ନନ୍ଦିଘୋଷ ବ୍ୟୁରୋ: ଉତ୍ତରପୂର୍ବାଞ୍ଚଳ ରାଜ୍ୟ ମଣିପୁରରେ ତେଜିଲା ୱାକଫଜନିତ ଅସ୍ଥିରତା। ଇମ୍ଫାଲ ଇଷ୍ଟ ସମେତ ଅନ୍ୟାନ୍ୟ ସ୍ଥାନରେ ବ୍ୟାପକ ଅସ୍ଥିରତା। ରାଜରାସ୍ତାକୁ ଓହ୍ଲାଇଲେ ହଜାର ହଜାର ମୁସଲିମ। ଏହି ଆଇନକୁ ଅସାମ୍ବିଧାନିକ ଦର୍ଶାଇବା ସହ ଏହାକୁ ପ୍ରତ୍ୟାହାର କରିବା ଲାଗି ଦାବି କରିଛନ୍ତି ଆନ୍ଦୋଳନକାରୀ। ରାଜ୍ୟରେ ଜାତିଗତ ହିଂସାକୁ କେନ୍ଦ୍ର କରି ରାଷ୍ଟ୍ରପତି ଶାସନ ଜାରି ହୋଇଥିବା ସତ୍ତ୍ବେ ଲୋକମାନେ ଉତ୍ତ୍ୟକ୍ତ ହୋଇ ରାଜରାସ୍ତାକୁ ଆସିଛନ୍ତି।

ଲୋକମାନେ ମସଜିଦ, ମଦ୍ରାସା, କବରସ୍ଥାନର ସୁରକ୍ଷା ସଂକାନ୍ତ ପ୍ଲାକାର୍ଡ ଧରି ବିକ୍ଷୋଭ କରିଛନ୍ତି। ମୁସଲିମମାନଙ୍କ ସମ୍ପତ୍ତିଗତ ଅଧିକାର ଛଡାଇବା ଲାଗି ଚେଷ୍ଟା କରାଯାଉଛି ବୋଲି ଆନ୍ଦୋଳନକାରୀ କହିଛନ୍ତି। କେନ୍ଦ୍ର ସରକାର ମୁସଲିମମାନଙ୍କ ଭାବନା ଉପରେ ଆଘାତ ଆଣିଛନ୍ତି ବୋଲି କହିଛନ୍ତି ନେତା। ଆସନ୍ତା ୧୬ ତାରିଖରେ ୱାକଫ ପ୍ରସଙ୍ଗରେ ସୁପ୍ରିମକୋର୍ଟ ଶୁଣାଣି କରିବାକୁ ଯାଉଥିବାବେଳେ ଦେଶର ବିଭିନ୍ନ ସ୍ଥାନରେ ପ୍ରତିବାଦ ଆନ୍ଦୋଳନ ଜାରି ରହିଛି।..

ଚେନ୍ନାଇ: ଖୋଲୁଛି କେନ୍ଦ୍ର ସରକାରଙ୍କ ସଂଖ୍ୟାଲଘୁ ପ୍ରୀତିର ଅସଲ ମୁଖା। ବହୁଚର୍ଚ୍ଚିତ ୱାକଫ ବିଲ ବିରୋଧରେ ରାଜ୍ୟସଭାରେ ତାମିଲନାଡୁ ଏଆଇଏଡିଏମକେର ୪ ଜଣ ସାଂସଦ ଭୋଟ ଦେଇଥିଲେ। ହେଲେ ଗତ ୧୧ ତାରିଖରେ ଏଆଇଏଡିଏମକେ ସହ ମେଣ୍ଟ ଘୋଷଣା କରିଥିଲା ବିଜେପି। ଏପରିକି ଚେନ୍ନାଇରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ ସହ ମଞ୍ଚରେ ଆସନ ଅଳଙ୍କୃତ କରିଥିଲେ ଏଆଇଏଡିଏମକେ ନେତା ଇକେ ପାଲାନିସ୍ବମୀ ବା ଇପିଏସ । ଗତ ୧୧ ତାରିଖରେ ତାମିଲନାଡୁରେ ଘୋଷିତ ହୋଇଥିଲା ବିଜେପି-ଏଆଇଏଡିଏମକେ ମେଣ୍ଟ। ଏଆଇଏଡିଏମକେର ଦୁଇଟି ସର୍ତ୍ତକୁ ପାଳନ କରିଥିଲା ବିଜେପି।

