚାହିଁଲେ ମହାନଦୀରେ ଏକାଧିକ ଆନ୍ତଃନଦୀ ଜଳାଶୟ ପ୍ରକଳ୍ପ ନିର୍ମାଣ କରିପାରିବେ । ଯଦି ନଦୀ ପଠାରେ କିଛି ବିସ୍ଥାପିତ ସମସ୍ୟା ଉପୁଜେ ତାହେଲ ସେଥିପାଇଁ ସରକାର କ୍ଷତିପୂରଣ ଦେଇପାରିବେ । ଏପରି କଲେ କେବଳ ମହାନଦୀ ହିଁ ଜଳ ସଂକଟ ଦୂର କରିବାରେ ବଡ଼ ସହାୟକ ହୋଇପାରିବ । ଟ୍ରିପଲ ଇଞ୍ଜିନ ସରକାର ଜଳ ସମସ୍ୟାର ସମାଧାନ କରିପାରିବେ । କେନ୍ଦ୍ର ସରକାର ସହଯୋଗ କଲେ ଛତିଶଗଡ଼ ସରକାରଙ୍କ ସହ ଆପୋଷ ଆଲୋଚନାରେ ବି ମହାନଦୀ ଜଳ ବିବାଦର ସମାଧାନ ବାହାରିପାରିବ । ଆଉ ତାକୁ ଟ୍ରିବ୍ୟୁନାଲ ଗ୍ରହଣ କରିବାରେ ଅସୁବିଧା ହେବନି । ୨୦୨୪-୨୫ ଆର୍ଥିକ ବର୍ଷରେ ବିଭାଗର ସଂଶୋଧିତ ବ୍ୟୟ ଅଟକଳ ୧୦ ହଜାର ୪୧୬ କୋଟି ୩୭ ହଜାର ଥିଲା । କିନ୍ତୁ ତୃତୀୟ କ୍ବାର୍ଟର ସୁଦ୍ଧା ମାତ୍ର ୫୪ ପ୍ରତିଶତ ଖର୍ଚ୍ଚ ହୋଇପାରିଛି । ଯାହାକି ଅତି ନଗଣ୍ୟ ।
୨୦୨୫-୨୬ ଆର୍ଥିକ ବର୍ଷ ପାଇଁ ଜଳ ସମ୍ପଦ ବିଭାଗ ପାଇଁ ୧୨ ହଜାର କୋଟିର ବଜେଟ୍ । ଖୋଦ ବିଧାନସଭା ବିଭାଗୀୟ ସ୍ଥାୟୀ କମିଟି ମଧ୍ୟ ଜଳ ସଂକଟ ଦୂର କରିବା ପାଇଁ ଆଇଏସ୍ଏସ୍ ନିର୍ମାଣ କାମ ତ୍ବାରାନ୍ବିତ କରିବାକୁ ସୁପାରିସ କରିଛି । ହେଲେ ଏ ସରକାର ତାକୁ ଗୁରୁତ୍ବ ଦେଇ କାମ କଲେ ତ?
ହୋଲିରେ ଗଡ଼ିଲା ୫ ମୁଣ୍ଡ ,ପୋଲିସକୁ ଅପରାଧୀଙ୍କ ଖୋଲା ଚ୍ୟାଲେଞ୍ଜ
ନନ୍ଦିଘୋଷ ବ୍ୟୁରୋ: ହୋଲିରେ ଏଥର ରଙ୍ଗ ଖେଳ ନୁହେଁ, ହୋଇଛି ରକ୍ତର ହୋଲି ଖେଳ । ରାଜ୍ୟରେ ଗଡ଼ିଛି ୫ଟି ମୁଣ୍ଡ । ମାତିଲେ ଅପରାଧୀ ଲାଗୁଛି ଆଇନ ଶୃଙ୍ଖଳା ବୋଲି କିଛି ନାହିଁ । ଦିନ ଦ୍ଵିପହରରେ କାହାକୁ ଖାତିର ନ କରି ମାତିଲେ ଅପରାଧୀ । ରାଜଧାନରେ ଏତେ ସୁରକ୍ଷା ସତ୍ତ୍ଵେ ଦୁଇ ଦୁଇଟି ମର୍ଡର । ହାଇପ୍ରୋଫାଇଲ ସହିଦ ନଗର ଅଞ୍ଚଳର ଶାନ୍ତିପଲ୍ଲୀରେ ଜଣେ ଯୁବକକୁ ହତ୍ୟା କରାଯାଇଥିବା ବେଳେ ମଞ୍ଚେଶ୍ଵର ଥାନା ସମେଇଗଡ଼ିଆ ଅଞ୍ଚଳରେ ହୋଇଛି ଦ୍ଵିତୀୟ ହତ୍ୟାକାଣ୍ଡ। ଭୁବନେଶ୍ଵରରେ ଗୋଟିଏ ଦିନରେ ଦୁଇଟି ଦୁଇଟି ମର୍ଡର ଚାଞ୍ଚଲ୍ୟ ଖେଳାଇ ଦେଇଛି। ପ୍ରଶ୍ନ ଉଠୁଛି, ପୋଲିସ ପ୍ରତି କଣ ଆଉ ଅପରାଧୀଙ୍କ ଭୟ ନାହିଁ। କେବଳ ଭୁବନେଶ୍ଵରରେ ନୁହେଁ ସମ୍ଵଲପୁରରେ ବି ଘଟି ଯାଇଛି ଏକ ହତ୍ୟାକାଣ୍ଡ। ସାହୁ କଲୋନିରେ ଜଣେ ଯୁବକକୁ ଘରୁ ଡାକି ନେଇ ତାର ଜୀବନ ନେଇଛନ୍ତି ଦୁର୍ବୃତ୍ତମାନେ। ସେହିପରି ଅନୁଗୁଳ ନାଖରାସାହିରେ ଭୁଜାଲି ଚୋଟରେ ଜଣେ ବ୍ୟକ୍ତିଙ୍କ ଜୀବନ ଯାଇଛି। ସେହିପରି ବ୍ରହ୍ମପୁରରେ ବି ଏକ ମର୍ଡର ହୋଇଛି। ଲାଞ୍ଜିପଲ୍ଲୀ ଚାଣକ୍ୟ ନଗର ଅଞ୍ଚଳର କଣ୍ଟ୍ରାକ୍ଟର ଟି. ରାମଚନ୍ଦ୍ର ପାତ୍ରଙ୍କୁ ଛୁରି ଭୁସି ହତ୍ୟା କରାଯାଇଛି। ପୋଲିସ ପହଞ୍ଚି ତଦନ୍ତ କରିଛି। ହୋଲି ପରି ଦିନରେ ରାଜ୍ୟର ୪ ପ୍ରମୁଖ ସହରରେ ୫ଟି ହତ୍ୟାକାଣ୍ଡ । ସତେ ଯେମିତି ପୋଲିସକୁ ଖୋଲାଖୋଲି ଚ୍ୟାଲେଞ୍ଜ ଦେଇଛନ୍ତି ଅପରାଧୀ। ଘରୁ ବାହାରିବାକୁ ମଧ୍ୟ ଡର ଲାଗିଲାଣି।
ଦୋଳ ମେଲଣ ଉତ୍ସବ,ରୋଷଣୀରେ ସୁସଜ୍ଜିତ ବିମାନରେ ବିଜେ କଲେ ଦୋଳ ଗୋବିନ୍ଦ