ପ୍ରଥମଟି ହେଉଛି ଏଆଇଏଡିଏମକେର ଦାବି ଅନୁସାରେ ବିଜେପିର ରାଜ୍ୟସଭାପତି କେ. ଆନ୍ନାମଲାଇଙ୍କୁ ହଟାଇ ତାଙ୍କ ସ୍ଥାନରେ ନାଇନାର ନାଗେନ୍ଦ୍ରନଙ୍କୁ ରାଜ୍ୟସଭାପତି କରିବା। ଦ୍ବିତୀୟଟି ହେଉଛି- ସୀମା ପୁନଃନିର୍ଦ୍ଧାରଣରେ ଯେପରି ତାମିଲନାଡୁର  କିଛି କ୍ଷତି ହେବ ନାହିଁ ସେଥିପାଇଁ କେନ୍ଦ୍ର ଦୃଷ୍ଟି ଦେବ। କେବଳ ଏତିକି ନୁହେଁ ଇପିଏସଙ୍କୁ ତୁଷ୍ଟ କରିବା ଲାଗି ଆମ୍ମା ମକ୍କଲ ମୁନେତ୍ର କାଜାଗମ ନେତ୍ରୀ ଶଶୀକଳା ଓ ଟିଟିଭି ଦିନାକରନଙ୍କୁ ଦୂରେଇ ରଖିବା ଲାଗି ବି ବିଜେପି ସହମତି ହୋଇଥିବା ସୂଚନା ମିଳିଛି। ବିଜେପି ଓ ଏଆଇଏଡିଏମକେ ମେଣ୍ଟ ଯୋଗୁ ରାଜ୍ୟର ୩ଟି ଅଞ୍ଚଳରେ ଏବଂ ବିଶେଷ କରି ଗ୍ରାମାଞ୍ଚଳରେ ଏନଡିଏ ନିଜ ଆଧିପତ୍ୟ ବିସ୍ତାର କରିବ ।

ନୂଆଦିଲ୍ଲୀ: ଦିଲ୍ଲୀରେ ଭୟଙ୍କର ଝଡ଼ ତୋଫାନ ଯୋଗୁ ଅଟକି ରହିଲା ଅନେକ ବିମାନ । ଯାତ୍ରାରେ ବିଳମ୍ବ ହେବାରୁ ବିମାନ ବନ୍ଦରରେ ଅଟକି ରହିଲେ ଶହ ଶହ ଯାତ୍ରୀ । ରାତିସାରା ଯାତ୍ରୀମାନେ କୁଆଡେ ଯାଇ ନପାରି ହନ୍ତସନ୍ତ ହୋଇଛନ୍ତି । ବିମାନବନ୍ଦରରେ ଏତେ ଯାତ୍ରୀ ହୋଇଗଲେ ଯେ, ଦଳାଚକଟା ଭଳି ପରିସ୍ଥିତି ସୃଷ୍ଟି ହୋଇଛି ।

ସୂଚନା ଅନୁସାରେ, ଗତକାଲି ରାତିରେ ଦିଲ୍ଲୀରେ ପ୍ରବଳ ଝଡ଼ ତୋଫାନ ଯୋଗୁ କିଛି ସମୟ ପାଇଁ ଠପ୍ ହୋଇଯାଇଥିଲା ସହର । ଏହାର ପ୍ରଭାବ ଯାତାୟତରେ ପଡ଼ିଥିଲା । ଦିଲ୍ଲୀ ଇନ୍ଦିରାଗାନ୍ଧୀ ବିମାନବନ୍ଦରରେ ଏହାର ଏତେ ପ୍ରଭାବ ପଡ଼ିଥିଲା ଯେ, ଦଳାଚକଟା ଭଳି ପରିସ୍ଥିତି ସୃଷ୍ଟି ହୋଇଥିଲା । ବିମାନବନ୍ଦର ଟର୍ମିନାଲ ୩ର ଗେଟ ନଂ ୪୨ଏରେ ଏପରି ପରିସ୍ଥିତି ସୃଷ୍ଟି ହୋଇଥିଲା । ଯାତ୍ରୀଙ୍କ ସଂଖ୍ୟା ଏତେ ବଢ଼ି ଯାଇଥିଲା ଯେ, ପରିସ୍ଥିତି ଅସମ୍ଭାଳ ହୋଇଥିଲା । ଆଜି ସକାଳୁ ଫସି ରହିଥିବା ଯାତ୍ରୀଙ୍କୁ ୨ରୁ ୮ଟି ବିମାନ ବୋର୍ଡିଂ କରୁଛି ।

ଶୁକ୍ରବାର ରାତିରୁ ବିମାନ ଚଳାଚଳ ବାଧାପ୍ରାପ୍ତ ହୋଇଛି । ଏଭଳି ପରିସ୍ଥିତିକୁ ନିୟନ୍ତ୍ରଣ କରିବାକୁ ଚେଷ୍ଟା କରାଯାଉଛି ବୋଲି କହିଛି ଏୟାର ଇଣ୍ଡିଆ ।