ନନ୍ଦିଘୋଷ ବ୍ୟୁରୋ : ରଙ୍ଗବେରଙ୍ଗର ସୁସଜ୍ଜିତ ବିମାନରେ ଆସୁଛନ୍ତି ଦୋଳ ଗୋବିନ୍ଦ । ବାଜାବାଣ ରୋଷଣୀରେ ମେଳଣ ପଡ଼ିଆକୁ ବିଜେ କରୁଛନ୍ତି ରାଧା କୃଷ୍ଣଙ୍କ ଚଳନ୍ତି ପ୍ରତିମା । ମେଳଣ ପଡ଼ିଆରେ ଲାଗିଛି ହଜାର ହଜାର ଲୋକ ଭିଡ । ଭଦ୍ରକ ଜିଲ୍ଲାର ବାସୁଦେବପୁର ବ୍ଲକର ବ୍ରାହ୍ମଣଗାଁରେ ପାଳିତ ହୋଇଛି ମେଳଣ ଉତ୍ସବ । ଏହି ମେଳଣ ଉତ୍ସବ ୧୪୮୫ ଖ୍ରୀଷ୍ଟାବ୍ଦରେ ଆରମ୍ଭ ହୋଇ ଚଳିତ ବର୍ଷ ୫୨୫ ବର୍ଷରେ ପଦାର୍ପଣ କରିଛି । ପାଞ୍ଚଟି ବିମାନକୁ ନେଇ ଆରମ୍ଭ ହୋଇ ଥିବା ମେଳଣ ଉତ୍ସବ ୪୨ଗୋଟି ବିମାନରେ ପହଞ୍ଚିଛି । ଦିଅଁ ଦର୍ଶନ ସହିତ ସୁସଜ୍ଜିତ ବିମାନ ଦେଖିବାକୁ ବାଲେଶ୍ଵର ଓ ଭଦ୍ରକ ଜିଲ୍ଲାର ହଜାର ହଜାର ଶ୍ରଦ୍ଧାଳୁଙ୍କ ଭିଡ଼ ଜମିଥିଲା । ୨ ଦିନ ଧରି ଆୟୋଜିତ ହୋଇଥିବା ଏହି ଭାଇ ଚାରାର ମେଳଣରେ ଉଭୟ ହିନ୍ଦୁ ଓ ମୁସଲିମ ସମ୍ପ୍ରଦାୟର ଲୋକେ ସାମିଲ ହୋଇଥିଲେ । ଏହି ଅବସରରେ ବହୁ ଉଠା ଦୋକାନ ଲାଗିଥାଏ ।
ଆନନ୍ଦ ଉଲ୍ଲାସର ସହିତ ପାଳିତ ହୋଇଛି ଦୋଳ ପୂର୍ଣ୍ଣିମା । ରୋଷଣୀରେ କାନ୍ଧରେ ଆସୁଛନ୍ତି ଦୋଳ ଗୋବିନ୍ଦ । ସାମିଲ୍ ହୋଇଛନ୍ତି ଉଭୟ ହିନ୍ଦୁ ମୁସଲିମ୍ । ପୁରୀ ଜିଲ୍ଲା ନିମାପଡ଼ା ବ୍ଲକ ଶଗଡା ପଞ୍ଚାୟତ ରେଂଘାଳୋ ଠାରେ ପବିତ୍ର ଦୋଳ ପୂର୍ଣ୍ଣିମା ପାଳିତ ହୋଇଯାଇଛି । ଦୁଇଟି ସୁସଜିତ ବିମାନରେ ରାଧାକୃଷ୍ଣଙ୍କ ଚଳନ୍ତି ପ୍ରତିମା ଗାଁ ପରିକ୍ରମା କରିବା ସହିତ ଚରେରୀରେ ଭୋଗ ଖାଇଥିଲେ । ଦୋଳପୂର୍ଣ୍ଣିମା ପାଇଁ ଉଭୟ ହିନ୍ଦୁ ଓ ମୁସଲମାନ ସମ୍ପ୍ରଦାୟର ବନ୍ଧୁ ବାନ୍ଧବ ଘରକୁ ନିମନ୍ତ୍ରତ ହୋଇ ଏହି ପର୍ବରେ ସାମିଲ ହୁଅନ୍ତି । ଅନେକ ବର୍ଷରୁ ଏହି ନିଆରା ଭାଇଚାରା ପରମ୍ପରା ଚାଲିଆସୁଛି । ତେବେ ଦୋଳ ପୂର୍ଣ୍ଣିମାରେ ଦୋଳ ଗୋବିନ୍ଦଙ୍କୁ ରୋଷଣୀରେ ପାଛୋଟି ଆଣୁଥିବା ବେଳେ ପରସ୍ପର ମଧ୍ୟରେ ଅବିର ଲଗାଇ ହୋଲି ଖେଳିଥିଲେ । ଏହାପରେ ଦୋଳବେଦୀକୁ ବିରାଜମାନ କରିଥିଲେ ରାଧାକୃଷ୍ଣ।
ଗଞ୍ଜାମ ଜିଲ୍ଲାର ଆସିକା ବ୍ଳକ ଭେଟନଇ ଗାଁ ନିକଟ ମାଆ କଙ୍କଣ ଦେବୀଙ୍କ ପୀଠରେ ଦୋଳ ଯାତ୍ରା ପାଳିତ ହୋଇଯାଇଛି । ଦୋଳ ପୂର୍ଣ୍ଣମାରେ ନାମ ଯଜ୍ଞ ଅନୁଷ୍ଠିତ ହୋଇଥିଲା । ଏହି ଅବସରରେ ମାଆ କଙ୍କଣ ଦେବୀଙ୍କ ପୀଠରେ ହଜାର ହଜାର ଶ୍ରଦ୍ଧାଳୁଙ୍କ ସମାଗମ ହୋଇଥିଲା । ଲୋକ କଥା ଅନୁଯାୟୀ ଘୁମୁସରର ଭଞ୍ଜବଂଶିୟ ରଜତନ୍ତ୍ର ସମୟରୁ ଏଠାରେ ବିରାଟ ପ୍ରସ୍ତର ଖଣ୍ଡ ରୂପରେ କଙ୍ଗଣ ଦେବୀ ପୂଜା ପାଇଆସୁଛନ୍ତି । ମାଆଙ୍କ ପାଖରେ ମାନସିକ ରଖି କୁଣ୍ଡାପୋଡ଼ ପିଠା ଓ ପଣାଭୋଗ କଲେ ହଜିଥିବା ଜିନିଷ ମିଳିଯାଏ ବୋଲି ବିଶ୍ଵାସ ରହିଛି । ବିରାଟ କାୟ ପଥର ଖଣ୍ଡଟି ଛୋଟିଆ ପଥର ଉପରେ ରହିଥିବାରୁ ସମସ୍ତଙ୍କୁ ଆଶ୍ଚଯ୍ୟ କରିଥାଏ ।
ସମ୍ବଲପୁରରେ ଘରୁ ଡାକିନେଇ ଯୁବକଙ୍କୁ ହାଣିଦେଲେ ଦୁବୃର୍ତ୍ତ
ସମ୍ବଲପୁର: ସମ୍ବଲପୁର ସାହୁ କଲୋନୀରେ ଯୁବକଙ୍କୁ ହତ୍ୟା । ଘରୁ ଡ଼ାକିଆଣି ଜଣେ ହତ୍ୟା କରାଯାଇଥିବା ଅଭିଯୋଗ ହୋଇଛି l ମୃତ ଯୁବକ ଆଦିତ୍ୟ ସାଲମା ବୋଲି ଜଣାପଡିଛି । ପୂର୍ବ ଶତ୍ରୁତାକୁ କେନ୍ଦ୍ରକରି ହତ୍ୟାକାଣ୍ଡ ଅଭିଯୋଗ ହୋଇଛି । ଆଜି ଅପରାହ୍ନ ୩ ଟା ସମୟରେ ହୋଲି ଖେଳ ଚାଲୁଥିବା ବେଳେ କିଛି ଯୁବକ ଆଦିତ୍ୟଙ୍କୁ ତାଙ୍କ ଘର ନିକଟରୁ ଉଠାଇ ନେଇ ନିକଟ ହନୁମାନ ମନ୍ଦିର ପାଖରେ ଧାରୁଆ ଅସ୍ତ୍ରରେ ହତ୍ୟା କରି ଫେରାର ମାରିଛନ୍ତି ଦୁର୍ବୃତ୍ତ l ଯୁବକଙ୍କ ମୃତ୍ୟୁ ପରେ ସଦର ମେଡିକାଲରେ ଉତ୍ତେଜନା ଦେଖିବାକୁ ମିଳିଛି l ମେଡିକାଲରେ ଦୁଇ ପ୍ଲାଟୁନ ପୋଲିସ୍ ଫୋର୍ସ ମୁତୟନ କରାଯାଇଛି ।
ରାଜଧାନୀରେ ହୋଲି ଖେଳ ବେଳେ ଗଡିଲା ୨ ମୁଣ୍ଡ