ନୂଆଦିଲ୍ଲୀ: ତହବୁର ରାଣାକୁ ଏନଆଇଏର ଜେରାର ଆଜି ଦ୍ବିତୀୟ ଦିନ ।  ୨୬/୧୧ ମୁମ୍ବାଇ ଆତଙ୍କବାଦୀ ହମଲାର ଷଡ଼ଯନ୍ତ୍ରକାରୀ ହେଉଛି ତହବୁର  । ଗତକାଲିର ତଦନ୍ତ ବେଳେ ତହବୁର ରାଣା ଏନଆଇଏକୁ ସହଯୋଗ କରିନଥିବା ସୂଚନା ରହିଛି । ସ୍ବାସ୍ଥ୍ୟାବସ୍ଥା ଠିକ ନଥିବା କହି ସମସ୍ତ ପ୍ରଶ୍ନକୁ ଏଡାଇ ଚାଲିଥିଲା । ଆଜି ପୁଣି ତାକୁ ଜେରା କରିବ ଏନଆଇଏ ।

ତହବୁରକୁ ୧୮ ଦିନର ରିମାଣ୍ଡ ବେଳେ ବିଭିନ୍ନ ଦିଗକୁ ନେଇ ପ୍ରଶ୍ନ କରିବ ଏନଆଇଏ ଟିମ୍ ।  ବିଶେଷ କରି ଏହି ଆକ୍ରମଣ ଘଟଣାରେ ପାକିସ୍ତାନର ଲିଙ୍କ୍ ନେଇ ତଥ୍ୟ ଓଗାରିବ ଏନଆଇଏ। ରାଣା କେଉଁ କେଉଁ ସ୍ଥାନକୁ ଓ କାହା ନିକଟକୁ ଇ-ମେଲ ପଠାଇଛି, ଅନ୍ୟତମ ଷଡ଼ଯନ୍ତ୍ରକାରୀ ଡେଭିଡ କୋଲମାନ ହେଡଲି ସହ ସମ୍ପର୍କ ଓ ପାକିସ୍ତାନ ସେନା ଅଫିସରଙ୍କ ଭୂମିକା ସମ୍ପର୍କରେ ଜେରା କରାଯିବ। ଭାରତରେ ଆତଙ୍କବାଦୀ ନେଟୱାର୍କ ଏବଂ ୨୬/୧୧ ଆକ୍ରମଣର ଷଡ଼ଯନ୍ତ୍ର ସହ ଜଡିତ ସମସ୍ତ ଦିଗ ଉପରେ NIA ତହବୁର ରାଣାଠାରୁ ସୂଚନା ପାଇବାକୁ ଚାହୁଁଛି। ତହବୁର ରାଣା, ଡେଭିଡ୍ କୋଲମ୍ୟାନ୍ ହେଡଲି, ଲସ୍କର-ଏ-ତୈବା, ହରକତ-ଉଲ-ଜିହାଦି ଇସଲାମି ଏବଂ ଅନ୍ୟାନ୍ୟ ପାକିସ୍ତାନୀ ଆତଙ୍କବାଦୀଙ୍କ ସହ ମିଶି 2008 ମୁମ୍ବାଇ ଆତଙ୍କବାଦୀ ଆକ୍ରମଣ ପାଇଁ ଷଡ଼ଯନ୍ତ୍ର ରଚିବାର ଅଭିଯୋଗ ରହିଛି । ତଦନ୍ତକାରୀ ସଂସ୍ଥା ସନ୍ଦେହ କରୁଛି ଯେ ତହବୁର ରାଣା ଭାରତର ଅନେକ ସହରକୁ ଟାର୍ଗେଟ କରିବା ପାଇଁ ୨୬/୧୧ ମୁମ୍ବାଇ ଆକ୍ରମଣ ପରି ଏକ ଆତଙ୍କବାଦୀ ଷଡ଼ଯନ୍ତ୍ର ରଚିଥିଲା। କୋର୍ଟ ତାଙ୍କ ଆଦେଶରେ NIAକୁ ପ୍ରତି 24 ଘଣ୍ଟାରେ ତହବୁର ରାଣାଙ୍କ ଡାକ୍ତରୀ ପରୀକ୍ଷା କରିବାକୁ ଏବଂ ପ୍ରତି ଦ୍ୱିତୀୟ ଦିନରେ ସେ ଓକିଲଙ୍କୁ ଭେଟିବାକୁ ଅନୁମତି ଦେବାକୁ ନିର୍ଦ୍ଦେଶ ଦେଇଥିଲେ। ତହବୁର ରାଣା ଆମେରିକାରୁ ଏକ ସ୍ବତନ୍ତ୍ର ବିମାନରେ ଆସିବା ପରେ ତାକୁ ଗିରଫ କରିଥିଲା ଏନଆଇଏ। ରାଣାର ତଦନ୍ତ ପ୍ରକ୍ରିୟାରେ ସାମିଲ ଅଛନ୍ତି ଏନଆଇଏର ୧୨ ସଦସ୍ୟ।