ନନ୍ଦିଘୋଷ ବ୍ୟୁରୋ: ହୋଲିରେ ରାଜଧାନୀରେ ଗଡ଼ିଲା ୨ ମୁଣ୍ଡ । ଭୁବନେଶ୍ଵର ସହିତନଗର ସ୍ଥିତ ଶାନ୍ତିପଲ୍ଲୀ ବସ୍ତିରେ ହତ୍ୟାକାଣ୍ଡ ହୋଇଛି । ହୋଲି ଖେଳ ବେଳେ ବଚସା ପରେ ହୋଇଛି ହତ୍ୟାକାଣ୍ଡ । ହୋଲି ଖେଳ ବେଳେ ୪ଜଣ ଯୁବକ ଛୁରି ଭୁସି ହତ୍ୟା କରିଥିବା ଅଭିଯୋଗ ହୋଇଛି । ସେପଟେ ମଞ୍ଚେଶ୍ଵରରେ ହୋଇଛି ଆଉ ଏକ ହତ୍ୟା କାଣ୍ଡ । ହୋଲି ଖେଳ ବେଳେ ସମେଇଗାଡ଼ିଆରେ ଜଣେ ଯୁବକଙ୍କୁ ହତ୍ୟା କରିଥିବା ଅଭିଯୋଗ ହୋଇଛି ।
ପାକିସ୍ତାନ ଟ୍ରେନ ହାଇଜାକ୍ ଘଟଣା: ପଣବନ୍ଦୀ ଥିବା ୨୧୪ ସୈନ୍ୟଙ୍କୁ ହତ୍ୟା କଲେ ବଲୁଚ୍ ବିଦ୍ରୋହୀ
ନନ୍ଦିଘୋଷ ବ୍ୟୁରୋ: ପାକିସ୍ତାନ ଟ୍ରେନ ହାଇଜାକ୍ ଘଟଣାରେ ପଣବନ୍ଦୀ ଥିବା ୨୧୪ ସୈନ୍ୟଙ୍କୁ ହତ୍ୟା। ଏହି ଦାବି କରିଛନ୍ତି ବଲୁଚ୍ ବିଦ୍ରୋହୀ । ୨୧୪ ଜଣ ପାକିସ୍ତାନୀ ସୈନ୍ୟଙ୍କୁ ହତ୍ୟା କରାଯାଇଥିବା ବଲୁଚ ଲିବରେସନ ଆର୍ମି ଘୋଷଣା କରିଛି । ଏଥିଲାଗି ପାକିସ୍ତାନ ଆର୍ମିକୁ ଦାୟୀ କରିଛି ବିଏଲଏ । ଗତ ମଙ୍ଗଳବାର ବଲୁଚ ବିଦ୍ରୋହୀମାନେ ଏକ ଟ୍ରେନକୁ ଅପହରଣ କରିନେଇଥିଲେ । କ୍ଵେଟାରୁ ପେଶାୱର ଯାଉଥିବା ଜାଫର ଏକ୍ସପ୍ରେସକୁ ସେମାନେ ହାଇଜାକ କରିନେଇଥିଲେ । ବୁଧବାର ପାକିସ୍ତାନ ସେନା ସମସ୍ତ ପଣବନ୍ଦୀଙ୍କୁ ଉଦ୍ଧାର କରାଯାଇଛି ବୋଲି ଘୋଷଣା କରିଥିଲା । ହେଲେ ପ୍ରକୃତରେ ତାହା ଏକ ଉଡ଼ା ଖବର କହି ଏହାକୁ ଖାରଜ କରିଥିଲା ବିଏଲଏ । ଟ୍ରେନ ଅପହରଣ ବେଳେ ସେଥିରେ ୪୫୦ରୁ ଅଧିକ ଯାତ୍ରା ଥିଲେ । ବୃଦ୍ଧ, ମହିଳା ଓ ପିଲାକୁ ଛାଡ଼ି ଦେଇଥିଲା ବୋଲି କହିଥିଲା। ତା ପରେ ୨୧୪ ପଣବନ୍ଦୀ ସୈନ୍ୟଙ୍କୁ ହତ୍ୟା କରିଥିବା ବିଏଲଏ ପକ୍ଷରୁ କୁହାଯାଇଛି। ସେମାନଙ୍କ ମୁକ୍ତି ପାଇଁ ପାକିସ୍ତାନ ପକ୍ଷରୁ କୌଣସି ଉଦ୍ୟମ ନ ହେବା, ବିଏଲଏର ସର୍ତ୍ତ ନ ମାନିବା ଯୋଗୁଁ ଚରମ ପଦକ୍ଷେପ ନିଆଯାଇଥିବା କହିଛି ବିଏଲଏ।